تحميل رواية «ساهر الفجر» PDF

مساء الشوق حبايب .. مشتاقتلكم كومااات 😚

//// البارت الأول ////

#ساهـر_الفجـر ..

#الكاتبـة_شمس ..

قصـة حقيقيـة /////// بقلـم الكاتبـة شمس ///////

قد تأخذنـا الحياة في آفاقهـا عبر دروب صعبـة طويلـة وشاقـة ...تحفها الأشواك وتحيط بها المتاعب من كل الجهات ...

نمشي بها أحيانـاً بإرادتنا ...وأحيانـاً مرغمين ..

ولكن نتيجـة تعبنا وصبرنا فيها لن تذهب سدى بالتأكيد

فالنور يشق قلب الظلمة ...

كما ينبت الزهر الجميل من الأشواك...

...في بعض الاحيان تتقرب الى انسان بدافع الشفقة والعطف ..

لكن سرعان ماتجد نفسك .. في حالة تعلق ورغبة اتجاه هذا الشخص ..

وتأخذك مشاعرك وعواطفك لدروب انت فـي غنـى عنها ..

.....رجعـت من الشغل تعبان .....

حارة وبشهر السابع والمفروض الواحد من يرجع البيته يحتاج الراحة والطمأنينة .

اني بيتنا مايخلو من المشاكل والعياط ..

ام ساهر .. هلا ييعد امك گواك الله ..

ساهر .. هلا يمة .. شبيكم صوتكم واصل للشارع .

ام ساهر .. شعدنا غير هاي المگموعة الفگر الي الله ذبهـا علينا ..

ساهر .. اووووه يمـة بعدج حاطتها ببالج خطيه هم يتيمة وهم صغيرة بعدهـي فهميها علميها بدل ماتحاربيها ..

ام ساهر .. هو شطلع عينها غيرك انت وجدتك. خبصتونـي طفلة وطفله .

نسيتوا هاي الطفلة كتلت اهلها وخلت عايله كاملـة جوة التراب .

والله اخاف يجي يوم تدفنا كلنا بليلة ظلمة ..

-ولج نعيمـة كافي حرام عليج .. البنية طفله وغلطت

عاد لاتضلين تعيدين وتصقلين .

كم مرة گلت سالفه فجر مااريد واحد يذكرها بهالبيت والي صار قضاء وقدر وهي مالها ذنب ..

-عمة ماتشوفيها فوگ وكاحتها گوة عينها . وماتسمع كلامي وتعاند .

-وج يامضروبه لو تعامليها صدگ مثل ماتعاملين بناتج جان سمعت كلامج واحترمتج .

مو تسمع كلام مرت حمزة وشتگللها تجاوبها بجلمة صار وتدللين عمة .

صيري مثلها وشوفي شلون تجاوبج .

تركت امي وجدتي يتعاركن وصعدت الغرفتـي . لگيت بنين اختي نازله .

بنين .. هلا خوية گواك الله .

گرصتها من خدها . هلا بنون . اخيج جوعان ومن ورى امي صعدت بلا غدا . صبيلي وصعديلي الغرفتـي .

بنين .. صار خوية تدلل .

اني صعدت مدنگ افتح بدگم الدشداشة من الحر . وكل ضني ماكو احد بالصالة الفوگ .

وتفاجأت من شفتها تمسح بالارضيه ورافعه دشداشتها وتدندن مدري تغني . ماانتبهت .

كل فكري بحسنها ..

وعيت على حالي .

احم احم ..

بسرعة طفرت من مكانها ..ونزلت دشداشتها .

-ها عمو شلونك .

-اوووف يكلمة عمو تزرف گلبي زرف ..

ساهر العن الشيطان ..( احجي بداخلي)

-انتي شتسوين هنا ؟؟

-عمتي نعيمة گالت نضفي الطابق الفوگ ..

-هااا . وكم مرة گتلج من تنضفين البسي بجامة لاتفترين هيج ماتگولين اكو ولد بالبيت . حاجيتها بعصبيه .

-اعتذر عمو .. هسا رايحة البس شي .

-وبسرعة كملي شغلج .. دور ماكو تنضيف الظهر .لان اريد انام تعبان ومااريد هوسة ..

-صار عمو راح انزل ..

دخلت الغرفتـي وطبگت الباب .. ااااه يساهر رجال طول بعرض والكل يحسبلك حساب تالي تضعف گدام هالطفله بس الي يشوفها مايگول طفله .

شايله جسم وحسن ماشايلته اكبر مرة حتى الاثر الي برجلها يخبل ..

بدلت وتمددت . اندگت الباب ..

وانفتحت طفرت من مكاني . هاي انتي ؟؟

مو گلت البنين تجيب الغدا .

-اي عمو مو عمتي صاحتلها وراحت . وهاي اني جبته الك ..

-يلة روحي وسدي الباب وراج ..

راحت للباب ورجعت ..

گالت عمو انتو ليش تكرهونـي ؟؟

ساهر بأستغراب .. منو الي يكرهج ..

-كلها تكرهني ويگلولي بومة لو فگر . بس جدتـي فخرية تحبني ومرات انت زين ومرات تعيط عليه ..

دنگت عيني لان استحيت من حالي ..

لا انتي غلطانه . كلها تحبج وتريد خاطرج . واذا ينصحوج مو معناها يكرهوج . بس مرات تتصرفين مثل الاطفال والناس تنتقدج ..

جا اني مو جبيرة بالعمر..

- مو عمرج 16 وربعج بالاعدادية معناها كبرتي ونضجتي ولازم تحسبين الخطواتج . وخاصة بهذا البيت اكو شباب ولازم تكونين ثگيله .

هزت راسها بس عيونها حزينة وطلعت من غير ماتحجي ..

بقيت عيني عليها .. ااااه يافجر ..

شليتـي حال ساهر .. شبسرعة كبرتي هيج وحليتي بالعيون . وشلون راح اضمج عن الناس ونضراتهم ..

اكلت شويه . وشلت الصينيه خليتها ع الطاوله .

ورجعت نمت ..

وبقيت اتذكر فجر بنت عمي محمد اول مااجت الهذا البيت جان عمرها تسع سنوات .

والكل يضرب بيها ويعيط عليها .

ومن شافتني سحبتها عنهم وحميتها . حضنتني وتعلقت بيه .

وتگلي عمو لاتخليهم يضربون اني ماسويت شي .

وديني لأهلي اريدهم ..

كانت تلوع وتبجي من الحرگ الي برجلها وهمة يزيدون وجعها بضربهم وعياطهم عليها ..

يوم عن يوم تكبر گدامي الى ان صارت مرة من غير مااحس انقلبت مشاعري من شفقة الى عشگ وشغف.

شفت تعلقها بيه واهتمامها بملابسي وغرفتي ..

وتعلقـي بيها زاد ودفاعي عنها يم اهلي والناس .

طلع حجي عليه هواي ..

وگمت اتجنبها واحاول ابعدها عني ..

حتى لايجيها حجي بسببي وهي ماقاصرة كلام من الناس وكرهم الها ..

بالظاهر گمت اعيط عليها ع اتفه سبب واحاول اخليها تكرهنـي ..

بس هي كانت بريئة اكثر من عدنا كلنا . وتتقرب الي بعفويه لان الوحيد الي وگف وياها بعد الحادث اني .

انـي ساهر مواليد 82 .. الحفيد الاول لعائلة آل سلطان ..من وحدة من المحافضات الوسطـى ..

عندي عمام اثنين وعمات اثنين ..

عمي حمزة متزوج وعايش ويانا ..

وعماتـي متزوجات ..

اما عمي محمد متوفي هو وعائلتة قبل سبع سنوات ..

وبس بنته فجر عايشه ويانا ..

عندي اخوات ثلاثة هاجر متزوجة الابن عمتي بتول .

واثنين بعدهن يدرسن بنين سادس وبراء بالاعدادية اكبر من فجر بسنة .. بس براء السانها متبري منها.

واخواني اثنين .. ماهر تخرج السنه امنيته يروح كلية ضباط ويحب بنت عمتي إبتهال ورايدها بس صعب ينولها.

اما عامر فهذا بلوة .. سوالفه تافهه وبالگوة وصل للجامعه ومسائي هم ومااعتقد يطلع منها بسهوله .

اني خريج جامعة بس عدنا محلات مال خياطة دشاديش رجالية واقمشة بالاضافة لمحل ازياء عربية مستوردة . اشتغل وي ابوي وعمامي بهاي الشغلة من عمري عشر سنين ..

ورثنا المحلات والصنعه من جدي سلطان الله يرحمة

تعودت عليها وصرت محترف بهالشغلة بعكس اخوتي

حالتنا المادية الحمد لله بخير ..

ابوي حب امي واخذها عناد بجدتي .. ومن ذاك اليوم جدتي وامي على خلاف ومايتراهمن .

ساعة تلگاهن حبايب وساعه يدخلن بحرب ..

لليوم ماعرفنا سالفتهن شني ..

بس من اجت فجر النا . زادت المشاكل . لان امي ماتحبها وتأذيها ..

وجدتي ماتسكت وتضوج اذا واحد يمسها وخاصه بعد ماتيتمت ..

جدتي كانت دايما توصيني ..

ساهر يمة خاف تغمض عيني مااوصيك غير بس بفجر تحافظ عليها وعلى حلالها ..

ولاتخلي احد يستغلها ويضحك عليها ..

بگلبي اگلها .. لاتوصين ساهر على فجرة . هاي بنت گلبي وربيتها على ايدي ومااخلي واحد يمسها ..

وقتت موبايلي ونمت ساعة . ورن المنبه .

طفرت من مكاني سبحت وبدلت ونزلت ..

واني انزل سمعت امي وابوي بالصاله يسولفون .

ام ساهر .. اگلك محمود معقوله ماتگدر تقنع ساهر . الي بگدة عندهم كم جاهل .

واني ابني لسا معاند ومايقبل . مااعرف شمنتظر .

ابو ساهر .. ماتشوفيه مايقبل زعطوط هو واجبرة . اذا جدته الي ربته عجزت تقنعه . تردين اني اقنعه .

نزلت اسد بأزرارات الردن واحجي .. ها ياام ساهر . شجاي تخططين من وراي ..

-يايمة شخطط غير اريد سعادتك واشوف عيالك حولي ..

ليش تحرمني من شوفتهم يمة ..

-بعدج صغيرة ياام ساهر . بالعجل تردين تصيرين جدة ويتركج ابوي ويروح الغيرج ..

-اسكت ولك لاتقشمرني وتاخذ بال ابوك الغير افكار . اعرف غايتك يسويهر مو عبالك غشيمة ..

گرصتها من خدها .. وخري عنج هالافكار يمة ترى الي تفكرين بي ماهو ببالي ..

رايح اشوف جدتي ..

دخلت الغرفة جدتي لگيتها گاعدة بمكانها وتسبح ..

والبنات نايمات يمها ..

غضيت نضري عنهن خاف مكشفات ..

شافتني وگالت .. ساهر جدة سمعت الحجي كله . صحيح امك ماتعجبني سوالفها بس هالمرة راي من رايها .

شوكت تفرحنا وتتزوج ..

ساهر .. هههههه جاانتن العمر كله مختلفات . مااتفقتن الا عليه ..

من رخصتج جدتي عندي شغل ..

بستها من راسها وطلعت ..

اخذتني عيني الفجر وشلون نايمة . نومها من صغرها مبعثر .

لهذا تلبس بجامة من تنام ..

گلت يله يابه تطلع اني رايح للمحل ..

ابو ساهر .. اي جايك . يله نعيمة وين صرتي . اجت امي جايبه موبايله وسبحته. رغم هذا كبرهم .

بس ابوي مايعرف يوصي واحد على حاجته الا امي .

طلعنا اني وابوي للمحل ..

اتصل بيه رعد صديقـي .. هلا خوي شلونك ..

منتضرك بالمحل تعال لهناك ..

ابو ساهر .. بويه ساهر . ماتقنع ماهر يشتغل وياك ويشيل فكرة كلية الضباط اني مامرتاحلها ..

ساهر .. يابه لاتضغط عليه . ماهر مو صغير ويعرف مصلحته . واذا هو حاب هالشي لاتجبرة .

ابو ساهر .. بويه مو بيدي الوضع جاي تشوفه شنو . ماكو امان والعسكري مهدور دمة من كل ناحية .

مااتحمل يصير عليكم شي .

ابوي ترك بغداد واجة هنا علمود يحافظ علينا وترك اهله وناسة .

شلون تردون اخلي واحد منكم يضيع مني ..

ساهر .. بوية ذاك وكت وهذا وكت . وجدي انهزم من ابوه لان طاغي ومايخاف ربه .

وخلص عمرة بالثارات والمشاكل ..

وماكفاه هالشي .. حكم على جدي وجبرة يطلگ جدتي وهي عندها اثنين جهال .

ولو اني بمكانة اسوي اكثر .. بس شغلة ماهر تختلف هذا مستقبله وحرام نفرض عليه راينا .

وجدي سلطان جان عادل وعلمنا كل واحد ياخذ قرارة بيدة ويتحمل مسؤوليته .

خليه يتحمل المسؤولية وياخذ قرارة ..

ابو ساهر .. الله كريم وليدي .. الي كاتبة الله يصير ..

وصلت ابوي المحلة ورت للمحل مالي . لگيت رعد منتضرني ..

حضنته .. هلا بالظلع شلونك .

رعد .. اني بخير بس انت ماكو هاي الايام . حتى طلعاتك ويانا مو مثل قبل .

والبارحة الولد سألوا عليك من طلعنا للصيد . گلتلهم مسافر .

ساهر .. ماجذبت . قبل يومين رجعت جبت بضاعة واجيت رعد.. لا صدگ . مو اگلك مختفي ومااعرف اخبارك .

المهم شلونك انت .

ساهر .. ااااه شلوني . بعد انت تعرف .

رعد .. ولك والله لو اعرف منو الي مخربطة احوالك هيج لأروح اني اخطبها بيدي الك ..

ساهر .. انسى بالها مو يمي ..

رعد .. ولك انت ساهر الي بأشارة تجيب البنات كلها الك تعصى عليك وحدة ..

ساهر .. هاي مو أي وحدة . تختلف .. اففف كافي ولك سد الموضوع .

محمد محمد تعال يبى جيبلنا اثنين جاي ..

محمد .. صار عمي ..

بقينا لليل نسولف اني ورعد مرات يجي يمي بأجازته لان هو عسكري .

رعد مثل اخوي واكثر . تربينا اني وياه سوية .. اسرارة واسراري سوية .

ومايظم واحد عن الثاني اي شي ..

الا فجر .. لليوم ماگتله عنها . يدري بيه احب وحدة بس مايعرفها منو .

رغم عشگي الها بس مااريد احد يعرف عنها شي . لان اعرفها تتأذة بسبب حبي وخاصه مشاعرها طايشة ومو يمي ..

ولسا تصيحلي عمو ..!!

رجعت للبيت شفت مادين السفرة وجاي يحظرون بالعشا

ساهر .. السلام عليكم .

الكل .. وعليكم السلام ..

-هلا جدة تعال يمـي هين( وتأشر بصفها )..

ماهر .. هاااا سلطانة فخرية . مو صارلي ساعة گاعد شو ماگلتي تعال هين يمي لو بس حبيب الگلب ساهر

-اسكت لااگصو للسانك .. تربات امك علمتك تنادي جدتك بأسمها ..

ماهر .. الله اشتاقينا الهاي اللهجة نسيتي اصلج سلطانة فخرية ..

ساهر .. لا مانست بس الي يعاشر المحبوب ياخذ صفاته وجدتي تعودت على لهجة جدي وصفاته .

-حتى انت يساهر تتمسخر عليه خلف الله عليك ..

گرصتها من خدها وحضنتها .. ماعاش الي يتمسخر عليج انتي سلطانتنا .. بس كلامي صحيح لاتنكرين ..

-لايمة مانسيت ولاانسى بس هي بحكم التعويد من اني شابة تركت الانبار واهلي ورحت وي جدكم البغداد وبعدهي اجينه الهين وتعود الساني ع لهجتو ..

اااااه ليش تذكروني . وعيونها تدمع ..

غمزت الماهر يسد الموضوع .. لان من احنه صغار وهي بس تتذكر الانبار واهلها تدمع عيونها وتضوج ..

اختارت گلبها وتركت اهلها . وماشافتهم الا لمن توفى جدي واجو للفاتحة واخذوا من خاطرها ورجعت العلاقة وتالي خربوا بعد وفاة بيت عمي محمد ..

صاحت جدتي .. يلة ولجن وين عشاجن صار ساعة من مادات السفرة ..

صعدت بدلت وغسلت .. نزلت لگيتهم بادين بالعشا .

گعدت يم جدتي وصارت گبالي فجر ..

تاكل شوية شوية وتسولف وي بنين وتضحك ..

تاخذ روحي بضحكتها ..

انتبهت على امي تخوزر علية .. درت وجهي بسرعة .

وگمت احجي وي ابوي ع الشغل ..

كملنا عشا ..

صاحت بيبيتي .

جيبن الجاي للربعة .. وانتو گوموا وياي عندي سالفه وياكم ..

استغربنا من كلامها ..

راحوا عمي حمزة وابوي للربعة . وهي اتكت ع ايدي ورحنا وراهم ..

نعيمة .. عمة اجي اني هم ..

التفت عليها .. وشعندج حاشرة خشمج بالوسط اني وولدي انتي شكو ..

دخلنا گالت سدو للباب زين يمة ساهر .. امك ماتتأمن دقايق وتلگيها بوسطنا بحجة تردون شي. تموت اذا ماتعرف السالفة شنو ..

ضحك ابوي وعمي على سوالفها ..

اندگت الباب گمت فتحتها لگيت براء جايبة الصينيه وتريد تدخل .. عرفت امي دازتها ..

اخذتها منها وخزرتها . طلعت .

سديت الباب ومنتضرين جدتي تحجي الي عندها .

#بقلمـي_الكاتبة_شمس

يتبع...

..........................................

هلا وغلا حبايب ..

اسفة ع التأخير . بس صارت عدنا حالة وفاة .

اعتذر من اصحاب القصة لان طولت عليهم .

وكنت مقررة بعد العاشر يلة انزل اول بارت.

بس لان البارت الاول كاتبتة من زمان فنشرته لعيونكم حتى تاخذون فكرة عن القصة .

شنو رأيكم بأول بارت ؟؟

صباح الورد لعيون كل متابعيني الغوااالي ..

//// البارت الثاني ////

#ساهـر_الفجـر ..

#الكاتبـة_شمس ..

ها جدة گولي .. مو خالية جمعتج النا ..

-شبيكم تدحكون بيه هيج .. انطوني صبر ..

ابو ساهر .. اسكت يساهر وخلي نسمع من جدتك ..

-يمة الاعمار بيد الله . واني ماضامنة روحي ..

الكل .. اسم الله عليج طولت العمر ان شاء الله.

-خلوني اكمل .. اذا متت راح اموت مامرتاحة وهاي البنية مااعرف مصيرها شني ..

حمزة .. شتقصدين يمة .

-اقصد فجر . الي ناسيها ومامعتبريها وريثة وياكم .

ساهر .. ليش جدة حق فجر محفوظ ..

-يامحفوظ يمة وهي من يوم المات ابوها ماشفنا انطيتوها شي . لو ساهر ينطيها من عندة لو اني ..

ابو ساهر .. يمة حقيش تحجين عليه . انتي ناسية هذا تعبني اني وساهر وحمزة .

احنه الي كبرنا المحلات وطورناهن . محمد من هو صغير مايوم وگف ويانا.  بحجة يدرس وصار استاذ بتعبنا وحتى من تزوج ماگعد ويانا واجر بيت وگعد وحدة هو مرتة .

وفوگ هذا كله بنته حرگت البيت وصاحب البيت غرمنا وخلانا نرممة ..

ساهر .. يابة شنو هذا الحجي ..

-اتركة جدة اتركة خلي يطلع الغل الي بگلبة . من يومة حاقد على اخوه الصغير ..

تالي راح عمة عيني وماتمهل بشي ..

ابو ساهر .. يمة شنهي هذا الحجي . شنو حاقد عليه الله يرحمة هو الي باعد روحة عنه وماقبل يشتغل ويانا وراح كمل دراسته وصار استاذ وحب بت خالي رغم ابوي وعداوتهم وياه واخذها وابوي ماحجة ولاگال . وفوگ كل هذا لح على ابوي واخذ ابتهال الهم وتالي ماغزر بيهم ومنعوها عن اهلها ..

-ولك لاتگوم تخلط بالحجي . احنه سالفتنا فجر وحلال ابوها . شجاب خوالك والي سووه بينا هسا ..

حمزة .. يمة محمود كلامة صحيح . خوالي من يوم ماتت أزاد وهمة محاربينا من غير عداوتهم الابوي بسبب عمايل جدي ..

-كافي ولكم ذولي اهلي مهما يكون واذا حاربوني بأبتهال وبعدوها عني مثل مابنتهم راحت .

فيجي يوم وترجعلي وهي بين فترة وفترة تخابرني وتسأل عليه من غير مايدرون ..

لاتدخلونا بسوالف مالها اول من تالي .

خلوني بسالفة فجر ..

ابو ساهر .. وشبيها فجر عايشة وماكله وشاربه وتدرس بعد شنهو تريد .

ساهر .. يابة فجر بنت عمي ومن لحمنا والي يسرى علينا يسري عليها .

ابو ساهر . يعني شتقصد يساهر تريدني اشيللها حلالي وتعبي وانطيه البنت ازاد الي جانت تستنكف منا وتباوعلنا بتكبر . اكيد يجي يوم وتطلع مثل امها وتنكر الجميل وتاخذ الاول والتالي منا ..

ساهر .. بوية فجر ترباتنا وماتسويها . ماتشوفها فقيرة ويتيمة . واذا انتو ماتنطوها حقها . اني انطيها من محلاتي ..

ابو ساهر .. ساهر لاتخليني اندم سويتلك وكاله . وحق الحق اسحب كلشي منك اذا سويتها..

ساهر .. يابة المحلات تعبي مثل ماهو تعبك واني احجي على حصتي . لاتظل كل شوية تعايرني ..

من رخصتج جدة تعبان واريد ارتاح ..

ابو ساهر .. لاتخلونا نتعارك بسبب فجر. اذا خايفين عليها نعقدلها على عامر ونفضها وهيج ماتروح للغريب .

رجعت وعيني احس ماتشوف من الغضب ..

شگلت يابة . شنو عامر السافل هذا انطيه فجر . والله لو يموت مايطولها .

باعوا كلكم . فجر محد يتقربلها وهاي گدام جدتي . فجر تبقى هنا وتدرس وتتخرج ومالكم شغل بيها والي يگول ازوجها لفلان لو علان اني اوگف بوجها ..

-عفية جدة عفية ماضاع تعبي بيك . لو تبقى ع ابوك وامك يخلصون منها بليلة ظلمة.

عجل مالگيت الا عامر المهتلف تنطيه فجر يمحمود. لو ولدك المتخرجين واصحاب الشهايد تشوفهم مالايگين الها ..

محمود .. همة منو ساهر جبير عليها وبنت خالته اله.  وماهر عندة وحدة رايدها ..

ساهر .. هههههه هاي شنو يابة طلعت خاطب وماادري . ليش اني گايلكم اريد اتزوج حتى تخطبون الي بكيفكم .

انسوا سالفه العرس وسالفه بنت خالتي هم .

طلعت ورجعت . ها وعود گول الامي الي ببالها مايصير وزواج مااتزوج .اترخص اني .

طلعت من يمهم واحس نار وشابة بيه ..

سحب جگارة من الباكيت ورحت للحديقه  .. اشعل بالجداحة ماتشتعل .

دخلت للمطبخ اورثها من الطباخ ..

شفت فجري تنضف بالمطبخ ..

فجر .. ها عمو بيك شي . سمعت صوتك عالي . اسويلك جاي ..

ساهر .. كااافي ولج ..

فجر .. ها شسويت ..

اتقربت الها بحرگة .. بعد لاتگولين عمو . انتي كبرتي اني ابن عمج مو عمج افتهمتي ..

حسيتها

خافت وتهز براسها .. اخذت نفس ولعنت الشيطان وطلعت . سويلي جاي وياج . گلتلها .

بقيت گاعد بالحديقه . وصافن .

تذكرت اول مااجت فجر النا شلون خايفة وتبجي . ورجلها محروگة ..

اااااه شلون يوم اغبر كان ..

كان وكت ظهر وسمعنا الناس اجت تتراكض علينا ..

تكسرت الباب واني توني اجيت من الشغل..

طلعنا اني وابوي وعمي ..

شفنا ولد .. عمي ابو ساهر الحگ بيت اخوك محمد احترك ..

بلا وعي تراكضنا وبملابسنا مال البيت . بيت عمي بالشارع الي ورانا كان مأجر وحدة هو مرت عمي اسمها ازاد هي من الغربية .

تصير بنت خال ابوي . يعني بنت اخوها الجدتي ..

اخذها عمي محمد غصب عن ابوي ..

لان كانت اكو خلاف بين جدي واهل جدتي ..

بس لان جدي سلطان يحب محمد كلش ماراد يكسر بخاطرة وزواجه من عمتي ازاد رجع العلاقة بين العائلتين وطورت وخطبوا عمتي ابتهال الاخو ازاد ..

وعاشت هناك بالغربية ..

بس بعد الحادث رجع الخلاف وتهمونا بموت ازاد وخال فجر . خير عمتي بينا وبينه . وهي اختارت زوجها واولادها وتركتنا من يوم الحادث ..

#بقلمي_الكاتبة_شمس

………………………………………..

الكل يتهم فجر بموتت اهلها .

بس هي كانت بريئة ومالها ذنب ..

طفلة وتصرفت بلاوعي وصار الي صار ..

شعلت النار تريد تگلي بيضه .. رفعت الطاوه بثوب مااعرف شنو واحتركت القماشة الي شايله بيها الطاوة شمرتها ووگعت ع الطاوة على رجلها وانجوت بالدهن طلعت تركض تبجي وماتدري هي شامرتها ع القنينة من خوفها وماعت صوندة الطباخ وطگ البيت كله واهلها نايمين ..

طلعوهم عايشين بس حروقهم بليغة .. اخوها الصغير بسرعة توفى لان طفل ..

وعمتي ازاد بقت يومين وتسممت وتوفت . بس عمي بقى اسبوع تقريبا يله توفى ..

كانت فاجعه كبيرة بالنسبه النا كلنا . ومن ذاك اليوم الكل يأذيها ويتهمها . وهي حالها من حالهم بالمستشفى ورجلها كلها مسلوخة وتبجي تريد اهلها .

لو امها يمها تراعيها ..

فزيت على صوت فجر .. عمو هذا الجاي عمو ..

رفعت عيني بعينها واعاين عليها ..

نفس ملامحها مااتغيرت هي ذيج الطفله الي اجتنا قبل سبع سنوات ..

بيدي هاي كنت انضف جرحها واعقم رجليها . لان الكل ملتهي بالفاتحة والمشاكل الي صارت ..

حتى جدتي كانت مريضه بسبب وفاة عمي وبنت اخوها وحفيدها هم .

ثلاثة اشخاص راحوا من عدها بأسبوع مو هينة طبعا ..

گلتلها فجر .. اني شنو بالنسبة الج ..

فجر .. اممممم مااعرف بس احسك احسن واحد بيهم انت وجدتي وبنين هم حبابه ..

ساهر .. اني منو ؟؟

فجر .. انت وسكتت ..

ساهر .. احجي ..

فجر .. ابن عمي ..

ساهر .. خلص بعد مااريد كلمة عمو . فاهمة . گليلي ساهر وبس .

هزت راسها وضحكت وراحت ..

اخوط بالاستكان ومبتسم واباوع عليها الى ان دخلت للمطبخ . بلحظتها طلعت امي .

بسرعة اخفيت الابتسامة من وجهي ..

نعيمة .. ساهر شنو گايل الابوك ..

ساهر .. الي سمعتيه ..

نعيمة .. يمة انت تريد تموتني . ليش تعاند وماتقبل تفرحني ..

ساهر .. لويش اعاند يمة . اني مااريد اتزوج هسا واذا فكرت اتزوج اختار بمزاجي والي تعجبني ..

نعيمة .. وشبيها بنت خالتك معلمة ومثقفه وحلوة احسن من زعاطيط هالوكت ماينحزرن ..

رفعت عيوني عليها .. لاتلمحين يمة الي عندج گوليه .

نعيمة .. لو تبقى بس بنت ازاد ماتصير مرة الواحد من ولدي . عيب عليك تصيحلك عمو وانت عيونك وراها وين متروح عبالك ماحاسة عليك .

ساهر .. احم . شنو هالحجي يمة مااسمحلج تخلين هيج افكار براس احد . وگتلج ماكو شي تلحين البنيه يتيمة اتركيها بحالها ..

نعيمة .. اذا تريد اصدگك وافق على ايات . حلوه ومناقصها شي .

ساهر .. يمة گومي رحمة الاهلج لاتخليني اهج بهذا الليل . گتلج زواج مااتزوج سدي الموضوع كااافي ..

تركتها ودخلت للبيت .

بسرعة صعدت للغرفة ..

نزعت الگلبية وتمددت ع الفراش ..

اجة ماهر ..

ها ساهر نايم ..

تعال ماهر ادخل .

شغل الضوة ودخل .

ماهر .. اگلك ساهر ماتحجي وي ابوي بلكي يوافق اقدم بكلية الضباط ..

ساهر .. اليوم فتح الموضوع وحاجيته واقتنع شوية . انتظر فترة ونرجع نحجي وياه . لان هسا تعاركنا ومااگدر احجي وياه بموضوعك لا ينفر ومايقبل ..

ماهر .. خير شكو ..

ساهر .. شكو غير الزواج ماعندة سالفه هو وامي غيره ماهر .. وشمنتظر ماتتزوج الي بگدك عندهم كم طفل .

ساهر .. منتظر ازوجك يله اتزوج!!  ..

ماهر .. اي والله علواه . هيج وتقنع ابوي بـ لينا ويقبل تكسب ثواب بيه ..

ساهر .. گوم ولك خلفتك ونسيتك . تدري متعارك وي عمتي ابتهال ورجلها .. تروح تحب بنتهم شكو ..

ماهر .. جا هو بكيفي غير گلبي السحلني هيج سحله . حقك مامجرب الحب شنو ..

ساهر .. ااااه ..

ماهر .. شكو هاي الحسرة لازم اكو وحدة .

ساهر .. ها . لاماكو منين. قابل اني مثل گاضيها فرة وحب . شو ليل ونهار بالمحل .

صدگ شلون تلتقي بلينا بعد ماتخرجتوا .

ماهر .. وين نلتقي باقين ع الموبايل وبالبوگات خاف واحد يراسلها ..

ساهر .. المهم متواصلين بعد شتريد .. دگوم تعبان اريد انام يلة روح عني ..

دفرته وطلعته ..

بعدني بس غفيت اجة عامر .. اگلك ساهر اريد اطلب منك شي ..

ساهر .. خير ياطير . ابقى للصبح اليوم من وراكم خلصني شتريد ..

عامر .. حاجي ابوي اريد اروح الاربيل وي جماعتي ومايقبل ..

ساهر .. واني شنو المستشار مال ابوكم . كلساع وجاي واحد الي .

عامر .. غير انت اخونا العود وبمثابة ابونا ..

ساهر .. بطل لواگة هو انتو تعرفون عود .. لو بس وكت مصلحتكم ..

عامر .. هسا شگلت تگله لو لا ..

اندگت الباب اجت فجر ..

تفاجأت بيها .. ها فجر شرايدة .

فجر .. جدتي تريدك .

عامر .. صدگ فجر تعاي رايدج بشغلة ..

فار دمي ..

شتريد منها ؟

خزرت فجر .. نزلي جوه يله هسا جاي .

باوعت العامر .. شتريد منها ..

عامر .. شبيك عندي ملابس هواي وسخة اريد انطيهيا تغسلهن ..

ساهر .. وانت ماعندك اخوات يغسللك الا فجر ..

عامر .. ليش فجر غريبه . مو ترتب ملابسك وتنضف غرفتك وحد احنا ..

ساهر .. قبضت على ايدي . من وحدها تسوي اني ماطالب منها وبعدين نبهت عليها بعد ماتسويهن ولاتدخل غرفة واحد بينا ..

ملابسنا ممنوع فجر تغسلهن فاهم .. عندي بنين لو براء گلهن ..

عامر .. ياكلمة ردي المكانج طالع اني ..

نزلت واني محترگ دمي من وراها. شوكت تكبر هاي وارتاح ابقى اراقبها ليل ونهار .

عامر اخوي واعرفة مو راحة . وهي ثولة وتتقشمر بسرعة ..

#بقلمي_الكاتبة_شمس

………………………………………… .

لگيتها يم الدرج . سحبتها وصفطتها ع الدرج ..

باعي فجر . ممنوع بعد تصعدين فوگ واي شي يوصيج عليه عامر ارفضي . طلعي حجة بأي شي .

وملابسنا بعد ممنوع تغسليهن فاهمة ..

حسيت نفسي اذيتها واني ضاغط على اديها .. هديتها

واشرتلها تروح ..

اخذت نفس قوي وزفرت ..

طلعت امي بوجهي تخوزر ..

تركتها ومااهتميت . رحت الغرفة جدتي ..

ها جدة گالوا ترديني ..

-اي جدة تعال هين يمي .

گعدت يمها ..

شوف سوهير انت الوحيد الي اگدر اعتمد عليه وأمن بي شفت ابوك شلون يحجي .

وعمك يمشي بحجاية اخوه .

فجر امانة عندك واريدك باجر من غير مااحد يدري تاخذني اتنازل بحصتي الها لان اعرف بعدي ماتحصل شي وياكلو حقها ابوك وعمك ..

ساهر .. افة عليج جدة واني وين رحت . مادام راسي يشم الهوا . فجر ماتحتاز احد ..

-يمة هذا وكت مانعرف شيصير باجر . انت هم تتزوج وتصير عندك عايلة وتلتهي بيهم .

وتبقى هالمسكينة مالها احد ..

اتنهدت وردت احجي واگول جدة فجر الي وماتصير الغيري لاتخافين عليها ..

طمنت جدتي وصعدت نمت .. والاصح خلصتها اتگلب وماعرفت النوم شني ..

مر كم يوم واحس فجر تتهرب مني ومو مثل قبل تتلگاني وتسلم ..

ومن نگعد ناكل احس عيونها تبعدهن عني ..

ردت فرصة اعرف شبيها مالگيت ..

استغليت اهلي ناموا وهي تنضف المطبخ . ركضت الها مثل التايه والمضيع شي ..

صار كم يوم مضيع عيونها ونضراتها الي ..

شبيج فجر صاير شي ..

-لا عمو ماكو شي ..

-اشتعلوا ال سلطان كلهم .. كم مرة اگلج بطلي كلمة عمو .

-مو بيدي تعويد . حباب عمو روح منا لاتشوفنا عمة نعيمة وترزل بيه ..

-ليش ترزل بيج ..

-ماكو شي هيج وحدي احجي ..

اتقربت مني وتهمس واحس نفسها وي نفسي اختلط وضاعت علومي بحجيها وريحتها ..

-اترجاك عمو لاتسولف وياي بعد . ماتقبل عمتي وگالت ادزج الخوالج واني مااريد اروحلهم خاف يكتلوني لان امي ماتت .

ساهر .. وليش يكتلوج ..

فجر .. عبالك اني ماادري . صحيح كنت طفله ومااتذكر بس عمتي نعيمة سولفتلي كلشي وبراء هم ..

اني الي موتت اهلي مو ؟؟ ونزلت دموعها ..

ساهر .. لا مو انتي ..

تعاي وياي . سحبتها واخذتها بوسط الصالة وصحت ..

يمة يمة وينج اطلعي ..

طلع امي وابوي وكل البيت على صوتي وحتى جدتي طلعت تتكا ع عصتها ومستغربة ..

ام ساهر .. ها يمة خير شرايد وعينها على ايدي الي لازم فجر بيها ..

#بقلمي_الكاتبة_شمس

يتبع…… .

…………………………………… ..

هلو حبايب ..

البارتات الجاية راح ابدي بيها بعد عشرة محرم .

مساء الخيرات .. لأروع متابعيـين 💕

//// البارت الثالـث ////

#ساهـر_الفجـر ..

#الكاتبـة_شمس ..

& أحيانـا تكـون احلامنـا .. أوسـع من أن يحتويهـا واقعنـا ..

طلع امي وابوي وكل البيت على صوتي وحتى جدتي طلعت تتكا ع عصتها ومستغربة ..

ام ساهر .. ها يمة خير شرايد وعينها على ايدي الي لازم فجر بيها ..

ساهر .. ليش هو اكو خير بهذا البيت ..

جدتي .. شكو يساهر طفرت العالم من نومتها ..

ساهر .. يمة انتي شگايلة الفجر ..

نعيمة .. يايمة شگايله . وعينها على فجر ..

لابيض الله وجهج . شلفقتي عليه للولد وخليتي شايط هيج ..

ساهر .. يمة اني جاي احجي وياج . معليج بفجر .

بيت عمي ماتوا بحادث وفجر مالها دخل . هذا قضاء وقدر الي اسمعه يگول غير هذا الحجي حسابة وياي ..

جدتي .. ولج نعيمة ماتجوزين من سوالفج .. اني مو ناهيتكم كم مرة ..

فجر .. جدة صدگ اني الي قتلت اهلي وماتوا بسببي .

تعاي جدة تعاي .. اني راح اسولفلج كلشي . واسمعي مني ومالج شغل بحجي غيري ..

دخلت هي وجدتي وابوي هز اديه ورجع الغرفته وامي ماخلت عينها بعيني تدري بروحها مذنبة ..

حمزة .. كااافي گولوا واحد وياكم بهالبيت ليل ونهار تتكاونون ..

مريم .. يله مصار شي خلينا نروح .. وتهز براسها الي معناها لاتنقهر ..

( مريم مرت عمي حمزة . بس انسانه طيبه وفقيرة بمعنى الكلمة وماعدها خبث . رغم هي اصغر من عمي بهواي بس تحبة كلش . وهذا الي مصبرني ومخليني اثق انه بيوم راح تحبني فجر مثل ماتحب مريم عمي حمزة )

رحت الغرفتي واني مامرتاح ..

نزلت على اطراف اصابعي . تقربت من باب جدتي . واسمعها تسولف وي فجر ..

-جدة خليج قوية لاتضعفين . ولاتسكتين عن حقج . الي صار الاهلج قضاء وقدر وانتي مالج ذنب بي .

كلمن يموت بحد يومة ..

فجر .. جدة ليش اني مااتذكر الي صار رغم عمري مو كلش صغيرة يعني واعيه ..

جدة .. يمة من جابوج لهنا تبجين وتونين من وجع رجلج وبعدها دخلتي بصدمة وعزلتي نفسج عن الناس كلها . حتى المدرسة بطلناج منها .

لان حالتج صعبه وحرنا بيج من مكان المكان . لاطبيب خلينا ولاسادة .

فجر .. اي صحيح گالي ساهر اني اتأخرت عن المدرسه سنة ..

بس ليش من اسألكم تضمون عليه وماتسولفولي .

-ماردنا نذكرج بأهلج وخفنا عليج تتمرضين مرة ثانية من هيج نبهت عليهم مايگلولج ..

لاتاخذين بحجي نعيمة هاي كبرت وخرفت معليج منها .

براء .. يا جدة خلف الله عليج . عاد گولي هاي امنا .

-انلصمي ولج ونامي مو اذانج يمي شأحجي . مو هاي اختج ساكته . لو انتي السانج مثل امج يرادلو گص .

براء .. ياكلمة ردي المكانج . نايمة جدة نايمة ولاعبالك سمعت شي . استمري انتي وحبيبة الگلب بالحش ع امي

-وج فجر ماتگومين تنطيني عصتي خلي اكسرها ع راسها .

-ارتاحيت من سمعت كلامهن وضحكت فجر على حجي جدتي وبراء ..

رجعت الغرفتي ونمت ..

.............................. .

گعدت الصبح لگيت الكل يتريك . عادتنا الوحيده الي محافظين عليها هي الاكل سوية .

ماعدا براء هاي لو يشلعوها شلع من الفراش ماتگوم ..

ام ساهر .. يلة يمة تعال تريگ ..

باوعتلها بزعل .. مااشتهي .

بنين صبيلي بس جاي .

گعدت ع القنفه واشرب بالجاي ..

جدتي .. ياجدة مايصير هيج تطلع على لحم بطنك . هاي راح اسويلك لفه اكلها وي الجاي ..

هاج يمة غجر اخذيها الاخوج خلي ياكلها ..

احس كلمة اخوج خنجر بصدري . مو كافي كلمة عمو الي مخبلتني ..

اجت شايله لفة بيدها وتبتسملي .. بقت عيوني على اديها اخذتها منها واتعمدت اتلمس اصابعها ..

بس هي مابدت اي ردة فعل .

وتصرفت عادي ورجعت المكانها ..

گمت اكل وعيني عليها .. صحيح هي مواليد 98 بس الي يشوفها يگول اكبر . عبالك بنت العشرين .

ضحكتها وسوالفها ترد الروح ..

صحيت على صوت جدتي وهي تصيح بأسمي ..

ولك يمة شمالك صار ساعة احجي وياك ..

ساهر .. ها جدة گولي اعذريني بالي يم الشغل .

جدتي .. يمة ماتشوف خبر لو طارش العمتك . ابوك وصيتة ومعاند مايقبل . وتدري بالاوضاع هناك الصارت وهذا داعش مايرحم واخاف عمتك يصير عليهم شي .

ساهر .. هي مو تخابرج ؟؟..

جدتي .. اي يمة تخابر بس صارلها فترة مگطوع خبرها وتلفونها مغلق ومااعرف رقم واحد من ولدها ..

باوعت الماهر .. هز راسة بمعنى مابيهم شي . لان هو عندة اتصال بـ لينا..

ساهر .. لاتخافين جدة ماكو شي ان شاء الله. اني اشوف خبر عنهم واگلج ..

محمود .. يمة اني كم مرة گلت سدي الموضوع هي باعتنا واختارت عمار واهلها خليها تستاهل ..

جدتي .. ولك شنو باعتنا . المرة تباعت رجلها . مو اني عفت ديرتي واهلي ورحت وي ابوك . ودور عاف اهله واجيت وياه هنا. شو ماگلتوا باعت اهلها .

وبعدين هي عندها ولد منه تعوفهم وتجي .

نعيمة .. ياعمة نسيتي شسوه رجلها من ماتت ازاد شلون گلب الدنيا وفضحنا وجرجرنا للمراكز . وگال انتو كتلتوها ..

الجدة .. خايبة ماتسكتين وتسدين حلگج . دومج ماتحجين بس العايبات . بدال ماتهدين النفوس وتدخلين بالرحمن .

ادري بيج تكرهين ازاد واهلها من زمان ..

محمود .. يمة شني هذا الحجي ..

نعيمة .. خليها . خليها . خلصت عمرها ترزل بيه گدام جهالي وگدام اليسوة والمايسوة ..

الجدة .. وج لو تسدين حلگج جان محد رزلج . مو هاي مريم وياج شو ماتحشر خشمها بسوالفنا . ليش بس انتي

محمود .. يمة كافي . وسالفه ابتهال انسيها لااروح ولااسأل عليها خلص سدوا السالفه .

وانت ساهر يله كملت وصلني بطريقك للمحل ..

ساهر .. يابة اني اريد اروح للبصرة الشحنة توصل اليوم ولازم استلمها ..

خلي واحد من الولد يوصلك ..

#بقلمي_الكاتبة_شمس

................................. ..

صعدت بدلت ونزلت ..

صاحتني جدتي ..

ساهر يمة مااوصيك انت . ابوك هذا من يومة عايب ونعيمه تمشيه . طمني على عمتك وشوف الاوضاع يمهم

ساهر .. صار جدة . وبست راسها وطلعت .

شفت البنات بالمطبخ ..

بنين .. ها خوية رايح .

ساهر .. اي بنون تردون شي اجيبلكم وياي ..

بنين . لاخوية سلامتك تروح وترجع بالسلامة .

باوعت الفجر . وانتي فجر تردين شي .

فجر .. لا ع ... وقطعتها . سلامتك .

ابتسمتلها . فرحت من مانطقت كلمة عمو .

براء .. شنو صايرة ناس وناس .. فد يوم اسألني حالي حال غيري ..

ساهر .. خزرتها . گولي ام اللسان محتاجة شي ..

براء .. لا خوية سلامتك بس ردت احس بطعم السؤوال هههههه .

ساهر .. ماتتغيرين ابد . يله اني رايح ..

طلعت من البيت وخابرت ماهر ..

الو ماهر هم خابرت لينا . شنو اخبارهم .

ماهر .. اي حجيت وياها . الوضع مو زين ويمكن يرحون البغداد .

ساهر .. جيب رقم عمي عمار من لينا ..

ماهر .. شتسوي بي ..

ساهر .. جدتي ماتطمن اذا ماتخابرهم . جيبه وخلي تخابر وتطمأن على عمتي ..

ماهر .. مو تدري عمي عمار مايحجي وياهم .

ساهر .. اي بس جدتي تصير عمته واكيد مايردها اذا حجت وياه . يله بسرعة دزه الي انتظرك .

رحت للبصرة كملت الشحن بس اضطريت ابات هناك ..

دز ماهر الرقم .

خابرت جدتي وگلتلها الوضع موزين . وحصلت رقم عمي عمار . خابري واسألي على عمتي ..

اجرت بفندق واول مادخلت نمت من التعب ..

ثاني يوم رجعت ورحت للمحلات حتى نرتب البضاعة وندخلها للمخزن ..

واجة رعد وياي وماهر وعامر يساعدونا ..

اختاريت كم دشداشة منهن . لان اني واهسي بالزي العربي ومااحب البس غيرة ..

اهديت الرعد وحدة لان دوم يساعدني بالمحل وكت اجازته . بس اخواني مايحبون يلبسون هيج ..

انشغلنا بالمحل ودخلنا البضاعة للمخزن .لان اقمشة وگلبيات ودشاديش هواي اشترينا.

ماهر .. ساهر ابوي خابر يگول هسا تجي للبيت عندة شغل وياك .

اشرتله شكو ..

غمزلي . بمعنى اسكت لان رعد موجود والولد الي يشتغلون ويانا ..

كملت شغل ..

ورجعت للبيت المغرب .

البيت هوسة ومگلوب .

شافني ابوي گام يحجي .. انت ليش ماترد على جهازك مو حركت الموبايل عليك ..

ساهر .. ملتهي بالمحل خير شصاير ؟؟

محمود .. انت شلون تجيب رقم عمار وتنطيه الجدتك تححي وياه . تالي عمرنا تنزلون كرامتنا وتذلونا انت وجدتك .

ساهر .. يابة جدتي گلبها نار على عمتي واترجتني وماردت اكسر بيها . وبعدين انتو ليش ماتنسون الماضي صار سبع سنوات ماكفاكم زعل ..

درت وجهي وردت اصعد ..

سمعت ابوي يگول .. وهاي راح تجيبهم هنا ببيت ابوي ارتاح يساهر ..

التفتت .. وين يجون ..

جدتي .. يمة مالك شغل بأبوك . گلتلهم يجون عدنا فترة بين مانلگالهم بيت .

خو مااترك بنتي تموت واتفرج ..

فجر .. يعني واخيرا راح التقي بخالي وولده اشتاقيتلهم ..

كانت فرحانة بجيتهم .. وهي تتذكر لينا وكيان ومراد وسما ..

حسيت بالغيرة وهمة بعدهم مااجو ..

ضجت وصعدت الغرفتي ..

فتحت موبايلي . اتصفحت بالفيس شويه .

دخلت امي ..

ساهر .. ها ياام ساهر ماتصعدين لهنا الا اذا عندج حجي .

ام ساهر .. يمة انت ذوله ماتعرفهم حية من جوة تبن . احنة ماصدگنه خلصنا منهم . وهسا راح ترجع العلاقة بيهم ..

ساهر .. يمة ياعلاقة شبيج . واصلا عمي عمار مايجي بس عمتي والولد .

ام ساهر .. عساه لايجي لسا اتذكر شلون اجرجر ابوك وعمك للسجن بس كله من محمد هو الي كتل روحة على ازاد المغروره واخذها ..

ساهر .. يمة اني تعبان ومالي خلگ .

ام ساهر .. نام نام وارتاح بس بعدين تظل تعظ اصابعك ندم ..

ساهر .. يمة صدگ اريد اسأالج . انتي ليش تكرهين عمتي ازاد وابوي ليش هيج حاقد عليهم ..

ام ساهر .. هااااا ماكو شي شعندي وياها بس انت صغير وماواعي ع الي سووه بينا .

ساهر .. ترى عمري 24 سنة من صار الحادث . يعني مو صغير ..

ام ساهر .. اني مااخذ منك لا حق ولاباطل اروح انزل احسن الي ..

طلعت ورجعت ماتنزل تتعشا ؟؟

-مااشتهي اريد ارتاح ..

اتصل رعد .. ها اخوي تطلع .

ساهر .. وين ؟؟

رعد .. وي الولد نطلع .

ساهر .. اذا اگلك تعبان تعذرني ؟؟..

رعد .. تعودت عليك خويه العشگ مغيرك علينا ..

ساهر .. ولك ياعشگ ماتگلي . تعبت ومو حاسه بيه .

رعد .. اذا انت ساكت . حاول تصارحها شوف انت شنو تعنيلها ..

ترى وحدتهن من تگلها اني احبج يلة تحبك ..

ساهر .. ولك هو اني مال هيج . اخاف تصدني وتخليني اندم . خليني هيج احسن اباوعلها من بعيد احسن مما تنفر مني ..

رعد .. الي تشوفه انت بس نصيحة لاتبقى ساكت .

ساهر .. الله كريم ..

بقيت افكر بكلام رعد ..

نزلت بسرعة . شفت بيت خالتي هنا .

وعمتي بتول .

تلگتني هاجر .. هلا خوية شلونك .

ساهر .. هلا يبعد اخوج . ليش ماگلتولي اجت عمتي بتول .

نعيمة .. وهاي خالتك هنا هم اجت .

ساهر .. هلا بيها .

اتقربت سلمت على عمتي وخالتي ..

شفت ايات بنت خالتي تقربت .. شلونك ساهر .

ساهر .. هلا خوية شلونج .

ايات .. زينة . ادري بيها ماعجبتها كلمة خوية . لان امي معشمتها والبنية تباوعلي بنضرات غير نضرات .

اباوع البيت صار هوسة ..

دخلت سلمت على رجل خالتي ورجل عمتي . گاعدين يم ابوي وعمي .

وطلعت للمطبخ اريد اكل فد شي ..

صحت براٱ تعاي سويلي لگمة ..

براء .. اوكف هسا هذا ابن هاجر يبجي خلي اوديه الامة

طفرت ايات ..

اني راح اسويلك .

ساهر .. لا مايحتاج خوية ارتاحي انتي ضيفه . هسا اصيح فجر تسويلي .

فجر . وينج تعاي ياب سويلي لگمة شنو سالفتجن انتن من يجي واحد تفهن ..

احجي معصب .

اجت تركض .. اي ساهر اجيت ..

ابتسمت لحجايتها ..

هي ضحكت گالت . بالگوة تطلع مني بس لازم اتعود .

ايات .. وشنو الي تغيير وبطلتي كلمة عمو ..

فجر .. غير كبرنا والشهر الجاي راح يصير عمري 17 ابقى دوووم اگله عمو.

كنا صغار ومانعرف ..

ايات .. هااااا والله البزونة المغمضة فتحت وصارت تعرف تحجي ..

براء .. ديري بالج لاتخرمشج وتضحك .. (اجت من وراها)

ايات .. ههههههه اي والله هم صدگ .

ساهر .. كافي حجي ماصخ . وروحن خلني اكل لكمة هنية ..

بقيت بالمطبخ اتعشا وايات كل ساعة تجي بحجة تريد شغلة ..

كملت ورحت يم عمتي گعدت .. سألتها عن الولد .

گاعده فجر يمنا ..

ابتهال .. شلونج فجوره . ماترحين ويانا كم يوم غيري جو .

هاجر .. اي والله اني هناك وحدي اضوج ..

ساهر بعصبيه .. وين تروح مايصير ..

ابتهال .. ليش يمة وحد غير اني هم عمتها ..

ساهر .. لا مو قصدي بس ..

فجر .. اي والله اني هم ضايجة . ها جدة اروح وياهم .

جدتي .. اي يمة روحي ليش لا .

ساهر .. احس نار وشبت بيه .. بيت عمتي بس شباب ماعندها بنيه .. واخاف عليها . شلون ياربي ..

ضجت وگمت من يمهن ..

صحت هاجر ..

ها خوية ..

ساهر .. شلون تاخذين فجر وياج ووانتو عندكم شباب بالبيت ..

هااجر .. شبيها ياخوية قابل ببيت غريب. هم بيت عمتها واني بنت عمها ..

ساهر .. اي بس رجل عمتج غربة وولد عمتها شباب ومراهقين ..

هاجر .. ترى خوية فجر كبرت . مو ذيج الطفله الي تتحكم بيها وتمشيها على امرك ..

ترى صارت كبيرة وفاهمة وخاف من كثر الضغط تكرهك لو تطفش منك .

ساهر .. شتقصدين ..

هاجر .. مااقصد يخوي .. بس لاتضغط زايد ترى كثر الضغط يولد الانفجار ..

وحتى محد يفهم اهتمامك غلط . خف شويه عليها .

ولو اني اعرف انت من المستحيل تفكر بيها لان ما تلوگلك انت وين ..ولان تربات ايدك تخاف عليها ..

بس غيري ماراح يفكر هيج ..

ساهر .. كافي هاجر روحي من وجهي ..

ااااه يساهر شوكت تصير فجر حلالك وترتاح ..

اني گاعد بالحديقة ادخن . وطلعت عمتي ورجل عمتي .

ووراهم هاجر وفجر شايله ابن هاجر وتضحك مامصدگة راح تروح وياهم ..

فار دمي اكثر .

سلموا وطلعوا . صحت فجر على جهة ..

طلعت فلوس وانطيتها . هاج خاف تحتاجين شي وديري بالج على روحج واني يومين واجي اخذج ..

زوج عمتي .. هاي مو حلوة منك ساهر . قابل راح نخليها تحتاج شي وتنطيها مصرف ..

ساهر .. لاعمي حشاك. بس اعرف فجر تستحي وخاف تطلعون بمكان وتشتهي شغله ..

نعيمة .. هو هذا ساهر من يومة هيج مايفرق فجر عن اخواتة بعد هي هم اختة الصغيرة ورباها على ايدة ..

خزرتها حتى تسكت .. اعرفها الامي وشنو قصدها ..

ولان ايات واكفه ماتريد تكسر بخاطرها ..

بعد ماراحوا بيت عمتي .

اني ركبت سيارتي وطلعت ضايج .

خابرت على رعد ..

الو وين انت ..

يلة جاي يمك......

البيت المابي فجر موحش وباهت بالنسبة الي ..

والاكثر وجودها بعيدة عني وببيت بي شباب ومراهقين يوترني اكثر ..

وأغـار من غريـب يرى عيناك صدفـة .. فيغرم بهـا !!

#بقلمي_الكاتبة_شمس

يتبع.....................

//// البارت الرابـع ////

#ساهـر_الفجـر ..

#الكاتبـة_شمس ..

‏صُوتـكـي !!

‏هو الوحيد الذي يقدر ان يحضنني من بعيِد .. ويتلاشى حُزني عندمـا  اسمعه ..

رحت ببيت رعد ملتمين الجماعة كلهم ..

جاي انرگل وافكر ..

شبيك يسـاهر العمر يجري منك وحبيبتك كبرت وحلت الدنيا بعينهـا . ويجي يوم الي تضيع منك ..

لازم احجي وياها .. اي باجر اروح البيت عمتي وارجعها واحجي وياها ..

مااخليها تروح مني .

لازم تعرف اني احق من غيري بيها . اني الي ربيت وتعبت وحميت علمود تصير الي ..

ادري بروحي اناني واحب امتلكها الوحدي .. بس موبيدي حبي الها هيج خلاني ..

رعد .. اگلك ساهر لو گاعد ببيت اهلك وتنرگل مو احسن الك .

ساهر .. شنو ؟؟

رعد .. اووووه ياجماعة الاخ مو يمنا اصلا ..

هيثم .. اگلك ساهر انت ماناوي تتزوج شني.  ولك الي واحدنا عندة طفل واثنين ماتگلي شمنتظر ..

رعد .. لا تدگون ع الوتر الحساس .. ساهر سالفتة طويله ..

ساهر .. ولكم شنو سالفتكم اليوم وياي .. بس مو صوجكم . صوجي انة الگاعد يمكم ..

خلي اروح للبيت .

وانتو ماعندكم نسوان ماترحون ..

رعد .. اي والله رحوا مرتي اليوم كله ماشفتها واني عريس جديد ..

ضحكنا على رعد وهو يطرد بينا علمود يروح المرتـة ..

شوكت يفجر انتضر الليل يجي واجي ملهوف الغرفتي حتى اشوفج منورتها بگعدتج وانتضارج الي ..

رجعت للبيت ..

البيت هدوء ..

لگيت مريم مرت عمي حمزة ..

ها ام حسين شو گاعدة ..

مريم .. عمك جوعان ونزلت اسويله شي . اسويلك وياه خاف جوعان ..

ساهر .. لامااشتهـي مشكورة . راح اصعد انام تعبان .

مريم .. صدگ ساهر بالخير ..

ساهر بإستغراب ..

شكو ؟؟

مريم .. على ايات ..

ساهر .. ايات ؟؟ شبيها .

مريم .. شبيك ساهر البارحة جدتك وامك فتحن الموضوع وي خالتك . وخالتك وافقت ..

ساهر .. اعرف هاي سوالف امي . بس جدتي شلون تطاوعها .. هي بكيفهن يزوجني ..

الصباح رباح يمة . يصير خير ..

مريم .. لا ساهر حباب لاتگول اني گتلك امك تسويلي مشكلة عبالي تدري لهذا حجيت اني ..

ساهر .. لاتخافين مااگول ..

رحت صعدت للغرفه . ضربت الحايط بوكس حسيت اصابعي تكسرن من الظربه ..

انفتحت الباب ..

ماهر .. شبيك شنو هاي الضربه ..

ساهر .. فوت حالي ماهر مالي خلگ .

ماهر .. اي شصاير ؟؟

ساهر .. گتلك ماكو شي لاتلح ..

ماهر .. صدگ خاف تگعد ماتلگاني . اني طالع باجر البغداد ..

ساهر .. ليش شتسوي ؟؟

ماهر .. اروح اقدم على كلية الضباط ..

ساهر .. يعني مصّر .

ماهر .. اي ولو ابوي مامقتنع بس گال روح .بس ادري بيك انت محاجيه عليه ..

ساهر .. المهم انت مقتنع . سوي الي تشوفة من صالحك ..

اگلك شصار الشغله عمتي ابتهال واولادها ..

ماهر .. خابرت لينا . گالت يومين ونجي . بلكي اخلص شغلتي بسرعة قبل مايجون . مامصدگ راح تجي يمي ولو راح اداوم ببغداد اذا صارت الشغله . بس المهم من اجي اجازات الگيها گبالي ..

ساهر ..الله يجمعكم ..

ماهر .. ويجمعك بيها ..

ساهر .. ههههه منو .

ماهر .. الي ماخذة عقلك ..

ساهر .. ان شاء الله.

ماهر .. ها يعني اكو وحدة صدگ .

ساهر .. دگوم يله الغرفتك لاتتأخر وراك تطلع غبشة .

ثاني يوم گعدت مالي خلگ وحتى سالفه امي وايات نسيتها من كثر تفكيري بفجر ..

رحت للشغل بقيت شوية وبعد مااتحملت رحت البيت عمتي ..

فتح الباب احمد رجل هاجر ..

احمد .. هلا والله بساهر . مشتاقين شعجب اجيت .

ساهر .. ها لا مو جدتي دزتني على فجر تريدها ..

احمد .. ادخل جوه ليش واگف بالباب .

دخلت تلگتني عمتي وهاجر سلموا ..

عمتي .. شلونك عمة شعجب اليوم منورنا..

ساهر .. هههههه شنو السالفة عمة شو محسسني صار قرن ماجايكم .

عمتي .. اي والله اخر مرة من يوم الجابت هاجر . وهسا ابنها عمرة سبع اشهر ..

ساهر .. تدرين بيه ماافرغ والمحلات برگبتي . بس لو ماجدتي تلح تريد فجر .

عمتي .. يا شمالها امي صايرة كلش . قابل فجر ببيت غريب شو اني عمته وذوله اخوتها ..

عمتي تحجي واني افرك بإيدي من التوتر وعيني ع البيبان اريد اشوفها تطلع ماكو ..

باوعت الهاجر .. جا فجر نايمة لسا .

هاجر .. اي خطيه للاربعه الصبح يلة نمنا ..

سألتها بأستغراب .. ليش سهرانه ووي منو .

هاجر .. كلنا سهرنا وسوالف ولعبوا طاولي الولد ونشجع بيهم ماحسينا بالوكت .

-هااااا هسا راح تصير العشرة گعديها خلي نروح .

-يايمة البنية نايمة خطيه توازيتوا هسا . للعصر وتعال اخذها ..

-لا عمة شيجيبني العصر عندي شغل ..

-اني اوديها وي الولد ..

-لا گعديها هسا . عود توصل وتكمل نومتها هناك .

-يمة هاجر گعدي اخيتج وخلي تتريگ . خو ماتطلع على لحم بطنها ..

-لاعمة اني اشتريلها ريوگ من الطريق ..

-واالله يعمة هذا طبعك بعده لسا ماغيرته . جانن اخواتك وين مايرحن تروح ثاني يوم نجيبهن وتجي ..

الله يساعد التاخذك ..

عمتي تحجي واني گاعد اتگله .. ماصدگت طلعت وگالت صباح الخير ..

ردت عادي بس داخلي يغلي واني اباوع على عيونها الناعسة وشلون تحجي بتعب او قلة نوم ..

-يلة فجر بسرعة بدلي حتى اوديج للبيت وراي شغل

-بس جدتي البارحة گالت ابقي ع راحتج ماحددت يوم ارجع بي ..

-تدرين بجدتي كل ساعه الها رأي .

-هففففف لحظة بس اغسل وابدل واجي .

-يلة منتظر ..

بين مابدلت وكملت سلمت على عمتي وطلعنا ..

رادت تصعد السيارة ..

گلتلها تعاي اگعدي هنا لاتروحين لورى ..

صعدت يمي ويمكن هاي اول مرة نطلع وحدنا . لان اغلب الاحيان البنات لو امي ويانا ..

#بقلمـي_الكاتبة_شمس

…………………………………… .

-لازم مشبعانه نوم . شنو سهرانة (گلتلها)

- اي . البارحة سهرنة والولد يلعبون طاولي وتراهنوا على عشا ..

وتالي خسر احمد وراح جابلنا بيتزا بنص الليل وبقينا ناكل ونسولف حلوة .

-هااااا يعني تونستي .

-اي ..(وتضحك)

اباوعلها ومشتعل اهل اهلي ..

اخذتلها لفة گص من الطريق وعصير .. گلتلها اكليهن .

وصلنا للبيت ..

دخلت واني وراها .

شافتنا امي ..

يا هاي شجابة مو ع اساس تبقى هناك كم يوم .

-اي جدتي گالت جيبها  ..

دخلت باوعت الجدتي وغمزتلها .. ها جدة خبصتيني هاي جيبتلج فجر ..

هي بالاول استغربت . بس بعدين افتهمت وسايرتني ..

-اي يجدة ماقصرت .. تعاي يمة هين يمي البيت موحش بلاج .

فجر حضنت جدتي ..

-فديت جدتي الماتگدر ع فراگي .

براء .. اي هاي لو اني اطلع شهر محد يحس بوجودي ..

ضحكنا على غيرتها ..

بس امي كانت معبسة وماعاجبها الوضع . وكأنه خلصت من فجر ورجعتلها ..

ساهر .. يله اني رايح عندي شغل تركته واجيت .

جدتي .. بالاول تعال يمة اخذني الغرفتي عندي سالفه وياك ..

عرفت راح تعلق على الي صار ..

اخذتها ورحنا ..

-سد الباب وتعال يمي ..

-وهسا گلي . شنو ورى هاي جذبتك وليش رحت جبت البنيه من بيت عمتها ..

-هاااا . شبيج جدة گمت تحللين وتفكرين . تدرين بيه مااحب وحدة من بناتنا تبات ببيت غريب وبي ولد .

-ولك جدة ياغريب غير بيت عمتها .

-اي . بس رجل عمتها غريب وولدها مراهقين وصغار . ومستحيل اخلي عرضي عند الغرب .

-انت ماتگلي عليمن طالع . ولك قابل فجر صغيرة وماتفتهم . واختك هناك يمها قابل وحدها وتخاف عليها .

-اي صغيرة ماتشوفيها فاهية وماتعرف تتصرف . يجي اي واحد يقشمرها تصدگ ..

-لاجدة انت تسودنت . خلي نزوجك بسرعه حتى تلتهي بمرتك ولاتضل تتحكم بالبنات الطلعت والمشت ..

-اووووه بدينا . خلي امشي الشغلي احسن ..

طلعت من البيت ضايج . خلصت اليوم كلة بالمحل .

خابرت على ماهر اطمأنيت عليه ..

دور خابرني ابوي .

گال تعالي اخذني من المحل ضغطي مرتفع ..

ركضت اخذتة ورجعته للبيت ..

تلگتنا امي اخذت ابوي الغرفتة يرتاح .

واني جوعان بلا غدا لسا .

رحت للمطبخ .

گلت الفجر . صبيلي بسرعة وراي شغل ..

صبت الي والها ..

-شنو انتي لسا مامتغدية .

-اي مو تريگت متأخرة ومااشتهيت اتغدا .

-خوش تعاي گبليني احسن مما اكل وحدي ..

جاي اكل .. گالت ..

واخيرا راح يصير عدنا عرس . من زواج هاجر لسا ماكو حفله .

-عبست بوجهها . يازواج .؟؟

-زواجك انت وايات . عمتي وجدتي گالوا راح يخطبولك .

-ماكو هيج شي .

-ليش شبيها ايات حلوة وحبابة ..

-وانتي شتگولين ؟؟

-شنو؟

-يعني لو انتي بمكان ايات توافقين عليه .

-لا اني ماافكر بالزواج اريد اكمل . بس انت هم حباب وتستاهلها ماناقصك شي .

وسالفة جدتي تگول ساهر كبر الي مثلة عندة كم جاهل بحظنه ..

-يعني تشوفيني كبير كلش . هيج اني شايب وماادري بروحي ..

-لا مو هيج . اني شعليه غير جدتي تگول ..

-فجر!!  گومي من وجهي .

-هااااا

-شنو ها . سديتي نفسي خليني اكل براحتي .

-اي گايمة ..

ردت اكل سدتها النفسي بنت اللذين ..

شمرت الخاشوگة وگمت .

اخذت سيارتي وطلعت . بقيت افتر مااعرف وين اريد .

اعرفها تشوفني كبير عليها وماتريدني .

فجر اكيد هسا تحلم بواحد من عمرها وتتمناه اني مالي اي قيمة عندها ومااعنيلها شي .

حسبة تاخذني وحسبة تجيبنـي وماحسيت الا صار الليل ..

رجعت للبيت بس مالي خلگ احد ..

صعدت بسرعة نمت ..

گعدت الصبح طلعت بسرعة للمحل ..

خابرني ماهر . گال محتاجك المعاملة تتأخر وانت عندك معارف ..

وصيت ابوي ع المحل وطلعت البغداد ..

بالطريق خابرت ولد نقيب صديقـي .. گال تعال وتدلل .

اول ماوصلت لگيت الولد منتضرني اخذته ورحنا الماهر . بقى ويانا الى ان كملها ..

ووصى معارف اله يتابعوها ..

تشكرت منه وگتله روح ويانا نتغدا .

ماقبل گال ..

ساهر انت ضيوفي هنا ببغداد المفروض اني الي اغديكم مو انتم ..

ماقبلت واصريت اني اغديه لان خطيه النهار كله ويانا مافارگنة ..

اتغدينا وكملنا ..

سلمنا ع الولد وطلعنا للكاظم عليه السلام . زرنا واشترينا هدايا الاهلنا ..

بس فجري حرت شأخذلها ..

صار گبالي ابو الفضة دخلت اشتري الجدتي محبس تحب هاي السوالف ..

وصار گبالي محبس ياقوت نقشتة حلوة مثل الخاتم ..

اخذتة الفجر . واخذت الجدتي عقيق..

كملنا شغلنا ورجعنا للفندق صار المغرب ..

عساس نرجع بنفس اليوم . بس ماهر ماقبل گال اثنينة تعبانين والطريق طويل ومو امان ..

بقينا بالفندق .. بس اكل گلبي . يتصل على لينا مغلق .

تخبل .

گام يروح ويرجع بالغرفة ..

ساهر .. شكو شبيك صرعتنا اهدأ شويه ..

ماهر .. شهدأ ماتگلي .. راح اتخبل من الصبح لسا مغلق ساهر .. دزلها رساله وهي بس تقرأها تجاوبك ..

ماهر .. كتبتلها ( لينا خبلتيني ليش متردين صاير شي )

بقيت انتظر تالي ساهر گال ..

گوم خلينا نطلع طگت روحي ع النرگيلة . ومنها تلتهي شويه خاف اهلها يمها وماتگدر ترد ..

ماهر .. اي طبعا الايدة بالمي مو مثل الايدة بالنار ..

ساهر .. ولك يامي غير يفور وحرگني حرگ ..

ماهر .. هلو ياب مواگلك انت مو خالي ..

ساهر .. دنزل گدامي ولاتبدي تحلل ..

ماهر .. شعدنا اول وتالي تبين السالفه وتطلع ريحتها .

ساهر .. دير بالك لاتخنگك ههههه .

#بقلمي_الكاتبة_شمس

………………………… ..

طلعنا اكلنا موطا ورحنا للكوفي مارجعنا للوحدة وماهر مانزلت عينة من الموبايل .

تمنيت اني بمكانة وهيج گلبي يفرفح على اتصال منها لو رسالة ..

شوية واجة مسج الماهر ..

بسرعة فتح وتنهد وهو مبتسم ..

ساهر .. ها خير .

ماهر .. مابيها شي بس گالت هسا مااگدر ارد عليك الصبح اخابرك ..

ساهر .. الحمد لله . يعني راح تخليني انام الليل لو تصرعني مثل مساع .

ماهر .. ههههههه شسوي يخوي الحب يتعب ..

بگلبي اگلة جا شتگول على حب من طرف واحد . هذا دمار وموت بالبطيئ مايحس بي الا الي مجربة..

نمنا ومن الفجر طلعنا الاهلنا ..

وصلت تعبان من الطريق .

اتصلت على محمد ولد يشتغل وياي .

گتله بعد الظهر اجيك . كنت مسافر وتعبان .

وصلنا للبيت . ركنت السيارة ودخلنا .

انتبهت على ولد بالمطبخ وماخذ راحته ويغسل .

اول مرة اشوفـة بحياتي ..

شعرة ثخين ورافعه لفوگ طويله وعندة شوارب ولحية خفيفه بس هو مبين صغير ..

احس النار شبت بيه ..

باوعتله بتساؤل معناها انت منو . او شعندك هنا .

مد ايدة مبتسم وگال .. يول شبيك مستغرب اني كيان ابن عمتك ابتهال .. انت ساهر اكيد .

هزيت راسي اي اني .. وسلمت عليه بس ماادري ليش نغزني گلبي منة وماارتاحيتله ..

ماهر .. واني ماهر ..

تسالموا على بعضهم . وماهر طبعا الفرحة ماسايعتة اجت حبيبة الگلب يمة .

بس ساهر شيصبرة على مابلاه ..

اجت فجر ولينا اني شايفهة بموبايل ماهر ..

سلمت لينا علية .

واباوع الفجر . الضحكة تارسة وجهها . وفرحانة .

كيان .. ها كفوش شبيج فاتحة حلگج . اتذكرج بصغرج بس تبجين ..

بقيت صافن على جرأتة وكلامة وياها وهي تضحك . اني الي ربيتها مااتشاقها وياها هيج ..

خزرتها تدخل لجوة . احس ضاجت وراحت عبالك ماعجبها الوضع ..

راد يدخل لجوة .

سحبته .. كيان ادري بيك مو غريب بس احنة الغرف ماندخللها لان بيها نسوان والها حرمتها ..

كيان .. واني هم اعرف عادات البيت وحرمتوا . لاتخاف بس انت گلتها مو غريب اني يعني هين اهلي وخوالي ..

استغفرت الله ودخلت ..

االصراحة ماتوقعت يجون بهذي السرعة .. وتفاجأت من شفت هذا المايع گبالي ..

شفت عمتي صار هواي ماشايفها .. حضنتني وتبجي خطيه ..

بعدين تعرفت على مراد وسما كانوا صغار ومتغيرين هسا ..

جدتي .. تعال جدة هين .. بشرني كملتوا شغلتكم لا .

ساهر .. اي جدة كملنا الحمد لله ..

جدتي .. الحمد لله وليدي . هسا يله ارتاحيت واني اشوفكم كلكم يمي . البارحة خفت عليكم ببغداد .

وين بتوا بس لا رحتوا البيت عمامكم ..

ساهر .. لا جدة مارحنا . ابوي ماقبل ..

احجي وعيني على فجر الي ضحكتها مالية وجهها وعيونها الطايرة ..

ياترى هاي فرحتها لان شافت احد من ريحة امها . لو ماخفي كان اعظم ..

دخل ماهر . وعينة بعين لينا ونضراتهم تسولفهم ..

احس بيك يخوي . اني مجرب لهفتك عليها .

بس مامجرب اللهفة ونضرات الي بعيون لينا  ..

فزيت على صوت عمتي ابتهال .. ساهر شنو ماناوي تتزوج عبالي الگي ولدك يتلگوني من اجي ..

امي .. لا ان شاء الله عن قريب خطبناله بنت خالته مثل الوردة .

خزرت امي .. يمي مو گتلج لاتفتحين الموضوع ..

جدتي .. كافي نعيمة مو وكتها سدي السالفه ..

حظروا الغدا .. طلبت يخلون سفرة الولد منفصلة عن البنات .

بس جدتي ماقبلت واصرت ننجمع بسفرة وحدة ..

گعدنا كلنا وبقن البنات يتراكضن هاي الي تجيب خبز والي تجيب گلاصات مي ..

اخر شي اجت فجر جايبة بيدها اللبن وحايرة وين تگعد .

صاحتلها عمتي ابتهال ..

تعالي هين يمي يجنتي الحلوة ..

بسرعة رفعت عيني مصدوم هاي شتحجي ..

عمتي .. من انتي صغيرة گلت الاهلج فجر الي ماافوتها اربيها واخذها ..

بس كبرتي بعيد عني وفارگتج ..

قطعت حجيهم والنار تغلي بيه .. يلة سموا الاكل برد ..

وعيني على فجر الي صار وجهها طماطة من الخجل وتبتسم ..

بودي اگوم افلشة الوجهها الي يشوفها يگول ممصدگة

والي ضوجني اكثر . امي مأيدتها وفرحانة . وعبالك هم وانزاح عنها ..

#بقلمي_الكاتبة_شمس

يتبع .. 

………………………………… ..

هلو حبايب ..

اعذروني ع التأخير. قبل نص ساعة اجيت من كربلاء .

كملته ونزلته الكم .

متابعة ممتعه ..

اسعد الله اوقاتكـم بكل خير احبتـي ..

//// البارت الخامس ////

#ساهـر_الفجـر ..

#الكاتبـة_شمس ..

قد لانستطيع البوح بمشاعرنا لمن أحببنا ولكن قد تكون تصرفاتنا كفيلة بذلك !!!

فهناك هاجس يخيفنـا.. اذا بحنا بمشاعرنا يرحلون!!

مااتحملت كلام عمتي وتصرفات فجر الطفولية .. گاضيتها ابتسامات وماخذة راحتها ..

كملوا غدا .. اني ستأذنت وصعدت للغرفة .

اولاد عمتي ناموا بغرفة عامر .

والبنات يم جدتي ..

خليت البيت هدأ شوية .

نزلت بسرعة ..

بقيت افتر بالبيت بلكي تطلع فجر واشوفها . احس نار بيه ماتنطفي الا لمن احجي الي بداخلي كلة وارتاح .

الى متى ابقى ساكت والعمر يجري .. شمنتظر واني اشوفها مامهتمة الي رغم اهتمامي بيها وحبي الها ..

اوصل للغرفة وارجع . استحي ادگ الباب بهيج وقت وخاصة هسا جدتي والبنات نايمات ومااگدر ادخل .

گعدت بالمطبخ طلعت جكارة ورثتها ..

اجت مريم مرت عمي حمزة ..

-ها ساهر شعجب هنا عبالي رحت للمحل ..

-اي هسا عود ردت اطلع وتذكرت فجر رادت غراض توصيني ومااگدر ادخل زحمة من بنات عمتي ابتهال.

-جان رحت وبعدين خابرت على بنين تحجي وياها ..

-لا مو گالت كاتبتهن بورقة . تگدرين تصيحيها بس تنطيتي الورقة وترجع ..

-هسا اشوفلكياها اذا گاعده ..

راحت للغرفة واني بالمطبخ . اسمع صوت ورى المطبخ .

تقربت يم الشباك واشوف ماهر ولينا گاعدين بالممر يسولفون .

ااااه يحلات الحب لو حس الي تحبه بيك ..

فزيت على صوت فجر .. صحتنـي ؟؟

ها اي تعاي وراي واشرتلها فوگ .

صعدت وشويه اجت وراي ..

اول مادخلت قفلت الباب ..

بقيت عينها ع الباب ومستغربة ..

-شردت مني . مو خاف جدتي تگعد گالت الي اشوفها گايمة من فراشها اكسر رجلها .

-لاتخافين ماتكسر رجلج . انتي بحمايتي .

ضحكت ..

باعي فجر وسحبتها وگعدتها يمي .. انتي مو صغيرة

وتصرفاتج ماعاجبتني ..

-ليش شنو سويت ؟؟

-انتي تعرفين اكو ولد غربة عدنا . وانتي كبرتي لازم تحشمين روحج وماتضحكين بالرايحة والجايه .

خلي حدود الضحكتج وسالفتج ..

-بس ذولي ولد خالي وولد عمتي بنفس الوقت يعني مو غربه ..

-استغفر الله . وج ياخالج مو هو نفسة الي گال مااريدها اخذوها انتو ربوها .

كم مرة گتلج لاتثقين بسرعه . ذولي نفس طبع ابوهم بالوجه يضحكلج بوراج الله اليعلم ..

-كلها كبرت وتغيرت محد يبقى نفسة ..

-استغفر الله .. وج فجر افهميني اني اغار عليج واتقربت منها كلش . مااريد واحد يباوعلج .

اني ربيتج وكبرتج حتى يجي اليوم الي تصيرين فجر ساهر .

-شنو تقصد ..

-افهمي عاد مو دمرتيني اني احبج ورايدج مرة الي .

-بس

-بس شنو . لاتجاوبين بسرعة . ولاتگولين شي .

اني مااريد اجبرج بس اريدج تعرفين انه ماكو غير ساهر بهاي الدنيا يسعدج ..

حسيتها گامت ترجف وتوترت .. وگالت .

اريد اطلع خاف جدتي تريدني .

اوكفي ..

لا حباب خليني اطلع . واحسها صارت طماطة . خفت عليها توگع . فتحتلها الباب وهي مثل الطلقة .

اختفت بسرعة . بقت بس ريحتها بغرفتي ..

احس بروحي ارتاحيت وبنفس الوقت مامرتاح ..

بدلت وطلعت للمحل ..

من رجعت شفت الوجوه متغيرة ..

وفجر الي كانت تتلگاني للبيت . صارت تبعد نضرها عني وتحاول تتلافاني ..

گلت السلام عليكم .. الكل رد الا هي ..

دخلت الجدتي وعماتي گاعدات ..

سلمت عليهن ..

اجت امي .. ها يمة شلونك .

ساهر .. زين يمة وين ابوي لسا مااجة .

امي .. لا هسا راح ماهر وكيان ياخذوله عشا يتأخر بالمحل عندة خياط هواي ..

دخلت فجر .. جدة العشا جاهز اجيبلج عشاج هنا لو ويانا تاكلين ..

باوعتلها .. ليش شبيها جدتي وماتاكل ويانا .

فجر .. ها مالها خلگ . وتركتني وراحت ..

اللهم العنك ياشيطان ..

جدة تردين اخذج للمستشفى..

-لايمة مابيه شي . هو ضغطي مرتفع . وهسا زينة .

تعال گومني اكل وياكم ..

گومتها للصاله نتعشا ..

عمتي ابتهال .. عمة ساهر ماتشوف النا بيت هين بالمنطقة قريب .أاجرو .

جدة .. وليش تأجرين يمة هنا ابقي والبيت واسع. .

نعيمة .. هم حقها عمة تريد تاخذ راحتها هي واولادها مهما يكون الواحد مو مثل بيته ..

اشرتلها تسكت . لان اعرف امي اذا حجت محد يسكتها .

واصلا بالي مو يم احد..

كلة يم فجر الي تتهرب مني .

كنت اتصور اذا اصارحها بحبي راح تتغير حياتي وتبادلني نفس الشعور ..

لكن الي صار .. ابتعدت عني وكأني عدوها ..

لو ممصارحها احسن ع الاقل تتلگاني بضحكة وبسالفه

صعدت ابدل ونزلت ..

سمعت كيان يحجي .. رحنالوا للمحل ملگينا وينو اجة .

شافني .. ياهلا بساهر .

اتوقعت اليوم تاخذنا وتفررنا المنطقة . اشو سمعت عنك مضياف وتكرم الضيف ولسا ماشفنا شي ..

ساهر .. افة عليك مو اطباع ساهر هاي .. شتگولون باجر نروح للصيد وناخذ منقلة ونتغدا هناك ..

مراد .. اييي هذي الطلعات الزينة . يول هسا عجبتني .

بگلبي اگلة تدلل ماشفت شي من ساهر ..

گعدنا ناكل .. وعيني ماشلتها عن فجر . الي حتى ماتعشت واتعذرت ماتشتهي وگامت ..

باوعت الكيان ونضراته الها شلون يفصلها ويراقبها .

غرت عليها مثل الطفل الي يغار على امة ..

عبالك اسد وخاف على لبوتة لايخاذوها منه .

گلت الحمد لله وگمت ..

رحت ورى فجر ..

شبيج اليوم ..

طفرت من مكانها .. ها مابيه شي ..

شبيج طفرتي . خايفة مني انتي .

لا بس...

شنو بس . اني رايدج بالحلال قابل اگلج اتونس وياج وتشردين مني . وترى انتي كبرتي والمثلج واعيات وفاهمات ليش انتي تحاولين تسوين نفسج طفلة .

#بقلمي_الكاتبة_شمس

............................................. ..

لا مابيه . بس اني ماافكر بهيج شي وبعزين انت... ..

سكتت .

اني شنو گولي . مااعجبج لو اكو واحد ببالج ..

لا ماكو . بس اني اعتبرك...... .

دخلت بنين... سكتت .

گلتلها .. بنين اطلعي ..

صفنت بوجهي ..

گتلج اطلعي ماتسمعين ..

اشو هاي بسرعة لزمت ايد بنين وگالتلها . بنين اخذني وياج ..

فجر ابقي خلي اكمل ..

بنين صافنه عليه وعرفت الي اريده .

گالتلها ابقي شوفي شيريد ..

اتقربت منها .وسحبتها للممر ورى المطبخ .

دفعتها للحايط .

ولج افهمي اني احبج . وماتلگين واحد يحبج مثلي .

انتي بس گولي اي واعيشج ملكة ..

فجر .. اني هم احبك واحترمك . بس مو مثل ماانت تفكر اني اعتبرك مثل اخوي الجبير او ابوي ..

عمري مافكرت بيك غير شي .

وعبالي انتي هم تفكر مثلي ..

انت تدري اني قبل فترة يله بطلت كلمة عمو شلون تريدني اگلك اي وانت اكبر مني بهواي .

مااگدر .حباب خليني احبك مثل ماانت لاتكرهني بيك ..

هي تحجي واني صرت اعصاب . ردت اسوي كلشي حتى اخليها تحبتي بس الحب مو جبر .

اتقربت منها حيل ردت اشمها واخفف غضبي ..

حسيت حركة وراي .

ابتعدت عنها بسرعة .

بس ماشفت احد .

هي خافت وركضت لجوة ..

بقيت بالحديقة شويه اخذت جكارة بلكي اهدأ شويه ..

اجت بنين ..

ساهر انت تحبها الفجر ..

-بنين اذا عندج حجي يضوج اسكتي لان مالي خلگ.

-لايخوي . اني مايهون عليه اشوفك ضايج ومقهور . بس فجر ماتستاهلك ..

-بنييييين شگلت اني ..

-صحيح انت ربيتها على ايدك وكبرتها وحبيتها لان ترباتك بس هي عقلها مو يمك ..

هي دووم تگول اريد واحد شاب ويلبس ع الموديل وتنطينا مواصفات خياليه ..

-شنو . انتي شتحجين . فجر الي ذاك اليوم كبرت هيج تفكر .

-خوية كل بنيه هيج تفكر ومو يعني هي موزينه لو اخلاقها مو زينه . بس هاي امنية كل وحدة تتزوج شخص حسب الصفات الي تريدها . ولاتنسى هي بعدهي مراهقه وبالدوام تسمع اشكال الحجي ويبقى ببالها .

-لامستحيل .. فجر مو مثل البنات . هسا لو تگولين براء اصدگ لان اللسان ووكحة بس مو فجر هاي ترباتي .

ومحد يخاف عليها ويحبها مثلي ..

-خوي مايهون عليه اقهرك . بس تدري هي من يوم اجونا بيت عمتي ابتهال لسا . خابصتنا بكيان وشكله . وتگول يعجبني هيج ولد ومن يمر منها ترتبك وتوتر .

انت تعودت ع هذا لبسك وحياتك بس هي زمنها غير ورغباته تختلف عنك .

لاتظلم روحك وتظلمها ..

-مو بكيفها . اني ابن عمها واولى بيها لو اصبر عليها العمر كله يجي يوم ترضى وتقتنع بيه .

-واذا خطبها غيرك شلون . ترفضهم وتگلهم محجوزه الي

-اي اسويها واذا لزم الامر انهـى عليها ..

-ماادري شأكلك . بس ربي يكتبلك الخير ان شاء الله

راحت بنين وزادت همي همين بكلامها .. عشت عمري على هذا الامل وتالي تروح مني .

بعدهي صغيرة وماتعرف مصلحتها وين . اخذها جبر وغصب عنها توافق ومن تعاشرني اخليها تحبني وادللها .

دخلت للبيت وگلت الماهر .. اياني واياك تخلي ولد عمتي يختلطون ببناتنا . حاول تخليهم لو بالغرفة لو بالاستقبال

ماهر .. ليش شكو ..

ساهر .. ماارتاح الهذا كيان وعينة زايغه .

ماهر .. افگسهن اله والله .

ساهر .. ماگتلك روح فگسهن بس ابعده عن البيت لو تبقون فوگ ..

(عاشگ اخته ويريد يفگس عيونه ) هزيت ايدي وضحكت

ماهر .. ساهر خبلني اني ادور فرصه التقي بحبيبتي وماصدگت اجت البيتي وصارت قريبه عليه .

وهو يريدني الزم حراسة الكيان افندي ..

اني كنت اداوم ببغداد . وبالصدفة عمتي گالت الجدتي بنتها تداوم هناك وخايفه عليها لان اقسام داخليه .

جدتي وصتني عليها وانطتني اسمها وقسمها .

وگالت خلي السالفه بينا مااريد واحد يدري وخاصه ابوك .

اني كنت اكره عمتي ورجلها من سوالف ابوي وامي عنهم ..

وبالگوة رحت لان وعدت جدتي ..

وسألت عنها بالجامعه وعرفت قسمها ..

رحت اسأل عنها ومااعرف شكلها شنو . يمكن اتذكر شويه من ملامحها من احنة صغار .

بس مو بالمضبوط لان كانوا بعيدين عنا ..

سألت واحد من الطلبة اشرلي عليها تقربت منها وهي بوسط مجموعه من البنات ..

من رخصتج انتي لينا عمار ..

لينا .. بلي منو حضرتك ..

ماهر .. اذا تسمحين شوية من رخصتج واعرفج عليه .

اجت وياي وهي تتسائل .

مگلتلي حظرتك منو ..

كنت متردد ابلغها . خاف تكون ردة فعلها محرجة وتسببلي مشاكل گدام الطلبه ..

وهي واگفه منتضرة الجواب ..

گلتلها اني ابن خالج محمد ماهر اذا تتذكريني ..

فتحت عيونها ع وسعهن وهمة كبار. .

والصراحة كنت لازم گلبي للرزاله والاحراج ..

لينا .. صدوك انت ابن خالو . ياي ممصدگة . شلونك بيت جدو شلونهم مشتاقة الايام زمان .

لكن الضروف بعدتنا .

بقيت مصدوم وجامد بمكاني . هاي تحجي صدگ لو تبالغ .

هي ترحب وتسلم. وتسألني على اهلي واني صافن .

لينا .. شبيك صافن دااحجي وياك . انت تداوم هين بالجامعه .ووين ساكن. شنو رجعتو البغداد ؟؟

ماهر .. لا مرجعنا بعدنا بمحافضتنا . بس الصراحة ماتوقعت هيج تقابليني تصورت راح تعيطين عليه .

لينا .. ههههههه بالعكس دايما اني وماما نذكركم . فجر شلونها كبرت .

ماهر .. اي كبرت وتشبه امها بالضبط .

لينا .. اذا فعلا تشبه عمتي فهي جمال . محد طلع بينا يشبه . سالفه بابا يگول انتو على خوالكم طالعين .

ماهر .. بعد الوالد يحبنا ماشاء الله .

لينا .. ههههههه لتهتم اسفه اذا ازعجتك.

ماهر .. لا بالعكس . مااريد اعطلج بس اني اداوم هنا واي شي تحتاجيه تعالي الي . واذا تحبين انطيج رقمي .

المهم مينقصج شي . شيخلصنا من سلطانه فخريه .

لينا .. ياي فديتو جدتي مشتاقه الها . بس خبرها لاتقلق محد يدحك بيه وابن خالو هين معاي ..

#بقلمي_الكاتبة_شمس

....................................... ..

بقيت كل يوم امر عليها اسلمها عليها واشوفها شنو محتاجة الى ان تطورت علاقتنا وصرت مااصبر اذا مااشوفها وخاصة بعد ماراقبتها وشفتها انسانه بسيطه ومتواضعه ومؤدبة .

عجبتني كلش . وگمنا نتراسل ونتخابر ومرت كم سنه وحبينا بعضنا وصرنا مانگدر على البعد .

وخاصة بعد ماتخرجنا . تأذيت حيل لان بعد مااشوف كنت حتى بالاجازة ماانزل بحجة امتحانات وهي كذلك .

من التخرج لسا مشايفها ومكالمات قليله لان خاف اهلها يحسون عليها .

الى ان الله جبر بخاطري وجمعني بيها مرة ثانيه ..

وماصدگت نفسي من شفتها گبالي عند اهلي .

ردت احضنها وابوسها لو مالعيبة ..

..............................

ساهر .. الليل كلة مانمت من كلام فجر وبنين .

وقررت احجي وي جدتي وانهي الموضوع ..

ثاني يوم .. حظرنا نفسنا وجهزنا اسلحة الصيد ..

لبست ملابس صيد ولفيت الشماغ على راسي ..

واول مانزلت . حسيت العيون عليه. الا عين فجر الي رايحة الغير مكان .

بودي اضربها على وجهها وعيونها الشابحة للمايقدرها ويحس بيها ..

جدتي .. يمة صلن على النبي . جدة لاتطلع بسرعة خلي ابخركم . الناس من تشوفكم تضربكم عين وانتو طالعين بجمعتكم ..

ابتهال .. عمة ساهر ولدي امانه عندك . ترى لاتشوفهم هيج هناك لايطلعون ولاينشون ابوهم محاصرهم يخاف عليهم .

ساهر .. لاتخافين عمه اني وياهم ماكو شي .

ومناك نروح للهور ونرجع . يعني اذا تأخرنا لاتقلقون .

اباوع الكيان لابس برموده وتشيرت وحذاء رياضي ..

ساهر .. اگلك انت رايح تلعب رياضه لو للصيد .

كيان .. ليش ويباوع الروحة .

ساهر .. لا سلامتك ماكو شي . بس لاتگول محد گالي ترى هناك عشب واشجار وتتجرح بهذا لبسك .

كيان .. مايهم عادي..

براحتك .لقد احذر من أنذر ..

طلعنا للصيد بسيارة رعد مال صيد .. وهناك بدينا نصيد .

واكو عشب طوال وعاقول .

وهذا كيان كل شويه يطفر عباله حيه لو عگرب رجله تدمرت دمار منهن ..

اني بديت اصيد . واطلع قهري بالصيد.

بعدين اخذنا الي صدناه ورحنا للهور . وجايبين سمك ويانا وبدينا نشوي ..

تونسنا حيل . هناك الموج عالي بالهور ويغدر ..

وكيان اصر يدخل للهور .

تالي زلگت رجليه ولوما الله ساتر ولزمته جان راح بيها .

صحيح مغتاث منه ومقهور . لان حسيته منافس الي بفجري .

بس بذيج اللحظة خفت عليه حيل . وگمت اصيح عليه لان هبطنا كلنا .

گتله .. انت زعطوط متفتهم من انگلك لاتتقرب للهور ليش تتقرب وتسوي نفسك بروسلي .

لك احنه اصحاب الهور والمنطقة ومانوصل اذا الموج عالي .

تدري لو ماالله سترك جان انت بعداد الموتى ..

كيان .. لاتصيح ولاتعلي صوتك والله ماعاش الي يصيح علية ويدحك بيه لأگصوا للسانو .

تقربت منه . ولك هاي عليمن . فوگ ماخايف عليك هاي جزاتي . يله تعال اذا انت ابن ابوك اتقرب الي وگصوا للساني يله .

اتقربت منه كلش .بس رعد والولد لزموني وگالوا اتركة زعطوط ولان حس نفسة تفشل طلع بطولاته .

رعد .. يله يولد لموا الغراض الليل خيم علينا . واصلا خربت طلعتنا بسوالفكم وعرككم ..

ساهر .. وهذا الصحيح . غلطت عمري ورطت حالي وجبت مزعطة وياي ..

هجم عليه كيان من ورى .. منو المزعطه . تاليكم مثل ماگال ابوي ناس ماتفهمون وكلكم مشاكل .

رفعته من ايده ولويته للگاع . ردت اضربه بس لعنة الشيطان .

ساهر .. روح اصعد والعن الشيطان كيان مااريد اخلي عقلي بعقلك ومهما يكون انت ضيفي ..

صعدوه الولد بالسيارة .

واني صعدت بصف رعد . بس النار تسعر بيه ..

افة عليك ساهر . تالي عمرك زعطوط يتطاول عليك .

ااااخ لو ماابن عمتي وضيفي .

فوگ مانقذته يتعالى عليه ..

رجعنا للبيت كلنا طين وتعبانين .. الكل منتضرنا وقلق علينا ..

اول مادخلنا . صاح كيان ..

وينج يمة باجر من الصبح نطلع مانبقى هين .

الكل استغرب .

جدتي .. شكو شصاير ..

اني ماسكتت وخليته هو يحجي ويلفق ويطلع الغل الي بگلبه .

تالي گتله خلصت .. عمة ماادري عندكم نكران الجميل . نقذته وصحت عليه صحيح من خوفي عليه لان هبطنا وعاند الا يدخل .

بس هو گام يتطاول ويعيرنا رغم اني اكبر منه .والمفروض يحترم ..

عمه البيت بيتج واخليكم على راسي ومو طبعي اطلع ضيفي زعلان . بس الضيف المفروض يحترم مو يتهجم ويطلع العيبه بينا ..

جدتي حجت عليه هو وعمتي . هو صعد زعلان ويحلف مايبقى ومن باجر يدور بيت ويطلعون .

بس اني مااهتميت . اجت عيوني بعيون فجر . دارت وجهها وراحت عني .

وكأنه شايله عليه او تحملني ذنب .

ضربت المحجر مال درج حيل وصعدت الغرفتي سبحت وارتاحيت ..

اجت بنين . گالت جدتي تريدك ..

-اگلج امي وابوي وين ماشفتهم ..

-راحوا للزيارة .. همة وبيت عمي حمزة ..

-شوكت راحوا .

-المغرب ع البرد ويباتون ويرجعون الصبح .

-هاااا يله انزلي وهسا جاي وراج ..

همزين اهلي مموجودين . جان اتأزم الوضع اكثر ..

نزلت الجدتي . گالت تعال اخذني للربعه خلي احجي وياك بشغله ..

اخذتها ومشينا .. گالت يمة اعرفك ماتغلط واعرف ابن عمار مثل ابوه وطبعه . بس ترى يجدة اني اعرف عيونك وتصرفاتك .

واشوفك شلون تناظر الكيان . شعندك وياه شمسويلك .

اخذت نفس .. مامسويلي شي جدة .

وثقي ماعندي شي وياه .

ومن حجيت عليه من خوفي .

بس قبل هيج ماانكر تصرفاته وعينة الزايغه على بناتنا تضوجنـي..

جدتي .. قصدك على فجر مووو !!

#بقلمي_الكاتبة_شمس

يتبع...

حبيباتي .. رجاءً من تعلقون . بلا تجريح لان اغلب ابطال القصة يتابعون .

وخاصة ساهر . هواي تجاوزوا عليه البارحة

وهذي كانت رسالته الكم ..

اعزائي .. ماانكر اني تهاونت هواي يلة صارحت فجر . لكن كنت خايف من صدها او عدم رغبتها الي

لهذا كنت اكتفي بضحكتها وكلامها وفرحتها من تشوفني

وانتو شفتوا لما صارحتها . شلون تهربت وابتعدت عني وهذا الشي كلفنا هواي .. وخلانا نندم ..

صباح العسل لعيونكم حبايب ..

//// البارت السادس ////

#ساهـر_الفجـر ..

#الكاتبـة_شمس ..

((علمته الرمايا ولمـا اشتد ساعده رماني.!!))

ساهر ..شنو قصدج جدة ؟؟

-يمة ترى اني ماكبرت هذا العمر كلة من فراغ .. اعرف الذبانة اذا طارت وين تروح ..

ادري بيك عينك من فجر وتريدها ..

بس فجر يتيمة يمة . لاتجبرها تجازيك على تعبك ورباتك الها بالزواج ..

بعدهي طفلة وتريد تتزوج الي تتمناه .. مو من حقك تطالبها برد جميلك الها بهيج طريقه ..

ساهر .. حتى انتي ضدي .. وسنيني الضيعتها صابر ومنتظر شنو ..

ردت انسانه اعرفها وتعرفني . ومااغلط غلطت قبل . من ركضت ورى نزواتي وتالي طلعت حية من جوة تبن .

-يمة جنت مراهق وماتعرف .. بس هسا لازم تلگي الي تناسبك وبعمرك .. تاخذ وحدة زعطوطة تتعب وياها وتعبها وياك ..

اني كنت رايدتها الماهر . بس من شفت لهفته على بنت عمته . ماردت اكسر بي ..

-جا بس اني يهون عليج تكسريني ..

-ولك منو الي يكسرك . جا غير البنيه مارايدتك ..

واني اخذت الحجي من السانها . والله لو شايفتها مقتنعه شويه . من الليله اخطبها الك .

الزواج والحب مو بالجبر .

وفجر اذا ماتلزم شهادتها ماازوجها .

لان بعد عيني محد يفيدها غير مستقبلها ..

-جدة لاتدمريني كافي .. وهاي اني اگلج فجر ماتصير الغيري لو اتزوج ثلاثة تصير هي رابعتهن .

مو تگولين صغيره . اخليها تكبر براحتها وتتعالى عليه بس صدگي مااخلي احد ياخذها ..

-اعقل ولك ولاتعاند . هذا راسك اكسرو اذا سمعتك تحجي هالشكل .

مو ربيتها وملكتها.. خاف الله بيها .

لاتخليني ابعدها عن البيت كله . حتى احميها ..

گمت على حيلي .. مع الاسف جدة تالي العمر تحمين فجر مني .. اني ساهر الي كنت اخاف عليها من نسمة الهوا تمس وجناتها .. هسا تهدديني تبعديها عني .

اني الي راح اريحج لاتخافين ..

-شتقصد ولك ..

-يجي وكتها وتعرفين ..

صعدت الغرفتـي ضايج ..

صارت بوجهي فجر . وبيدها صينية ..

سحبتها ودخلتها للغرفة ..

شتسوين فوگ هيج وكت ..

-الولد رادوا جاي وجبتلهم ..

ضربت الحايط . وماكو غيرج يجيبه . لو ماكو خشا عندج .

-قابل غرب همة غير ولد خالي وولد عمي ..

ولج لاتخبليني انبهج منا تعاندين . شوكت عرفتيهم وتعودتي عليهم .. ماصار اسبوع من اجو .

-بس هيج حرام . انت گمت تكرهني لان گتلك انت مثل اخوي وتريد تعذبني ..

ولج شنو تكرهني لان اعلمج ع الصح والخطأ . نسيتي اني منو وهمة منو . اني الي ربيتج وحميتج وهمه الي مافكروا حتى يسألون عليج .

تالي هيج تحجين هاي جزاتي يفجر ..

-يعني لان ربيتني وحميتني تريد اگلك صار ومااگلك لا .

هههههههه انتي شوكت كبرتي على ساهر ورفعتي خشمج .. ديري بالج تتعالين عليه والله اكسر خشمج هذا فاهمة ..

روحي منا بسرعة لااسوي شي مايعجبج ..

طلعت واخذت روحي وياها .. هاي شبسرعة كبرت وصارت هيج تحجي ..

فكرت بكلام بنين .. معناها اني ماگدرت اعرف فجر وخدعتني ببرائتها وياي ..

فركت وجهي واستغفرت ربي ..

مر كم يوم واني مااتواجد بالبيت هواي ..

لگينا بيت قريب علينا البيت عمتي وانتقلوا ..

بس الي مضوجني .. تواجد فجر الدائم عدهم ..

باجر عيد ميلادها ..

واحس نفسي قسيت عليها هواي .

وابتعدت عنها هاي الفترة . لازم ارجع ثقتها بيه مثل قبل

اتفقت وي اخواتي ولينا وسما انسويلها حفلة بيناتنا ..

طلبت من لينا تاخذها يمهم طول النهار .

واني واخواتي زينا الاستقبال وجهزنا كلشي ..

امي ماعاجبها الوضع كـ العاده .

وتگلي طفله مدوهنتك ..

ومن هذا الحجي ..

بس هديتها وگلتلها يمة لاتخافين .. الي اسويه مالي غاية بي ارتاحي .

گدرت اقنعها وتسكت شويه ..

صحيح فجر جرحتني بكلامها .. بس گلبي ماينطيني اقسى عليها ..

للعصر خليت ماهر يخابر لينا ..

اجو كلهم . بس كيان ماهو . من يوم الي انتقلوا ماشفته بعد ..

اول مادخلناها للاستقبال تفاجأت وضحكت .

جدتي .. هاي سوالف ساهر كلها .. باوعتلي وابتسمت شكرا تعبتك ..

ساهر .. تعبج راحة ..

احتفلنا وقطعت الكيك وكانت الضحكة مالية وجهها .

اني اكتفيت بنضراتي الي تراقبها بخفيه ..

كملت الحفلة ..

انطيتها هديتها .. فتحتها بتساؤل ..

شافتها ضحكت .. گالت واخيرا صار عندي موبايل ..

نعيمة .. امك ماعندها موبايل حديث وتجيب الغيرها .

جدتي .. ماتخلين الجهال تفرح شمالج حاطة روحج .

البقية انطوها فلوس لان ممتوقعين نسويلها حفله وصارت مفاجاة ..

تفاجأت بوجود كيان . وهي ابتسمت اول ماشافته ..

مااتحملت وطلعت ..

#بقلمي_الكاتبة_شمس

.................................

بقيت لليل ورجعت ..

شفت بيت عمتي عدنا وكيان هم موجود وضحك وسوالف مااهتميت وصعدت ..

بقيت هيج مااهتم . ردت احسسها بخطأها بس ماكو كل نتيجة وواضح مرتاحة على بعدي وعدم اهتمامي ..

مرت اشهر واني بين الشغل والسفر والوضع من سئ الى اسوء ..

اجة زوج عمتي . خال فجر وخبرنا بالاوضاع المتأزمة ..

رغم هو مايحجي وي اهلي بس جدتي اجة سلم عليها وباس راسها .

واخذ فجر الحظنه بعد ماتركها وماسأل عنها طول هاي الفترة ..

وهذا الشي خله فجر تتقرب الهم اكثر وتحاول تسد الفراغ الي بينهم كل هاي السنين ..

اتغيرت جذريا . وصارت لو بالدوام لو عند بيت خالي مانشوفها بس بالليل وكت ماتجي تنام .

ومن احجي وي جدتي . تگلي خطيه يتيمة ومضلومة خلها تشبع من خالها وريحة امها ..

كم مرة اروح البيت عمتي والگيها تسولف وتضحك وي كيان . ومن اسألها تنكر وتگول ماعندي شي .

بس هو يحب يسولف ويضحك وكلنا گاعدين سوه مو وحدنا ..

استغفر ربي والعن الشيطان .. حسيت بضعف وقررت اخلص من هذا الوضع ..

كنت مقرر اسافر . وارتاح فترة .

مو ساهر الي يضعف وينهز علمود مرة وتالي ترفضه .

بعد فترة .. اجت فتوة التحاق للقتال ضد داعش ..

خابرت الرعد ..

-هلا اخوي ..

-الشغله الگتلي عليها . سجل اسمي بيها .

-متأكد .. مو بعدين تتراجع ..

-لا متأكد . احسن حل ابعد منا فترة حتى ارتاح ..

رحت للسوگ اشتريت احتياجاتي اني ورعد . ورحت الابوي ابلغه بقراري ..

ضاج وعصب عليه بس گدرت اقنعة ..

رتبت اموري كلها وطلبت من عمي حمزة يلزم المحل بمكاني .

وابوي شغل عامل وياه ..

بعد ماصار الوقت ..

واحنه گاعدين نتعشا ..

گلتلهم .. ترى اني تطوعت وي الحشد نقاتل ضد داعش وراح اروح باجر غبشة لطمت امي على صدرها .. يمة اسم الله اني كبرتك حتى تروح مني برمشة عين ..

-يمة تحجين صدگ . الاعمار بيد الله . واذا اني او غيري تراجعنا منو الي يحارب ويدافع عن عرضنا ..

-يمة وانت شلك غرض . اذا اهلها وناسها انهزمت انت تروح تدافع عنهم ..

-يمة الاعمار بيد الله . واذا اهلها انهزمت احنة نتركها . داعش مثل السرطان اذا ماستأصلناه وقضينا عليه راح ينتشر بكل العراق . ومصيرة يوصلنا .

وشفتي انتي كم محافظة سيطروا عليها ..

-ماتحجي محمود شو ساكت .

-شأحجي تدرين بأبنج اذا خلى شي براسه . وماكو غير ندعيله الله يحفظه ..

-عفية جدة ماضاع تعبي بيك .. هاي گاعك مو بس گاعهم واذا خليتوا ايد بإيد الله ينصركم ويخلصنا منهم ان شاء الله.

عمي حمزة .. والنعم من ساهر هاي مو جديده عليه .

امي .. والله اني گلبي ماكلني ومامرتاحة بس شسوي ادري محد ياخذ كلامي ..

محمود.. خلص ام ساهر . افتخري بي . اني مثلج ما قبلت بس بعدين افتخرت بأبني يحارب بمكانة ..

جهزت جنطتي وكملت غراضي .

اندگت الباب ودخلت فجر ..

-ها فجر تعاي ..

-اجيت اگلك اذا محتاج شي ..

-لا سلامتج .. بس مااوصيج على روحج لاتخلين واحد يضحك عليج وتنغرين بكلامة .

-شكرا على كل الي سويته وياي .. دير بالك على روحك

-ضحكتلها . لاتخافين عليه . بس اريدج توعديني تهتمين بدراستج وتنجحين .

-من غير ماتوصي ماصدگت صرت بالاعداديه .

-الله يسهل عليج ..

كان كلامنا رسمي وجاف . حتى مو مثل قبل تضحكلي وتسمع مني ..

عرفت ساعتها اكو فجوة بينا كبيرة ..

طيبت خاطرها بكلمتين لان مااريدها تكرهني وهاي دنيا مانعرف نموت لو نعيش ..

داومت ثاني يوم وصار مقرنا بالرمادي ..

هواي متطوعين ويانا ..

الكل تخابرهم حبيباتهم وزوجاتهم .

الا اني .

لو جدتي لو امي يخابرون عليه . خبلوني .

حتى گمت اسوي صامت حتى مااسمعه على گد مايخابرون .

لو اگلهن لاتخابرن لان احنه طالعين هجوم على هيج منطقة ..

تعرفت على اثنين ولد مسلم وحيدر .

كنت احاول انسى كلشي من ندخل هجوم لان اعرف تفكيري بفجر معناها نهايتي ..

وگدرت اقلل تفكيري بيها .. او احاول انساها .

الكل كان يسألني ليش ممتزوج لسا .

واگلهم مالگيت الي اتمناها ..

مسلم .. يمعود هي اهم شي مرة تصونك وتحافظ عليك والحب يجي ورى الزواج ..

ساهر .. تحجي صدگ انت .. شلون اخذ انسانه گلبي مايهواها .

حيدر .. اسأل مجرب . والله امي خطبتلي وحدة لااعرفها ولاتعرفني. وابوها متشدد حتى بالخطوبة لااشوفها ولااخابرها .

تالي بعد الزواج تعودت عليها وحبيتها وهسا مااگدر استغنى عنها . انت شتحجي وين اكو حب بهذا الوكت .

ساهر .. يمعودين خلوني هيج مرتاح . حتى زواج بعد مااريد واحنه هسا ذابين ارواحتنا بالموت بعد وينه الي يفكر بمرة ومسؤوليه ..

مسلم .. اي والله . واحدنا عنده ثلاثه واربعه . واذا صار علينا شي . الهم الله . لان ندري حكومتنا ماراح تهتم ولاتراعيهم . بس كله انسويه في سبيل الله وگاعنا مايدنسها الغريب ويوصل العرضنا ..

بقيت حوالي شهر بعيد عن اهلي وشغلي ومحافظتي ..

حنيت الهم هواي ..

بس كسرت خاطري مصبرتني عنهم ..

والوضع مو زين ومانگدر نترك المقر ..

كنت مااهتم واذب روحي بالموت ..

ومااعرف ليش ماخايف او اهتم . يمكن احس ماعندي احد ينتظر رجعتي ويخاف عليه ..

كانت ماكو اجازات قليله ..

من شهر ونص انطوني كم يوم اروح وارجع ..

رجعت متأمل فجر تتلگاني . وكنت اتخيل فراگي اثر بيها وتصارحني بحبها ..

كان وقت الظهر . فتحت الباب وتفاجأت بيها هي وكيان بالحديقة گاعدين ومتقاربين حيل ...

هو مااعرف شنو يهمسلها وهي مبتسمة ومنصية راسها

احس عيوني غوشت . لا مستحيل هاي فجري وطفلتي

صحت فجر بعلو صوتي .

هي طفرت من مكانها ..

ودخلت جوة ..

اتقربت منة . گتله استغليت ماكو رجال بالبيت وتجي تتحارش بعرضنا .

كيان .. اولا اني مو غريب عنها واقرب الها منك . وبعدين ماسويت شي مو برضاتها . هي رايدتني انت ليش تتدخل بينا ومسوي نفسك ولي امرها ..

لزمته من قميصه ودفعته حيل . اطلع برة كلب . واذا عتبت باب البيت اكسرها الرجلك فاهم .

كيان .. هههههه طالع ..بس اعرف ليش حارگ روحك ..

مو خوف عليها . بس لان رفضتك ..

بله متستحي رجال شكبرك والشيب تارس راسك وعينك على طفله ..

من گال هيج مااتحملت . نزلت عليه ضرب . مااردت انفعل بس هو جبرني .

الكل طلع على صوتنا . عامر وامي ومريم يسحبون بيه واني فاقد ..

جدتي .. ولك ساهر يمه شبيك . شوكت اجيت ولحگت تتمشكل وي ابن عمتك ..

ساهر .. وانتي نايمة وتاركة البيت الكنان يفتر بي .

فجر واكفه ع جهه ومخليه اديها ع حلگها .

جدتي .. ولك كنان شسويت .

كنان .. شسويت اشو اجة شافني عندكم تخبل وگام يعيط غير بيت جدي ابطل مااجي ..

امي .. وانت ماتجي الا وكت الظهاري لو تستغل نومتنا حتى تسرح بكيفك وي.... قاطعتها ..

يمة اسكتي ..

-قابل حاجية جذب اني...

گتلج كافي يمة . وانتو ادخلوا يله ..

دخلت قبلهم . وصلت يمها بس ماباوعت بوجهها ابد .

صاحت جدتي .. ساهر ماگتلي شگالك كيان وهيج تخبلت .

ساهر .. اسأليه شسوه . وتعاي احجي وياي ..

صعدت الغرفتي حتى من غير مااسلم على احد وعود اني صار هواي مفارگهم ..

سمعت هوسة جوة .. طلعت اشوف شكو

نعيمة .. الله لاينطيج خليتي الولد يتعاركون يجي يوم يتاكتلون بسببج ..

فرحانه مو لان يتعاركون علمودج ..

جدتي .. نعيمة كافي مالج دخل وانتي تعاي وراي للغرفة ..

اخذت جدتي فجر ودخلن . رحت الغرفتي

بعدما سبحت وبدلت نزلت ..

اجت كلها حولي وبوسوني اخواتي وعامر بس ماهر مموجود ببغداد طلع اسمه ويداوم بكليه الضباط .

جدتي ضايجة من الي صار . گمت بست راسها .

واخذت من خاطرها .

گامت تضحك وحضنتني ..

اما فجر ماشفتها بعد ..

تغديت ونمت لليل كلش يله گعدت . لان وصيتهم محد يگعدني من نومتي ..

شفت فجر تحوس بالمطبخ ..

شافتني رادت تطلع ..

-لزمتها .. شبيج .

-مابيه .

-احجي عدل هو منو المفروض يزعل اني لو انتي .

-وليش تزعل . قابل اني شمسويه . انت ربيتني وتعبت عليه ماانكر بس هواي تتدخل بحياتي وماتريدني اختار الي اريده تريد تجبرني على شي ماراغبته .

حتى جدتي اليوم رزلتني من وراك .

خليت اصبعي على شفايفها .. اشششش ولاكلمة بعد مالي دخل بيج وشتسوين سوي ..

بس ساعة التوگعين لاتگولين تعالولي ..

بس اريد اگلج شغله وحدة لو تفرين الدنيا كلها ماتلگين مثل ساهر ..

وهسا روحي من وجهي يله ..

بقيت اضحك على حظي .. مستحيل تكون هاي فجر الي عشگتها . هاي وحده ثانيه . ياخوفي لايطلع كنان يقرأ براسها ويقويها علينا ..

ليلتها مانمت ..

فجر متصوره نفسها تگدر تذلني وتكسرني. بس مااطلع ساهر اذا مااراويج الوجه الثاني الساهر ..

ثاني يوم ..

انتضرت جمعتنا بالغدا وابوي مامصدگ مسوي سفرة شكبرها وعازم عماتي واولادهن ..

واحنه گاعدين . گلتلها يمة اريدج تخطبيلي ..

بذيج اللحظه الكل سكت وباوعلي بس امي من فرحتها مااعرف صدمتها . گامت تهلهل ..

#بقلمي_الكاتبة_شمس

يتبع.........

اسعد الله مسائكم بكل خير حبايب💕

//// البارت السابع ////

#ساهـر_الفجـر ..

#الكاتبـة_شمس ..

ثاني يوم ..

انتضرت جمعتنا بالغدا وابوي مامصدگ مسوي سفرة شكبرها وعازم عماتي واولادهن ..

واحنه گاعدين . گلتلها يمة اريدج تخطبيلي ..

بذيج اللحظه الكل سكت وباوعلي بس امي من فرحتها مااعرف صدمتها . گامت تهلهل ..

نعيمة .. واخيرا يمة راح اشوف عرسك .. شگد دعيت وبجيت والحمد لله الي استجاب دعائي ..

جدتي .. اوكفي ولج خلي افهم .. شني بيوم وليله قررت تتزوج ومني هي ..

ساهر .. باوعت الفجر الي منصية راسها وتفرك بأصابعها شبيج جدة مو خابصتني شوكت تعرس ونشوف جهالك . هاي راح اتزوج والي اختارتها امي الي ..

جدتي .. يايمة يوم المنى نزفك ونفرح بيك ..

البيت صار ضجة والكل فرحان ويضحك .. بس بقت عيوني عليها . شالت راسها تباوعلي وبعدين گامت ..

انتبهت على بنين تهز براسها وماعاجبها الوضع ..

كملنا غدا .. وامي وجدتي يخططن ياخذن نسوان ويرحن ..

ساهر .. يمة اريد هاليومين نكمل الخطبه لان مالحگ لازم التحق .

ابو ساهر .. وليش هالاستعجال بويه خلي نحجي بالبنيه هسا ومن تجي مرة ثانيه تگطعون مهر ..

ساهر .. لا يابه اني اريد اخلصها بسرعة خاف اتأخر بالجيه الاجازة الثانيه ..

عامر .. اي يااخي واخيرا انفكت الجبسه .. وين ماهر عنك يطير من الفرح بس يسمع لان لازم سره وراك ..

الكل كان فرحان الا اني ..

كنت متردد بس لازم اخطو هيج خطوة . ماانتضر عمري كله ورى وهم ..

ترخصت وصعدت ارتاح ..

اجت بنين وراي ..

ساهر .. بنين لاتحجين اعرف شراح تگولين .

بنين .. من هيج اخذت رقم ايات مني البارحة .. شردت منها ..

ساهر .. مايخصج ..

بنين .. خويه جا انت تريد تخلص من فجر تروح توگع بحظن ايات ..

ايات اللسان وماتفيدك ..

ساهر .. اخوج اني مو ياهو الجان .. واذا هي اللسان اعرف شلون اروضها واخليها تمشي بطوعي .

ولاتخافين احنة متفقين على كلشي ..

بنين .. براحتك خويه ..

قبل ساعات ..

اتصلت على ايات .. يمكن حافظة رقمي عندها ..

-الو ساهر شلونك .

-هلا ايات انتي شلونج .

-بخير .. شوكت رجعت .

-البارحة . اسمعي ايات اريد اسألج كم سؤال وتجاوبين عليه ..

-تفضل .

-تدرين بأمي تريدج الي لو لا .

-هااا .اي من زمان محاجيه امي .

-وانتي رايدتني ..

سكتت

جاوبي لاتسكتين .

-انت ابن خالتي وماالگي احسن منك .

-وتعرفين اني رايد منو لو لا .

-اي بس الي تريدها ماتلوگلك..... قاطعتها .

-مايخصج بيها ولابگلبي... بس اريد اگلج شغله اذا اتقدملج اني ساهر وبس . من غير گلب ولامشاعر .

تقبلين بيه لو لا ..

-اي اقبل .. ورى الزواج اخليك تغيير رايك .

-ايات .. فكري . انتي راح تاخذين جسد بس . والله شاهد عليه مااقصر وياج ابد واعاملج بالزين وطلباتج مجابه ..

بس اكثر من هيج مااگدر انطيج ..

لهذا اريدج تفكرين زين قبل ماتجاوبيني وقبل مااحجي وي اهلي . الج منا للظهر .

-من غير ماافكر . اني موافقة والي تريده يصير .

-هاهي احجي وي اهلي واخلي يجون يخطبوج رسمي .

سديته منها وع الغدا فاتحت اهلي ..

دزت عليه جدتي ..

نزلت . وامي كل ماتشوفني تهوس وتصفگ .

يمكن لو خاطب فجر جان گلبتها عزا ..

-ها جدة صحتيني ..

-اي يمة تعال ..

اگلك يمة انت وازيتنا وماعدنا وكت .. اني اگول تلبسون بس حلقات بيوم المشيه وهاهي لاحفله ولاهوسه .

-جدة روحوا اليوم احجوا وي خالتي وشوفوا طلباتهم . وخلي باجر المشيه وبالليل نجيب سيد نعقد ونلبس حلقات ..

-اي زين ننطيهم فلوس لو شلون ..

-جدة اني مااعرف بهاي السوالف .. اني انطي فلوس الامي وهي تتكفل بكلشي ..

امي من سمعت ماكو هوسه وحفله ضاجت ..

للعصر اخذن سياره . جدتي وعماتي ومرت عمي حمزة وراحن خطبن ايات من اهلها ..

ومناك رايحة للسوگ هي وعامر ومتسوكه اشكال .. كرزات للملبس وحلويات وماخذه قياس محبس ايات ومشتريه حلقة وخاتم الها وفستان .

وكل ساعة تراويني شوف وشوف . وهاي المرتك ومرتك . من هسا سوتها مرتي ..

اني بس اهز راسي ومااحجي ..

اما فجر فحسيت شعورها عادي ومامهتمة ..

خابرت على رعد وجماعتي كلهم وخبرتهم بالمشيه والخطبه والكل تعجب . لان صارت مفاجأة .

اما ماهر ..

گال احاول اجي حتى لو الظهر المهم الحگ ع العقد ..

ثاني يوم ..

رحت اشتريت قاط رسمي وهاي اول مرة يمكن البسها .

صعدت بدلت والولد يمي عامر ورعد ومراد وولد عمتي بتول .

رتبت شعري ونزلت ..

الكل تعجب بيه وامي خلصتها حرمل وتصلي ع النبي .

المفاجأة بفجر .. اول ماشافتني صفنت وماشالت عينها الحد مانزلت ..

اخواتي يرگصن گدامي ويهوسن ..

( اخونا خوش اخو يستاهل الهوسـة)

اني مستمع بمنظرها وهي صافنة ..

گلتلها ..

ها فجر شو ماتهوسين الي . معقوله مافرحانه الاخوج لو العمج .

هي جمدت ..بمكانها وراحت للمطبخ..

تجمعت الزلم كلها .. وصعدنا بالسيارات ..

بس امي والنسوان يجون ورانا من تخلص المشيه ..

كملت المشيه . وگالوا راح نعقدلهم ..

احس گلبي انكمش .

وساعتها يمكن تندمت .. بس مو ساهر الي يوعد ويخلف بوعده .

بدأ السيد يقرأ واني اردد وراها الى ان كمل .

وبعدين راح الايات . عقدلنا وكمل اشتغلت الهلاهل ..

دخلت للبيت نلبس الحلقات ..

عيوني تركت ايات ونسيت هي زوجتي . گبل اتجهت الفجر اتمنيت فجر بمكانها وراح ادخل البسها ..

لبست ايات الحلقه ولبستني ..

بس اخواتي مايگعدن راحة ..

گام يهوسن .. ( حبها ولك حبها ولتخاف من امها )

بستها براسها وگعدت ..

جابولنا عصير وكيك ..

وسمعت هوسة دخلت للبيت .

باوعت ماهر هذا واخيرا لحگ ..

#بقلمي_الكاتبة_شمس

.............................. ..

يهوس بنص هو وعامر ويرگصون ودور سحبوني ارگص وياهم واجت امي بنصنا وجدتي تهوس بعصتها رحت بست راسها واديها ...

تالي گلتهم كافي فصحتونا بوسط النسوان يله خلونا نطلع ..

ماهر .. خرررب خبصتنا ومشغل الاسطوانه الحزينه وطلعت ايات .. اشو امي من يومها تگلك اخطب ايات ليش كنت يائس ..

رعد باوعلي ودنگ . افتهم مو هي . لان دوم اسولفله على حزني ومعاناتي بحبها ..

غيرت الحديث بسرعه حتى مايسمع ابوها لو اخوانها ..

بالبيت ..

لينا .. ولجن شفتن ماهر يخبل طالع فدة للضابط مالتي

بنين .. ولج اسكتي فضحتيني اكو واحد ماحس عليج . وگفتي على طولج وتصفگين وفاتحة حلگج . عوزج بس تروحين ترگصين وياها ..

لينا .. اي والله لو مو عيب رگصت وياه .. مشتاقتلو موت فجر .. اگلجن من اجيت لسا هاي ايات بس تخوزر عليه تريد تاكلني ..

بنين .. لاتباوعليها ديري وجهج ..

فجر .. شعليه بيها .

براء .. والله راح يصير اكشن بعد الزواج .. من هسا اشتغلت الغيره . وطبعا اني اصف وي الاقوى .

فجر......... ..

گرصتها بنين . وسكتت .

استغربت على نضرات ايات .. تباوعلي وكأنه ضرتها . مع العلم اني ماراح ااثر عليها ولا الي علاقة بيهم ..

صحيح خسرت انسان غالي عليه . بعد ماكنت متصورته اخ او سند الي .

وخلصت عمري اگله عمو .. لان هو الوحيد الي حماني من جبروتهم واتهامهم اليه بوفاة اهلي ..

كنت اخلص يومي بغرفة جدتي . حتى ماتضربني عمتي ام ساهر .. الي كانت دايما تضربني لو تسحل شعري واني اسكت مااگدر ابجي . لان تهدد بيه اذا حجيت يشمروني بالشارع ..

لو يودوني الخوالي يكتلوني ..

بس ساهر كان يطبطب عليه ومن ابجي يمسح دموعي ..

ويشتريلي كلشي بنفسي ..

الى ان كبرت وتعلقت بي وگدر يعوضني عن الحب والحنان الي فقدته ..

كنت احس واضوج بس دايما افضل انه اتصرف بطفوليه واضحك مجامله حتى مااضوجه .

لان من يشوفني ابجي يضوج ويتعارك وتصير مشكلة بسببي ..

كبرت وفهمت لكن احب اهرب للطفوله حتى اضيع النقص الي بداخلي ..

ماعندي احد احجي وياه ..

بنين جامدة واكثر الاحيان تدرس ..

اما براء .. بس تبسط بيه وتتعارك وياي ..

ماعندي احد اشكيله او افضفض اله .الى ان اتزوج عمو حمزة ..

واجت باجي مريم البيتنا . انسانه طيبه حيل وتحب الكل .

عمو حمزة كبير . وهي صغيره بس تحبه .

وكنت اتعجب عليها شلون تحب انسان اكبر منها بهواي .

وخاصة من ماصار عندهم اولاد ..

اكيد السبب كان فارق العمر بينهم ..

كنت اتمنى احد يسولفلي عن اهلي وامي وخوالي .

بس من اسأل الكل يسكتني .

ويبقون يحجون على خوالي وشلون سجنوهم لما امي ماتت . لهذا الكل حملني ذنب اني اقترفته من غير وعي .

عشت حياتي كلها بتناقض وتفكير ..

الى ان اجوا بيت خالوا عدنا ..

فرحت حيل من شفتهم .. حتى اولادهم تذكرتهم بسرعة لان كنا دايما نلعب سوية من تجي عمتي لهنا او نروح احنه للانبار ..

بس سما كانت صغيره ماتذكرتها ..

من اول يوم وكيان ينضرلي نضرات اعجاب ..

كنت اتلافه نضراته بس بعدين بشقاه وسوالفه قربني منه ..

واخيرا حسيت بأهتمام شخص بأتجاهي ..

ومن عمتي تصيحلي جنتي .. فرحت لان كيان شكله حلو وشخصيه واي وحدة بمكاني تتمناه ..

كلامي وضحكي وي كيان .. خلى ساهر يضوج ويتعصب عليه الى ان مرة من المرات صارحني بمشاعرنا .

هنا انصدمت ومااعرف شأسوي ..

وحاولت ابتعد عنه قدر الامكان ..

مامعقوله انسان حبيته ووثقت بي . ويمكن حاسته مثل اب الي .

ينضرلي بمشاعر ثانيه ..

وگمت اخاف منه لما يعصب اكثر لو يسحبني بالغرفه عيونه تصير حمر من الغضب واحس بأي ساعة ينفجر عليه او يجبرني على شي مااريده ..

گمت ابتعد عنه وخاصه بعد مااحاول يتقربلي بالممر لو ماالله ستر وسمعنا حركة وابتعد عني ..

هذا الشي خلى فجوة بيني وبينا ..

واتقربت الكيان اكثر . بلكي يحميني وماانجبر اتزوج انسان مااريده واكبر مني ..

كلام كيان ورومانسيته خلتني اتعلق بي واحبه ..

ولما سألته ع تركهم الي وخالي ماسأل ..

گال ..

عمامج منعونا نشوفج وبعدوج عنا. حتى يسيطرون على ورثج وكل اعتقادهم انه احنه طمعانين بيج ..

وابوي يحبج لان انتي بنت اخته الوحيد شلون يفرط بيج ..

انصدمت من سمعت كلامه . والي اكدلي هذا الشي الكره الي اشوفه بعيون عمامي وحتى ساهر الهم ..

مرت عليه ايام كرهت ساهر بيها . لان يتحكم هواي بيه وخاصه من شافنا اني وكيان وضربه ..

مااتحملت وگلتله الي بگلبي كله . ردته يبتعد عني ..

بس الي فاجأني خطوبته المستعجله من ايات . هو مايحبها ومايطيقها .

معقوله سوه هيج بسببي لان حجيت عليه وجرحته ..

بس من شفت شكله من نزل ع الدرج ولابس قاط تفاجأت اللبس العربي كان مكبره حيل .

بس بالقاط طلع يخبل وحلو ..

وهو شكله فرحان ويرگص . ويحاول يستفزني ويگولي ماتهوسين معقوله مافرحانه الاخوج ..

ضجت حيل منه ..

#بقلمي_الكاتبة_شمس

.......................................... .

بدلنا ورحنا البيت العروس .. او ماشافتني دارت وجهها وسلمت بثگل ..

عبالك راح اخذ ساهر منها ..

وتسولف هي وبنت ختلتها عليه ويباوعن .

حاولت اتجاهلهن كم مرة ومااباوع ..

بس من شفت ساهر شلون يلبسها ويضحك ودور يرگص هو واخوانه .

مااعرف ليش حسيت بالغيرة واتمنيت اني بمكانها .

وانه ساهر ديلبسني الي ويبوسني الي ..

شعور اناني اول مرة احس بي . يمكن لان كان اهتمامه بس الي ومااقبل احد يشاركني بي .

مثل حب طفله الابوها .

او غيرة من نوع ثاني مااعرف ..

حسيت بضوجة وگلبي انقبض.. رحت الجدتي. هاجدة نروح عندي امتحان ولسا ماقاريه شي. .

جدة ..هسا شويه . من كون عندج امتحان شعندج اجيتي .سكتت وگعدت الى ان دزوا علينا وگالوا يله راح نرجع .

فرحت لان راح اطلع منا .

وحتى من غير مااباوع الاحد .

خليت عباتي ع راسي لان لابسه بنطرون وبدي ضيگ .

وطلعت گدامهم ..

ساهر ..

بقينا شويه ببيت خالتي ..

والولد گالوا خلونا نرجع للبيت نريد نحتفل بيك هناك .

اني ماقبلت وعاندت .

بس همة اصروا ..

دزينا خبر للنسوان يحظرن ارواحتهن ..

شويه مااشوف الا فجر طلعت بسرعه وعباتها تتطاير ولابسة جينز والجسم يكتل بس الوجه معبس .

يمكن واحد مضوجها ..

ردت استر عليها من العيون .

رحتلها بسرعها .. لمي روحج شنو هاي عباتج طايره .انتي شوكت تكبرين .

هي ضايجة واني عطت بيها . نزلت دموعها مااتحملت .

-شبيج من وياج ..

-مابيه . بس خليني اروح اختنگت ..

-ليش اكو واحد ضوجج .

-لا ماكو احد . بس مستعجله عندي امتحان .

-ها زين .يله روحي اصعدي بالسيارة بسرعه ولمي على روحج ..

-اجت امي تركض .. يمة انت بعد خطبت بطل سوالفك هاي .

-ياسوالف يمة . قابل احجي وي غريبه غير بنت عمي .

-احم اي خفف من السوالف . ترى مريتك تغار ..

-اگلج يمة مو بدينا بهاي السوالف. اطلعي منها انتي وهي تسلم ..

-يا شحجيت اني . بس هاي مثل امها حيه . تركض ورى الزلم المتزوجة ..

-سحبتها على جهه .. يمة ترى عمتي ازاد جانت تحب عمي ومو بعينها واحد . بس ابوي الي كتل روحه عليها وهو متزوج وعنده جهال . لاتخليني احجي ..

-يا هاي جدتك الي قشمرتك بهاي السالفه .

-كافي يمة ويله روحن اصعدن . واني رايح گدامج نجيب عشا من المطعم لاتسون انتن ..

مشينا اني ورعد نجيب عشا .. وگتله اليوم يمنا ابقى نسهر وي الولد ببيتنا ..

باوعلي وگال .. الي تحبها بنت عمك مو . هاي الي ربيتها انت ..

فتحت عيوني على وسعهن وگتله شنووو منيلك هذا الحجي .... ماكو هيج شي !!متوهم .

#بقلمي_الكاتبة_شمس

يتبع....

.................. ..

هلو حبايب .. اعذروني اذا البارت قليل . لكن الله شاهد مريضه وفولاونزا وكتبتلكم ونزلت ..

اريدكم تقدرون ضروفي هاي الفترة لان اتأخر بالتنزيل.

ارآكم بالقصة .

وعجبتكم او لا .

//// البارت الثامن ////

#ساهـر_الفجـر ..

#الكاتبـة_شمس ..

أردتـكي جنتـي .. اردتكـي حلالي...

فإذ بكـي .. النّار التي أحرقـت قلبـي وروحـي واخاف ان تلفـح وجهي فأتشوه ..

باوعلي وگال .. الي تحبها بنت عمك مو . هاي الي ربيتها انت ..

فتحت عيوني على وسعهن وگتله شنووو منيلك هذا الحجي .... ماكو هيج شي !!

انت متوهم ..

رعد .. ساهـر انت اخوي وصديقي من الطفوله ورابين سويه ومن كلام ماهر عرفت مو نفسها الي تحبها خطيبتك .. والي اكدلي هذا الشي لهفتك عليها من طلعت وشلون راحت عيونك عليها وركضتلها ..

اسوق واني معصب .. رعد انت غالي عليه لاتخليني أضوجك اذا سمعتك تحجي هذا الحجي ازعل وزعلك وياي

رعد .. ازعل مني وضوج المهم مااريدك تتعب وتعب بنت الناس وياك ..

يااخي اذا هي بنت عمك. ليش خايف مااخذتها ..

ضربت ع الاستيرن .. ماتريدني فهمت . صارحتها ورفضتني وتگلي انت اكبر مني وحاسبتك مثل ابوي او اخوي ..

قبل كم شهر بطلت كلمة عمو .. شلون تريدها تحبني بعد .

رعد .. جا انساها وعيش حياتك . تزوج وكون عائله .

ساهر .. اييييه يامسهل الحجي .. بس الفعل صعب ..

رعد .. الله كريم خوي .. انت بس فكر بخطيبتك وبيتك وداعتك تنساها .

ساهر .. عوفنا من هاي السالفه وخلينا ننزل نجيب عشا .

فجر .. وصلنا للبيت بدلنا وجهزنا سلطات والخضرة بس العشا يجيبوه من برة ..

جدتي گالت سون حلاوات انواع للولد خاف يسهرون هنا.

وراح ماهر جاب فواكه واجة .. جان مشتاق اللينا ومتلهف . وراحوا بمكانهم للمعتاد بالممر يسولفون ..

الله شگد حلو حبهم ..

بعد ساعة اجه ساهر جايب كباب ودجاج شوي . لان عماتي هنا واصدقاء ساهر ..

سوينا للولد عشا وحدهم بالاستقبال .

واحنه مدينا السفرة بالصاله وحدنا ..

تعشينا وكملنا ..

وعمة نعيمة كل ساعه وتگول .. جنت ناذرة شگد نذوره حتى ساهر يتزوج ايات وتحقق نذري والله خلصنا من المصيبة .

تقصدني !!

ادري بيها ماتحبني .. ومن تحجي هيج عبالها اضوج لو ازعل .

هي عبالها اني ضايجة بس اني ماسديت حلگي من الضحك وفعلا بيومها تونسنا ..

بعد العشا .. الولد شغلوا ام بي ثري .. ويرگصون ..

واحنه بقينا بالصاله ..

والصراحة الصوت مال اغاني والام بي ثري عالي .

سوالنا واهس .

وبقينا نرگص . واني حليت شعري واهز منطلقه .

شفت كيان دخل من باب المطبخ ..

بسرعة لبسنا حجاباتنا ..

هو مااعرف شگال العمتي .. وطلع .

دزالي رساله تعالي للحديقه ..

استغليت الكل ملتهي ..

رحت اله ..

ها كيان شرايد خاف واحد يشوفنا ..

سحبني اله .. اشتاقيتلج صار كم يوم ماشايفج ..

فجر .. بسرعة دفعته مني .. حسيتة مو طبيعي . گتله روح منا بعدين اخبارك جدتي ماتقبل .ومنا ولد ليطلعون .

تركته ودخلت بسرعة ولازمة گلبي من الخوف ..

صحيح احبه بس مااحب تصرفاته .

ساعات يتحول الانسان ثاني ..

وكم مرة تعاركت وياه وگتله . من نتزوج يله تتقرب مني

بس هو مايسمعني ..

حتى بطلت اروحلهم من ورى هيج شي .وبحجة جدتي ماتقبل .

وكنت اكتفي بس نتخابر ونسولف ..

ومرات هم يتعمق بالسوالف بس اني اسكت واخجل من كلامة ..

وهذا الشي يضوجة ويگلي انتي باردة ..

رجعت گعدت يم البنات ..

براء .. وين جنتي ؟؟

فجر .. بالمطبخ ..

براء .. هسا اجيت من المطبخ ماكو .. الله يستر من تحت السواهي دواهي ..

فجر .. شتقصدين ؟؟

براء .. لا ماقصدي .. بس الله سترنا ومااتورط اخوي هيج ورطه ..

عزاااا يمكن هاي شافتنا . بسرعة گمت من يمها . الي يوگع باللسان براء مايخلص ..

شورطني هالورطة ..

بقيت كم يوم اتجنبها ومااباوعلها وهي بالرايحة والراجعة تسمعني حجي ..

ساهر .. بقيت يومين ورجعت التحقت .. وبقيت شهر يلة نزلت ..

وهاي الفترة لگيت امي مجهزة كلشي ومكمله نشيان ايات وحتى الفرشات والغراض مكملتها ..

من رجعت للبيت ..

استغربت اكو عمال بالبيت ..

دخلت الغرفة جدتي گبل . البنات گاعدات كلهن بس امي تطبخ بالمطبخ ..

بست راس جدتي وسلمت ع البنات ..

ها خير شنو هاي العمال ..

دخلت امي ..

يمة جاي نرتب بالطابق الفوگ .. وصبغنا غرفتك وعدلناها .

ساهر .. يمة تحجين صدگ جا اني شنو موقعي هنا .

غير تاخذين رأيي . ماتبطلين هاي السوالف .

دووم تتصرفين من كيفج ..

نعيمة .. يمه انت بالشهرين تجي كم يوم وين تلحگ تگضي شغل ..

اذا على هاي الحسبه ماتعرس بعد سنه ..

-لو ابقى سنتين .. شعليكم بيه .. وان شاء الله الاخشاب هم اختاريتيهن ..

-لايمة هاي خليتها على ذوقك ..

-لا زين .. نعم الله من خليتي شي بأختياري ..

-يمة شبيك .. غير وليدي وافرح بيك ..

جدتي .. ها ينعيمة مو گتلج مالج شغل لما يجي ساهر وهو يختار بكيفه .. عاندتي وذاك الاغبر وياج .. قابل انتو الي تعرسون لو هو ..

ساهر .. هو اني شفهمت من خطوبتي حتى تعرسيني بكيفج ..

نعيمة .. شتفهم يمه . البنيه بنت خالتك وتعرفها . والخطوبه مو حلوة اذا طالت تجي يمك وفهمها وعلمها عليك ..

هزيت ايدي .. لا حول ولاقوة الا بالله . باوعت الفجر تضحك .. طلعت حرگتي بيها ..

وانتي عليمن تتمضحكين . اني مشعول اهلي وهاي تضحك ..

فجر .. قابل بس اني لو كلها ضحكت ..

ساهر .. بله السانج صاير بيكيسي مايتلاحگ عليه ..

فجر .. اها سكتت وخليت ايدها ع حلگها ..

جدتي .. الله لاينطيج ينعيمة حرگتي دم الولد اول مااجة

روح يمة بدل وارتاح ومعليك بأمك ..

ساهر .. وين ارتاح ماتگلولي اذا غرفتي مطلعتها بره .

راح اروح الغرفة ماهر ارتاح . لحد يگعدني ..

نعيمة .. جا ماتتغدا .

ساهر .. شبعت يمة . بس اريد انام .

#بقلمي_الكاتبة_شمس

............................................. .

صعدت والطابق الفوگ مگلوب ..

سبحت وبدلت ورحت بغرفة ماهر ..

للعصر يله گعدت على صوت وحدة تصحيني ..

اتخيلت فجر واديها تطبطب على زندي ..

واحس بأصابعها تلامس ايدي ..

ابتسمت وفتحت عيوني .. شفتها ايات طفرت ..

ايات شجابج ..

ايات وهي تبتسم .. مااتحملت من سمعت اجيت . مشتاقتلك وخالتي گالت تعبان ونايم . ردت اجي افاجأك .

رفعت شعري لورى وفركت وجهي ..

-زين سويتي .. شلونج انتي .

-زينة انت شلونك . اشو ضعفان حيل ..

-ليل ونهار گاعدين وماكو لانوم ولانلحگ ناكل .. من كمين الكمين . طبعا اضعف ..

-وشمنتظر ماتبطل .. ليش ذاب روحك ع الموت منو يفيدك ..

-اذا ماندافع على عرضنا منو يدافع ..

-وليش ميدافعون اهلها عنها . مو هذولي بيت عمتك انهزموا واجو . مايروح رجل عمتك لو كيان ومراد يحاربون ..

-ايات انتي جاية لان مشتاقتلي لو تحاسبيني . وبعدين اني او همة كلها گيعانا وبعد كل واحد وضميرة .

اني لاغيرتي ولاضميري . يخلوني انهزم واكو شياب تحارب هناك ..

وعبالج مستفادين شي . بس اكو ذمة وغيرة وشرف عندهم هي الي تخليهم يدافعون .

ولهنا وكافي مااريد اسمع حجي زايد .

-اذا تزوجنا شلون ابقى انتظر هالگد يله تجي زواجيش هذا ..

-ايات من وافقتي عليه تعرفين اني شنو اشتغل ووين ..

-اي صحيح .. بس....

-ماكو بس هذا اخر حجي عندي .. وبعدين العرس مو هسا لاحگة تفكرين ..

-ليش مو خالتي گالت هذا الشهر ..

-انتي ماخذة خالتج لو ماخذتني .. باعي يبنت الناس اذا من اولها فلانة گالت وفلانة حجت . ترى مانتراهم هيج .

اني احب المره الي تسمع كلمتي وتطيعني اخليها على راسي ..

بس اذا تبقين تسمعين الحجي تخسريني!! .من هسا اگلج..

-لاهاهي بكيفك .. صدگ شكرا ع الهدية ..

-ياهديه ؟؟

-خالتي انطتنياها جايبلي موبايل عجبني حيل اشكرك ..

-ضحكت .. بالعافية .. وبداخلي ( اويلي عليج يمة خوش تلعبين )

-يلة گومي خلي ننزل . ترى جوعان لسا ماتغديه ..

-هسا انزل اسويلك بيدي ..

نزلت ايات واني وراها ..

اتباوع الفجر .. واضحك ..

هي دارت وجهها وراحت گعدت يم جدتي ..

ايات .. خاله شنو الغدا ساهر جوعان اريد اسويله .

نعيمة .. يمة مابقى لان عمال واحنه تغدينا خلص. طلعيله لحمة من المجمدة واشويله ..

گعدت يم جدتي .. سمعت فجر . تباوع الايات وتگول لوگية ..

هزيتلها براسي .. هااا خير .

تركتني وگامت .. ضحكتني بنت اللذين ..

جدتي .. يمة ساهر شو بالبدايه خبصتنا مااريدها ومااريدها وهسا صارلك ساعه حابسه بالغرفه مالتك . ترى هذا الحجي مايصرفلي .

البيت بي بنات مايصير هيج حتى لو عاقد عليها . اختشوا شويه .

ساهر .. ها جدة وين راح بالج .. لاتخافين مو اني الي اسويها . بس هيج سوالف عاديه لاتخافين ..

جدتي .. لايمة اني واثقه بيك . بس هاي الخفيفه بالعجل زاحت الخشة وصعدت لفوگ . طالعه على خالتها والله امها فقيرة ماعندها هيج سوالف ..

ساهر .. ها جدة خلصت امي دور درتي على ايات ..

جدتي .. گوم قليل الحيا . قابل اني ضالمتهن شو اثنينهن نفس الطينـة ..

صحت .. ايات اذا خلصتي الغدا جيبيه بالاستقبال ..

(وتگدرون تگولون انهزمت من حريم السلطان الي عندي) وحدة تصد ووحدة ترد خبلنـي ..

فجر .. رحت للمطبخ يم البنات وايات دا تشوي لحم الساهر ..

شافتني گامت تحجي وتسمعني ..

وج عيني براء .. هاي شنو ساهر طلع رومانسي .. صار ساعة فوگ ميخليني اطلع يگلي مشتاقلج .. وشفتي الموبايل الي جابه الي من الغالي ويخبل احسن من ذاك الي گلتيلي عليه موديله قديم ..

عرفتها تقصدني .. ضجت من كلامها لان اني ممسويتلها شي ليش هيج تغار مني عبالك ضرتها ..

گمت ردت اطلع واسمع براء وهي يضحكن عبالك متقصدات ..

اجت باجي مريم يمي .. طبطبت على كتفي ..

مايهمج منهن ..

ابتسمتلها ودخلت .. لمحت ساهر يباوع والباب مفتوح ..

لان بين المطبخ والاستقبال ممر للصالة ..

ساهر .. فجر تعاي ..

فجر .. رايد شي ..

-شبيج ضايجة اكو شي .

-لا ماكو ..

-تعاي هنا شبيج شاردة ..

-لا هيج احسن مو اخاف خطيبتك تغار ..

-والله مبين انتي الي تغارين ..

-اني .. ههههه على شنو اغار بالعكس فرحانه الك لان واخيرا راح تتزوج وتستقر ..

-هااااا اذكرج بهذا الحجي ..

اجت ايات ضربتني بكتفها ..

شويه واكفه بوسط الطريق متشوفين الصينيه بيدي .

ساهر .. شبيج ايات ؟؟

-مابيه ياعيني بس وكفتها هيج محلوه ..

-اني صحتها بعد شنو المو حلو بوكفتها ..

فجر تركتنا وراحت وايات اخذت على خاطرها ..

اوووف ساهر .. استلم مو هاي الي جبتها الروحك تستاهل ..

اكلت بسرعة .. وگلتلها جهزي نفسج .. حتى اروح للمحل واخذج وياي اوصلج البيتكم ..

ضحكت وگالت ثواني واجهز ..

...................................................

صعدت بدلت ونزلت لگيت ايات منتضرتني ..

وي طلعتي شفت فجر تريد تطلع ..

-ها وين رايحة ؟؟

-البيت خالو عمار ؟؟

-والمغرب .. مارحتي العصر ؟ ملاحظة صايرة متاخذين حجي ..

-گلت الجدتي وهي سمحتلي شبيها يعني ..

-هااااا ارجعي ماكو طلعة هسا .

-ليش يعني .. ضايجة واكو موضوع مافاهمته بالرياضيات اريد لينا تشرحة الي ..

-ارجعي اني اشرحلج .. لو بنين يمج . الا لينا ..

ايات .. ساهر شبيك خليها تروح شعليك بيها ..

-ايات لاتتدخلين !!

وانتي گتلج ارجعي ماكو طلعة هسا . واذا رجعت ولگيتج مو هنا مايصير خير ..

فجر .. هففففف هسا انتو مو تطلعون وتتونسون اكو واحد مانعكم ..

ساهر .. اذا تردين تعاي ويانا تونسي ..

فجر .. لا شكرا .. مااريد اصير عزول روحوا انتو . دخلت وسدت الباب ..

ابتسمت .. دارت وجهها ايات عليه درت وجهي وضيعت ابتسامتي ..

ايات لزمت ايدي واني اسوق .. ساهر لاتسوي هيج اضوج ..

ساهر .. شمسوي بنت عمي واحاسبها مثل مااحاسب اخواتي .. الليل خيم وهي تريد تطلع شلون اخليها براحتها تروح وترجع ..

ايات .. بس...

ساهر .. شتگولين نروح باجر نشوف الغرف اذا فارغ..

ضحكت ونست كلشي ..

-اي بكيفك .

وصلتها الاهلها ورحت للمحل ..

لگيت عمي حمزة بي .. سلمت عليه .

وگعدنا نتحاسب ..

حمزة .. ساهر . ناقصنا بضاعة صار هواي مامسافر ..

ساهر .. اي والله . انشغلت هواي وبالگوة جاي اجي يومين وارجع ..

ماكو غير اخابر الوكيل يدزلي تصاميم واختار ويدزهن الي بالشحن ..

حمزة .. اي الا هيج ..

جاي احجي تفاجأت برعد اجة . حضنته وسلمت عليه ..

وعمي حمزة استأذن وراح يم ابوي ..

رعد .. بذات اجيت وماتخابر ..

ساهر .. ولك هو اني شنو شفت . اول مااجيت لگيت گالبين البيت ويصبغون بغرفتي ومجهزين كلشي وراح يعرسوني واني ماادري ..

رعد .. اي شمنتظر ماتتزوج .

ساهر .. خلي اخذ نفس يله .. وبيني وبينك اريد اشوف سالفه داعش هاي شوكت تخلص يله .

خاف اتزوج واموت وتبقى البنيه معلگة ..

رعد .. اسم الله لاتگول هيج .. اذا نيتك مو زواج المن خطبت ..

ساهر .. هاااا رجعنا .

رعد .. لاعمي سكتت ..

ساهر .. ههههههه ولك حتى اذا انت سكتت امي راح تبقى وراي الى ان تزوجني ..ودها اليوم قبل باجر.

رعد .. حقها ابنها الجبير وتريد تفرح بي ..

رحت اني ورعد لليل كلش يله رجعت ..

شفت ابوي وجدتي يتعاركون ..

اول ماشافني اجة عليه . مو هاي ترباتك ربيناها وتعبنا عليها تالي عضت الايد الي ربتها ..

-شكو يابه .. هاي بدل ماتسلم عليه تتلگاني هيج .

-ولك شتلگة .. تدز خالها عليه وتطالب بحصتها من الربح

جاي تاكل وتشرب منين مو من حصتها دراستها وكروتها منين مو من حصتها ..

اباوع على فجر .. تبجي ومخليه اديها على حلگها ..

سألتها .. فجر صحيح هذا الحجي انتي گايله الخالج يطالب بحصتج ..

بعدهي ماحجت قاطعنا ابوي ..

خلي تلم ملابسها وغراضها وتولي الخالها ومن باجر تجي حصتها وراها . مااريدها ببيتي بعد ..

-اوگف بويه خلينا نفهم .. شنو تروح لهناك ذولاك اهلها لو احنه ..

جدتي .. ولك محمود شو ماتعرف تحجي بكيفك تطردها من بيتي . عود من اموت اطرد بكيفك مادام راسي يشم الهوا البيت بيتي مو بيت واحد ..

فجر .. والله اني معليه مالي ذنب . بس مادام هيج ماتردوني اني هم ماابقى هنا . هسا الم غراضي واروح .

اتقربت منها .. روحي ادخلي جوه ولاتأزمين الامور .

-ماتشوفه شلون يتهمني من غير مايعرف السالفه والله ماگلت الواحد روح . هو وحدة راح .

-شلون وحدة ..

ابو ساهر .. انت لسا تحقق وياها . خلي تولي گتلك مااريدها هنا ..

فجر .. لاتخاف اني ماباقيه هنا .. كافي ذله خلصتوا عمركم تذلون بيه . اذا ع اللگمة اعيش مگدايه ولااعيش عدكم ..

اتهسترت ساعتها من عمي طردني .. وملخت روحي وابجي ..

اجة ساهر راد يحضني ويهدأني . دفعته .

وخر عني كلكم نفس الشي . تحكمون وتتهمون من غير ماتفهمون السالفه ..

قبل من كنت ابجي اذا واحد عيط عليه او ضربني ويحظني ساهر . اسكت لان احس بأمان بحظنه . امان ابويه الماشبعت منه وحنان امي ..

بس هسا مااحس بذاك الامان بعد وكأنه ضعت وعايشه بعالم الوحدي ..

مااتحملت ظلمهم وجبروتهم ..

وامة الي تگلي بنت ازاد كلشي يطلع منج .. وتتهمني بأمي وتكرهني الكرهها ومااعرف السبب !!

استغليت هوستهم وعركهم .. خليت حجابي على راسي وطلعت البيت خالو .. عسا وانه الگي الحنان والانصاف الي مالگيته بحظن عمي اخو ابوية ..

#بقلمي_الكاتبة_شمس

يتبع...

صباح الورد . لعيون السهرانين ..

//// البارت التاسع ////

#ساهـر_الفجـر ..

#الكاتبـة_شمس ..

استغليت هوستهم وعركهم .. خليت حجابي على راسي وطلعت البيت خالو .. عسا وانه الگي الحنان والانصاف الي مالگيته بحظن عمي اخو ابوية ..

طلعت وعيونـي تبجي دم .. ليش هذا حظي .

لان ماعندي ابو يدافع عني وام تحميني ..

ربي ليش مااخذتني وياهم ..

ليش خليتنـي هنا ..

وصلت البيت خالي .. گمت ادگ الباب بلا وعي ..

بعدهي ماانفتحت الباب ..

شفت واحد سحبني من ايدي ..

شهگت !!

-وين موليـة .. من يمتى صاروا بيت خالج اهلج وتلتجأين الهم .. مو همة سبب المشكله ..

-وخر عني .. بلكي الگي عندهم الحب والاحترام الي مالگيتة عندكم ..

خلصت عمري اضحك واجامل بالكذب بس حتى مااقهرك ولااقهر جدتي ..

بس انت تغيرت وجدتي كبرت ومو حمل مشاكل ..

انفتحت الباب ..

ساهر .. شفت خالها وكيان طلعوا ..

گلتلها .. يله فجر امشينا للبيت . الدنيا ليل ومنا شارع فضحتينا ..

فجر .. مااروح خلينـي هنا .. مو دوم تعيروني بأزاد .واني بنت أزاد .

لليوم ماگالوا بنت محمد ..

خلص راح اريحكم مني وابقى عند اخو ازاد ..

ساهر .. فجرررررر لاتعصبيني تعاي وياي ..

كيان .. اعتقد سمعت رأيها .. يله توكل منا .

ساهر .. انت لاتتدخل لااسوي شي مايعجبك .

كيان .. اي ادري بيك كلشي تسوي عصابجي وهمجي ..

ساهر .. اني ضايج من فجر وعنادها .. ومن ابوي والي سواه . وزودها كيان وضغط عليه حيل خلاني افقد واضربه بلا وعي ..

بالگوة سحبني ابوه منه ..

عمار .. كافي ولك بباب بيتي وتضرب ابني.  محمود يجي يسطر عليه قوانين بالاخلاق ماعرف يربيك ..

ساهر .. اني تربات شيوخ ومضايف واعرف الاصول .. بس شوف ابنك بنص بيتنا وعينه ع عرضنا ويتطاول على الاكبر منا ومايحترم .

طلعت عمتي والبنات ع الصوت ..

ابتهال .. شكو يمة ساهر شبيكم..

ساهر .. ماكو شي عمة . بس شوفي رجلج وابنج الي انتظروا هاي اللحظة من سنين حتى يصفون حساباتهم .

وفوگ كل هذا يحرضون فجر علينا ..

عمار .. حساباتيش . ماعندي شي وياكم .كل هذا لان ردت حق بنت اختي الي اكلتوه ..

ابتهال .. منو الماكله عمار وانت شعليك . فجر كلها سنه وتصير 18 وتاخذ حقوقها . ليش تسوي مشاكل .

عبالي اجيت لهنا وتصلح كلشي.

تالي تخربني وي اهلي من جديد ..

عمار .. كافي حجي زايد .  وانتي بابا فجر . هذا بيتج تبقين بي شگد ماتگدرين . وهنا محد يأذيج او يسمعج كلام حالج حال بناتنا ..

ساهر .. فجر خلينا نروح .

فجر .. روح ساهر اني راح ابقى هنا ..

باوعت الكيان وضحكاته وعبالك يگلي اني الي فزت عليك واخذتها ..

تعصبت حيل وردت اسحبها واخذها غصب عنها ..

بس عمتي مالت خليها اليوم ترتاح هنا واني ارجعها ..

رجعت البيتنا ميت حرگة ..

جدتي .. ها جدة وين فجر ..

ساهر .. بقت يم عمتي ماقبلت .

محمود .. خليها احسن . ماارتاحينا من يوم الدخلت بيتنا .

جدتي .. انت مالك دخل . مادام راسي يشم الهوا .

بنت محمد هذا بيتها .. كافي صغن وحقد ولك محمود هاي يتيمة راعي الله بيها حرام عليك ..

نعيمة .. يايتيمة حيه من جوه تبن.  السانها شطوله واستقوت بخالها علينا ..

جدتي .. ولج ماتبطلين سوالفج . اذا رجلج اغم وراح حب عليج وحدة ورادها وهي مارادتة واختارت اخوه ..

بعد البنيه شنو ذنبها تحقدون عليها ..

مو كافي منا بناتج لاتخليني احجي زايد ..

عامر .. اي جدة عليج الله هاي السالفه فايتتنا . صدگ ابوي حب على امي .. خرررب نعيمة يعني اهتز عرشج بسنه من السنين ..

محمود .. انجب ولك وولي منا .. وشمره بالمزهريه خلاه يطفر ..

نعيمة .. نعم الله عليج عمة . بعد شخليتي فضحتيني وشمتي بيه الناس وتباوع المريم مرت عمي حمزة .

خليتهم يتطالبون وصعدت لفوگ ..

خابرني ماهر ..

-الو شلونك ساهر. شكو شصاير ليش تعاركت وي رجل عمتي وكيان ..

-الاستخبارات العندك بسرعة وصلتلك ..

-شنو اليسوه تتعاركون . كلما اگول سهلت وراح اخطب لينا تخربوها عليه . محد يفكر بيه ..

-ولك انت ليش اثول وتفكر بس بروحك . ابوها واخوها نزلوا كرامتنا للگاع وانت تريدنا نسكت مو ..

-شسوو ؟؟

-اجة عمار الابوي يگله نريد حصة فجر انتو ماكليها وهي طلبت احجي وياك .. وابوي طرد فجر من البيت وراحت البيت خالها ..

-لا عليك الله .. ماسألتوا فجر صدگ هي الدازة خالها .

-هو ابوك خلانا نفتهم . وفجر تحلف تگول ماگلت ولاحجيت .. بس اني اعرف هاي سوالف كيان الملطلط .

وفوگاها يگلي همجي وعصابجي تريدني اسكت ..

-لاخوي قصرت لو مفلش وجهها وراويه الهمجي على اصوله ..

-اني اخوك شتدريني اقصر ..

-لا والنعم .. بس حاجيني بلينا . عود اني گلت كم شهر واتخرج. اتعيين واخطبها . بعد منو يگول ينطوها .

-دتخرج ومنا كم شهر . هينة اخذها من حلگ السبع الك .

-هلا هلا اروحلك فدوة . يله خليني اروح انام باجر عدنا تدريب من غبشة .

-الله وياك دير بالك على روحك ..

خليت راسي ع المخدة واتذكر صوتها وشلون تناشغ وتبجي ..

ماگدرت انام للصبح من وراها ..

الناس تنزل الاهلها ترتاح اني بس شلاع الگلب . لو باقي هناك احارب داعش مو احسن الي ..

فجر .. انقهرت وضجت من طردني عمي .. وانقهرت على ساهر هم لان بقى بيني وبين اهله ..

مااريد اكلفه اكثر من طاقته ..

گلت الخالي اريد ابقى يمهم وهو وافق ..

عمتي گامت تحجي عليه وتگلي .. ماصدگت بعد هاي السنين ترجع علاقتي بأهلي وبسببج راح تخرب .

صدگ ضجت .. وين اروح ياربي وكلها تفكر بمصلحتها ومحد هامة فجر والي يصير بيها ..

عمتي .. باعي فجر . اذا خالج او كيان جابو طاري حصتج . گليلهم اني اريدها تبقى عندهم ومعليكم .

فدوة يمة لاتخليهم يتمالخون على كم فلس ولاتحرضيهم .

فجر .. ياعمة .. اني احرضهم . والله مالي علاقة . هو كيان سألني… .

سكتتني .. ولاتجيبين طاري كيان . لان ساهر يكرها وبس يسمع بأسمه يتخبل ..

والاحسن ابقي الليله هنا . وباجر ارجعي مااريد مشاكل فدوة ..

طلعت وسدت الباب .. بقيت صافنه بوجه لينا ونزلن دموعي ..

وج لينا ليش اليتيم هيج مظلوم ..

لو اهلي عايشين ماصار بيه هيج .. بس الله عاقبني لان اني سبب موتهم .

لينا .. لاتگولين هيج . كلنا على هذا الطريق ..تعاي نامي والصباح رباح ..

#بقلمـي_الكاتبة_شمس

…………………………… .

ساهر…

گعدت الصبح مكسر وراسي يوجعني ..

صحت براء سويلي جاي وانطيني براسيتول ..

مريم .. مو زين على لحم بطنك . اكل لگمة واخذ البراسيتول ..

ساهر .. رحم الله والديج . مااشتهي .

براء .. والله حقه راسة يوجعه . اذا هذا البيت عبارة عن اكشن صاير ناس تاكل ناس ..

اااوف يفجيرة ماتجي وراج بس المشاكل ..

ساهر .. ولج انتي تلصمين لو اريگج من الصبح على طريقتي ..

براء .. لاخويه . متريگة والحمد لله .  راح اخذ الجاي الجدتي . وعود من تخلص تريدك روحلها ..

شربت جاي واخذت جكارة . كملتها رحت الجدتي ..

ساهر .. ها جدة صباح الخير . صحتيني .

جدتي ..ليش مانزلت تتريگ ويانا . اليوم البيت كله گالب وجهها ومحد گعد للريوگ .

ساهر .. مااشتهي . اريد اطلع مستعجل رايده شي .

جدتي .. تعال اخذني البيت عمتك . اريد احجي وي عمار وارجع فجر ..

ساهر .. لاترجعيها عوفيها هناك ..

جدتي .. يا يمة تحجي صدگ شنو اعرفها . هذا بيت اهلها ومكانها هين . ببيت ابوها ..

ساهر .. جدة اني هم ماقابل على طلعتها . بس فجر تمردت وخاصة من اجو بيت عمتي .

خليها هناك كم يوم وتالي انجيبها حتى تتعلم درس ..

جدتي .. ماادري شنو ببالك . بس مااخليها اكثر من يومين ..

ساهر .. تتدللين .

جدتي .. بعد شغله ثانيه .. شناوي على حصة فجر ..

ساهر .. يمة انتي ناسيه انتي الوصية عليها . يعني مادامها مابالغة محد يگدر يتصرف بحصتها غيرج .

لاتخافين خلي تكبر وتفتهم وكلشي يتحول بأسمها . واصلا اني الربح مال ذيج السنين كلها .

مخلي الها برعاية القاصرين ..

وهذا الشي محد يدري بي بس اني وانتي ..

ومااريده يطلع الغيرنا ..

جدتي .. الله يسعدك ويحفظك ويحقق كلشي ببالك لان ماكو مثلك صان الامانه وراعى اليتيم ..

ساهر .. امين امين جدة ..

يله هسا اني راح اطلع لان لازم اخابر على بضاعة للمحل فارغ .. وارتب اموري حتى من التحق مطمأن ..

جدتي .. يمة اني اشوف ماتروح بعد احسن .

ساهر .. لاجدة مامقبوله منج . منو الشجعني وگال روح وحارب الارضك وعرضك ..

جدتي .. اي بس خايفه عليك والاوضاع موزينه وانت بعدك عريس ..

ساهر .. انتي بس لاتبطلين دعاء الي .. والله يحميني ..

جدتي .. الله يحفظك يمة ..

رحت للمحل .. رتبت شغلي هناك خابرت ع الشركة الي استورد منها .. واتفقت ع الشحنه الي يدزوها ..

وكلت عمي حمزة بمكاني يستلمها من الگمرگ .

بقيت طول النهار اشتغل وصفينا المخازن مالحگت حتى اتغدا ..

للعصر خابرتـني ايات ..

-الو ساهر شلونك ..

-هلو ايات انتي شلونج ..

-مو اتفقنا نطلع اليوم نختار الغرفة . انتضرتك الصبح ومااجيت . شنو نسيت ..

-اووووه اي والله التهيت بالمحل وراسلت الشركة الي استورد منها . مافرغت ابد اعذريني ..

-لا عادي بس گلت اذكرك . نروح هسـا لو نخليها على باجر ..

-لا هسا مااگدر.. جنت اشتغل بالمحل وماسابح ولامبدل نتأخر اذا رحت للبيت ورجعت اخذتج .. تخليها على باجر.

-اي عادي .. بس ساهر ميصير هيج علمود فجر ومشاكلها احنه نبقى انأجل بكل شي ..

-شنو فجر وشجابها هسا . ومنو وصلج ع المشاكل .

-محد بس هيج وحدي ..

-ماكو شي اسمه وحدج .. امي لو براء گالولج .

-محد شبيك ..

-شنو شبيه . اليوم كله بالمحل مخبوص واركض منا ومنا وسويت جرد وحولت فلوس للبضاعه الجديده وسويت وكاله العمي .

وفوگ شغلي . اعتذرتلج وگتلج باجر الصبح نطلع ..

شجاب فجر بالوسط .. انتي تتعمدين تغثيني لو شنو ؟

-لا مااغثك .. بس دا احس فجر مااخذة اهتمامك اكثر مني ..

-اگلج ايات انتي تدرين اهتمامي بفجر من هي صغيرة يعني مو جديده عليج .. وبعدين انتي معلمة وواعيه شنو هاي التصرفات والغيرة . واني من الاول گتلج اصبري عليه وانتي تدرين بكلشي ووافقتي ..

ليش تخلين امي لو غيرها يقرأون براسج . اذا هيج ماتستمر حياتنا ..

- لا ساهر مو قصدي .. بس مرات اضوج .. خو مازعلت .

-يله هسا عندي شغل باجر الصبح نطلع نحجز الغرفة .

-اوك ع راحتك باي ..

-الله وياج ..

جان القلم بيدي .. شمرته اوووف يمة شوكت تبطلين سوالفج .. اعرفها ماراح تخليني ارتاح وتبقى تحرض بأيات وتسوي مشاكل ..

فجر .. ثاني يوم گعدت الصبح ساعه 11 احس راسي يريد ينفجر من گد البجي الي بجيته ..

مارحت للمدرسه لان كتبي وملابسي ببيت جدي ماجبتهن .

تريگنا اني والبنات . واصلا لگينا عمتي طابخة الغدا ومكمله ..

سمعت عمتي اتصلت بجدتي .. وتسولف . بعدين راحت للغرفة وماسمعت شي ..

كنت انتظر ردة فعلهم ع غيابي . وتوقعت جدتي مستحيل تخليني ابات زعلانه ببيت احد ثاني ..

واكيد راح تتصل وترجعني لو تجي بنفسها . بس خابت ضنوني من طلعت عمتي ساكتة وماحجت اي شي او فتحت الموضوع ..

ضجت حيل وانقهرت .. وخاصة لما صار الليل وماكو احد بين . معقوله هيج هنت عليهم وماصدگوا خلصوا مني ..

صحيح اني الي طلعن برضاتي ..

بس جدتي تحبني ومستحيل تتخلى عني ..

طلعت بالحديقه ضايجة ..

اجة كيان وخالوا من المحل . لان فتحوا محل مواد غذائيه يشتغلون بي ..

خالوا .. ها فجر بابا ليش هنا بيج شي..

فجر .. لا مابيه بس طلعت اشم هوا ..

كيان .. ادخل بابا اني يمها هنا ..

اجة كيان يمي .. شبي الحلو ضايج اشعلو الي موضجج .

فجر .. جدتي لسا ماسألت عليه ولااجت .

كيان .. لاتنقهرين حبيبي يردون يلو ذراعج وترجعين الهم

فجر .. لا كيان حتى لو فرضنا مثل ماگلت . بس جدتي غير . وربي اشتاقيت الحكياتها ومن نبقى سهرانين تگوم تحجي وتشمر علينا الاشياء اليمها يله ننام ..

اتقرب كيان حيل مني واني ابجي وضايجة خلى ايدة ع كتفي ولفحت انفاسه برگبتي .. اقشعر جسمي .

اتقرب اكثر .. دفعته ..

-لا كيان مالي خلك لاتحاول تستغل قهري ..

-انتي ليش هيج تصرفاتج طفوليه .. قابل شمسويلج هاي الاشياء البسيطه الكل يسويها مابيها شي ..

-لا اني عندي ماتصير . لان احنه تربينا هيج وحتى اذا تحبني مايصير تتقرب مني او حتى تلمسني الا اذا عقدت عليه واصير حلالك ..

-وقابل اني راح اضحك عليج .. اني احبج وبس يستقر وضعنا وانتي تبلغين اخطبج من جدتي ويصير كلشي رسمي ..

-اي عود من ننخطب . هسا مااگدر . راح ادخل لجوة تجي ؟؟

-روحي انتي هسا اجي وراج ..

شفته ضاج وگلب وجهها .. ماردت ازعله . بس مااگدر اسوي الي يريده .

جدتي جانت تگول . البنيه مثل الگزازة اذا انكسرت مستحيل ترجع بعد ..

وهذا كلامها باقي بذاكرتي ومايفارگني .. صحيح اني احب كيان واتمناه يصير زوجي .

بس لازم يعرف اني تربيت ببيئة مختلفه عن بيئته وحياتنا غير !!

تعشينا وكملنا ..

حاجيت مراد ..

-مراد تگدر تروح البيت جدي تجيب غراضي.  اني اتصلت على بنين راح تحظرهن ..

-اي عادي هسا اروح .

انتضرت مراد على احر من الجمر .. بلكي جايبلي خبر من جدتي ..

بس ماكو .. اكيد نسوني گمت اتخيل عمتي نعيمة هسا فرحانه والضحكة متفارگ وجهها لان اني مموجودة بالبيت

ساهر ..

رجعت بالليل للبيت لگيت امي مسوية ذاك العشا والسفره شكبرها . وعازمة بيت خالتي ..

استغربت من شفت ايات گبالي ..

اتقربت ايات .

اخذت علاليگ مال فواكه اشتريتهن بطريقي ..

وباست خدي .. الله يساعدك .

بقيت صافن . اخواتي موجودات بالمطبخ ومرت عمي . استحيت منهن ..

دخلت سلمت وصعدت ابدل .

هستوني نزعت الدشداشه . دخلت ايات ..

-غير تدگين الباب ..

-قابل غريب . غير زوجي .

ماحجيت وياها اخذت تراك اريد البس . اخذت التراك مني ولبستني . واديها تلامس بصدري وتسوي حركات عبالك صار سنين متزوجين .

كحيت .. احم . شكرا اني اكملها . انزلي انتي واني اجي وراج ..

طلعت تتماوع بمشيتها وتضحك ..

ردت ازمخ بيها حتى تمشي عدل . مااحب المرة المايعه والفاهيه .

بدلت ونزلت شفت امي ..

يمة شنو المناسبه عازمتهم ..

-يايمة صار شگد من عاقدين وماعزمناهم. فشله .

-ليش همة غربه وفشله .. وباجر اروح اني وايات گلت واعزمها ع الغدا ..

-اي يمة عفيه . خطيه لاتكسر خاطرها لمريتك .

رحت الجدتي گاعدة تسبح ..

بست راسها .. شلونج يمة .

-هلا يمة . بشر مارحت شفت بنت عمك شلونها .

-شبيها تلگيها مرتاحة . مو تگول اريد اخلص منكم..

خليها تخلص . وتتعلم كم يوم تالي ترجع وحدها .

-يمة ماينطيني گلبي ودور اجة مراد اخذ غراضها وملابسها . گلبي طگ عليها .

مااتحمل باجر اروح اجيبها ..

-اذا جبتيها اخذ غراضي واطلع وماتشوفيني بعد . ترضين رحت وراها واتوسل بيها ترجع وتالي تكسر كلمتي وتدخللهم ..

شنو السواه ساهر وياه وهيج تجازيه .

صحيح گلبي طيب ومااضوج من احد . بس الي مايقدرني ويستغل طيبتي ماارحمة ..

-دكافي هالحجي حاط عقلك وي زعطوطه .

-شبيها زعطوطه . مو السانها شطوله وتاخذ قرارات .

عوفيها يمة . من تضوگ هاي التجربه راح تفكر وتكبر وتوعى ..

دخلت امي .. يله السفرة محظره وانتو تسولفون خلصوني ..

-جايين ياام البلاوي اعرفها سوالفج هاي وعزايمج محتفله وعوزج بس ترگصين .

نعيمة .. ياعمة. خلف الله عليج دومج ضالمتني ..

گاعدين ع العشا وگالت امي ..

-يمة ايات مو باجر الصبح ترحون تشوفون الغرف . خليج هنا والصبح اطلعوا سويه شيوديه ساهر وشيرجعه .

ساهر .. لاعادي امر عليها شعندي .

امي .. لا يمة اطلعوا منا احسن وقابل هو بيت غريب راح يصير بيت رجلها وعيالها ..

بيومها امي اصرت تبات ايات ..

وفعلا باتت .

بقيت شويه ع اللابتوب اراسل الشركة ولد بيها صاحبي وتعبت .

بسرعة خليته ع جهه وطفيت الضوه ونمت .

ومااحس الا الباب انفتحت ومابين منو الدخل بس خيال

لان الغرفة ظلمة .

واني بين نايم وگاعد . وكأنه حلم .

اتقرب هالخيال مني . ودنگ عليه ........

#بقلمي_الكاتبة_شمس

يتبع………

… ،……………………… ..

هلاو حبايب .. اعرف الاغلبيه تعصبوا والي حجوا عليه .

بس وربي اشتراك كان ماكو من البارحة لليوم .

وكتبت بسرعة ونزلت الكم .

اعرف مقصرة وياكم . بس ضروفي هالفترة اقوى مني .

اسعد الله مسائكم بكل خير احبتي ..

//// البارت العاشـر ////

#ساهـر_الفجـر ..

#الكاتبـة_شمس ..

لماذا تفعلي بي هذا.....؟

جعلتيني اتذوق المرار يوما بعد يوم

جعلتي حياتي نار لا تطفأ ابدا

جعلتي دقات قلبي سكاكين تطعن في

جعلتي الظلام يكسوا حياتي فلا فرق عندي بين ليل ونهار

لماذا كل هذا .....؟!

اهذا لاني احببتكِ وسعيت سعيي من اجلك.....!؟

اردتي البعد فلبيت ندائك .

قلتي فسمعت كلامك.

وها انا ابتعد عنكـي ..

ليس لانكِ اردتي ..

وانما لاسترجع كبريائي الذي هدر لأجلكي ..

ابتعدي عني وارحلي ..

ساترككِ حيث انتهت بي المقادير ولن ابكي

ولن اندم.،ولن استحلفكي يوما بالرجوع.

ساتخلص منكي الي الابد ..

لأستعيد مادمرتيه بي طول تلك السنين ...

................................. .

نايم ومااحس الا الباب انفتحت وماگدرت اشوف منو الدخل بس خيال ..

لان الغرفة ظلمة .

واني بين نايم وگاعد . وكأنه حلم .

اتقرب هالخيال مني . ودنگ عليه ..

لفحت وجهي بأنفاسها . لساعة اتخيلته حلم حلو وكأنه فجر يمي .. استسلمت الها وماردت شي يصحيني من نومتي .

ماردت الحلم يخلص ..

الى ان صحانـي الصوت .. ساهر اني احبك اريد احس بحبك وحنانك ..

فزيت من مكاني .. ايات شتسوين هنا ؟؟

-اني تعبت ساهر ..

-من شنو ؟

-من هجرك وصدك الي .. مامحسسني خطيبتك مامقربني الك ..

-يعني شلون اقربج . نتزوج وذيج الساعه احكمي واحجي -ادري بيك ماتحبني بس ع الاقل قشمرني بكلمتين فرح گلبي ..

-ايات . بله صاعدتلي بنص الليل وتحجين هذا الحجي لو شافج احد يمي ..

اكو واحد يصدگ احنه نسولف وبس .

-خلي يحجون .. واذا غير اني مرتك ..

-هههههه انتي شلون صرتي معلمة .. ماتفهمين قصدي . مااريد احد يگول ساهر قشمر خطيبته وصعدها فوگ قبل الزواج ..

مااريد اطلع نذل وماعندي غيره ..

وقبل كلشي انتي مرتي واخاف على سمعتج قبل سمعتي ..

-انت گلتها .. مرتك يعني منو اليحجي وماكو غريب بس اهلك ..

گومتها من مكانها . خليتها گبالي . باعي ياعيني اني تعبان وباجر وراي گعدة الصبح ونطلع للسوگ .

اتركي هذا الكلام الغير وقت وانزلي هسا .

بستها براسها .

ضحكت .. اوك نازله ..

اووووف اخذت حيلي .. همزين محد شافنا بهذا الليل ..

والاضبط اذا وگعنا بلسان السلطانه فخريه ..

گعدت الصبح سبحت وبدلت ونزلت ..

الكل گاعد ومتريگين ومكملين ..

بس بنين وبراء راحن للدوام ..

دخلت المطبخ شفت ايات تسوي ريوگ . باوعتلي وتضحك گلتلها ..

صباح الخير . اذا مابيها زحمة اريد جاي بس ..

-صباح النور بأبتسامة . لا ماكو زحمة قابل اني غريبه ..

سمعت صوت جدتي ..

ساهر . يساهر تعال هين الغرفتي ..

رحت يمها ..

-صباح الخير جدة شلونج ..

-هلا صباح النور . سد الباب وتعال .. ووجهها مايتفسر .

-يمة واني اگول انت اعقل واحد بيهم تالي تخيب ضني ..

-شكو جدة ..

-شعندك انت وهاي المگموعه الليل كله وحدكم بالغرفة شسويتوا ..

-اوووف منو گلج ؟؟

-يعني ماتنكر .. حسافة ياتربات ايدي هاي تاليها تاخذ بنت العالم قبل الزواج اذا هيج كاتل روحك خلي نزوجك هذارالاسبوع ونفضها ..

-اوكفي اوكفي .. شنو اخذها . هذا ظنج بيه تصدگين اني اسوي هيج ..

-شمدريني اني .. امك الي گالتلي .. وصرلها ساعة تاكل بروحها وتگول اذا دروا اهلها شلون ..

واني گلتلها نزوجهم ..

-ههههههه معقوله جدة لسا ماعرفتي سوالف امي . هي تريد تگلج خلي نزوجهم بس بطريقه غير مباشره .

-ياجدة بس انت مانكرت هي عندك بالغرفة . قابل شني تلعبون حيه ودرج بالليل وحدكم .

-لا يالليل هي ساعة وطردتها . عندها شغله وتستحي تگولها يمكم بيني وبينها .

سولفتها وطلعت كل الي ببالج ماصار لاتخافين ..

-ايا قليله الحيا منين تطلبها . يمه سوالف النسوان ياشغله هاي الماتسولف الا بالاثنين بالليل ..

هاي سوالف روح كلهن لاخواتك الصغار مو اليه ..

-هههههه حلوه السوالف وياج جدة بس عندي شغل اخلصه ومناك اخذ ايات ونروح نحجز غرفة ..

-بالعافيه يمة طبتها خير عليك .. بس احسب حسابك .

العصر نمشي البيت عمتك نجيب فجر . مااريدها تبقى بعيده عني ..

-مالي دخل بيها بعد .. تردين انتي روحي اخذي عامر لو عمي حمزة .

اني بعد شلت ايدي من فجر ولاتعتبر عندها ابن عم اسمة ساهر بعد ..

-لاتگول هيج يمة ادري بيك مقهور منها . بس هاي ربيتها بيدك ادري ماتهون عليك ..

-لو ادري هيج راح تطعنـي وتنكر رباتي وتعبي .. جان گطعتها الايدي قبل لاافكر برباتها وتحمل مسؤوليتها .

-يمة اعذرها صغيرة وماتفتهم . وابوك ضغط عليها شتسوي بعد . راحت البيت خالها وهو هم مو غريب خالها ومرته عمتها يعني هم الهم حق عليها . قابل رايحة بيت غريب ..

-اني مااحجي ع البيت . الي قاهرني اگلها ارجعي وياي تخذلني وتختارهم . وخلت هذا المايع يستهزأ بيه .

مو ساهر الي ينذل بسبب مرة ناكرة وجاحدة ..

*سدي الموضوع جدة واني رايح . رايده شي؟؟

-مودع بالله .. الله يهدي سركم ويخليكم گلب على گلب ان شاء الله..

-هذا الحجي فات وكته بعد . في امان الله ..

طلعت شفت ايات متحظرة ومبدله ..

-ايات اني عندي شغل بالمحل واوراق اكملها واجي اخذج ابقي هنا احسن مماترحين وياي وتبقين بالسيارة .

-ع راحتك بس مو تتأخر ..

#بقلمي_الكاتبة_شمس

.......................................... .

شفت امي گالبه وجهها عليه وتلگط تمن ..

-ها يمة شلونج ..

-شلوني . بعد عملتك اكو لون بيه . فضحتني تالي عمري شأكول الاهلها حايرة ..

ماكو غير تستعجلون بسرعه وتفضوها . احسن مما ينكشف المضموم وننفضح .

-عليمن تنفضحين ليش هو اكو شي ؟؟

-لاتغشم روحك البارحة شفتكم ..

-شنو شفتي گولي ..

همستلي . شفت ايات صعدتلك . شگلت للبنيه وقشمرتها وصعدت وبقيت بالساعه منتظره وماكو مانزلت ..

-وليش مااجيتي ونقذتي بنت اختج لااغتصبها ..

-شلون اجي وافضح روحي . واذا شافتنا مريم غير سيرتنا تبقى على كل اللسان ..

-ههههههههه والله يمة ضحكتيني .. دنگت عليها وهمستلها ..

ياام ساهر اللعبة انكشفت لاتمثلين بعد . ومخططج فشل واني ساهر ماالمس مرة الا اذا انزفت الغرفتي ..

والاحسن روحي اسألي ايات هي تسولفلج ..

ركبت سيارتي ورحت للشغل . صارت عيني على بيت عمتي .. ااااخ يفجر كون انزل وافرغ حرگت گلبي بيج ..

بس لاتصدگين ارجع ساهر الي عرفتيه .

الا اراويج الوجه الثاني الي ..

كملت شغلي بالمحل ..

ورجعت للبيت اخذ ايات ..

شفت فجر گاعده يم جدتي بالصاله ..

تفاجأت هاي شجابها ..

سويت نفسي ممهتم ..

وصحت يله ايوووو وينج خلينا نروح ..

گامت هي من مكانها ..

واجت بأتجاهي ..

اني تركتها وصعدت لغرفتي جبت فلوس ونزلت .

وكنت اتصرف معاها كانه مموجودة ..

لگيت ايات منتضرتني يم الدرج ..

گالت نروح ..

-اي حبيبي يلة .. ايات ضحكت .

وامي تباوع الفجر بشماته ..

اعرف نفسي جاي اقسى عليها .. بس لازم اسوي هيج حتى اعيش حياتي واتخلص من وهم سيطر على حياتي اسمة فجر ..

صعدنا بالسيارة وطول الطريق ساكت بس احس نفسي اريد انفجر . اريد اطلع قهري بيها شلون ماادري ..

لگيت رعد منتضرني بالسوگ لان ابن عمة عنده معرض مال اثاث ..

من نزلنا ..

گلت الايات انتي افتري شوفي شنو الي عجبج وهسا اجيج بس اسلم ع الولد ..

راحت هي بقسم الغرف .

واني ورعد گعدنا بقسم الصالون . يعني اثاث صالون وقنفات ..

رعد .. شبيج ابو السواهر شو مو على بعضك ..

ساهر .. مابيه بس شغله مضوجتني جاي افكر بيها ..

رعد .. انسـى ياب الهموم ماتخلص .. عيش اليوم ولاتفكر بباجر . هاي مرتك جايبها وجاي تختارون غرفة عرسكم .. فكر بحياتك الجايه وياها مو وي غيرها ..

ساهر .. والله عرفتك راح تحجي تحجي وبالتالي تلوفها عليه ..

رعد .. ههههههه غير اخيك واعرف طينتك . ديله گوم روح وراها واختاروا غرفة . ويابة وياك اختار احلى ثريات وتيبلام مال غرفة عليه ..

ساهر .. لايمعود قابل اريد اجربك ..

رعد .. ولك جاي احجي صدگ واعتبرها هدية العرس عود ساهر .. كفو ماتقصر ..

رحت ورى ايات ..

شفتها تباوع وحايرة .. گلتلها ها اكو وحدة عجبتج .

فزت من مكانها .. ههههه كلهم حلوات يحيرون .

-اختاري احلى وحدة ..

-هجبتني هاي غرفة مصرية وفخمة حلوة . بس سعرها غالي ..

-لاتشيلين هم السعر .. انتي اختاري وبس ..

اختارت الغرفة ابيض وذهبي تصميم مصري . بالعاده اني ماتعجبني هيج غرف . احب الاشياء البسيطة .

بس لان هي عجبتها . ماردت اكسر بيها ..

خطيه عروس ومن حقها تختار . واول وتالي هي راح تگعد بيها اكثر مني ..

اختارينا الغرفة وانطيتة مقدمة ..

رعد اصر نختار هدية الزواج ..

اخذنا ثريات وتيبلام وطلعنا .. اباوع الايات فرحانه وتضحك ..

گلتلها شنو رأيج نروح نتغدا بمطعم ..

-ها بكيفك بس لازم اخابر امي اگلها ..

-اي خابريها وگليلها ساعه ونجي مانتأخر ..

اخذتها المطعم راقي بالمحافظة صحيح اجنه محافضتنا مو مثل بغداد ومناطقها .

بس عدنا مطاعم للعوائل حلوة ومرتبه ..

اني جنت بلا ريوگ وجوعان . گالوا شتطلب .

گلتلهم قوزي ع التمن ويابسه ..

ايات .. هههههه حتى هنا تمن ويابسه .

ساهر .. عيني احنه بطونها ماتشبعها الكنتاكي والبيتزا مالتجن . تربينا ع الذبايح والمفطح ..

ايات .. ههههههه لعد اني راح اخذ دولمة ومحاشي ومقبلات .

جابولنا شوربه قبل الاكل ..

اكلت وگالت .. تدري ساهر اني اليوم اسعد وحدة .

-هههههه حسيت عليج .. بس اريد اگلج شغله فجر .. اني بحكم شغلي ودوامي... . قاطعتني ..

-اني ايات مو فجر...

-اوووه مو ماخذ اللساني عليها اعذريني .. حسيتها ضاجت .

كملت كلامي .. بحكم دوامي وشغلي يمكن مااگدر يوميه نطلع وناكل برة مثل اليوم .

بس اوعدج كل عطله او اجازه اخذج زيارات نروح البغداد

گمت احجي وياها بأي طريقه حتى تنسة زلة گلبي الي جرحتها بي ..

رغم اني گلبي يم فجر . بس قررت ابعد وانسى وابدي حياة جديده وي ايات . وگلبي مايقبل يخليني انسى وارتاح ..

جابوا الاكل .. اكلنا وكملنا . هي اكلت بس مقبلات گالت مااشتهي ..

طلبت يلفولها الاكل دليڤري ..

واخذتها للبيت . وصلتها يم الباب ..

گالت تعال ادخل . گلتلها لا اريد اروح للبيت ارتاح ساعة وارجع للمحل . عندي شغل هواي ولازم عگب باجر التحق ..

رجعت للبيت سبحت ونمت ساعة وگعدت بدلت ..

نزلت لگيت مسوين كليجة وجاي ..

گعدت شويه وياهم ..

صحت .. براء جيبيلي جاي ..

اجت فجر جايبه گلاص جاي بإيدها ..

صحت براء . مو گتلج جيبيلي جاي . بسرعة وراي شغل .

هي بقت واكفة وبيدها الگلاص .

اني مااهتميت وكأنه مموجودة ..

جدتي .. روحي يمة رجعيه وحضري دروسج هواي فاتج بهاليومين ..

#بقلمي_الكاتبة_شمس

..................... ..........

راحت فجر وحتى ماشفت طولها بس حسيت بيها . اكيد اختنكت وعيونها غرغرت بالدموع وصاروا لآلؤ . ويلمعون .

لاتنقهر ساهر . اصبر واتحمل . لازم تنسى ..

جدتي .. يمة على كيفك وي بنت عمك مو هيج ..

امي غيرت الحديث ..

-اي يمة ساهر ماسولفت شلونها الغرفة الاختاريتوها حلوه عجبت ايات ..

-هي اختارتها على ذوقها .. هاي صورتها شوفوها .

يومين ويجيبوها ينصبوها بيدهم واني ماموجود التحق .

خلي ابوي يجي يمهم من ينصبوها .

ووياهن ثريات وتيبلام مو يتكسرن ذني هدية رعد ..

امي .. والله خوش ولد هذا رعد الله ينطيه العافيه ..

بقت امي تباوع للصور واخواتي اجن تكومن يمها . شربت الجاي .

وگلتلهن يلة انطني الموبايل عندي شغل .. اخذته ورحت مااتحملت نضرات جدتي الي . كلهن لوم وعتب . ودارت وجهها عني يمكن زعلت ..

ذبيت روحي بالمحل . رتبته وسويت مكان للبضاعة الجديده خاف تجي واني مموجود .

وسويت جرد .. مارجعت لنص الليل ..

لگيت الكل بغرفهم .. صعدت بدلت ونزلت ..

رحت للمطبخ .. جوعان !!

شفت بالثلاجة مسوين كبة وزلاطة . اني مااحب الكبه

خليت القوري ع النار .

وطلعت طاوة . وخبطت ثلاث بيضات وگليتهن .

طلعت خبز من المجمدة حميته ع الطباخ ..

خليته بالصينيه وصعدت ..

بعدني اول لگمة ..

اندگت الباب خفيف ..

عبالي متوهم ..

رجعت اكل .

واسمع الباب يندگ مرة ثانيه ..

گمت من مكاني فتحتها واشوف فجر گبالي ..

استغربت ..

-شجابج هنا ؟؟

-اريد احجي وياك .. انتضرتك واتأخرت . شفتك بالمطبخ وماگدرت اطلع خاف يطلع عمتي لو عمي ..

-وشنو يعني قابل مسوين شي غلط . وشنو التردين تحجين بي . ولو مااعتقد اكو شي مهم .

-على كيفك وياي . ليش هيج صاير ماتتفاهم ..

-ههههه اني مااتفاهم . لو انتي البعتي الاكو والماكو علمود نزواتج ..

-شتقصد ؟؟

-مااقصد شي . خلصيني شعندج .

-انت مستحيل تكون ساهر الي جان يخاف على نسمة الهوا الي تمر بفجر .يخاف عليها اكثر من روحها ..

-انتي الي غيرتي ذاك ساهر وخسرتيه ..

-لا مو اني . هو الي تغيير وخلاني اخسر السند الي اتحامة بي ..

فورت دمي بنت اللذين... ..

سحبتها للغرفه من زندها وعاصرها حيل . وتكيتها ع الباب ..

ولج شفت انانيه مثلج ماكو .. اني مااتغيرت . ساهر الي حبج وحماج ويباوع للكلمة التطلع منج . هو نفسه الي حبج وعشگج ورادج مرة اله ..

ولج كلمة منج تخليني اعيش ملكة. اسويج سلطانة زمانج وادللج واعوضج عن كلشي .

بس انتي جرحتيني وبعتيني واختاريتي العرفتيه من يومين ..

هي جامدة بين اديه ومغمضه ..

فجر .. ساهر ارحمني ماعندي مشاعر تجاهك وانت على وشك زواج . خلينا اخوان بس ولاتزعل مني . مايهون زعلك عليه ..

خلينا نرجع مثل قبل احسن الي والك . لاتعذبني ببرودك .اريد ساهر الي اعتبرته اخويه وابويه لاتيتمني وتحرمني منه اترجاك ..

تعصبت . ضربت ع الحايط الي يمها . وتقربت اكثر منها. هي غمضت واني اتقربت اكثر.

ودت احضنها اخذ شفايفها الي يرجفن وادفيهن بشفافي ..

تالي لعنة الشيطان وهمست بأذنها ..

اني لااخوج ولاابوج . راحت كل المشاعر الي جنت خازنهن الج ..

بعد سوايتج الاخير مسحتج من حياتي .

لهذا يحلوة ..تعودي على تصرفاتي الباردة وياج .

وهسا انزلي منا وبعد لاتعتبين هاي الغرفة لان الي مرة وهاي غرفتها ومااريدها تغار لازم اراعي مشاعرها ..

نزلن دموعها وطلعت تركض ..

سديت الباب .. واتنهدت ..

سامحيني يبنت گلبي .. لازم اقسى حتى انساج كحبيبه وتنسيني كالشخص الي مخليته بمخيلتج الي ..

لان بعدج عني راحة .. وقربج مذلة !!

#بقلمي_الكاتبة_شمس

يتبع......

.......................................... .

حبايبي .. رجاء بدون تجاوز .. الي مايحب الانتضار ينتضرها تكمل ويقرأها ..

والله اعرف مقصرة وياكم بهذي القصه . وهذا مو من طبعي . بس كل شخص اله ضروفه .

وبالقصص السابقه كنت مامقصرة وياكم ابد .

ولازم تعذروني بهذي القصه . لان اجت دوامات وجهال ومسؤوليه وان شاء الله مااقصر ..