رشيد اتفاجأ لما نزلت اتنين من التاكسي وضَربوا روفان على دماغها وأخدوها في التاكسي وطلعوا بيها بسرعة.
رشيد بقى يزعق وينادي بصوته كله وجري ورا التاكسي، بس حد خبطه على دماغه جامد، فقد الوعي والرؤية بدأت تختفي، وعربية روفان اختفت معاها.
بعد شوية فتح عينيه لقى نفسه في القصر وأمه بتبص له بقلق. قعد بسرعة وقال:
"روفان... فين روفان... مراتي فين؟"
نجوى ابتسمت بفرحة وقالت:
"الحمد لله يا رب... انت كويس يا ابني؟ إيه اللي حصل؟ ومالها روفان قلقانة كده ليه؟"
رشيد افتكر اللي حصل لروفان، وقف بسرعة وقال:
"روفان... روفان اتخطفت يا ماما."
عند روفان، فتحت عينيها بتعب واتصدمت صدمة عمرها لما لقت نفسها على السرير وفرح جنبه.
روفان قعدت بسرعة وفرحة وقالت:
"فرح... حبيبتي... فرح انتي كويسة؟"
فرح قالت بسرعة:
"اهدي يا حبيبتي اهدي، أنا تمام."
روفان حضنتها جامد وقالت:
"حبيبتي انتي وحشتيني وحشتيني أوي يا قلبي و..."
بس قطعت كلامها وبصت لها باستغراب وقالت:
"إحنا فين... وإزاي كده؟"
دخل عمران وقال:
"أنا هقولك إزاي كده."
روفان أول ما شافته وقفت وبصت له بغضب رهيب وقالت:
"آه... كده صح... بقى حضرتك اللي جايبني هنا؟ يا جبروتك يا أخي، بقى فوق ما هربت وخطفت أختي كمان قادر تقف قدامي عينك عينك؟"
عمران قال بهدوء:
"قادر أقف قدامك لأني معملتش حاجة يا حضرة الرائد، ومع ذلك مش أنا اللي عايزك هنا، دي أختك هي اللي طلبت كده."
روفان بصت لفرح وقالت بسرعة:
"انتي متخافيش يا قلبي، أنا أكيد مش هسيبك هنا وهاخدك معايا كمان، أنا كنت بدور عليكي، منمتش ساعة وبس."
فرح قالت بسرعة:
"بس أنا مش عايزاكي عشان تطلعيني أنا يا روفان... أنا عايزاكي تطلعي عمران من اللي هو فيه، انتي الوحيدة اللي تقدري تساعديه."
روفان بصت لها بصدمة وقالت:
"نعم يا أختي؟"
عند رشيد، كان هو ورائف قالبين الدنيا على روفان، ورشيد هيتجنن، مش قادر يهدى ولا يقعد، رايح جاي وهو بيقول:
"أخدوها قدام عيني... الكلاب مش هرحم حد فيهم... بس لما ألاقيها... وألاقيها إزاي؟ افرض حد أذاها... أكيد هو... فادي مفيش غيره."
قال كده وسحب مفاتيح عربيته وطلع جري.
رائف جري وراه وهو بيقول:
"رشيد... استنى أنا جاي معاك."
عند روفان، كانت مصدومة من طلب اختها، وفرح كملت وقالت:
"أنا عايزة تساعدي عمران يا روفان، ده طلب من أختك واعتبريه طلبي الوحيد."
روفان كانت بتبصلها بزهول، وبصت لعمران، ولقتُه قاعد على الكرسي حاطط إيده على خده بملل، زي ما يكون متأكد إنها هترفض.
روفان قالت بغضب:
"وطبعاً هو اللي طلب منك الطلب ده مش كده؟ طبعاً بعد ما كل حاجة اتكشفت وبس..."
فرح قاطعتها وقالت بسرعة:
"لأ بالعكس، أنا اللي أصرت عليه يجيبك هنا، لأني متأكدة إنك هتساعديني ومش هتسبيني، إنما هو كان متأكد إن مفيش فايدة من اللي بقوله."
روفان قالت بغضب:
"معاه حق والله... انتي فوقتي حدود الهبل بكتير، وصلتي للجنان خلاص بقى، بعد ما عيني طلعت وأنا بأثبت إدانته... أساعده عشان يطلع بريء مش كده؟ شوفي يا فرح، الشخص ده مجرم... ومكانه الطبيعي الحبس، فاهمة ولا لأ؟"
عمران وقف وقال:
"أنا قلتلك الكلام ده يا فرح، مسمعتيش الكلام، وأنا جبتها زي ما انتي طلبتي، وانتي قلتي اللي معاكي، كده أظن عداني العيب، وأختك لازم ترجع."
روفان قالت بغضب:
"أرجع فين؟ أنا مش هرجع من غير أختي، وانت لازم تسلم نفسك، على الأقل تخفف من مدتك."
عمران اتنهد بضيق وقال:
"كتر خيرك، أنا هعرف أتصرف لوحدي، ومدتي ملكيش دخل بيها."
روفان لسه هترد. فرح قالت بدموع:
"روفان... أنا اتحرمت من كل حاجة وأنا صغيرة، انتوا عشتوا سوا وأنا اتقفل عليا البيت لوحدي، بابا وماما اتخانقوا بسببي وماتوا بسببي، معشتش طفولة ولا كان عندي صحاب، معرفش أي حاجة عن الدنيا، بس اللي أعرفه إن عندي أخوات بيحبوني، ويهمهم أنا أحب إيه، وأنا بحب عمران... أكتر من نفسي، يمكن أكون بسيطة... وهبلة... وغبية زي ما بتقولوا عليا، لاكن بحس... وإحساسي بيقولي إن جوزي بريء، وكمان بيقولي إن أختي مش هتردلي الطلب الوحيد اللي طلبته منها."
روفان اتملت عينيها دموع وقالت:
"فرح يا قلبي، والله بحبك كأنك بنتي، بس فيه حاجات مينفعش ناخد بإحساسنا فيها... سامحيني مش هقدر."
فرح قالت بدموع:
"تمام يا روفان، عمران معاه حق، انتي مستحيل توافقي حتى لو أنا اللي طلبت... شكراً بجد."
عمران بص لفرح بحزن، كانت زعلانة جداً ودموعها على خدودها، صعبت عليه جداً. قال:
"روفان، أنا الأول كنت فاكر إنك بتكرهينا عداوة شخصية وإن مفيش حاجة من اللي بتقوليها أصلاً، بس بعد ما شفت البضاعة بعيني، صدقت إن كل همك العدالة وشغلك وبس، عشان كده أنا جبتك، أكيد مش هتبقي مبسوطة لو سجنتي واحد بريء، وحياة أمي ورحمة أبويا ما ليا أي دخل بكل ده."
روفان وقفت مكانها، أول مرة تشوفه بالضعف ده، وأول مرة يبقى صادق كده، بس مكانش ينفع تكذب كل الأدلة اللي قدامها. قالت:
"انت معندكش أي دليل، لو في دليل واحد حتى كان ممكن أحاول أقف معاك عشان فرح."
عمران قال:
"أنا معنديش دليل، بس انتي تقدري تجيبيه، هتفق معاكي اتفاق... انتي أكتر واحدة هتبقى مبسوطة بيه... لو جبتي الدليل وساعدتيني هتنقذي واحد بريء، ولو محصلش واتضحلك إني فعلاً مجرم، هسلم نفسي... وهطلق فرح... وده وعد مني ليكي وقدامها بقوله... قولتي إيه؟"
عند رشيد، وصل فيلا فادي الأسيوطي ودخل هو ورائف بالقوة، وكان فادي بياكل، اتفزع وقال:
"انتوا إزاي تدخلوا كده وبس؟"
قاطعه رشيد لما مسكه من قميصه بغضب وحط السلاح في دماغه وقال:
"روفان فين؟"
فادي وقف بخضة وقال:
"روفان... مالها روفان؟"
رشيد قال بغضب وزعيق:
"ولا متستعبطش... انطق روفان فين؟ لا أطلع بروحك وقتلك."
فادي قال بغضب:
"بقولك معرفش، معرفش... أنا هكدب ليه؟ لو عندي كنت أكيد هقويك انت بالذات، بلاش غباء."
رشيد شد أجزاء السلاح وقال:
"شكلك مش هتتكلم."
بس رائف منعه وقال:
"اهدي يا رشيد، شكله ميعرفش فعلاً، بلاش نضيع وقت."
رشيد قال بغضب:
"ميعرفش إزاي؟ مين غيره ليه مصلحة في كده؟"
فادي وقف في وشه وقال بغضب:
"فكر انت بقى مين ليه مصلحة... مش أخوك هربان... وروان هي السبب، ليه ميكونش هو... والله لو حصلها حاجة هاخد روحكم انتوا الاتنين."
رشيد ضربه قفا جامد، وقعه على الأرض من غير مقدمات وقال:
"تاخد روح مين يلا... انت آخرك تاخد حواجبك."
فادي كان باصصله بزهول لأنه اتفاجأ، وحاطط إيده على رقبته بألم. ورشيد قعد في مستواه وقال بغضب:
"للمرة المليون... روفان مراتي... يعني حتى القلق عليها مش من حقك."
فادي لسه هيرد، سمعوا رائف بيتكلم في التليفون وبيقول:
"إيه... رجعت... رجعت إزاي؟ طيب... طيب جايين حالا."
رشيد قال:
"إيه اللي حصل؟"
رائف قال:
"مش قولتلك ملوش دعوة؟ عليا بتقول روفان رجعت... يلا عشان نشوف إيه اللي حصل."
في القصر، كانوا قاعدين جنب روفان وكانت مغمى عليها وبيحاولوا يفوّقوها بس مش بتفوق.
رشيد وصل هو ورائف وجري عليها بخوف وقال:
"روفان حبيبتي مالك يا قلبي؟"
وبص لأمه وقال:
"مالها؟ إيه اللي حصل؟"
نجوى قالت:
"مش عارفة مالها، الشباب جابوها من بره وبيقولوا فيه تاكسي جابها وحطها عند السور وطلعوا بسرعة قبل ما يقدروا يعرفوا هما مين."
رشيد استغرب جداً، ورائف بيفوق في روفان، وبعد محاولات أخيراً فاقت وبصت لهم بتوهان وقالت:
"أنا فين؟"
رشيد قال بسرعة:
"انتي معايا، انتي في بيتك هنا يا حبيبتي، إيه اللي حصل؟"
روفان قعدت بتعب وقالت:
"فرح... فرح حبت تشوفني... وخطفوني وخلوني قابلتها... كنت عايزة أجيبها معايا، بس مخلونيش... خدروني وصحيت لقيت نفسي هنا."
رشيد استغرب وقال:
"يعني عمران اللي عمل كده؟ طب ليه؟"
روفان قالت بحزن:
"أنا تعبانة عايزة أنام يا رشيد... عن إذنكم."
قالت كده ودخلت الأوضة بتعب، ورشيد راح وراها.
روفان كانت نايمة على السرير بتعب، ورشيد بيبص لها بشك وقال:
"روفان أنا مش عارف ليه حاسس إنك مخبية حاجة... يعني عمران خطفك عشان تقابلي فرح؟ ده السبب؟ معقولة... عمران ده اللي هو أخويا ولا حد تاني؟"
روفان قالت بضيق:
"حتى لو كلامك صح أنا مش مضطرة أجاوبك... عارف ليه؟ عشان أنا وانت خلاص مبقاش فيه حاجة بتربطنا."
رشيد قال بغضب:
"لأ فيه يا روفان فيه... انتي مراتي... ولسه على ذمتي... انتي صحيح رميتي دبلتك ببساطة، إنما أنا لسه لابسها... ولعلمك مش هتخلي عنها وطلاق مش هطلق."
روفان وقفت في وشه وقالت بتحدي:
"يبقى هطلقك لما هرفع عليك قضية طلاق، إيه رأيك بقى... ولآخر مرة هقولك يا رشيد متختبرش صبري عليك وكفاية لحد هنا."
رشيد قرب عليها وقال:
"يعني عايزة تطلقيني؟"
روفان قالت بسرعة:
"أيوه."
رشيد قرب أكتر وقال:
"وهتعرفي تعيشي من غيري؟"
روفان بلعت ريقها بارتباك ورجعت خطوة وقالت:
"أيوه... هعرف عادي."
رشيد قرب أكتر وشدها بين إيديه وقال:
"وهتهون عليكي أيامنا؟ طب واهون عليكي لما أكون لغيرك؟"
روفان اتجمعت الدموع في عيونها وكانت بتحاول تسيطر عليها، ورشيد ابتسم في اللحظة دي، وشدها لصدره وحضنها بقوة، وروان بكت لأول مرة بشدة قدامه وفي حضنه، ورشيد غمض عيونه وسابها تاخد راحتها لحد ما تهدى.
عند عمران، قال بتوتر وغضب:
"عارفة أنا غلطان إني مشيت وراكي... معقولة روفان الشيمي... تساعدني أنا؟ ده لو القمر والشمس شربوا قهوة سوا في المريخ... أختك مستحيل تساعدني."
فرح ضحكت وقالت:
"أنا سمعت أمثال تعجيزية كتير بس زي المثل ده مشوفتش الصراحة... ابقى خلينا نروح نشرب معاهم... ههههه."
عمران ابتسم وقال:
"والله بتهزري سيادتك، أنا مش عارف إزاي بطاوعك في كل حاجة كده... أنا هتجنن بقى أنا أسمع كلامك انتي يا فصعونة، لا واعلق مصيري كله بأفكارك."
فرح قالت:
"طب انت بكرة تشوف أفكاري دي هتنفعك إزاي، أنا متأكدة إن كل حاجة هتمشي تمام، انت بس نفذ اللي روفان قالتُه."
عمران قال:
"ولو إنه خطر واختك متضمنش، لاكن هنفذ عشان عيونك."
عند روفان، بعدت عن رشيد وهي مكسوفة إنها انهارت كده وقالت:
"احم... أنا... أنا أعصابي تعبانة شوية... ممكن لو سمحت تسبني آخد قرار بهدوء ومتضغطش عليا."
رشيد قال:
"تمام... وأنا معاكي في أي حاجة يا روفه، انتي عارفة إني معرفش أقولك لأ."
روفان بصت له بدهشة وقالت:
"يعني انت كده مبتضغطش عليا... متكلمنيش بالطريقة دي، سبني آخد قرار، قولتلك."
رشيد ابتسم وبصلها بحب شديد وقال:
"خلاص زي ما تحبي يا قلب قلبي."
روفان قالت بضيق:
"رشيد..."
وبعدين... بص متتكلمش أصلًا."
رشيد قال:
"سكت... أصلًا لما عيونك تتكلم مبعرفش أرد، والسكوت أجمل تعبير."
روفان اتنهدت بيأس وقالت:
"مفيش فايدة فيك أقولك، أنا هروح أنام مع عليا، خليك لوحدك هنا ابقى سبل للحميطن."
روفان طلعت من الأوضة ورشيد طلع وراها وهو بيقول بضحك:
"يا بت استني يا مجنونة اعقلي وتعالي... طب خلاص والله هقعد ساكت."
روفان مردتش عليه ولسه هتروح عند عليا، وقفت عند أوضة سمر لما سمعتها بتقول:
"لأ.. أجلك إيه؟ الوضع متكركب."
رشيد قال بضحك:
"يعني... لو رحتي عند عليا مش ه..."
بس روفان شاورتله بسرعة بمعني يسكت ميتكلمش، وهو وقف يسمع معاها باستغراب. وسمر قالت:
"شوف يا فادي كل حاجة ماشية صح، عمران لبس القضية ولما هرب أكدها عليه المسكين، وروان تقريباً فاكرة إن رشيد هربان من عمران ومتخانقة معاه وهيطلقوا... كده كل حاجة ماشية زي ما خططنا لها بالظبط."
روفان كانت بتبص لرشيد بزهول، ورشيد لسه هيفتح الباب بغضب، روفان منعته وسمعوها بتقول:
"طبعاً يا بني، أنا بحب رشيد، مستحيل أكمل حياتي مع واحد من الملاجئ."
رشيد اتسعت عينه بزهول وصدمة، ومكانش مصدق اللي بيسمعه، ولا روفان، بس الصدمة بقت كسرة لما قالت:
"لأ قميص نوم إيه اللي عايزني ألبسه يا شقي وأنا جوزي هربان؟ طيب... على العموم بكرة هجيلك وألبسلك اللي تحبه، بس دي آخر مرة عشان متتعودش، لأن رشيد غير عمران."
روفان ورشيد بصوا لبعض بزهول ولطموا هما الاتنين سوا وقالوا بصوت واحد:
"أحيه."