بقى انتي يا ولية يا حرباية جاية تتكلمي على بنتي وتقولي عنها كلام وحش.
دي نسمة بنتي، ستك انتي وبنتك.
سماح بغيرة وكره:
ستك إيه يا وليه. تعالي شوفي بنتك وهي دايرة على حل شعرها.
ورمت الصور في وش صباح.
بنتي شافت بنتك في الجامعة ومعاها شاب. عاوزاكي بقى تقوليلي إيه مبرراتك دلوقتي. عرفتي تربية مين الوسخ.
صباح حست بحزن أنها شايفة بنتها اللي الكل بيحلف بأحترامها وأدبها ومليون شاب يتمنى يتجوزها واقفة مع ولد في الجامعة. هي واثقة في تربيتها بس محروق دمها إن ريهام بنت سماح صورت بنتها كده وجاية تشمت فيها. اتكلمت بحزن واضح:
تعرفي يا سماح أنا عمري متخيلت إنك تكوني بالوساخة دي. جاية انتي وابنك تفرجوا الناس علينا وتقولي كلام في حق بنتي. للدرجة دي وصلت بيكي.
سماح بشردحة:
بقولك إيه يا ست أنتي. مش هتبقى بنتك غلطانة وتيجي ترمي علينا بلوتها. بنتك اللي عاملالنا فيها الخضرة الشريفة اتكشفت على حقيقتها خلاص.
عامر أخو ريهام كان واقف وبيسمع اللي بيحصل ومش بيتكلم. بسبب إنه بيحب نسمة جداً واتقدم لها كذا مرة بس هي كانت بترفض بسبب سمعته الوحشة وكمان هي في كلية هندسة فكان مفكرها رفضته بسبب تعليمها. فحب يشمت فيها ويخلي مرات عمه راسها في الأرض بسبب بنتها ويعلم ابن عمه إبراهيم الأدب علشان هو اللي كان بيشجع نسمة ترفضه. فاتكلم بخبث:
هيعمل إيه بس يا ماما. هما طالعين السما بتعليمها ده. بس ميعرفوش إنه ده نقمة مش نعمة عليهم. بنتهم ماشية على حل شعرها ومفهماهم إنها محترمة ومتربية.
سماح ضحكت بشماتة وهي بتقول لكل الناس اللي بتتفرج:
اتفرجوا يا عالم علشان بس تعرفوا إن بنتي أنا المحترمة وهما اللي بيتبلوا عليها. وقال إيه بنتي بتغير من بنتها.
وكملت بخبث وهي بتعمل نفسها بتبكي:
مش عارفة والله ليه واخدين نقرهم من نقر بنتي الغلبانة.
التهامس بين الناس بدأ يزيد وصباح كانت واقفة قدام بيتها بحزن وبتتمنى الأرض تنشق وتبلعها. بس فجأة الكل سكت على صوت خلاهم يبطلوا كلام.
جرا إيه منك ليه ليها. في إيه. هو انتوا مابتصدقوا جنازة وتشبعوا فيها لطم. امشوا من قدام بيتي. أنا أختي أشرف من الشرف. وبكرة أوريكم ده بعينيكم.
إبراهيم أخو نسمة وهو يعتبر اللي مربي نسمة وعارف أخلاقها.
راجل من اللي واقفين:
إنت مش شايف يا إبراهيم نسمة واقفة مع واحد. يعني كلام مرات عمك صح.
إبراهيم بعصبية:
صح إزاي. أنا عمري مشكك في أختي أبداً. ولو شفت ده بعيني نسمة دي أنا مربيها وعارف أخلاقها كويس. والا إيه يا عم ماجد. هو مش حضرتك أنت كمان عارف نسمة أختي.
عم ماجد بحزن:
أنا واثق فيها. بس دي صور. غصب عننا يابني بنشك فيها.
إبراهيم:
أنا هثبتلكم إن أختي بريئة وعمرها متعمل كده. وبكرة هروحلها الجامعة وأعرف منها مين اللي واقفة معاه في الصورة دي.
الكل بدأ يمشي وسماح شماتة فيهم وهي بتقول لإبنها:
يالا يابني نمشي من قدام البيت ده. أصل الناس تفكرنا لينا علاقة بيهم. أصل الواحد ملهوش غير سمعة.
إبراهيم كان هيروح لمرات عمه بس أمه مسكت إيده وهي بتقول:
سيبها يابني. ربنا ياخدلنا حقنا منها. أهم حاجة أختك دلوقتي.
***
تاني يوم...
كانت بتجري في السكن لأنها متأخرة عن المحاضرة.
سميرة سهى قوموا. أنا بقالي ساعة بنده عليكم وانتوا مش راضيين تفوقوا.
في إيه يا نسمة. هي الساعة كام يعني.
نسمة بصتلهم وربعت إيديها بتكبر وهي بتقول:
الساعة 8 بس. يعني متأخرين.
سميرة بخضة:
يلهوي أتأخرنا.
سهى بهزار:
إنتي لسة هتتخضي. قومي البسي بسرعة.
نسمة بضحك:
أنا صليت ولبست وهخرج قبلكم علشان المحاضرة متفوتناش ويكون في حد فينا لحقها من أولها. وأنتوا متتأخروش.
سهى:
اشطا يا صاحبي.
نزلت نسمة وراحت الجامعة وهي داخلة من باب الجامعة.
آه مش تحاسبي.
أسفة مخ.. إنتي.
أيوه أنا يا بنت عمي. إيه مش متوقعة تشوفيني في الجامعة يعني.
نسمة باستغراب وهي شايفة بنت عمها كانت لابسة فستان وطرحة غير عادتها اللي بتلبس بناطيل وبتطلق شعرها. فاتكلمت وهي بتحاول تستوعب ده وتمشي من قدامها علشان اتأخرت على المحاضرة:
براحتك.
وسابتها ودخلت المحاضرة بتاعتها. وريهام كانت بتبتسم ابتسامة خبث وهي بتبص للي حط إيده على كتفها.
شاطر نفذت اللي قولتلك عليه.
أي خدمة ياستي. أهم حاجة متنسيش هديتي.
غمزتله وهي بتقول:
هديتك في الحفظ والصون. أهم حاجة تخدمني علشان إبراهيم جاي النهاردة. عاوزك تخليه يتبرى منها.
سامح باستغراب:
بس في حاجة محيراني. هي مش دي بنت عمك. إزاي تعملي فيها كده. الصراحة النوتيلا دي حرام يتعمل فيها كده.
ريهام بغيرة:
لأ والله عجباك قوي.
توء مين دي اللي تعجبني يا جميل. هو حد يكون معاه الفرس ويروح للخيال.
وكان بيقول جواه:
هفضل وراكي بس علشان أفوز بقلب نسمة مش أكتر. أصل مين هيبص في وش واحدة زيك.
***
في القاعة بتاعة المحاضرات.
بت يا نسمة شوفتي اللي شوفته.
نسمة بصتلها وهي مستغربة وبتقول:
إيه اللي شوفتيه يا سميرة.
سميرة بهزار:
شفت بنت عمك. بس كانت إيه حاجة جمدان كده ومحجبة ولابسة طرحة. هي خلاص ربنا تاب عليها.
إحنا ندعيلها وبس يا سميرة. مش عايزة حد ياخد مني حسنات يابنتي. ربنا يثبتها ويهديها.
وانتبهوا للمحاضرة.
***
كان ماشي بكل هيبة وفخر ببدلته السودة وجسمه الرياضي وعيونه الخضرة.
كان مدير الحسابات في الشركة بيجري وراه وهو بيقوله بأمر:
جبت كل الحسابات بتاعة السنة دي.
جبتها يا يزن بيه.
وساعتها اتكلمت سكرتيرة مكتبه بسهوكة وهي بتجري وراه:
كلمت كل العملاء يا يزن بيه وعرفتهم تفاصيل الشغل وأنك رجعت بعد سنة وطالبهم كلهم في اجتماع.
بصلها بصة برود وهو بيقول:
طب كويس إنك بدأتي تاخدي بالك من الشغل. بس خفي شوية. أنا مش من النوع ده.
مدير الحسابات ضحك بس بصوت واطي وبعدها سابهم ودخل مكتبه.
بعدها بصلها عمر وهو بيقول:
ههه والله ضحكت عليكي بجد. قولتلك يا شوشو بلاش يزن. بس الظاهر إن طبعك بيغلب عليكي قدامه.
شوشو بصتله وهي مدايقة وبتقول:
ياريت تبطل بقى. والا علشان محدش معبرك غيران.
بصلها بقرف ومعالم وشه ظاهرة:
أنا أغير من واحدة زيك ليه. اتجننت.
وسابها ومشى. وشوشوا كانت مدايقة جداً.
***
أخيراً المحاضرة خلصت. أنا تعبت جداً.
نسمة وهي بتضحك:
يابنتي أنتي معملتيش حاجة غير إنك قاعدة تبصي على الدكتور وبس.
يابت يا سماسم. أما عليه جمال يهبل.
سهى بهزار:
والله يا سميرة مهتجبيها لبر. إحنا هنا علشان نتعلم وبس مش علشان نحب. خدي بالك.
مش يالا بينا والا إيه.
سهى وسميرة:
يالا بينا. بس إيه رأيك نروح الكافيتريا نشرب حاجة علشان دماغي هتفرقع من الصداع.
سميرة:
والله يا سهى أنا كمان دماغي بتوجعني.
نسمة:
تمام. يبقى نروح نشرب حاجة ونمشي علطول.
توجهوا الكافتيريا اللي قدام الجامعة وقعدوا علشان يشربوا حاجة.
آنسة نسمة ممكن كلمة.
نسمة وصحابها بصوا على صاحب الصوت:
سامح عاوز إيه وبتنده عليا كده ليه. هو أنت محرمتش.
لأ مش اللي في دماغك. بس أنا ندمت على اللي عملته معاكي وجيت أقعد معاكم.
نسمة:
أنا أسفك مش بقعد حد معايا أنا وأصحابي. وأسفك مقبول.
سامح بمكر:
طب طلاما كده أنا هعزمكم والله ومش هقعد معاكم.
نسمة بصت لأصحابها وهما هزولها دماغهم بأه.
تمام.
وفعلا جاب المشروبات ليهم وحط في كباية الفراولة اللي طلبها نسمة برشام.
اتفضلوا. وإنتي يا نسمة خدي الفراولة بتاعتك.
نسمة مدت إيديها و.
ياترى فعلاً نسمة هتشرب والا حاجة هتحصل. وبالنسبة لإبراهيم فعلاً هيثبت براءة أخته والا ده مجرد بداية.