البنت بشهقة: مين دي يا حبيبتي؟ هو ما قالكيش إنه اتجوزني ولا إيه على سنة الله ورسوله؟
ريناد بصدمة: الكلام ده صحيح يا رائد؟
رائد بخبث: أكبر صح هو الكلام ده، قلت الحق أجيب بديل ليكي بقى، أنتِ عارفة إني راجل وعايز اللي تكون معايا، وبما إنك هتمشي أجيب غيرك.
انصدمت من كلامه ودخلت أوضتها بدون كلام.
البنت بدلع: مالك يا حبيبي؟
رائد بضيق: ادخلي دلوقتي أنتِ يا سهر.
سهر بضيق: ماشي.
دخلت الأوضة التانية وهو بص على أوضة ريناد واتنهد وقال: أنتِ اللي خلتيني أعمل كده.
خرج من البيت بأكمله.
ريناد جهزت هدومها في الشنطة وقررت إنها هتمشي وتبعد عنه، بس قعدت على السرير بدموع وقالت: كمان ليك عين تكسرني وتجرحني، أنت أكتر واحد أنا حبيته والله، بس أنت اللي بدأت بكده، طب هروح فين أنا؟ لازم أتصرف لأن مش هينفع أرجع لأهلي تاني.
قامت جهزت نفسها وأخذت هدومها وخرجت، ولسه هتفتح باب الشقة كان رائد داخل.
رائد ببرود: رايحة فين؟
ريناد بجمود: ماشية.
رائد: وأنا مش هسمح لك تخرجي.
ريناد بدموع محبوسة: رائد بعد إذنك، سيب حتى ولو ذكرى واحدة أفتكرك بيها، إحنا خلاص مينفعش نكمل مع بعض، ولو طلقتني أنا هتنازل عن القضية خالص ومش عايزة أي حقوق، أنا هبعد خالص عنكم.
رائد بحزن ومسك إيدها: ريناد أنتِ ليه مش عايزة تفهمي إني حبيتك بجد؟
ريناد بعدت إيدها عنه وقالت: خلاص يا رائد كله انتهى و...
قاطعها صوت سهر وهي بتقول بدلع: إيه يا حبيبي هتفضل واقف كده كتير؟
ريناد بسخرية: كلم مراتك بقى.
سابته ونزلت وهو خرج وراها مسك إيدها وقال: قلت لك مفيش خروج من هنا.
ريناد زقت إيده بحدة وقالت: ابعد عني بقى، عايز إيه؟ أنا بكر"هك، بكر"هك.
سابته ومشيت وهو اتصدم من الكلمة اللي قالتها.
ريناد ما كانش قدامها غير الشقة المشؤ"ومة بتاعتهم القديمة اللي فيها كل حاجة أذيتها، دخلت الشقة وكانت الشقة مبهدلة ومتربة، قعدت على أقرب كرسي وافتكرت الليلة اللي غيرت حياتها.
ريناد: أيوه جاية.
فتحت الباب وقالت بدهشة: رائد!!
رائد بابتسامة: مش هتقولي لي اتفضل؟
ريناد بتوتر: مـ مفيش حد من أهلي هنا، كنت محتاج حاجة؟
رائد دخل وقفل الباب وقال بحب: على فكرة أنا بحبك أوي.
ريناد بصدمة وتوتر: إيه أنت بتقول إيه وقفلت الباب ليه؟ اتفضل أخرج إحنا جيران وبس.
رائد قرب عليها وقال: وأنا مش بعتبرك جارتي أنا بعتبرك حبيبتي.
ريناد بخوف: أرجوك أخرج ميصحش كده، أخرج.
رائد قرب عليها أكتر ولسه هيقبلها، أبوها دخل من الباب واتصدم.
عماد بصدمة: بنتي ومع راجل غريب في البيت؟
ريناد بدموع: بابا أنا...
قاطعها صف"عة قو"ية من والدها وهو بيقول: اخررسي يا.......* أنا معرفتش أربيكي، وأنت أنا هقتلك أنت وهي.
رائد بتوتر: أنا مليش دعوة أنا...
ريناد قاطعته بدموع: كداب يا بابا والله كداب.
رجعت من تفكيرها واتنهدت، قامت دخلت الأوضة وابتدت تجهز الأوضة اللي هتنام فيها.
وفجأة الباب خبط وراحت تفتح بس اتصدمت من اللي شافته، شافت آخر واحد ممكن تتوقعه، قالت بصدمة: مراد!!