مين اللي قالك تضرب نار عليا؟ انطق وإلا مش هرحمك.
= واحدة اسمها منال.
قمت وسيبته واقع على الأرض، لأن منال دي تبقى مراتي. منال اتجرأت وعايزة تقتلني. رجعت أركب العربية وجريت على البيت. وبعد ساعة بالظبط وصلت هناك ودخلت الشقة، لكن منال مش موجودة فيها، حتى هدومها. منال بدأت الحرب، يبقى أنا عرفت العزا اللي جاي هيكون بتاع مين.
في اللحظة دي اتصلت بشهد اللي كانت بتعيط وبتقولي:
= هو في إيه يا أمجد؟ قولي إيه اللي بيحصل؟
= خليكي عندك، متتحركيش لحد ما أجلك. خلي بالك من نفسك كويس.
= طب انت كويس، طمني.
= أمجد العطار طول عمره كويس وهيفضل كويس.
= طب أنا عايزة أجلك.
= متتحركيش من بيت أبوكي. أنا هخلص من الصداع ده وهجيلك عشان نكمل فرحنا.
نزلت من البيت وركبت العربية ومشيت على بيت ناهد بعد ما اتأكدت إن مفيش حد مراقبني. وصلت شقة ناهد ودخلت وقعدت على الكنبة. بعدها بـ 10 دقايق ناهد خرجت من الأوضة واتفاجأت إني موجود.
= انت مش المفروض تكون دلوقتي في الفرح؟
= منال بعتت حد يضرب عليا نار في الفرح.
= إيه! طب انت كويس؟
= مش دي المشكلة.
= دي باين عليها اتجننت. طب هي فين دلوقتي؟
= معرفش. خدت هدومها من البيت ومشيت.
= مش يمكن راحت عند أختها؟
= مستحيل، لأن ده أول مكان هييجي على بالي، فمستحيل هتروحه.
= اومال هتروح فين يعني؟
= هلقيها.
= كان المفروض تخلص عليها من الأول يا أمجد. معرفش انت استنيت ليه.
= كل حاجة ليها وقتها يا ناهد.
= طب انت لو لقيتها هتعمل معاها إيه؟
= هقتلها.
= أمجد انت محتاج تفكر كويس. حاجة زي دي مش سهلة، وإحنا مش عايزين دليل واحد عليك، خصوصًا إن أمها ماتت من قريب.
= متقلقيش. خطة موت منال مرسومة من يوم ما اتجوزتها.
= بس كانت مرسومة على أساس إنها معاك، إنما دلوقتي هي اختفت.
= تفتكري يا ناهد إيه اللي يخليها تظهر؟
= أختها طبعًا.
= بالظبط.
= هالة دي غلبانة، وكفاية اللي انت عملته في صلاح.
= امممم، بدأت أشم ريحة خوف ممزوجة بحنية وسذاجة طالعين منك يا ناهد.
وفي ثواني سحبت السكينة اللي كانت قدامي جنب طبق الفاكهة وحطيتها على رقبتها.
= أنتي مرات أمجد العطار، فاهمة يعني إيه؟ أي إحساس بالرحمة أو الخوف أو الحنية أو السذاجة أو القلق أو حتى الإحساس نفسه. المشاعر دي كلها مينفعش تكون موجودة فيكي. فاهماني يا ناهد؟
= فاهماك يا سيد الرجالة، بس اهدى. هدي نفسك وسيب السكينة.
= هالة يا ناهد. هالة هي الحل.
= هتعمل معاها إيه؟
= هالة هي الضلع الأخير في عضم منال. منال دلوقتي فقدت أمها، وأنا ضلعين كانوا مهمين جدًا عندها. آن الأوان إنها تفقد الضلع التالت.
= هتقتلها؟
= ليه، انتي شايفاني مجرم؟ أنا قولت هكسر الضلع بس.
= أمجد أنا خايفة عليك. اللي بيحصل حوالينا ده مش سهل.
= الدنيا كلها مش سهلة يا ناهد. مفيش حاجة في الدنيا سهلة. محدش فيها بيرتاح غير القوي. الذكي اللي يبقى فاهمها وقادر يلاعبها، غير كده هتخسري والدنيا هترميكي في جهنم.
= إيه هو جهنم الدنيا؟
= الظلم، الاستغلال، الجشع، الحرمان، الجوع والفقر.
= الحرمان زي الفقر بالظبط، مفيش فرق بينهم.
= بالعكس، في فرق كبير جدًا. الحرمان هو إنك يبقى معاك فلوس تشتري أكل معين بس الدكتور مانعك عنه عشان هيضرك، أما الفقر هو إنك ميبقاش معاك فلوس أساسًا.
= مش جايز الفقر ده يبقى أحسن ليك من إنك تكون غني ومعاك فلوس بس مش عارف تعمل بيها حاجة؟
= على الأقل هفضل عايش فوق. الكل بيعملي ألف حساب، حتى لو أنا بيني وبين الموت خطوة.
= جايز بينافقوك؟
= أنا عايزهم ينافقوني. عايز أشوف الكذب في عينيهم. عايز أحس بخوفهم واحترامهم ليا. عايز أشوف عدوي مرعوب مجرد ما يسمع اسمي.
= كل ده موجود عندك دلوقتي. إيه اللي ناقصك؟
= أنا. ناقصني أمجد العطار.
= أمجد العطار قاعد قدامي وبيتكلم أهو.
= ده الظاهر مني. الباطن حاجة تانية.
= أنا مش فاهمة أي حاجة.
= أمجد العطار فكرة، والفكرة لا تموت. بس برضو مبتحسش بحاجة. مش حاسة بالاستمتاع رغم إنها صاحبة مفتاح الشقة جنة الإنسان على الأرض، ولكنه يفتقد إلى متعته.
= إيه اللي يفرحك وأنا أعمله ليك دلوقتي حالًا؟
= من ضمن الحاجات اللي استعملتها عشان أقدر أكون أمجد العطار هي إني مربطش سعادتي ولا حزني بشخص. يعني مفيش شخص في الدنيا يقدر يفرحني ولا يزعلني.
= ساعات كتير جدًا بحس إني أول مرة أعرفك وأتكلم معاك. أنا ساعات مباعرفش انت مين.
= أنا صاحب مفتاح الشقة.
: راشد.
نزلت من عند ناهد وأنا مقرر أنفذ خطتي. كلمت أربع رجالة من عندي واتفقت معاهم يروحوا على بيت هالة ويغتصبوها، وطبعًا كل ده هيكون متصور. اتحركت على بيت حماتي عشان أشوف شهد وأطمن عليها بعد اللي حصل. طبعًا كنت متوقع أسئلة كتير من أهلها، ولكن أنا تجاهلت كل ده وفتحت باب أوضة شهد ودخلت. اللي كانت نايمة، وأول ما شافتني قامت جريت عليا ودخلت في حضني. عينيها كان لونها أحمر من العياط. كانت لسة بفستان الفرح.
= ممكن تهدي عشان أعرف أتكلم معاكي.
= مين اللي عمل كدا يا أمجد؟
= أنا مين يا شهد؟
= أمجد جوزي.
= وجوزك ده يبقى إيه؟
= إيه؟
= راجل عظيم وشأنه كبير جدًا في الدنيا والآخرة، وعشان كده ليا أعداء بيحاربوني.
= ودول مصيرهم إيه؟
= نار الدنيا هتحرقهم قبل نار الآخرة. كل حاجة معمول حسابها، أنا مش عايزك تقلقي من حاجة.
= طب انت هتاخدني معاك؟
= للأسف مينفعش. أنا جاي أطمن عليكي وهمشي.
= أمجد أنا خايفة، عشان خاطري خدني معاك.
مسحت دموعها وطبطبت عليها.
= مرات أمجد العطار مينفعش تخاف. أنتي مرات صاحب مفتاح الشقة جنة الإنسان على الأرض، وأنتي أول هتدخلها.
= عنيها لمعت وقالتلي:
= بجد؟
= أنا مبكدبش.
= بس ندخلها سوا يا أمجد.
= وهو مين يقدر يفرقنا؟
= القدر.
= على حسب ما سمعت إن الدعاء بيغير القدر. ادعي لنا يمكن ربنا يستجيب منك.
= هدعيلك دايما في كل صلاة.
= وأنا هبقى سامعاك وهستنى قبول دعوتك.
مهم إنك تطمن اللي قدامك حتى لو انت نفسك مش مطمئن. دي من أساسيات الراجل. الراجل لازم يحتوي الأنثى اللي معاه. لازم يحسسها بالأمان حتى لو هما وسط غابة. لأن أي كلمة هتقولها في اللحظة دي هتتكتب عليك. اختار انت بقى تكون صاحب كلمة قوية تخلي مراتك تتطمن وتتسند عليك، ولا تكون صاحب كلمة ضعيفة، وطبعًا مش محتاج أقولك هيكون شكلك إيه في نظرها.
نزلت من عند شهد وقعدت في العربية لحد ما الرجالة اتصلوا بيا وبلغوني إنهم قدام بيت هالة.
= على بركة الله، اطلعوا ونفذوا اللي اتفقنا عليه، وأنا هاجيلكم.
اتحركت من عند شهد واتجهت على بيت هالة. الوضع هيكون صعب جدًا على منال أول ما تعرف. وفعلاً بعد نص ساعة وصلت، وقبل ما أنزل من العربية لقيت تليفوني بيرن. كان رقم غريب. رديت عليه.
= مساء الخير يا أمجد. أتمنى إنك تكون بخير.
= وصلتني هديتك، بس كان الأهم إنك تختاري ناس بتعرف تضرب نار يا منال.
= غلطة ومش هتتكرر أوعدك. المرة الجاية هوصيهم إنها تكون في قلبك.
= طول عمرك بتختاري أماكن حساسة.
= ومش أماكن بس. الناس كمان اللي بختارهم ناس حساسة جدًا.
= تقصدي إيه؟
= لو روحت عند أمك دلوقتي هتعرف قصدي إيه.
= أمي لو حصلها أي حاجة أنا هقتلك.
= هنشوف يا صاحب مفتاح الشقة.
اتحركت بالعربية بأقصى سرعة لحد ما وصلت هناك وطلعت الشقة. لقيت الباب مفتوح. دخلت لقيت أمي واقعة على الأرض.
= أمي...
امي فوقي
" في اللحظة دي تليفوني رن من نفس الرقم. رديت عليها.
البقاء لله يا أمجد. امك ماتت بنفس السم اللي قتلت بيه امي. بس الفرق بقا اني اجدع منك وحطتلها جرعة سم مميتة مش زي ما انت عملت مع امي لما قتلتها بالبطئ. طبعا انت هتتجنن دلوقتي وعايز تعرف انا عرفت ازاي. واحد من قرايبنا دكتور واول ما شاف الدوا اللي انت كنت جايبه قال ان دا علاج للسم.
= بس اللي أنتي متعرفيهوش ان اللي كان جواه مش علاج دا كان السم نفسه. يعني انتي اللي كنتي بتقتلي امك ب ايدك مع كل جرعة دوا بتاخدها.
طب عرفت بقا اني اجدع منك برضو على الاقل ابقا انت اللي قتلتها مش ابنها. استعد للي جاي يا صاحب مفتاح الشقة.
" المكالمة فصلت وانا ساعتها قمت قعدت على الكرسي وخدت نفس عميق وابتسمت وفي نفس اللحظة كانت الرجالة بتكلمني.
كل حاجة خلصت يا باشا. الفيديو هيبقا عندك دلوقتي.
= اطلع اقتل هالة!!