7\- انت لسه صاحي؟
= أيوه
- طيب انا فكرت في كلامك.. بس انا دلوقتي معايا سجاـ..ير احمد كان ادهالي وكده.. ومش عايزه اشربها بس مش عارفه اعمل ايه
= طيب اصبري..
" قلبي كان بيدق بقوة انها اقتنعت بكلامي دخلت البلاكونه وبعدين منها دخلت اوضتها وهي كانت قاعده بالبيجامه "
- هي فين هاتيها
= انا الأول عايزه اتأسف لك على كل حاجه يا يوسف.. بس انا فعلا مش هقدر اتغير لوحدي
- متقلقيش يا ليلي كل حاجه هتبقي تمام..
بصتله بعيون بتلمع: هما فالدرج عندك..
فتحت الدرج وانا بدور عليهم: مفيش حاجه
" وانا بكمل تدوير لقيتها صوتت مره واحده اتحْضيت وبصتلها "
- فيه اي يا ليلي !!!
علت صوتها اكتر: ماما !!!!! يا جدوووو !!!
" دخلوا الأوضة بسرعه و بصوا لنا وانا مكنتش فاهم حاجه جريت ناحيتهم و طنط حضنتها "
- فيه ايه يا حببتي !!!!
عزيز: فيه ايه يا يوسف !!
اتكلمت بعياط مزيف: كنت نايمه لاقيته دخل الاوضة عليا !!!!
" بصولي بصدمه وانا نفسي اتصدمت ومكنتش عارف اتكلم !!! "
- اييه!
هدي: يعني ايه يا ليلي الى بتقوليه ده
عزيز: ما تتكلم يا يوسف !!
اتكلمت وانا بتلجلج: والله محصلش انا دخلت عشان!!!
بصتلها: بطلي هزار يا ليلي انتي عارفه جيت ليه!!
طنط هدي بصتلي: دخلت اوضتها ليه اتكلم؟؟
بصيت لـ ليلي مره اخيره: انا مكنتش عايز اعمل كده!! بس هقولكم على كل حاجه
" حكيت لهم كل حاجه اعرفها و فالأخر طلعت موبايلي عشان اوريهم الشات وهي كانت واقفة ساكته وباين عليها الصدمه "
" لكن انا اتصدمت للمره التانيه لما ملقتش المسدجات!! "
- والله كانت موجوده صدقني يا جدو !!!
اتكلمت بعياط: انت كمان بتألف عليا حورات عشان تدراي على الى كنت هتعمله !!! كل الى قاله ده كدب !!! وانت عارف صحابي يا جدو !! وعارفني!! وانتي يا ماما !!!! وبعدين انتوا جيتوا شوفتو ف اوضتي بعينكم !!!!
عزيز بصله بحيره: يوسف انت مش هينفع تفضل هنا
بصتله بعدم تصديق: اييه؟؟
"لقيتها بصتلي بـ شر فا مكنتش عارف اتصرف"
- جدو صدقني!! انا دخلت عشان هي بعتتلي انها كانت هتشرب تاني انا من ساعه ما جيت بقولها تبطل الى بتعمله
ردت بكل بجاحه: اخرس انا مش بعمل اي حاجه ولا بشرب الى قولت عليه وكلهم عارفين صحابي كويس!!
= انتي مصدقه نفسك ؟؟؟ فاكره انك كده ذكية !! صدقيني محدش بيتأذي ولا هيتأذي غيرك
- انت مش معاك اي دليل ضدي بتكلمني كده بأي حق؟؟ بتحاول تداري انك دخلت اوضتي !!!
بصيت لطنط هدي: اليوم الى سألتيني فيه اتأخرنا ليه ويعتبر رجعنا الصبح كان وقتها كان ساعتها ادوها كوكاـ..ين ومقدرتش تتحمله وفضلت معاها لحد ما فاقت وبعدين جبتها لحد هنا وانتي خبطتي عليها مرضتش تفتحلك عشان مكنتش لسه فايقه وانا كنت جمبها و قولتلها تقولك انها هتنام هي مش هتفتكر اي حاجه من الكلام ده عشان مكنتش واعيه انا وانتي بس الى هنفتكر
" لقيت ماما بصتلي و بدأت تشك فيا تقريبا "
- انتي فعلا هتصدقيه؟ لو كلامه صح مقلش لحد فيكم ليه وسايبني كل ده اضيع نفسي !
= عشان محبتش صورتك تبقي كده قدامهم
عزيز: يعني كل كلامه كدب؟!
بصيت لجدو: ايوه !!! ده بيدراي على عملته
"قرب مني وبصلي بقمه خيبه الامل"
- يبقي خدوها اعملوا لها تحليل ونشوف مين كداب
فتحت عيوني بدهشه وبصتله: انت رْبالة !!!
= انا هبقي كده فعلا لو التحليل بتاعك طلع مفهوش حاجه يا ليلي
- ده لما تشوف نجوم السما !!!!!!
جدو بأنفعال: اخرسوا انتوا الاتنين كفاية!!! محدش محترم وجودنا !!!
زعقت بنرفزه: انا مش هعمل الهبـ.ل ده !!!!! مش مضطره اثبت لحد اي حاجه !!! و على فكره لو ممشيش من هنا بعد الى حاول يعمله انا الى همشي
"جدو سكت لكن ماما بصتلي"
- وانتي مش عايزه تحللي ليه؟
= انتي فعلا هتصدقي كلامه؟
- لا انا مصدقاكي انتي.. وعشان كده عاوزاكي تحللي طالما مفيش حاجه
= وانا هستفاد ايه ؟؟
- وقتها هنمشي من هنا و هو هيفضل
رد بسرعه: لا! وقتها انا الى همشي من هنا هرجع مكان ما كنت
" ابتسمت بدون ما حد ياخد باله.. هو ده الى كنت عاوزاه انوه يمشي للأبد.. "
" خرجوا وسابوني اغير عشان نروح نعمل التحليل وانا جهزت و.. جهزت كويس اوي كمان كنت نازله وبصيت عليهم ملقتهمش فالدور فا دخلت اوضته كان قاعد هادي "
- شكلك مضايق ليه ؟ مش انت قولتلي يا انا يا انتي؟
قام وقف قصادي: قولت.. و دلوقتي هيعرفوا الحقيقة لما التحليل يطلع يا ليلي
= ولما يعرفوها؟
- شوفي انتي بقا
ضحكت: انت صعبان عليا.. خليك بس فاكر انك قولت لو التحليل طلع مفهوش حاجه هتمشي
" خرجت و سيبته و روحت مع جدو و ماما المستشفي و خدوا العينه مني و بعدين مشينا وقالو هيكلمو جدو بليل او الصبح يعرفوه النتيجه.."
>>>>>>>>>>>>>>>>>>>>>>>>>>>>>>>>>>>لا إله إلا أنت سبحانك إني كنت من الظالمين
|| في الشركه | في مكتب مريم ||
- يوسف اتفضل.. مال شكلك؟
= انتي فاضية؟
- أيوه حصل ايه
= مفيش بس عايز اقولك موضوع كده
- اكيد قول
= بصي
" بدأت احكي لها كل حاجه و هي كانت بتسمع و ساكته.. وانا حكيت كل التفاصيل من البداية "
- ايه انتي مصدقاني صح؟
"هزت راسها بـ.. ايوة فا اتنهدت براحة."
- انت بجد طيب اوي يا يوسف.. حقيقي متستاهلش كل ده يعني فا انا اسفة بالنيابة عنها
- انا مش زعلان منها اوي يعني قد ما زعلان عليها يا مريم.. وعامة انا عارف ان جدو مصدقني
= وانا كمان حاسة كده
"سرحت شوية فا شاورت قدام وشي وابتسمت"
- ايه روحت فين؟
= في ايام ما كنا اطفال.. لما كانت ليلي رقيقه وبنت عادية كنا بنلعب كلنا و فرحانين.. كانت أقل حاجه بتزعلها
بصتلي وهي بتضحك: وكانت دايما تعيط و حساسه اوي بالذات لما ناخد منها اي حاجه بتاكلها
ضحكت و بصتلها: ممكن تساعديني نرجعها
- بس كده يا ابن عمي؟ عنيا
= قولتلك قبل كده انك جدعه؟
ابتسمت: قولت
- ومالو.. نقول تاني
>>>>>>>>>>>>>>>>>>>>>>>>>>>>>>>>>>سبحان الله و بحمده سبحان الله العظيم
|| في الفيلا | بعد المستشفي ||
" رجعت و كلمت صحابي عشان يجوا كنت حابه اتصرف عادي وكأن مفيش حاجه جدو راح الشغل وانا كنت مستنياهم فالجنينه لقيت ماما جت قعدت جمبي "
- خير يا ماما
= انتي عارفه اني بثق فيكي صح؟
- أيوه
= انتي مهما عملتي انا عارفه انك مش هتتخطي حدودك يا ليلي صح ؟
- ايه لازمة الكلام ده؟ مش اجبرتوني احلل؟ استنوا وشوفوا النتيجه عشان تعرفوا انوه بني ادم مش كويس وكداب
= انا وجدك مش اغبيه يوسف ميعملش كده
بصتلها بتوتر: يعني ايه؟.
- معرفش لكن اكيد مكنش داخل يعملك حاجه
= والله؟ هيدخل في وقت متأخر يعمل ايه!
= يعني مكنش في اوضتك قبل كده لما رجعتوا سوا بليل ؟
- لا و مكناش سوا وبعدين انا مش فاكره احنا دخلنا الفيلا مع بعض وانا كنت مرهقه وطلعت اوضتي نمت
= ماشي يا ليلي
" الشلة وصلوا فا سابتني وقامت سلمنا على بعض واطمنوا عليا وكمان كان معاهم البايك بتاعتي بعد ما اتصلحت.. وفضلت احكي لهم عن الى حصل "
أحمد: بتهزري؟؟ وحللتي
- ايوه يابني فيه ايه
عمر: مش اول مره تحصلنا ايزي ايزي
نادين: المهم شوفتي البايك؟
- اها مالها
= وريها يا عمر لقوا فيها ايه
بصتله بستغراب طلع جهاز و حطه في ايدي: لقوا ده ملزوق فيه من تحت ورا كده
مسكته و اتكلمت بعْضب: ده جهاز تتبع!
احمد: طبعا الحدق الى عامل ذكي هو الى حطهولك صح
- عشان كده عرف مكاني يوم لما روحت الجبل !
احمد: ده بقي خنيق اوي منك لله يا عمر
عمر: مكنش قدامي غيره يجي معانا لأني ضامن انوه هيكسبنا !
نادين: ليلي! انتي هتيجي السبق الاخير صح؟
احمد: ايوه يا ليلي احنا اتأهلنا في حد فعلا لعب فالبايك بتاعتك
- مين بقا ؟؟
= خالد رشاد
- اه.. الى معلمه عليه قبل كده..
عمر: بالظبط يعني بطلي الشغل ده ولازم ندخل عشان نكسب
- بطل انت الشغل بتاعك انت عارف ان محدش بيجبرني على حاجه وانا قولت اني مش عاوزاه معانا حصل ولا لاء ؟
= كان عندك حل تاني ؟ هنعمل ايه بعد يومين بقا ؟ ماحنا عاوزينه! وهو سجل خلاص
- كله من تحت راسك يا عمر !
احمد: خلاص يجماعه! هنعدي السبق ده وبعدين نروق له!
نادين: انا بقول كده برضو بعدين انتي كدا كدا عرفتي توقفيه عند حده
ضحكت: هو لسه شاف حاجه ؟
>>>>>>>>>>>>>>>>>>>>>>>>>>>>>>>>>>" صلي علي محمد "
|| في الشركه | الساعه 6 ||
" كنت بخلص شغلي وفاضلي حاجات بسيطه وهروح الباب خبط "
- اتفضل
" اتفاجئت بيها قدامي داخله بقمه الهدوء وحطه ايدها في جيبها وبصالي بشماته "
- جاية ليه؟
طلعت ايدها من جيبها ورفعتها: تعرف حاجه عن الجهاز ده ؟
اتنهدت وبصيت للأرض بعدين بصتلها: انا الى حطيته
- امممم ده انت صريح اوي!
= كنت خايف عليكي افهمهالك ازاي ؟؟
- فا قولت اراقبها و حطيته و عرفت مكاني على الجبل وجيت ورايا وكده بقا خلاص؟ اتحكمت فيا
ساب مكتبة وقرب وقف قصادي: ليلي لما مكنتيش في وعيك فضلتي تقولي حاجات غريبة
بلعت ريقي وبصتله: يعني ايه
- اتكلمتي عن شجرة.. و عن وردة و اتكلمتي عن خناقة جامده و البايك كأنها قصة محتاجه تترتب! او لغز محتاج يتحل.. بس حتي وانتي مش في وعيك مصرحتيش فيه اية بالظبط ايه الى مخليكي كده؟ ليه رافضه المساعده و بتحاربي نفسك؟
= خلصت ؟
- مخلصتش.. انا مش ضدك ومكنتش عايز اقولهم انا لآخر لحظه كنت بتفاهم معاكي وبحاول اساعدك حتي بعد الحركه الى عملتيها فيا عشان شيفاني عدو
= ومش هشوفك غير كده! انت انسان حشري و متسلط و عايز تحاسبني بتحاول تخليني اعرفك الى هما مقدروش يعرفوه محدش فيهم مصدق اني كده بمزاجي؟؟ كلكوا فاكرين فيه سبب فعلا ؟
- يعني السبب مش عمـ...
" سكت ومرضتش اتكلم عنه قدامها.. زي ما جدو قالي"
- طب وبعدين هتعملي ايه تاني؟
= انت لسه مشوفتش حاجه يا يوسف
- فوقي يا ليلي النتيجه كمان ساعات هتظهر
= بالظبط.. فا خلي بالك.
" رميت الجهاز وفتحت الباب عشان اخرج شوفت مريم في وشي "
- ليلي ازيك!
" مردتش عليها و كملت طريقي "
- فيه ايه يا يوسف؟ انا من سنين مشوفتهاش هنا
"ضربت الكرسي بأيدي وانا متعصب"
- يوسف اهدي فيه ايه !!
= سبيني يا مريم معلش
قربت ومسكت ايدي: هدي اعصابك!!! انت نسيت اتفقنا على ايه! قولتلك الموضوع مش سهل
- مريم انتي مش فاهمه اي حاجه ليلي هى مش سهله! انا مبقتش مرتاح
= طيب اهدي بس اهدي!
>>>>>>>>>>>>>>>>>>>>>>>>>>>>>>>>>>
|| تاني يوم الصبح | الساعه 8 ||
" صحيت ونزلت وكانو بيجهزوا الفطار "
فاطمه: لوله! كويس انك صحيتي بدري انا عامله بيض من الى بتحبيه
- شكرا يا فوفا
عزيز: خير ايه مصحيكي بدري؟
- عندي اول امتحان فالكلية الساعه عشره
ماما كانت بتشرب و شرقت: ايه ؟ انتي رايحه
اخدت من الأكل الى قدامي وضحكت: اه فيه ايه يا ماما؟
" الابتسامه اترسمت على وشها وبصت لحدو بسعاده وانا بصيت ناحيه يوسف وابتسمت بأستفزاز "
" جدو موبايله رن وانا بصيت بتركيز "
عزيز: دي المستشفي.. ألو.. النتيجة طلعت؟ ....... فعلا ... طب تمام شكرا جدا
"قفل الموبايل و الكل بصله الا انا كنت مكمله اكل"
عزيز بص ناحية يوسف: التحاليل سليمه ومفهاش اي نسبة محْدرات
يوسف بصلي بعدم استيعاب:
>>>>>>>>>>>>>>>>>>>>>>>>>>>>>>>>>>