احكيلى ومتخافيش مش هقول حاجه لعزيز.
بصراحه يا انكل فى بنت جديده بتدرب عند عزيز فى المكتب وعنيها منه.
طيب إيه المشكلة هى دى لا أول ولا أخر واحده تعجب بعزيز.
لأ المشكلة البنت دى مش سهله خالص وعزيز بيسايرها وبيعاملها بشكل مختلف وطول الوقت مع بعض لدرجة انها حضرت معانا امبارح الفرح وهو وصلها بنفسه لباب بيتها.
لأ واحده واحده كده وقوليلى كل حاجه بالتفصيل.
البنت دى تبقى صاحبه مرات اياد صاحب عزيز وخلته يتوسطلها عند عزيز عشان يتابع الماستر بتاعتها وطبعا عزيز وافق عشان صاحبه وبعد كده بقى بتحاول تعمل الاعيبها عليه مره يغمى عليها وتخليه يشيلها يوديها المستشفى ومره تحضر معاه الفرح وتفضل قاعده معانا بحجه إن مافيش حد تعرفه فى الفرح وتخصص الرسالة بتاعتها عشان تبقى نفس نوع القواضى اللى عزيز بيمسكه وانهارده واحنا ماشين تعمل نفسها دايخه عشان يفضل عزيز جمبها واللى أكدلى ان نيتها مش حلوه أنها اطلقت من جوزها بعد شغلها مع عزيز مش قبل فده يدل على ايه، انها حاطه هدف قدامها وبتحاول توصله.
وهو بيفضل معاها ولا بيعاملها زى الباقى.
للاسف يا انكل مهتم بيها زياده وبيصدقها أوى ومش بس كده الناس اللى شغالين فى المكتب لاحظوا علاقتهم وتقاربهم ببعض.
للدرجة دى.
هاديه هدت برأسها بمعنى نعم وتصنعت الحزن وقله الحيله.
جلس جمال والد عزيز يفكر في ما سمعه من هاديه. كان يشعر بالقلق على ابنه، لم يكن يتوقع أن يقع عزيز في مثل هذه المكيده لكن عليه الأول أن يتأكد من صحه ذلك الحديث.
دلف إليهم عزيز فوجد والده شارد فإقترب منه وحدثه.
بابا أنت بخير.
أه يا حبيبى انا بس جعان ومستنيكوا تيجوا عشان نتغدى كلنا سوا وحشتنى لمه زمان.
أدينى معاك أهو وأنا كمان جعان يلا عشان ناكل.
ذهبوا جميعاً لطاولة الطعام وبدأت هاديه تتعامل بأريحية وتضع الطعام أمامهم. لم يبدى أحدا منهم اعتراضه وتركها عزيز تفعل ما تريد.
ابتسمت هاديه على نجاح أول خطوه فى خطتها.
انتهى اليوم فى منزل عزيز وذهبت هاديه لمنزلها وقررت تنفيذ خطتها الثانيه للتخلص من رحيل.
بينما جمال قرر السؤال عن رحيل داخل المكان الذى تقطن به ويذهب لابنه داخل المكتب ليتأكد من حديث هاديه هو يخشى على إبنه فمن وجهة نظره أن ابنه قليل الخبره فى ألاعيب النساء.
فى اليوم التالى اتصل جمال بهاديه وطلب منها بعض البيانات الخاصه برحيل فعادت هاديه للحديث مع مها واخذ بيانات رحيل منها.
أعطتها مها بعض البيانات فعادت هاديه لمعاودت الإتصال بجمال واعطته تلك البيانات.
سجل جمال البيانات لديه ثم قام بالاتصال بأحد الأشخاص من معارفه وأعطاه تلك البيانات وطلب منه أن يرسل له تقرير حول تلك الفتاه.
خلال تلك الفتره كانت رحيل تركز على رسالتها وعزيز يصب كامل تركيزه في أحد القواضى التى سيترافع بها وكانت علاقته برحيل تزداد فى العمل بسبب تلك القواضى التى تعمل عليها ومن جهه اخرى مراجعة الرسالة الخاصة بها معه.
كانت هاديه منتظره مكالمه من جمال يطمئنها بها حتى تستطيع تنفيذ باقي الخطه فهى من داخلها عندما يتأكد جمال من تاريخ طلاق رحيل سيتأكد من صدق كلامها.
بعد مرور يومين فى منزل جمال جاءه اتصال من شخص ما وأعطاه التقرير الذى طلبه فتح جمال التقرير وبدأ في قراءة.
وكان عبارة عن.
الاسم: رحيل عبد الرحمن حجازى.
خريجه حقوق جامعه القاهره. تبلغ من العمر ٢٤ عاماً تزوجت من ابن عمها ولديه مكتب محاماه فى العنوان التالي. وأتت معه الي القاهره. وفى يوم. تم طلاقها من اسبوعين و تعمل فى مكتب عزيز المراكبى المحامى. تعمل محاميه تحت التدريب وفى نفس الوقت يباشر رساله الماجستير الخاصة بها. لا غبار عليها او على عائلتها.
قرر جمال التدخل والتحدث لابنه وقام بمهاتفه هاديه.
الو انكل جمال ازيك.
بخير الحمدلله انتى عامله ايه.
بخير يا انكل.
بتقابلى عزيز.
لأ انا مش بخرج من البيت نهائى بسبب أوامر عزيز وغير كده كل شويه يتصل بيا فلازم أكون فى البيت عشان مايقلش انى بكدب عليه ويزعل.
تمام يا بنتى بقولك ايه انا سألت عن البنت دى واتاكدت من كلامك وهروح لعزيز المكتب عشان انا ليه كلام معاه في الموضوع ده.
هتروح امته يا عمى.
النهارده.
لأ خليها بكره.
ليه.
النهارده كنت عارفه إن عزيز عنده قضايا كتير بره المكتب وغالباً مش هتشوفوا هناك خليها بكره وروحلهم من غير ماتقوله.
خلاص استناه لما يجيى واكلمه.
لأ طبعا هيدافع عنها وهينكر أنا رأيى يا عمى إنك تروح بنفسك وتشوف بعينك وقتها مش هيقدر.
عندك حق أنا هروح واكلمه هناك خلاص هكلمك بكره اقولك وصلت لايه.
شكرا جدا يا انكل ربنا ما يحرمنى منك ابدا.
أغلق جمال معها الهاتف وبعدها قامت هاديه بالاتصال بعزيز أجابها عزيز ببرود.
ألو ايه هاديه.
ازيك يا حبيبي عامل ايه.
أنا كويس الحمد لله إحنا مش لسه قافلين.
أصل انا نسيت اقولك المره اللي فاتت وقع الانسيال بتاعي عندك فى المكتب ولما سألت مها قالتلى انها لقيته فأنا هعدى بكره عليك عشان اخده منها.
طيب مابعتهولك فى عربيه بدل المشورة.
انا عايزه اتمشور يا سيدى انا زهقت من القاعدة فاخدتها حجه اقابلك واخرج وارجع الانسيال.
تمام يا هاديه براحتك.
ثم أغلق الهاتف معها واتصلت هاديه بعد ذلك بمها وأخبرتها أنها ستمر عليها غدا وابلغتها بالخطه التى طلبت من مها تنفيذها.
بس انا اخاف يا مدام هاديه حد يكشفنى.
استحالة أنا مش غبيه عشان اخليكى تنكشفي وانكشف معاكى ووقتها هتبقى علاقتى بعزيز انتهت والمره دى للابد.
وافقت مها على حديث هاديه ومن داخلها بعض القلق.
مر باقي اليوم بدون احداث جديده وفى اليوم التالي ذهبت هاديه لمكتب عزيز وقابلت مها ثم أعطتها احدى الأدوية.
خدى البرشامه دى هتحطى نص فى كوبايه عزيز والنص التانى فى كوبايه رحيل.
طيب افرضى ناموا كده هيفهوا إن حد حطلهم حاجه.
بصى يا مها وقولتلك اجمدى لو خايفه يبقى بلاها وهشوف غيرك دى برشامه منوم بس الكميه اللى هتحطيها هتخلي راسهم تقيله وهيغفلوا دقايق مش أكتر من كده وهيفتكروا دوختهم دى بسبب انهم كانوا فى المحكمه طول اليوم وقولتلك اديهالهم اخر اليوم عشان انا عايزاهم يبقوا لوحدهم فى المكتب فى الوقت ده.
طيب ايه اللى هيحصل بعد كده.
مالكيش دعوه دى مش شغلتك خالص انتى مهمتك لحد كده تنفذى اللى أنا بقلهولك بس فاهمه.
حاضر.
أثناء وقوفها مع مها وجدت رحيل فى طريقها لمكتب عزيز فأوقفتها.
انتى يا.
أكملت رحيل طريقها ولم تجيبها فذهبت اليها هاديه واوقفتها.
انتى يا بتاعه مش بكلمك.
أولاً انا اسمى رحيل.
معلش يا رحيل هانم نسيت اسمك أصله غريب زيك بصراحه المهم روحى اطلبى من البوفيه يعملى فنجان قهوه ويبعته مكتب عزيز واستنى شويه ماتدخليش ليه غير لما اخلص كلامى معاه فاهمه.
قامت رحيل بتجاهلها وذهبت باتجاه غرفه عزيز فأوقفتها هاديه مره أخرى.
طبعاً هتجرى تشتكيله وتعيطيله.
وقفت رحيل فى مكانها ونظرت لهاديه.
ولما إنتى جبانه أوى كده وخايفه أنى اشتكيله بتعملى اللى عملتيه ده ليه ها، بس عموماً لانتى ولا اللى واقفه جمبك دى تفرقوا معايا لانى اكبر من أنى ارد عليكم أصلا والموضوع أقل من أنى حتى اشتكى.
ثم تركتهم ودلفت لغرفه عزيز.
وقفت هاديه تنظر فى اثرها بغيظ فهى لم تتوقع ذلك الرد منها فهى خمنت أقصى شئ ستفعله أن تشكو لعزيز ووقتها ستكذبها لكن هانت باقى القليل وستخرج من حياته للابد.
اخرجت بعد ذلك انسيال من حقيبتها ودلفت لغرفه عزيز واقتربت منه لتسلم عليه وتجاهلت رحيل وفعلت معها رحيل نفس رد الفعل.
قامت بتكمله حديثها عن العمل مع عزيز مما جعل عزيز مشتت من جهه رحيل تحدثه ومن جهه أخرى هاديه تجذب رأسه اليها بيدها حتى تجذبه فى حديثها هى وبعدها رحيل تقوم بمناداته باسمه حتى يركز معها.
لم يستطع عزيز الصمود فوقف فى مكانه.
بس انتوا الاتنين بتتكلموا فى نفس اللحظة مش فاهم حاجه.
تحدثت رحيل مسبقه.
انا عايزه اخلص القضيه دى قبل مامشى.
ثم تابعتها هاديه بالحديث.
وانا عايزه اسلم عليك ومعطلكش عن الشغل إنما هى مش سيبالى فرصه.
نظر عزيز لرحيل وقرر أن ينهى حديث هاديه أولا حتى تنصرف.
تمام يا هاديه لقيتى الانسيال.
اه أهو وخد بقى لبسهولى عشان مش عارفه البسوا لوحدى.
قام عزيز بالاقتراب منها ومساعدتها فى لبسه ثم عاد لمجلسه مره اخرى.
تمام كده يا حبيبي همشى بقى واشوفك بعدين باااى.
ثم خرجت هاديه من الغرفه واشارت لمها أن تدخل لهم المشاريب.
وبالفعل فعلت مها كما ابلغتها هاديه.
بعد خروج هاديه قامت بالاتصال بوالد عزيز واخبرته بوجود عزيز ورحيل بالمكتب.
خرج جمال من منزله وتوجه لمكتب عزيز.
فى ذلك الوقت غفى عزيز بمكتبه وكذلك رحيل.
وبعد فتره قامت رحيل ونظرت لساعتها وجدت مر فتره على انتهاء عملها اخذت حقيبتها واتجهت للخارج وكان ذلك نفس موعد خروج عزيز من غرفته.
نظر لها عزيز بدهشه.
ايه ده انتى لسه هنا.
اه مش عارفه غفيت من غير ما احس.
وانا كمان خلاص تعالى اوصلك فى طريقى.
لأ شكراً لحضرتك هاخد اوبر.
اسمعى الكلام ويلا هوصلك.
أثناء حديثهم ونقاشهم دلف جمال اليه.
نظر جمال للمكتب ووجده فارغ واضح أن الجميع ذهبوا من فتره.
لماذا يجلس عزيز بمفرده بالمكتب فى ذلك الوقت ولما لم يطلب من احد الانتظار معهم وبدأت الشكوك تساوره.