تحميل رواية «مغامرات عائلية الجزء الثاني» PDF

عبدالله : على فين يا زمردة هانم؟ ده انتي أول وحدة هتتعاقبي.

زمردة بصدمة: نعم؟

عبد الله: فريدة عملتي اللي قولتلَك عليه؟

فريدة بخبث: طبعًا يا جدو، أخدت كل حاجتها وخبّيتها.. ومش هتعرف تاخد حاجة منها.

زمردة: إيه ده؟ انتي إزاي تمدي إيدك على حاجتي يا بلونة انتي؟

فريدة: والله جدو اللي طلب مني، أنا مليش دعوة.

عبد الله: سحر، طلّعي الجلابيات القديمة وأدي أمك واحدة منهم.. تصدقوا يا عيال أنا نفسي بإيه دلوقتي؟

دينا بتوتر: بإيه؟

عبد الله: عيش بلدي من تحت إيد زيزي هانم.

دينا بحماس: أنا هعمله.

عبد الله: اسكتي انتي يا دينا.. زيزي هانم هي اللي هتعمله دلوقتي.. وأنتم عقوبتكم هتبدأ من بكرة.

حلا: هيا إيه عقوبتنا يا جدو؟

فارس: هنرجع نلعب بالغيط تاني؟

عبد الله: لأ يا ظريف.. قبل ما تقطفوا باميه للغريب، غيط جدكم أولى.. هتنزلو تقطفوها كلكم مع بعض كدة.

زياد: كلهم اللي هما مين يعني؟

عبد الله: كلكم.. بنات وولاد.. ما عدا فريدة وحبيبة وغادة.

لارا: والله أشمعنى حبيبة دايمًا مستبعدة؟ كل مرة هي اللي بتورطنا وما بتتعاقبش معانا.. ده ظلم.

سعاد: انتي مش شايفة بطنها؟ هتنزل تشتغل معاكم إزاي وهي على وش ولادة؟

حبيبة: وبعدين أنا روحت غصب عني وإنتي شاهدة لما دينا وحلا خدوني بالعافية.

لارا بغيظ: بس كل اللي حصل كان بسببك.

زمردة: استني يختي منك ليها.. أنا مش هشتغل حاجة في البيت ده.. إيه الكلام الأهبل اللي سمعته ده؟ إنتي يا بلونة وديتي حاجتي فين؟

عبد الله: اللي قولته هيتنفذ.. انتي هنا في بيتي واللي يقعد في مكان لازم يحترم قوانينه.. ولو مش عاجبك اتفضلي، الباب يفوت جمل.

زمردة بغضب: أكيد همشي من البيت العجيب ده بس هاتولي حاجتي الأول.

عبد الله: دلوقتي حاجتك عند فريدة.. خديها منها لو قدرتي عليها.

زمردة بغضب: هاتي حاجتي يا بت انتي.

فريدة: آسفة يا تيتة، ما أقدرش.. خصوصًا إنك من ساعة ما وصلتي عمالة تشتمي فيا.. اعتبريها رد اعتبار أو رهينة عندي لغاية ما العقوبة تخلص.

زمردة: آه يا حرامية، والله لأبلغ البوليس.. حضرة الضابط احبسيها دي حرامية.

يزن لدينا: هي بتكلمني أنا؟

دينا: أيوه.

يزن: والله يا مدام زيزي أنا اتعلم عليا مرتين قبل كده من الراجل ده.. ودي التالتة، مش عايزهم يبقوا أربعة، الهي تحج يا شيخة.

زمردة: همشي إزاي من غير حاجتي يا متخلفين؟ بطاقتي وجواز السفر وفلوسي كلهم بالشنطة.

سحر: وما تتخيليش إن بابا هيبعتلك فلوس أو إخواتي ممكن يساعدوكي.. عشان بابا زعل منك جامد وما بقاش عايزك.

زمردة بذهول: يعني إيه؟

سحر: يعني المحامي كلمه وقال له إنك عايزة ترفعي قضية خلع.. عايزة تخلعي جوزك بعد العمر ده، يماما؟ عيييب والله عيب.

زمردة: مستحيل.. توفي ما يقدرش يعيش من غيري أبدًا.

تميم بضحك: توفي؟ لسه بتقوليه توفي يا تيتة؟

زمردة: اخرس انت.. أنا مستحيل اشتغل حاجة في البيت ده.

سحر: مقدامكيش حل تاني يما.. لو خرجتي من هنا هتروحي لفين؟ معاكيش لا فلوس ولا حاجة.. ولو عايزة تفضلي هنا لازم تنفذي أوامر عمي.

زمردة بانفعال: مش هشتغل.. ده عايزني أعمل عيش بلدي.. أنا أقعد أنخل وأعجن زي الخدامة؟

عبد الله: وهتلبسي جلابية كمان.. ده إحنا لسه بأول الطريق، اصبري بس.

سحر: يلا يما قدامي عشان أديكي هدوم الشغل.

زمردة بغضب: عايزة تشغلي أمك يا بت يا عاقة.

سحر: معلش يماما، دي قوانين البيت.. منا بشتغل من يوم ما اتجوزت، شوفتيني قلت حاجة.. مش انتي اللي بتقولي السن مجرد رقم، يلا عايزين نشوف شطارتك بقى.

عدنان: مسخرة علينا ناكل عيش من تحت إيديكي يا حماتي؟ ده عيد بالنسبالنا.

زمردة بقهر: ماشي، أنا هوريكم.. والله ما هعديها كده.. هتشوفوا.

سحر: طيب يلا يا حبيبتي قدامي عشان تورينا هتعملي إيه.

أمْسَكَتْهَا سحر من يدها بهدوء وأخذتها للطابق العلوي.

تميم: أنا لغاية دلوقتي معرفتش إيه اللي عملته عشان أتعاقب.

عبد الله: منا لو قلت هنا ممكن يروح فيها قتيل، فخليها سر أحسن.

زياد: طب أنا أقسم بالله ما عملت حاجة.. ليه الظلم ده يا جدو؟

عبد الله: ما تحلفش بس.

فارس: طب والله حضرتك بتتلكك عشان تعاقبنا.. ما أنت عارف إننا بريئين، وهو يزن اسأله.

عبد الله: مهو متهم معاكم وهيُعاقب زيه زيك يا حنين.

كارما بتوتر: جدو، هو أنا هتعاقب؟

عبد الله: لأ يا حبيبتي، انتي كمان مستبعدة.. بس هتشرفي عليهم معايا.

كارما بسعادة: يسس.

دينا: ضروري نلبس الجلابيات يا جدو؟ ينفع ننزل بلبس عادي؟

عبد الله: ضروري يا دينا.. المرة دي ده شغل بجد مش أي كلام زي المرة اللي فاتت.. يلا الحقوا ارتاحوا عشان بكرة هتتعبوا أوي.

يزن: طب استأذن أنا.

عبد الله: رايح فين يالا؟ مفيش مرواح.

يزن: آه، أنا أسير يعني.. تمام، هنام فين؟ برا زي المرة اللي فاتت؟

عبد الله: لأ يا حبيبي، انت دلوقتي كاتب كتابك يبقى هتنام في البيت.

يزن بخفوت: قصده بأوضتك يعني.

دينا: اتلم.. ده انت هتتبسط أوي مع زياد.

يزن: والله؟

عبد الله: يلا كل واحد يروح يشوف وراه إيه.. جايكم أيام سودة إن شاء الله.

حلا بخوف: والنبي يا جدو تكلم بابا.. من ساعة ما وصلت وهو بيبرقلي.

حسين: اخرسي يا حلا.

عبد الله: حسين.. لو سمحت يا ابني، قلت لك أنا اللي هعاقبهم.. ما تكبرش الحكاية بقى.

حسين: ما أكبرهاش؟ بنتي متهمة بقضية ممنوعات وعايزني ما أكبرهاش؟

حلا: برييييئة، قالولك بريئة.

عبد الله: كفاية يا حسين، غلطهم وهيتحاسبوا عليه.. مش هنقعد نعيد الكلام كل شوية.

حسين بحنق: تمام.. زي ما انت عايز يا عمي.

توجه عبد الله لمكتبه بينما ذهب الباقون كل إلى أشغاله.

أوس: يلا يا حبيبتي لازم ترتاحي.

حبيبة: جدو زعل مني.. أنا كدبت عليه.

أوس: جدي لو زعل من كل الدنيا مش هيزعل منك يا حبيبتي.

حبيبة: بس كان بيلومني.. سمعته قال إيه.. أنا لازم أروح أكلمه.

أوس: أوك، إن كان ده هيريحك، يلا بينا.

توجهت إلى مكتب جدها وخبطت الباب ودخلت مع أوس.

عبد الله: فيه إيه تاني؟

حبيبة ببكاء: جدووو، والله ما كان قصدي أكدب بس أنا كنت خايفة.

عبد الله: طب ليه بتعيطي؟

أوس: هرمونات.

قام عبد الله وتوجه لها وحضنها.

عبد الله: بس يا حبيبتي، العياط مش كويس عشانك.. أنا مش زعلان منك.

أوس وهو يسحب حبيبة: كلمها من غير أحضان.. دي مراتي أنا وأنا بس اللي أحضنها.

عبد الله: اسكت انت.. حبيبتي، أنا مش زعلان منك بس مش عايزها تتكرر عشان أنا أدرى بمصلحتهم.. ولو قولتيلي من الأول كنت هحلها من غير ما يتبهدلوا كدة.

حبيبة: والله كنت مخضوضة عليهم وزيزي سابتني واختفت ساعتها.

عبد الله: زيزي دي سبب كل المصايب اللي بتحصل على الأرض.

حبيبة: آه والله، هي اللي قالت للبنات ياخدوني غصب عني.

عبد الله: بس أهي هتدفع تمن كل حاجة عملتها من يوم ما اتولدت لغاية النهاردة.. دي هتشوف أيام منيلة، بس استنوا وشوفوا هعمل بيها إيه.

أوس: من دلوقتي هقولك يا حبيبة، أوعي تاكلي حاجة من اللي هتعمله.. ممكن تسممنا كلنا دي، ولا يفرق معاها.

حبيبة بخوف: يا انهار أسود.. لا لا مش هاكل.

عبد الله: ولا حد هياكل.. دي بس بداية للعقوبة.. روحي ارتاحي يا حبيبتي، انتي تعبتي أوي النهاردة.

حبيبة: يعيني، مش زعلان مني خالص؟

عبد الله بابتسامة: لأ يا حبيبتي.. خد مراتك ترتاح يا أوس، يلا.

أوس: حاضر.. امشي يا حبيبتي.

***

نزلت زمردة للمطبخ.. كانت ترتدي جلابية واسعة باللون البني الغامق وتلف رأسها بوشاح أسود.

زمردة بقرف: دي آخرتي ألبس كيس زبالة؟

سحر: ماما، امسكي الدقيق أهو وعندك كل حاجة في المطبخ جاهزة.. يلا اقعدي واعملينا العيش بقى.

جلست زمردة على قطعة خشبية ووضعت سحر وعاء كبير جدًا أمامها.

زمردة بضجر: إيه كل ده يا بنتي؟ هاتي حاجة صغيرة.. ده أنا هعمل حتتين بس.

سحر: لأ يماما، عمي طلب كمية كويسة.. وما تفكريش إنك تحطي بيها حاجة كده ولا كده عشان هيجبرك تاكلي أول وحدة.

زمردة بغضب: اخرسي يا بت، بتستقوي على مامتك يا بنت الكلب؟

سحر: والله ده قانون البيت.. انتي عايزاني أطلق بعد العمر ده وأقعد جنبك يما؟

زمردة: طب حطي الدقيق، خلصيني.

بدأت زمردة تعجن وفي كل ثانية ترفع يديها لتتنفس.. مسحت جبينها بيدها فاتلتصق العجين برأسها ومقدمة شعرها.

زمردة بصراخ: أعااااااا! أنا اتبهدلت أوييي.. تعالي يا بت الحقيني.

دلفت خديجة وخولة بسرعة.

خديجة بفزع: إيه اللي حصل؟ إنتي كويسة يا طنط؟

سحر: مفيش حاجة، بس جه شوية عجين على شعرها.

خولة: طيب وإيه المشكلة؟ ده عجين عادي يا طنط.

زمردة لسحر: هاتي حاجة أمسح بيها وشي يا بنت الكلب.

سحر وهي تمسح وجه والدتها: ما انتي الصبح كنتي عيلة بضفاير وبتتنطي على اللي خلفونا.. إيه اللي حصلك دلوقتي؟ لحقتي تعجزي يما.

زمردة بغضب: اخرسي انتي، العجوزة.. أنا بس مليش في شغل الفلاحين ده.

خديجة: الأ قوليلي يا طنط، هو بجد سعدية قالتلك إن حبيبة معمولها عمل؟

زمردة: أيوه.. وقالت إنه حد قريب منها اللي عمله.

خولة بشهقة: يا انهار أسود.. مين يا زيزي، أبوس إيدك تقوليلينا.. البت على وش ولادة وممكن تتأذي.

زمردة بخفوت: سلفتها.. دي اللي بتغير منها ومش عايزها ترتاح بحياتها.

سحر: إيه الكلام ده يما؟ فريدة وحبيبة زي الأخوات وأعز.. وبعدين فريدة لا بتخرج ولا بشوف حد، دي طالع عينها مع أسر.

خديجة: بس برضه الغيرة ممكن تعمي البصر يا سحر.. يا انهار أسود، دي هتعمل حماية على بنتي، أنا خايفة تأذيها.

خولة: لا لا، فريدة أبسط من كده بكتير، مستحيل.

سحر: والله ماما بس اللي ما بتطيقهاش عشان كده عايزة توقع بينها وبين حبيبة.. حرام عليكي يما.

زمردة: اسكتي انتي، إيش فهمك.. مرات ابنك لغاية النهاردة ما ولدتتش وشكلها كده هتتعب لقدام.

سحر: ما الطبيعي يما، البكرية تخلص شهرها كله، إيه الكلام ده بس.

زمردة: هه، طالعة عبيطة لعماتك.. ده بدل ما تقومي تعمليلها كوباية قرفة تجيبلها الطلق دلوقتي.

سحر بنفاذ صبر: انتي ما بتعجنيش ليه؟ اشتغلي يلا.. أنا هروح أعمل العشا.. يلا يا خديجة انتي وخولة قوموا ساعدوني.

***

في أوضة البنات

غادة: أنا مش فاهمة انتو إيه اللي حصلكم؟ إزاي وافقتوا تروحوا للمكان ده؟

حلا: أبوس إيدك ارحمينا..

غادة : مش هسكت يا حلا .. انتي ليه محسساني انك عملتي حاجة عادي؟ انتو ارتكبتو اثم كبير .. روحتو لدجالة و سألتوها و ده حرام.

دينا : ما كناش نعرف انها دجالة .. كنا فاكرينها شيخة.

حبيبة : كدابة انتي اتبسطي اوي انها دجالة .. و انا يا غادة حذرتهم بس هما ما سمعوش كلامي.

دينا : البت دي هتفقعلي مرارتي .. حد ياخدها من وشي.

غادة : ليه؟ عشان قالت الحق؟ انتي عارفة يا دينا ان دلوقتي مش هتتقبل صلاتك اربعين يوم؟ كل ده عشان طيشك الي خلاكي تروحي لست دجالة.

دينا : و الله انا ما كنتش مصدقاها .. انا بس كنت عايزة اعرف لو الحاجات الي بالروايات صح و لا خيال و هبل.

غادة : مش لازم تسألي على حاجات زي كدة.

دينا : ليه ما السحر و الج..ن و الشيا..طين كله ورد بالقرآن .. فيها ايه لو وسعنا دائرة العلم شوية.

غادة : في حاجات لو عرفتيها ممكن تتأذي يا دينا .. الي عملتوه حرام و لازم تستغفري ربنا.

دينا : استغفر الله العظيم ربنا يسامحني .. و الله ما كانش في نيتي اعمل ذنب.

دلفت فريدة و قالت بغضب : الساحرة الشريرة الي تحت لازم تتأدب.

حلا : قصدك زيزي؟

فريدة : ايوة .. قال ايه انا عملت لحبيبة عمل تخيلوا؟!!!!

حبيبة بضحك : سيبك منها دي ست مش طبيعية.

فريدة : مستفزة .. و الله لاوريها و هفضل ورا جدو عشان يزود العقوبة اكتر و اكتر.

دينا : بجد طلعت واطية اوي .. ازاي دي جدة؟ ده انا عجزت من دلوقتي و هي لسا شباب.

حلا : لا و بتقول على جوزها توفي تخيلي .. فظيعة.

فريدة : طب انتو عارفين انا لقيت ايه بشنطة هدومها؟

حبيبة : ايه؟

فريدة بضحك : مايوه .. تخيلي.

دينا بذهول : بجد؟ و جايباه ليه ان شاء الله؟ عايزة تغري جدو جنب الترعة؟

غادة : اخرسي يا دينا .. الا صحيح زياد هيتعاقب ليه يا فريدة.

فريدة : معرفش يمكن عشان كدب على جدو.

غادة : طب تميم عمل ايه؟

فريدة : معرفش و الله .. كل حاجة بسبب زمردة الساحرة الشريرة.

حلا : اقسم بالله لو الست دي مش كبيرة بالسن كنت جبتها من شعرها .. مستفزة و من ساعة ما جات مبطلتش مشاكل.

فريدة : طب تعالو نبص عليها و هي بتشتغل و الله شكلها ينعنش القلب كدة.

حبيبة : ده انتي قلبك مات يا فريدة.

فريدة : و الله هي الي مش سايباني بحالي.

حلا بجوع : امشو امشو عايزة اعمل كوباية شاي و اغط العيش بيها كدة مممم .. يلا ننزل.

سحر : و الله و بقيتي شاطرة يماما .. كفاية كدة الكمية كويسة .. انزلي للفرن يلا.

زمردة : انزل فين؟ ما الفرن اهو.

سحر : لا .. عمي ما بيحبش الا العيش المعمول على فرن الطين.

زمردة بصدمة : نعم يختي؟ طين؟ لا امبوسيبل … ما اقدرش.

خديجة : لو ما نفذتيش ممكن عمي يزود العقوبة اكتر يا زيزي.

زمردة : طب هو فين الطين الي بتقولي عليه ده؟

سحر : الفرن تحت قبل الزريبة على طول .. استني هنده الشباب يروحو معاكي و اهو ينقلو دول معاكي.

نزلت الفتيات وراء بعض.

سحر : حلا روحي اندهي للاولاد .. قوليلهم ييجو يساعدو زيزي تنقل العيش للفرن الي بالارض.

حلا بحماس : حاضر .. بس انا هاخد اول رغيف.

سحر : ماشي بس خلصيني.

حبيبة بخفوت : طنط .. هو مش حرام نتعبها كدة؟ دي ست كبيرة يعني.

فريدة : اخرسي يا حبيبة خليها تتعلم شوية.

سحر : حبيبتي ماما الحمدلله بصحتها و الشغل ده بسيط و مش متعب دي بتعمله و هيا قاعدة .. على الاقل ما طلعناهاش فوق شجرة برتقان زي الصبح.

حبيبة : اممم و الله عندك حق.

فريدة : ما ينفعش كدة .. احنا لارم نغيظها يا بنات.

دينا : نعمل ايه يعني؟

فريدة : لازم نهتم بنفسنا .. و نحط كريماتنا و ماسكاتنا قدامها عشان تتقهر.

غادة : حرام عليكي يا فريدة دي بمقام جدتك.

فريدة : اتكتمي.

تجمع الشباب بالمطبخ.

زياد : هنشيل ايه يا طنط؟

فارس باندفاع : انا هشيل زيزي.

سحر : اتلم يلا .. هتشيلو دول و تودوهم للفرن .. بس ماما الي تخبز مش انتو ماشي؟

تميم : اكيد يعني ما حدش فينا يعرف يخبز اصلا.

سحر : طيب شيلو يلا .. ماما معاكي نص ساعة و العيش يكون جاهز.

فريدة : هيا العجينة مالها ملزقة كدة؟ انتي مش مزودالها دقيق؟

زمردة بتحذير : بت انتي .. ان ما اتخرستيش هجيبك من شعرك و اعملك ممسحة للمطبخ ده.

فريدة : هتشتمي هروح لجدو و هو يجيبلي حقي.

زمردة بصراخ : انا ليه اتعاقب لوحدي؟!! ليه العيال دول ما يتعاقبو معايا؟

حلا بفحيح : ورديتنا هتبتدي بكرا الصبح من بدري .. بس انتي الراس الكبيرة و لازم تدوقي الاكتر يا زمردة.

فارس : لا زمردة ايه؟ ده احنا دخلنا كوكب اكشن.

تميم : ما بلاش غتاتة يالا .. اكبر منك ليها ده انتو شوية و هتتجوزو.

خديجة : يلا يا عيال انزلو العبو حوالين طنط زيزي.

اكملت بخفوت : عينكو عليها بقا لاحسن تزوغ منكو.

تميم : اعيش و انتقم و الله ما هرحمك يا تيتة يا مفترية .. استعنا ع الشقا بالله.

كان الشباب يمشون نحو الفرن و كل منهم يحمل صنية على رأسه تحتوي على اقراص العجين.

زمردة و هي ترفع طرف جلابيتها : انتو بتعملو من العيش ده كل يوم؟

حبيبة : لا احيانا طنط سحر بتعمله و احيانا بيجيبو عيش عادي.

زمردة : يعني جدك عايز يمرمطني بس.

حبيبة : انا لغاية دلوقتي مش قادرة افهمك .. ازاي عايزة تطلقي بعد العمر ده؟

زمردة : العمر مجرد رقم و الطلاق ملهوش علاقة بالسن يا ساذجة.

حبيبة : بس حسب كلام اوس ان انتي كنتي بتحبي جدو توفيق اوي .. ايه الي اتغير دلوقتي؟ ازاي هتستحملي تعيشي من غيره؟

زمردة : ايوة بنحب بعض بس برضو مش لازم يغلط بيا.

فريدة : و الله كتر خيره الي استحملك عمر بحاله .. ده انتي قعدتي عندنا يومين بس و كرهتينا الدنيا.

زمردة : اخرسي انتي يا بلونة .. انا مش فاهمة تميم ايه الي عاجبه بيكي.

فريدة بغرور : كل حاجة .. الشغل الي انتي مش بتعرفي تعمليه ده انا اعمله بخمس دقايق.

زمردة بغيظ : بلونة .. غوري من وشي اتلهي بالبيبي بتاعك.

حبيبة : زيزي .. هتعملي ايه لو جدو توفيق حصله حاجة و انتي بعيدة عنه؟ هتسامحي نفسك؟

زمردة بفزع : تفي من بوقك يا ولية .. بعد الشر عن قلبه … ان شاء الله البلونة دي تفرقع قدامي يا رب.

فريدة : حسبي الله و نعم الوكيل .. انتي مالك يا ست انتي؟ انا لغاية دلوقتي ما اتجنتتش لو عايزة تشوفي جناني قوليلي بس و انا اسلط عليكي جدو.

زمردة : انتي قاعدة عندي ليه؟ ما تروحي تشوفي جوزك لاحسن يخونك و انتي شكلك كدة.

فريدة : فشر .. تميم مستحيل يبص لغيري .. يا بنات خودو بالكم منها انا هروح اشوف اسر.

زمردة بنرفزة : غوري يا بت قبل ما اولع بيكي .. البتاع ده بتولعوه ازاااي؟

اقتربت منهم دينا و قالت : هاتي انا هولعه و انتي جهزي العيش .. البت حلا ريلت على نفسها من الجوع.

نظرت فريدة للشباب … كان جميعهم يلعبون بكرة القدم في الارض بحماس شديد.

فريدة : بصو للعيال دول كمان .. و الله لو جدو يشوفهم بس.

حبيبة : ارجوكي يا فريدة كفاية .. ما تسيبيهم يلعبو براحتهم هما جم ناحيتك؟

فريدة : على قولك .. انا هروح .. باااي زيزي.

زمردة بغضب : الهي تروحي ما ترجعي يا بعيدة.

بعد وقت .. اجتمع افراد العائلة في حديقة البيت و اعدت سعاد الشاي.

زمردة بتعب : اهو خلصت شغلي كله .. ادوني حاجتي بقا.

عبد الله : العيش متحروق كدة ليه؟

زمردة : اعمل ايه ده الي قدرت اعمله.

سحر : و الله يعمي ده شغل كويس لوحدة اول مرة بحياتها تخش مطبخ.

عبد الله : تمام .. اتفضلي يا زمردة هانم مدي ايدك.

زمردة بقرف : مستحيل مش هاكل من الاكل ده.

عبد الله : هتاكلي .. يلا يا سحر ادي امك لقمة.

سحر : خودي يماما دوقي على الاقل.

زمردة : ما حطيتش بيه حاجة مفيش داعي للكلام ده.

اخذت حلا رغيف و قطعت منه جزء ثم غطته بكوب الشاي .. رفعت القطعة عاليا و فتحت فمها لتأكلها بشراهة.

سعاد بحدة : ما تاكلي زي الناس يا بت.

كارما بقرف : بيئة هقول ايه.

حلا : ما دي طريقة اكله .. الله!

لارا : بس مش قدامنا جاتك القرف .. شبه عبد العال في ريا و سكينة.

حلا بتمثيل : و كتاب الله المجيد؟

لارا : طفسة.

فارس : جرا ايه يا بت ما تسيبوها تاكل براحتها .. و الي مش عاجبه يقوم بقا.

ايهاب بتحذير : فارس اخرس انا مش طايق اسمع صوتك .. نرجع احنا لمصر و شوف هعمل بيك ايه يا كلب.

فارس باستخفاف : من هنا لشهرين هتكون ناسي الحكاية كلها.

ايهاب بحدة : اتلم ما تخلينيش اقوم اضربك من دلوقتي.

فارس : خلاص خلاص اتلميت اهو.

في صباح اليوم التالي.

نزل جميع الشباب للطابق الارضي و هم يرتدون الجلابيات و كانت دينا ترتدي ذهب والدتها كله كعادتها.

عبد الله : فريدة .. جمعتي الغسيل زي ما قولتلك؟

فريدة : ايوة يا جدو و اهو في وسط البيت زي ما طلبت مني بالزبط.

عبد الله : طيب اندهي لزمردة هانم يلا.

خرجت زمردة من المطبخ و هي تضع على وجهها مادة بيضاء.

حلا : ايه الي حاطاه على وشك ده يا زيزي؟

زمردة : ده ماسك النشا و ماء الورد … مضطرة اتصرف طالما حاجتي محجوزة.

دينا بابتسامة : ده شكلي لما اعجز يا يزن.

يزن : يبقى مبروك اتطلقتي يا هانم .. انا اصلا نفسي اضربها بالنار ما بالك انتي تبقي شبهها.

عبد الله : زمردة هانم قدامك طشت الغسيل اتفضلي اغسلي على ايدك يلا.

زمردة : و الله؟ .. في غسالات كتير هنا استعملوها و اغسلو هدومكم.

فريدة : و الله احنا هدومنا و غسلناها .. دول هدوم بنتك و احفادك اتفضلي يلا.

كارما : ما بلاش لؤم يا فريدة حرام عليكي.

فريدة : هي الي بدأت الحرب معايا يبقى تستحملني.

رن هاتف عبد الله.

عبد الله : انزلو انتو للغيط و انا هحصلكم .. فريدة عينك عليها و اندهي لسحر و سعاد كمان.

فريدة بخبث : من عنيا يا جدو.

زمردة بهمس : يجد جدري في جلدك يا جربوعة.

تميم : يلا يا عيال اتفضلو.

فارس : باي زيزي .. سي يو.

زمردة بغضب : غور من وشي يالا.

توجه الشباب للغيط.

فارس بشك : على فكرة جدو كل شوية موبايله بيرن.

زياد : و ايه الغريب بده؟

فارس : يعني جدو مش بيحب الموبايلات كتير .. و انا سمعته امبارح بالليل بيتكلم بيه بصوت واطي كدة و كان واخد باله كويس.

تميم : المعنى؟

فارس : شكله جدو هيعملها يا عيال.

حلا : يعمل ايه يا اهبل؟ انت اتجننت؟

فارس : طيب ما تيجو نراقبه.

يمكن يكون بيلعب بديله.

زياد: اتلم يالا عايزنا نتعاقب تاني؟

كارما: على فكرة أنا عارفة جدو بيكلم مين.

زياد: بيكلم مين يا حبيبة جدك؟