في اليوم التالي، نزل أدهم ومنة ومعهم شنط، ودعوا الجميع.
نرمين: افطروا الأول بعدين روحوا.
أدهم: هنتاخر يا ماما.
منة جلست: أنا أصلاً جعانة، هفطر من غير عزومة.
نرمين: اقعد أنت كمان، عايز تاخد البنت على لحم بطنها.
أدهم: أمري لله، وجلس.
كان الكل موجود على السفرة.
الجد: بما إن الكل موجود، عايز أقول كلمتين.
ياسين: اتفضل يا جدي.
الجد: أنا عارف كل حاجة بتحصل في البيت ده، يعني المشكلة بتاعت امبارح عارفها، فعايزكم تعرفوا إن هدى مرات ابني وورد حفيدتي، يعني هقول تاني زيها زي منار ونرمين، معنديش فرق. وورد زيها زي منة وملك وزيكو. أنتم الأولاد مش عايز أي معاملة وحشة لحد فيهم، وهما كمان هيتعاملوا بأصلهم الطيب، مش كده يا بنتي؟
هدى: طبعًا يا عمي.
الجد: وأنا حابب إنكم تسامحوني. صح إن أحمد ابني غلط وغلطه كبير، بس أنا كمان ليا دور في اللي حصل، ويمكن سبب رئيسي... بس أنا عرفت متأخر إني لما أضغط عليكم بيكون ده غلط.
هدى: العفو، أنت في مقام أبويا، وأزعلش منك، وفي وقتها أنا قدرت إنك خايف على ابنك وشايف إن كده مش في مصلحتك.
الجد: وأنا يشرفني إني أبقى في مقام أبوكي اللي عرف يربي صح.
هدى بابتسامة: شكرًا ليك.
الجد: العفو يا بنتي... وأنتم وهو ينظر لمنار: ممنوع تمسي ورد ولو بكلمة.
منار: يعني أنا الوحش في الحكاية؟
الجد: منار، أنا عاجنك ولابنك وعارف تفكيرك، عشان كده حذرتك، ولحد هنا الموضوع انتهى.
لم تستطع أن تبرر، فهي كانت تنوي أن تنتقم منها في بنتها.
الجد: نقطة كمان، مش عايز البيت يبقى نظام أحزاب، كلنا عيلة وحدة، فاهمين؟ ومنة وورد شايف إنكم ما بتتعاملوش مع بعض، ممكن أعرف ليه؟
سكتوا هم الاثنين.
الجد: مفيش سبب صح؟ أنتم أصلًا صحاب، يعني مش غربين على بعض، وكونكم تطلعوا أخوات دي مش حاجة وحشة، ده مفروض حاجة تفرحكم مش تزعلكم. وانتي يا ستي منة، مش كنتي بتقولي نفسك يكون عندك أخوات؟ ولما جت ملك تعيش معانا فرحتي، وقلت إن ملك اختك، ولما عرفتي ورد قلتي إن ورد اختك، أهي لما بقت أختك بجد اتراجعتي ليه؟
سكتت منة وهي تفكر في كلام جدها، وهي تعلم أن ورد أيضًا لم تكن تعرف وأنها ليست مذنب، بالعكس هي ضحية زيها، ويمكن هي أحسن لأنها اتربت بين أهلها، عندها جد وأولاد عم بقوا ليها إخوانها، إنما ورد مكانتش ليها غير أمها.
أحست ملك أن الجو أصبح متوتر، فحاولت تغير الموضوع.
ملك: يا جدو، عايزة أشتكيلك من ياسين.
الجد: ماله؟ إياك تكون مزعل حفيدتي يا ولدي.
ياسين: وأنا إيه يا جدي؟ جايبني من الملجة، وإنتي ياستي أنا عملتلك إيه يا ختي؟
الجد: لا، حفيدي بس، دي ملك خط أحمر، اللي يزعلها يا ويله. وانتي يا حبيبتي اشتكي، عملك إيه؟
ملك: ما خدنيش شهر عسل يا جدو، ضحك عليا إكمني ولية مكسورة الجناح.
ضحكوا عليها.
الجد: ليه مخدتش مراتك شهر عسل يا أستاذ؟
ياسين: كنت مشغول يا جدي، وقلت لها أما أفضي.
ملك: باقي له 7 شهور ما فضيش يا جدو.
ياسين: ما أنتي عندك جامعة.
ملك: دلوقتي معنديش.
الجد: زين هينزل الشركة معاك يشيل عنك شوية. ابقى خد لك إجازة ووديها مكان ما تحب.
ملك: يعيش جدو القمر.
زين: افرحي يا أختي، هيسيب لي الشغل عشان يفسحك، دنيا قاسية.
ملك: متزعلش يا خويا، هيترد لك، مش كده يا سنسونتي؟
زين بتريقة: بجد يا سنسونته؟
نظر لهما ياسين بحد.
زين: معلش يا ياسين بيه، مش قصدي.
ياسين: أيواة كدا اتلم. وانتي مفيش أي سفر بكرشك دي، أما تولدي بالسلامة.
ملك: إيه كراشك؟ احترمني شوية، ده ابنك يا بيه.
نهض ياسين وقبل رأسها ورأس نرمين: حقك عليا، هبقى أقول كرشك. يلا أنا اتأخرت.
نظرت له بغيظ وهي تتوعد له.
نهض أدهم ومنة أيضًا: يلا يا جماعة، نشوف وشكم بخير، إحنا كمان اتأخرنا. وذهبوا باتجاه الباب، ولكن عدت منة فجأة واحتضنت ورد، فاحتضنتها هي أيضًا، وعيطوا مع بعض.
أحمد بص عليهم ودموعه جرت غصبًا عنه، وكان مبسوط إن علاقة بناته كويسة. ذهبت منة في اتجاهه وهي تمسك يد ورد، وقامت باحتضانه. ظلت ورد واقفة تنظر له ولا تعرف هل تسامحه.
أحمد: سامحوني يا بنات. ومد يده لورد، فلم تحتمل ودخلت هي أيضًا إلى حضن أبيها، وكانوا يبكون وتصالحوا مع بعض.
فعيطت ملك وقالت لياسين: اتصرف، أنا عايزة أخت أنا كمان.
ياسين: هبقى اجيب لك اخت من السوبر ماركت وأنا جاي.
ملك: بص حلوين إزاي، أنا هخلف كمان عشان ابني ما يكونش وحيد.
ياسين: إن شاء الله مش هيكون وحيد، إحنا ناوين نعمل زحمة في القصر.
ضحكت ملك.
بعدها خرج أدهم ومنة إلى المطار، وياسين وزين إلى الشركة.