تحميل رواية «جريح الصمت يا قلبي» PDF

قفلت المصحف وهي تتنهد براحه ....مسحت وجهها وهي تفكر بحالها ...لمتى رح تكون حبيسه الاحزان.  ....ليه تدمر حياتها الي دوبها بدأت....

رح تتجاهل كل شيء يضايقها ...وما تفكر فيه...رح تعطي نفسها فرصه من جديد ...وما تسمح لاحد يتشمت فيها... وقفت بعد ما عزمت أمرها ... توجهت لملابسها ....اختارت فستان من الملابس الي اشترتها من القرية ...ضمت الفستان لصدرها ...ما رح تفتح مجال لمنار تلعب ألعابها وتنجح بخططها...رح تثبت وجودها بهذا البيت غصب عنها ..وما رح تسمح لها تخرب حياتها .....

بعد وقت جهزت نفسها وقفت  تناظر نفسها بالمرايه برضا....لبست جلال الصلاة وتوجهت خارج الغرفه..اول ما فتحت باب الجناح توقفت لما طلع بوجهها كنان...رجعت بيلسان خطوة للخلف بحرج!!

ناظرها وهي لابسه جلال الصلاة...واضعه مكياج خفيف ...ما يدري ليه يتملكه الضيق لما يناظرها ...نطق بهدوء عكس الضيق الي بداخله: يقولون طرقوا عليك الباب وما رديتي..جيت أطمئن عليك

ردت بهدوء: ما سمعت كن

قاطعها بتفهم: اذا تعبانه ما له داعي تنزلين ...ارتاحي وعماتي ملحقه عليهم ...اهم شيء راحتك

هزت راسها بالنفي: الحين أفضل

سكت للحظات بعدها نطق وهو يناظرها: لا تحطين شيء على وجهك خارج الجناح وخاصه الكحل ..اخاف احد يصكك عين؟!

ختم كلامه بابتسامة لطيفه!!

ما تدري ليه حسته جالس يتريق عليها ..معقول خبصت وجهها ويقول كذا حتى ما يحرجها!!

نطقت بحيره : ادخل أمسحه؟!

قاطعها وهو يسحبها بلطف للخارج: اليوم مسموح لك بما انك عروس ...تعالي ننزل!!

هزت راسها بشبح ابتسامه وتحركت معه ... بالرغم انها ما كانت  تبغى تنزل بس عقلها رفض تترك مجال لمنار تخرب بيتها ....هذا هو كنان الي تمنته زوج لها ...ما رح تسمح لاحد يخرب بيتها بذي السهولة .... ورح تتجاهل كل الكلام الي سمعته .. ما رح تسمح لكلام الناس يستقر بداخلها ..رح تتخلص منه ...ما رح تبقى غارقه بعالم أحزانها ....تنهدت براحه سبحان الله بعد ما قرأت "يس والدخان" حست بالراحه استقرت بداخلها ...وقررت من بعدها تثبت وجودها هنا !!!

استغربت لما دخل المطبخ..ترك يدها وبدأ يتحرك بالمطبخ تحت انظارها المستغربه ..نطقت بتردد : اذا تحتاج شيء انا

قاطعها بابتسامه: انت ارتاحي وما عليك مني!!

بعد وقت قصير ...ناولها كأس عصير الليمون وهو يبتسم: قولي بسم الله ...رح تهدي اعصابك وترتاحي بعدها!!

ابتسمت وهي تحس نفسها بحلم ...تحس نفسها طايره والفراشات من حولها ترفرف!!!

تناولت العصير بملامح منحرجه ..نطقت بامتنان: مشكور!!

##

##

مرت الايام على زواجها ...جالسه بالصالة وبيدها كوب عصير الليمون تناظره بابتسامة وهي سرحانه بعالمها ...من ذاك اليوم وعشقها عصير الليمون .. .قاطع سرحانها رنا: الحمد لله شفنا الغماز الي بوجهك؟!

ناظرتها بيلسان وتوسعت ابتسامتها وما علقت!!

رمت رنا الكتاب على جنب وهي تنطق: يا حظك ما عندك دراسه تغث!!

بيلسان بهدوء: انغثينا وخلصنا

رنا زفرت بضجر: نفسي انام واصحى ويقولون لي مبارك تخرجتي؟!

ابتسمت لها: دام انك ما تحبين الدراسة ليه تدرسين من الاصل؟!

قاطعهم دخول احمد وهو ينطق: لأنها غبية!

رنا خزته بقوة: حسابك عند بابا لما يرجع

حرك حواجبه يستفزها ...وبعدها ناظر بيلسان بعبوس: وانت للحين عندنا؟!

ابتسمت له بيلسان بلطافه: جالسه على قلبك يا ابو لسان!!

رنا اشرت له: انقلع من هنا قبل ما اخبر بابا عنك

كش عليها وطلع لغرفته!

بيلسان بهدوء: للحين حاقد علي علشان الكره...مع اني نسيت السالفه ..ما شاء الله ذاكرته قويه وعرفني!!

رنا خزتها: وانت ما تستحين على وجهك تجلسين على الجدار وانت طول الجدار؟!

اعترفي كنت تراكضين خلف كنان؟!

لحظة لحظه حليت لغز خطوبتكم..انت وكنان كنتم تحبون بعض وتلتقون عند الجدار صح؟!

بيلسان ناظرتها بصدمه من كلامها ...الفترة الماضية بصعوبه حتى قدرت تتجاوز كلام اهل القرية .. والحين جالسه رنا تعيده بكل بساطه ... تحس بالاختناق من كلامها ..وبنبره تحذير فيها حده : يا ويلك إن سمعت هالكلام مرة ثانية..مو انا الي اخون ثقة اهلي علشان اخوك!!

رنا باستغراب من تحول ملامحها: انا اسفه ما هو قصدي!!

بيلسان تحركت وتجاهلتها وتوجهت للخارج وهي تحس بالاختناق ...كلما تتذكر هذا الكلام تحس بالاختناق!!

وقفت وهي تناظر المكان وتحاول تعدل مزاجها ...ناظرت ماجد لما اشر لها بالقدوم له ...

تحركت نحوه وهي تحاول تكون طبيعية ...اقتربت منهم وردت السلام بابتسامة!

ماجد بترحيب مبالغ فيه بنظر منار: هلا وغلا بزوجة ولدي!!

تعالي اجلسي هنا !!

جلست مكان ما اشر لها قريب منه...

منار بابتسامة نطقت : أرسلنا أحمد يناديك تجلسين معنا؟!

ابتسمت مجامله: جاء بس ما قال شيء...كنت جالسه مع رنا؟!

ماجد بتحقيق: رنا جالسه تدرس والا تطق حنك؟!

ابتسمت له بيلسان بمحبه: تدرس يا عمي

منار بهدوء مدت لها بالعصير : تفضلي

اخذته بيلسان وهي تفكر بحال منار من بعد ذاك الموقف تغير حالها وكأنها ثوب وانقلب ...معاملتها له جميله سواء بوجود كنان وماجد او ما كانوا موجودين نفس المعاملة..ما تدري وش الي غيرها.. تناولت العصير : يسلمووو!!

منار هزت رأسها وبلطافه: صحتين وعافية!!

ماجد باهتمام :ما فكرت تشغلي وقتك بشيء مثل وظيفه

قاطعته بيلسان بعد ما كنسلت فكرة التدريس دام النوام يرافقها ما ينفع معها التدريس هنا بالبيت تقدر تستدرك أمر نومها ..اما بالمدرسة صعب كثير ..وبلطافه ردت: هذا انا هنا اساعد خالتي منار

منار قاطعتها: لا تربطي نفسك فيني ...انا احب الجلوس بالبيت انت لساتك صغيره والمستقبل قدامك ..اطلعي وشوفي العالم

قاطعتها بيلسان برفض: لا خلينا كذا الحين!!

ماجد باقتراح: اليوم نازل للقرية ومعي امي اذا تبغين آخذك وتزورين جدك سلطان ؟!

طار قلبها لجدها سلطان ...كتمت لهفتها ونطقت بهدوء: ما ادري اشوف كنان بالاول

ماجد قاطعها: معروفه اجابته انتظري لما يصير معي وقت انزل انا وانت

ابتسمت بيلسان بضيق وما علقت على الموضوع!!

ماجد هز رأسه: انا اشوفه نهاية الأسبوع الكل يكون بالمزرعه

ابتسمت والفرحه تسللت لقلبها من قراره ...تغبط كنان واخوانه على هذا الاب ...

رن جوال ماجد .. ناظر الشاشه وابتسم: الطيب عند ذكره ..هذا كنان!!

هبط قلبها وعيونها ما نزلت عن ماجد الي فتح خط بروقان: هلا ...الله يسلمك...ايه بالبيت...هذي هي عندي...خذ كلمها ...طيب بإذن الله...مع السلامه!

قفل الجوال وناظرها: يتصل فيك وما تردين

عقدت حواجبها: الجوال بالشاحن

هز رأسه: خمس دقائق ويكون هنا ..رح يمرك تروحون لبيت ابو فيصل!!

**

**

*

جالسه جنب جدتها والهدوء يخيم عليها ...ناظرت جدها الي يكلمها بابتسامة: احسك بعد الزواج كبرت وصرت عاقله

فتحت عيونها باستنكار من كلامه ...ام فيصل بمداخله: هي دوم كذا عاقلة بس احيانا يفصل عندها العقل!!

كنان ابتسم وهو يناظرها: شفت اهلك يقولون عنك كذا!!

نطقت بابتسامه واسعه: أنا عاقله

قاطعها ابو فيصل وهو يغمز لها: وعنيده الله يعين كنان

بيلسان نطقت بإحباط: عنيده؟!

كنان نطق بروقان: للحين ما عاندت بشيء ..ما شاء الله عليها!!

ابتسمت له وهي تنطق: أنا طالعه فوق اشوف امي وإخواني

ام فيصل قاطعتها: ما له داعي قبل وصولكم اتصلت فيها وخبرتها..الحين تنزل ..وابوك على الطريق!!

هزت رأسها ورجعت لسكونها وهي تستمع لكلام جدها مع كنان .....

بدأ النوم يداعب جفونها ...ما تبغى تنام هنا ... لحظات ودخلت بعالم الأحلام...

ابو فيصل الي مندمج بالكلام ..انتبه عليها بعد وقت قصير.. أشر عليها باستغراب: هذي من جدها نايمه؟!

لذي الدرجه حديثي ممل؟!

التفت كنان عليها ...واضعه يدها تحت خدها وهي تنام بسلام وكأنها ملاك...هزها بخفيف : بيلسان بيلسان

نطق بابتسامة: نومها ثقيل حيييل...بيلسان!

فتحت عيونها بصعوبه وهي تستوعب المكان ...حست بالحرج من تصرفها

كنان بروقان  : قومي تأخرنا قريب ينتهي وقت البريك ...ارجعك للبيت

قاطعته ام فيصل: خليها هنا واي احد يوصلها .. للحين ما شافت امها

قبل ما يرد ناظر خزامى الي دخلت ويا ارض اشتدي ما عليك احد قدي!!

سلمت على كنان.  . بعدها ناظرت بيلسان بعبوس: وربي ما ابغى اسلم عليك .. ما تقولين لي ام اتصل اطمئن عليها

حست بالاحراج من تصرف امها قدام كنان. ..وبتبرير نطقت: انا اتواص

قاطعتها بتحقير لكلامها وهي تجلس: ثواني  تحكيها تعتبرينها تواصل!!

زمت شفتها وما علقت.....عم الصمت للحظات على المكان ....

كنان وقف وهو يستأذن عنده دوام!!

بعد خروجه ناظرت جدها الي نطق بانتقاد لخزامى: حتى لو كانت ابنتك أسوأ خلق الله ما يصير تعاملينها كذا قدام زوجها ...خليه يعرف إنه لها اهل وعزوة لزوم تقدرينها قدامه

خزامى مقهورة من ابو فيصل والحين يتفلسف عليها: خليه يعرفها على حقيقتها هالقاطعه!!

تابعت كلامها وهي تناظر بيلسان بحده: وإلا صرت تحت جناح منار ونسيت امك الي حملت فيك ٩ اشهر!!

غمضت بيلسان عيونها لثواني وهي تتمنى لو إنها ما حملت فيها !!

ام فيصل بانتقاد: وش جاب سيرة منار؟!

انت حاقده على البنت علشان الفلوس ...بيلسان ما لها علاقه عمك ما رضي يعطيك شيء من المهر

ابو فيصل قاطعها بتأكيد: ما رح تشوفين فلس واحد حتى تتعلمين كيف تصرفين فلوسك ...

والا وحده عاقلة تصرف كل هالمصاريف علشان ليلة وحده؟!

خزامى كتمت قهرها: يعني تبغى الناس تنتقد شكلها ولبسها

أبو فيصل ببرود: دام يهمك كلام الناس هالكثر ادفعي من جيبك!!

بيلسان مستحيل تجلس أو تتواصل مع أمها إلا تنكد عليها ...نطقت برجاء: يمه أنا مستعده أدبر لك الفلوس بس خلاص فكينا

قاطعتها خزامى بقهر: انت انكتمي...مالك كلام عندي

زفر بضجر ابو فيصل وهو يناظر وليد الي دخل وهو يرد السلام ..

وقفت بيلسان وسلمت عليه بحفاوة!

ابتسم لها بهدوء: كيف حالك؟! وين كنان؟!

ام فيصل ردت بضيق من خزامى: راح لدوامه اي احد منكم يرجعها!!

وليد هز رأسه على مضض: على خير إن شاء الله!!

جلس وهو يناظر خزامى وجهها منتفخ: وش فيك؟!

أبو فيصل بسخريه: هو في عندها الحين غير سالفه الفلوس!!

خزامى ناظرت وليد قبل ما يتكلم:دام عمي مو راضي يدفع لي ...انت ادفع معي مو انت أبوها

وليد مط شفته بسخرية: ليه قالوا لك مجنون اطير فلوسي على ذي التفاهات ..تحملي نتائج اختيارك؟!

خزامى انقهرت من رده: طيب على الاقل طقم الذهب ادفع فيه

قاطعها برفض: ما اشتريت حتى أدفع

نطقت بقهر من رفضه: وليه ليان لما تخرجت اهديتها سيارة وعلى زواجها اشتريت لها طقم ذهب وجبت لها هديه

قاطعها بقوة: ما يخصك...هذا شيء بيني وبين ابنتي لا تتدخلين؟!

ردت بقهر: لا والله!

يعني بيلسان ما هي ابنتك؟!

تحسفت تقدم لها هديه بتخرجها

قاطعها بتبرير: طلعت عن شوري بالدراسة ما تستحق مني الهدية

رفعت حاجب خزامى بقهر: والزواج ؟!

ما قدمت لها لو

قاطعها: هذي انت كفيتي ووفيتي!!

ابو فيصل بضيق: خلاص قلت لك ما رح تشوفين فلس واحد وقفلنا الموضوع وربي اذا فتحتيه مره ثانيه ما يحصل خير!!

مطت شفتها خزامى بقهر وملامحها منتفخة من الغضب!!

جالسه تسمع كلامهم .. بلعت غصتها وهي تحس بوسط حلقها خنجر من كلام ابوها!!

للحين حاقد عليها بالدراسة.....التفريق واضح للجميع ....تنهدت تواسي نفسها ...يبقى أخف من امها ...على الاقل كافي خيره وشره ....نكست رأسها بخيبه  منهم ...

يا كثر خيباتها منهم ... ما تدري ليه دوم مصممين يجرحونها بالصميم!!

ما علقت بحرف واحد لأنه بهذي الايام السكوت أفضل من كلام تندم عليه بعدين...ما تضمن نفسها اذا فتحت حلقها تخبص بالكلام ....قلبها مليان كلام جارح ...بس مضطره تبلعه وتسكت وهي تذكر نفسها " امي وأبوي" وتواسي نفسها رح ييجي يوم ويندمون على تجاهلهم وجودها وقسوتهم بالتعامل معها!!

وليد يناظر الساعه: اذا تبغين ترجعين الحين لأني بعد نص ساعه راجع للدوام

ضغطت على نفسها فوق طاقتها حتى ترد عليه بصوت هادئ: لا

نطق بتفهم: براحتك!!

ما تبغى ترجع معه ...ما تدري ليه بدأت تغزوها ذكريات لما كانت تزورهم ليان..كيف يقلب البيت طوارئ وهو يهلي ويرحب فيهم ...ليه هي لا ؟!

نفسها تعرف سبب التفرقه بينهم وبين ليان؟!

معقول لما تصير ام رح تفرق بين عيالها ؟!

كتمت ضيقها والسكون يخيم عليها .....

بعد وقت قصير استأذن ابوها ورجع للدوام ...وخزامى طلعت لفوق....

كتمت ضيقها وهي تناظر جدها وجدتها مندمجين بالكلام!!

ناظرت رعد الي دخل البيت ...نطقت بهدوء: رعد ترجعني للبيت؟!

ضحك رعد عليها: الناس تسلم بالاول؟!

ابو فيصل بانتقاد: دوبه ابوك طلع كان رجعت معه!!

ما ردت على جدها وهي تناظر رعد تنتظر رده ...نطق بابتسامة: تفضلي!!

**"

**

**

في اليوم الثاني تجهز الفطور مع منار والشغاله كالعاده الصمت يغلفها..بس اليوم الحزن يسكن اعماقها ....ما قدرت تتجاوز تصرف امها وابوها ...من لما رجعت استفردت بنفسها بالبكاء ..وللحين عندها رغبه بالبكاء ...مجروحه منهم كثير ....قررت ترجع طقم الذهب لامها ...وتبيع الشبكه حتى تدفع لها الفلوس حتى ترتاح من هالمشكلة كلما اتصلت فيها أو شافتها تعمل لها نفس الموشح !!

زمت شفتها وهي تسمع كلام منار: اغلي الشاهي اكثر البارحه كان خفيف!!

ما تدري ليه ما تتقبلها ولا تتقبل اي شيء منها ...تحس انها خزامى رقم ٢ ...بالرغم انها من ذاك الموقف يوم الصباحيه ما قالت لها شيء او ضايقتها. ...بس للحين كلامها انحفر بداخلها وما قدرت تتجاوزه أو تسامحها ...

التقت عينها بعين كنان الي دخل المطبخ ...ما قدرت ترسم ابتسامه له كالعادة ...تحس لو ابتسمت رح تبكي...نزلت نظرها بهدوء وهي تراقب الشاهي وهو يغلي ...مثلها بالضبط تغلي غليان وما تدري وش الي يطفيها!!

استرقت النظر لكنان الي كل يوم يقبل رأس منار ويصبح عليها بأجمل ابتسامه وكأنها أمه!!

حاله غريب لذي الدرجه يحبها ....مطت شفتها بعدم رضا عن تصرفه ...دخلوا البنات وما ناظرت احد ....

غمضت عيونها للحظات تمسك نفسها لما نطقت منار: خلاص غلي الشاي بما فيه الكفايه!!

ما تدري ليه على هالصبح ما هي طايقه صوتها...كتمت ضيقها ونزلت الشاهي ...ناظرت البنات يرتبوا السفرة والإبتسامة مرسومه على ملامحهم..

وضعت الشاهي على الطاولة .التقت عينها بعين كنان الي اشر لها بعيونه" وش فيك ؟!"

هزت راسها بالنفي ما فيها شيء!!

بعد وقت جلست جنب كنان بهدوء... بدأت تشرب شاهي بصمت مطبق...

رنا بابتسامة: بيسو وش فيك ساكته؟!

ناظرتها بهدوء: ما فيني شيء!!

كنان الي رجع متأخر وكانت نايمه .. تركها عند اهلها وما فيها شيء...بس غريبه الحين واضح انها متضايقه

منار بحزم: رنا اترك عنك اللقافه !

وبأسلوب لطيف نطقت وهي تناظر بيلسان:اعمل لك كوب نعناع يروقك

قاطعتها بيلسان: مشكورة ما فيني شيء...يمكن نعسانه شوي!!

منار هزت رأسها بلطافه: كملي فطورك وارجعي نامي رح ترتاحين!!

كنان ناظرها للحظات وما علق ...رجع يكمل فطوره!!

قاطعهم دخول هاني وهو يرد السلام...سحب كرسي وجلس مقابل بيلسان وهو ينطق: ابغى قهوة اصحصح ذبحني النعاس!

ديما بضحكه: كل الناس اليوم نعسانه!!

رفع حاجب بتساؤل: مين نعسان؟!

رنا اشرت له على بيلسان: ذي الكسوله!

عبس ملامحه وما علق ...تأثر هاني بأمه كثير ..يكره سلطان وخزامى وبيلسان واي شيء له صلة فيهم!!

طنشت بيلسان اسلوبه ونظراته وكأنه ينقصها هالبزر!!

رنا بابتسامة: اليوم سلاموووو رح تزورنا بعد العصر!!

زم شفته بضيق: بعد العصر عندي محاضره رح اكنسلها

قاطعه كنان بحزم: يا ويلك اذا فكرت تكنسل المحاضرة...ملحق على سلامووووو

احمد بعبوس: كل البنات غثيثات

قاطعه هاني: اقول انكتم افضل لك!!

منار تستعجل فيهم: يلا ما بقى وقت على الدوام تحركوا!!

هاني بضجر: الله يأخذ الدوام ...حمل نفسه وغادر المكان بدون ما يفطر!!

بعدها تبعه احمد وديما!

رنا وهي تأكل اخر لقمه: تأخرت

حملت نفسها وغادرت وهي تنادي على ديما!!

تحس بيلسان بالازعاج ...ما تدري ما عندها دوام ليه لزوم تصبح بوجههم....

ناظرت كنان الي ناظرها للحظات ..بعدها نزل نظره بضيق ... ما يدري وش يصيبه احيانا لما يشوفها ..يحس نفسه ما هو طايقها ويستغرب من نفسه على اصراره على خطبتها ...واحيانا قلبه طاير عليها ....ما يدري سبب تقلبه اتجاهها...بالرغم للحين من بعد الصباحية ما ظهر منها اي سوء ..مسالمه هاديه ودوم مبتسمه له على عكس اليوم ...ما يدري وش صاير معها!!

رفع نظره لمنار الي نطقت تكلم بيلسان: اذا حسيت نفسك ما تبغين النوم.. وش رأيك نجلس برا نشرب قهوة؟!

بيلسان ما تستلطفها او خايفه من غدرها ...وباعتذار نطقت: احس بعيوني ملح ابغى انام

منار هزت رأسها بتفهم: براحتك انا وقت الغداء اناديك...روحي ارتاحي!!

كنان ما عجبه رفض بيلسان لطلب منار ... يعني جالسه لوحدها وش ينقصها لو جلست معها وتقربت منها؟!

ومع ذلك ما تدخل بينهم ....دام العلاقه بينهم سالكة للحين ...يتمنى على طول تكون سالكه!!

نطق بهدوء: تبغون شيء؟!

منار بابتسامة: سلامتك يا قلبي!!

**

**

**

قفلت الجوال بعد ما اطمئنت على جدها...قررت تطلع للحديقه تتمشى تضيع وقت ...

اول ما نزلت رفعت حاجب وهي تشوف الصالة مكتظه ..عدلت ملامحها وهي تتذكر الصبح تكلموا عن احد رح يزورهم ...

تقدمت بهدوء وسلمت عليهم ...منار بابتسامة: توقعتك نايمه ما حبيت ازعجك!!

بيلسان هزت رأسها بتفهم: قبل قليل صحيت!!

رنا بابتسامة: خلينا نعرفك على ميس تكون ابنة عمي البارحه رجعت من السفر ... اجمل دكتورة نسائيه..اذا عندك اي مشكله ميس موجوده!!

ختمت كلامها بابتسامه عبيطه!!

بيلسان ناظرت ميس بابتسامة مجامله: الحمد لله على السلامه ...

ميس بابتسامة واسعه: تسلمين..حبيت احضر زواجكم بس ما قدرت..مبارك الزواج!

بيلسان بهدوء: الله يبارك فيك!

رنا اشرت على سلام: هذي الامورة سلام خطيبة هاني!!

استغربت بيلسان تحسه بعده صغير وخاطب.. سلام تجاهلت بيلسان وهي توجه الكلام لميس: احكي لنا عن حياتك بالخارج !!

واذا في صور يكون أفضل؟!

ميس خزتها: ترى من البارحه وانت مستلمه جوالي تناظرين الصور ...

تفشلت سلام من ردها...مدن لسانها بغيض: الحق علي ابغى اشوف وجهك !

ميس ابتسمت لها: خذي الجوال واشبعي بالصور!!

جميلة وهي تكلم ميس: قدمت اوراقك هنا

ميس هزت رأسها:  كنان البارحه كان معي وقدمت لاكثر من مستشفى!

خولة هزت رأسها : حلو وش قالوا لكم؟!

ميس ابتسمت: قدمنا طلب وننتظر منهم الرد!!

واليوم اخذني كنان لمستشفى ********نكمل اجراءات تتعلق

قاطعتها منار: ان شاء الله ربنا يوفقك..وربي تستاهلي كل خير!!

انت لك خبرات بالخارج

ميس هزت رأسها: اكيد ...وما كنت افكر ارجع بس بابا اصر علي يقول يكفي غربه

رنا بابتسامة:اكيد يبغى يفرح فيك خلاص كافي كبرت كم صار عمرك؟؛

ميس ابتسمت: ٢٧

جميلة: ربي يبارك بعمرك ونفرح فيك!!

جالسه تناظرهم بهدوء والكل يناظر ميس باهتمام وكأنها جايه من كوكب المريخ ... زمت شفتها بضيق هذي القمر لها يومين تلف مع كنان...

كتمت ضيقها وغيرتها....رفعت رأسها لميس الي تكلمها: وش تخطيطاتك بما إنك تخرجت؟!

بيلسان بهدوء: حالياً ما في شيء ببالي!!

ميس : قبل كم يوم شفت اعلان لمدارس******* يبغون كادر تعليمي من جميع التخصصات لو تقدمين له وتشغلي نفسك افضل من الجلوس بالبيت...انا اقترحت على كنان يقدملك هناك ..خاصه  تخصص تربية رياضيه مطلوب ٣ معلمات!!

رنا ضحكت بخفه: بيسو تخصصها ما هوتربية رياضيه!!

ميس زمت شفتها باستغراب: اسفه بس كنان قال تخصصك كذا!!

رنا تكمل كلام عن بيلسان الي تناظرهم بصمت مطبق : تخصصها رياضيات!

سلام بتدخل: ما فرقوا عن بعض الاثنين ازنخ مواد بالمدرسة!!

بيلسان ناظرتها بدون ما تتكلم وبداخلها تردد" ازنخ منك يالبزر ما في"

جميلة ناظرت بيلسان: شوفي اسم المدرسة وقدميلها طلب؟!

بيلسان ردت بهدوء: ما افكر بالوظيفة حاليا!!

خولة بابتسامة: الحين مستانسه عروس بعد فترة ينشغل   كنان بالدوام ...رح تملين وانت لوحدك بالبيت ...منار رح تداوم خلال هذا الأسبوع إجازتها انتهت برجوع ام لؤي اكيد طول الوقت رح تكون جالسه معها!!

رح تملين لوحدك!!

ابتسمت بيلسان بلطافه: بيتك قريب تعالي نجلس ونشرب القهوة مع بعض

ميس ابتسمت: عمتي شغل قهوة وحش بالعالم كل يوم تلاقيها باب البيت!!

خوله خزتها:هذا انت قلتيها "عمتي" احترميني يا بنت!

جميلة بتأييد: ميس صادقه تموتين على القال والقيل.. بس ما ظنيت تلقين بغيتك عند بيلسان ... البنت هاديه وما تتكلم يعني ما رح تشبعي فضولك!

خوله دقت على صدرها: لا تخافين رح اعلمها وأخليها ما تسكت ولا دقيقه!!

منار بروقان: اتركي كنتنا بحالها ...

جميله بامتداح: ما شاء الله دوبنا البارحه بسيرتها ..هاديه ورقيقه وناعمه

رنا بابتسامة عريضة:وقويه

خوله خزتها : والله ما في اقوى منك يا ام لسان!!؛

ما قلت لكم وش صار الاسبوع الي طاف ؟!

جميلة رفعت حاجب: غريبه الاسبوع الي طاف وللحين ما تكلمت!!

خوله كشت عليها: مالت عليك .. الحق علي اجمع لكم

كل اخبار الي حولنا ...المهم نسرين طلقها زوجها؟!

جميله بعدم تصديق: مستحيل؟!

ما سمعت ...مين قال لك؟!

خوله وهي تصغر عيونها وتتكلم باندماج ...طريقتها ذكرتها بنجوى لما تنفعل وتتكلم بسالفه حصريه وما احد يعرفها غيرها...وبدون انذار ضحكت من قلبها على شكل خوله!

خوله رفعت حاجب: وش الي يضحك؟!

بيلسان مستمره بالضحك: ولا شيء!

رنا ابتسمت على ضحك بيلسان: تراها فاصله تلقينها تضحك على سالفه سمعتها قبل سنه والحين فهمتها ...كملي يا عمتي!!

خوله اشرت لها بوعيد: بعدين نتفاهم على هذا الضحك ...الحين نرجع لسالفتنا... حماتها التقت بحماتي وخبرتها

قاطعتها جميلة: والسبب؟!

خوله زمت شفتها بتعجب:يعني السبب تافه وبدون معنى ...تخيلوا طلقها لأنها طالعه مع صديقاتها لشاليه بدون ما تعطيه خبر ...كلمه من هنا وكلمه من هنا وطلقها!!

منار بانتقاد: كيف تطلع بدون اذن زوجها؟!

حريم عجيبه ..انا إذا لو بغيت اروح لبيت خوله وهو قريب علينا اتصل فيه وما اطلع حتى يوافق

خوله بابتسامة عبيطه: والله انا لما اوصل بيتكم او بيت اخواني اتصل فيه واقول له ابغى اروح ..علشان لو يعترض أقوله صرت على باب البيت ما هي حلوة ارجع

!!

جميلة هزت راسها بعدم رضا: أنا مثل منار مستحيل اخط خطوة وحده اذا ما كان موافق

خوله كشت عليها: تراني غاسل يدي منك من يوم رفضت تطلعي معي للسوق ..وحضرته مقفل الجوال وتكنسلت الروحه بسببكم!!

ميس:لزوم تأخذين اذن زوجك قبل الخروج !!

جميلة ابتسمت لها: دررررررررر يا حظ الي رح يكون من نصيبك!!

زمت شفتها ميس بضيق وما علقت ....

**

**

**

ام سلمان كالعادة دوم جالسه باب بيتها وتراقب الي رايح والي جاي مع ولدها سلمان ...زمت شفتها وهي تؤشر بعيونها على بيت سلطان: يقولون من بعد الحادث ضيع عقله

سلمان وهو متمدد على طوله ويحرك السبحه يمين يسار بملل: البارحه التقيت فيه بالشارع ما فيه شيء!!

ام سلمان زمت شفتها: يعني احيانا يشتت واحيانا يرجع لعقله يعني بداية الخرف!

سلمان رفع حاجب: تدرين سالفه هالحادث ما مرت علي ... أحيانا اقول يمكن وصله خبر او شيء من سوالف حفيدته بالقرية وفقد اعصابه

قاطعته ام سلمان باستبعاد: تراه ما يقود السيارة  حتى يفقد أعصابه معهم سائق!

هز رأسه وهو يفكر بالتحليل: يمكن صرخ وعصب ومن صراخه فقد السائق السيطره!!

ام سلمان: يقولون ام ماجد هنا بالقرية ... اليوم رايحه ازورها ...واكيد رح اعرف اذا صاير شيء ...ومنه اعرف اخبار المتغطرسه!!

ما تلاحظ انها للحين ما نزلت للقرية!!

سلمان مط شفته بسخرية: ايه ملاحظ ..والثور العشقان طول الوقت يراقب ما بين بيت سلطان وما بين المزرعه وهو ينتظر قدومها!!

ام سلمان بغيره وحسد: ما ادري وش عاجبه فيها ...والا الغبي ابن المزرعه كيف خطبها؟!

تدري كل يوم وهم في بالي وأنا افكر كيف تزوجها ؟!

شينه شينه استغفر الله يا رب لا اعتراض على خلقتك...بس ما هي جميله حتى يراكض خلفها ويخطبها ..وفوق هذا اخلاقها استغفر الله...الله يسترعلى عباده!!

يعني استغرب دام انك تبغين راكان ليه توافقين على كنان الاخت تلعب على الحبلين!!

سلمان زم شفته بقرف: الله اعلم من المستور يمكن شابكه على اكثر من واحد ..يعني حنا نعرف راكان وكنان !!

بس المشكلة كله كلام وما في دليل على هذا الكلام ...والا من باكر اروح لسلطان واعلمه حقيقه حفيدته لعله تنكسر خشومه الي رافعهم!!

ام سلمان بلهفه: ما ادري ليه انتظر الساعه الي يقولون كنان طلقها ...يا اخي اكرهها .. تدري إني اكرهها اكثر من خزامى ...على الاقل خزامى زمان كنت استلطفها ..اما هذي اعوذ بالله ثعبان ... أنا ما يقهرني الا الخروف كنان الي تلاقيه الحين ما يفارق وجهها...مالت عليهم !!

سلمان ابتسم وهو سبب يناظر للبعيد: رح توقع بشر أعمالها وتنفضح!!

لا تخافين!!

**

**

**

جهزت القهوة وتوجهت للحديقه ...تنفست الصعداء وهي تناظر أجواء المساء في الحديقه مع الانارة .... كان منظر خيالي ...وضعت القهوة والحلا قدامه وجلست على نفس المقعد وهي تنطق بابتسامة: اليوم راجع مبكر!

كتم ضيقه الي يتلبسه لما يشوفها ... رسم ابتسامه صغيره مجاملة لها: قالوا لك المستشفى ما فيه غيري!!

توسعت ابتسامتها باستدراك: مو كذا ..البارحه تأخرت

قاطعها بتبرير: احيانا يكون فيه حالة طارئة واتأخر وأحيانا يكون الشفت تبعي متأخر...يعني حسب

قاطعته بتفهم: الله يعطيك العافيه

ابتسم وهو يتناول من الحلا: الله يعافيك ...هذا الحلا انت عملتيه؟!

ضحكت بخفه: أنا اعمل مثل هذا؟!

صعب ومستحيل ...عماتك احضروه معهم!!

هز رأسه بتذكر: صحيح اليوم تجمعوا عندكم...جلست معهم؟!

هزت راسها: ايه

نطق بتساؤل: وكيف الجلسه معهم ...اخذت على الجو والا بعدك

قاطعته وهي تحرك كتوفها: يعني مو كثير مع الايام اكيد رح اتعود على أجواء بيتكم واهلكم ...يعني انا مو متعوده اختلط بالناس... هز راسه وهو يشرب بشويش: رح تتعودين!

هزت رأسها بهدوء وما علقت ...عمت الصمت بالمكان ...ناظرته وهو يقلب بالجوال باندماج ...صرفت نظرها وهي تتأمل المكان وتشحن نفسها بالايجابية ...باكر لزوم تطلع للسوق تبيع ذهبها وترجع الفلوس لأمها...تفكر حتى الملابس الي احضرتهم ترجعهم لها ...بس تتراجع تخاف تزيد المشاكل بينهم اكثر ....

تتمنى لو تعرف سبب هالكره حتى تقدر تعالجه ... احيانا تتمنى مثل بعض القصص والروايات تطلع ما هي ابنتهم حتى تطلع كل الي بقلبها وما تأخذ إثم ...

معقول لو ربنا يرزقها طفل تعامله مثل خزامى ؟!

مستحيل اجمل شعور الامومه ويكون عندك اطفال تكون لهم منبع السعادة والامان والاستقرار....

تتمنى لو بقيت على رف النسيان بالنسبة لاهلها وما تذكروها ..على الاقل رح تكون مرتاحه وعقلها خالي من الضغوط النفسية....

تنهدت وناظرت كنان المندمج بالجوال...دوم على الجوال...هي تشحن نفسها بالايجابية بس الي حولها ما يساعدونها ...من لما تزوجت وهي تبادر بالكلام والجلوس معه وتتكلم ..وهو مستمع والجوال بيده...

أحيانا لا ما هو احيانا على الاغلب تشعر انها ثقيلة الظل عليه ...

يعني الي يشوفه ما يقول هذا الي دق الصدر وتحمل تكاليف المهر حتى يتزوجها ....كل يوم تتأكد إنه جدها ابو فيصل كذب عليها ....وماجد فعلاً خربط بالاسماءواضطروا يكملوا الموضوع....

اجتاحتها غيمة الاحزان وخيمت فوقها ...حست الدموع بدأت تتراقص بعيونها ....لزوم تنسحب بسرعه ...

قبل ما تتحرك نطق بتساؤل: اليوم اتصل فيني ابوي نهاية الأسبوع رايحين للقرية؟!

ردت وهي تناظر السماء تمنع نزول الدموع ...وبنبره هادئه فيها ملل من كل شيء حولها:ادري البارحه سمعته يقول!

هز رأسه ورجع يطقطق بالجوال...

نزلت رأسها وناظرته لما رجع للجوال ....وجودها وعدمه واحد ...وخاصه بعد ما بدا النوم يداعب جفونها...

وقفت وهي تنطق بهدوء وبداخلها خيبه: تبغى شيء قبل ما اروح؟!

نطق وهو مندمج بالجوال: لا

زمت شفتها بقهر من هالجوال الي اخذ كل وقته!!

همت بالحركه قاطعها: لحظه

ناظرته ظنت يبغاها تجلس معه ..سرعان ما حست بالخيبه لما نطق: قميصي الازرق اذا ما في غلبه تكوينه لي

زمت شفتها بضيق من كلامه ... ردت بجمود وهي تهم بالمغادرة: إن شاء الله

قاطعها وهو يمسك يدها وبضحكه: امزح معك ..تعالي اجلسي معي

ناظرت الجوال وهي تؤشر: والجوال

نطق بابتسامة: في أبحاث ضروري اطلع عليها..يعني وقتي ما هو لي !!

بس اجلسي قفلته علشانك!!

**

**

**

باليوم الثاني خزامى أخذت الذهب والفلوس وهي تنطق: الشعرة من  جلد الخنزير بركه!!

فتحت بيلسان عيونها بصدمه من كلامها...وبعتب

: يمه انا وش قصرت معك حتى تعامليني كذا ...اذا عملت غلط قولي لي ...

قاطعتها خزامى وهي تتنهد: من لما عرفت بوجودك بذي الدنيا وانا كارهك واتمنى موتك ...٩ شهور وانا كل يوم ادعي بصلاتي ربي يأخذك وما يكتب لك حياة ...ولما ولدتك كرهتك اكثر وأكثر....

قاطعتها بيلسان باختناق من كلامها : وش ذنبي؟!

خزامى مطت شفتها بلامبالاة...وغيرت الموضوع: كيف منار معك؟!

مطت شفتها بيلسان بسخريه وبقلبها " افضل من معاملتك " وبجمود نطقت: عادي

خزامى هزت رأسها: تراها حيه من تحت التبن ..تظهر لك الود والمحبة وعلى اقل زلل تغدر فيك ..تراها غداره وحقودة ...انا حذرتك منها باكر لا تقولين ما احد نصحني ..

اسمعيني زين اثبتي وجودك بينهم وما تسمحي لها تتأمر عليك...

وخلي نزولك لهم قليل يعني لا تختلطي فيهم ... وإن جلست خليك ثقيله والإبتسامة بصعوبه حتى تظهر ...لو ملعقه لا تحمليها او تساعدي ...لا تنزلي الا وقت الاكل وبعد الاكل اجلسي بالصالة تنتظري الشاهي او القهوة ...

زوجك حاولي اسحبيه لجهتك ...فتحي عيونه على اشياء من خلالها يكتشف سيئات منار وانها اكبر ممثله ..

حاولي تستغلي كل الوقت مع زوجك وما تتركين له دقيقه يقضيها مع اهله!!

اذا مثلت دور المسكينه الهادية صاحبة القلب الطيب ..صدقيني ما رح يتم زواجك اكثر من شهرين ...انت الحين جالسه على نياتك وهي جالسه تخطط وترسم كيف تقلعك من بيتهم!!

تذكري كلامي وحطيه حلقه بإذنك...

هذي الايام إن لم تك ذئبا اكلتك الذئاب!!

بيلسان مخنوقه من كلام امها ومن تصريحها بكل برود وهي تتكلم عن الكره الي تحمله لها ...والحين جايه تنصحها نصائح مثل الزفت ...احتارت مع امها وما تدري كيف تتعامل معها ....رفعت الرايه البيضاء واستسلمت !!

بعد وقت قصير غادرت المكان ..وتوجهت راجعه لبيت ماجد ....

**

**

ليان وهي تحمل طفلها بين احضانها وواقفه وتكلم أمها

ونورس بالسيارة ينتظرهم ....

منار بهمس وهي تنطق:حاولي ابعدي زوجك عن بيلسان تفهمين!!

ليان بضيق من كلام امها: ماما وش هالكلام

منار زمت شفتها بضيق من غباء ليان: انت غبيه والا هبله والا عبيطه؟!

ما تحسين باهتمام زوجك ببيلسان ...من لما جلستم وهو يسأل عنها ؟!

ليان بترقيع: يا ماما هو يعتبرها مثل اخته ... وبعدين بيلسان متزوجه

منار رفعت حاجب من غباء ليان: والله مثل اخته؟!

لجين يسأل عنها ؟!

بهتت ملامح ليان للحظات...بعدها نطقت بتبرير: لجين صغيره ...اما بيلسان

قاطعتها منار بقوة: أما بيلسان كبيره؟!

افتحي عيونك ...خراب البيوت ما ييجي الا من المتزوجات ...

شفيها كيف كنان رفضك وخطبها بالرغم انت احلى منها الف مرة؟!

ما ادري وش تعمل حتى تجذبهم كذا !!

والاهتمام المبالغ فيه واضح بعيون زوجك ...ولو كان ماجد هنا او كنان ما سمحوا له بهذا التمادي كل شوي بسيرتها ويسأل عنها!!

امسكي بزوجك من الحين قبل ما تتعقد الامور  أكثر!!

اشرت بعيونها :ناظري شرفت ست الحسن والجمال!!

اول ما اقتربت بيلسان نزل نورس من السيارة مباشرة وهو يبتسم: هلا هلا ببيلسان!!

وقفت بيلسان وهي تشوف منار وليان قريب من السيارة: هلا فيك

وتابعت خطواتها باتجاه ليان ...ابتسمت لها وسلمت عليها بحرارة وهي تسالها عن حالها واحوالها ...وتلاعب طفلها الصغير!!

اقترب نورس وهو ينطق: امي تقول إنه يشبهك يا بيلسان!!

منار ناظرت ليان واعطتها نظره حتى تنتبه!!

بيلسان ما ناظرته وهي مستمره تلاعب الطفل!!

منار بحزم: ما يشبه  احد يشبه حاله وبس!!

ليان ابتسمت مجامله وبداخلهاضيق من بعد كلام امها: تأخرنا اشوفك المرة الجاية

بيلسان ناظرتها بمحبه: ليه ما اتصلت انك هنا

ليان ابتسمت لها: اتصلت عليك وما رديت ...كم ساعه صار لي انتظرك؟!

نورس بمقاطعه يكلم ليان: ما هي حلوة نطلع مع دخول بيلسان ...خلاص خلينا ندخل واجلسي مع اختك!!

منار رفعت حاجب وهي كاتمه غيضها منه: انت مستعجل وما نبغى نعطلك اكثر من كذا ...والمرة الجايه تجلس ليان مع اختها ...

ليان كتمت ضيقها من تصرف نورس الي كان مستعجل وعنده مشوار والحين يبغى يجلس !!

ناظرت بيلسان الي معطيه نورس ظهرها ومنشغله مع الطفل ...

هزت رأسها تبعد كلام امها ..مستحيل مستحيل يكون صحيح!!

استأذنت ليان ورجعت مع زوجها ...منار ناظرت بيلسان والهدوء يغلفها: توقعتك ترجعين مع كنان؟!

بيلسان بهدوء: ما اتصلت فيه ...ما ابغى اعطله عن شغله!!

مناى وهي تدخل معها للداخل: ليان تقول اهلك رح يسافرون؟!

ناظرتها بيلسان للحظات بعدها ناظرت امامها ما عندها علم بالسالفه وأمها ما جابت سيرة ...ردت بسؤال حتى تتخلص من الاجابه: ليه ناويه تودعيهم؟!

منار ناظرتها للحظات ..بعدها زمت شفتها بعدم رضا وهي تردد: لا حول ولا قوه الا بالله

اطلعي بدلي ملابسك وانزلي نجلس مع بعض نشرب قهوة ..امي اليوم رح تزورنا بالمساء

هزت راسها بيلسان مجاملة وتوجهت معها للداخل!!

**

**

**

نهاية الأسبوع ما سألت عن سالفة سفر أهلها ..كل تفكيرها عند جدها ... متى يجهزون وينزلون للقرية ...زفرت بضجر لها ساعه تنتظر عند السيارة من كثر اللهفه وللحين ما احد طلع منهم!!

استبشرت لما طلعت رنا وبيدها حقيبه صغيره فيها اغراضها ... نطقت بيلسان بضيق: وينكم تأخرتم؟!

رنا اقتربت منها: شوي ويجهزون!!

زمت شفتها بضيق ...ليه كل هالوقت بالتجهيز ...رايحين لبيتهم الثاني وش لزوم التجهيز والاغراض

رنا بتساؤل: كنان وين؟!

بيلسان تنهدت ومن داخلها مشتعله من تأخيرهم: يجهز نفسه!!

رنا تثاوبت: اعطيك معلومه اذا احد من اهلي تأخر وتماطل بالطلعه اعرفي إنه ما يبغى يطلع ..تدرين ديما رجعت تنام وبالغصب حتى قومتها ماما!!

بيلسان جلست على الارض سالفتهم طويله ...ناظرت ساعتها ..صارت ١٠.٣٠ وهي من الساعه ٩.٣٠ منقوعه هنا تنتظرهم...يقهرون!!

رنا اشرت بعيونها : هذا احمد وماما طلعوا!!

التفتت بيلسان لهم وما علقت ...

منار وهي تضع اغراضهم بالسيارة : هاني ما رح ينزل!

رنا : احسن لأنه رح يقرفنا !!

احمد بتوعد: وربي الا اقول له!

رنا اقتربت منه وشدت شعره: وربي انتف شعرك يا بزر!

احمد فلت منها وركض لأمه ...

منار الي حست نقابها اعتفس منه ..نطقت بضجر: وبعدين معكم؟!

احمد مد بوزه :هي الي بدأت!!

ناظر بيلسان الي جالسه على الأرض وبعبوس نطق: هذي رايحه معنا؟!

رنا بضحكه: من الصبح جالسه تنتظر

قاطعها احمد بعبوس: روحي عند اهلك ليه تلحقينا وين ما نروح؟!

تبغين تسرقين كرتي الي بالمزرعه!!

ما ردت عليه بيلسان مالها خلق له ...

اشرت رنا على ديما وهي طالعه وتجر نفسها جر : ماما شوفي ديما كأنها نائمه

ديما بضجر: يا ربي عطله ومن الصباح عملتم هالطوارىء كان نزلنا العصر...ما رح تطير القرية!!

ملحقين على القرف!!

بيلسان ناظرتها بانتقاد: ما احد جبرك تنزلين .. تقدري ترجعي وتكملي نوم

ديما بردح: كله من تحت رأسك نزولنا للقرية!

قاطعتها منار بحده: وش فيك؟!

ابوك قال الغداء بالمزرعه ابلعي لسانك يا ديما واسكتي افضل لك .. أو اتصلي بأبوك وقولي له هالكلام!!

زفرت ديما بضجر وهي تتوجه للسيارة تكمل نومتها!!

منار بلطافه: لا تحملين بخاطرك عليها ...نعسانه وما تدري وش تتكلم....

هزت راسها بيلسان بلامبالاة:ما صار شيء!!

منار بابتسامة:خلينا ننتظر كنان بالسيارة؟

رنا باعتراض: ملحقين على السيارة خلينا هنا افضل .. اكره ما علي انتظر بالسيارة!!

مر الوقت ...ناظرت بيلسان الساعه١١...

منار ناظرتها:متأكده إنه صاحي؟!

بيلسان هزت رأسها: ايه قال لي اسبقيني وألحقك!!

منار اشرت لها: اطلعي شوفيه تأخرنا وربي ماجد الا يزعل ما يحب احد يتأخر عن اي موعد!!

هزت راسها على مضض وتوجهت للداخل ... أول ما فتحت باب الجناح رفعت حاجب وهي تشوفه واقف بالصالة ويتكلم بالجوال !!

ناظرها وهو ينطق على الجوال: لحظه

نطق بهدوء: شوي واكون تحت بس اكمل المكالمة!

هزت رأسها بضيق وقفلت الباب ونزلت وهي تشعر بالاختناق من طول باله ...هي تحترق وهو فاتح شركه اتصالات فوق!!

اول ما اقتربت منهم ردت لما سألتها منار: يتكلم بالجوال الحين ينزل!!

رجعت جلست على الارض بهدوء خارجي !!

بعد ربع ساعة رفعت نظرها لما اقترب منهم وريحه العطر سابقيته..نطق بروقان: تفضلوا!

منار نطقت بضجر: تأخرت كثير

نطق بتبرير وهو يقبل راسها: كنت احكي مكالمه

منار بتساؤل: لا تقول المستشفى

ابتسم وهو يتحرك للسيارة: ميس

منار هزت رأسها باندماج: وش صار معها؟!

نطق بهدوء: سالفه طويله بعدين اقولك!!

جالسه تناظره لما توجه للسيارة وخلفه منار ...وبداخلها نار مشتعله ...الحين طول الوقت وهو يتكلم مع ميس؟!

وهي مثل الكلبة برا جالسه تنتظر!!

غمضت عيونها تمسك اعصابها ....ما رح يكون عقلها قليل وتعمل مشاكل ..رح تشوف آخرها مع ميس...

توجهت للسيارة ...فتحت الباب وجلست جنب رنا بهدوء ....وصدت لجهة الشباك ماتبغى تناظره ولا تشوفه قلبها مليان عليه!!

غمضت عيونها وارخت رأسها على الزجاج وسمحت لنفسها تدخل عالم الاحلام...

**

**

**

ماسك الجوال ويقلب فيه بروقان ...نقز لما شاف صديقه فوق راسه ما انتبه على دخوله!!

نطق بغضب وهو يقفل الجوال: داخل لا احم ولا دستور!!

رفع حاجب بخبث: من وين حصلت على الصور؟!

راكان بحده: ما يخصك!!

ابتسم بخبث: وش تبغى بالصور دام صاحبة الصور صارت مع رجال ثاني!!

رد بضيق: يعني تقدر تقول ذكرى...او نقول ورقه رابحه بالمستقبل...ما تدري يمكن استفيد منهم!!

نطق بتساؤل: تهديد؟!

رفع حاجب بتفكير:  ما اعملها بس مثل ما قلت لك ما ادري وش رح يصير للمستقبل

عقد حواجبه: دام مو ناوي تهدد او تتحرك ليه اشغلت امي ذيك المرة

قاطعه بضيق: فكرت بالموضوع البنت ما عملت لي شيء ليه اخرب بيتها

قاطعه بخبث: ورفضهم لك وش تسميه؟!

انت اول واحد خطبتها ومع ذلك رفضوا بدون سبب ... كل ذنبك إنك فقير

رفع حاجب راكان وهو يناظره: البنت وش علاقتها؟!

ابتسم بتهكم: البنت هي اساس الرفض.. كل القرية تعرف سلطان ودلاله لها ..ما يرفض لها طلب ...مثل ما قلت لك من قبل البنت هي الي رفضتك .. ما سمعت كلام اهل القرية كانت على علاقه مع صاحب المزرعه!!

وانت رفضوك وكأنك ما تسوى نعال ... أنا لو مكانك اعلمها كيف ترفضني وكل القرية تتكلم عن رفضها لك!!

انت لزوم تهددها بالصور ووقتها رح ترجع تلحق خلفك 

قاطعه: وزوجها

رد بلامبالاة: خليها على ذمته ...

نطق بابتسامة وهو يكمل كلامه:تراها بالقرية قبل شوي شفت سيارتهم

عقد حواجبه بتكذيب: كيف شفتها وسيارتهم مظلله

قاطعه بابتسامة: كانت الدريشه مفتوحه ..والحين قوم تحرك ...

**

**

**

نزلت من السيارة وهي تناظر المزرعه بانبهار ...زادت جمال عن المرة الماضية الي زارتها مع اخواتها...

ناظرت ديما الي حملت اغراضها وهي تنطق: رايحه اندفس ما احد يصحيني!!

ابتسمت على كلام رنا وهي تنطق: نومه بلا قومه!

منار بحده: رنا وش هالكلام!!

رنا ناظرتها بتورط:امزح ماما!!

زمت شفتها منار بعدم رضا وتوجهت للداخل ...تنهدت وحملت بيلسان اغراضها بهدوء ... قاطعها كنان وهو يقترب منها بابتسامة: اتركي الاغراض بعدين ندخلهم

!!

تركت الاغراض وهو تناظره بتساؤل ...سحبها من يدها بخفه: رح نتجول بالمزرعه وأعرفك على المكان!!

وخاصه المكان الي كنا نلتقي فيه أنا وانت؟

هبط قلبها من كلامه من متى كانت تلتقي واصابها الشك بنفسها إنه يطلع كلام اهل القرية صحيح!!...وباستنكار نطقت: كنا نلتقي؟!

ضربها بخفه على جبهتها وهو ينطق بروقان: وشفيك فاقده الذاكره؟!

لما كان طولك شبر وتجلسين على الجدار وانا العم الكبير الي يجلس على المقعد يسمع سوالفك وجنانك!!

ابتسمت لما اجتاحتها مشاعر الحنين لذيك الايام؟!

تابع كلامه وهو ينطق: جاء اليوم الي تحققت فيه امنيتي واجلس انا وانت على نفس المقعد بدون ما ارفع رقبتي وانا اناظرك!!

خزته بتكذيب: تناظرني؟!

دوم منشغل بالكتب وأنا اكلم نفسي!!

قاطعها بابتسامه: اقول امشي ولا تضيعي علينا الوقت ...

تحركت معه وهي تحس نفسها طايره من الفرحه بعد ما بدأت الحواجز الي بينهم تنكسر ويقتربوا من بعض اكثر ....

انتهى البارت...دمتم بخير 🌹