في فيلا أدهم
أسيل وسهام قاعدين سوا بيستنوا أدهم اللي خرج.
أدهم دخل من باب الفيلا: آسف على التأخير.
سهام: كنت فين يا حبيبي؟
أدهم بص لأسيل: أخوكي ياستي راح القسم ومسك فريد ضربه والواد كان هيموت في إيده وواحد صاحبي كلمني عشان أروح أخلصه من إيده.
أسيل: نهار أسود ليه كدا؟
أدهم: بينتقم منه بقي بس الحمد لله إن الواد كويس لو كان جراله حاجة كان أسر راح في كلبوش.
سهام: ربنا يحميه يارب.
أدهم: يلا ناكل بقي أنا ميت من الجوع.
أسيل: هحضر الأكل أهو.
سهام: هاجي معاكي يا أسيل.
حضروا الأكل وأكلوا سوا. وبعد ما خلصوا أدهم أخد أسيل وطلع على جناحه اللي أول مرة تدخله.
أول ما دخلت كان فيه ريسبشن صغير وفيه شاشة وبعد كدا دخلت أوضة النوم اللي كانت بألوان الأسود والبني وكان فيه شباك إزاز كبير بيخرج على بلكونة كبيرة وفيها زرع كتير وباب للحمام وأوضة اللبس.
أدهم: إيه رأيك يا حبيبتي؟
أسيل: حلو جداً بس ممكن سؤال.
أدهم: اتفضلي يا قمري.
أسيل: ليه انتوا الشباب دايماً أوضكم بتكون ألوان غوامق؟
أدهم ضحك: مانا أكيد مش هعمل أوضتي بينك يا أسيل.
أسيل ضحكت.
أدهم: وبعدين أنا جايبك هنا عشان تختاري عايزة تغيري فيها إيه.
أسيل: لا طبعاً مش هغير حاجة هي أصلاً عجباني.
أدهم: انتي بتهزري يا أسيل لا طبعاً لازم تختاري ديكور وكل حاجة في الجناح زي ما انتي بتحبي.
أسيل: والله يا أدهم حلو جداً وعجبني ومش حابة أغير أي حاجة بس حاجة واحدة.
أدهم: إيه هيا؟
أسيل: عايزة مرجيحة في البلكونة دي لأني بحبهم جداً.
أدهم: من عيوني يا قلبي أحلى مرجيحة لأحلى أسيل في الدنيا.
أسيل ابتسمت: حبيبي يا دومي يلا بقي عشان أروح أنا اتأخرت جداً كدا.
أدهم: يلا يا حبيبتي.
***
جميلة وريان رجعوا القصر كان الكل قاعدين مكانهم والحزن باين عليهم ومروة اللي بتعيط في حضن حسن.
ريان: في إيه يا جماعة مالكم؟
جميلة: في حاجة حصلت انتوا ساكتين كدا ليه؟
مريم: أسر هيطلق زينة وهيُسافر دبي.
أسيل دخلت من باب القصر وسمعت الكلام: نـــــعم ليه إيه اللي حصل؟
شروق: منعرفش أي حاجة هو فجأة كدا قال قراره وطلع ينام.
ريان بص لفهد: اتكلم معاه حضرتك يا عمو هو بيسمع منك.
حسن: أسر خد قراره وجالي مكتبي وقالي وأنا حاولت معاه مقدرتش أمنعه.
زين: يعني هنسيبه يسافر؟
أسيل: لا مستحيل يسافر.
جنه: بصوا بقي من الآخر محدش هيقدر يمنعه غير زينة وبس.
أسيل: وهي فين؟
تمارا: طلعت أوضتها.
جميلة: هما الاتنين اللي قرروا القرار ده سوا.
كنان: منعرفش أي حاجة هو رمى القنبلة وطلع.
فهد: ملوش لازمة الكلام ده الوقت هو حسم قراره وخلاص.
مروة بعدت عن حضن حسن: خلاص يعني محدش فيكم هيمنعه؟
حسن: اهدي يا مروة.
مروة: اهدي إزاي وأنا شايفة ابني بيدمر بسبب الحب وهيسيب البيت والبلد ويبعد عني.
فهد: أسر مش عيل صغير يا مروة عشان نضربه ونقوله مش هتسافر وأنا شايف إننا لو اتكلمنا معاه برضه مش هيتراجع الوقت اتأخر كل واحد يروح على أوضته يلا.
فهد وكنان وراكان وحسن كل واحد طلع مع مراته والشباب وفضل البنات.
جميلة: وزينة موافقة على موضوع الطلاق ده؟
جنه: زينة تايهة مش عارفة هي عايزة إيه وبعد اللي حصلها مابقتش عارفة تاخد قرار.
أسيل بغضب: بس لازم تختار وأنا عارفة أنا هعمل إيه.
جنه: هتعملي إيه يا أسيل اهدى.
أسيل: لا مش ههدي أخويا هيسيب البيت ويمشي بسببها وأنا مش هوافق على ده.
أسيل طلعت بسرعة والبنات طلعوا وراها.
***
زينة قاعدة في أوضتها بتعيط لأنها ماكنتش متخيلة إن أسر هيطلقها هي مش عايزاه يبعد عنها وفي نفس الوقت مش قادرة تقرب ولا تاخد خطوة هي من وقت ما عرفت إنه بيحبها وهي كمان مشدودة ليه بس مش قادرة تتخطى موضوع فريد فاقت لما الباب اتفتح بعنف دخلت أسيل ووراها جنه وجميلة وقفلوا الباب عشان محدش يسمعهم.
أسيل: بتعيطي مش كدا بعد ما دمرتيه وهتبعديه عننا قاعدة هنا بتعيطي؟
زينة: دمرت مين يا أسيل انتي بتتكلمي كدا ليه؟
أسيل: تعرفي كنت لما بشوفك مع فريد وأشوف نظرة أسر ليكي كنت بحس قلبي بيتقطع من الوجع عليه بس انتي عارفة انتي متستاهليش حب أسر أبداً انتي اللي زيك يستاهل اللي زي فريد.
جنه: أسيل انتي بتقولي إيه؟
زينة كانت بتعيط جامد ومش قادرة تصدق الكلام اللي بتسمعه من أسيل.
أسيل: مش بتردي ليه هاااا أنا كلامي صح مش كدا؟
جميلة: أسيل بطلي هبل بقي إيه الكلام ده؟
أسيل: الكلام ده هو الحقيقة أنا أخويا بيدمر بسبب حبها وفي الآخر عايز يسيبنا ويسافر ويعيش لوحده بعيد عننا.
زينة بعياط: أنا والله معرفش إنه هيسافر أنا عرفت زي زيكو.
أسيل: انتي كدابة انتي فرحانة عشان شايفة واحد بيحبك وهيموت عليكي وحضرتك شايفة نفسك بقي مش كدا؟
زينة هزت راسها بلا وهي منهارة.
جنه شدت أسيل: أسيل اخرسي بقي انتي واعية لكلامك ده.
أسيل عيطت: أه واعية لكل كلمة انتو ليه مش حاسين بيا ده أخويا التوأم انتو مش قادرين تفهموا أنا حاسة بيه.
أسيل قربت من زينة وشاورت على قلبها وكانت منهارة: ده بيوجعني أوي أخويا هيبعد عني ونصي التاني هيمشي ويسبني بسببك يا زينة انتي ليه مش قادرة تشوفي حبه ليكي ده بيعشقك يا زينة والله العظيم بيعشقك.
زينة كانت بتعيط جامد والبنات عيطوا على منظرهم.
زينة قعدت على السرير وعيطت أكتر وحطت إيديها على وشها: والله العظيم وأنا كمان بحبه.
البنات بصولها بصدمة.
زينة: بس مش قادرة آخد خطوة في علاقتنا ويمكن كنت بتجاهله كتير بس أنا مكسوفة منه ده واحد حبني حب كبير أنا كنت بدي حبي لواحد تاني ميستاهلش وأسر قالي إن ليّ الاختيار إننا نكمل أو نطلق وقررت أتكلم معاه إني مش عايزة أطلق ونكمل سوا بس اتفاجئت النهاردة بكلامه زي زيكو.
أسيل بصت للبنات ومسحت دموعها: الله يخربيتك وخلتيني أعمل التمثيلية دي وأعيط عشان تتحركي.
زينة باستغراب: تمثيلية إيه؟
جنه قربت من زينة: يعني انتي بتحبي أسر يا زينو؟
زينة هزت راسها باه: أنا اتأكدت إن حبي لفريد ده ماكنش حب أصلاً وبجد أنا حاسة بمشاعر حلوة جداً ناحية أسر.
أسيل: يعني كل اللي بتقوليه ده وهتسيبى الواد يسافر بكرة؟
زينة: المفروض أعمل إيه؟
جميلة: الطمي ياربي اتحركي وقوليله امنعيه يسافر.
زينة ابتسمت: يعني لو قولتلُه مش هيسافر؟
البنات: ااااااه.
زينة لسه هتمشي رجعت تاني: يعني كل اللي عملتيه ده كان تمثيل؟
البنات ضحكوا.
جنه: أسيل قالت إن دي هي الطريقة الوحيدة عشان تتحركي.
زينة حضنتهم كلهم: بحبكووو أوي.
أسيل: ياختي وفري الكلمة دي لحد تاني يلااااا.
زينة خرجت من الأوضة جري.
جميلة افتكرت لبس زينة اللي هو بجامة بلون الوردي وفاردة شعرها: يالهوي البت نست تلبس أُسدال.
أسيل ضربتها على راسها: ماهو جوزها يامتخلفة.
جميلة: أه صح.
جنه: نجحت مهمتنا يارب تنجح هي كمان.
البنات: ياااااااااااارب.
الماميز دخلوا الأوضة.
(أسيل وهي طالعة على السلم قالت للبنات على الخطة وكانت تمارا خارجة من أوضتها قالت لها وأسيل والبنات راحوا على أوضة زينة وتمارا راحت نادت على الماميز وقالت لهم على الخطة ووقفوا يسمعوا البنات بيقولوا إيه ولما زينة جت تخرج من الأوضة استخبوا بسرعة)
تمارا: لا عجبتني الخطة الصراحة.
أسيل: تربيتك يا توتااااا.
مروة: يعني كدا ابني مش هيسافر.
شروق: لو زينة اعترفت بحبها أكيد هيلزق جنبها مستحيل يسيبها.
مريم: يارب ياختي يارب.
تمارا: يلا بينا.
***
أسر في أوضته قاعد على الكنبة بعد ما حضر الشنط ومش مصدق إن خلاص هيخسر حب عمره بعد ما كانت اتكتبت على اسمه الباب خبطت وكانت خبطة رقيقة هو استغرب قام يفتح واتفاجأ بزينة اللي تاهت في جمالها هي مش أول مرة يشوفها بشعرها بس المرة دي شعرها المفرود وواصل لآخر ضهرها وكان شكلها يسحر أي حد.
أسر: احم في حاجة يا زينة؟
زينة بصتله وهزت راسها باه.
أسر بعد عن الباب: طب اتفضلي ادخلي.
زينة دخلت وبتتفرج على الجناح بتاعه اللي عجبها جداً وأسر ملاحظ ده.
زينة لفت وبصت لأسر: الجناح بتاعك حلو جداً.
أسر: شكراً يا زينة.
زينة: احم يعني أنا مش ناوية أغير فيه أي حاجة.
أسر باستغراب: مش فاهم تغيري إيه؟
زينة قربت منه ودي أول مرة تكون قريبة أوي جداً منه ورفعت وشها وبصتله: بابا كان بيقول كل واحدة فينا تشوف جناح جوزها لو حابة تغير فيه حاجة قبل الفرح وأنا بقولك هو عجبني جداً ومش حابة أغير حاجة فيه.
أسر بصّله بصدمة: زينة انتي قولتي جوزي ومش هتغيري حاجة في الجناح قبل الفرح أنا سامع صح؟
زينة غصبن عنها ابتسمت وهزت راسها باه.
أسر: يعني انتي اخترتي نكمل سوا مش كدا؟
زينة: أنا عايزة أقضي الباقي من عمري كله معاك يا أسر مش عايزة إياك تطلقني وتسافر لو انت حابب ده طبعاً.
أسر شدها لحضنه ورفعها عن الأرض ولف بيها: دانا حابب ده كمان ….. أنا مش مصدق نفسي يا زينة.
زينة: أنا آسفة أنا كنت غبية أوي.
أسر بعدها عن حضنه: متغلطيش في حبيبتي لو سمحتي.
زينة ضحكت أوي: أسر.
أسر: عيون وقلب أسر.
زينة: أنا بحبك أوي.
أسر اتنهد بقوة: اخيييييراااا يازينة اخيراااا دانا كنت فاقد الأمل وكنت حاسس إني هموت من غير ما أسمعها منك.
زينة: بعد الشر عليك.
أسر حضنها: أنا بعشقك يا زينوووو.
زينة رفعت إيديها وحضنته بقوة هي كمان وفجأة الباب اتفتح والكل دخلوا الأوضة الرجالة والماميز والبنات اللي بيزغرطوا والشباب فضلوا برا عشان زينة كانت بشعرها.
زينة بعدت عن أسر وهي هتموت من الكسوف بس أسر شدها لحضنه تاني.
والكل كانوا فرحانين ليهم والبنات بقت تغني وتزغرط وأسر حاضن زينة مش عايزة يسيبها أبداً…..