تحميل رواية «دلال و الشيخ» PDF

الحلقة الثانية والأربعون والأخيرة

بسم الله والصلاة والسلام على رسول الله ❤️

إن لله مائة رحمة أنزل منها رحمة واحدة بين الجن والإنس والبهائم والهوام، فبها يتعاطفون، وبها يتراحمون، وبها تعطف الوحش على ولدها، وآخر الله تسعًا وتسعين رحمة يرحم بها عباده يوم القيامة.

حدثت حور بخفة ولطف شقيقتها منايا:

_ أيوه يا أختي يا حبيبتي لازم نتفق إننا نقسم شغل البيت على بعض، أنا مصدقت إني أخت بنت عشان الواد آسر ده بروطة مش بيعمل حاجة.

يعني أنا أطبخ أنت تعملي المواعين، أنا أغسل أنت تنشري.

فهماني يا موني عشان نبقى على نور من أولها يا حبيبتي.

فقهقهت منايا وأجابت:

_ بس كده عيوني يا حور وأنا مبسوطة جدًا إني لقيت بعد العمر ده كله أخت بعد ما كنت وحيدة بس مش عايزة أستعجل عشان متعشمش ولازم أتأكد بالتحليل الأول وعندي كمان أسئلة كتير أوي لازم يكون ليها إجابة.

أولها إزاي لو كنت بنته صح ميعرفش وإيه سبب الانفصال وسبب هروب ماما منه دلوقتي؟

حاجات كتير محيراني لازم يكون لها إجابة عشان أقدر أتكيف مع الوضع الجديد.

وكمان لو فعلًا دكتور أحمد بابا ده مش معناه أبدًا إني أنسى الراجل اللي رباني وعاملني كأنه بنته بالظبط وعمري ما شكيت للحظة إنه مش بابا متصوريش قد إيه كان كويس وحنين معايا ومع مامي لدرجة إنها سمتني على اسمه الله يرحمه.

حور:

_ الله يرحمه شكله كان راجل طيب ووالدتك كانت بتحبه عشان كده سمتك على اسمه.

استمع أحمد لتلك الكلمات التي أصابت قلبه في مقتل من فرط الغيرة وازداد وجهه قتامة وقبض على يده بغضب وهمس بغضب:

_ معقول يا دلال بعد كل اللي كان بينا تحبي راجل تاني غيري وتجوزيه وتكتبي كمان بنتي على اسمه.

أنا مش مصدق، لا كده حرام وقلبي مش متحمل القسوة دي منك وخايف فعلًا تكوني هربتي مني لما شوفتيني عشان حضرتك عايشة على ذكرى حبك ليه وأنا خلاص مبقاش ليا في قلبك مكان.

أنا اللي عشت عمري كله ليكي حتى لو مش معايا وعمري ما نسيتك لحظة.

جاءت صورة منايا على مخيلة آسر فشعر بالحنين والاشتياق إليها رغم أنه رآها مبكرًا في الجامعة ولكن ما حدث جعله لا يستطيع الحديث معها.

فأمسك بهاتفه واتصل بها، فتعجبت منايا من ذلك الرقم الغريب الذي يتصل بها ففتحت على الفور لتعلم من.

فجاءها صوت آسر الشجن:

_ عاملة إيه؟ هتصدقيني لو قلتلك إنك وحشتيني.

اهتزت أوتار قلب منايا من هذا الغزو الصريح بالحب وهي لا تنكر أن هناك شيء يجذبها إليه وإحساس من نوع فريد أول مرة تشعر بها نحوه ولكنها الآن ليست مستعدة لخوض التجربة في ظل الظروف الحالية لذا أجابت بفتور:

_ آسر من فضلك أظن إننا كبار شوية إننا ننساق لمشاعرنا بالسرعة دي، لأن ده ممكن يكون مجرد إعجاب وقتي وينتهي.

استنكر آسر ما تقول واستطرد بتأكيد:

_ أظن إني كبير كفاية يا موني عشان أقدر أحدد ده مجرد إعجاب ولا بداية حب حقيقي، لو ادتيني فرصة هقدر أثبتلك ده.

وكمان أنا عايز أدخل البيت من بابه، يعني حالًا هروح أكلم بابا اللي هو باباك الحقيقي أحمد الجمال.

متصوريش أنا فرحان قد إيه عشان طلعتي جزء مننا وخصوصًا إنك بنت أعظم راجل قابلته في حياتي.

عمي أحمد أو بابا أحمد اللي رباني من وأنا لسه طفل وعمري ما حسيت للحظة إنه مش بابا الحقيقي لإنه مكنش بيفرق بيني وبين حور أبدًا.

وغرس فينا الدين والأخلاق كويس جدًا، فجزاه الله خيرًا عنا.

ورحم الله أمي رحمة واسعة وربنا يعوض شبابها في الجنة، ويعوض بابا أحمد بالإنسانة اللي حبها واتحرم منها سنين طويلة لأن اللي يحب بيعرف قد إيه إحساس البعد مميت.

ده أنا مش قادر أهو ويدوبك لمحت طيفك من ساعتين.

داعب آسر مشاعرها وشعرت أن الهواء اقترب أن ينفذ من رئتيها فإحساس الحب لذيذ ولكنه في آن الوقت مصحوب بخوف الفقد أو الخذلان.

منايا بحرج:

_ أنا مقدرة مشاعرك يا آسر، بس يا ريت تدوني فرصة زي ما قولت لحور إني أتأكد إن دكتور أحمد بابا فعلًا وبعدين نتكلم.

فأكد لها آسر:

_ سواء كان بابا أو لا، فأنا حبي ليكي يا موني مش هيتغير وأنت مكتوبة لقلبي.

فأغلقت منايا الخط من توترها، فضحك آسر وردد:

_ بتحبني أوي شكلها.

أما دلال فكانت في عالم آخر بين الحنين والاشتياق لأحمد وبين الخوف من الماضي وبين ابنتها التي تشعر أنها لا تصدق ما قالت وتشك بها.

ثم من بين متاهتها تلك تذكرت حور فقتلتها الغيرة كما شعر أحمد وقالت بغيظ:

_ يعني أنا كنت بعاني هنا مع متولي الزفت الله يرحمه مطرح ما راح وحضرته عايش حياته مع أشجان بيربي ولادها وخلف منها كمان.

ماشي يا أحمد، بس يعني هو كتر خيره أنا سبته فجأة بدون أي سبب من خوفي عليه وهي برضه كانت مراته على سنة الله ورسوله وكفاية إنها استحملت وجع حبه لي وحبه لي، يلا ربنا يرحمها، وصعبانة عليه حور لأنها اتحرمت من حنية الأم في أكتر وقت محتاجة ليها فيه.

غير إني حبيتها عشان شبه منايا وفيها مني كتير وكأنها بنتي وهي ملهاش ذنب إنها بنت ضرتي.

مش عارفة أعمل إيه أنا احترت فعلًا؟

إزاي يكون أحمد معايا في نفس البلد ومكنش جنبه ويا ترى بعدي عنه هيفيد ولا هفضل أتألم لمدة أنا وهو لغاية آخر العمر ومنايا كمان صعبانة عليه هي لسه صغيرة ومحتاجة فعلًا أب يحميها ويحتويها ويكون سند ليها بعد ربنا وحرام أحرمها منه.

ولو عرفت برضه حاسة إني هدفع من دمي تمن إني خبيت عليها وممكن تبعد عني.

لا يا منايا ده إلا أنت عشان أنت مش بنتي وبس، أنت كل حياتي وعمري كله وعشت في الدنيا دي رغم كل اللي شوفتها عشانك يا بنتي.

يارب لما يجي اليوم اللي تعرفي فيه الحقيقة تسامحيني لإني مكنش في حاجة في حياتي حصلتلي إلا واتغصبت عليها ومكنتش بخاطري، وإن الحاجة الحلوة الوحيدة اللي عشتها هي حبي لأحمد وإنك منه يا عيوني.

توجهت منايا بالفعل في اليوم التالي لعمل تحليل إثبات النسب، مع إنها في قرارة نفسها تشعر إنها بنت هذا الرجل فعلًا الذي خطف قلبها من أول يوم رأته به، فكان حبه مختلف رأت به الأب الذي حرمت منه وفي عينيه رأت الحنو الذي تحتاجه.

وخلال تلك الأيام التي انتظرت لها منايا نتيجة التحليل تجنبت منايا الحديث مع دلال وكان بينهم حوار صامت من أعينهم فقط وكل منهما على لسانها كلام كثير ولكن تخشى النطق به.

كما اقتربت منايا من حور أكثر وأكثر وأصبحتا كروحين في جسد واحد.

أما آسر فأصبح لها كنسيم بارد يطرب النفس في يوم شديد الحرارة، رؤيته وحدها تسعدها فما بال القرب منه.

ولكنها مازالت تضع بينها وبينه حدود حتى تطمئن لنتيجة التحليل رغم تأكيده لها أنه لا يعنيه سواها هي فقط.

أما حور فكانت تبحث بعينيها دومًا عن سليم فإن وقعت عينيها عليه طابت نفسها واطمئن قلبها رغم صمته العقابي لها لرفضها له من قبل ولكن من داخله أشبه ببركان ثائر يريد أن ينفجر صائحًا:

_ بحبك يا حور، يا مراتي مستقبلًا إن شاء الله.

وعندما داهم أحمد الهم لم يجد سوى أحن الناس إليه والدته شمس لتهون عليه ذلك الثقل على صدره الذي يصيبه بالاختناق.

فاتصل بها فاستجابت سريعًا بفرحة عارمة:

_ أحمد حبيبي.

فاستطرد أحمد:

_ حبيبتي يا أمي وحشاني أوي، متصوريش أنا محتاجك قد إيه ومحتاج حضنك عشان أرمي عليه كل اللي تعبني.

شمس بكلمات بسيطة:

_ الله أحمد، كلم ربنا.

وأنا بدعي ليك أحمد ونفسي أشوفك أحمد.

أحمد:

_ ونعم بالله يا حبيبتي، صدقتي يا غالية.

وأنا كمان نفسي أشوفك وإن شاء الله في إجازة نصف السنة هنزل عشان أشوفك وأطمن عليكي.

ثم حدث أحمد عمته واطمئن على بقية العائلة وفرح بخطوبة سمر كثيرًا ودعى لها بالسعادة.

وعندما أغلق الخط تذكر كلمة والدته:

_ كلم ربنا.

فذهب مسرعًا المرحاض وتوضأ وافترش سجادة الصلاة وصلى ركعتين بنية قضاء الحاجة وحاجته هي "دلال".

ثم بدأ في الدعاء أن يلين الله قلبها نحوه وأن تعود إليه مجددًا وأخذ يلح في الدعاء وهو ساجد حتى فاضت عينيه وعندما انتهى افترش سجادة الصلاة ونام عليها.

فجاءه طفلان في المنام أمسك كل منهما بيده وكل منهما يساعده على النهوض قائلًا:

_ بابا اصحى، تعال العب معايا.

أحمد:

_ بابا مين، أنت مين يا حبيبي؟

أحد الطفلين:

_ أنا موسى يا بابا وده أخويا هارون.

أنت دايمًا كده بتنسى أسامينا عشان توأم، لكن ماما دلال بتعرفنا دايمًا.

قوم يا بابا، قوم يا مولانا.

فاستيقظ أحمد عند إحساسه بالفعل أنه هناك من يجذب يده وعندما فتح عينيه وجدها يد حور وقالت بحنو:

_ إيه اللي منيمك في الأرض كده يا حبيبي، ضهرك يوجعك يا مولانا.

قوم قوم، نام على السرير يلا.

ابتسم أحمد لها وأومأ برأسه وقام بالفعل وافترش التخت، فقبلته حور من جبهته قائلة:

_ تصبح على دلال ومنايا وحور زي بعضه فوق البيعة يا مولانا.

فأصاب جسد أحمد رعشة قوية، ما كل تلك البشارات من الله عز وجل وصدق سبحانه وتعالى حين قال "ادعوني أستجب لكم".

ثم ذهبت حور لتغفو هي الأخرى وهمست قبل النوم:

_ ربنا يهديك عليه يا واد يا سليم إيه جبلة مبتحسش.

أنا بحبك يا حمار، بحبك يا طور.

غفى أحمد لعدة ساعات ليستيقظ على صوت هاتفه فاستجاب وهو يتثاءب:

_ السلام عليكم.

ولكنه لم يجد صوتًا ولكنه استمع إلى نحيب ناتج عن بكاء اتبعه شهقات، ففزع واعتدل قائلًا:

_ فيه إيه؟

لتحدثه دلال بخفوت:

_ وحشتني أوي يا أحمد، وحشتني أوي يا مولانا.

سامحني إني مشيت للمرة الثانية وسبتك بس غصب عني يا حبيب الروح وضي عيوني.

أنا بحبك أوي يا أحمد وعمري ما نسيتك ولو لحظة واحدة.

فصاح أحمد باسمها من داخل قلبه قبل لسانه الذي شُل للحظات من المفاجأة:

_ دلااااااال.

فاستطردت دلال بشوق يزن الدنيا ومن عليها:

_ أيوه دلال يا مولانا.

دلال اللي عمرها ما حبت ولا عرفت غيرك، أنا بقالي فترة مش بعرف أنام من ساعة ما شوفتك ومشيت.

قصدي هربت، أيوه هربت من نفسي قبل ما أهرب منك يا أحمد.

هربت من خوفي منك وعلى منايا بنتك يا أحمد.

كنت خايفة تتهميني إني ست مش كويسة عشان الصورة اللي بعتها جوز أمي منه لله ولا تتهميني إني خلفت من حرام والعياذ بالله ولا تقول اتجوزتي وحبيتي جوزك لدرجة كتبتي البنت باسمه ونسيتيني.

وكل ده ما حصلش يا أحمد.

اعتصر أحمد بألم عند ذكرها كل تلك الأشياء التي تؤلمه ولكنه تجاوز عن ذلك كله من أجل حبه لها فقال:

_ اتكلمي أنا سمعك وهصدق كل كلمة هتقوليها متخافيش.

فاستطردت دلال باطمئنان ولكن صاحب ذلك غصة مريرة:

_ أنا جيت البلد دي مخطوفة من جوز أمي واللي أنقذني المنياوي باشا ربنا يرحمه وعشان يحميني اتجوزتي على ورق بس لكن عمره ما لمسني لإنه لا مؤاخذة ملهوش في الجواز أصلًا وأنا وفقت عشان كده.

لإني عمري ما كنت هسمح أبدًا أي راجل يلمسني غيرك يا مولانا.

ولما خلفت سميت البنت على اسمه عشان جميله عليه إنه سترني ومبخلش علي ولا على بنتنا بحاجة.

ولو هتسألني مرجعتش ليه هقولك مكنتش عايزة حياتك تنهد بسببي والناس تعايرك إني كنت راقصة.

حتى دي مكنش لي يد فيها، يعني مكنتش عايزة أشتغل راقصة بكيفي أنا اتغصبت بسبب جوز أمي ربنا يجحمه في جهنم.

ودلوقتي خايفة كمان على منايا لما تعرف حقيقة أمها وهي هتبقى دكتورة قد الدنيا يا أحمد.

أعمل إيه يا أحمد؟

وفي تلك اللحظة التي تعترف بها دلال لأحمد، كانت منايا قد ولجت إلى المنزل بعد أن أتت بنتيجة التحليل الذي أثبت بالفعل أنها ابنة أحمد وكانت مشاعرها متضاربة بين الفرح والحزن.

الفرح لأنها ابنة رجل ذو خلق ودين وما عادت يتيمة.

والحزن من الخوف من السبب الذي أخفت عليها والدتها الحقيقة.

ولكنها عندما استمعت لمعاناة والدتها من أجلها، فتحت الباب.

للتفاجئ دلال بها فأغلقت الخط مع أحمد سريعًا.

فصاحت منايا:

_ مامي أنا سمعت كل حاجة يا حبيبتي، وبالعكس أنا فخورة بيكي جدًا وعمري أبدًا ما هفكر في اللي حصل زمان مدام كان ضد رغبتك.

كفاية اللي شوفته معاكي وربتيني عليه والكل يشهد بأخلاقي ده كله بفضل تربيتك لي يا أحسن أم في العالم.

فبكت دلال واحتضنتها بحب وقالت:

_ يا حبيبتي يا بنتي.

توتر أحمد عندما أغلقت الخط وهمس:

_ حصل إيه تاني، لا حرام ده أنا مصدقت إن ربنا سبحانه وتعالى استجاب دعائي وكلمتني.

فاتصل بها سريعًا لتجيبه منايا بأفضل الألقاب إلى قلبه:

_ بابا.

فأصاب قلب أحمد رجفة قوية وهمس:

_ قولتي إيه يا حبيبة بابا.

ابتسمت منايا واستطردت:

_ والله أنت اللي حبيب قلبي يا بابا، ممكن تيجي عشان محتاجة أوي أرمي نفسي في حضنك عشان تعوضني عن سنين الحرمان دي كلها اللي اتحرمت فيها منك.

فأخرج أحمد تنهيدة مطمئنة بعد كل تلك سنوات العجاف وقال باشتاق:

_ حالًا يا حبيبة بابا وأنا كمان محتاج ده أكتر منك يا بنتي، وبإذن الله هعوضك عن كل دقيقة كنتي بعيدة عني فيها.

فلمعت عين منايا بالبكاء لتستطرد بحب:

_ حبيبي يا بابي، والست دي أمي برضه محتاجة حضن دافي من نوع خاص.

فلكزتها دلال بخجل قائلة:

_ منايا وبعدين معاكي.

وبعدين بابا الشيخ أحمد معندوش الكلام ده طول ما أنا مش على ذمته.

فصاح أحمد بعد أن سمع حديثها:

_ أنا جاي ومعايا المأذون لإني فعلًا مش هتحمل أشوف ماما من غير ما أخدها في حضني.

يااااه متصوريش وحشتني قد إيه.

منايا:

_ حبيبي يا مولانا على رأي مامي.

وبدال فيها مأذون بقى يعني حلويات وكده، هات معاك حور.

ويعني لو تجيب.. ثم صمتت للحظة.

ليبتسم أحمد على خجلها لإنه يدرك منذ اللحظة الأولى إعجاب آسر بها، وكم هي فرحته أن يزوج ابنه الذي رباه على يده لابنته من حبيبة القلب والروح دلال.

لذا استطرد:

_ أنا هجيب الشلة كلها، آسر وحور وشيكو وابنه وكمان ياسمين دي هتفرح أوي لما تشوف ماما.

منايا بفرحة عارمة:

_ يا ريت أنا من زمان وأنا بحب لمة العيلة عشان مكنش حواليا غير مامي وبس.

أحمد:

_ كلنا هنكون جنبك يا حبيبتي.

يلا استعدي أنت وماما وأنا هجمعهم واجي.

ليغلق معها الخط ويتصل بشيكو قائلًا بصوت مذبذب من الفرحة:

_ حبيب أخوك افرحلي أخيرًا، كلمتني وهروح أكتب عليها دلوقتي تصور!!

أنا مش مصدق نفسي.

أخيرًا لقيتها ومش بس هي مع حتة من قلبي منايا بنتي.

شيكو بسعادة:

_ هنيالك يا صاحبي، فرحتلك أوي.

أنت تستاهل كل خير، وأخيرًا ربنا سبحانه وتعالى عوض صبرك خير.

فسمع سليم حديث أحمد مع والده فخطف من والده الهاتف قائلًا بتهور:

_ عمي أحمد أنا سمعت من بابا إن حضرتك اتجوزت الست دلال وهو وعمي تميم في يوم واحد صح؟

فضحك أحمد حيث استشعر أن اليوم يكرر نفسه فقال:

_ أيوه يا سليم.

سليم بحرج:

_ طيب أنا طالب من حضرتك إيد حور.

وبالنيابة عن آسر عشان محرج: طالب من حضرتك إيد منايا.

فصاح أحمد مداعبًا:

_ إيه عايزين تاخدوا مني بناتي في يوم واحد كده.

لا مينفعش.

فاستطرد سليم:

_ عديها بقى يا عمو، وهو يعني كتب كتاب يعني يا بخت حضرتك أنت البريمو هتكتب وتحب غيرنا.

فصك أحمد على أسنانه بغيظ وقال:

_ أنت بتنؤ فيها يا ابن شيكو، مش كفاية اللي ضاع من عمري.

طيب مفيش كتب كتاب وهو قراية فاتحة وبس.

يا بلاها الموضوع كله أحسن.

فترجاه سليم:

_ لا أبوس إيدك يا عمو، ده أنا قتيلك النهاردة.

وأنا عايز أكتب عشان لا مؤاخذة بنتك منشفاها أوي علي من زمان.

فيمكن تتطرى بكتب الكتاب.

أحمد:

_ نعم يا أخويا، بتقول إيه؟

سليم بعدما استشعر خطأه:

_ لا يا عمي متفهمنيش صح.

أنا قاصد بس عشان يعني حضرتك شيخ وعارف إننا نكون في السليم وكده.

أحمد بضحك:

_ آه تمام.

خلاص هكلم مع البنات ولو وافقوا نتكل على الله ونكتب الكتاب.

سليم:

_ أحلى عمو في الدنيا، والله هدعيلك يا شيخ ربنا يفرحك مع خالتو دلال وتعيش يا مولانا وتعوض.

وأفرجها علينا يارب.

أصبحت دلال كالفراشة هي وصغيرتها تطير في أرجاء المنزل هنا وهنالك لتستعد لزيارة أحمد وعائلته وتعلق الزينة والبلالين ببهجة وفرحة وضحكة رنانة وتشاركها منايا وتقبلها بين الحين والآخر بحب وتهمس في أذنها:

_ يا خوفي يا ست الكل بابا يجي وتنسي العبدة الضعيفة منايا وهو ياخد الحب كله بقى.

فنفت دلال:

_ ده لا يمكن يحصل بالعكس، حبك في قلبي هيزيد لأن كده قلبي اطمن بعد سنين القلق يا بنتي اللي عشتها وهفرح إنك أخيرًا عرفتي بابا اللي هيكون ليكي السند والإيد اللي تحميكي العمر كله.

احتضنتها منايا وقالت بحب:

_ ربنا يحفظك أنت وبابا يا أجمل حاجة في حياتي.

ويلا يا ست الكل كفاية كده وادخلي خدي شاور ثم غمزتها وتابعت: وألبسي الحتة اللي على الحبل عشان العريس زمانه جاي وأنا هتصل بالدليفري يبعت لينا حاجة حلوة كده يا قمر.

دلال بخجل:

_ وبعدين معاكي يا بنت.

منايا بضحك:

_ أنت مكسوفة يا سكر.

ثم وجدت اتصال من أحمد فتوردت وجنتاها وقالت:

_ بابا يا حبيبتي بيتصل لما أشوف أقرب يجي ولا عايز يقول حاجة.

فغمزتها منايا وقالت بحب:

_ خدي راحتك يا قمر، دي الليلة ليلتك يا جميل.

فاستجابت دلال لأحمد لتجده يقول:

_ دايمًا الفرحة لما بتيجي بتجر وراها فرحة يا فرحة قلبي أنت.

ويا ستي بنتنا جالها عريس وعايز ومصمم يكتب كتابه معايا.

فخدي رأيها يا ضي عيوني.

ابتسمت دلال وسارت الدماء في أوصالها وكأنه عاد لها الحياة مرة أخرى وقالت بدلال:

_ بنتنا.

ياااه يا أحمد متتصورش كان نفسي أسمعها قد إيه.

بس على طول كده كتب كتاب مش يتعرفوا على بعض الأول، ده غير إنها لسه صغيرة يا أحمد والمشوار قدامها طويل وخايفة يعطلها عن دراستها.

أحمد:

_ هو عارف كده كويس ومتقلقيش بالعكس هيشجعها ومفيش جواز غير لما تخلص بإذن الله.

اسأليها بس موافقة على آسر ومتقفليش أنا هستنى الرد دلوقتي.

دبت الغيرة في قلب دلال عند ذكر اسم آسر ابن ابنة عمه التي تزوجها.

رغم علمها أنه لم يكن يحبها ولكنها تغار عليه حتى من نسمة هواء تداعب خصلات شعره.

لذا صاحت بغيرة:

_ عايز تجوز بنتي لابن ضرتي يا أحمد اللي كنت وعدتني إنك متلمسهاش وزي ما يكون مصدقت اختفيت من حياتك وعشت حياتك معاها عادي وخلفت بنتك حور.

ابتسم أحمد عندما شعر بغيرة دلال وهذا دليل إنها بالفعل مازالت تعشقه كما كانت.

ولكن سرعان ما ضم حاجبيه واستطرد بحزن:

_ حبيبتي لاحظي إنك بتكلمي على إنسانة بين إيدين ربنا دلوقتي يعني ميجوزش عليها غير الرحمة.

وعشت حياتي إيه بس، أقسم لك بالله إن حور جت بقدر الله ويمكن ربنا أراد كده عشان تلف الأيام وتدخل كلية الطب هنا في ألمانيا وتكون سبب إني أشوفك بعد كل السنين دي.

دلال بغيرة قاتلة:

_ يعني إيه جت باللاسلكي يا شيخ؟

أحمد بضحك:

_ لا جت من دلال، لأن حضرتك لما سبتيني تعبت وكنت شبه عندي انهيار يا دلال ومكنتش حاسس بنفسي، ده غير السخونة اللي صابتني وكانت الله يرحمها جنبي وأنا مكنتش بردد غير اسمك ومش شايف غيرك لدرجة إني اعتقدت إنها أنت، ودي كانت المرة الأولى والأخيرة يا حبيبة القلب والروح.

وهجرتها بعد كده رغم إحساسي إني ظلمتها وهي معترضتش ولا طلبت مني أقرب لأنها عارفة ومتأكدة إني ليكي أنت وبس.

تنهدت دلال بارتياح واستطردت:

_ وأنا هقبل ده ومش هكلم فيه تاني لمجرد إن البنت فعلًا ملهاش ذنب وأنا حبيتها عشان روحها الحلوة وكمان فيها شبه كبير مني ومن منايا لكن آسر مش عارفة صراحة اتقبله.

أحمد:

_ عشان لسه مش عرفاه لكن مع الوقت هتعرفي قد إيه هو إنسان كويس وراجل بجد ويستاهل منايا.

ومتنسيش إن منايا مائلة ليه وتقدري تسأليها.

فقامت دلال بالنداء عليها فأسرعت إليها وقالت ببشاشة وجه:

_ نعمين يا ست الكل؟

ابتسمت دلال وأخبرتها أن آسر يريدها، فتوردت وجنتا منايا خجلًا وسرى في جسدها رعشة جميلة وقالت وهي تتجه للخارج مسرعة:

_ اللي تشوفيه يا دولي.

فحركت دلال شفتيها يمينًا ويسارًا واستطردت:

_ شوفي البت، يعني حضرتها فعلًا بتحبه.

هقول إيه أنا بعد كده.

ماشي يا أحمد عشان خاطر البنت، واللي فيه الخير يقدمه ربنا.

أغلق معها أحمد الخط، ليتجه إلى غرفة حور، فوجدها تحدث نفسها:

_ كل الحبايب اتنين اتنين وأنت يا قلبي حبيبك فين.

فضحك أحمد وصاح بقوله:

_ موجود ومستني منك الإشارة يا حوري.

انتبهت حور لصوت والدها فتوترت وتعرقت حرجًا وقالت بتلعثم:

_ بااابا أنا كنت بغني بس وبسلي نفسي.

حضرتك فهمت إيه بس وموجود إيه، أنا أصلًا زي ما قولت لحضرتك رافضة فكرة الارتباط خالص دي لغاية ما أخد الدكتوراة بإذن الله.

طالعها أحمد بمكر واستطرد:

_ طيب خالص براحتك يا عيون بابا.

أنا هكلم الباشمهندس سليم وأقوله: طلبك مرفوض يا باشمهندس وتقدر تشوف عروسة تانية.

فصاحت حور:

_ لا عروسة تانية إيه بس، استنى يا مولانا ده أنا بهزر معاك.

دكتوراة إيه بس، أنا مع مبدأ إن الست ملهاش غير جوزها وبيتها.

فقهقه أحمد وقال:

_ بقى كده يا ست حور.

يعني حضرتك موافقة إن سليم يكتب عليكي اليوم في حفل كتب الكتاب الجماعي أنا ودلال وآسر ومنايا.

فقامت حور بإطلاق زغرودة ثم كبرت:

_ الله أكبر في اللي هيشوفنا وميصليش على النبي.

توكل على الله يا مولانا وأهو يا بخت من وفق راسين في الحلال.

ضحك أحمد وأكد بسعادة:

_ آه طبعًا طبعًا.

وسبحان مغير الأحوال ده أنت مكنتيش بطيقه ولا تطيقي سيرته.

حور بخجل:

_ أشفقت على قلبه المحب يا مولانا.

أحمد:

_ بقى كده ماشي يا ست حور.

يلا اجهزي حالًا، عشان هنروح دلوقتي عند دلال ومنايا.

حور:

_ حالًا يا مولانا.

ثم اتجه إلى غرفة آسر وسمعه يحدث سليم عبر الهاتف:

_ ما تنطق يا رذل وقول بابا أحمد وافق على خطوبتي لمنايا ولا إيه؟

ليبتسم أحمد بمكر وصاح:

_ لا مش موافق يا عم آسر.

فوقف آسر مصدومًا بعد أن أغلق الخط في وجه سليم وقال:

_ بابا بس أناااااا.

نكمل بإذن الله في الخاتمة السعيدة لأبطالنا.