تحميل رواية «بين الحقيقة و السراب» PDF

بعد مرور ستة أشهر على تلك الأحداث.

في كلية التجارة، حيث يقف كل من رحيم وفريدة وجميل وراندا وزوجها وأبنائها ومالك وريم، يستمعون بفخر واعتزاز إلى مناظرة مريم أثناء مناقشتها للدكتوراة.

فهي بعد أن انتهت من دراستها، فورا أخذت الماجستير، ثم اجتهدت وسارعت الوقت، والآن تقف بكل اجتهاد تناقش رسالتها.

وما إن أنهت، حتى ارتخت على مقعدها تنتظر تقديرها من لجنة المناقشة. جلست بتوتر بالغ بان على معالم وجهها، ونظراتهم جميعاً متبسمين لها ويدعمونها بأنها ستحصل عليها بتقدير عال.

ثم انتبهوا جميعاً إلى الدكتور المسؤول عن رسالتها يردد:

"لقد تم منح الطالبة مريم عماد شهادة الدكتوراة بتقدير امتياز مع مرتبة الشرف الأولى."

صفق الجميع مهللين ومباركين لتلك اليتيمة التي حصلت على الدكتوراة بتلك المرتبة العالية. هرول إليها رحيم مسرعاً قبل أن يصل إليها الجميع، وجذبها إلى أحضانه وهو يرفعها أعلى ويدور بها في المكان بفرحة عارمة. ثم أنزلها وقبلها من جبهتها مردداً أمام الجميع بفخر:

"ألف مليون مبروك يا أجمل وأصغر دكتورة، تستحقيها يا قلبي وعن جدارة. أنا مبسوط بيكي جدا والفرحة مش سيعاني وأخيراً هنتجوز ونلم شملنا بقى كفاية لحد كدة."

وصل إليهم جميل وجميعهم، فتحدث جميل بعيون لامعة من شدة سعادته بها:

"مبروك يا أجمل دكتورة مريم، أنا بجد فخور بيكي يابنتى، فرحتى قلبي إنك قدرتي تتحدي المستحيل وتبقي الدكتورة مريم عماد."

أما فريدة، فأخذتها بين أحضانها بحنان أم. ففي الفترة الأخيرة، اقتربت منها بشدة وصاروا في كل كبيرة وصغيرة لا يفارقون بعضهم. فقد أحبتها أكثر من بناتها، وألّمت حالها كثيراً على رأيها وازعاجها لتلك اليتيمة قبل ذلك، مرددة بحنان أم نابع من قلبها بصدق:

"مبروك يا مريومة، الف مبروك يا حبيبتي، أنا بجد سعيدة قوي بيكي النهاردة يا قلب ماما. ربنا يفرح قلبك ودايما من نجاح لنجاح يارب."

بادلتها مريم الأحضان بترحاب شديد، فقد تعلقت بها بشدة وأحست منها حنان الأم كما يجب أن يكون، وهي تشكرها بامتنان على وقوفها بجانبها:

"ربنا يخليكي ليا يا أمي، منحرمش منك ابدا. إنتي ليكي نصيب في نجاحي واني وصلت للدرجة دي بفضل ربنا أولا، ثم تعبك ووقفتك جنبي. وعمرك ما بخلتي عليا بوقتك ولا مجهودك ولا حنانك، وكنتي دايما دعم كبير ليا. عمري ما هقدر أوفيكي حقك يا امي."

شددت فريدة من احتضانها وهي تلومها:

"مفيش شكر بين الأم وبنتها يا قلبي، ونجاحك ده كأنه نجاحي بالظبط."

وبارك لها الجميع بقلب سعيد لتلك المريم. وبعد مدة، خرجوا جميعاً وعادوا إلى منزل جميل، فهو قام بعزيمتهم على العشاء في جو أسري فرحت به مريم بشدة.

انقضى أسبوعان على تلك الأحداث، واليوم موعد زفاف مريم على رحيم في أكبر قاعة من قاعات الإسكندرية. وصل إليها رحيم بسيارته إلى صالون التجميل كي يذهبوا إلى حفل زفافهم.

عندما رآها وهي بفستان زفافها، أحس بالفخر بذاته أنه يمتلك تلك الرقيقة وأنها زوجته، وأنه استطاع أن ينالها رغم كل الظروف المحاطة بهم. وصل إليها وأخذها بين أحضانه وشدد عليه بقوة، وكأنه أخيراً انتهى من معركة الوصول إليها.

وبدورها، شددت على احتضانه وهي تنظر أعلى، تحمد ربها على عطاياه لها. انطلق بها إلى القاعة المقام بها حفل الزفاف، وبدأت مراسم الحفل بعد أن بارك لها الجميع، وكانوا مبهورين بجمالها الملائكي.

والآن، انطلق منظم الحفل يعلن عن رقصة العروسين الأولى. التقط كف يداها وسحبها إلى ساحة الرقص، وهو يتسارع بخطواته حتى وصلا واستقرت بأحضانه. حاوطت رقبته بيداها الصغيرتين، وكل منهم ينظر للآخر بحب وسعادة تكفي العالم أجمع.

وانطلقت الأغنية التي انتقاها رحيم خصيصاً لأجلها:

"أيوه بسببك قادر أكمل، وقت ما بتعب ليكي بروح، لما ببان الدنيا تقفل حضنك آخر باب مفتوح، ياللي عيونك وقت ما بغرق بالنسبة لي دي مركب نوح، إنتي الحتة الحلوة في قلبي، ببقى في قربك مش قلقان، إنتي حبيبتي وأمي وبنتي ومليش بعدك تاني مكان، حبيبتيني في أيام عمري رجعتيني لنفسي زمان."

كان ينظر إلى عينها بعشق جارف وتحدث بهيام وهما يستمعان إلى الأغنية ويؤديان رقصتهما بتناغم يليق بهم:

"الأغنية دي أنا مختارها ليكي وقاصد كل كلمة فيها وبهديها لك من كل قلبي ياقلبي."

ابتسمت له بعينين عاشقتين ورمشت بأهدابها دليلاً على تفاعلها مع حالة الوله التي يعيشونها. واستمعت إلى باقي كلمات الأغنية بقلب يدق فرحاً:

"إحساسي بيكي لو قلت ليكي ميتحكيش، جيتي وبقيتي أهلي وبيتي لو يوم مشيتي إزاي هعيش، عمرك لحظه ما نزلتيني لأ بالعكس أنا بيكي عليت، ولا بعتيني ولا خذلتيني وبتديني أكتر ما إديت، قبل ما بندهلك بتجيني ضهري وسندي لو إتهزيت، نصي التاني إللي بيفهمني قبلك عمري ماهوش محسوب، حبك هو إللي مكملني من نقصي ومن أي عيوب، وسط حياة مليانة حروب، وأنا بين ايديكي إحساسي بيكي لو قلت ليكي آه مابينتهيش، جيتي وبقيتي أهلي وبيتيلو يوم مشيتي إزاي هعيش."

انتهت الأغنية، ثم حملها ودار بها في المكان تحت سعادة المعزومين، وهللوا جميعاً مصفقين لذاك الثنائي الخاطف للأنفاس. بعد ساعتين، انتهى حفل الزفاف وانطلق رحيم ومريم إلى عشهما السعيد.

ما إن وصل بها إلى بيتهم، حتى حملها وانطلق بها مسرعاً إلى الداخل. دلفا إلى شقتهم بنفس راضية مطمئنة. فتحدث رحيم وهو مازال حاملاً لها ويداعب أرنبة أنفها:

"نورتي بيتك ياعروستي، لااااا ده إنتي نورتي قلبي ودنيتي ياأجمل روما في الكون كله."

أنهى كلماته واختطف قبلة سريعة من شفتيها، ثم أنزلها وحاوط خصرها بكلتا يديه مكملاً:

"أنا سعيد قوي إننا اخيرا ربنا جمعنا مع بعض، يا ترى إنتي كمان حاسة بنفس الفرحة اللي أنا حاسس بيها ولا أنا مزودها شوية؟"

أجابته بعشق مماثل وهي تحاوط رقبته بيداها:

"أنا كمان مبسوطة قوي ومش مصدقة إن ربنا عوضني بيك بعد سنين العذاب اللي انا عشتها، مكنتش متخيلة إن أنا هيطلع نصيبي من الدنيا انت يا رحيم."

قطب جبينه وتحدث باعتراض:

"ليه ما تصدقيش يا مريم؟ انتي جميلة وأخلاقك راقية وكل حاجة فيكي بتدل على رقيك وتدينك وجمالك من بره وجوه. ليه شايفه نفسك قليلة كده؟"

وتابع بحب:

"إنتي أجمل حاجة حصلت لي في حياتى، أنا معرفتش معنى الحب إلا معاكى."

وظلا ينظران بوله لبعضهما من سحر اللحظة، ثم بدأ يخلع عنها حجابها. وما إن رأى خصلاتها الغجرية تهبط على وجهها، حتى حبست أنفاسه من روعة جمالها. وانطلق بها إلى رحلة العاشقين كي يسقيها من حبه وعشقه الشديد لها.

***

في منزل زاهر الجمال، حيث تجلس هند مع صديقتها نور، والتي كانت طريق النور لها. فتحدثت هند بقلب موجوع على ما حدث لزوجها:

"حالته صعبة خالص من ساعة الحريق اللي حصل. وهو زهق من كتر عمليات التجميل اللي عملها لنفسه هو وامه ومستكتر على نفسه إن هو يبقى شكله متشوه كده. أي نعم العمليات دي فرقت مع شكله كتير، لكن بقى زهقه وعصبيته وحالته حاله ومبقاش طايق نفسه."

مطت صديقتها شفتيها بامتعاض واردفت:

"والله لازم يرضى بنصيبه. اهي الفلوس اللي اخذها من اليتامى ما نفعتهوش بحاجة وبرده لحد دلوقتي ما رجعلهمش حقهم وهيفضل كده طول عمره يصرفهم على المرض وربنا هيطلعه من بلوة هيوقعه في مصيبة."

تحدثت هند بعيون تلمع دمعاً:

"انتي مش متخيلة انا خلصت كلام معاكي ونزلت وأول ما خرجت من البيت حصل لهم اللي حصل. شفتي تدابير ربنا أنا وبناتي ما نكونش موجودين في البيت."

وتابعت برضا عن نفسها:

"من ساعة ما ربنا شفاه شوية، وأنا واخته عمالين يتحايل عليه يرجع مال اليتيم وهو مش راضي. هو حر، أنا أخليت ذنبي قدام ربنا وعملت اللي عليا."

ربتت نور على ظهرها واردفت بتشجيع:

"انتي ما تعرفيش إن ربنا سبحانه وتعالى بيخزن عنده كل حاجة. فالإنسان لما بيعمل خير بيتحفظ عند ربنا وبيفاديه بسبب الخير ده من حاجات كتير، ومن أهم الحاجات اللي ربنا فداكي إنتي وبناتك بيها إنك مشهدتيش زور، وإنك تقبلتي مني أي نصيحة بقولها لك لوجه ربنا ولحد دلوقتي بتتقبلي وبعدتي نفسك عن أي مشاكل. فكملي في طريقك وإن شاء الله هيسترها معاكي إنتي وبناتك."

احتضنتها هند وهي تحمد ربها داخلها على تلك الصديقة الصادقة، واردفت بامتنان:

"بجد يانور انتى اسم على مسمى، كنتى شعاع النور وسط ضلمتي."

وها هو الصديق الصادق الذي قال الله سبحانه وتعالى عنه في كتابه العزيز، "الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ".

أما في شقة اعتماد، فهي تنام على التخت لا حول لها ولا قوة، وآثار الحروق نظراً لسنها الكبير تملأ وجهها وجسدها بشراهة. فتحدثت ابنتها بصبر قد سئمت منه:

"يا أمي كفاية لحد كده وخلي زاهر يرجع لريم وولادها حقهم. انتي مش حمل عقاب ربنا سبحانه وتعالى لما تقابليه، والعمر ما بقاش فيه بقية. كلمي زاهر وخليه يتنازل عن الميراث بتاع ولاد اخوه وخليه يبدأ صفحة جديدة عشان عنده بنات وكفاية اللي حصل قوي لحد كده. الله يسهل لها، هي بعدت وما بتأذيش حد ولا عمرها أصلا كانت بتأذي حد."

وظلت ابنتها تلقي عليها ارشاداتها ووعظها، إلى أن جعلتها هاتفت زاهر وأمرته أن يتنازل لريم واولادهم عن حقهم في ميراث زوجها، وأصرت عليه أن يفعل ذلك إجباراً.

أما زاهر، فعل ما طلبته منه والدته رغماً عنه، فكتب عليه أن يكون من القاسية قلوبهم، وما أكثر هؤلاء الذين يعيشون بقلب غليظ، وهؤلاء الذين قال الله عنهم "فويلٌ للقاسيةِ قلوبِهم".

***

في مجموعة مالك الجوهري، يجلس هو وزوجته ريم، مردداً لها بتشجيع:

"اهدى يا حبيبي ما تقلقيش، إن شاء الله هتفوزي في المسابقة وهتاخدي اللقب عن جدارة. ومين أصلا يقدر ينافس ريما ستور ولا ياخد منها اللقب."

كانت تفرك يدها بتوتر وتحدثت بملامح قلقة:

"انت ما تتصورش اللي انا داخلة قصادهم عاملين ازاي. دول قدام جداً وليهم اسم وصيت من سنين، وخاصة اللي بتاخدها كل سنة دي غول تصميم ومحدش قدر ينافسها."

قام من مكانه وجلس مقابلتها وأمسكها من يدها واحتواهم بين يديه كي يشعرها بالأمان وتحدث بفخر:

"هو انتي مستهونة بنفسك كده ليه! ده انتي صاحبة ماركة ريما ستور اللي كسرت الشرق والغرب بتصميماتها، وهي مش ظاهرة أصلاً. وانتي في السنة دي عملتي ضجة كبيرة في عالم التصميمات. ولازم يبقى عندك ثقة في نفسك وفي ربنا أولاً إنك هتاخدي اللقب لأنك تستحقيه عن جداره ياحبيبتي."

وتابع بعيون تطمئنها بتأكيد:

"وبعدين اللي إنتي بتتكلمي عنهم دول موجودين في السوق بقى لهم كتير. لو إنتي كنتي خرجتي للشغل وسوق العمل من زمان كان زمانك اكتسحتيهم، وخاصة إن هما عندهم معارض بتخدم تصميماتهم. شوفي انتي بقى في سنة واحدة خرجتي فيها عملتي ايه، وانتي كنتي مكونة اسمك وماركتك وانتي مش ظاهرة. فعلشان كده تأكدي إن ريما ستور هي غول التصميم مش حد غيرها."

وظل يطمئنها إلى أن أتى موعد المسابقة، فتأبطت ذراعيه وانطلقا إلى وجهتهم. وصلوا المكان، وجدوه ممتلئاً بالزائرين. انتقى لها مقعداً بعيداً عن الاستدج وجلسوا، وظل يهدئها وهو ممسكاً بيدها، مردداً بعيون تلتمع فخراً:

"ممكن نهدى بقى خلاص، فاضل ربع ساعة والمسابقة تبتدي ولجنة التحكيم دلوقتي دخلت أهي. نركز بقى علشان تتعلمي من كل حاجة بتشوفيها وتأكدي سواء أخدتي اللقب او ما أخدتيهوش، إنتي حاجة كبيرة قوي وليكي مستقبل باهر في التصميم. لازم تكوني متأكده من كده."

شكرته بعيناها بامتنان لوقوفه جانبها. وبعد دقائق، ابتدأت مراسم المسابقة، وخرجت عارضات الأزياء تؤدين العرض بمهارة، وكل العيون مثبتة عليهم. وبعد ان انتهوا من تقديم جميع العروض الخاصة بالمتسابقات، جاء دور لجنة التحكيم، وانطلق كل منهم رافعاً لوحته برقم التصميم الذي ابدى اعجابهم بشدة. والجميع في حالة توتر شديدة، وكل ينتظر النتيجة.

وها هم يعلنون عنها، وها هي تفوز ريما ستور بصاحبة أفضل مصممة على مستوى الشرق الأوسط. وأعلنت مذيعة العرض:

"صاحبة ماركة ريما ستور هي الفائزة بالمسابقة. تتفضل تطلع تستلم جايزتها."

ثم نطقت اسمها وهي تنظر إلى المدعوين:

"المصممة ريم جميل المالكي."

وضعت يدها على وجهها تمنع دموع عينيها اثر الفرحة. احتضنها مالك أمام الجميع وهو يبارك لها بكل اعتزاز وحب بنجاحها:

"الف مليون مبروك يا قلبي، مش انا قلت لك تستحقيها وبجدارة. اصلا إنتي قعدتي شهرين كاملين تتعبي على الفكرة علشان ما تعمليش حاجة تشبه حد، وفي الآخر ربنا قدر تعبك ومضيعهوش. يلا بسرعة علشان تستلمي جايزتك، وأنا هنا بشجعك بقلبي وبروحي وكل كياني."

شكرته بعينيها بامتنان وصعدت، وقامت بالتسليم على لجنة التحكيم الذين هنؤوها، ثم استلمت جائزتها وادلت بالشكر للجنة التحكيم والقائمين على المسابقة. ووقفت أمام الجميع الذين يصفقون لها بسعادة، وهي تمسك الدرع بسعادة عارمة. ثم عادت إلى مكانها، ووجدت الإعلاميين يتهافتون عليها كي يسجلوا لقاءً حصرياً مع صاحبة أحسن مصممة على مستوى الشرق الأوسط، ريم المالكي.

***

بعد مرور سنة من الآن، كانت مريم وضعت جنينها الأول من رحيم منذ شهران، والذي يعتبر نسخة مطابقة من والدته. فكان جميل سعيداً بحفيده من ولده سعادة غامرة، وعلى نفس سعادته كانت فريدة تحمل الصبي على فخذيها وهي تنظر إليه وتهدهده بحب وكأنه حفيدها الأول.

فتحدث جميل وهو يطلب من فريدة أن تعطيه الصبي:

"ناوليني يا جميل الصغير، لما أحضنه وألعب معاه شوية حبيب جدوا."

جذبته إلي أحضانها وتمنعت أن تعطيه الصبي مردفة برفض:

"لااااا أنا لسه مشبعتش منه حبيب تيتا انسى. شوية كدة وهديه لك."

انزعج جميل من رفضها وأردف بنبرة حزن مصطنعة وعلامات وجه منزعجة:

"لاااا كدة مينفعش، إنتي كدة ظالمة يافريدة، كل لما تشوفيه تفضلي متبتة فيه ومش عايزة تسبيه وكأنه حفيدك لوحدك."

ابتسم كل من رحيم ومريم على مشاغبتهما اليومية. وتحدث رحيم وهو يمد يده لوالدته يطلب منها جميل:

"بعد إذنك ياماما اديه لبابا يبوسه ويحضنه علشان احنا عايزين نروح مشوارنا."

وتابع كلماته وهو ينظر في ساعته:

"لااااا ده إحنا قدامنا مشوارين مش مشوار واحد."

ناولته فريدة الصبي وهي تردد بانزعاج:

"بردوا مصممين تروحوا مشاويركم دي، أنا مش مرتاحة."

وعلى رأيها تحدث جميل:

"وأنا بردوا يابني مش عايزكم تروحوا، وخاصة بالولد."

واستطرد حديثه وهو ينظر إلى مريم:

"ليه يابنتي مصممة تروحي وكمان تاخدي ابنك معاكم؟ كبرى دماغك وانسى وارمى اللي فات ورا ضهرك، هو أصلاً مات."

بتصميم شديد أردفت:

"معلش يا بابا أنا مصممة أروح المشوار ده، نفسي بجد أعمل كدة. وبعدين متقلقش عليا إحنا هنبقى في الأمان."

وجدوا منهم تصميم شديد، فتحدثت فريدة:

"طيب خالو بالكم من الولد أووي وتروحوا وترجعوا بالسلامة وهكلمكم علطول تردوا علشان هفضل قلقانة عليكم لحد ما ترجعوا."

ودعوهم وانطلقوا إلى وجهتهم. فتحدث رحيم باستفسار:

"نروح دار الأيتام الأول ولا المشوار التاني؟"

نظرت أمامها بشرود وأردفت:

"خلينا المشوار التاني الأول وبعدين نختم بالدار علشان يبقى ختامه مسك."

ربت على فخذيها بحنان وتحدث:

"أنا والله العظيم رايح معاكي علشان خاطرك إنتي، ولولا اني مينفعش أبين رفضي قدام بابا وماما كنت منعت إننا نروح."

واستطرد بعيون لامعة بعشقها:

"لكن أنا وعدتك إني هفضل معاكي وهسندك وعمري ماهتخلى عنك في أي موقف مهما كان."

ابتسمت لذاك الزوج البار بها والذي يمتلك قلباً عاشقاً لها منذ بداية معرفتها به. ورددت بقلب ينفطر وجعاً:

"لازم أروح يارحيم علشان أبقى مرتاحة، لازم أثبت لها إنها خسرت وأنا اللي كسبت. ومش شماتة لاسمح الله، لاااا ده قلبي وأيامي اللي اتدمروا بسببها أيام وشهور، لازم أحسسها إنها جريت ورا سراب وأنا دلوقتي اللي بقيت حقيقة."

وظلا يتحدثان إلى أن وصلا بعد مدة إلى سجن القناطر. دلفا إلى الداخل، تحمل ولدها بين أحضانها وهي في قمة شياكتها، حيث كانت ترتدي فستاناً باللون الأحمر ويزينه حجاب باللون الأبيض وترتدي نظارة شمسية، فحقا كانت أنيقة وملفتة للأنظار. وبجوارها رحيم زوجها بحلته الأنيقة، فحقاً كأنه نجم سينمائي، فكانت تليق الأناقة به، وواضعاً يده بتملك على كتف زوجته.

وصلا إلى مكان تلك المى في حجرة الزيارات، ووجدواها تجلس وفي يدها سيجارتها تنفس دخانها بشراهة، وشكلها المشعث واضحاً للأعين. وصلوا أمامها وألقوا عليها السلام. وللعجب، لم تعرف مريم. فتحدثت باستغراب:

"مين انتي ياهانم؟"

أعطت مريم ابنها لرحيم، ثم خلعت نظارتها وأردفت بنبرة شامخة:

"أكيد عرفتيني دلوقتي، ولا أعرفك بنفسي. أنا الدكتورة مريم عماد، وده جوزي الدكتور رحيم المالكي. وده ابننا جميل ثمرة الحب الحلال. ها افتكرتيني."

شهقت بصدمة وهي تنظر لها بانبهار ورددت بغل:

"والله أهلاً وسهلاً. تصدقي لايق عليكى النضافة ياتربية الملاجئ."

لم تقدر على أن تثير مشاعر الغضب داخلها ولا أن تعكر صفو مزاجها. وأردفت بقامة مرفوعة:

"فعلاً تربية ملاجئ وأفتخر. وبصراحة ليا حق أفتخر بنفسي وأبص لفوق أوووي لأني بقيت زي مانتي انبهرتي كدة أول ماشفتيني. حاجة راقية محترمة واتجوزت جوازة راقية تليق بيا."

واسترسلت دفاعها عن مشوار عمر عانت فيه كثيراً:

"أنا جاية النهاردة أثبت لك إنك وانتي في عز قوتك مقدرتيش تدخليني طريق السراب والضياع وأنا كنت في عز ضعفي ومستسلمتش ليكي وسلمت أمري لربنا. ولو كنتي حطيتي السكينة على رقبتي أو حتى عملتي فيا إيه باللذي، عمري ما كنت هبقى زيك أبداً. والأدوار اتبدلت وبقيت أنا في عز القوة وإنتي في عز الضعف، وياريتك توبتي."

نفثت الأخرى دخان سيجارتها في وجهها لكي تشعرها أنها لا تبالي. والحق يقال أن داخلها يغلي. وتحدثت بدم بارد تعودت عليه:

"مين قال كدة ياحلوة، دول كلهم كذا سنة وهخرج أتمتع بالملايين اللي معايا وهبقى زيي زيك بالظبط مفيش فرق. الفلوس بتلمع أي حد ومبيفرقش في مجتمعنا ده كل الهبل اللي انتي جاية تغظيني بيه، من الأخر الدنيا ماشية معاك قرش تساوى قرش."

ضحكت مريم على هرائها وهتفت باستفزاز لها كي تفيق:

"بصي حواليكي حبيبتي وإنتي هتعرفي وانتي خارجة من هنا هيتكتب في سجلك خريجة سجون."

تحدث رحيم إلى مريم:

"بقول لك ايه ياحبيبي مش كفاية ضيعتي من وقتك الثمين مع دي، يالا الندوة خلاص اتنظمت وابتدت ومستنينا وكمان المكان هنا مش لطيف وريحته مش حلوة هيزعج جميل."

ابتسمت إليه وهتفت بموافقة:

"تمام ياحبيبي عندك حق يلا نمشي."

ثم ضربت بيدها على جبينها كعلامة للتذكر:

"أه صحيح نسيت أقول لك ياميوشة اني عندي دلوقتي رصيد في البنك وفلوس كتييير أووووي بشغلي الحلال وبمجهودي يعني من ناحية المادة والفلوس اللي بتتكلمي بيها أنا بقيت غنية بس وأنا نضيفة، باااااااااى."

أنهت كلماتها وانطلقت من أمامها وهي ترتدي نظارتها وتتأبط ذراع زوجها برأس مرفوعة، وخرجت من ذاك المكان وهي الآن في قمة راحتها النفسية. فكم حلمت كثيراً بتلك المقابلة كد تردم جرح قديم مازال دامياً في قلبها، والآن قد شفي. وهي تحادث حالها:

"أنا تِلْكَ المريمُ التى سَافرْتُ رحلة آلامِى حتَّى اسْتَقرَّ أَمانِى. أنا تِلْكَ الطُّفُولةُ التَّى لمْ أحترفُ معانِيها فهماً ولمْ أحيا كلماتِها طيلةَ زمانِى. أنا تلك السِّنِين التِّى قاوَمَتْ كى تَصِل إلى مُنْتَهى نجاحِها بِكُلِّ كفاحٍ وعزمٍ كعَزمِ الجِبالِ، وها أَناَ ذا بِفَضْلِ ربِّي وصَلْتُ إليهِ وشَعُرتُ براحةٍ داخل أوَطانِى."

وصلوا إلى دار الأيتام وبنفس دلوفهم وبنفس الشموخ تدللوا بخطواتهم إلى الدار، ولكن بمنتهى التواضع. ودلفت وهي تنظر إلى كل ركن في الدار بقلب يدق اشتياقاً، فهي لم تخذل يوماً من أنها تربية ذاك الملجأ. كانت تنظر إلى المكان الذي آواها عمراً بأكمله بكل فخر واعتزاز.

بعد أن سلمت على كل أخواتها في الملجأ باشتياق جارف، جلست تستمع إلى مديرة الملجأ في تلك الندوة المقامة. والآن جاء دورها في الصعود كي تلقي كلمتها. نظر إليها رحيم بتشجيع وصعدت. أمسكت مكبر الصوت وتحدثت بعفوية:

"أنا مريم عماد. كتير منكم يعرفني وكثير ميعرفونيش، لكن هحكي لكم حكايتي باختصار. أنا اتربيت هنا زيكم من وأنا طفلة صغيرة وبفتخر إني اتربيت هنا. اتعرضت لمواقف كانت ممكن تدمرني، لكن قاومت وعافرت واتحديت الظروف وكنت أقوى منها وعمري ماسمحت لها تهزمني رغم صعوبتها ورغم إنها كانت بالنسبة لي موت بالحياة. أنا جاية النهاردة أقول لكم انتو أحسن من ناس كتير ولازم تشوفوا الحلو اللي حواليكم ومتيأسوش من رحمة ربنا وتأكدوا دايماً إن الاعتماد على ربنا سبحانه وتعالى هو اللي هيوصلكم لطريق النجاح اللي وصلني ليه أنا من مريم عماد مجرد بنت عادية فقيرة تربية الملجأ للدكتورة مريم، واللي بردوا بقت زوجة وأم لطفل وبفضل الله عايشة مستقرة. فماتيأسوش وتأكدوا إن رب الناس رب قلوب."

صفق الجميع كلماتها الرائعة حينما رأوا أثر الدموع في عينيها. ثم طلبت منها المديرة وبعض زميلاتها:

"غني يامريم، غني يامريم صوتك وحشنا."

نظر رحيم حوله وجد جميع الموجودين نساء، فأشار إليها أن توافق. ابتسمت بامتنان له، فهي تود أن تغني. ثم اشتغلت الموسيقى وقررت أن تغني:

"هنعيش ونشوف معاناة وظروف، والفرحة حترجع من تاني والدنيا هتبقى مصالحاني حالنا بيتغير في ثواني وفي غمضة عين، في سباق ماشيين وفراق وحنين. الشدة تملّي تقوّينا وتبين مين قلبه علينا. على حس الأمل اللي مالينا عايشين راضيين.

ده ياما حكايات أولها ناس بتنسى وآخرها حب لقيناه عوضنا ع اللي عشناه. وياما حكايات خلت حياتنا أحلى والصعب ياما عدّى وتَعبنا كله نسيناه.

في طريق مقفول أول ما نقول يا رب بتفرج في دقيقة وتروح الأوجاع والضيقة. لو سألوا مجرب دي حقيقة مين عاش مهموم. محروق، حتروق والناس حتدوق طعم الأيام وأحلى ليالي وسعادة ما خطرتش في بالي. يوم في النازل يوم في العالي ولا شيئ بيدوم.

ده ياما حكايات أولها ناس بتنسى وآخرها حب لقيناه عوضنا ع اللي عشناه. (وياما حكايات) حكايات خلت حياتنا أحلى والصعب ياما عدّى وتَعبنا كله نسيناه.

إحساس جوّاك تلاقيه قوّاك وتقوم على رجلك من تاني وتقولها لنفسك ده زماني ده أنا ياما إيماني ده قواني وبقيت في ذهول. أيام ورهان على مين كسبان والشاطر هو اللي يعافر ما يقولش تعبت ومش قادر. أصل اللي بيصبر للآخر على طول بينول.

ده ياما حكايات أولها ناس بتنسى وآخرها حب لقيناه عوضنا ع اللي عشناه. وياما حكايات خلت حياتنا أحلى والصعب ياما عدّى وتَعبنا كله نسيناه."

أنهت كلمات الأغنية ونزلت بكل تواضع وسلمت عليهم جميعاً وأعطتهم هداياهم التي مكثت تجهز فيهم أسبوعان بأكملهما، وجلست معهم عدة ساعات، ثم غادرت الدار وهي تنظر إليها بوحشة، فذاك المكان هو طفولتها وشبابها وعمرها.

***

ومرت الأيام. وفي إحدى لياليهم، قامت ريم بعزيمة والدها ووالدتها وأخواتها بأولادهم. أما عبير، رفضت بذوق نظراً لتطور مرض هيام الشديد. وبعد مجيئهم وتناولهم وجبة العشاء، قامت ريم وتحدثت بعيون سعيدة:

"أتنشن بليز كله ينتبه معايا، عندي مفاجأة حلوة جداً ليكم ولذلك عزمتكم النهاردة."

انتبهوا جميعاً إليها. ثم ساقتها قدماها إلى ذاك المالك لروحها وقلبها، فحقا كان زوجاً بارعاً وعوض الأيام. جذبته من يداه، ووضعتها على بطنها وهي تنظر داخل عيناه قائلة:

"مبروووك هتبقى أحلى بابى في الدنيا بحالها."

اتسعت عيناه باندهاش، ولسانه غير قادر على النطق من أثر مفاجأتها الغير متوقعة. فهو متزوجها منذ أكثر من سنة ونصف وكان قد فقد الأمل، لكن الآن هي فجرت ذاك الخبر. لاحظت ذهوله وأنه لم يصدق، فتابعت وهي تشير برأسها بعين لامعة بدموع الفرح:

"أيوه والله أنا حامل يامالك زي مابقولك كدة، ومحبتش أتكلم إلا لما تم الشهرين واتأكدت."

أخيراً استوعب مفاجأتها وأردف وهو يبتلع أنفاسه بصعوبة:

"بجد ياريما ربنا جبرني وهيبقى لي ابن من صلبى."

"بجد ياقلب ريما وعمرها كله."

"أنا مش مصدق نفسي إن بعد السنين دي كلها أخيرا حلمي هيتحقق."

"ليه يا قلبي ربنا كبيير وانت طيب وقلبك جميييييل زي أخلاقك، فأكيد ربنا كان لازم يجبرك."

"عارفة أنا بحمد ربنا إنه خلى ولادي منك انتي وكأني كنت بعافر السنين اللي فاتت علشان أوصل لك انتي، علشان تبقى الحب الكبير اللي قلبي يستحقه."

"تدابير ربنا كلها خير لعباده ومهما نشوف إن طريقنا ضلمة وعواصف في الأخر بعد الصبر هنلاقي إن بعد الضلمة نور مفرح ومبهج هيعوض الضلام اللي فكرنا نفسنا هنفضل عايشين فيه."

أمسكها من يداها وأدارها بلهفة:

"أنا عايز بنوتة تكون شبهك كدة."

أدارته بكلتا يداها وهى تردد بنفس اللهفة والحب:

"أي نطفة منك جوايا وتطلع للدنيا هتبقي بالنسبة لي زي نور عيني."

"بحبببببببك ياريما."

"وأنا بعشقك ياقلب ريما."

وأخذها بين أحضانه، حضن الأمان والسلام والاطمئنان، حضن الحياة والروح التي رُدَّت لها بعد الفقدان. بارك لهما الجميع بفرحة عارمة، وجلسوا جلسة عائلية يتسامرون بكل الحب والود والرحمة والألفة. البحر من أمامهم ونجوم السماء تضوي من فوقهم، وهم يستمعون إلى كلمات كوكب الشرق:

"طول عمري بخاف من الحب وسيرة الحب وظلم الحب لكل اصحابه. طول عمري بخاف من الحب وسيرة الحب، وأعرف حكايات مليانة آهات ودموع وأنين، والعاشقين دابوا ما تابوا، دابوا ما تابوا. طول عمري بقول لا أنا قد الشوق وليالي الشوق، لا أنا قد الشوق وليالي الشوق ولا قلبي قد عذابه، عذابه. وقابلتك إنت لقيتك بتغير كل حياتي. ما عرفش إزاي حبيتك، ما عرفش إزاي يا حياتي. من همسة حب لقيتني بحب لقيتني بحب وأدوب في الحب وأدوب في الحب وصبح وليل، وليل على بابه. فمن عمري سنين وسنين شفت كتير، كتير وقليل عاشقين. اللي بيشكي حاله لحاله واللي بيبكي على مواله. أهل الحب صحيح مساكين، صحيح مساكين."