عمي هنروح فين.
عمي بابتسامه: مفاجاه.
صحيت تاني يوم على صوت عمي وهو شايل تميمة وبيطبطب عليها.
مالك يا حبيبتي بتعيطي ليه.
هو.
عمي اتكلم بضحك: قومي يا سما شوفي بنتك مش عارف أتعامل معاها.
اتكلمت بضحك: ليه بس يا حبيبي مالها.
عمي بضحك: مش عارف.
أخدت تميمة من عمي وحضنتها وعملتلها اللبن وشربتها وفضلت أهز فيها وهي في حضني.
عمي بحنان: يلا يا حبيبتي علشان هنمشي.
أدي تميمة لمرات عمك هي هتخليها معاها لحد ما نرجع.
ليه يا عمي أنا مش هسيبها وهخدها معايا.
وحضنتها عليا جامد.
عمي بابتسامه: اللي يريحك يا حبيبتي.
أهم حاجة تكوني مبسوطة.
ماشيت أنا وعمي وركبنا العربية.
وطول الطريق وهو ساكت وكل ما أسأله يقولي مفاجأة.
بعد مدة وصلنا اسكندرية من تاني حسيت قلبي اتقبض.
اتكلمت بخوف: عمي.
عمي بحنان: نعم يا حبيبتي.
إحنا هنا بنعمل إيه.
ومسكت إيده جامد.
عمي بحنان طبطب على إيدي: إحنا هنا علشان هعوضك عن العشر سنين أولاً يا ست البنات هعملك كل الحاجات اللي كنتي بتحلمي بيها قبل ما تتجوزي.
هنتفسح ونشتري حاجات كتير ونجري على البحر وناكل آيس كريم واحنا قدام البحر وتقصي شعرك قصير وترجعي كأن السنين ما مرتش عليكي عايز أرجع بيكي البيت من غير ولا ندبة في قلبي.
دموعي نزلت غصب عني وحضنت عمي.
لسه فاكر كل كلمة قولتها.
هتعملي إيه في اسكندرية يا سما ما تخليكي معانا هنا هكون مطمن عليكي أكتر.
اتكلمت بكل سعادة الدنيا: يااااه يا عمي قول مش هعمل إيه.
أول ما أوصل هاكل على أقرب عربية فول تقابلني وبعدين هروح على البحر وأنزل فيه بهدومي وكان المياه بتحضني.
بتضحكي على إيه مش هكمل.
عمي بضحك: خلاص هبطل ضحك كملي علشان خاطري.
حاضر يا حبيبي بس لو ضحكت تاني.
عمي بابتسامه: أوششش مش هضحك.
وبعدين هروح أشتري حاجات كتير اللي محتاجة واللي لا.
واقص شعري لحد كتفي مع لونه البني هيبقي تحفة.
كملت كلام بضحك: وكمان يا سيدي أنا حلوة أي حاجة هتبقى جميلة عليا ولا إيه رأيك.
عمي بضحك: أكيد هو كان يطول يتجوز سما القمر.
إنتي السما اللي بتنور حياتنا وهتسيبنا وتنوري حياة الواد حاتم ابن المحظوظة.
اتكلمت بكسوف: بس بقي يا عمي بتكسف.
عمي بضحك: خلاص هسكت كملي.
ضحكت أكتر.
وبعدين ناكل آيس كريم واحنا قاعدين قدام البحر.
ونفضل نجري على البحر لحد ما أحس إن رجلي مش على الأرض لا في الأحلام.
أحلام كلها أنا وحبيبي والمياه.
عمي بحنان: قد كده بتحبي حاتم.
اتكلمت بشرود: بحبه بس بعد كده هحبه أكتر.
وكملت بضحك: بس بقي يا سيدي.
تعالي أم أقولك على سر.
عمي قرب مني باهتمام.
قربت منه وبوسته على خده وجريت.
ضحكت عليك.
عمي بحنان طبطب عليه: روحتي فين يا حبيبتي.
اتكلمت بهدوء: معاك بس بحمد ربنا في كل ثانية على نعمة وجودك في حياتي.
حضني: ربنا يخليكي ليا.
ويخليك ليا.
نزلت أنا وعمي من العربية بعد ما وقف قدام عربية فول.
اتكلمت بضحك: تضرب واحد فول يا حاج.
عمي بضحك: تلاتة.
وقفنا ناكل على العربية وبعدين وصلنا قدام البحر وعمي شال تميمة وأنا نزلت بهدومي كنت حاسة إني بغسل روحي وقلبي وكل ما الموجة تخبط فيه كأنها بتاخد حتة من الماضي وبتمشي مع انسحاب الموجة وفي الآخر قعدت وأنا بضحك.
عمي بضحك: بتضحكي على إيه.
اتكلمت وأنا بضحك أكتر وببص لعمي: بضحك على الأيام وأنا بودع ليل وبجيب نهار.
بودع الظالم للأبد.
وبيجي النور.
عمي اتكلم بضحك ودموعه بتنزل: يارب يا حبيبتي إن شاء الله اللي جاي كله فرح.
سكت وكأني بوعد نفسي بالسعادة.
فضلت مكاني لحد ما شفت الغروب.
بعدها طلعت من المياه وأخدني عمي على فندق.
ونزلنا اتعشينا بره.
وتاني يوم رحنا اشترينا هدوم كتير وشنط وجزم كتير أوي وهدوم بيت حلوة وفساتين للبيت وللخروج.
وبعدها رحنا ناكل آيس كريم واحنا ماشيين على البحر.
وفضلنا نتكلم لحد الليل ما دخل علينا.
وفضلنا على الحال ده أسبوع كل يوم حاجة جديدة والسعادة دخلت قلبي من تاني.
عمي بابتسامه: يلا علشان نعمل آخر حاجة علشان هنرجع النهارده.
عارفه يلا.
روحت قصيت شعري قصة حلوة أوي ولبست فستان جميل كان بنص كم أحمر وحطيت مكياج خفيف وخرجت لعمي.
عمي بفرحة: بسم الله ما شاء الله خمسة في عينيه.
إيه القمر ده.
فعلاً انتي سما.
اتكلمت بفرحة: بجد يا عمي.
بجد يا قلب عمك يلا علشان العيال كلهم في البيت النهارده أول يوم في إجازاتهم عايزين نلاحقهم على الغداء وكلهم عايزين يشوفكي.
يلا يا عمي.
عمي بابتسامه: ولا حد سأل عليكي قبل كده سيبني أنا هتصرف.
حاضر.
بعد مدة وصلنا ودخل عمي ومعه تميمة وأنا دخلت وراه بكسوف مش عارفة ليه.
واتكلمت بابتسامه: مساء الخير.
ودخلت لقيت مرات عمي قاعدة وجنبها تلات شباب أكيد دول ولاد عمي بس شكلهم اتغير مع مرور الزمن.
مرات عمي بابتسامه حضنتني واتكلمت في وداني: إيه التغير ده.
واتكلمت بصوت عالي: إيه القمر ده بس الله عليكي.
حلوة طول عمرك.
عمي بعد ما سلم عليهم: طول عمرها.
قربت مديت إيدي سلمت عليهم.
اتكلم أول واحد: عاملة إيه يا سما أنا آدم.
الحمد لله بخير.
التاني بابتسامه: وأنا يونس.
واتكلم الأخير: وأنا نوح.
قعدت في مكاني جنب عمي وهو حضني.
مرات عمي بضحك: كده أنا بدأت أغار وأنا يا راجل ماليش حضن.
عمي بضحك: بس يا ولية انتي كبرتي أنم القمر ده يتحضن في أي وقت.
اتكلمت بكسوف وكل العيون بتبص عليا: أنا طالعة أوضتي.
عمي بضحك: شوفتي أديكي كسفتي القمر بتاعنا.
متتأخريش يا حبيبتي علشان نتغدى.
حاضر يا عمي.
طلعت غيرت ولبست فستان أسود بيتي وغيرت لتميمة وهي كمان جابت هدوم كتير ورضعتها.
وبعد ما نامت نزلت وأنا طالعة من باب أوضتي قبلت يونس.
يونس بابتسامه: عاملة إيه طمنيني عليكي.
اتكلمت بهدوء: بخير وانت.
يونس بابتسامه: في أحسن حال علشان شوفتك.
انتي مش عارفة فرحتنا قد إيه علشان شوفتك.
ضحكت: وأنا أكتر.
آدم من ورانا: يلا هناكل ولا هنفضل طول اليوم نضحك.
مشينا وراه ويونس مد إيده سلم عليا وقال: سلام صدقة من تاني صديقي الصدوق.
اتكلمت بضحك: صديقي الصدوق.
وسلمت عليه.
آدم لف لينا وكمل مشي.
قعدنا كلنا على السفرة ناكل.
مرات عمي: أما يا واد يا آدم لاقيتلك حتة عروسة يا حلوة.
آدم اتكلم بضيق: إنتي عارفة رأيي في الموضوع ده جوزي يونس.
يونس بضحك مسك إيدي وقال: أنا خلاص لقيت عروسة.
سحبت إيدي من إيده ولسه هتكلم.
آدم بعصبية: هو في إيه انت مش كبرت على الهزار ده.
يونس بضحك: لا لسه صغير.
ومسك إيدي تاني.
وبعدين محدش له دعوة بسما.
عمي بضحك: جدع يا واد طمرت فيك التربية.
اتكلمت بهدوء وأنا بسحب إيدي: أنا شبعت وقمت من مكاني.
عمي بحنان: كملي أكلك يا حبيبتي.
اتكلمت بابتسامه: أنا شبعت يا عمي.
طلعت اطمنت على تميمة وبعدين طلعت على السطح في مرجيحة هناك قعدت عليها من غير ما أحركها وغمضت عيني.
مرة واحدة لقيت المرجيحة بتتحرك.
اتكلمت وأنا لسه مغمضة: بس يا يونس سيب المرجيحة.
ليه يونس هو مفيش حد هنا غير يونس طول الوقت كنتي بتلعبي مع يونس وتطلعي مع يونس وتتكلمي معاه وأنا السئ عندك.
اتكلمت بهدوء رغم استغرابي من كلامه: انت اللي كنت مش حابب وجودي وكل ما كنت أحاول ألعب معاك أو أكلمك كنت بتمشي وتسيبني.
فسيبتك على راحتك.
آدم اتكلم وهو لسه بيزق المرجيحة بهدوء: بس معملتش كده مع يونس طول الوقت كنتوا مع بعض وأول ما شفتيه النهارده رجعتوا زي الأول وأنا دايماً غريب عنك وبتبعدي عني.
اتكلمت وأنا بقوم من على المرجيحة: كلكم أخواتي يا آدم.
بس الفرق كان في تعامله معايا.
ولو وجودي مضايقك أنا آسفة.
نزلت وسبته.
وأول ما دخلت أوضتي شلت تميمة وحضنتها.
سمعت الباب بيخبط.
اتفضل.
يونس بيتكلم بضحك وهو بيدخل الأوضة: القمر ماله.
اتكلمت بضحك: القمر في السما يا باكش.
يونس بضحك: طول عمرك فاهمني.
ضحكت أكتر.
أكتر من نفسي.
يونس قرب مني وشال تميمة وباسها: حلوة شبهك.
كأنها نجمة في سماء.
اسمها إيه.
اتكلمت بابتسامه: تميمة.
بس هي مش شبهي هي أجمل مني.
يونس بابتسامه: مفيش أحسن منك.
كأن الأيام ما مرتش عليكي.
اتكلمت بكسوف: بس بقي ده أنا كبرت.
يونس بضحك: وه كبرتي إزاي اللي يشوفك يقول انتي اللي أصغر مني.
كأن العشر سنين مروا عليكي وانتي واقفة عند 17 سنة.
قمت خدت تميمة من يونس وأنا بضربه على إيده: بس يا ابني عيب.
يلا اطلع بره علشان هنام.
قام وهو بيضحك: اخص عليكي وأنا اللي كنت هقولك على مفاجأة.
لفيت ليه بسرعة كان هو فتح الباب وهو بيجري حطيت تميمة على السرير وفتحت الباب وقعدت أدور عليه.
لأقيته بيدخل أوضته خبطت عليه ودخلت.
اتكلمت بفضول أول ما دخلت: قولي.
اتكلم بضحك: امشي اطلعي بره من أوضتي عايزة مني إيه.
اتكلمت وأنا بقرب منه: هتقول ولا.
اتكلم بضحك: بتقربي مني ليه عايزة مني إيه أنا لسه صغير ياختي.
مرة واحدة الباب اتفتح.
آدم بغضب: بتعملوا إيه.
يونس بابتسامه: ولا حاجة في إيه يابني.
أنا اتحركت علشان أمشي.
بس آدم مسك إيدي وشدني لبره ويونس اتكلم بضحك: معادنا بكرة يا سما المفاجأة بكرة.
اتكلمت بغضب: سيب إيدي يا آدم.
وسحبت إيدي منه ومشيت على أوضتي.
مشي ورايا ودخل وأنا بقفل الباب بعد ما دخلت.
اتكلمت بهدوء: عايز إيه يا آدم.
اتكلم بغضب: عايز أعرف انتي كنتي بتعملي إيه في أوضة يونس.
اتكلمت ببرود: وانت مالك.
واتفضل علشان هنام.
آدم بغضب: ابعدي عن يونس.
قال كده وطلع على طول.
نمت على السرير وحضنت تميمة.
صحيت الصبح ونزلت أفطر.
بعد الفطر يونس قالي إننا هنخرج شوية.
طلعت غيرت ونزلت وأنا نازلة على السلالم.
رايحة فين.
لفيت ببرود: ليه.
آدم اتكلم بهدوء: بطمن عليكي.
اتكلمت بهدوء: اطمن طالعة أنا ويونس.
آدم بعصبية: اللي هو إزاي.
مشيت وسبته وهو نزل ورايا.
نزلت لاقيت عمي قاعد مع يونس.
قربت من عمي وحضنته: عامل إيه يا حبيبي.
عمي بحنان: بخير يا حبيبتي.
خد بالك منها يا واد يا يونس.
يونس بضحك: في عيني يا حاج.
عمي بضحك: خدي بالك انتي من الواد الباكش ده.
اتكلمت بضحك: حاضر.
يونس بضحك: يلا يا سما.
آدم اتكلم بهدوء: رايحين فين.
يونس بضحك: مفاجأة.
خرجت أنا ويونس وركبنا العربية لحد الملاهي.
يونس بضحك: مفاجأة.
لفيت ليه واتكلمت بسعادة: أحسن مفاجأة.
فضلت ألعب أنا ويونس على كل اللعب لحد المغرب.
وبعد كده رحنا نتعشى في مطعم.
وبعدين قررنا نتمشى لحد البيت.
واحنا ماشيين جبلنا درة وقعدنا ناكل طول الطريق.
كان يوم جميل.
يونس بابتسامه: مبسوطة.
اتكلمت بابتسامه: أكيد.
يونس بابتسامه: فاكرة لما كنا صغيرين وكنتي بتقوليلي لما نكبر هنروح أنا وانت الملاهي لوحدنا ونروح مشي وناكل درة ونفضل نجري.
اتكلمت بضحك: ياااه لسه فاكر.
وقلت كمان أنا أول واحدة أعرف لما تحب وهتفضل طول العمر صديقي الصدوق.
يونس بضحك: هتكوني أول واحدة تعرف وهتفضلي طول العمر صديقي الصدوق.
وصلنا البيت بعد كلام كتير.
أول ما دخلنا لقينا آدم قاعد في الصالة لوحده وطافي النور.
آدم اتكلم بهدوء: الساعة في إيدك كام.
يونس بهدوء: 12 ليه.
آدم: كنتوا فين لحد 12.
يونس بابتسامه: في إيه يا آدم.
بابا عارف.
أنا.
تصبحوا على خير.
وطلعت على أوضتي نمت على السرير على طول لأن تميمة مع مرات عمي وهي قالت إنها هتنام معاها النهارده.
لسه هغمض عيني سمعت صوت التليفون بيرن.
رفعت السماعة: الو.
المتصل: أخيراً.