رباب: مرت عمي الله يرحمه جاية تسلّم، افتح ياض.
فتح الباب وقال: يا مرحب.
هنية بصت له بابتسامة بدموع.
رباب: هي اتجوزت واحد بعد عمي الله يرحمه، بس بتيجي تزورنا ما نسيتناش.
سامي: آه فيها الخير والله، ازيك يا خالة.
هنية بدموع: كيفك يا ولدي.
سامي: الحمد لله يا خالة، نحمده ونشكر فضله.
وهمس لرباب: في حاجة؟ الولية دي بتبص لي كده ليه؟
رباب: ما اعرفش والله، أصل هي كانت مخلفة من عمي سامي عيل ومات وهي بتولده، ما شافتهوش. كان هيبقى في نفس عمرك كده لو عاش.
سامي: آه.
وابتسم لهنية اللي كانت بتبص له بشرود.
بعد شوية كانوا كلهم بيتغدوا، بس سامي ما كانش معاهم.
هنية: فين سامي؟ ولا هو مش هيتغدى معانا؟
سميحة بخبث: لا هو مش هيتغدى معانا يا حبيبتي، ما بيتغداش معانا. بيتغدى لوحده. ولا عايزة تطلعي له الأوضة تاني؟
رباب: يا أما هي ما طلعتلوش أوضته، كلنا طلعنا أنا وهي علشان تتعرف عليه.
هنية: طب هو ليه بياكل في أوضته؟ ما ينزل ياكل معانا أحسن؟
سعاد: جرى إيه يا أختي؟ ما خلاص، أنتِ شاغلة نفسك بالواد ده ليه؟ كلي وأنتِ ساكتة.
هنية سكتت. وبالليل رباب راحت على أوضتها. وسامي نزل ينام في الصالة زي كل ليلة. بس جات سميحة وقالت:
أنت مش هتنام هنه عشان هنية نايمة في الأوضة جوه، وحماتي كمان مع رباب. وأنت ما ينفعش تنام في الصالة والناس عندنا، افرض حبوا يروحوا الحمام ولا حاجة؟ يروحوا قدامك؟ نام على السطح.
سامي: بس الدنيا برد دلوق.
سميحة: لا معلش يا حبيبي استحمل، أصل قعدتك كده مش لادة.
سامي: حاضر.
وطلع على السطح. وهنية طلعت من الأوضة لما لقت رباب وسعاد ناموا. وبقت تبص عليه في الصالة.
سميحة: بتدوري على حاجة يا هنية؟
هنية: هو سامي فين؟
سميحة: وأنتِ طالعة في نصاص الليالي تدوري على سامي ليه؟
هنية: لا كنت هروح الحمام لا مؤاخذة، وما لقيتوش فبسأل بس.
سميحة: على السطح.
هنية: إيه اللي مطلعه السطح في البرد ده؟
سميحة: معلش بقى، ما ينفعش ينام في الصالة عشان لو حد عايز يروح الحمام ولا حاجة. وزي ما أنتِ شايفة البيت كله أوضتين وصالة والمطبخ والحمام. البنت رباب في الأوضة، وأنا وجوزي في أوضة. هينام فين يعني؟
هنية بضيق: لو ولد بطنك كنتِ هتنوّميه فوق؟
سميحة: بس هو مش ولدي. يلا هروح لجوزي.
ودخلت تنام. وهنية لا إراديًا حست برجليها بتاخدها لفوق. وسامي كان قاعد وبيقرا. قالت:
إيه اللي طلعك في السقعة دي؟ أنت مش بتنام في الصالة ليه؟ ليه تسمع كلامها؟ البيت ده ليه راجل.
سامي: مش عايز حد يتشاكل بسببي. وعشان تبقوا براحتكم يعني، معاها حق.
هنية: حق إيه؟ أنا كد أمك. أنت بتدرس إيه؟
سامي بحرج: في كتب رباب، ولو في حاجة ما فهمتهاش بتشرحها لي. لازم شهادة ميلاد للمدرسة وأنا ما عنديش.
هنية: ربنا يعتر أهلك فيك.
سامي: ده لو كان ليا أهل أصلًا. أصلهم بيقولوا عليا اسم الله على مقامك ولد حرام.
هنية: ياما في الحبس مظاليم. أنت محبوس في كلمة ولد الحرام مع إنه شكلك ما بيقولش إنك ولد حرام واصل. عارفة جوزي سامي الله يرحمه مات وأنا حبلة. ولدي مات وأنا بولده، قالوا لي مات. أنا حتى ما شفتهوش. كنت زعلانة قوي على سامي، إنه مش هيشوف ولده. بس حتى أنا ما شفتهوش. بتهيأ لي لو كان عايش دلوقتي كان بقى شبهك كده.
سامي: آه ما هي رباب بتقول لي إنه نفس عمري. يحتسب لك عند ربنا إن شاء الله.
هنية: إن شاء الله. بس أنا أقصد الشبه، أنت تشبه سامي الله يرحمه.
سامي: أنتِ اتجوزتِ بعد عم سامي؟ خلفتِ غير الولد اللي مات؟
هنية: أخواتي جوزوني عشان ما يصرفوش عليا عشان يتيمة. وما خلفتش أصل جوزي كبير في السن.
سامي: طب ليه جوزوك للكبير؟ كان ممكن يتقدم واحد من سنك يعني؟
هنية: أنت عارف في الصعيد المطلقة والأرملة فرصتهم في الجواز مش كيف البنات الصبايا الصغيرين.
سامي: لا أنتِ ما شاء الله ما يبانش عليكي يعني مش كبيرة. قاعدة صبية لسه حلوة.
هنية: دول عينيك الحلوين.
بس سمعوا سميحة بتقول لجمال:
شايف الولية! قلت لك تحت وكدبتني. اتفرج. مش مكسوفة من نفسها جاية لواحد قد عيالها.
هنية: أنتِ بتقولي إيه؟ اقعدي ساكتة، أنتِ فهمتِ غلط. أنا بس جيت عشان...
سميحة: واضحة جيتِ ليه. جوزك راجل كبير وهنج، وجاية ترخصي نفسك لواحد قد عيالك. وعمالين تتوشوش وهاتك يا وشوشة. وعينيك اللي حلوة. عينيه بس.
هنية: أنتِ مريضة ده قد ولدي.
سميحة: ده مش ولدك. ده ولد حرام. واحنا جايبينه نتثاوب فيه.
وبصت لسامي وقالت: وأنت هي رخيصة إزاي تعمل كده؟ في بيت الراجل اللي رباك؟
بس سامي وقف قصادها وقال بغضب:
وطي صوتك، أنتِ عارفة كويس إنه ما فيش داعي للكلام ده. وإن ما حصلش حاجة. أنتِ بتقولي كل ده عشان أمشي من هنه صوح؟ بصي بقى.
وحط إيده على رقبته وقال:
وصلت معايا لهنا منك. من يوم ما جيت وأنتِ مش بلعاني. مرة تقولي إنه أنا كبرت وبنتك كبرت وما ينفعش نفضل سوا. مع إنك عارفة زين إني أنا بعتبرها كيف أختي. ومرة تقولي إن العرسان مش هتيجي للبنت طالما في راجل غريب قاعد معاها في البيت. مع إن قعادنا كله تحت عينك. مرة تقولي ما تسيبيش البنت لحالها معايا في البيت. يعني أكون واحد متربي على يدكم وما تأمنوش ليا؟ تمام أنا ماشي سايب لك البيت. لأني عارف إنك بتعملي كل ده عشان أمشي. أصلًا ما تفاجأتش. مين هيتحملني يعني؟ إذا كانوا أهلي رموني، أنتم مش هتلموني. بس بلاش تكرهي فيا الراجل اللي سكنّي عنده ودخلني بيته وعاملني كيف ولده كل السنين اللي فاتت دي. وإني أغوى ضيفة جاية عنده. تمام بلاش تكرهيه فيا.
وأخذ بعضه ومشى. جمال نزل وراه وبقى يقول:
سامي استنى يا ولدي، أنت رايح فين؟ خليك. سيبك منها دي هبلة، أنا هتصرف معاها. أنا مصدقك أنت.
سامي: لا كفاية كده. هقعد هنا لحد ميتى يعني؟ كفاية كده، شكرًا على كل دقيقة قعدتها معاك وعلى كل لقمة أكلتها عندك. لو ربنا اداني خير هرجع لك كل قرش أنت دفعته عليا.
جمال: إيه الكلام اللي أنت بتقوله ده؟ طب سلم على رباب حتى.
سامي: لا سلم لي عليها أنت. لو شافتني مش هتخليني أمشي.
جمال: طب طب خد خلاقاتك حتى.
سامي: مش بتوعي. جيت بالخلاقات اللي عليا. وهمشي بالخلاقات اللي عليا.
عند هنية قالت: أنا جيت لأني حسيته ولدي، قلبي كان بيدق له. والله حسيت كيف ما كنت أحس وولدي في بطني. سايقة عليكي النبي ترجعيه، وأنا همشي وما هاجيش هنه تاني واصل.
سميحة: ده مش ولدك. سمعتِ؟ ولدك مات.
هنية: والله حاسة إنه ولدي. أنتِ عارفة إنه ولدي صوح؟ عشان كده بتخبيه عشان ما أشوفهوش؟ وعشان كده عاوزة تبعديه من البيت؟ سامي ولدي صوح؟
سميحة: مش ولدك بلاش جنان. أنا ما عاوزاهوش يقعد معانا في البيت لأنه ما ينفعش يفضل مع البنت رباب. وأنا فكرتك يعني مليتِ جوزك العجوز ودايرة للصبيان، أصل إيه اللي هيطلعك وراه السطح غير كده؟
هنية: حسيته ولدي.
سميحة: إيه اللي هيجيب ولدك هنا؟ ولدك مش مات؟ بعدين يا أختي. جمال شاف جتت ولدك وهي نازلة التراب، اسأليه لو ممصدقناش. أنتِ بتصدقي جمال أصلًا؟ كنتِ عينك منه.
هنية: لسه بتقولي عيني منه؟
ونزلت بيأس وراحت على أوضتها بدموع.
سميحة لسه هتنزل بس مسكتها سعاد ورجعتها وقالت:
الواد يرجع سمعتيني؟ وإلا واللي خلق الخلق لأروح أقولها إنه ولدها. وإنك أخذتيه منها ووديتيها عيل تاني مش عيلها. وقلتِ لها إن ولدها مات. وأقولها إنك رميتِ الواد ده قدام الجامع. عشان تخلصي منه.