تحميل رواية «اغنى فقيرة» PDF
بقلم سمية خالد
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
عن الرواية
بابا إيه رأيك في الشنطة دي يابابا؟ لسه جايباها النهاردة. كل صحابي كانوا هيموتوا ويجيبوها بس أنا لحقتها. = جميلة يا حبيبتي، بكام دي بقي؟ - ب 10000 جنيه بس، تخيل! = مستهونة بالمبلغ ومحسساني إنه عشرة جنيه! - هو المبلغ اللي دفعته في الشنطة دي مبلغ؟ وبعدين ما إحنا معانا فلوس. = وافرض صحيتي في يوم لقيتي كل ده اختفى؟ هتنزلي تشتغلي! ضحكت بسخرية. - أنا ندي هانم، أنزل اشتغل يعني أي شغل! = يعني تعب وشقى عشان تجيبي القرش وتحسي بقيمته. طبعًا هتعرفي كل ده إزاي وإنتي مولودة وف بوقك معلقة دهب. بس معلش، بكرة تعر...
رواية اغنى فقيرة الفصل الأول 1 - بقلم سمية خالد
بابا إيه رأيك في الشنطة دي يابابا؟ لسه جايباها النهاردة. كل صحابي كانوا هيموتوا ويجيبوها بس أنا لحقتها.
= جميلة يا حبيبتي، بكام دي بقي؟
- بـ 10000 جنيه بس، تخيل!
= مستهونة بالمبلغ ومحسساني إنه عشرة جنيه!
- هو المبلغ اللي دفعته في الشنطة دي مبلغ؟ وبعدين ما إحنا معانا فلوس.
= وافرض صحيتي في يوم لقيتي كل ده اختفى؟ هتنزلي تشتغلي!
ضحكت بسخرية.
- أنا ندي هانم، أنزل اشتغل يعني أي شغل!
= يعني تعب وشقى عشان تجيبي القرش وتحسي بقيمته. طبعًا هتعرفي كل ده إزاي وإنتي مولودة وف بوقك معلقة دهب. بس معلش، بكرة تعرفي قيمة كل جنيه بيطلع من جيبك.
- بس أنا عارفة قيمته، دي حتى الشنطة دي كان عليها discount كمان.
= عمرك ما هتفهمي كلامي غير لما تكوني ما معكيش جنيه واحد.
- تؤ، مش هيبقى معايا أنا جنيه واحد؟ ما ربنا فاتحها علينا الحمد لله، إيه اللي هيوصلني إنه ما يبقاش معايا فلوس.
= بالمناسبة، صحابك اللي معاكي بمجرد ما يبقى معاكي فلوس هيبعدوا عنك. وقولتلك قبل كده مش برتاح لهم ولا بينزلولي من زور.
- إزاي بقى؟ دول أكتر ناس بيحبوني وبيخافوا عليا، وبذات ميرنا.
= لما تتحطي في محنة هتعرفي مين صاحبك الحقيقي ومين كان مجرد موجود بياخد منك بس.
محمود خطيبي رن عليا. طلعت الجنينة كلمته.
- أيوة ياحبيبي.
= طمنيني عنك، عملتي إيه النهارده؟
- أنا الحمد لله، أنا لسه جاية من الجامعة. وأنا جاية عجبتني شنطة، إنما إيه لذيذة. لما نتقابل هوريهالك. وبابا قاعد بيقولي في كلام غريب من أول ما جيت. الحمد لله إنك كلمتني عرفت أهرب منه.
= أممم، طيب أنا كنت عاوز أكلمك في موضوع كده. فاضية ولا إيه؟
- يارب ما يكون نفس الموضوع.
= أيوة هو. ليه أستنى سنة كمان عشان نتجوز؟ ما الشقة موجودة وكل حاجة جاهزة.
- أنا لسه مش جاهزة، أنا صغيرة خالص على المسؤولية دي كلها. إنت ليه مش فاهم ده.
قال بلهفة.
= مش هخليكي أصلاً تعملي حاجة و...
- محمود، أنا قولت اللي عندي وهقفل دلوقتي عشان رايحة البيوتي سنتر. ضفري الصغير اتكسر، بقي شكله وحش. متخيل؟
كلمت ميرنا تجمع البنات بعد ما طلعت من البيوتي سنتر عشان نتقابل في الكافيه اللي بنتقابل فيه كل مرة.
رفعت راسي بابتسامة وكبر.
- بنات، مقولتوليش إيه رأيكم في الشنطة الجديدة؟ 10000 جنيه تستاهل؟
بصوا لبعض بنظرة ذهول. وقالت ميرنا.
_ وااااوو، جميلة أوي.
مريم بصتلي باستغراب.
= بس مش جبتي اتنين الأسبوع اللي فات؟
- أه، بس دي عجبتني. مقدرتش أبعد عيني عنها الصراحة. ولا إنتي إيه رأيك يا فريدة؟ هي الشنطة اللي معاكي دي قولتيلي بكام؟
بصتلي بابتسامة كلها رضا.
= الشنطة اللي معايا بـ 70 جنيه.
بصيت للبنات وقعدنا نضحك عليها.
- ليه جايباها من الشارع؟
= لأ، جايباها من العتبة. إيه رأيك؟
- يعني إيه عتبة؟ إيه الكلام اللي بتقوليه ده؟ كنتي قوليلي وأوديكي المكان اللي بجيب منه.
بصيت لمريم بصدمة.
- أوووف، نسيت إنها ما معهاش مبلغ الشنطة اللي معايا.
فريدة ميلت دماغها بحزن في الأرض.
= على الأقل مش بعاير حد ولا بتنمر. أهلي ربوني على كده.
- فريدة، إنتي زعلتي مني؟ أنا بهزر معاكي.
= لأ، وهزعل ليه؟ هستأذن أنا عشان اتأخرت.
مشيت فريدة. وحقيقي مشفقة على سذاجتها في كل حاجة. فاهمة الدنيا غلط.
_ ها بقى يا ستي ندى، الـ weekend الجاي هتودينا فين؟
= إيه رأيك نطلع شرم؟ أو دهب.
اتنططت على الكرسي بحماس وسقفت.
_ دهب، هموت وأروح دهب. بس....
= بس إيه؟
_ أصل ماما قفلت الـ فيزا بتاعتي كعقاب عشان أذاكر.
مسحت على شعرها.
وممكن متدهاليش دلوقتي وتقولي خدي من أبوكي؟ وأنا مش عاوزة منه حاجة، إنتي عارفة. و.....
= عشان الفلوس يعني؟ يا ستي العزومة دي عندي. فلوسي هي فلوسي، ما تشيليش هم.
حضنتني بحب وفرحة.
مش هنكر إني قعدت طول الليل أفكر في كلام بابا. اللي أنا أصلاً مش فاهمه سببه إيه.
كنت بقلب في التليفون. وه، ده الدريس اللي كانت الممثلة الأجنبية چويس لابسااه.
بكام بقى؟
نزلت أشوف سعره لقيته بـ 6000 دولار ومش متواجد منه غير قطعتين.
طلبته وأنا مبسوطة إني أخيرًا لقيته.
حطيت تليفوني على الشاحن ونمت.
"أنسي" ندي هتفطري هنا ولا في الجنينة تحت؟
فردت شعري لورا وسندت ضهري على المخدة.
- إعمليلي قهوة الأول وحضريلي الفطار في الجنينة.
مش هنكر إني مفيش مرة بصيت على حاجة عجبتني ومجبتهاش.
لأني معايا فلوسها. الفلوس بالنسبالي ممكن تجيبلي أي حاجة.
هي اللي هتجيبلي الأكل اللي أنا نفسي فيه.
هي اللي هتجيبلي الفساتين والشاليهات اللي بشتريها.
مفيش حاجة الفلوس مبتشتريهاش.
وكداب اللي يقول غير كده.
وأصح هو إنسان ساذج وغبي زي... زي فريدة صاحبتي.
"ندي، يلا نطلع المحاضرة. الامتحانات قربت لازم نركز."
= ما....
ميرنا جت. ميلت دماغها على كتفي أنا وفريدة.
وقالت بحماس.
- ندي، متفقناش هنطلع دهب إمتى؟
ابتسمت لميرنا وبصيت لفريدة.
= تعالوا نروح الكافتيريا نطلب حاجة ناكلها. لأحسن متت من الجوع. مش فطرت خالص. سبت الفطار في الجنينة عشان أفطر معاكم. يلا وبالمرة ونتفق هنطلع إمتى.
التفتت يمين وشمال بتوتر وقالت.
_ أنا هطلع المحاضرة. القبض بتاعي خلص. وبعدين مش عاملة حساب إني هاكل عشان هجيب ملزمة الدكتور.
قعدت أضحك أنا وميرنا بسخرية.
- هتضحي بأكلك عشان ملزمة؟
= طيب تعالي وأعزمك عادي.
_ لأ شكراً. أموت من الجوع ولا أخلي حد يعزمني.
= طيب إيه ده، رايحة فين؟ نسيت أسألك. إنتي مش لبستي الدريس ده كذا مرة ليه مش رميتيه أو جبتي غيره؟ موضته من أيام ante. هههههه.
قعدنا نضحك أنا وميرنا على فريدة. عينها كانت مرمغة وعلى وشك العياط.
- أنا مش عاوزة أعرفكم تاني. أنا خسارة أفضل مع ناس زيكم. بس ربنا مش هيسيب حقي.
مشيت وسابتنا. وكملنا ضحك.
مش عارفة إيه عزة النفس دي اللي عند فريدة. المفروض واحدة زيها فقيرة ما معهاش فلوس كانت وافقت أعزمها.
- يلا ياندي بقى نروح الكافيتيريا. جعانة. هكلم محمود وعمر يستنونا هناك. بس بقولك إيه، هتعزميني النهاردة عشان زي ما إنتي عارفة ماما قافلالي الـ فيزا بتاعتي.
= ماشي.. ماشي.
روحنا الكافتيريا، وكالعادة محمود بيضايقني.
- مفكرتيش في الموضوع اللي كلمتك فيه امبارح؟ أنا بحبك ومش قادر أعيش من غيرك. إنتي ليه مش فاهمة ده. إنتي أنانية جدًا على فكرة.
= أنا أنانية؟
- أه، بتفكري فنفسك وبس. لكن مفكرتيش أنا عامل إزاي بسببك.
= ما إنت كمان بتفكر في نفسك. ف اللي إنت عاوزه. مفكرتش أنا هرتاح في إيه. مين فينا اللي أناني؟
- طب معلش، تفكري تاني بليز يروحي.
مسك إيدي بحب.
= إن شاء الله.
حضرت شنطتي وكلمت ميرنا عشان هنتقابل 7 الصبح عشان نلحق اليوم من أوله.
كنا مبسوطين. كنا مبسوطين دي كلمة قليلة. لدرجة فكرت في كلام محمود في موضوع جوازنا. وأنا لسه في تالتة كلية.
= محمود، أنا موافقة أتجوزك.
قام من على الكرسي بفرحة وهو بيتنطط.
مسك إيدي جامد وفضل يلف بيا.
- بجد؟ أخيرًا! أنا فرحان أوي. أول ما نرجع من دهب هكلم والدك.
بصيتله من فوق لتحت بابتسامة كبر.
= أه، بس على شرط.
- اطلبي اللي انتي عاوزاه. كل شروطك هتتنفذ بالحرف.
قعدت بأريحية على الكنبة وحطيت رجل على رجل.
= فاكر الخاتم الألماظ اللي كان عاجبني من يومين من باريس؟ أنا عاوزاه.
مسح على رقبته بربكة.
- أيوة ياحبيبتي، بس... ده داخل في 6 مليون جنيه و...
= و إيه؟ هو كتير عليا؟ مستاهلش مثلاً؟ بص، ده شرطي، أوكاي؟ وإلا مش هنتجوز.
- لا.. لا، موافق خلاص. مبروك علينا ياحبيبتي.
لحد ما جالي تليفون من كرم، محامي بابا.
= أيوة يا أنكل كرم، في حاجة؟
سكت دقيقتين وهو بياخد نفسه بالعافية.
- أأأ... الحقي يابنتي أبوكي مش قادر ياخد نفسه. كنا قاعدين بنتكلم وفجأة مبقاش عارف ياخد نفسه. إحنا دلوقتي في مستشفى "العالمية". حاطينه على أجهزة.
التليفون وقع من إيدي.
= محمود! بابي في المستشفى! لازم نرجع بسرعة... بسرعة! أنا خايفة يحصل له حاجة.
اتصدم وجري على الفندق لم الشنط. وكلمنا ميرنا وعمر يسبقونا على العربية.
وصلنا المستشفى بعد 3 ساعات.
كنت بجري في الطرقة وأنا حاسة بتوهان. أول مرة أحس إني خايفة يحصل حاجة لبابا.
أنكل كرم كان قاعد في الأرض وحاطط إيديه باستسلام.
= أنكل كرم، بب.. بابا فاق؟ هو فين؟ في أنهي أوضة؟
- البقاء لله. والدك مات بأزمة قلبية.
= لا لا، بابا فين؟ هو مامتش؟ مات إزاي ده؟ لسه كنا بنتكلم امبارح.
لفيت ضهري. بصيت لمحمود وميرنا.
= بابا ماماتش، صح؟
أنكل كرم، بابا كان صاحبك؟ كان بيثق فيك؟ إنت ما خدتش بالك منه إزاي؟ ده كان بيديك فلوس قد كده.
بصلي بأسف.
- صدقيني، كنا قاعدين بنتكلم وندردش عادي. مكنش حاسس بتعب. هي صحوبيتنا بالفلوس يابنتي؟ الله يرحمه.
= إنتوا كلكم كدابين. بابا ماماتش. ده فيلم، هه! فيلم صح؟ بابا كان زعلان مني قبل ما يسافر. أنا ملحقتش أصالحه. ملحقتش أخليه فخور بيا.
محمود وميرنا قعدوا يطبطبوا عليا ويهدوني.
كان وجودهم زي عدمه. مكنتش حاسة بحاجة غير بحرقة في قلبي شديدة أوي. هو موت الأب ده بيتهون عليه بطبطبة ولا بكام حضن؟ حتى العياط مش هيرجعه.
أأأهه يابابا، اااه. سبتني لمين؟ أنا معنديش حد دلوقتي أروح له. إنت وماما سبتوني. معنديش حد أفضل عشانه.
مرضتش أشوفه. لو شوفته هنهار أكتر. كنت فاكرة إنه هيفضل دايما معايا. كنت فاكرة إنه مش هيمشي. بس دي دنيا فانية.
حضرت جنازته اللي منزلتش فيها ولا دمعة.
كل صحابي كانوا موجودين.
لقيت إيد بتمسك إيدي.
لفيت وشي. كانت فريدة. خدتني في حضنها وطبطبت عليا.
- البقاء لله يا ندي. هو في مكان أحسن بكتير.
"بعد مرور أسبوعين"
= أنكل كرم، اتفضل.. اتفضل.
- مش عارف الوقت مناسب ولا لأ، بس من حقك تعرفي وصية أبوكي اللي وصاني أسلمهالك لو... لو حصله حاجة.
بصيت بتوهان وحزن.
= وصية؟ هو أكيد كاتبلي كل حاجة. أنا وهو مكنش لينا غير بعض و...
- اتفضلي استريحي وهنعرف اللي في الورقة حالاً.
قعدت على الكرسي وقعد على الكنبة اللي قصادي.
ولبس النضارة وبدأ يقرأ.
"أقر أنا سليم عبدالعزيز، وصيتي بنقل جميع ممتلكاتي وما أملك للجمعية الخيرية ونصفها لأقاربي الذين في بيروت. والڤيلا التي أعيش بها مع ابنتي ندي قد باعت منذ عدة أشهر، يستلمها المشتري عندما لم أعد موجوداً في هذه الحياة. وليس لـ ندي ابنتي أي صلة بما أملك بتاتًا."
رواية اغنى فقيرة الفصل الثاني 2 - بقلم سمية خالد
أقر أنا سليم عبد العزيز وصيتي بنقل جميع ممتلكاتي وما أملك للجمعية الخيرية ونصفها لأقاربي الذين في بيروت.
والڤيلا التي أعيش بها مع ابنتي ندي قد بيعت منذ عدة أشهر، يستلمها المشتري عندما لم أعد موجوداً في هذه الحياة.
وليس لـ ندي ابنتي أي صلة بما أملك بتاتاً.
بصيت له بصدمة واستغراب.
= يعني إيه؟ يعني بابا مسابليش حاجة؟ بابا عاوزني أنام في الشارع؟ بابا كان بيكرهني أوي كده؟
ضحكت بسخرية وعياط.
أنكل كرم طبق الورقة وبصلي بأسف.
- مفيش أب يكره بنته يابنتي.
= أنت كنت عارف؟ أنت كمان بتكرهني زيه؟ كلكم بتكرهوني.
مسكت الزهرية اللي كانت على السفرة وحدفتها على الأرض بغضب.
= اطلع براااا.
جري قصاد الباب وخرج.
قلبت الترابيزة وقعدت أكسر في الديكورات واللاب توب بانهيار.
وصوت بابا بيرن في ودني وهو بيقول:
"لو فرض صحيتي في يوم لقيتي كل ده اختفى؟ هتنزلي تشتغلي. بكرة تعرفي قيمة كل جنيه بيطلع من جيبك."
"بكرة تعرفي قيمة كل جنيه بيطلع من جيبك."
"بكرة تعرفي قيمة كل جنيه بيطلع من جيبك."
حطيت إيدي الاتنين على وداني.
= بس... بس بقى كفاااااية.
حتى وانت ميت صوتك بيرن في ودني.
كده بتعرفني قيمة الجنيه.
وقفت قصاد صورته اللي متعلقة في الريسبشن.
= ماترد يابابا، قولي مرتاح كده؟ مكنتش أعرف إنك بتكرهني أوي كده.
أروح فين دلوقتي؟ أنت دمرتني، دمرتني.
= انتِ يازفتة ياريهاااااام..
جت وهي بتجري بخضة وعنيها مليانة خوف وتوتر.
_ أيوة... أيوة ياندي هانم، تحت أمرك.
= اعمليلي قهوة، ولو معجبتنيش مش هيحصلك كويس. امشي من وشي.
_ حح... حاضر ياهانم.
كلمت محمود وحكيتله اللي حصل، كان ساكت طول المكالمة ومنصت ليا.
= متخيل كل ده حصل معايا؟ بابا مسابليش أي حاجة خالص، أنا مش مصدقة.
قال بربكة وتهته.
- أنا مستغرب إزاي أنكل سليم عمل كده؟ يعني إنتي كده معكيش أي حاجة دلوقتي؟ ولا حتى في البنك؟ مكنش معاكي حاجة مخبياها في البيت؟
= لأ طبعاً، هسيب فلوس في البيت ليه؟ كنت بحط في الفيزا بتاعتي يا إما في البنك. أنا مش عارفة هعمل إيه دلوقتي.
جرس الباب رن.
ريهام فتحت.
- آنسة ندي، في واحد برا بيقول إنك كنتي طالبة أوردر.
= أوردر إيه؟
- دريس تقريبا ياهانم، بيقول إنك طلبتيه من 3 أسابيع ولسه واصل مصر إمبارح.
*فلاش باك*
= وه، ده الدريس اللي كانت الممثلة الأجنبية چويس لبساه.
= بكام بقى؟
- بـ 6000 دولار. هطلبه.
= طب استني هنا، أنا هطلعله.
= أيوه يافندم.
_ ندي هانم، كنتِ طا...
قاطعته في الكلام.
= أنا آسفة جدًا، بس أنا عندي حالة وفاة، والدي توفي ومش هينفع آخد الفستان، مابقتش عاوزاه.
_ إزاي فندم، الأوردر جالك من باريس، مش هينفع ترديه. اتصرفي ياهانم.
التفت يمين وشمال.
طلعت أوضتي، مسكت علبة فيها تلت ساعات يد، كنت جايباهم من فترة. كل ساعة فيهم تعمل حوالي 100 ألف.
بصتلهم باهتمام وحزن.
= كنت بحبكم أوي... بس مضطرة أسيبكم.
أديتله الساعات. وشكلها كان يدي تمن الفستان اللي معاه.
رجعت رنيت على محمود، اداني مغلق. قولت أكيد عيب شبكة.
رنيت على ميرنا وحكتلها على الوصية وأنا منهارة لتاني مرة.
- أوووميجاد، إزاي أنكل سليم يعمل كدة.
وسألت نفس سؤال محمود.
= يعني كده مبقاش معاكي فلوس خالص؟ مكنتيش بتشيلي حاجة في البيت وكده؟
= لأ مكنتش بشيل، أنا حتى مش عارفة هبات فين دلوقتي.
ارتبكت وقالت بتهته.
- والله يا ندي كان نفسي أقولك تعالي اقعدي عندي، بس... بس أدهم أخويا جاي من السفر النهاردة.
= مش قولتي جاي الشهر الجاي؟
- لأ، ماهو اتصل بيا من شوية قالي "أنا طالع من المطار وجايلك"، طلع عامل لي مفاجأة.
= مفاجأة؟ تمام... تمام.
- طب انتي كده هتعملي إيه دلوقتي؟ متقلقنيش عليكي.
= هتصرف.
غفلت على الكنبة وأنا قاعدة.
المنبه رن على الساعة 9. قمت لبست جيبة سودا وبلوزة سودة وروحت الكلية.
طول ما أنا ماشية كانت الأنظار عليا، مفيش حد واحد مكنش بيبصلي، نظرة شفقة أو حزن.
لقيت ميرنا والبنات جايين ناحيتي أول ما شافوني وحضنوني.
ميرنا قالتلي وهي بتبص للبنات.
_ تعالوا نروح الكافتيريا يابنات، وبالمرة ندردش. أنا جعانة، نطلب ماك؟
هزيت دماغي بـ لأ.
= أنا مش جعانة.
_ مش جعانة؟ انتي مبقتيش تاكلي خالص. انتي مش عاوزة تاكلي عشان معكش فلوس، هعزمك أنا، متخافيش.
بصيت للبنات بفخر وتكبر.
افتكرت لما كنت بعمل مع فريدة الموقف اتكرر، بس المرة دي كان عليا!!
ده أنا اللي كنت بعزمها، أنا وديتها دهب، كل حاجة كانت بفلوسي.
إزاي قدرت تهيني قدامهم كده؟
= إنتي إزاي تتكلمي معايا كده؟ نسيتي أنا مين؟ أنا ندي ها.....
ميرنا بصتلي وقعدت تضحك.
_ ندي إيه؟ مكملتيش؟ ندي هانم.. بححح.
مقولتلكوش يابنات، مش ندي هانم بقت ندي من غير هانم.
بالمناسبة، صحابك اللي معاكي بمجرد ما يبقاش معاكي فلوس هيبعدوا عنك.
وقلتلك قبل كده مش برتاح لهم ولا بينزلوا لي من زور.
إزاي بقى دول أكتر ناس بيحبوني وبيخافوا عليا، وبذات ميرنا.
بصوا لي بتعجب وسمعوها باهتمام.
= تعالوا أما أحكيلكم، مش أبوها مش كاتب لها ولا مليم في الورث بتاعه، حتى البيت باعه.
كل واحدة بصت للتانية وفضلوا يهمسوا.
*أوه، معقولة؟ إزاي أنكل يبقي كده.
* أي ده، يعني رمى بنته في الشارع.
ي حراااام.
قولت بحرقة وعياط.
= بس بقى، بسسس، اسكتوا. بدل ماتهونوا عليا وتبقوا جنبي بتعملوا كده.
جريت وبدون وعي وقعت في الأرض.
كنت سامعة صوت ضحكهم عليا.
لقيت إيد بتتمدلي.. رفعت دماغي لقيتها فريدة.
والابتسامة على وشها بتهزلي دماغها وبتقولي "اسندي عليا".
فضلت مستغربة ومصدومة.
فريدة اللي بتمد لي إيديها؟ أنا كنت بهينها كتير، أنا كنت قليلة الذوق معاها.
مديتلها إيدي وسندت عليها.
ميرنا قالت بصوت عالي.
"روحي للي شبهك يلا، بنات أنا اللي عازماكوا النهاردة على الأكل".
كلام بابا دايما كان بيرن في وداني مع كل قلم باخده من صحابي.
طلعنا برا الكلية.
سبت إيد فريدة بعصبية.
= إنتي شمتانة فيا مش كده؟ أكيد إنتِ فرحانة فيا ومديتي لي إيدك عشان تكسري عيني، أنا فاهمة كل ده و....
فريدة قالت بعصبية.
- اخرسي ي ندي، اخرسي. أنا كنت فاكرة إنك هتشكريني، كنت فاكرة إنك اتغيرتي بعد موت باباكِ. هو أنا لو شمتانة فيكي همد لك إيدي ليه؟ بعد اللي عملتيه فيا هقف جنبك ليه في جنازة أبوكي؟ الوحش بيشوف كل ناس شبهه، بس أنا مش كده، أنا مش شبهك.
لفت ضهرها ولسه هتمشي.
مسكت إيدها.
= فريدة.
- أفندم.
= أنا آسفة، ممكن متزعليش؟
بصتلي ونظراتها كلها علامة استفهام.
= ندي هانم بنفسها بتتأسف.
ابتسمت لها ومسحت دموعي.
= هانم إيه بقى، راحت عليا.
- أنا كنت مقررة أمشي ومرجعش تاني، بس معنى إنك اعتذرتي وانتي عمرك في حياتك ما اعتذرتي لحد حتى لو غلطانة، دي عندي حاجة كبيرة.
= ممكن تيجي معايا البيت تقعدي معايا شوية؟
- ممكن.
وصلنا الڤيلا ولسه هندخل من البوابة.
لقيت الأمن بيمنعنا.
فضلت أزعق وأقولهم "انتوا نسيتوا نفسكم، انتوا متعرفوش أنا بنت مين!"...
افتكرت إن اللي أنا بنته نفسه هو اللي رماني في الشارع.
قعدت على الرصيف وفريدة فضلت تطبطب عليا.
= طب هروح فين دلوقتي؟ أنا حتى ممعيش فلوس للفندق.
- هتيجي تعيشي معايا، أنا عايشة أنا وماما، معنناش حد.
= أعيش معاكي؟ هو إنتي ساكنة فين؟
- المطرية.
= يعني إيه مطرية؟ انتوا عندكم هناك الدنيا بتمطر كتير؟
قعدت تضحك عليا.
- لأ، دي منطقة عادية. أول ما نروح هتشوفي. تعالي نطلع على الطريق نركب ميكروباص.
بصتلها من فوق لتحت.
= طب ليه؟ تعالي نطلب أوبر أو تاكسي.
- إنتي عارفة الأوبر عشان يودينا هناك هياخد كام؟ مش بعيد ياخد 80 أو 90 جنيه، لكن الميكروباص لما نمشي لآخر الشارع العربيات بتقف، الأجرة أربعة جنيه.
بصتلها بصدمة.
= 80 أو 90؟ رخيص أوي، أنا لما كنت بركب بقي كنت بديله 300 أو 250.
- امشي معايا ياندي، أنا عندي مرارة واحدة.
فضلنا ماشيين تلت ساعة على رجلينا وأنا لابسة كعب، وحقيقي هموت من رجلي، أنا ماتعودتش أمشي المشي ده كله.
= فريدة، ناقص كتير؟
- هما خمس دقايق وهنوصل.
= يا دي الخمس دقايق دول.
رجلي وجعتني أوي، مش شايفة لابسة كعب قد إيه؟
- اقلعيه، العربيات هناك إيه؟ خلاص هنركب.
= لا ثواني، إنتي عاوزاني أقلع وأقعد حافية؟ إنتي عارفة أنا صارفة قد إيه على ضوافري دي؟ كده ضوافري تبوظ وبرستيجي هيبقى في الأرض، عاوزة الناس تقول "أم رجل حافية أهي".
فريدة بصتلي بقرف وبدأت تقلدني وتعوج لسانها.
- كده ضوافري تبوظ وبرستيجي هيبقى في الأرض، عاوزة الناس تقول "أم رجل حافية أهي".
نينيني.
= أنا بعمل كده، بتكلم بالطريقة دي!
- آه، ويلا اطلعي الميكروباص قبل ما يتملي.
بصيت على السلم.
= ده طويل أوي.
- أنا هطلع، خليكي واقفة.
طلعت فعلا وسابتني.
*يلا اللي عايز مطرية.. مطرية نفرين مطرية مطرية*
قربت ناحيته.
= لو سمحت يا أنكل، هو مفيش كرسي عشان اطلع؟ العربية دي عالية عليا.
_ لو سمحت يا إيه؟
= يا أنكل. هو مش حضرتك أنكل برضو؟
طلع خمسة جنيه من جيبه.
_ الله يسهلك يابنتي.
= أنا مش شحاتة صدقني.
_ أومال إنتي إيه ولا مين؟
ابتسمت ومدتله إيدي.
= أنا ندي.
مسح على شعره وخبط إيديه الاتنين في بعض.
- أنا لو مكنتش زعقت مع مراتي قبل ما أنزل مكانتش دعت عليا، أدي دعواتها استجابت.
فريدة نزلت من العربية مسكت إيدي وقالتله.
- معلش ياسطا، دي معايا. افتكرتها طلعت ورايا، هي بس مش متعودة تركب ميكروباص.
= بصي قبل أي حاجة، أنا اللي هقعد جمب الشباك.
- لا يا ماما، إنسي. أنا ممكن أفوتلك أي حاجة إلا إنك متقعدنيش جمب الشباك.
= أنا على طول كنت بقعد في عربية بابي جمب الشباك، سبيني أقعد جمب الشباك بقى.
خبطت على الشباك.
- لا يعسل، دي مش عربية بابي، دي عربية الشعب.
= يعني مش هتقعديني جمب الشباك؟
- لأ، إنسي.
*بعد مرور ربع ساعة*
= كنت متأكدة إني مش ههون عليكي وهتخليني أقعد جمب الشباك.
- متتعوديش على كده، ده عشان أول مرة تركبي ميكروباص.
= سيلا، اللي مدفعش الأجرة يدفع.
- الأجرة كام ياسطا؟
_ النفر بـ 6.
= ليه كده؟ كانت الأسبوع اللي فات بـ 4.
_ البنزين غلي والدنيا غليت، هنعمل إيه يعني يابنتي؟
فريدة طلعت 15.
- طب معاك 2 من 15، عايزين تلاتة جنيه.
= طب ما تديهاله كلها، ده شكله راجل كيوت وغلبان. وبعدين دول 3 جنيه مش مبلغ يعني.
- الـ 3 جنيه دول ممكن نجيب بيهم ربع كيلو طماطم، سندوتش فول، نتصدق بيهم. ليه؟ قوليلي ليييه؟
= ليه؟
- عشان أنا بشتغل وبقف على رجلي 9 ساعات عشان أجيب الجنيه ده، عشان كده أنا عارفة قيمته. بجيبه بطلوع الروح.
= صحيح، إنتي بتشتغلي إيه؟
- في مصنع أدوية، بغلف كراتين، بشيل الزيادات اللي بتقع من المكن.
= عاملة يعني، بس إنتي مبتتكسفيش؟
- هو أنا بشتغل شغل حرام؟ قدام الشغل حلال مفيش حاجة تخليني أتكسف.
*اللي نازل مطرية مطرية*
= يلا وصلنا يا ندي.
فريدة كانت ماسكة في إيدي.
كأني مسؤلة منها، كأنها ماما. أنا أول مرة أحس إني مسؤلة من حد. أول مرة أكتشف قد إيه هي جميلة أوي وأنا اللي كنت عامية مشوفتش كل ده.
طلعت النظارة الشمس من شنطتي ولبستها.
على الرغم من إني مكنتش لابسة حاجة ملفتة أو ميك أب، بس محدش نزل عينه من عليا.
*أندال أندال وأنا أقولهم ده أخويااا جربو ده ابن أبويا*
= فريدة، هو إيه البتاع اللي طالع من الأغاني ده؟ عامل زي العربية الصغنونة كدة.
- ده توك توك.
= تكتوك؟
- لا لا... توك.. توك.
= طب بليز ممكن نبقى نركبه في مرة؟ تخرجيني بيه، شكله لطيف خالص.
- حاضر ياحبيبتي، هنخرج أنا وإنتي وناهد وبابا وكلنا.
صبرني يارب.
وصلنا بيت فريدة.
كانت عمارة صغيرة هادية جدا، مفيهاش حس.
لقيت كورة بتخبط دماغي.
لفيت ضهري، لقيت عيل صغير أسمراني ضحكته جميلة أوي.
_ أسف يا أبله، مكنتش أقصد والله.
- تعالي ي ندي، ادخلي.
ماما دي ندي صاحبتي اللي حكيتلك عليها.
قامت من على الكرسي سلمت عليا وحضنتني بحب.
= أنا آسفة لو هتقل عليكي يا طنط، بس أول لما يكون معايا فلوس هشوف شقة إيجار أقعد فيها.
- ما تقوليش كده ياحبيبتي، إنتي زي فريدة بنتي. إن شاء الله تقعدي معانا على طول، على قلبي زي العسل.
مامتها كانت وشها بشوش والإبتسامة مش مفارقة وشها. بيضة وعنيها بنُع.
عرفت ابتسامة الرضا اللي دايما على وش فريدة دي جايباها منين.
البيت عبارة أوضتين وصالة ومطبخ، يا دوب يساع فرد واحد.
- وادي ياستي الأوضة اللي هنام فيها.
الأوضة على الرغم من صغرها كانت جميلة ومرتبة وصور رابونزل وملكة الجليد كانت مالية الحيطة.
= طب أنا معيش هدوم و...
- دولابي عندك، خدي اللي إنتِ عاوزاه.
= طب بليز، ممكن تفتحي التكييف؟ الجو نار خالص.
- معندناش تكييف، وبعدين ما المروحة شغالة أهي. اكراما ليكي هخلي المروحة عندك النهاردة، بعدين هحطها ناحيتي عشان مابتلفش غير على اتجاه واحد.
نمت من التعب، مقدرتش أقعد لبليل.
حسيت بإيد بتطبطب على كتفي براحة.
- ندي.. قومي عشان تاكلي.
= يوه، حطيلي الأكل في الجنينة. هفطر هناك، ياريهام.
- أنا فريدة ي ندي.
= إيه؟ فريدة.
قمت مخضوضة، معلش تلاقيني كنت بحلم، بس أصل اتعودت على حياتي اللي مكانتش عجباني زمان.
- ولا يهمك، بصي ماما عملالك إيه؟ بانيه وملوخية ومكرونة.
= بصي، أنا مش باكل مكرونة عشان عاملة دايت. عندك توست سن؟
- يعني إيه توست سن؟
= توست دايت مش بيتخن؟
- أجيبلك عيش بلدي، فيه عيش بلدي صابح من الفرن لسه جايباه حالا.
جابت العيش من على الترابيزة وقعدنا ناكل سوا.
حطيت إيدي على بطني.
= أنا طلع لي كرش، هو أنا أكلت كتير أوي كده؟ أنا هنفجر.
- ده رابع رغيف، مبروك عليكي الـ 5 كيلو اللي تخنتيهم.
قمت جريت وراها بالمخدة وهي بتضحك لحد ما وقعنا على الأرض.
= ندي بتحبي الشاي بالنعناع ولا من غير؟
= لا، بالنعناع.
طلعنا البلكونة وحطينا كوبايتين الشاي على السور.
مسكت تليفوني رنيت على محمود.
- بتعملي إيه؟
= هتصل بمحمود. تخيلي مرنش عليا من ساعة ماكلمته آخر مرة؟ ده مكنش بيفوت دقيقة إلا لو لازم يكلمني.
- مش جايز عمل زي ميرنا أول ما عرف إن باباكي مسابلكيش حاجة خلع؟
= شوفي الكون كله لو اتقلب، محمود مستحيل يخذلني ولا يسيبني عشان فلوس.
كنسلت عليه، رنيت عليه تاني لقيته حطني على البلاك لست.
فتحت الفيس عملت سيرش على الأكونت بتاعه.
اتصدمت صدمة عمري.
حسيت بحد طعني بسكينة لمة. معرفتش أنطق.
- في إيه ي ندي؟ شوفتي إيه خلاكي مصدومة كده وهتعيطي؟ ندي ردي عليا، ماتسكتيش عشان خاطري.
ضحكت بصوت عالي بهستيريا وعياط وحطيت إيدي على بوقي.
محمود خطيبي اللي لو اتقلب الدنيا وميخذلنيش، خطب انتيمتي.
خدت الفون من إيدي وقرأت.
"محمود إبراهيم خطيب ميرنا علي".
"الأمس هي انتصاري الوحيد، وداعاً للآخرين."
رواية اغنى فقيرة الفصل الثالث 3 - بقلم سمية خالد
فريدة قعدت تضحك بهيستريا.
- طب بذمتك ده يتزعل عليه أو يتزعل عليها؟ دي حتي الطيور على أشكالها تقع.
قربت التليفون نحيتي.
- فيهم شر وحقد من بعض، بصي كدة كويس.
= فريدة انتي ليه مش حاسة بيا؟ عارفه يعني إيه حب عمرك يخطب صاحبتك؟ طب إزاي إزاي هُنت عليهم كدة؟
يعني هما كانوا معايا عشان فلوسي مش أكتر؟
- بالظبط.
- ندي هو لما بتتحطي في محنة دي حاجة وحشة؟
= آه.. آه وحشة، عشان أنا غبية مبعرفش أتصرف، عشان ببقى لوحدي بكتشف قد إيه أنا وحيدة أوي.
- غلط، المحنة يعني ابتلاء ربنا بيبتليكي عشان بيحبك، متضايقة إن ربنا بيحبك؟ بيختبر صبرك.
المحنة اتعملت عشان تكشفلك كل الوشوش المزيفة اللي عاملين دور حبايبك وبتاخديهم بالحضن وانتي مصدقة!
في الحالة دي بتقومي تصلي ركعتين شكر وتقوليله: شكراً يارب، شكراً إنك أنقذتني.
= بس أنا مكنتش عايزة أتصدم فيهم، أنا كنت عايزة يحبوني.
أنا بابا حذرني كتير، إزاي مخدتش بالي من كلامه!
قعدت على الأرض وفضلت أعيط بحرقة.
= أنا كنت بحبهم أوي.
فريدة أخدتني في حضنها وفضلت تطبطب عليا.
- انتي متضايقة منهم أوي كده؟
= أوي، نفسي أحدهم بسكينة كده وأنتقم منهم.
خدت الفون ولبست الإسدال واستأذنت من مامتها تروح تشتري حاجة.
ومقالتش هتجيب إيه.
عدت عشر دقايق ولقيتها جايبة لوحتين كبار ملفوفين.
= إيه ده يافريدة؟ انتي ناويتي ترسمي ولا إيه؟
- هش هش.
راحت المطبخ، روحت وراها لقيتها بتلم كل السكاكين اللي فيه.
دخلت الأوضة وقفلت الباب بالمفتاح.
= دي آخرتها، هتقتليني.
- غمضي عينك ولو فتحتي هبقى بزعلة.
غمضت عيني.
مسكتني السكاكين في إيدي وقالت بصوت عالي:
تاتا تاتاااااا! فتحيييي عينك.
فتحت ببطء لقيتها معلقة صورتين كبار فيهم محمود وميرنا.
= إيه ده؟ عملتي دول إمتى؟
- بسيطة، روحت طبعتهم في السايبر وجيت.
= يعني إيه سايبر؟
- لا مش وقت ترجمة.
السكاكين اللي في إيدك دي عايزة إيه تحدفيها عليهم زي ما طعنوكي إطعنيهم، انتقمي منهم، طلعي العياط والمضايقة اللي انتي حاسة بيها.
وأول ما تحسي إنك ارتحتي قوليلي.
بصتلها وعنيا فيها دموع.
= أنا مش عارفة أقولك إيه، أصل.. أصل أنا مبعرفش أعبر للي قدامي أنا بحبه قد إيه، بس thank you so much على كل حاجة بتعمليها عشاني.
ابتسمتلي بحب وقالت: يلا ابدأي.
عشان الفلوس يعني؟ ياستي العزومة دي عندي، فلوسي هي فلوسك، ماتشليش هم.
محمود أنا موافقة أتجوزك.
بجد؟ أخيراً، أنا فرحان أوي، أول ما نرجع من دهب هكلم والدك.
حدفت أول سكينة على وش محمود وبعدين على ميرنا.
= كنتوا أقرب ليا مني، انتوا مقرفين ومش بس تستاهلوا طعنة واحدة، انتوا تستاهلوا كتير، إزاي مخدتش بالي إنكم كلاب فلوس.
فضلت أحدف السكاكين ورا بعض.
روحت لميتها من الأرض وعملت علامة ❌ عليهم.
قعدت أقطع في الصور.
إنتو انتهيتوا بالنسبالي، انتهيتوا.
سامعين؟
قولت بتنهيدة وعياط:
إنتهيتوووووووووو.
فريدة جريت عليا.
- كفاية عياط، كفاااية.
مسحت دموعي وخدت نفس طويل وابتسمت.
شاورت على قلبي.
= بالعكس، أنا حاسة إنه كان في نار جوا وإنطفت، كان في عبء كبير أوي.
- العبء راح؟
= مكنش هيروح لو مكنتيش موجودة!
صحيت الساعة 8 لقيت فريدة بتصلي.
وسلمت وقامت تلبس الشنطة.
= انتي رايحة فين الصبح كده؟
- رايحة الشغل، كملي نومك، انتي دقيقتين وهقفل النور.
= أنا هاجي معاكي، هما مش محتاجين حد؟
بصتلي بصدمة وهي فاتحة بوقها.
- تيجي معايا فين الشغل؟ تقصدي تشتغلي معايا وكده؟
= آه، في إيه؟ هو ممكن ميقبلونيش؟
- لا تتقبلي عادي، بس انتي متأكدة إنك عايزة تنزلي تشتغلي؟ انتي ندي ها...
= ندي بس بدون هانم، خمس دقايق وهكون جاهزة، مش هتأخر صدقيني.
دخلت لبست دريس أبيض من دولاب فريدة ولقيت طرحة شكلها حلو لونها وردي.
= فريدة تعالي ثواني.
- إيه؟
= أنا عايزة أتحجب، ممكن تلفيلي الطرحة دي زي ما انتي لفاها.
وأه، أول ما نيجي ممكن تعلميني أصلي إزاي وكده عشان مبعرفش!
عارفة إن طلباتي كترت بس و...
ولسة مكملتش الجملة خدتني في حضنها وعنيها مدمعة من الفرحة.
- انتي عارفة إني فخورة بيكي؟ كإنك بنتي وبشوفك قصادي بتكبري في نظري وفي قلبي والله.
= انتي بجد فخورة بيا؟ يعني أنا مش وحشة ومش فاشلة؟
- لا انتي مش كده، جايز تكوني كنتي بس حالياً لأ.
يلا بقي عشان منتأخرش على الشغل.
روحت معاها الشغل.
المدير كان بيبصلي من فوق لتحت.
- اشتغلتي قبل كده ياندي؟
= لأ.
- قولتيلي اسمك إيه؟
= ندي.. ندي سليم عبدالعزيز.
فضل متنح شوية.
- أنا زي ما أكون سمعت الاسم ده قبل كده بس مش فاكر.
نظرت بربكة وتوتر في الأرض.
- تمام، تقدري تبتدي شغل من النهاردة. بالنسبة لضوافرك دي لازم تقصيها.
= أفندم؟ انت متعرفش أنا دافعة عليها كام عشان تبقى كده.
قام من على المكتب بغضب.
- نعم ياختي!!!
بصتله بإشمئزاز.
= إيه الطريقة impudent دي؟
- بقي أنا واقح؟
= وه، انت بتعرف إنجلش. sorry!
نده على السكرتارية قالها تنده فريدة.
راحت تناديها.
- صاحبتك ياهانم فاكرة نفسها في التجمع أو جاية بيوتي سنتر.
_ هي عملت إيه بس يافندم؟
- بقولها تقص ضوافرها تقولي انت مش عارف أنا دافعة عليها كام، ومش بس كده دي بتقول إن طريقتي impudent، متخيلة؟
فريدة قربت ناحيتي خطوتين.
- يعني إيه impudent ياندي؟
= يعني وقح، بيقولي نعم ياختي يبقى وقح ولا مش وقح؟ أنا مش أخته ده في سن جده.
حطت إيدها على بوقها وهي مصدومة من الكلام اللي قولتهوله.
وقفت قصاد المدير وهي مميلة دماغها في الأرض.
- أنا آسفة جداً حضرتك.
_ انتي مطرودة انتي وصاحبتك، اتفضلي روحي الحسابات صفي حسابك وامشي.
= I's, ok go to the hell.
بصتلي ونظراتها مليانة حزن.
= فريدة انتي زعلانة مني!
- ........
= فريدة.
مش بتردي عليا ليه؟
- انتي ليه مصممة تحرجيني ليييه؟ أنا آذيتك في إيه؟ أنا لقيت الشغل ده بطلوع الروح.
=. أنا آسفة.
- انتي فاهمة الموضوع غلط، الاعتذار أحياناً مبينفعش طول ما المواقف بتتكرر.
... أنا زهقت منك، زهقت! طباعنا مختلفة ومش هعرف أتأقلم.
قولت بتنهيدة حزن.
= تقصدي.. إنك زهقتي مني؟ مبقتيش حابة تكملي معايا؟
أنا.. أنا معرفش حد غيرك دلوقتي، محدش وقف جنبي غيرك، كلهم سابوني.
أنا عارفة إني مستفزة شوية.. لأ لأ كتير وتنكة وساعات ببقى مغرورة وميعجبنيش العجب، بس صدقيني غصب عني، أنا اتولدت كده.. اتولدت في مكان راقي وكل حاجة كنت بشاور عليها بابا كان بيجبهالي.
كان بيحاول يعوضني عن غياب ماما لحد ماكبرت وهو اللي بقى ضد تصرفاتي ومصاريفي اللي هو أصلاً خلاني أتأقلم عليها وعايزني بعد ما أتأقلم أتغير.
- ندي أنا أس...
= انتي كمان عندك حق تزهقي مني، ومحمود وميرنا حقهم يحبوني عشان فلوسي.
رجعت بضهرى لورا وأنا بكلمها لحد ما بقيت بعيدة عنها.
= أنا ماشية، أتمنى متزعليش مني.
فريدة بصتلي بخوف وصدمة.
- ندي احسبي!
ندي تعالي هنااااا! فيه عربية.... العربية هتخبطك.
ندااااااااااا.
محستش بنفسي غير وناس كتير متلمة حواليا وفريدة منهارة من العياط.
رواية اغنى فقيرة الفصل الرابع 4 - بقلم سمية خالد
ندي حاسبي
ندي تعالي هناااا في عربية .... العربية هتخبطك
ندااااااااااا
محستش بنفسي غير وناس كتير متلمين حواليا وفريدة منهارة من العياط وصوت عربية الإسعاف وهي جايه وبيحطوني علي الترول
"فريدة"
جريت علي الدكتور
دكتور ندي هتبقي كويسه صح ، ندي مينفعش يحصلها حاجه
بصلي بأسف
ندي عندها نزيف حاد ف دماغها ادعيلها تعدي المرحلة دي لإنها خطر جداً
لبس الماسك ودخل أوضة العمليات
قعدت علي الأرض وانا منهارة
كل ده بسببي أنا السبب ندي لو حصلها حاجه انا مش هسامح نفسي
مسكت الفون
إتصلت برقم
أيوة أنا فريدة ، ندي عملت حادثه
الدكتور خرج وقال
احنا حاولنا نوقف النزيف علي مانقدر وهي عدت الخطر الحمدلله أول ماتخرج من العناية وتتنقل ف ألأوضة تقدري تدخليلها
عدي نص ساعة نقلوها الأوضة العاديه
قعدت علي الكرسي اللي جمب السرير أقرألها قرأن و قومت صليت العشا ودعتلها
"ندي"
كنت حاسة بوجع شديد في دماغي وحسيت بحد دخل الأوضة وسمعت طراطيش كلام مش عارفه ده حلم ولا انا فين بظبط
هي دي الأمانه اللي أمنتك عليها ي فريدة !
سمعت الجملة دي من هنا ولاقتني نمت فجأة صوته كان مألوف عليا
زي ما أكون سمعاه مش قادره أحدد
لقيت واحدة قاعدة قصادي علي الكرسي وعمالة تعيط قالت بتهته
ندي قومي بقي كل ده نوم وحشتيني
بصتلها ب إستغراب وتعجب
انا ايه اللي جابني هنا !وانتي مين ؟
انا مين إزاي بصي ي ندي أنا عارفه إنك زعلانة مني انا أسفه علي الكلام اللي قولته انتي مش عبئ والله
انا متفهمه كلامك بس انا فعلا معرفش إنتي مين ومين ندي اللي بتتكلمي عنها ؟
فريدة التفتت يمين وشمال وقامت من علي الكرسي وهي بتجري
"فريدة"
دكتور هشام ندي ...ندي مش فكراني ازاي مش حضرتك قولت العملية نجحت طب طب ازاي مش فاكره حاجه دي حتي اسمها مش عرفاه
بصي يافريدة انا كنت عامل حساب حاجه زي دي تحصل بس مرضتش أقولك الا لما تفوق ونشوف وضعها.. بس معني ان مش فاكره حتي إسمها يبقي شكي في محله ندي جزء من خلايا مخها إتأثر وتعرضت لفقدان ذاكرة طولي في فقدان ذاكرة طويل بيقعد فترة طويلة وممكن مايرجعش وممكن يرجع
ثواني انا كنت بشوف ده بس في المسلسلات الهندية والروايات وكده يعني بجد ممكن ماتفتكرنيش تاني_واحتمال كبير أوي تفتكرك لو مشيتي ب اللي هقولك عليه
إتفضل
شخصية ندي ، انتي أكيد عاشرتيها وعارفة طريقه كلامها وبتحب أي وبتكره اي
مش فاهمه
يعني كل اللي ندي كانت بتعمله انتي تعمليه قدامها
بصتله بصدمه
متأخذنيش يادكتور بس ندي قبل ما طريقتها تتغير في الفترة الأخيرة كانت شخصية متنمرة متكبرة بتهين اللي قدامها علي مستواه لمجرد انها كانت غنيه
كانت غنية؟
أيوة ،ندي بنت رجل الأعمال سليم عبدالعزيز
أكيد سمعت عنه
معقولة ؟ سليم الله يرحمه كان صديقي كنت بحبه أوي كان بيحكيلي عن بنته لما بنتقابل بس مخدتش بالي من شكلها
بصي ي فريدة انتي هتقوللها إن هي اسمها ندي ..ندي بس ، وزي ماقولتلك أياً كانن طريقتها ف حاولي تتعاملي بيها قدامها انتي مش هتحكيلها حاجه عن حياتها لأنك لو حكيتلها ممكن تتعرض لصدمة وت....
وايه ي دكتور !!!!!
بعد الشر ممكن تموت ، لكن لو انتي اتصرفتي بطريقتها دماغها هتجمع هتحس إن هي عاشت أحداث زي دي قبل كدة
روحت ل أوضة ندي
"ندي"
ها مش هتقوليلي انتي مين بقي؟
بصي مبدأيا انتي إتعرضتي لحادثة واحنا مروحين سوا ، وإنتي إسمك ندي وانا فريده صاحبتك احنا مع بعض في نفس الجامعة وعايشين في بيت واحد اللي هو بيت خالتو
طب وأهلي هو انا ماليش أهل ليه محدش جيه سأل عني !
انا معرفش حاجه عن أهلك مكنتيش بتحكيلي كتير انتي حاليا فاقدة جزء من ذاكرتك
إتصدمت من كلامها وبدأت أحس بصداع شديد ودماغي توجعني أوي
حطيت إيدي الإتنين علي دماغي وانا موجوعه
أنا فاقدة الذاكرة ؟
انا انا مش فاهمه حاجه
فريدة قامت من علي الكرسي فضلت تهديني وتطبطب عليا
انا معاكي لحد ماترجعي أحسن من ألأول وتفتكري كل حاجه
طب ممكن نروح انا زهقت من قاعدة المستشفي
بكرة هنروح ياحبيبتي
"فريدة"
ماما ارجوكي اتصرفي معايا علي إنك خالتو مش ماما ، ندي هتخرج بكرة من المستشفى ومفهمها ان إنتي خالتو
ماتقوللها الحقيقة وتخلصي يابنتي
مينفعش كدة ممكن يحصلها حاجه ، وهبقي افهمك بعدين أنا قولتلها ان ده مش بيتي ليه
"ندي"
فريدة جت خدتني من المستشفى وبصراحة كدة أحسن مش هنكر كنت طول الوقت بحاول أفتكرها حاسه إنها مش غريبة عني
انتي ساكنه فين
خالتو ساكنه في المطريه
يعني ايه مطريه هي بتمطر كتير هناك؟
إبتسمتلي بحب
اممم حاجه زي كده
روحت معاها البيت وخالتها كانت واقفه علي الباب هي اللي بتستقبلنا
اهلا اهلا بروح قلبي الف سلامه عليكي
أخدتني ف حضنها بكل حب وحنية
زي ماتكون أخدتني ف حضنها قبل كدة حضنها عامل زي حضن الأم اللي مجربتوش
فريدة شاورتلي علي السرير وقالتلي دي أوضتك إرتاحي
كانت بتمر الأيام عليا بسنة كإني عايشه ف حياة مش بتاعتي
طول الوقت كنت بحاول أضغط علي دماغي عشان أفتكر
بصيت علي المروحة "وكنت بفتكر الكلام بس وشوش الأشخاص مش واضحه نهائيا
كراما ليكي هخلي المروحة عندك النهاردة بعدين هحطها نحيتي عشان مابتلفش غير علي إتجاه واحد
عمرك ماهتفهمي كلامي غير لما تكوني ممعكيش جنيه واحد
ازاي بقي دول أكتر ناس بيحبوني وبيخافوا عليا وبذات ميرنا
محمود إبراهيم خطيب ميرنا علي "الأمس"
هي أنتصاري الوحيد وداعاً للأخرين
قعدت علي السرير ودماغي هتنفجر كلمة هتنفجر دي كلمة قليلة
قعدت أعيط وب إنهيار ندهت علي فريدة
فريدااااااااا
طلعت تجري من المطبخ عليا وهي بتهديني حطت إيدها علي دماغي
يالهوي انتي مولعه ياندي ثواني طب إهدي اهدييي هيحصلك حاجه
راحت جابت طبق مليان ماية بتلج وحطتلي قماشة علي جبيني
قولت بتهته وعياط
بالله عليكي لو تعرفي عني حاجه متخبيش انا هنفجر من التفكير انا زي ما أكون جيت هنا قبل كدة
شاورت علي البلكونه
ايوة انا حاسة اني جيت قبل كدة بس فين وازاي مش قادره أفتكر
فريدة كانت بتتهرب من أسألتي وبتحاول تنيمني
أخدت الطبق ولسه هتقوم
مسكتها من دراعها
مين ميرنا محمود ؟
وش فريدة قلب ألوان قالت ب إرتباك
"فريدة"
اول ما ندي سألتني عن ميرنا ومحمود قلبي إتقبض
إفتكرت كلام الدكتور
بصي ي فريدة انتي هتقوللها إن هي اسمها ندي ..ندي بس انتي مش هتحكيلها حاجه عن حياتها لأنك لو حكيتلها ممكن تتعرض لصدمة وتموت
دلني يارب مش عوزاها تضيع مني
"ندي"
ميرنا ومحمود اتخطبو دول كانوا زمايلنا في الدفعه بس مكناش قريبين ليهم وكده
أممم طب ماتقولي كده دة انتي وشك قلب ألوان أول ما سألتك
لا انا بس متوترة بقالي كذا يوم ، المهم ممكن تنامي وترتاحي دلوقتي اه انا عملتلك شربة خضار تاكليها وتنامي عشان انا نازلة
رايحة فين
"فريدة"
مش هنكر إنه كان صعب عليا إنه أأدي دور ندي
انا شخصية ماتولدتش وف بوقها معلقة دهب ،متعودتش أتنمر أو أستقل بحد
بس الأكيد إني ده هيبقي لمجرد فترة أنا مش هفضل أمثل الدور دة علي طول
"ندي"
بصت علي ضوافرها وقالت
رايحة البيوتي سنتر ضوافري بقت شكلها وحش خالص متخيلة بقالي أسبوعين معملتهاش باديكير
وهعمل شوبينج في محل لسه فاتح جديد محتاجه حاجه أجبهالك
لأ
"فريدة"
روحت محل إكسسوري اشتريت ضوافر ومانكير وقعدت أحطها في إيدي كإني روحت بيوتي سنتر
كنت شايلة 3الاف جنيه علي جمب لوقت الشدة روحت إشتريت بيهم شنط ودريسات وسلسلة فضة
روحت البيت وماما فتحتلي
فريدة انتي من إمتي بتصرفي فلوسك علي كل ده
بصت علي ايدي بدقة
الله الله مطولة ضوافرك وحطالي مانكير
حطت إيدها علي دماغي
لا انتي مش سخنه ! هتقوليلي اي التغير المفاجئ ولا أخد الحاجات دي وارميها في الزبالة
يأمي قولتلك قبل كدة هفهمك كل حاجه في الوقت المناسب
لا هتفهميني دلوقتي
ماما ندي فاقدة الذاكرة انا حاليا بحاول أمثل شخصيتها عشان تفتكر هي كانت اي لان مينفعش تعرف هي مين بالحكاوي وبس الدكتور قال لازم تمثليها لحد مع الوقت تفتكر لوحدها ف اعذريني الفترة دي أرجوكي لإني هلكانه.
دخلت الأوضة اللي فيها ندي
ومديت إيدي
بصي روحت عملت ايه في البيوتي سنتر حلو؟
جميل اوي
طلعت الشنطة اللي جيباها كانت مليانه فصوص دهبي ولونها إسود
واو الشنطة تجنن
رفعت راسي بكِبر
عارفة دي بكام ، دي ب10000 بس متخيلة
مش شايفة إنه مبلغ كبير
تؤ الحاجة اللي بتعجبني مبفكرش هي بكام ....استني استني
طلعت دريس لونه أحمر ومعاه حزام محطوط في فيونكة لونها إسود في النص
الله أنا بحب اللون الأحمر جدًا
عارفة دة بقي بكام
لقيت عليه offer رهيب كان ب 5000 نزلوه ل 3000
مش غريبة انك تكوني جايبة حجات بالسعر ده ولامؤاخذة في الكلمة عايشة في بيت صغير زي ده
مسحت علي شعرها وقالت بتوتر
ده بيت خالتو زي ماقولتلك انا قاعدة معاها هنا كام يوم وبعدين بروح أقعد في البيت بتاعي لأن خالتو مبترضاش تيجي تقعد معايا يعني عشان إتعودت واتربت في المنطقة دي
انتي عندك بيت ليكي لوحدك ؟
اه هنبقي نروحها سوا في مرة
طيب فريدة انا عاوزة أشتغل زهقت من البيت بجد
يابنتي انتي لسه مبقالكيش كام يوم جاية من المستشفى
عشان خاطري تعالي ننزل نشوف شغل
"فريدة"
عمري ما تخيلت في حياتي إن ندي يجيلها يوم وتصرً علي الشغل وهي عمرها ما إشتغلت
...روحت المكان اللي كنت شغالة فيه قبل كده وإتأسفت للمدير نيابة عنها
انا جيالك النهاردة عشان تساعدني
اساعدك في ايه
حضرتك فاكر البنت اللي جت معايا اخر مرة لما طردتني أنا وهي
ملامح وشه اتغيرت واتضايق
ايوة ودي تتنسي برضو
البنت دي بتمر بحالة صحية مش كويسه وفاقدة الذاكرة وانا بحاول اعمل كل الحاجات اللي هي بتعملها عشان تفتكر هي مين
واحدة واحدة
والمطلوب؟
اللي عملته ندي المرة اللي فاتت انا هعملو
انتي جايه تهزقيني بقي؟
أبداً والله بس بالطريقة دي ذاكرتها ممكن ترجع ممكن حضرتك تساعدني ،بس
بعد مرور يوم
"ندي وفريدة"
الدولاب عندك ياندي البسي اللي انتي عوزاه
دولابها كان معظمه دريسات وچيب ، لقيت دريس لونه أبيض ومتعلق معاه طرحة وردي
"بدأت أفتكر الكلام"
أنا عوزة أتحجب ، ممكن تلفيلي الطرحة دي زي ما إنتي لفاها
انا فخورة بيكي ي ندي
كل ماكنت بفتكر جزء دماغي كإنها كانت بتعاقبني إني كنت بحاول
مفيش أصعب من إنك تصحي في يوم ماتعرفش إنتَ مين ومين أهلك أو ايه اللي حصلك متعرفش حتي إسمك إيه !.
انا فريدة وهي ندي
اسمك الثنائي ايه ي ندي
هزيت دماغي وقولت بتوتر
معرفش ... معرفش
تمام تقدرو تبتدو شغل من النهاردة وبالنسبة لضوافرك ي فريدة والمونكير اللي حطاه ده لازم يتشال وتتقص قوانين الشغل
بصتله بسخرية
أفندم ؟ انتَ متعرفش أنا دافعه عليها كام عشان تبقي كده
قام من علي المكتب بغضب
نعم ياختي !!!
بصتله ب إشمئزاز
ايه الطريقة impudent دي
بقي أنا واقح ؟
وه ، انت بتعرف إنجلش
sorry !
بصيت لفريدة ب إستغراب
عيب كدة يافريدة اي الكلام اللي بتقوليه ده
انا بعتذر نيابة عنها هي بس تعبانه اليومين دول ان شاء الله نكون عند حسن ظن حضرتك
"فريدة وندي"
مش هنكر اني زُهلت من طريقة ندي لدرجة اللي خلتني أسألني " معقوله هي دي ندي اللي اعرفها قبل كدة؟
شكرا ي ندي إنك أنقذتيني بس فعلا انا لسه عاملة ضوافري امبارح ازاي عايزني أقصها
مش حاسة انك متكبرة شويه ، بصي ي فريدة أحيانا الإنسان لازم يتنازل علي حاجات معينة في حياته عشان ميخسرش كل حاجه واحنا لاقينا الشغل ده مينفعش نخسره
حاضر ي ندي
شِلت الضوافر اللي كنت لزقاها
ولقيت ندي بتقص ضوافرها دي كانت معجزة ندي ..ندي هانم اللي كانت بتروح بيوتي سنتر لما ضوفرها يتكسر هي اللي بتقصهم دلوقتي ؟
بدأنا نشتغل سوا أول يوم كان متعب علينا وبذات عليها هي كانت لازم ترتاح بس ندي الجديدة بتكره قاعدة البيت وحابة إنها تشتغل
المدير كان بيمرً علينا كل يوم وبيلاقي ندي مركزة في شغلها وبتبذل جهد كبير إبتسملي بثقه وقالها
انا مبسوط منك ي ندي وبالشغل بتاعك
بشكرك جدا جدا ان شاء الله اكون عند حسن ظنك دايما
فريدة فريدة النهاردة كام في الشهر
النهاردة 1
إتنططت في مكاني من الفرحة
الله هنقبض النهاردة ، العزومة النهاردة عليا ها تحبي تتغدي اي ؟ وكلمي خالتو شوفي نفسها في ايه
بصتلي ب إبتسامة حب
حبيبتي إنتي تعبتي عشان تقبضي الفلوس دي مينفعش تخلصيها علينا وبعدين منا كمان هقبض
اخلصي بقي يافريدة متكسفنيش
طب أنا موافقه بس علي شرط
ايه هو
هنتقاسم الحساب ...يتقسم علينا احنا الإتنين
طيب تحبي تاكلي اي رأيك كباب وكفته
وه لسه كانت علي لساني هقولها
طيب يبقي اتفقنا بالنسبة للحاجة السقعه في دي بقي عليا ولو فتحتي بوقك هزعلك
خلصنا شغل وروحنا علي الحسابات قبضنا ال 1800ج
بصيت لفريدة وعيوني مدمعه
أنا أول مرة احس اني مبسوطه النهاردة وان
ا بقبض فلوس انا تعبت فيها حاسة إني بعمل إنجاز
انتي فعلا عملتي إنجاز وانا فخورة بيكي ، يلا نركب العربية قبل ما تتملي
لقيت فريدة بتبص علي العربية بتمعن
ايه ده دي عالية أوي انا مش هعرف اطلعها
ندهت للسواق
لو سمحت ي أنكل هو مفيش كرسي أطلع بيه علي العربيه لإنه عليا عليا أوي
لو سمحت ي إيه
يا أنكل هو مش حضرتك أنكل برضو
لا اله الا الله اي الأشكال اللي بنقابلها علي المسا دي
ندي مسكت إيدي جامد وطلعتني غصب العربية
معلش ياسطا أصلها تعبانه شويه
أنكل ايه ياهبلة انتي فاكرة نفسك ف مدينتي ولا التجمع
حيث كدة انا ال هقعد علي الشباك
ومقعدش ليه انا ان شاء الله
فضلنا نتخانق علي شباك ، فريدة قالت بدون تفكير
انا قعدتك المرة اللي فاتت جمب الشباك عشان اول مرة تركبية المراد مش هتنازل
حسيت الموقف متكرر وبدأت اضغط علي دماغي عشان افتكر
انا علي طول كنت بقعد في عربية بابي جمب الشباك سبيني اقعد
كنت متأكدة إني مش ههون عليكي وهتخليني أقعد جمب الشباك
فريدة thank you so much علي كل حاجه بتعمليها عشاني
لفيت ايدي حوالين دماغي وانا بتألم
أأدأه مش قادره ي فريدة دماغي هتنفجر حاسه إني بموت
قولت وانا بتنهد
الحح الحقييني ي فريدة
"فريدة"
ندي ..ندي فوقي
نزلت ندهت السواق يودينا المستشفي
يا دكتور انا عملت وبعمل زي ماقولتلي بظبط وف كل مرة كانت بتتألم من دماغها وبهديها بالعافيه بس المرادي اغمي عليها
ندي لو مفاقتش هتدخل في غيبوبة ، انا عملت اللي عليا والله ان شاء الله هتقوم بالسلامة
قعدت أعيط ب إنهيار
هتفوق..هتفوق هي مش هتسبني أنا ماليش غيرها
دخلت ألأوضة وقعدت في الكرسي اللي قصادها
عارفة إنك سمعاني وحاسة بوجودي اي رأيك أحكيلك رواية
كان في بنت غنية أوي وعندها فلوس كتير وصحاب كانت مخطوبة وبتحب خطيبها ومتكبرة لحد ما جيه يوم عليها باباها مات ومسبلهاااش أي حاجة وخطيبها طلع واطي سبوها طلعو كانوا بيحبها عشان فلوسها بس لحد ما صحبتها وقفت جمبها وبقو يشتغلو والبنت الغنية دي بقت تشتغل وتحس بقيمة الجنيه اللي طالع من جيبها واتحجبت وبقت تصلي ومبتقللش من قيمة حد
لقيت صوابع ندي بتتحرك
رفعت دماغي لقيتها بتفتح عنيها براحه
"ندي"
البنت دي بقي إسمها ندي
انتي .. انتي فوقتي
فضلت تبوس ايدي
أيوة اسمها ندي ونايمة علي السرير قدامي بتكلمني
قوليلي مامتك عاملة اي ؟
ماما؟
أيوة مامتك نستيها ؟ وحشتني الملوخية بتاعتها الكام كيلو ال تخنتهم حاسه انهم إتشفطو
ندي انتي فاكرة مامتي والأكل وكدة طب دول كام؟
يابنتي هو حد قالك اني عامية دول خمسه
بصيت علي ضوافري
فريدة بليز ممكن أول ما نطلع من المستشفى نروح البيوتي سنتر ضوافر ايدي شكلها بقي مقرف
إبتسمت بحب
كدة أنا إتإكدت إن ندي رجعت وحشتيني يابنت الإيه
وانتي كمان والله ، علي فكرة انا مش ناسية الكباب والكفته أنا قولت هعزمك يبقي هعزمك
ميلت دماغي وبصيت في الأرض بهزيمة
هو بابا فين ؟
بس ..بس باباكي مات ي ندي !
انتي بتقولي ايه !!!بابا ماماتش انتي بتكدبي عليا
طيب إهدي ...اهدي دقيقة وجيالك
"فريدة"
ي دكتور ندي افتكرت كل حاجه الا موت أبوها
ندي إفتكرت اللي هي عاوزة تفتكره لكن الحاجة إللي عوزة تمحيها بتحاول متفتكرهاش
"فريدة وندي"
أول ما تخرجي هنا هوديكي مكان منتظرك بقاله فترة
مكان ايه ؟
بعد مرور تلت أيام
وقفتني قدام ڤيلا
احنا داخلين فين الڤيلا شكلها مش غريب عليا
هتعرفي أول ماتدخلي
طلعت أول سِلمه الأمن اللي علي كانوا بيميلو راسهم ويقولولي أتفضلي ياهانم
انا هانم ؟
دخلت الصالون لقيت حد قاعد علي المكتب وقاعد بضهره علي الكرسي
حضرتك م...لف الكرسي وقال بصوت حاد
سليم ...سليم عبدالعزيز
قولتيلي اسمك اي؟
ندي ..ندي سليم عبدالعزيز
عمرك ماهتفهمي كلامي غير لما تكوني ممعكيش جنيه واحد
وافرض صحيتي في يوم لقيتي كل دة إختفي ؟لما تتحطي في مِحنه هتعرفي مين صاحبك الحقيقي ومين كان مجرد موجود بياخد منك بس
"انا ندي هانم انزل اشتغل يعني اي شغل !
قولت بصدمة وتهته
البقاء لله ، والدك مات بأزمة قلبية
بب ..بابا
حطيت لمست وشه
إنتَ ماموتتش ! عايش بتتكلم قدامي ...بس قالولي انك مت
قولت بعياط وحُرقة
انت سبتني وروحت فين انا ..انا بقيت وحيدة من بعدك زي اللي تايهه ومش لاقيه طريقي
طيب اهدي اقعدي علي كرسي وهتعرفي كل حاجه
"فلاش باك"
"سليم وكرم المحامي"
ندي مش هتعرف قيمة الجنيه غير لما الفلوس تتبخر من قدامها وانا مكنش موجود
مش فاهم سعاتك
انا همثل اني مت ،ودي الوصية ال مكتوب فيها اني ملهاش اي حاجه من الورث والڤيلا وأي حاجه تخصني بتاتاً
ايوة بس كدة ندي هتتبهدل انت كده هترميها في الشارع
دي بنتي الوحيدة مش هرميها في الشارع ، اه هتتبهدل لأنها طبعا ماتعودتش ع الحياة دي بس والحياة دي هي اللي هتكشفلها الناس المزيفة اللي ف حياتها زي منا متأكد ان ميرنا ومحمود كلاب فلوس بمجرد مايكونش معاها مليم هيسبوها
ندي هتكون مع مين
مع اللي بتحبها لذاتها رغم ال بتعملو فيها وهي مش شيفاها "فريدة عدنان "
البنت دي نقية جدا لبسها بسيط وشكلها بنت ناس طيبة اه مش غنية بس عنيها مليانه حاول تجبلي رقمها ف أسرع وقت ممكن
"''فلاش باك علي أرض الواقع "_
انا مرمتكيش في الشارع انا كنت سايبك مع إيد أمينه واثق إنها هتخلي بالها عليكي
بصيت لفريدة
يعني كنتي عارفه ان بابا ماماتش وسبتيني قدامك أنهار لي كده لي عملتي فيا كدة
بابا قاطعني
هي ملهاش ذنب ده كان أمر مني خليني أكملك
غرضي من ده كله تعرفي حقيقة الناس اللي حواليكي وتعرفي قيمة كل قرش بيطلع من جيبك والصراحة أبهرتيني كنت قاعد هنا بتفرج عليكي وانتي بتشتغلي وفرحانة ب أول قبض بتقبضيه
كنت بتفرج وانتي بتعتذري للمدير علي طريقة فريدة اللي هي اصلا تمثيل عشان ترجعلك ذاكرتك لما عملتي الحادثه
"فلاش باك "
جتلك المستشفي بعد مافريدة كلمتني
أيوة أنا فريدة ، ندي عملت حادثه
زعقت لفريدة وهي ملهاش ذنب وقولتلها
هي دي الأمانه اللي أمنتك عليها ي فريدة !
انا اخترتك دونا عن الجميع ، انا لازم اخد ندي من هنا انا هوديها أحسن مستشفى في العالم انا اللي عملت فيها كدة انا اللي رميتها
وقتها فضلت تتحايل عليا ماخدكيش وقعدت تعيط كتير عليكي شوفت حبها ليكي ف عنيها ولما عرفت ان صاحبي اللي ماسك حالتك اطمنت عليكي
فلاش باك علي ارض الواقع"
رجعت بعد ما عرفت انك عرفتي حقيقة اللي حواليكي وأظن قولتلك قبل كدة هتعرفيهم في وقت المحنه بدليل ان ميرنا ومحمود اتخطبو متخيله انهم كانوا بيخونوكي طول الوقت دة وانتي مخدتيش بالك
كل ده مكانش سهل عليا بس كان بيهون بمجرد مابشوفك سعيدة ومتأقلمة علي حياتك الجديدة وسعيدة بالقبض ال قبضتية عشان عارفة انك تعبتي فيه
انا كمان غلط لإن انا اللي ربيتك وكبرتك علي ان اي حاجه تعجبك بجبهالك حتي لو بمليون جنيه مكنش من السهل عليكي تتغيري علي نظام تاني انتي ماتعودتيش
أنا النهاردة ولحد أخر عمري فخور بيكي وبإنجازك وبالحجاب اللي علي راسك
لقيت ناس داخلة من الباب لفيت راسي لقيت
المدير بتاع مصنع الأدوية.
والدكتور اللي كان بيعالجني
وسواق الميكروباص
ومامت فريدة
وقفو كلهم قصادي وبابا راح وقف قصادي
وكلهم سقفولي
لقيت يافطة كبيرة نزلت من فوق مكتوب فيها
وصيتي عندما أموت جميع ممتلكاتي تعود لإبنتي الوحيدة ندي
الڤيلا ، حساباتي التي في البنك ، تعود لرفيقة عمري وحياتي ندي أحبك ندي
دي الوصية الحقيقيه ودول كل الناس اللي ساعدو في إنك تبقي هنا النهاردة
كنت مصدومة وفي نفس الوقت الفرحة مش سيعاني مش عشان الوصية طلعت غلط لأ عشان بابا طلع عايش
إكتشفت إن الغنا الحقيقي مش غنا المال ممكن يبقي غني النفس غني في خب
بابا
جريت علي بابا حضنته
انا زعلانه منك أوي بس اكتشفت اني بحبك أوي والله
بصي جبتلك شنطة من باريس موديل السنادي عارفه بكام ؟ ١٢٠٠٠٠ج
تؤ تؤ مابقتش عوزاها معايا شنط كتير جبتها من العتبة الواحدة ب70ج لازم نعرف قيمة الجنيه اللي بيطلع مننا عشان مانخسرش كل حاجه
ضحكو كلهم بفخر وسقفولي
استأذنت بابا وروحت أتمشي مع فريدة
بقي انتي يطلع منك كل ده
ندي عشان خاطري ماتزعليش مني والله لما حصلك حاجه كنت هموت من القلق عليكي ماتزعليش مني
قاطعتها في الكلام وحضنتها
هو انا قولتلك قبل كده إني بحبك ولا لأ
ابتسمنا لبعض ومشينا
عارفة ي ندي حكايتنا عاملة زي رواية لسه كنت بقرأها وحكتلك منها جزء لما كنتي في المستشفى لواحد كده اسمها سميه خالد
أيوة أيوة الإسم ده حاسه إني سمعته قبل كده فعلا
قولنا بصوت واحد
كاتبة رواية أغني فقيرة
تمت النهاية