تحميل رواية «ابي والغزلان للكاتبة ريام هادي (REEM)» PDF

#رواية_أبي_والغزلان_الجزءالثاني

#للكاتبة___REEM___ريام_هادي

#البارت_الرابع

(لسان حال طه)

والله اتمنى اجرب نومة الليل

ومثل باقي البشر يرتاح بالي

لا كادر وغير واقع الحال

ولاكادر اصيرن لاابالي

ويكولون الوكت مقسوم نصين

نهار وليل شو كلهن ليالي

بلا زحمة الزمان شعندة وياي

شنو الباقين حنضل وانة حالي

لا كاتلي سيد لا خنت جار

ولا رديت محتاج من اجالي

ومن كثر الشلتهن فوك المتون

وصلت لمرحلة اتعب من خيالي

وخلص هيج عمري وماشفت شي

عشت دور الضرير وشوفي عالي

وعجيب الناس تحسدني اعلى ياحال

وانا الماكاض ربحي ولا حلالي

خضير : احجي طه صدك انتي الي كتلت سلام اخوك وعلمود الفلوس

حجي طه : دنجت وگلي قهر وكلت اي اني الي كتلته

عبد الله : ولك ليش علمود وصخ دنيا من الاول گلبي لعب وفوكاها جاي ينفخ بروحه مااريد ورث وبس دخيل حقها مرت ابوك واخوك مو بس يأذوك يذبحوك هم

نهر : لزمت طه من الخوف گلت راح يأذوه وبدلت تعلى الاصوات مره ثانيه بس هلمره ضد طه الي بقى بس ساكت تقربت منه وهمست كول احجي لخوالك ليش كتلت سلام واذا متكدر اني احجي

جان يعصر ايدي حييل وحجه بعصبيه بس صوت ناصي وبسبب الهوسه محد يسمع بس اني لان لازكه بيه كاال

حجي طه : ايااج تحجين حرف وروح ابويه لساني ميطخ لسانج ليوم الدين ومتشوفين وجهي عمرج كله

نهر : بس شلون وشوفها بعدني ممكمله قاطعني وكال

حجي طه : طبهم مرض محد يهمني المهم طاري سليل وشرفها مينجاب كدام الناس

نهر : دنجت ونزلت دموعي هاي مو اول مره ينظلم طه دومه مظلوم ومحد فاهمه

طالب : يابه اذكرو الله وصلو على النبي وخلي نفهم هسه احنا مو بموضوع ليش دخل السجن بموضوع الاخت الاجت هداده علمود البنات

خضير : بس هو كذب علينا وتحامه بينا ودخل دخيل علينا وتاليها كاتل اخوه شلون نرضى ساعه يبقى عدنا ماتضل هنا مو اني الالفي كاتل ابن حسين الله يرحمه

سيف : يابه هسه مو وكتها

خضير : لك شنو مو وكتها موزين مني راح اطلع يمشي على رجليه

سيف : بروح جدي اعتبره غريب واوكف وياه وانسى سالفه سجنه

عبد الله : ولك شنو نسى هاي مكان ماتسحلوه هسه واطلعوه

طالب : مو ثوبنه عمي نطرد دخيل وضعيف يريد حمايتنا

نفض سالفه البنات وراها احنا اهل ونتجازه  والتردوه يصير

شعلان : منو يكول اهل اذا هو جذب بهيج شغله ميجذب بسالفه امه

سيف : كافي شعلان لتزيد النار حطب اهل مو اهل الرجال محسوب هسه علينا حسابنه ويااه بعدين المهم الجماعه شتردون هسه

سندس : اني اريد بناتي وماابقيهن اليوم ساعه عنده

حجي طه : موتيني واخذيهن

المختار : ابوحسام قانوناً البنات من حق الام عدا الجبيره حسب مفهمت بالغه السن القانوني

حجي طه : ياقانون وهي متزوجه شلون انطيها بناتي واخليهن عايشات ويه رجال غريب راجع قانونك زين

سندس : القانون ضدي بصفي تكدر تثبت هذا الشى بلمحكمه اليوم راح اخذهن بيك زود اخذهن مني بلمحكمه

سيف : بس لو افهم شلون جنت متزوجها لهاي

احد الحزبيين : احترم نفسك شنو هاي احجي وياها عدل اني ساكتلك لان ابوك وعمك موجودين اخر مره اكول انت لتدخل واحترم لو تريد اعلمك الاحترام شلونه

سيف : يله علمني بله مستحيتو على نفسكم واحدكم شكبره وجاي وره مره وفوكاها على باطل

نهر : كام خضير وسحب سيف خاف ليأذوه وخاصه من كام الحزبي يعيط ويهدد وسيف يأشر بيده شسوي سوي سحبه لبره بس هو مقبل يطلع ورجع دخل واشتغل العياط وكوه سكتهم المختار

تحركت من مكاني وكلت لطه فدووه احجي وخلي خوالك يطبكون وياك

حجي طه : نهر كافي ملحه كتلج اياج لو على موتي مااخلي بنتي يحجي بيها ذوله الزبايل وطبهم مرض خوالي صدكو وان مصدكو ميهموني اني نار وشابه بيه على البنات روحي رجعي لمكانج لو ترجعين للبيت وهذا الموضوع تنسي

نهر : صار ورجعت لمكاني واني خايفه حيل من الي راح يصير وجان يعيط طه

حجي طه : من الاخير وكدام الكل مالج بنات يمي وعود رفعي قضيه طخي راسج بلكاع متاخذيهن

جان تكوم سندس وتكول رايحه اخذهن هسه وكامت وذوله الي وياها طلعو اسلحتهم

خضير : تره عيب بويه هاي السالفه انتم بمجلسنا

احد الحزبيين : كول لطه هذا الحجي جايه مفرزه بلطريق وراح ناخذ البنات بلقوه ردنا بلعيني والاغاتي وهو صار ساعه يهدد ماعدنا غير ناخذهن بلقوه واريد اشوف منو يمنعنا

حجي طه : ماكو قانون بكيفك هي تايهه والله اشتكي عليكم بمقر حزب البعث واكول تعدو على حرمه بيتي واخذو بناتي

سندس : هاي اذا هو بيتك لو ماانت كاعد عاله على الوادم ومبهذل بناتك من بيت البيت دومك فگر وشايف نفسك ميصير براسك خير لو بعد مية سنه

المختار : حجي خضير جفن للشر والطلايب خلي ام حسام تاخذ بناتها وتروح وانت ابو حسام عندك شى تاخذهن بلمحكمه هاي السوالف كلها متفيد وماتقدم وتأخر

حجي طه : مو بكيفكم اكول الكم ماانطي بناتي لو اعرف اذبح واصلخ والقران اني ماعندي شى اخسره هنه بس هلبنات الطلعت بيهن من الدنيا ومامستعد ليله ابات بدونهن او اخلي لحظه يروحن من حضني

نهر : لحظات وطبكت سياره الشرطه الظاهر متفقين وياهم بيومها عرفت شكد سندس صارت قويه والها سلطه وتكدر تظلم بكل سهوله هي جان الفگر كاتلها ولاعبه لعب مو عاد هسه وهذا رجلها على كد ايدها ومستغلته بس لو افهم اشاف منها وصار محبس بيدها

بلحظه واشوف طه طفر على سندس ويخنك بيها ويعيط متاخذيهن اله اموتج واشتغل المصايح  اني تهسترت كمت ادك والطم على راسي راح اخويه

حجي طه : الله ياخذج ولج عاار موتيني من يوم ماعرفتج ماشوفت يوم راحه وجايه هسه تعذبيني وتاخذين بناتي

نهر : ‏شفت الولد جيتو عليه ويريدون بس يوخرون  طه منها وهي قلبت الدنيا بلعياط وكوه اتجر  النفس اشر المختار على الشرطه الواكفه بره ودخلو ركض

‏لزمو طه وجتفوه وخواله جيتو على الشرطه حسيت بلحظتها يوم القيامه وقامت على راس اخويه منا المفرزه ومنا الحزبيه ومنا سندس ومنا خواله الي رغم بعدهم وياه بس دعمهم اله قل

من جتفو اجه شعلان يهف وحجه ويه الضابط هو وسيف وكوه قنوعه مياخذه لان تعدى عليها وذوله الي وياهم واحدهم وجهه ميكصه السيف وشايلين خشمهم واني واكفه بلزاويه وبس ابجي مااكدر ادخل بنصهم كلها زلم كمت اقرا ايات وجسمي كله ينفض على ساعه روحي تطلع من الموقف والي كعد يصير

خضير : طه مالك غير حل انطي البنات لامهم وارفع قضيه وبلمحكه اخذهن

حجي طه : ماانطيها البنات لو تموت شعره متشوف منهن

عبدالله : مو بكيفك هسه تاخذهن وانت تشمرك بلتوقيف وخلي المزامط مالتك والهوسه تفيدك ولو احسن ياخذوك اقلها يبرد گلبي من سوايتك

سيف : عمي مو وكتها

طالب : ابو حسام كلام ابويه صحيح كعد تشوف بساعه وحده گلبت الحزب الي بلحي كله علينا وفوكاها جايبه جماعه من بغداد الافضل تنطيها البنات وتقدم بلمحكمه تاخذهن وان شاء الله منقصر وياك احسن محامي اجيبلك

حجي طه : ترضى ياخذون ابنك منك احجي انت اب وتعرف

طالب : حقك وداعت ابني حقك بس شوفت عينك الجماعهً ثكال وهي ماحطت مجال للتفاهم هسه تاخذ البنات وانت تذبك كم سنه بلسجن بتهمه تعدي على الحزب او اي تقرير من عدهم تاكلك كم سنه ويطيح حظك اكثر ماهو طايح وتخسر روحك وبناتك

شعلان : بكل الاحوال هسه راح اطب وتاخذهن الافضل تروح لبناتك وتكسب وقت وتفهمهن واني راح احجي ويه الضابط يطلع جماعته وهي تاخذهن بلسياره الجايه بيها احسن من الفضايح الصارت هسه ويطلعن كدام الناس بسياره شرطه

نهر : كعد بلكاع وحط ايده على راسه وكام يبجي ويباوع بوجوه خواله بلكت احد يساعده بس الفقير منو اله غير بس الله

بلحظتها حسيت بعجز اخويه وشكد الظلم صعب ويكسر صاحبه رفعت عيني عليها الحقيره يشربوها مي لان اختنكت من لزمه طه لرگبتها عساج ميته وخلصانين منج

تقرب مني طالب وكال

طالب : خويه راح اخذج للبيت ترحين للبنات تفهميهن

نهر : مسحت دموعي المقابله تسكت وكتله شفهم ابو علي يعني راح تاخذهن شون تقبلون

طالب : مجبورين خويه بس ان شاء الله مايضلن يمها كلها فتره ونرجعهن وداعت جهالي لو اعرف ابيع ملابسي وارجع بناته لحضنه بس هسه كدامج اني خايف تأذي وادخله سجن وتالي شيطلعه متكوليلي خلي نجفي الشر اليوم لان هاي مبينه عرمه ومالها رداد وگلشي تكدر تسوي احنا هسه علينا نهدي النفوس وان شاء الله بلمحكمه نرجعهن ونكسر راسها مو بس خشمها

نهر : شسوي هسه

طالب : ترحين للبنات وتكعدين وتحجين وياهن هنه مو صغار وفهميهن حتى يحضرن نفسهن ويرحن ويه امهن تره تبقى امهن مهما جان قابل راح تأذيهن لو يباتن بلشارع

نهر : حجيت بعصبيه بدون ماانتبهه

اني امهن والله مو هيه

طالب : اعرف وسمعت كل كلامج بس هذا هسه مايفيد لتأذين طه شوفي حاله وقوي مو كدامه ادكين وتلطمين يله خويه خلي اخذج مااريد الشرطه تدخل بيتنا عيب بحقنا وياخذون البنات بلقوه لان اذا صارت شعلان وسيف ما يسكتون شفتيهم يتراجفون وراح تصير مذابح وتاليها هم تاخذ البنات يله خويه ارجعج وانت بعد بشطارتج ساعدي طه

نهر : مسحت دموعي وكتله يله وعفت طه وطلعت ويااه مدنجه ودموعي تنزل امسح بطرف العبايه ومتسكت عيوني اتخيل شلون يرحن وما اشوفهن

سليل : كاعده والوب ومااعرف شسوي صار فوك الساعه ونص من راحو ولا حس ولا خبر 

ريم : ثلل تره والله خوفتينا اكعدي شويه

سليل : شكعد يمعوده واني قطره دم مضلت بجسمي من الخوف

رشا .. قابل شتريد تسوي هم الها عين واداعي بينا وتجي هداده والله ياالله

غزل : ماما ثلل شكو

سليل : ماكو شى گلبي ادخلي العبي بلعابتج

ريم : زين هي منين عرفت مكانه

سليل : ماادري ولو هي اذا تريد شى تسوي راح تسوي امكم بعد لو نسيتو

رشا .. امكم انتم اني ماعندي ام

ريم : اي مو انولدتي من البقره حبلت بيج وجابتج موو

رشا .. تسكتين لو اكوم اكطع شعرج

سليل : اسكتو مالي خلك عركاتكم

وجان تنفتح الباب وطبت ماما نهر وجهه اظلم والعيون دم صايره ركضنا عليها هااا ماما شصار

كعدت بلكاع وكالت

نهر : لمن ملابسجن ترحن ويه سندس

رشا .. اني مااروح لو اموت شنو بهاي السهوله نروح وياها وبابا قبل شلون يقبل

نهر : ابوج كطع روحه سوده بوجهي حتى الشرطه رادت تاخذه

سليل : ثلجت وگلبي دكاته اختفت وكعدت بصف ماما نهر ومصدومه واحجي وامتمت بلكلام  شلون تاخذهن هي بكيفها

نهر : اي بكيفها صايره غابه كلمن الزود اله وامج متخاف الله رادت تلوي ايد طه واطيح حظه بيجن وكدرت وهسه جايبه مفرزه والمختار وناس من الحزب وحلفت متبقيكم لحظه

ريم : وبابا سكت قبل نروح وياها

جان تكوم تلطم عمه نهر

نهر : اخويه راح يموت شلون سكت شلون لو تشوفون حاله وحده بنص الذيابه ينهشون بيه ولجن ابوجن عفته كاعد بلكاع  بنص الزلم يبجي مثل النسوان عليجن وتكولين سكت

سليل : لزمت ايد ماما وحضنتها منهاره كولش وتملخ بوجهه

جان تعيط رشا مااروح  لو اعرف اموت نفسي وطبني مرض وماابقى ساعه يمها

غزل : وين انروح ماما

سليل : سحبت غزل بحضني لان كولش خافت وهاي رشا تعيط وتبجي وماما تملخ بروحها وهي صافنه بلوجوه وريم تروح وتجي وتصيح شتريد من عدنا مكافي الصار بينا متريد تشوفنا مرتاحين

جان تندك الباب كمت حطيت الربطه على راسي وفتحتها شفت طالب بلباب مدنج ويحجي

طالب : اكدر احجي ويه خواتج اذا مابيها احراج

سليل :اشرت للبنات يلبسون ربطاتهم وماما كامت من الكاع

تفضل ابو علي

طالب : ياالله وطب للبيت وكعد والسبحه بيده جان رجال وقور ومرتب واكفات كباله اشر بيده نكعد

اكعدن خواتي

كعدنا وماما واكفه على صفحه

طالب : يمكن اني مو من حقي احجي وادخل بس سمعت عياطكم ويشهد الله صوتكم لدارنا واصل ومن جبت عمتكم كلت انتظر حتى اخذكم بلسياره مااريدكم تمشون بلشارع كدام الوادم اني جاي احجي چم كلمة اقتنعتو بيها خير وبركه مقتنعتو براحتكم محد يجبركم

سليل : تفضل نسمعك

طالب : بالاول يمكن ماتعرفين انتي ماترحين وياهن

سليل : وكفت متفاجأه شنو مااروح

طالب : اكعدي الله يستر عليج وخليني اكمل كلامي

كعدت وافرك ايد بأيد من التوتر

واباوع بوجوه خواتي صايرات صفر والدمعه بعينهن

طالب : انتي بالغه سن الرشد وماتحتاج ترحين وامج مالها حكم عليج وهم ماذكرت اسمج ورادتج هي تريد البنيات

سليل : واني مااخليهن يرحن بوحدهن هاي اذا راحن

طالب : خلي اكمل ولا تقاطعيني

سليل : العفو تفضل

طالب : ابوكم رجال تعبان وحالته تكسر الخاطر ومع الاسف ميكدر يسوي شى هسه

ريم : وانتم متكدرون

طالب : لو نكدر منقصر ولا اخليكم اطلعون هيج مكسورين الخاطر

رشا .. اني مااروح حتى لو لتسحلني مااروح وياها اكرهه مااريدها هاي مو امي

سليل : على كيفج رشا عيب

رشا .. ياعيب سليل وهي عافتنا بأهم ايام حياتنا

طالب : اني مااعرف الصار كله بس مبين حيل اذتكم وشتحجون حقكم ومحد يكدر يطلع العيبه بيكم بس الحال صعب واذا بقيتو معارضين مو بعيده توكع ابوكم بتهمه تخليكم تتحسرون على شوفته العمر كله

وهم بكل الاحوال هم تاخذكم اني اكول اكسرو الشر وروحو وياهم كلها مده ونرجعكم

سليل : شلون يرجعون

طالب : بلمحكمه نقيم دعوه ويطلب بيها طه حضانت البنات وراح يسأل القاضي المن تردون منهم وخاصه البنات عابرات العشر سنوات

رشا .. يوم مااروح يمها مااتحملها والله من اشوفها اتذكر كولشي صار بينا

طالب : لترحين بس بعدين لتبجين اذا ابوج صار بيه شى

ريم : قابل شتريد تسوي

طالب : على الشفته اليوم كولشي تكدر تسوي من كلامهما عرفت همها الجبير اذيه ابوكم واي رفض منكم هسه راح ابوكم ياكلها ويتأذه وانتم بعد بكيفكم

سليل : مااعوف خواتي وحدهن

طالب : الافضل تبقين حتى لتصعبين الشغله على طه

شوفو بنات اذا اكو رابط دم بيني وبين ابوكم او ماكو كلمة شرف مني ارجعكم اله وكلت هذا الشى لعمتكم بس رايد منكم ترحمون حال ابوكم المسكين تره كلها ضده هسه لتصيرون انتم هم عليه عندكم خياران ماكو ثالثهم لو تشترون ابوكم وتتحملون مده يم امكم لحين منرجعكم لحضنه لو مترحون واتحملو الي راح يصير بيه

سليل : رفعت راسي على خواتي شفت ريم تاكل بأظافرها ومدمعه ورشا تهز برجلها ومدنجه ودموعها توكع على رجلها وغزل صافنه متعرف الي ديصير وماما نهر حاطه العبايه على وجهه وتشهك من البجي

اما احساسي اني نفس احساس يوم مااحتركنا نفس الخوفه لا افقد خواتي نفس الرهبه حسيت ماما سندس هي النار الجايه تاكلنا لو نطلع منها على خير لو هم كل وحده بينا تترك بيها عاهه العمر كله تبجي من وراها

جان تكوم رشا ودخلت وراها ريم

سليل : كمت اشهك متحملت باوع طالب على ماما نهر وكال

طالب : اني بره انتظر قرار البنات

طبيت وراهن لكيت يحضرن بملابسهن كل وحده لازمه علاكه وتحط ملابسها بيها

ويبجن مكدرت اتحرك ودنجت وكعدت باب الغرفه اشوف شلون يحضرن بغراضهن وغراض غزل

انداريت على ماما وكعدت بصفها

فدووه ماما مااكدر بلياهن خلي اروح وياهن اقلها عيني عليهن

نهر : اله انتي مستحيل ترحين تعرف بيج امج اطلكتي مو بعيد تورطج بزواج بصخام بوجهه شى يخليج ترضين حتى خواتج يرجعن مااضمن سندس ستفكر هاي حيه تلدغ وتضم راسها

سليل : لعد ابقيهم وحدهم وياها

نهر : رشا سباعيه واعرف عينها على خواتها

سليل : لا ماابقى لو اعرف اتوسل بيها واروح عاطت ماما نهر وهاي اول مره تسويها وخاصه ويايه

نهر : كافي الله يخليج ارحمن ابوجن اني مااكدر وحدي اهدي واطيب خاطره

اذا اجه ومالكه ولا وحده مو بعيد ينجلط اقلها انتي موجوده اتهدي تخلي يتحمل مصيبته 

سليل : وخواتي وغزل شلون اخليها وحدها ويه رجل امي مااكدر يوم معناها يوميه اكل بروحي والقران مااتحمل اتخيل يصير بيها الصار بيه

نهر : اسم الله الرحمن بنتي كولي ياالله وهسه نوصي رشا عليها سليل الجاي اصعب من الراح وطه انكسر فوك كسرته وضياع حياته وجودج هنا راح يخفف تعبه اقلها من موجوده ميحس خسركم كلكم

سليل : تتوقعين ابوعلي يكدر يرجع خواتي

نهر : ان شاء الله يكدر واذا مكدر نحاول شكد مابينا نرجعهن امج مراح تتحمل وجودهن تره السوته كله بس حتى تكسر ابوج بين اهله واطلعه مو خوش ادمي وكتل اخوه متريده يرتاح

سليل : ليش شكالت

نهر : بعدين احجيلج بس اهم شى سوته راح تاخذ البنات وصلت لخواله هو كاتل سلام بسبب فلوس

سليل : يمه هيج كالت وبابا شتصرف

نهر : شتعرفين ابوج سكت وكال اي اني كتلته علمود الفلوس

سليل : ليش مكال على السبب الحقيقي ليش قبل على نفسه هيج تهمه حقيره

نهر : هو وصل للاعدام ومكالها تردين هسه يكول من كل عقلج رغم كتله احجي اني اذا تريد احجي تخبل وتعصب عليه

سليل : اوووف يايابه شتتحمل ضيم بعد

نهر : ليش كتلج ابقي ولترحين الله اعلم خواله وره هاي الهوسه شراح يسوون

سليل : ماما

نهر : هاا يمه

سليل : ليش بس احنا مشلوع گلبنا ليش بس احنا شفنا اشكال المصايب بعدنا صغار والدنيا يوميه كافختنا شمسوين حتى هيج نتعاقب

نهر : اراده ربج يابنتي المؤمن مبتلى

سليل : قابل بس احنا انكتب على كصتنا الايمان ولازم نبتلى

نهر : حبيبتي اختبار من الله لتشككين برحمته يقول للشى گنُ فيكون ورحمته وسعت كولشي وداعتج ماضاقت اله ما فرجت لازم نحمدالله على كولشي ومنعرف شمكتوب النا

ريم : سوده مصخمه مكتوب قابل شنو الراح يتغير

سليل : طفرت ريم جانت ورايه وكفت على حيلي

حرام لتحجين هيج

ريم : احجي او اسكت شنو الي راح يتغير

اني كملت ورشا هم مااخذنا هوايه غراض كم قطعه

غزل : ماما ثلل تعالي ويانه

سليل : حضنتها وبجيت اجيكم بعدين حبيبتي

غزل : والمدرسه صديقاتي راح يروحون كل يوميه اصادق بنات واروح لغير مدرسه وانقهر

نهر : تعاال حبيبة امج انتي حضنتها وشميتها افيييش ياريحتك ترد روحي اسمعي غزوله ماما دير بالج على نفسج ولتعوفين خواتج ابد ايدج بأيدهن ولتحجين ويه احد غريب

ولتاخذين اي شى من واحد متعرفي

غزل : اي ما اخذ

نهر : صيري سباعيه وعاقله ولتعبين خواتج والمدرسه نشوف شلون نحلها

غزل : ماما اخذت لعابتي

نهر : اي حبيبتي اخذيها

سليل : اباوع على رشا فايره بركان ومنتظر يطك

رشا .. يله منو ياخذنا

سليل : متسلمين عليه

رشا .. مااحب اودع كلها ايام ونرجع

سليل : سحبتها حيل لحضني وكامت تشهك وريم اشرت الها واجت تركض بحضني وغزوله حاضنتني من رجلي

علت اصوات دموعنا بشهكه حزن تزرف صدر كل وحده بينه وكأن نكول لكل وحده بدون منحجي راح اشتاقلج احنا مو خوات عاديات احنا خوات تربينا على الالم والحزن قبل الفرح والضحكه تربينا وحدتنا اذا صار بيها شى الثانيه يصير بيها عشنا وحده تحامي للثانيه وتخاف عليها اربع اجساد بس روح وحده

حسيت روحي تنسحب مني وهنه يوخرن من حضني ويفتحن الباب ويطلعن لبست العبايه ماما نهر وطلعت وياهن وكفت بلباب شفت طالب يفتح السياره الهن بدون اي كلام وصعدن

بقيت رافعه راسي وابجي واشهك تذكرت سجاد وينك تعال شوف حالنا جانت من تريد تأذينا ماما سندس توكف بوجهه وتصدها وينك تعال شوف شكعد تسوي يمكن لو انت موجود متكدر تسوي شى ومتاخذ البنات ويمكن هي مثل مكال طالب تكدر كولشي تسوي بس على الاقل وجودك يخليني احس بالامان تعال شوف حال التعبت عليهن وخفت عليهن من روحك شلون امهن تاخذهن بس حتى تكسر ابوهن

ااااخ ياربي الصبر مطالبه شى صبرني على فراك خواتي والله لو ميته ولا شايفه هذا اليوم ربي اجمعني بيهن مثل ماجمعت يوسف بيعقوب (عليهم السلام )

ربي خواتي امانه عندك دخيلك كولشي ولا يصير بيهن شى

بقيت اشهك ورافعه ايدي للسما

نهر : وصلنا والبنات هادئات اي صوت مطلع ردت افتح الباب كعدت ليكدام والبنات ليوره كاال طالب

طالب : لتنزلون

نهر : ليش

طالب : زلم هوايه وهوسه هي تجي تاخذ البنات واريدها بسيارته تاخذهن مااريد يصيرن فرجه لليسوه والميسوه

نهر : دمعت عيني وكتله الله يستر على اهلك ويحفظهم مثل مكعد تحفظ بنات اخويه

طالب : قصدج بناتج

نهر : دنجت ونزلت دموعي اي والله بناتي

رشا .. منشوف بابا ونسلم عليه

طالب : الافضل متشوفوه حتى ليتأذه او يسوي شى ويخرب الدنيا

ريم : عمو راح ترجعنا لبابا

طالب : والله ارجعكم وداعت ولدي وشرفي ارجعكم بس اصبرو وابقو قويات اريد اشوف قوتكم من وكفتن ضد شعلان وطلعتنه يكمز من البيت شعلان الي ابوه نفسه ميكدرله خليتوه الليل بنهار يكمز من وراجن انتن سباعيات وتمنيت عندي بنات لو خوات مثلجن قويات ياخذن حقهن من اكبر واحد وميسون الغلط والنعم من تربيتج اختي الله يستر عليهن

نهر : رحمه الله والديك

نهر : يمكن هاي الكلمات البسيطه الي خلت البنات يبتسمون وشوي يخف التوتر من عدهن نزلن وراح بقينا ننتظر بحدود النص ساعه

اسمعي ماما رشا عينج على خواتج متنامين اذا مو نايمات بحضنج متغفلين ساعه عليهن وخااصه غزل بله ريم سباعيه بس غزل عينج عليها حتى من تروح للحمام تنتظريها

ريم : ليش محسستني راح نروح لبيت اشباح

نهر : اسمعي كلام وبلا جدل

رشا : صاار ليضل بالج

واجت من بعيد باوعت على وجوهه البنات مباشره انگلبت

فتحت الباب وبقت تبوس وتحضن بيهن وهنه اي استجابه ماكو حتى غزل الي ختلت ورايه

سندس : تعالي ماما غزوله اني ماما

غزل : ماما نهر رجعيني لثلل

نهر : لتخافين گلبي راح ترحين بلسياره ويه ماما سندس وتشتريلج لعابات ونساتل

غزل : وماما ثلل

نهر : تجي وراكم

ابتسمت ابتسامه بريئه وراحت لحضن سندس الي تباوع عليه لو بيدها تشرب من دمي

تقربت منها وكتلها البنات امانه يمج اذا صار بيهن شى وروح ابويه اصلخج بلشارع واعزيج واصخمج اخليج فرجه للجلاب مالتج وبيدي مو بيد طه

سندس : هههه مبقت بس الخوثه تهددني والله انتم تضحكون انتي ولا اخوج بس حجي بوخه يله ماما امشو عمتكم كبرت واخرفت

شمرو البنات نفسهم بحضني وابوس بيهم

ديرو بالكم على نفسكم

ودعوني واخذو روحي وياهم ياناس والله ذني بناتي مو بنات اخويه

اخذتهم وركبت سياره مارسيدس ام عيون جان اسمها نعرفها من المسلسلات والله وكت اااخ يلفكر من يصير عندك فلوس شتلعب لعب بلناس

ترددت ارجع بسياره طالب كلت ارجع مشي انداريت وصاحني

طالب : وين رايحه يابه

نهر : راجعه للبيت خلف الله عليك مقصرت جزاك الله خير الجزاء

طالب : اصعدي اوصلج

نهر : رحمه الله والديك ميحتاج البيت هيانه خطوتين

طالب : مثل مااخذتج ارجعج وهم خلي اجيب طه كافي منهاره اعصابه حيل

نهر : اي عفيه گلبي جمر عليه

طالب : تامرين بس اصعدي شوي واجيبه

نهر : جابه ولازمه سيف وطالب باوعت عليه واكول تعال يايابه شوف ابنك العزيز شلون محني الظهر كتمت دموعي مردت يشوفها صعدوه ليكدام بصف طالب

سيف : ارجعو اني ارجع مشي

ورجعنا واول مدخلنا لزمته وامشي بيه كوه يمشي ودمعته تنزل بهدوء ويهمس

حجي طه : راحن مو راحن شمعه بيتي وغزلاني اخذتهن مو

نهر : على كيفك ياطه ان شاء الله يرجعن

حجي طه : شلون ارجعهن واني حتى بيت ماعندي احويهن

نهر : ليش شصار

حجي طه : عبالج خوالي راح يسكتون حظري غراضج نطلع بكرامتنا مااخلي بشر يطردنا ويطردج

نهر : ويطرد سليل اندار عليه

حجي طه : سليل مراحت

نهر : لا مراحت بقت يمك

مشه سريع وفتح الباب لكاها كاعده بلكاع يم باب الغرفه الي انام بيها وحاطه راسها بين رجلها وتشهك

ركض وحضنها ويشهك وياها

سليل : اخذتهن بابا راحن خواتي

حجي طه : وحق كل دمعه نازله منج ارجعهن لو اعرف اذبحها لسندس واطب سجن ويرجعن بحضنج

سليل : رفعت راسي ومسحت دموع بابا وكتله مثل ماهنه روحي انت اغلى من روحي بلياك نضيع بابا كافي ضحيت مره ما مستعدين نضحي بيك مره ثانيه

حجي طه : شسوي يابنتي شفتي شلون حصرتني واخذتهن

سليل : ان شاء الله يرجعن كمت ولزمته وكعدته عدل وجبت مي اله باوعت على حاله حمدت الله مارحت يمكن يموت مثل مكالت ماما

بيومها اصوات خواتي يرن بأذنه تلاثتنا ساكتين اكل مأكلنه المي محطينا بحلكنا وبابا متأذي شويه واندكت الباب طلع تأخر فتحت الشباك من جهه الهول يشرف على الحديقه وشفت سيف ينطي لبابا جكاره

وبابا يشربها واسمعه يكول اله

سيف : اشرب ابو حسام ذب قهرك بيها وذبها ربك كريم يرجعن

حجي طه : لازم ارجعهن

سيف : مايبقى الحال مثل ماهو بس عندي سؤال اني ممقتنع انت كتلت سلام علمود الفلوس

حجي طه : ليش ممقتنع

سيف : لان حبوبه كالتلي على سالفه الكاع الي انطتها الك بدون حس ابويه وعمامي وانت مقبلت تاخذها وجان بسهوله تحطها بأسمك وغصب عن الكل وتكعد معزز مكرم بكاع كذا دونم وتعيش ملك ليش رفضت

حجي طه : مكالت الحجيه الك ليش

سيف : على اساس انت كايل اجيت ردت اهل مو فلوس

حجي طه : وارجع واكول ردت اهل يحموني ويحمون بناتي ولو ادري تاليها هيج ولا اجي ولا اوصل ااااخ شيرجع الزمن واصلح الصار

سيف : معناها هيج واحد ميكتول اخوه على ورث ليش كتلته طه

حجي طه : سيف اني يمكن مااعرفك غير من كم يوم وحسب الحجي السمعته الكل يحبك ويمدحون بيك وبطيبه گلبك وكفاتك بس حياتي مالك دخل بيها انت ابن خالي وعلى راسي بس مااحب احجي شى عن حياتي اذا ساعدتوني ارجعهن خلف الله عليكم مقصرتو مكدرتم هم خلف الله عليكم استقبلتونا طول الاشهر الفاتت

سليل : اسمع بابا شلون يحجي بنفس عزيزه وبقوه رغم الصار واجه طالب يصيح تعالو الحجيه تريد الكل ومن رخصتك ابو حسام جيب الاهل وتعال كلكم تريدكم

سديت الباب وسويت نفسي كاعده وبابا كال تعالو لبست جبه فوك ملابسي وربطه وماما عبايه ورحنا اول مدخلنا جان الكل كاعد

عبد الله وزوجته وبنته زوجة طالب وشعلان وخضير ومرته ورازقيه وسيف وطالب وبيبي بس الجهال ماكو  وابن عمهم الي دوم وياهم كعدنا قريب منهم طلعت بيبي وكوه تمشي وكعدها طالب

جان تعيط

شلون تخلون هاي المكموعه تاخذ البنيات ورازقيه وتروح

خضير : بناتها ومن حقها

الحجيه : كسر راسها وراس الخلفها ياحق هذا وانتم يلزلم مشوربه مكيفه مخلفه ومربيه وتشوفون ابن اختكم وانتم ابن عمتكم ينوح على بناته وتسكتون

عبد الله : شتريدين يوم نسويها مذابح ويه الدوله علمود ابن حسين غير هو متزوج وحده بلحزب وكلها معارفها مشفتي شسوت

الحجيه : كرت عيني هم مكيفه مخلفتكً

عبدالله : يمه شلج بهذا الحجي وهذا ياهوالوصل الج الصار

الحجيه : هذا الفالح بيه ياهو جاب وياهو وده يمه طه بنياتك امانه برگبتي ويردن غير ذني من ريحه الغاليه

عبدالله : ياغاليه يمه منو يكول هو ابن رازقيه اذا هو كذب من كال انسجنت من وره واحد بلحزب طلع كاتل اخوه الله اكبر اخووه يمه وانتي ادافعين عنه

الحجيه : ماعسى يكتل ابوه شلك دخل

خضير : يمه مايضل هنا لو شميصير هذا ايده كلها دم اخوه يمه احنا مدخلين جتال ابن حسين (ابوطه)

الحجيه : ماعسى جتل حسين نفسه

عبد الله : غير حسين الله يرحمه ابن عمنا

الحجيه : هسه صار حسين ابن عمكم نسيتم دمعت اختكم وهي تكعد هناك جوه السعف مال النخل وتنوح عليه نسيتو شلون باعها واخذ الحضريه (بنت بغداد ) وشرد بيها وخلاها لاطايله سما ولا كاع وتالي خذاها هناك وكتلها بقهره

سليل : اباوع على بيبي شلون تحجي وترجف ولدها عياطهم وصياحهم عاااالي جان يكوم بابا

حجي طه : حبوبه اني اخذ اختي وبنتي واروح لغير مكان

الحجيه : وتراب امك اذا طلعت من هذا الباب لا اطلع وياك

عبدالله : خوش والله يمه هاي تاليها ادوسين على روسنا لخاطر ابن انعام

حجي طه : اني مو ابنها رضيت وان مارضيت متهمني

عبدالله : اي دك اليتيمه عباله نصدكه

حجي طه : كومن نروح

الحجيه : يله امشينا

طالب : وين حبوبه

الحجيه : ماضل بمجان انطرد بيه ولد بتي وعياله

طالب : ابو حسام رحمه لذيج الام الطيبه اكعد حبوبه مريضة واذا طلعت راح متتحمل وتوكع

حجي طه : حبوبه ضلي بروح امي هنا بيتج ومكانج واجيج والله اجيج

الحجيه : تطلع اطلع وياك يله كمن بس فاكات حلوگجن حضرن البقجه

خضير : هذا هو يمه يضل بس مالنه دخل بيه عسى يذبحوه

الحجيه : خوش وانت تتفرج عليه هاي الضلت اسمعمو كلكم زين طه هنا حاله من حالكم الي يمسه بجلمه ماابقي لحظه هنا وانت ولك شجابك انه مو طاردتك

شعلان : والي طردتيني علمودها راحت

الحجيه : ترد الغزاله ترد وبعدها ماتضل ساعه هنا

شعلان : عود الله كريم اذا رجعت

سليل : دنجت وبدت النقاشات تعلى واخر شى صفى يبقى بس مالهم دخل بيه بس سيف وطالب تعهدو يرجعون البنات فضت الكعده ورازقيه اخذت ماما وماادري وين يمكن تخابر على سجاد استحيت اروح وراهم بقيت متردده كلت غير مره اخابره

سليل : مرت ١٠ ايام واحنا بتعب وتفكير شلون انرجع البنات بابا طلب من طالب يشتري بيتنا الي بغداد مقابل المحامي مراد الفلوس من عدهم كال فدوه لتراب رجلهن البيت خلي ارجعهن لو اعرف اشتغل ليل نهار واكعدهن بيت وحتى هنا ماابقيكم اذا بقيت بس حتى الحجيه لتوكع بس يرجعن خواتج منبقى وطالب رفض سالفه البيت وصلو لاتفاق يشوفون شكد تكلف القضيه وراها يقررون

جنت من انام مااغفى اله بحضن ماما نبقى نبجي لحد منتعب من كثر منشتاق الهن

كاعده وحاطه ايدي على خدي واجه علاوي يركض خاله يصيحوج تلفون

ركضت والربطه بيدي ودخلت ملهوفه واسمع صوتهن هلو ثلل

مباشره نزلت دموعي ياروح ثلل انتم ولكم ليش صار ١٠ ايام لا حس ولا خبر منكم

رشا ..غير امج قافله التلفون بمفتاح

سليل : شلون يعني بمفتاح

رشا .. شمدريني يمعوده تلفون ارضي يقفل بمفتاح وهم من يدك يحجي الرقم الداك ويخزن الارقام تلفون يخبل

سليل : واذا قافلته شلون جبتو المفتاح

جان اسمع صوتها

ريم : ماكو شى يصعب على ريم الجباره

سليل : ولج حتى لوكاحتج مشتاقه الها طمنوني شلونه وضعكم وغزوله شلونها

هلو ماما اني زينه واكل والعب بلحديقه

سليل : عينج عليها رشا

رشا .. وداعتج حتى سبح بيدي اسبحها مااتركها لحظه

سليل : عفيه زين تسوين احجولي شصار

رشا .. شوفي ياعيني بلطريق جنا وياها جنت على نار كاعده وكوه متحمله وره وكت وصلنا لبيت تكولين فيلا مثل هاي مال مسلسلات المصريه طبينا حديقتيش والكراج اكبر من بيتنا القديم بمرتين والصاله شعلاتها وذاك الاثاث الي بالافلام انشوفه دخلنا مستغربين المكان وجان نشوف ولد شاب كاعد وحاط رجل على رجل

ريم : منو هذا

رشا .. ماادري

سندس : تعال ماما سلم على خواتك

سليل : نغزني گلبي وكتلهم حسام مو

ريم : قصدج الباشا حسام قصدج الملك

سليل : شبيكم

رشا .. تدرين اجه سلم علينا من وره خشمه من الصدمه بقينا واكفات منعرف شنسوي

سليل : وتالي

رشا .. سلم هلو رشا مو ويأشر بيده وباسني بخدي وريم هم وغزل خافت منه

بس تدرين والله حسيته غريب ولمسني مباشره قشعر جسمي

وريم شكالت

ريم : اني بس اندار كتله زين تتذكر اسمائنا

حسام : ليش قابل هيج صعبه وانساها

ريم : بس نسيت عندك خوات اصلاً

حسام : ملتهي ومكدرت امر عليكم

ريم :هااا تلتهي بالسبع سنوات ماشاء الله بنيت برج الجزيره واخذك الوكت

حسام : تصنفين حضرت جنابج

ريم : لا العفو اخونا الجبير

سندس : شبيكم ماما هاي فوك متاخذون اخوكم بلحضن صار سنين ممتشاوفين

رشا .. مااحب احضن الغربه ابونا طه علمنا وكال عيب نحضن الغربه

سندس : ولج هذا اخوج

ريم : قصدج ابنج المدلل مو

حسام : خوش والله داخلات حاميات بناتج

رشا .. رجاءاً بنات طه احنا

حسام : ولسانهن اطول منهن مبين راح نتعب حتى نربيهن من جديد

ريم : باع هذا مصدك روحه اخونا الجبير

جان يجيت يريد يضرب ريم ولزمته سندس

سليل : يمه وتالي

رشا .. دفعته وكالت روح لشغلك واخوج الباشا على كوله ريم اخذ مفتاح السياره وطلع

ومن يومها كلمة بكلمة ويااه

سليل : ليش ياعيني غير اخونا

رشا .. اسكتي سليل لا اسوي اخوج تشريب محروك اصبعه من كل عقلج تسمي اخ

سليل : مهما كان يبقى اخونا

ريم : بابا هذا ابن خليل يااخونا تصوري يصيح لخليل بابا

سليل : وخليل خوما مضايقكم

رشا .. لا منشوفه كل اجتماعات وطلعات هو وامج

سليل : كلت بصوت خايف من الجواب عجبتكم العيشه هناك مو

ريم : لا والله اني بلنسبه اليه وياكم جنت متونسه اقلها العب دعبل اكمز ويه علاوي افتن على مشعول الصفحه هنا كولشي ماكو تكول مكبره بس خمس نجوم

سليل : ههههههه ليش مو تكولون بيت يخبل

رشا .. بس مابيه روح مابيه ريحه خبز عمه ولا عياطج علينا ولا حنيه بابا وسوالفه ولا لمتنا على الصينيه مال الاكل بلكاع هنا واحد ميعرف بلثاني وين اصلاً تكول عايشات وحدنا

سليل : والاكل شلون والتنظيف

رشا .. اسكتي غير امج عدها خدامه تنظف اااخ مااريد احجي احنا جان حسره علينا الاكل الزين واللحم ومخلصيها طماطه وبتيته لو طماطه وبيض وهي تذب الاكل الزايد بلزباله واخوج يوميه لبس شكل

سليل :  الْحٍمَدٍ للـّہ بس عايشين لزمت گلبي خفت خواتي يتأثرن بعيشه ماما ومن يرجعن ميعجبهن فقر حالنا

نسيت اكولج ثلل

سليل : هااا عيني

رشا .. غير عمو سجاد اجانه

سليل : اووف نبض گلبي بس سمع اسمه

اي كملي

رشا .. لعب طوبه بماما وضل يهدد وطردته خطيه بس قبل ميطلع باوع علينا وكال شيصير بس خابرو عدكم رقمي لو لا

واني اشرت حافظته على الغيب ومن يومها ماما قفلت التلفون اخاف نخابر عليه

سليل : المهم متركم

رشا .. لا خطيه صار ٣ مرات يجي بس ميدخل من الباب يسلم علينا وينطينا لسته مال اوامر ويروح

سليل : غير يخاف عليكم

رشا .. نعرف والله الي علمج نحبه اكثر من حسام وخاصه الفتره الي شفنا بيها حسام شلون شايل خشمه علينا حتى كام من يطب ميسلم

سليل : مالكم دخل فدووه لتسوون مشاكل

ريم : اني مااسوي حبابه وهادئه

سليل : ريموو ام البلاوي اكعدي راحه تره ماكو احد يخلصج من ايده فدوه لتسون مشاكل بس هاي الفتره تحملو

رشا .. اختج الخبله كم مره اطب اتضم مفتاح سيارته ويبقى مثل المخبل يدور عليه اكول الها توبي منه متوب

ريم : ضامتله مقالب معدله

سليل : ريمو اكعدي راحه

ريم : كاعده شمسويه اني ريمو السنفوره تره مو شرشبيل

رشا .. خلي نروح ثلل ونرجع المفتاح قبل مترجع وتشيل التلفون كله

سليل : عفيه طمنوني مو تعوفوني هيج اتأذه وحدي

دير بالكم على نفسكم

بستهم وسديت التلفون دموعي تصب انداريت شفت سيف

سيف : انيالهم عليج شكد حنينه انتي

عفته ومشيت مهتميت اله ولا انداريت سألت على عمه نهر كالو كعد تخبز

نهر : جنت اخبز وظهري على الباب ولابسه دشداشه ومغطيه راسي ونص وجهي متعلمه هيج اخبز ومباشره اشوف واحد جر خبزه وياكل وكال شنو هذا الخبز الزين رزوقه

انداريت وصار طالب بوجهي مباشره عرف اني مو رازقيه ذب الخبزه

طالب : العفو اختي عبالي رازقيه لان دوم هيج وكت تخبز

نهر : عافيات اكل شنو الفرق اذا اني او رازقيه اني كتلها اخبز النا والكم ماعندي شى

طالب : ليش اتعبين نفسج هيه متعلمه

نهر : جريت الغطا من وجهي مغطي حلكي وخشمي وابتسمت بقهر وكتله ماكو وحده متعلمه على الخبز كدي تفضل اكل وان شاء الله يعجبك 

رجع سحب الخبزه وياكل حسيته صفن بوجهي ودنج وراح وره شويه اجه علاوي سويت اله خبزه صغيره انصيح الها (حنيني ) يصير مالخ عليها سويت ورفعت راسي لكيت طالب صافن عليه صح بعيد مكانه بس واضح خجلت حيل وهو هم انتبهه على نفسه وطب للبيت

جان تجي مرت طالب ومتخوصره هااا كملتي

هااي شبيهه نبرتها ابد محبيتها كتلها اي مالتكم كمل تكدرين تاخذي

مرت طالب : عود مكيفه هذا خبز شحاله حشه نعمه الله

بعدني احجي وسمعت طالب كالت كولش طيب عاشت ايدها يله اخذي الخبز وطبي وصبي الغدا جعت خلف الله عليها خبزت وتعبت ومن تردين خبز احسن من خبزها عود انتي خبزي بيدج

اخذته وعيونها براسها مجاوبته اصلاً

طالب : كملي يگويج الله

نهر : شكراً

سليل : بابا كلف محامي وبدت الاجرائات بس الي صار حجي هواي على اكو حرب راح تصير وناس تضحك وناس مصدكه وناس لا

وبيوم 19 من شهر الثالث كعدنا على هزات قنابل تضرب الكوت وكل المحافظات الكل لازم الراديو ويسمع الاخبار اله احنا حايرين بخواتي بغداد

نهر : ولك طه البنات هناك شلوون

حجي طه : باجر من الصبح اطلع الهن

نهر : وين تروح والدنيا مگلوبه مااخليك

حجي طه : وشتردين اعوف بناتي من كل عقلج

سليل : وهيج ماما راح تعوفهم

حجي طه : انعل ابوها يابو الساعه السوده الشفتها بيها لو اعرف ابوكهن هي صايره هوسه

نهر : فدوه طه على كيفك شفتها شسوت اخر مره

سليل : بابا خلي اندك عليهم

حجي طه : شندك والخطوط كلها مكطوعه عبالج محاولت

بقينا للصبح منايمين وقرر بابا يروح لبغداد اول يوم ماكو طريق كالو تعال باجر بلكت اكو وعلكت والاخبار مطمن واكو ناس كالو صواريخ كامت تنضرب على بغداد اول شى صار الكهرباء طفت وحلت محلها اللاله نشغلها ونكعد الكم ساعه الفاتو كأنهم عمر خواتي رغم وكاحتهن بس هيج امور جبانات وميعرفن ومشافن حرب

ثاني يوم من الصبح بعد ٣ ايام من اندلاع الحرب اجو كالو اكو طريق

لبس بابا وحظر كولشي وديطلع

نهر : اجي وياك مااعوفك طريق يخوف

حجي طه : بست راسها هاي شبيج نهر احد گلج طفل كدامج لتخافين ادعيلي

طلعت وبيدها دولكه المي تذكرت ايام الحرب شلون جانت توكفلي بلباب رجعت بست راسها وكتلها انتي مو بس ام لبناتي انتي حتى ام اليه

نهر : الله لايحرمني من حنانك ياابويه انت روح مودع بالله وذبيت المي وراه والله الدموع الذبيتهم اكثر من المي الذبيته

سليل : اشتد الوضع ونسمع اشكال الاخبار وخااصه بلبصره حروب طاحنه كاعدين اليوم رابع يوم من الحرب اذا جنا اني وماما نهر كاتلنه القهر والخوف على خواتي صار القلق والخوف مضاعف على بابا وعلى خواتي الي منعرف اي شى عنهم لهسه ومنا بالي يم سجاد عقلي راح يوكف بمنو افكر

صار ضرب قوي اندكت الباب جان ليل ساعه ١٠

فتحتها

سيف : تكول حبوبه تعالو يمنا احسن اخاف يصير شى اقلها كلنا سوه

سليل : لا كاعدين هنا ماكو شى

نهر : منو امي

سليل : ماما حبوبه دازه علينه تكول تعالو هنا

نهر : طلعت وسلمت على سيف ميحتاج كاعدين هنا

سيف : ميصير وحدكم نسوان واحنا هناك كاعدين

نهر : مو بعيدين نفس البيت احنا تره ودنسولف وسمعنا دكت باب قويه وشفنا طالب من بعيد فتح الباب وجان تجي تركض غزل مصدكت مثل المخبله ركضت عليها وابوسها واشمها ممصدكه

ريم : اني اجيت

سليل : ياروح اختج انتي واجت رشا هم تركض مكيفات حضنتهن ممصدكه گلبي راح يطك من الخوف عليهم وابجي من الفرح صدك خواتي رجعن يارب رحمتك وجان اسمع صوته شلونج سليل رفعت راسي واشوف سجاد گبالي

يتبع ...