اني موافقه واتفقنا على كل شي.
واتفقنا نعيش مع بعض أصدقاء وبس.
أول أسبوع كان أحمد واخد إجازة وما بيروح على شغله.
وأنا كنت طول الوقت فوق في شقتي.
كانت علاقتي بأحمد كويسة جداً، ونفكر سوا ونتغدى ونتفرج على التلفزيون سوا، نتكلم سوا، وآخر الليل كل واحد منا ينام بغرفته.
أول أسبوع كان حلو ما فيش مشاكل وكنت حاسة بأمان ومشاعر متلخبطة.
صحيت من نومي لقيت أحمد طالع على شغله وكاتبلي ورقة على الثلاجة.
"أنا طلعت بدري وما رضيت أصحيكي، خلي بالك على نفسك ولو حصل حاجة كلميني."
استغربت من محتوى رسالته وفطرت ونضفت وروقت شقتي ونزلت عند مرات عمي.
خبطت على الباب فتح لي سلفي الصغير.
سألته فين مرات عمي، قال لي إنها لسه نايمة.
دخلت المطبخ وحطيت القهوة على نار.
ما فيش دقيقة كانت مرات عمي قدام وشي.
أم أحمد: بتهبي إيه هنا يابت؟
منى: بعمل لحضرتك قهوتك. أحمد قال لي إنك بتحبي تشربي قهوة الصبح.
أم أحمد: قهوة!!! وحطيتي إيه في القهوة؟ إيه يا بت؟ عايزة تسحريني زي ما سحرتي ابني؟ فشرتي انتي وأمك. انتي بتحسبيني هبلة ولا عبيطة عشان تسحريني زي ما عملتي مع ابني؟ يلا اخرجي بره مش عايزة أشوف وشك العكر ده هنا تاني.
منى: والله العظيم ما حطيت حاجة، أقسم بالله انتي فاهمة غلط. أنا قلت أعمل لك قهوة تكوني صحيتي ونشربها سوا.
أم أحمد: فشرتي! انتي عايزة تضحكي عليا بفنجان قهوة وتصاحبيني؟ شوفي يا مسهوكة انتي، انتي هنا غريبة عني زيك زي الضيفة الغير مرحب فيها، وبتطلعي شقتك ضيفة. ممنوع تمسكي حاجة ولا تيجي ناحية مطبخي خالص، لا قهوة ولا أكل ولا أي حاجة. أنا ست البيت هنا والكلمة والشورة شورتي. انتي فهمتي يا ست منى ولا مفكرة نفسك يا ما هنا يا ما هناك؟ ولا عشان أخدتي ابني مني بتحسبي إنك هتاخدي بيتي كمان؟ لا يا حبيبتي وغوري اطلقي لفوق.
منى: حاضر... يا حماتي.
أم أحمد: حمى لما تجيلك يا حرباية.
طلعت على بيتي وبكيت كتير، بكيت 3 ساعات لحد عيني ما تورمت.
على الساعة 3 ظهر انفتح باب شقتي ولاقيت أحمد.
بس سمعت صوته جريت على الحمام غسلت وشي وحطيت شوية مكياج لأخفي ورم عيوني.
أحمد: منى انتي هنا؟
منى: أيوا هنا يا أحمد.
أحمد: دخل وبص عليا وشاف عيني وقال: مالك يا مني؟ عينيكي مالها؟
منى: ما فيش حاجة.
أحمد: إحنا اتفقنا على إيه؟
منى: حكت له على كل اللي حصل وحلفت له إنها ما حطيتش حاجة بالقهوة.
أحمد: حقك عليا، معلش. بكرة هتعرف وهتفهم كل حاجة. ما تهتميش ولا تزعلي، أولها صعب وكبري دماغك.
مسح لي دموعي ونزلنا نتغدى أنا وهو تحت.
قعد جنبي أحمد وكان بياكلني بإيده ويحط بصحني الأكل.
عمي: الحمد لله إنكم مبسوطين يا ولاد، أنا والله انبسطت وإن شاء الله دايماً.
منى: صحة وهنا يا عمي.
قام عمي ينام بعد الغدا وبقينا على السفرة مرات عمي وأنا وأحمد وسلايفي التلاتة.
مرات عمي: إيه يا أحمد؟ عايزني أغضب عليك؟ انت عارف غضب الأم. انت وعدتني إنك تتجوز مريم بنت خالك. انت نمت في العسل ونسيت وعدك.