تحميل رواية «ناراحيدرة» PDF

إحتواء، غُربة، يَتِمَ، ألمَ في الروح، وأوطان مُتشردة، وعدةِ جروح لا تَلتئم، وأفكار مُشتَّتة، هكذا تُركت عندما أخبرتني بأزقة ماضيك، لَمْ يكنْ لدي حينها جسارة كافية لأقول لك أن الذي فعلتهُ بي لَمْ يكن سهلًا ولَمْ يمر مرور الكرام، تساؤلات كانت تَصرعُ رأسي شللتني برصاصةٍ تائهة أم مُتعمدة؟ شعرتُ بأنك ضربتني في قلبي قبل جسدي، يا تُرى هل سينبضُ قلبي إليك بعدما يعلم بالمشاعر المُضطربة لديك والعُقد المُبهمة.

تشكلت في علاقتنا الَّتي كالمد والجزر، حواجز لكن لا بد أن تُهدم في مُرور الزمن .

"كانَ قَلْبِي مِنْ نارٍ وقَلْبِكَ مِنْ ثلجٍ" .

هذهِ الرواية حقيقية حُدثت عَلَى أرض العِراق، أبطالها قد عانوا قديمًا في الماضي مِنْ إضطرابات نفسية.

غموضها قام بشدني إليها، أتمنى أنَ تُلامس قلبكم مثلما لامستني، بدأتُ برحلة كتابتها عام ٢٠٢٠

أستندتُ لكتابة هذهِ الرواية ، من الصديقة "المجهولة" حيثُ شدتني قصتها وأبحرت بي الى طريق كتابتها لم أحب أنْ أترك مثل هذهِ القصة أنْ تضلُ عابرة لذلك كتبتُها بَحُبّ ..

قبل البدأ لا تحكم على الإختِلال إلَّا بعدما تعرف ما الذي مَخبَأ في منتصف أسطرها.

••••

رواية عراقية كُتبت عام ٢٠٢٠، ونالت نجاحًا لافتًا بفضل أحداثها المشوّقة. صدرت في ثلاث طبعات عن دار "دراويش" للنشر عام ٢٠٢٢.

أصدقائي القُرَّاء الأعزَّاء أتمنى لكم قراءة -مُمتعة ومَاتعة-

بقلمي: نمارق رحيم 🌸

العراق/ بغداد عام ٢٠١٥

استيقظتُ من غفوةٍ قصيرةٍ، نهضتُ بسرعةٍ حيث اصطدم رأسي بالجدار، فرفعتُ إصبعي مهدِّدةً نفسي:

"شوفي يا روحي بعد ماكو سهر للفجر ومسلسلات كوريّة لازم تلتزمين."

لبثتُ لحظاتٍ أحدّق في الساعة؛ كانت تشير إلى السابعة صباحًا. هرولتُ إلى الحمام، غسلتُ وجهي على عجلٍ، ثمّ عدتُ إلى الغرفة لأرتدي صدريّتي. أتممتُ استعدادي ونزلتُ إلى المطبخ، فرمتني أمي بنظرةٍ غاضبة بينما ألقت حقيبتي بعصبية على ظهري. صاحت بي كعادتها:

"السايق عوزه بس مخدة وينام من الانتظار صارله ساعة يدگ هورن! أمشي ولي لمدرستج"

لم أجبها، كنتُ أُعدِّل شعري الكيرلي في المرآة بلا اكتراث. تركتُها تزمجر وخرجتُ إلى السيارة، حيَّيتُ الطالبات عند الصعود وجلستُ. رمقني السائق بنظرةٍ مُستفزة لم أردَّ عليها.

وصلنا المدرسة، فدخلتُ الصف أعتزم مراجعة الأحياء ما دمتُ وحيدة. لم أُخرج الكتاب بعد من حقيبتي حتى صدمت أذني صرخةُ المديرة...  وعصبية أيضًا!

"شيخلصني من ميسون اليوم!"

هززتُ رأسي بخوف، وأغمضتُ عينيَّ تاركةً الكتاب لأركض نحو الساحة، أصعد الدرج قفزتين قفزتين. وقفتُ هناك أتمتمُ همسًا:

"شنو هل صباح كُلها گالبة عليَّ شنو السالفة؟!"

وقفتُ أمام مُدرِّسة الرياضة والكشّافات. اليوم هو يوم الخميس، اصطففنا، وكعادتي وقفتُ أخيرةً لأتبادل الأحاديث على راحتي. بدأت مراسم رفع العلم وإنشاد النشيد الوطني العراقي، كنتُ أندمج في سماعه وأشعرُ بلذّةٍ حزينةٍ، وبعد انتهاء الطابور عدنا إلى الصفوف، خضتُ امتحان الأحياء، ثمّ خرجتُ غير مكترثة. اتجهتُ إلى الحانوت، فجاءت صديقتي تسأل:

"ها ولچ مجاوبة لو لا؟"

هززتُ يدي وأنا آكل:

"لا مصخمة كلعادة ماكو شي جديد."

"اخ من برودج ولج وبعدين وياج ليش ما تدرسين ترى أنتِ سادس آخر سنة شدي حيلج لا توگعين دور ثاني!"

"الله كريم إن شاء الله لا توصين حريص."

انتهت المحاضرات، وكأنَّ إفراجًا حلّ حين دقّت ساعة الخروج. عدتُ إلى البيت، وما إن دخلتُ حتّى قلتُ:

"الله يساعدك بابا، يمة صبيلي غدة."

صعدتُ إلى غرفتي؛ كانت أختاي "نبراس" نائمة و"نور" تدرس. بدّلتُ ثيابي ونزلتُ لأتناول الغداء بعد أن غسلتُ وتوضأتُ وصلّيتُ.

مع حلول المغرب فرشتُ فراشي في الصالة، نثرتُ الكتب والأقلام لأدرس، أتت تؤامي "نبراس" تدرس جانبي.

سألتها: "شنو عندچ إمتحان باچر؟"

"ما عندي إمتحان بس تحضير يومي بسيط أدرخ المادة وأروح."

"حظچ گاعد دخلتي أدبي لعد مثلي داخلة علمي ومتورطة."

"يلا بس هاي السنة ونرتاح ونخلص من ضيم السادس."

كنتُ أقرأ حتّى وقعت عيني على الساعة، وإذا بها التاسعة! حلقة مسلسلي الأخيرة بدأت. ركضتُ بسرعة، تركتُ الكيمياء واتجهتُ إلى التلفاز أُقبّل الشاشة.

نبراس: " شبيج ميتة على الكوريين"

"عُشق ابدي"

دخلت "نور" قائلة:

"يمة يگول سالار رح يجون أصدقاءه حضروا الچاي والكعك."

جاءت بنات خالاتنا، فغدًا عرس "نرجس" أختي الكبيرة. الصبح تذهب للصالون وقد أُقيمت الحنّة قبل يومين. في اليوم التالي توسّلتُ لأمي أن تسمح لي بحفّ حاجبيَّ بمناسبة العرس، لكنّها رفضت كعادتها.

****

الساعة الرابعة عصرًا، الزغاريد تعلو في الشارع مع وصول الزفّة، والسيارات تملأ الطريق.

أمي: "روحي أقفلي الباب وتعالي أركبي السيارة بسرعة لا تتأخرين"

أسرعتُ إلى البيت لأغلق الأبواب وألحق بهم، لكنني حين خرجتُ فوجئتُ بالشارع فارغًا. ضججتُ من الحزن. وبينما أستدير رأيتُ يدًا على كتفي، التفتُّ فإذا هو "النذل". ابتسم واقترب ممسكًا يدي، فدفعتُه بعصبية:

"شلوون تلزم ايدي منو إلي سمحلك؟"

لؤي: "على كيفج شمسوي قابل هو لزمت بس ايدج وابن خالج اني مو غريب"

"لا غريب ونص، وكتلك ألف مرّة لا تحجي وياي وتتقربلي ترى والقرآن العب بيك طوبة مو سهلة ناردين"

لؤي: "حلو ست ناردين طالع إلها لسان وصايرة قوية وتوگف گبال لؤي من شوكت؟"

نظرتُ إليه بثبات: "أي وإذا تمد ايدك مرّة ثانية أكسرها الك فاهم؟"

حاولتُ الانصراف فقطع طريقي:

لؤي: "وين رايحة؟"

- "للبيت."

لؤي: "ترى البيت فارغ شعندچ باقية بي واهلچ يتأخرون لليل يلا يجون!"

- "لعد ابقى بالشارع؟"

لؤي: "أنا اخذج لزفة اختچ"

- "وين تاخذني بأيّ سيارة؟"

- "بسيارتي، يلا أمشي اوديچ وأرجع."

صمتُّ لحظةً أحدّق في وجهه، فقال:

"لا تصفنين شبيچ ترى ما اسويلچ شي وحق الله اوصلچ وأرجع"

- "بس ما عندي ثقة بيك!"

- "ناردين ترى أني تغيرت"

"من شوكت تغيرت! سبحانك ربّي، أدري كلش زين بسوالفك الساقطة وياي وأخاف على نفسي منك."

لؤي: "صُدگ چذب ترى أنتِ عرضي"

هززتُ يدي وقلتُ بسخرية من كلامه:

-"اللّهمّ صلِ على محمد وعلى آل محمد زين من تذكرت."

لؤي: "هسة أوصلچ لو لا؟"

- "لا وألف لا"

لؤي: "ممنوع تبقين وحدچ بالبيت، رح ابقى وياچ لحدما يجون"

- "تخسي والله إذا دخلت للبيت أسويلك فضيحة."

لؤي: "تمام لعد رح أخابر أمچ واگُلها لو أوصلچ لو أبقى وياچ بالبيت"

ارتبكتُ. هذا سيفعلها حقًا ويتصل بأمي. سكتُّ أفكّر ثمّ هززتُ رأسي موافقةً:

-"لا تخابر أمي."

ابتسم، ولم يظهر عليه شيء. توكّلتُ على الله وركبتُ السيارة. طوال الطريق ظللتُ ساكتةً قلبي يؤذيني. شعرتُ أنّ مصيبةً ستقع على رأسي. كنتُ أستغفر ربي في سرّي. مضت ربع ساعة وهو يقود بصمت.

سألتهُ مُستغربة:

- "معقولة بيتهم بعيد؟ لعد خلصت الزفة أكيد!"

لم يجبني. التفتُّ إليه، فإذا به يرمقني بنظرةٍ غريبة ويغمز. ارتعد جسدي، وقلتُ لهُ بصوتٍ مرتجف:

- "وين ماخذني؟"

تجمّد دمي في عروقي، راحت يداي ترتجفان. كنتُ متأكدة أنه سيؤذيني. صرختُ بصوتٍ عالٍ:

"رجعني للبيت!!! دا احچي وياك جاوبني لا تنطيني الاذن الطرشة رجعني لا والله أفتح الباب وأصيح وأشهرك!!"

لؤي: "الباب والجام مقفولات ياحلوة منو إلي گادر يسمعج؟ أني مو غبي وافوت هيج فرصة وما اسوي إلي أبالي، چنت أحلم بي من سنين طويلة."

جنّ جنوني، صرتُ أضرب على الباب وأصيح، وهو مستمر في القيادة غير آبه.

"الله يطيح حظك يا عار يا عديم الشرف نزلني يا حيوان"

صفعني على وجهي صفعةً أحرقت خدي:

"الله ياخذك كسر بيدك يا ربّي."

لم أستطع أن أستجديه، توقفت السيارة بجانب بستانٍ بعيدٍ عن المدينة على أطراف بغداد. لم أتعرف على المكان. فتح الباب، كنتُ مصدومةً، أمسكني من شعري وجرّني بسرعةٍ إلى غرفةٍ صغيرةٍ في البستان. كنتُ أصرخ:

"عوفني ولك شعري وخر والله وكفيلك مُوسى الكاظم إذا مديت أيدك وتقربت خطوة وحدة اكتلك بيدي."

ضحك وأغلق الباب متقدّمًا نحوي، وأنا أتراجع خائفة أضع يدي على قلبي. اشمأزتُ من شكله وبصقتُ في وجهه.

"لك أني بنت عمتك شبيك أنت سكران مو بوعيك اصحى على نفسك."

ضربني ودفعني على الأرض محاولًا أن يعتدي عليّ، وأنا أستمر بضربه. في تلك اللّحظة أقسمتُ أنّي لن أسمح له حتى لو قتلتُ نفسي أو قتلته هو. استمددتُ قوّةً كبيرةً فجأةً، ركلته بكلّ قوّتي ثمّ ركضتُ نحو الباب. لكنه أمسك شعري مجددًا، فالتفتُّ وضربتهُ بقوّةٍ في مكانٍ حساس حتّى أوجعتهُ بشدّة. أفلتني، فهربتُ بأقصى سرعتي من البستان، أركض والدُّموع على وجهي حتّى ابتعدتُ كثيرًا.

كنتُ فرِحةً في داخلي رغم التعب. لم أسمح له بانتهاك جسدي، حمدتُ الله لأنّه منحني القوّة في لحظة ضعف. كنتُ أضحك وأبكي وأنا أركض بلا توقف.

تذكّرتُ كلّ ما فعله بي منذ صغري، وكيف كنتُ أخاف إخبار أمي لأنها لا تصدّقني وتضربني. كنتُ أكتم في قلبي لأنّني أعرف أنّني سأُلام وحدي. لديّ توأمٌ تشبهني في الخِلقة وتختلف عني في الطباع، علاقتنا باردة. أبي طيّب وفقير، لم يمد يده علينا يومًا، أحبّنا أنا وأختي كثيرًا، ومع ذلك لم أخبره بشيء خوفًا من أن يُفهمني خطأ.

كبرتُ وأنا أقول سأقف بوجهه، لكن رغبته ازدادت حتّى صار عمري ١٧ عامًا. واليوم كرهته أضعافًا حين حاول الاعتداء عليّ.

أمشي وأسبّه في قلبي حتّى وصلتُ إلى شارعٍ عام. كنتُ أركض منذ ساعتين بلا توقّف. جاءت سيارة وتوقفت، أطلّ منها رجل كبير وقال بقلق:

"بابا شبيچ؟ شفتچ من بعيد تركضين بتعب."

مسحتُ دموعي وقلتُ:

"عمو فدوة وديني للكاظمية."

مسح وجهه بقلق وقال:

"أركبي بابا هياتها الكاظمية هسة أوصلچ لبيتكم تدللين بنيتي خادم الچ."

ركبتُ معه، ولم يسألني شيئًا طوال الطريق. نصف ساعة ووصلنا إلى شارعنا.

- "اوگف عمو اجيبلك الكروة."

- "روحي دخلي لبيتكم بسرعة بالچ على نفسچ ما أريد بوية اعتبريها وصلت."

-"فدوة لگلبك الطيب عمو الله يحفظك لجهالك ويوفقك ويرزقك، تسلم."

تركني ورحل. أردتُ دخول البيت فتذكرت أنّ المفتاح في سيارة لؤي. ضربتُ رأسي قهرًا. لا يوجد لديّ حلّ سِوى الجلوس على الرّصيف ألهثُ من الركض والعطش، أنتظر أحد إخوتي. مع غروب الشّمس جاءت سيارة "سالار" أخي الكبير، توقّف مستغربًا:

"ها يابة شعندچ هنا گاعدة بالشارع؟ شكو ناردين مو رحتي للعرس؟"

"وصلني أمجد أبن عمو."

"وليش باقية هنا ما عندچ المفتاح البيت؟ شكو گاعدة بالشارع زحمة."

"جيب المفتاح إلي عندك أريد ادخل تعبانة مفتاح البيت نسيتة بالعرس."

أخذتُ المفتاح منه ودخلتُ البيت الفارغ. خرج هو، وقال: "هسه يجن نبراس ونور رايح أني."

خفتُ أن يأتي لؤي وأنا وحدي. أغلقتُ الأبواب والنوافذ وجلستُ في غرفتي. كانت روحي منهكة، أكرهتُ كلّ شيء حتّى حياتي حين تذكّرتُ ذلك النذل.

"شدعي شكول!! الله ياخذك ويخلصني منك ما عندي بس ربّ العالمين اشكيله، الشكوى لغيره مذلة."

قررتُ أن أفتح الموضوع مع أبي حين يعود، ثمّ تراجعتُ خوفًا من أن يُفهم خطأ ويجبروني على الزواج به. ضجرتُ: إلى متى أسكت؟ اليوم نجوتُ منه، غدًا قد لا أستطيع.

وقفتُ أمام المرآة أُخاطب نفسي: ما أريد أبچي ولا أسوي دراما بالعكس يا ناردين أنتِ أقوى من أن يبچيچ رجل عار يفتقر الرجولة.

توجّهتُ إلى المغسلة، توضأتُ، وعدتُ إلى غرفتي، فرشتُ سجادتي وصلّيت ركعتين، قرأتُ سورة يس، شعرتُ بالطمأنينة والهبوط يزول عن صدري. أعدتُ سجادتي وتمددتُ على السرير. الصباح رباح، غدًا أقرر ماذا افعل.

يتبع…

___

نمارق رحيم✍️🏻

اجو من العرس محد افتقدني وگال وينج؟ بس نبراس گالت ما شفتج گلتلها باللامبالاة البيت هوسه وظليت بالطارمة ما وگفت يمكم اختنگت ورجعت للبيت سكتت وما گالت شي وامي ما سألت اصلاً وهالشيء قهرني انو وجودي وعدمه واحد بالنسبة إلها ..

اليوم الثاني گعدت الصبح مثل الروتين كالعادة رحت للمدرسة جان عدنا درس شاغل ظليت اشخبط بدفتري گعدن يمي شلة بنات..

هذن المجموعة سوالفهن كلها على الحب وكلهن يحبن ومصادقات رغم سوالفهن حلوة ما بيها شي خلني اندمج وياهن بالحديث..

عفت دفتري وظليت اسمعهن تالي سألني انتي ليش ما تحبين ضحكت وهزيت ايدي جاوبتهن منو الي يحبني..

جاوبتني وحدة منهن وگالت ليش ترى انتي صح سمرة بس ملامحج تجنن..

باوعتلها صفح وجاوبتها ترى قصدي على خبالي محد گادر يتحمله مو على وجهي وانا مقتنعة بنفسي واعرف روحي جميلة وبشرتي برونزية زايدتني جمال..

بتول: اي بس شعجب ما عندج احد ابالج وما معجبة معقولة گلبج ما نبض لشخص..

-إي.

بتول: عندي واحد يريد يحب وحدة ويعيشها اميرة زمانها تردين انطي رقمج؟ هو كلش جاد بكلامه يعني لاتخافين ما يلعب عليج

- لا ما أحب هذه السوالف خلوني بعيدة عنها.

صفا: شبيج انفعلتي ترى ماكو وحدة بگدج ما مصادقة وتحب شعبتنا كلها مرتبطة..

-حياتكم مو حياتي.

صفا: بس الحب حلو ناردين رح يخليج تكونين مجنونة..

-على اساس أني ناقصني خبال! اسكتي اسكتي.

بتول: هههههه براحتچ احنا نريد مصلحتچ وحبينا نساعدچ ما نجبرچ

-مصلحتي! ما فهمت قصدچ؟

صفا: نعرف بيچ انعزالية وما تفضفضين لأحد حتى اختج نبراس تؤامج ما نشوفج تگعدين وياها لو تسولفين وسمعنه دائماً تصير عدكم مشاكل انتي وامج فگلنا تتسلين وي شخص ويمكن تتغيرين

ظليت صافنة متفاجئة شلون ملاحظين هالشيء ومنين عرفوا!! سألتها: شلون عرفتوا هالاشياء منو وصل الكم مشاكلي العائلية؟

بتول: سرور بنت جيرانكم گالت النا هيج عنج وما ندري صح لو لا بس من انعزالج عنا وما تسولفين ويانا وحتى دراستج هاملتها حسينا كلامها صحيح

- لا ماكو هيج شي وعلاقتي بأهلي زينة وماكو مشاكل وحتى وي امي والي وصلت الكم هالحچي تريد اطلعني مسكينة ومظلومة فگولوا الها لا تكذبين بعد..

بتول: ماشي لا تتعصبين..

سكتت ودگ الجرس دخلت مدرسة العربي كرهت هالدرس وشغلني تفكيري بكلامهم معقولة سرور توصل بيها الحقارة هيج

سرور صديقتي القديمة جنت اشكيلها واسولفلها اسراري بس من وعيت على سوالف لؤي تركتها وتجنبت كل صديقاتي وما جبت طاري سوالفه الها بس جنت اشكيلها من امي لأنها صديقتي

حالياً البنات الي بشعبتي كلهم زميلات ما عندي صديقة مقربة ولا اريد هيج مرتاحة بس ما جنت اعرف سرور رح تسولف للبنات على حياتي وما تضم اسراري

ما اهتميت وگلت عادي يابه وذا صارت حله طلعت وكل شويه التفت اباوع يمنى ويسرى خفت لؤي يراقبني لو اشوفه .. سوا بيه خوفه من البارحه حتى تحلمت بي يخنگني ..

الله ياخذك كون كبر وبصفه مطي حتئ اذا دفنوك وطلعت عايش يرفسك المطي وترجع للكبر ..

رجعت للبيت واحچي عليه بگلبي هو منو حتى اخاف منه يولي اصلا فد واحد بوخة .. قنعت نفسي بهذا الكلام ودخلت البيت فارع

ما موجودين .. رايحين لنرجس من الصبح يباركون الها صباحية العرس واني محد عزمني وگال تعالي ويانه! ..

عادي يابه وذا!!

تغديت سويت شامية رحت اباوع علئ مسلسل نمت والمغرب گعدت اقرا أمتحاني .. دخل سالار يغمز و يبتسم غمزة المصلحة

رفعت تك حاجب :- هـا شرايد ؟

سالار -يابه ادري بيج سادس بس شويه اعصابج اهدئي بعد اخوج وتعالي اريدج صبغيلي حذائي اريد اطلع

- ناقصك ايد رجل ما دتشوف دا اقرا

-ناردين والله مستعجل صديقي منتضرني اخوچ الچبير اني ترفضيلي طلب؟..

-توسل بعد

سالار -:چا غير انتي المعدله الورده يابه شحلاتج شنهي چنچ ڪليچه العيد ياسمين صبري ماتوصل جمالج

- تدري بيه احب لهجه البصراويه وجاي تسويلي اغراء ۿا ولك شسمه توسل بعد

- يابه تاكلين تبن وامشي كرامتي انسحلت دفضيها ولج

- خوش حظر الف حتئ اضمن مصروفي مال باچر ؛ماشتغل بلاش

شمر عليه المخده وراح سويتله حذاءه وانطاني الف أهم شيء وتالي رجعت اقرأ امتحاني رياضيات ما فاهمه شيء

انسطرت الأ شوي ابچي اتأخر الوقت

واني بعدني بالفصل الأول ..

ونوب المسائل الكاتبه حلها بالدفتر مافهمتها لان ماعرف خطي

يبووو عليج ياناردين .. هي المدرسه ماتشرح عدل شحجي عليج ست عايشو البكدج شبع ماي ورد وانتي بعدج تدرسين رياضيات ..

عيوني راحن للفجر واني بس ادرخ المسائل شلون ماچان بس كون اجيب درجة نجاح .. نمت بعد ما طلع الفجر وگعدت بالسبعة عيوني حمر ما شبعانه نوم ..

غسلت علئ سريع لبست الصدريه رصاصية شعري كيرلي سويته كباية عالية .. انتضرت السايق ماكو! عززه بس لا ضربني بوري ونساني وما اجه عليه ..

عندي امتحان اول درس إذا اتأخر خمس دقايق

ما ادخل للصف ..گلت لامي رايحه مشي لأن محد يوصلني بابا بالشغل وسالار بالكلية..

وخوب مصطفى حتى لو دوام وعنده امتحان الگا نايم بغرفته وما رايح للمدرسة.. توسلت بي يوصلني ماكو مارلفه جفن عليه طلعني من غرفته برفسه ورجع لنومته غسل اي والله

اخو چيس حب ؟

طلعت ضايجة لازمه الملازم بأثنين ايديه وجنطتي علئ ظهري ..مدنگه راسي وامشي وبداخلي اراجع القوانين واتذكر المسائل ..

وعلئ حظي العمال مال قطعه ارض دايشتغلون بيها وگاعدين بالشارع دا يتريگون .. هسه اني شلون اعبر ؟ ريوگهم بنص الشارع يالله سهلها وتسهل حتئ الدعاء نسيته ..

گمت اخبط بالحچي بگلبي مشيت علئ سريع وما باوعت بس عيونهم گصتني گص..

چانت الگاع گلها طين ومي وترابه لأن الفجر مطرت قوي بس الجو حلو نهاية الشهر العاشر ..

دامشي وصلت گبال المدرسة مشيت أسرع رح اوصل صلوات شفت اكو طين فوگا تراب .. هذا اكيد من مطرت الدنيا صار طين وهم العمال خلو عليه تراب حتئ يجف الطين ويصير اسمنت ..

تفكيري الخنفشاري ..

مشيت بكل ثقة وما مهتمة ودا افكر هسه عايشو وزعت الأسئلة الأمتحان ؟ لو ميسونو سجلتني غياب؟ .. ديلا عادي يابه وذا ..

توقفت ..ما احس الا على رجلي وصلها شيء

بارد علئ حار..

ما اعرف شنو بالضبط استغربت دنگت راسي ماشوف الا الطين مالي كل الحذاء ..

باوعت على الكارتونه الي معلگيها كاتبين عليها ممنوع عبور الشارع مسدود بأمر من الشركة

ياا عزه هاي شركة دا تسوي الشارع وترممه

صرخت من استوعبت ملابسي صارن كلهن طين ..

ونوب مو طين عادي لا هذا طين اليطلع بالأفلام الوحل الي يغركون بي

تخيلت محد موجود والشوارع فارغه واصيح محد يسمعني واغرك بالطين وينغرك راسي واموت

شهيده الطين ..

عزززززه يااا رجلي يمه لحگيني! الا شوي وابچي حسيت بحجم المصيبة إلي بيها أني.. اكو محل صغير بصف المدرسة يبيع لفات فلافل للطالبات..

من سمعني اصيح اجه هو وصديقة وكفو بعيد عني صاحو علية :-يا خوية شوداچ اهناااا شتسوين بالطين؟..

- عجبني اللعب بالطين..

- خيتي تذكرتي طفولتچ..

امده حضي أي والله.. سبيتهم بگلبي حالتي حاله وهذولي يتمضحكون..

جاوبتهم:- خويه ما چنت اعرف اكو طين ما أنتبهت شسوي هسة..

بسرعة سكتت وقطع كلامي صوت عالي شخطة سيارة.. التفت صارت بعيني سيارة سودة وكبيرة عبرت من يمنة لونها أسود فحم.. طالعة گبل ..

الولد ابو الفلافل صاح عليه اوگف اوگف يمعود.. توقفت بمسافة بعيدة شوي..

گال اله:- خوية السلام عليكم بلا زحمة عليك هاي طالبة مثل ماتشوف كلها طين ..ما تگدر تطلع وأنت اجيت بوقتك والله جابك خطيه أكيد عدها امتحان..وصلها للمدرسة بدون أمر عليك مثل خيتك هيه هياتها گبالك مو بعيدة..

حچه هيچ وما أشوف الا السيارة تقربت يمي كلش رفعت راسي وبنفس الوقت أنرفعت الجامة..

صارت عينه بعيني توترت ودنگت راسي بسرعة...

- عـزه بعيـنه علئ هلجمـال

گال بهدوء وهو يأشر علئ كشن الي ورا:- اركبي يابه..

فتحلي الباب شمرت الجنطة وملازمي وصعدت حسيت بالفشلة وسخت سيارتة للولد..

شخط السيارة لباب المدرسة نزلت اعدل بصدريتي..أبو الفلافل اتشكر منه وابو السيارة هز راسه وابتسم وراح.. حتى ما لحگت اتشكره

دخلت للمدرسة كل بالي يمه يا ترى هذا منو؟ وشنو اسمه؟ وين ساكن؟ معقولة ابن منطقتنه!..

الرياضيات كله اتبخر حرفيا ..

الساعة ثمانية ونص..المديرة واكفتلي بالباب الصف عبالك منتضرتني حتئ بس تغرد وترزل..

شافتني كلي طين سكتت الحمدلله..امتحنت بعدما رحت للحمام وغسلت صدريتي والحذاء

طلعت من الامتحان منسطره ومصخمه..وعادي ريلاكس.. اجت زينب صديقتي ونفس سؤالها بكل امتحان مجاوبة لو لا..

-مصخمة حبي

-صدگ؟

-اي كتبت قوانين من كيفي والقران سطرت ارقام وطلعت..

هزت ايدها وضحكت عادي يابه وذا.. يمكن لأن امتحان كله مصفنه وعقلي كله يفكر بهذا الساعدني..

ادعي إلك بحياة حلوة مثلك..

خلصت الفرصه رجعنه للصفوف اجت فاطمة ام المعلومات السرية ..

گالت بنات اجو مشرفين ودكاتره بالأدارة گاعدين..اسمعها واني امسح بالصبورة وما مهتمة..

- آي خلي يجون بعد احسن نشتكي للمشرفين علئ مدرساتنه إلي مو خوش يشرحن..

كلهن كالن اييي بس نخاف ناردين أنتي احجي لانو شخصيتج قوية وما تخافين..

- عادي يابه وذا اني اشتكي تدللون چنكم على شكوى خلوها عليه داده..

دگ الجرس اجت المدرسة تشرح عربي موضوع جديد.. تالي دخلت ميسونو المديرة قاطعت الشرح

گالت:- بنات رح يدخلون الدكاترة فحص النظر عدلو رحلاتكم ونضفو الصف بسرعة وعطروا..

ربع ساعة ودخلوا دكاترة ثلاثة، چنت گاعدة قبل الرحلة الأخيرة اشخبط بدفتر وارسم عيون وما منتبهة الهم

بين الربع ساعة يحچون وي الطالبات بعد سلام وكلام واحد منهم گال بنبرة هادئة خلاني اركز بيها واسمع كلامه..

-الي ما تشوف ياريت تتقدم وتجي يمي افحص نظرها واختبرها..

سارحة اشخبط وما منتبهة عليهم بس اسمعهم تالي ضربتني صفا بالقلم..

-وسم وعمه شبيچ؟..

صفا: عمه بعينچ دشوفي الدكتور بربچ دشووفي ربچ شخالق!!..

رفعت راسي بإستغراب وشفته گاعد وياهم من ضمن الدكاترة! فتحت عيوني على وسعهن من المفاجئة وشهگت..

وكفت علئ طولي بالرحله وصحت ... عززززززززززه

يتبع..

__

نمارق رحيم✍️🏻

رفعت راسي بأستغراب شفتة فتحت عيوني علئ وسعهن من الصدمة

وكفت علئ طولي بالرحله وصحت ... عززززززززه

الكل انصدم البنات التفتن عليه بصدمة من عيطتي گبالهم شهگت عززه هذا نفسه الساعدني الصبح يمممه هوو الدكتورر !! عززه ماداصدك

گالت إليه المديرة شنوو هاي التصرفات ليش صيحتي شنو صاار؟..

ارتبكت .. ست شسمه شفت ابو بريص كاعد ! اا اقصد شسمه واكف علئ حايط لذلك انكمزت اسسفه

كالت بعصبيه اكعدي وسوتلي علامة بيدها بمعنئ اني الج ورا الولد علمود مايشوف التهديد

هو بقى ساكت واصلا ما باوعلي من حچيت ضل مدنگ..

هسه هذا ثگيل لو يستحرم يباوع بوجه الحلوات مثلي ؛

گعدت بالرحلة واحد منهم بدأ يفحص نظر الطالبات وهو فقط گاعد، تمنيت نظري ضعيف حتى يفحصني هو بالذات ..

گالوا بعد منو نظرها ضعيف؟ رفعت ايدي وجاوبت إﻧـي..

إنتبهلي هو وباوعلي بإستغراب، گمت وگفت يم السبورة بدأ يختبرني الدكتور ويطلع الحروف E على اشكال مختلفة كبيرة وصغيرة

جاوبت كلهن خطأ شك بيه اچذب رجع لكرسيه طلع ورقة وانطانياها ..

-هاي انطيها لوالدچ او لأحد يوديچ للمستوصف ومناك يحولوچ للعيادة الدكتورة حوراء الشغل مو يمنا، يمها ..

اخذتها من ايده وظليت صافنة بوجهة كزبر جسمي من لمسة ايده حچه وي المديرة وطلعوا من الصف رئستًا ..

رجعت للرحلة واني سارحة بغير عالم، هو شنو اسمه؟ .. اساساً ليش دا أفكر بي مجرد ساعدني وهاهيه ..

يربييي انت تخلق وعبدك يبتلي..

أريد اروح لعيادته شلوون واسمه ما اعرفه ضربت راسي بقهر رح اسكت يولي كافي رح اطلعه من عقلي زين هوو وين عيادته؟ ..

والمديرة سوتها صدگ ودزت عليه بنات حتى اروح للأدارة ، رحت وچانت عصبية گالت الضيوف أول مرة يجون لمدرستنا فشلتينا بردة فعلج

اعتذرت منها وگلتلها مو قصدي بس صدگ شفت ابو بريص تكرمين وصرخت، سكتت وتالي گالت تمام روحي..

ما ادري شلون مر الوقت خلصن ٥ دروس ورجعت للبيت مشي..

مشيت واني مركزة عيوني بالگاع حيل خاف اكو طين ما اريد اتفشل بعد ..رجعت گبل نمت فزيت العصر مصدومة..

عزززه تحلمت بي !!!

لا هاي هوايه لعد شگد مفكرة بي! شسالفة شبيه اليوم؟ هسه هذا منين طلع إليه، رغم هذا إبتسمت چان الحلم كلش حلو !

تذكرت كلام البنات صفا وبتول وسوالفهن على الحب والارتباط صفنت بتوتر معقولة ناردين رح توگعين مثلهن وتحبين مثلهن!

يمكن كلامهن بالحب اثر عليه فعلاً خصوصاً من جابن طاري امي والمشاكل تنهدت وگمت گلت الله كريم..

نزلت جوه سالار متمدد ومصطفى ضارب الدنيا چلاق ودا يلعب بلي..گعدت متربعة أيدي على راسي..

مصطفى: بس لا السادس وجع راسچ لاتصدميني من كثر الدراسة راسچ يٲذيچ؟..

-انت بس اسكت وراسي يصير زين..

دخلت امي: مصطفئ روح جيب صمون

قبل ما يصير المغرب..

مصطفى:- فد شوي اكمل بلي واروح..

دخل بابا وأمي خلت صينية چاي والكعك..

گلت لأبوي: اريد اروح للمستوصف فحصوا نظري اليوم وطلع ضعيف ما اشوف..

مصطفئ: حقچ من المسلسلات الكورية والسهر علئ الافلام..

-لا تصير حشري..

أبوي: اي ان شاءالله اوديچ الله كريم فارغ اليوم ماعندي شي..

وداني للمستوصف چان تعبان گال بسرعة روحي ادخلي جيبي عنوان الدكتورة وتعالي فرحت گلت اخذ عنوانه هو، رحت حچيت وي البنية گالت تفحصين عند دكتورة حوراء..

-لا أريد عند الدكتور

-يا دكتور قصدچ؟

- ما اعرف اسمه بس إذا تعرفين هو اليوم اجه لمدرستنا مدرسة ثانوية نور الأيمان..

-اها دكتور حيدرة قصدج ؟

- آي هو اريد احجز يمه أريد عنوان عيادته

گلتلي شنو اسمج انتي انطيتها اسمي الثلاثي هزت راسها وانطتني اياه بس كانو ما راضية ومجبورة ! تشكرتها وطلعت عزه ما داصدگ عرفت اسمه وعنوان شغله هم!!

نوب أسمه "حيدرة" شگد حلو!!

رجعت للبيت فرحانة گلت لبابا بليل نروح يفتح هيچ وگت ويسد عيادته بـ 12

بسرعة رحت بدلت تنورة وقميص رصاصي رفعت شعري كبايه ونزلت كذله طويلة

أبـوي: سالار يوصلچ مابيه حيل أطلع بعد

جاوبتة:- تمام إن شاءالله

وصلني "سـالار" لمكان عيادته صعدنه بالطابق الثاني موجودة بنية تاخذ الحجز وتكتب الأسماء سجلت أسمي

گلتلها اريد احجز يم دكتور حيدرة صفنت بوجهي وگالت منين تعرفين اسمه ومنين جبتي العنوان..

استغربت وجاوبتها ليش هو مو دكتور هنا يشتغل؟ جاوبتني بصوت ناصي متفاجئة منها اي بس مامعروف

گلتلها بنية انطتني العنوان من رحت للمستوصف وسجلت اسمي الثلاثي گالت ها تمام اذا هيج..

اجه سالار وگف يمي قريب وگال يمته نگدر ندخل؟

جاوبته هي:

- بعد كم شخص انتظروا لطفاً ..

گعدنه على الكراسي نسولف ونحچي.. انتبهت عليها شالت موبايلها وظلت تخابر وكانو متوترة تالي دخلت لغرفة حيدرة دقايق وطلعت..

ما اهتميت گلت يجوز تنطي علم او تبلغه شفت سالار صافن على لوحه فوگ الباب واتفاجئ..

- ها شبيك شصار؟

- هذا اخو حسن..

أستغربت: يا حسن هذا ؟

سالار -: حسن صديقي

انصدمت وجاوبتة شلون عرفته!؟..

- الدكتور حيدرة أخو حسن الچبير ومرات يجي للكلية وهم ملتقي بي هواية بس ولا مرة جاي اني لعيادته لذلك اتفاجئت

- اهااا

جر ايدي وگمنه گال للبنية:- مستعجلين خلي تدخل أريد أحچي وي الدكتور بسرعة

البنيه راحت تفتح الباب سالار دخل واني واكفة بعدني

گاعد بڪل هدوء يحچي وي الولد وينطي نظارات من شاف "سـالار" گام و أبتسم سلمو وتحاضنو

تقدمت وگفت بظهر سالار ما چان منتبه إلي وما رفع عيونه عليه

سالار: حيدرة هذِه أختي الصغيرة

باوعلي احسه انصدم من شافني أو ما متوقع يشوفني بس مابين شيء أبتسم

گـال:" أتشرف..

گعدنه وهمه يسولفون ومنطلقين واني بس أصفن عليهم زين شنو اني رجل كرسي اهنا؟

سـالار: خوية افحص نضر هلخبلة وريحني شلعان كلب الله وكيلك

حيدرة: تمام بوية تعالي افحص نضرچ واتأكد مرة الثانية لحتئ انطيج درجة المناسبة لمناظرچ

جعل محد يكلي بويه غيرك .. شهل رزانه والاسلوب والكعده

بقو يحچون وبعدين وگفت ورجع يطلعلي حرف E وكم اختبار واني أتعمد اجاوبهم خطأ

دگ موبايل سـالار خابر وخلص گال: اني

رايح شوي واجي علما يخلص الفحص ..

خجلت وارتعشت لأن رح نبقئ لوحدنه!!

من يسألني اجاوبة غلط تالي گال إلي:

- "گـعدي ..

گعدت اجه يمي وكف قريب كلش دنگ غمضت عيوني كزبر جسمي من قربة

- فتحي عيونچ ليش غمضتيهن ؟

سكتت تلمس عيني وفتحهن بيده صفن

شوي واني رافعه راسي اباوع الهُ

كال هاي عيونج ؟

إستغربت:- شنو قصدك ؟

- عيونج الحقيقيه لو عدسات

- أكيد عيوني

سكت ورجع لكرسيه، فتح المعرض بصفه بي كومة مناظر،طلع مناضر ورديه نازكه والأيطار صغير

انطانياها كتله شنۉ هاي ماريد هذا اللون مااحبه

ضل صافن گـال: چَا شنو بوية يالون

تردين ؟ هي مناظر قابل لبس

هوو گـال "چَا" لو راد گلبي يوگف

- أنت بصراوي ؟

رفعَ حاجبة وهز راسة بمعنئ "آي"

- عززه احلللفففففف

انصدم مني وگال: ليش انفعلتي وشبيهم البصراويـين ؟

كلت بسرعة - اعششششقهم

- شبيچ يابة بالهداوه!

- هههه لا بس اني احب اهل البصرة واتمنى اروح إلها

سكت ما رد ..

- صدگ نسيت اگلك شيء

باوعلي ورفع تك حاجب بمعنئ گولي..

- شكراً كُلش شكراً لان ساعدتني اليوم الصبح وصلتني للمدرسة وما لحگت اشكرك لأن رحت

- العفو لا شكر علئ واجب يابه مجرد وصلتج وساعدتچ من الطين

أبتسمت بدلي المناظر گال إلي..

- يا لون تردي؟ ..

- أسود

انطانياها وضل يكتب واني أصفن وارجع ادور وجهي خاف ينتبه إلي ..

عبالك شارد من كوكب ثاني، لزمت گلبي يدگ سريع

بقيت صافنة بملامحَ وجهه البصراوية ..

أباوعلة بتركيز واتأملة و أني مُبتسمة..

حنطـاوي عـلئ سمـار بذقنه المدبـب

ولحيتـه الخفيفـه سحرتنـي!!

و عـيونـه الـواسعـه

و شعـرة حاجبـة وثخـنه

تسريحة شعرة المرفوعـه بترتيـب

وثخـن شعـره الفاحـم !!

رأيتك صدفة أول مرة و سلبت قـلبي

لم اؤمـن بالحُب بٲول نظرة قبل إن اراك

صدفة وما احلاها مـن صدفة

جعلت قلبي يُنبض من هذه اللحضة

لا أدري يا حبيبي اهذا حُب أم اعجاب ؟

يتبع ..

توقف نظري واني اتأمل ملامح وجهة صوت سالار من دخل وهو يگول:- السلام عليكم

نزلت راسي وگمت..

حيدرة: أهلاً..

سالار: دكتورنه صارت عندي شغلة لذلك تأخرت

حيدرة: عادي يابة..

سالار: المهم انطيتها نظارات؟..

حيدرة: أي انطيتها حبيبي..

سالار: تعبناك دكتورتنه..

ضحك وغمزله كأنُ نظراتهم الغاز ويقصدون شيء .. جاوبة بأبتسامة تعبكم راحة ولو..

قبل ما نطلع ما قبل ياخذ فلوس الفحص سلم عليه وطلعنه..

ركبت السيارة واني صافنة بالجامة ومانتبهة على سالار يحچي وياي..

-الصفنه مو الچ لـ أبو صابر..

-ها شنو!..

-دا اگول تردين فلافل لو سمبوسه..

- هاا فلافل فلافل..

- خـوش انتظريني دقايق

صف السيارة وراح جاب فلافل ولفات النه .. اكلناها بالطريق وصلنه للبيت والوقت متأخر حيل الكل نايم

صعدت للغرفة نور نايمة ونبراس متغطيه جوا البطانية وضوا الشاشة مبين لازمة الايباد

شمرت الجنطة بالگاع بضوجة وصافنه بالمرايا تالي توقفت من تذكرت المناظر بالجنطة..

عززه بس لا انكسرن!!

رحت طلعتها الحمدلله مانكسرن بس فكرت بيها لو متكسره جان رحت للعياده اجيب وحده جديده وهمات اشوفة..بدلت ورحت تمددت على چربايتي

بقيت بس اني گاعدة للفجر سارحه بخيالي واصفن واتذكر الدكتور بالي ما فرغ من تفكير بي

سمعت صوت الأذان صليت الفجر وقريت قرأن تالي تمددت ونمت أعمق نومة

گعدنه الصبح نتريگ چان يوم جمعة أمي تگلي طماطة و بيض وريحة تسطر..

تذكرت الفلافل مال البارحة حميته وصعدت لغرفة سالار اگعده سمعته يحچي وي وحدة

ضحكت وچان الزم دليل علية

دخلت وهوو قطع الأتصال وشمر المخدة

-سالار العاشق الولهان، تعال اتزقنب

-يا عاشق يا حُب يا اكلان تبن ولچ زميلتي

-صحيح صدگتك لاتحلف..

زمخ بيه واني اضحك طلعت واجه وراي گعدنة نتريگ..

افتقدنه نرجس أختي.. بابا ما اكل شيء مصطفى غير الموضوع وگال لأبوي اريد بلي جديد..

نرجس اختي الچبيرة اكبر مني بـ٥ سنوات تزوجت الي تحبه بجامعتها..

احنا عدنه عادي وحده تزوج عن حب والاهل يدرون بس من تخلص دراستها..

ماما راحت تركب غده واني رجعت گعدت وايدي علئ خدي صافنه بالسگف ومبتسمه..

وافكر بي شگد حلو اسلوبه وكلامة من يگول بويـه شگد حلوة منه.. جعل محد يگول بوية غيرك ياحيدرة..

چنت معجبة بي ومن دريت بي بصراوي زاد أعجابي بي..

ويمكن بسبب اسلوبة وهدوئة الغريب لو من لهجتة..

اتسأل نفسي هوو شگد عمره؟ شكله ينطي عمر ٢٦ لو ٢٧ مو چبير هواي..

طلعت الورقة والمناظر بقيت اشمم بيها ومبتسمة لبست المناظر بعد ماضميته وبستها

حسيت مابيها شي ڪمناظر عاديه مال قراءة عبالك ..

استغربت گلت هو يمكن هيچ طبيعة المناظر ولأن اني اشوف ما أحس اكو اختلاف

دخلت نبراس تؤامي .. وهي تگول..

- ناردين صدرية الرصاصية ام الوردة

وينها اريد اغسلها ؟

صخيمة دا احچي ويااچ ردي..

-اهووو شعرفني بصدريتچ اني!..

عاطت امي بينه ولچن تعالن سون الغدة رايحه اغسل الطرمة وضلت تغلط..

رحنه للمطبخ نبراس تطبخ واني بس اساعدها اودي واجيب واغسل..

لان اني طگه ونص بالطبخ ما اعرف الكركم من الكاري ولا مرة طابخة..

مره تحمست اسوي شوربه عدس عبالي ينخلي بيها معجون حتئ تصير حمره اشو طلعت صلصله مو شوربه ومالحـه تگطع ونصهم صار ببهم اسهال ..

حفظت كرامتي وما دخلت للمطبخ بعدها..

وره الغدة امي چانت تخابر مرت خالو گالت الها خالو مريض فلاونزه وقوية!! ..

امي نهت الأتصال وراحت گالت لابوي گال بدلو نروح لبيت خالكم وأني ما ادري يا خال منهم المريض رحت لنور وسئلتها

نور: خالو جابر أبو لؤي..

عزه لا ما اروح ونوب اشوفة واني بلگوه ناسيه السالفة!! ..گلت الهم ما اروح وتحججت بالدراسة راحوا وبقيت اني..

مر أسبوع.. كل ليله قبل ما انام اتخيله وافكر بي علمود اتحلم بي ومن اگعد مبتسمة مع هذا مستغربة من نفسي ليش هيچ مخليته أبالي وما نسيتة

بليل صعدت للغرفة وقفلتها طلعت المناظر وكسرت الجام مالها

ما چنت بوكتها اعرف هذا أكبر غلط سويته.. يمكن چان تهور وطيش مني..

رحت نزلت جوه لسالار كلت إله أنكسرت مناظري وباچر دوام شلون أروح ؟..

سالار: رايح اجيبلچ غيرها نفس الدرجة مو؟..

-لا اروح وياك افضل لأن اريد يقيس نظري مره لخ يمكن احتاج درجه ثانية..

-ها تمام روحي بدلي..

رحت بدلت بسرعة..وصلنه للعيادة وصل دورنه گالت البنيه ما يصير تدخلون سويه بس واحد الي يفحص عيونة..

هز راسه دخلنه وشافه گام سلم عليه گاله سالار مناظرها انكسرن وهم اتأكد من نضرها رايح هناك اگعد انتضرها..

طلع وسد الباب ما حچيت شي گال گعدي..

-ها آآي هسة..

بقيت ساكتة وهو هم، گلت بأرتباك..

-والمناظر !؟

-خصم الحچي شنو تردين ؟

-مناظر جديدة مو گالك سالار انكسرن

:- اي وانتي تردين مناظر وانتي تشوفين ؟

تقاجئت بكلامه وتوترت وضليت اطكطك أصابيعي گلتله شنو قصدك أشوف؟..

؛- بويه تره اعرف بيج اتشوفين لاتمثلين

گمت من مكاني وگلتله بأستعجال:- رح أرووح..

وگف وگال گعدي بله..

-أريد اطلع

-ليش ترجفين؟ تره ما اكل بشر.. گعدي

المناظر الي انطيتهن الچ مناظر عادية لان دريت بيچ تشوفين ونضرچ تمام التمام

انتي مو طبيعية وتصرفاتچ عجيبة غريبة سولفيلي يمكن اگدر اساعدج حتى لو ما عدنه صله قرابه بس حسيتچ عندچ حچي بگلبچ كاتمته انتي مراجعتي وانا دكتورچ واسمعچ..

-آي صحيح..

-اذا ممكن تگعدين أحچي كلمتين وياچ!..

گعدت ومارفعت راسي..

-اريدچ تشرحيلي وتوضحيلي ليش مثلتي ما تشوفين والأختبارات كلهن غلط!! ليش مضطرة تچذبين ؟!..

تلعثمت ما عرفت شحچي!! اگوله سويت كل هذا لأن اريد اشوفك؟..

سكتت گال: "ليش ساكته احچي..

- ماسويت لأجل شيء معين..

رفع تـك حاجبة: چا شنو ؟..

- هيچ..

- بابا ما جاي اشاقه وياچ انا جاي احچي جديات ادري اكوو شيء دفعچ تچذبين عليه..

باوعتله وعيني بعينه گلتله واني ما دا أشاقة وياك صدگني..

- صح انتي مراجعة عندي ومع هذا نزلي عينچ لا تتحديني بيها مفهوم يابه؟..

وگفت متخصره گلتله ردت مناظر وهاهية ما تريد گول علمود أروح؟..

عصب وكام من كرسي وطلع من مكتبة اجه وگف يمي..

-يابة لا تعلين صووتچ!! عجيب .. كلامچ ثنمي قبل ماتگولي ويا مناظر وانتي تشوفيين؟؟..

-شكراً على استضافتك دكتور مع السلامة

لزم ايدي بعصبية ورجعني للكرسي گعدني بثبات تفاجئت من تصرفة وحركته السريعة ..

-أنا مو ناقص وما عندي غيره سئلتج سؤال بما إن أنا دكتورچ وهو ليش جاي تچذبين؟ وانتي شكلچ ما حابه تجاوبين براحتچ رح يجي اخوچ روحي ويا وبعد لاتجين وچذبي على دكتور ثاني لاتجين لعيادتي..

دگ الجرس الي علئ الميز بعصبية وبقوة اجت البنيه المساعدة گال الها..دخلي الي بعدها فورًا

استغربت هيه واني أخذت جنطتي وطلعت بسرعة وگلبي يدگ حيل.. عيوني غوشن وهي تدور علئ سالار ما موجود...

گالتلي البنية الي اجه وياچ نزل بعد ما دفع الفلوس ومنتظرچ بالكراچ ..

رحتله ديخابر انطاني المفتاح السيارة گال فتحيها صعدي هسه اجي ..

صعدت بالسيارة ورگعت الباب حييل من قهري شمرت الجنطة ورا الكشن..

خليت راسي بحضني بچيت بقهر وربي ماردت اكبر الموضوع هيچ واجاوبه بهل شكل أكيد هسه كرهني..

حقه اني ارد بسرعة وما احسب حساب لكلامي هسه بعد مارح يقبل اجي لعيادته مره الثانية

اذا ارجع للبيت سالار من يگلي وين مناطرچ شنو اگول إله؟ يا ربي هسه اني شوازاني ونعجبت بي وخليته بعقلي!!..

باوعت روحي بالمرايا وغميتها صدگ مخبلة اني ما چذب من گال ..

صعد سالار مسحت دموعي باوعلي متفاجى..

- ها يروحي شبيج شنو دا تبچين ؟

-بلي بس شسمه عيوني دا يأذني ما متعودة على مناظر..

شغل السيارة:- هاا اي بعد اخوچ اكيد تتأذين

وبعدين تتعودين..

-آآي وهو هيچ..

رجعنه للبيت وصلني وراح دخلت للبيت دا يتعشون..

بدلت وبقيت بلغرفه مانزلت طفيت الكلوب ورجعت تمددت بچيت ما اريد بعد افكرر بي هاهيه خلص اريد اطلعه من تفكيري

لكن هيهات بس اصفن عقلي مايقتنع يفكر بغير شيء جبت شال غطيت عيوني واستطنعت النوم لحد ماغفيت واني كارهة كلشي

ثاني يوم الصبح ..

گعدت علئ دفره امي وصوت المي فتحت عيوني بنعاس تريد تغسل الغرفة

اخذت بطانيتي ومخدتي ورحت للهول اكمل نومتي مستحييل يخلون أحد ينام بدون ازعاج

فزيت الساعة بالعشره انكمزت عزززه بوجهچ وبعينچ وبطولچ يا ناردين

لا دارسه ولا كاتبة ولا كاويه صدريتي!! ياربي!!

ماعرفت شسوي بقيت ايد تحل تمرين رياضيات وايد تحل تمرين عربي

وكله نقل من الملزمه وكوب الحليب يمي وفوگ راسي أمي ترزل بيه وتغلط ..

چان دوامي ظهري نبراس سبقتني راحت للمدرسة .. واني چنت اكوي ملابسي وما لحگت بدلت علئ السريع طلعت امشي ركض أريد بس اوصل حتئ ادرس هناك..

انصدمت من توقفت سيارة يمي ونزل منها لؤي !! جسمي ضل يرجف وتوقفت بمكاني تقرب مني وعينه بعيني يضحك..

گال بُسخريه أسمعي زين يا ناردين وافهمي..انتي الي ورح تبقين الي ان رضيتي او لا ياحلوة؟؟

قاطعتة: لك هييي شگد صلف رووح منا يا فاره المجاري

لــؤي:- باعي لچ قسم بالله اذا لعبتي بذيلچ وگلتيلهم اني خطفتچ بعرس اختچ ماتلومين الا نفسچ ومااطلع رجال إذا ماندمتچ دم..

- ديله علئ اساس أنت رجااال؟ اني لو اريد اگول چان حچيت من يومها بس ما اريد اهبط ضغط بابا بسببك ياعار الزلم ماتوخفني لا أنت ولا القندرة المثلك

رفع ايده عليه بنص الشارع راد يضربني تفلت عليـه بنص كصتة..وركضت بسرعة وما باوعت ليورا مالحگ يلزمني دخلت للمدرسة..

ايدي علئ گلبي فحطت من ركض ومن الهبطة الي سواها بيه..

الله ياخذه لا عنده كرامة ولا غيره ولا شرف معقولة هذا ينحسب علئ الزلم!!؟

طاح حظة وحظ شواربه المعفنه خابصني بس يتواعد ويهدد بوخة..

دخلت للصف ايدي ترجف مدري شلون جاوبت وطلعت من الدرس كعدت بالساحه ماحسيت بدموعي من نزلن..

ياررربي تعبت بعد ما اتحمل تصرفات لؤي إلى متى اضل ساكتة!!

بقيت گاعدة لوحدي إلي بگلبي رح يبقئ بگلبي

وأخاف اگول لأحد..

جانوا صفا وبتول يتمشون من شافني اجن ركض يسألني شبيج وتقربن مني حضنني بالحظتها جنت محتاجة حضن دافي وكلمات حنونة إنفجرت بحضنهن واني ساكتة ما نطقت كلمة وحدة .

بتول: عمري گوليلي شبيج احنا يمج ونساعدچ .

صفا: صارلج كذا يوم متغيرة اكثر من قبل احجيلنا احنا مثل خواتج .

مسحت دموعي وشربت بطل مي تالي ضحكت كلتلهن ماكو بس جنت مختنگة .

صفا: لا گولي بربچ منو المتعبج وشاغل بالچ؟

اصرن عليه بالحجي ولحن بالحظتها جفصت وحجيت الهن على حيدرة..ظلن مبتسمات وگالن ولج اطلعين غبية وثولة إذا عفتي ..

-بس هو ما مفكر بيه .

بتول: اعترفيله..

-شنوو أعترف؟! .

صفا: گوليله على مشاعرج .

-صح اني مخبلة بس ما توصل هيج لا اكيد.

بتول: ترى اني وي أحمد علاقتنا مثل العسل واني الي بادرت واعترفتله بحبي، وهسه هو مثل المجنون بيه .

-هو يحبج ومفكر بيج حيدرة لا.

صفا: ولج تجي غيرج وتاخذه هم جمال وهم دكتور وهم بعده صغير وانتي ما ناقصج شيء خبلي ويصير خاتم بيدج .

-لا بنات ما توصل هيج يلا رايحة حتصير حلة .

بتول: احنا هم رايحين بس نصيحة لا تعوفين هيج شخص كنز .

گمت وكلامهن يرن بأذني، بالرجعة للبيت لزمت ايد نبراس خفت لا يجي لؤي صعدت لغرفة نامن واني تغطيت جوه البطانية

وكلامهن ما نسيته، اتساءل نفسي وگلبي مقهور ومخنوگة غصة بصدري يعني أني ليش مو مثل باقي البنات؟

اليوم إنفجرت بحضن غريبات لو عندي شخص مقرب ما يصير هيج، ما عندي صديقة قريبة اشكيلها همي ولا خوات اسولف وياهن على مواقف الي تصير بيه ولا ام اكلها على اريده واسولفلها كل شيء والحرب الي ابداخلي .

ما عندي صديقة قريبة اشكيلها همي ولا خوات اسولف وياهن علئ مواقف الي تصير بيه ولا ام اكلها علئ اريده واسولفلها كلشي بداخلي والدايصير بيه ..

من طفولتي واني اعاني من ابن خالي الي يتحرش بيه ويريد اصير اله وبكل عين وقحه راد يعتدي عليه ياخذ شرفي وانجبر اتزوجه

مراهقة وساعدني شخص وهل شخص دكتور لمدرستنة مجرد كلمتين منه خلتني افكر بي طول اليوم وما افرغ عقلي من تفكير بي ..

بعد حديثنه الي دار أمس ما اعتقد رح إلتقي بي مرة الثانية ما ادري ليش كُل هل تفكير العميق بي؟ يُمكن هـذا أعجابً لا أكثر فترة ورح أنساهُ

يتبع..

گعدت ثاني يوم بدلت بملل واني واعده روحي ما أافكر بي نهائيًا

رحت للمدرسة اليوم توزيع النتائج ..

احنه العلمي .. والأدبي جايين من الصبح أضافي موزعيلهم النتائج وراجعين للبيت

گلبي مقبوض خايفة لا اطلع راسبة گعدت بالرحله منتظرة نتيجتي ..

بداخلي اگول عادي يابة وذا ما أنقهر إذا طايحة بكم درس ..

داحجي بيني وبين نفسي صاحت المدرسة "ناردين جاسم"

وگفت وجاوبتها باللامبالاة:- نعم ست

- تعالي اخذي شهادتچ شمنتظرة خاتون

رحت يمها بكل فخر امشي وراسي رافعته والابتسامة علئ خدي

والطالبات الفضول كاتلهن أكثر مني يردن يعرفن ناجحة او راسبة ..

اخذتها ورجعت للرحلة باوعتلهم بإبتسامة ..

شفتها و شهگت .. اصخاااااااام

عزه بوجهج وبعينج وبطولج

طايحه بثلاث دروس واللغات

اصفنت بقيه المواد درجات ب60 انتبهت بس الاسلامية اعلئ درجة جايبه 85

ديله علئ أقل طلعت مؤمنة وجايبه درجة جيدة أسم الله علية الدمعة بطرف عيني

خليتها بالجنطه ما واريتها لوحدة..

زينـب: هاا شبيچ احسچ رح تبچين ؟

-لاا ابجي شنوو هاي دموووع الفررح

شكلي اليوم رح أترزل رزالة غير شكل من أبوي ونبع الحنان أكيد هسة واكفتلي متحزمة بالسلاح المؤذي..

عادي يابه وذا قابل اني أنشتاين وما أرسب ؟

رجعت للبيت وأمي تصب الغدة..

گالت إلية:- صديق أخوچ "حَسن" عدنه بالصالة دا يدرسون تعالي هُنا تغدي انتي واختچ بعدها ما متغدية

هزيت راسي واخدت الجنطة صعدت للغرفة علئ كيف چان باب الصالة مفتوح شوي

دخلت للغرفة أول ما دخلت عاطت أختي بيه خرعتني

نبـراس: هاااا انطوكم النتائچ راسبة مووو

- عزه بحلكچ چنه حلگ مطي أسكتي لچ فضحتيني

سديت الباب وشمرت الجنطة عليها

- طلعيها شوفيها ورجعيها بمكانها

نبـراس: شكلچ مصخمة وجهچ

- علئ أساس كُل سنه مبيضة وجهي أسكتي يمعودة السادس شگني

سكتت ثواني وتالي نكمزت من شافتها ..

نـبراس: ولچ ولله لو تشوفها ماما أطيح حضچ تدرين بيها ما مهتمة إلنا مو أنوب ترسبين والله تكتلچ

- خلي اطيحة فوگ ما هو طايح

- رح تصيرين دوشك رزايل اليوم

- أي عادي يابة زين و أنتي ناجحة ؟

نبراس :- ايي درجاتي عاليه اللهم لاحسد

- عادي يابة أصلاً كُلش ريلاكس

غسلت وجهي ولفيت راسي ونمت ..فزيت العصريه امي معصبه

اجتي كفختني وهي دكول :- ولجج ههاااي درجااات هاااي ؟؟؟ درجه الحرارة بلبصرة اعلئ منها

- بس بغداد أعلئ يگولون

كفختني :- ولچ راسبة بالثلاثة ونوب شلون مواد بالغات والرياضيات جيره بفركچ

- اهووو شسوي يعني شسوي المدرسات محد تفهم بيهن ولا دخلتوني خصوصي بعد هاهية أقبلي بالواقع

شمرت عليه النعال وطلعت معصبة وياهو يشوفني يگلي طاح حضچ وحظ درجاتچ الزفت ويرزلون ومستمرين

رحت اخذت الايباد وتمددت جوه البطانية اسمع اغاني BTS

من صغري أحب الكوريين وأتابع مسلسلات وأفلام وحبيت الفرقة حبيتهم هَواي

بحيث عندي اللبوم كامل بس لصورهم وصور الفرقة وصيت صديقاتي يجيبلي صورهم وأنطيهم فلوس

اندگ الباب ودخل أخوي..

سـالار: ها عبالي فارغات

نبـراس: لاا تعال سوير أدخل

اجه كعد علئ جربايه نور كال الها :- اكلج انوينه اخت صديقي هم ثالث وتريد تجي تدرس وياج علئ الواهس تدرسن سوه دام انتي شاطرة بلمواد

چنت أسمع الاغنية نصيتها حتئ أسمع حديثهم لكن ما أباوع إلهم طباكات وضايجة منه

نـور: أي عادي خلي تجي هلا بيها أصلاً أفرح من تجي لأن محد يگعد يدرس ويايه

سـالار: عفية وگعدن بغرفتچن هُنا ودرسن ماشي ؟ باچر رح يجيبها أخوها

نـور: ماشي

قبل مايطلع شافني اباوعله ومطنكرة خزرتة شمر إلية بوسة بلهوى وهو يضحك

طلع واني گلت إلها روحي اغسلي الغرفة ورتبيها من هسه باچر تجين تعبانه من دوام مالج خلگ وعَيب من البنية تشوف غرفتنة صايرة غرفة جهال

نـور: لا باچر ما أداوم بس أنتم الأعدادية اداومون المُديرة گالت

نبـراس: افا ليش ؟

نـور: باچر عدكم أضافي من الصبح ترحون وناردين عادي دوامها ظهري

نبـراس:- اهووو بدت رحمة الله ودوخة وشلعان الگلب من باچر أحير شلون اگعد بعز نومتي

درست شويه ورجعت نمت للصبح رحت للمدرسة عاد خلصن الدروس بسرعة وصارت حله للبيت

نزلنه من سيارة السايق قبل ما ندخل أنتبهت علئ سيارة چبيرة وسودة مصفوفة يم الباب

أستغربت المن هاي السيارة كأنُ شايفتها ؟

دخلنه للمطبخ سمعت اصوات من الاستقبال رحت لامي سئلتها منوو كالتلي :- اجه اخو صديق اخوج واخت اخو صديقه لاخوج

- ها يوم سلامات ؟ عيدي شنو ترا ما فهمت بطتنه بطت بطتكم ؟

:-ولج اخت صديق اخوج اجت لنور تدرس وياها واجه اخوها الجبير

- اهاا

- وجع دروحي مناا

جريت نفس وطلعت تعودت علئ أسلوب أمي ..

أشرت علئ نبراس :- تعالي

نبـراس: هاا شكو ؟

-بدلي هُنا وروحي صعدي البنية بالغرفة الملابس مخليتهم أمي علئ كرسي

هزت راسها وراحت بدلت وسبقتها دانتغده واصوات ضحكهم العاليه طرشت طبل اذني الفضول قتلني

وأني أفكر بالسيارة يا ربي والله شايفتها ليش ما دا أتذكر وين ؟

توقف تفكيري دخول سالار وهو يضحك ويگول :- يابة صبو چاي بعد

أخذت منه الصينية وهو راح للطرمه يغسل ونبراس صعدت للغرفة

تركت القوري علئ النار ورحت بالباب الأستقبال

تنفست بعمق ريحة العطر كُلش طيبة وقوية كأنُ راش العلبة كُلها

وكفت علئ صفحة خطفت نظرة شفته مدنگ راسه

بقيت منتطرة ثواني قليلة ورفع راسة أنصدمت "عزه هذا حيـدرا !!

ضليت فاتحة عيوني علئ وسعهن من الصدمة واكفه بمكاني ما تحركت

انكمزت وطفرت من صفنتي علئ صوت سالار ..

سـالار: شعندج هناا ناردين ؟

وجهي كام ينطي اللوان چنت صافنة ومركزة بي

واكفين برا الأستقبال گال بصوت ناصي لحتئ ما يسمع: شداتسوين! احچي ؟

جر ايدي وطلعني ..

- شسمه شسمه غلى الچاي وردت اصيح الك ما عبالي ما موجود بالأستقبال

سـالار: ماشي روووحي جيبي

- أي بعيوني ثواني

رجعت للمطبخ وسديت الباب ايدي علئ گلبي يدگ اسرع من المولدة ..

طلعت هاي سيارته للأفندي للأستاذ للدكتور للصاك للسيد الحلوين ..

نفسها الساعدني بيها من الطين واني اگول وين شايفتها ..

الچاي عطب هسه هاي شلون ورطه احترگ

ذبيته وسويت غيره ..

همزين اتأخر تالي اجه اخذ الصينيه و راح وگفت يم الباب أريد اعرف شنو دايحچون ؟

شدعوه هذا الضحك كله ؟

ضجت وگعدت علئ كرسي وايدي علئ حنچي افكر ..

والله ما متوقعه هو الي اجه وما مخليته في بالي أصلاً

ما عبالي هو أخو صديق اخوي مع العلم گالي سالار بالعيادة بس ما عبالي البارحة يحچي علية

أستوعبت إن أخته عدنه بالغرفة أبتسمت ورحت طلقه للغرفة قتلني الفضول أشوفها وأشوف خلقتها الصاكة اخت الصاك

فتت للغرفة گاعدات صُدگ يدرسن مو چذب

سلمت عليها وبستها گعدت يمهن وفاتت أمي لازمة صحن فواكة وصينية العصاير والحلقوم

أدري بأمي هاي لواگه لطيبة حتئ تدرس نور ..

دائمًا نور هي المُفضلة عند أمي حتئ ما تضربها ولِا تحاسبها حتئ لو غلطت

بـَس أني و نبراس شابعين الويل منها نگعد وأنام علئ رزايل منها وغلط وحتئ تضربنا

وإذا يجي أبوي لو سالار تغير مُعاملتها وتعاملنا بالحُسن والطيب

أمـي: طلعن من الغرفة يلا عوفنهن يدرسن خطية ثالث وبكالوريا

- لعد أني شنو صف الحايط هم سادس وبكالوريا أني ونبراس

أمـي: أسكتي انتي أم الستينات مبارك فرحانه بالأسلامية 85

- وشبيها 85

- نچبي ڪاافي لغوه

سكتت فشلانة أبتسمت وحاولت ما أبين إلهن إنُ أنقهرت گمت بسرعة طلعت من الغرفة تنهدت وجريت نفس طويل

عَادي يابة وذا ناردين لِا تهتمين هي بالنهاية أمچ لِاااا تنقهرين

تنفست بعمق وغسلت وجهي ورجعت إلهن

گعدت أسولف وياها ما أعرف أسمها لذلك سألتها : شنو أسمچ ؟

جاوبتني بهدوء: أسمي طيـبة

- عاشت الأسامي والله ياعُمري حبيتچ خلي نصير صديقات شنو رأيچ ؟

نـور: لا عيني هي صديقتي أني وبس

- هااا فلك فلك شبسرعة غرتي

نـور: هههههه بعد صرنا صديقات للأبد

- دوم ياربي

گعدن يكملن دراسة وحدة تشرح للثانية مسألة

صفنت عليها وضيقت عيني مُبتسمة أمتع نظري ببرائتها وحُسنها فدوة بيضة وعيونها عسلي وغمازات بخدها تَجنن

مُحجبه هي عكسنه أني وخواتي ما محجبات كانت لافته بطريقة حلوة ونازكة حِيل

تشبه أخوها الصاك بملامحها

شنو عائلتهم كيك كلهم اللهم صل علئ مُحمد نياله لأخوية مُصاحب عائلة تشيز كيك

يله أني هم حلوة ما عايزني جمال ..

ضحكت وطلعت ..

والله ما مصدگة معقووولة !! قبل يومين گلت ما أفكر بي وخلي أنساهُ واليوم موجود ببيتنه

هسه هم يصح إلية أفكر و أنعجب بي من جديد لا ؟

أييي يصح كل شي يصح عادي يابه وذا

سمعتُ صوت أبوي رحت للأستقبال أسمعهم بسكوت

أبـوي: لا أبدًا ما نخليك تروح الأ وأنت متعشي هذِه أول مره تزورنه وعيب تطلع منا بدون ضيافة حارة صُدگ چذب تتعشئ يلا عود تترخص

حيـدرة: لِا عمي أبو سالار أعذرني والله عندي شغل ومُضطر جدًا أطلع لليل اجي أخذ أختي مشكورين فدوة لگلبكم الطيب

أبـوي: حلفتك بداعتي تردني ؟ هسة رح يأذن صلي وأتعشى بوية ؟

حيـدرة: هذا هو تأمر حجي ما أخجلك

شكله أبوية حباهُ وضلو يحچون ويضحكون سوية ..

أذن و راحو للطرمة يتوضون رحت ركض أفرش السجادة الهم ..

فرشت سجادة أبوية وأخوية وخليت سجادته لحيدرة بصفهم ..

خليت التربه وعليها السبحه مبتسمه سويت السبحه علئ شكل قلب

ضحكت علئ خبالي وردت أطلع علئ السريع قبل لِا يجون

دخل وهو يلف بردان قميصه طخت ايدي بيده بدون قصد الله شاهد

تلعثمت وهو ما باوعلي وماحچه شيء سوا إلية طريق دخل وأني طلعت بسرعة ..

أبتسمتُ شگد حلو ثكل شخصيتة ورجولتة

هسه أني شنو دا اخبص بالكلام أوي نزول عليچ ناردين

صاحتلي أمي من درت رح يبقون گالت إلي روحي كشري شكو بتيته وباذنجان موجود

ودزت مُصطفئ علئ صمون وكباب ..

طاح حضي واني اكشر واقلي

ونبراس طامسة بالغرفة نايمة ولايمها الحماره دومها تنام وتعوفني بالضيم

يلا عادي يموون عليه اليوم ياكل من ايدي

فرحت وصرت اسوي كل شي بنشاط

همزين طلعت أعرف اكشر واقلي أمي خلت عليه الشيء السهل مع العلم حركت كم بتيتايه

سويت الزلاطه بس استغفرلله اني من يمي ماشتهي اكل منها مدريي شلون كصصتها وحده جبيره وحده صغيره

ورشيت عليها دبس رمان وشطه وشكر يخليها حلوه عبالي عود فيكات بلطعم تالي طلعت مو طيبة أبد

تذوقتها أمي وشهگت..

أمـي: أدبسزز ولچ هسه أبوچ ياخذ الصينية للأستقبال شكله أنتظر أسووي زلاطة ؟ رح أدخلين جامعة وانتي مصخمه بالأكل مصطفئ يطبخ أحسن منچ امشيي روحي من وجهي بنت الزفرة

قبل ما احچي كلمة دخل سالار شاف الصينية جاهزة بسرعة لزمها وراح للأستقبال وأمي بقت ترزل بيه

- شنو يگول علينه هسة ابوچ شيحچي ولچ العوبة الثووولة

- كاافي شبعتيني غلط ما تملين

- أمشيييي وليي لا اجيلچ وربچ جسمچ ازورگه

دفرت الطبلة وصعدت فوگ هو أني من وحدي ضجت وتالي يعني لازم اصير منال العالم واعرف كل شيء عن الطبخ ؟

صبت إلنا عشه وگعدنه نتعشه بالغرفة تالي لميت السفرة من خلصنه ونزلت

صارت الساعة بـ10 بليل وهم مُستمرين يسولفون سالفة تجر سالفة ومُنطلقين

تالي صاح سالار خلي تجي البنية رح يروح أخوها ..

صحت إلها :" يله طيبة

جاوبتني: " ماشي أجيت

سلمت علينه وراحت وگفت يم أخوها أبتسم بوجها وحضنها وبقئ لازم أيدها

وأني واكفة بظهر أمي وخواتي وراي نسمع حديثهم

تالي قبل مايطلعون بابا مدري شنوو كال وحيدرة ضحك ضحكه بصوت عاليه

حيـدرة: عاشت أيدكم بوية ما قصرتو خصوصًا الأكل چان كُلش لذيذ

سـالار: أي أكل البيت أطيب من المطعم

تقدمت يمهم وحچيت بمرح: " أني سويت العشه..

التفت علية باوعلي و أبتسم وبينت غمازاته الحلوة

أشر إلية أبوية بيده بمعنئ دخلي جوه عفتهم ورحت صعدت فوگ

دخلت للغرفة لفت أنتباهي كتاب مال طيبة

ناسيته عدنا اخذته ركض ونزلت

سويت الدرج بايتين بس لِا راحوو! خطية عدها أمتحان

وصلت للطرمه أبوي دخل للبيت وسالار يريد يسد الباب ..

لبست تك شحاطة وگلتله..

- اوووگف لِا تسده طيبة نست كتابها خلي اوديها إلها

- روحي بسرعة ديحرك بالسيارة

دخل جوا واني طلعت السيارة مصفوفة كُلش طبگ يم الباب رادت تتحرك صحت

- لحظة حيدرا

التفت باوعلي من جام وكفت يم الباب سيارة رفع الجام وجاوبني

- نعم ؟

- شسمه هذا الكتاب طيبة نسته عدنا

- ممنون

باوع علئ الكتاب ومد ايده گال جيبي

بدون ماانتبه وعيوني مركزه بي مديت ايدي بمكان الكتاب

وايدي صارت بيده لزمها قوي ..

اتفاجئ من تصرفي و تركها بسرعة ضليت مصفنة بوجهة وگلت الهُ

- أعتذر مو قصدي!

- الكتاب ؟

-هاَا !! أي هذا أتفضل

أنطيته الهُ أخذه وگالت إلية طيبة بأبتسامة

- شكرًا ناردين

-: العفوو عمري وتعالي زورينه مو تكطعين انتي والي جابج

هزيت راسي بفهاوه من أستوعبت بروحي جفصت أنتبه لكلامي مُتفاجئ وخزرني تمنيت لو ساكتة أحسن إلي

رجعت دخلت للبيت بسرعة ..

يتبـع..

آه من محبُوبٍ لايعلمُ، عن لهفَتي

ولا بشوقي إليهِ ورغبتي

رَغب عَني وعن قَلبي الذي

قد كانَ، مِن الحُبِ متيمُ

...

شهر كامل ما مُلتقية بي وما شايفته أريد أروح الهُ بأي طريقة لعيادتة ما أعرف ليش بس أريد أشوفة احساس غريب بروحي يوم عن يوم يكبر ..

سألتني نبراس على مناظري الجديدة وإلي أصلاً ما أشتريت لأن تعصب حضرتة وعرف بيه اشوف

گلت إلها نسيتها بالمدرسة وسالار كذلك سئلني لأن ما يشوفني لابستها جاوبتة من أروح للمدرسة البسها بالبيت أشوف

شهر وأني اچذب عليهم وهذه چانت اول غلطه ارتبكها وهي الچذب.. ما چنت اعرف الچذبه الصغيرة رح تولد مشاكل ما الها نهاية وهالچذبه رح تتبعها چذب طويلة..

اليوم العصر ردت أروح اله بس بأي حجه گعدت افكر بحدود الساعة ما أستجنت شيء بيمن أقنع سالار وياخذني للعيادة ؟

رحت لغرفته ودگيت الباب وگلت اله عادي أدخل ؟..

جاوبني أي تعالي ..

دخلت بهدوء وأبتسمت بوجهة..

سالار: أول تالي ادگين الباب شعجب؟..

-احترم خصوصياتك اخي المهم شسمه..

- گولي لا تستحين..

- أريد اروح للعيادة الدكتور حيدرة لأن عيوني يوجعني ما أشوف بيهم صار إلي شهر واريد يفحص نظري ما اريد انعمي..

- يابه اوديچ عادي ليش لا.. بس مناظرچ صار الهن أكثر من شهر ما شايفج لابستهم حتى لو صدفة ليش ؟

- شسمه أني البسهم بس بالمدرسة..

- آي وهسة وينهم ؟..

- بالمدرسة

- شيسون بالمدرسة ؟ دايدرسن بمكانچ ؟

- آي

-روحي روحي بعد شوي رايح لصديقي عود اوديچ بطريقي..

- أحبك والله

طلعت ركض للغرفة فرحت ما توقعت رح يقبل يوديني بهِذه السهولة

رحت بدلت بنطرون وعليه جاكيت خفيف رصاصي دام الجو شوي بارد بقيت شعري مفتوح ورحت لسالار

راح بدل وطلعنة .. طول الطريق صديقة يخابرة تالي من وصلنة قبل ما ننزل گال إلية..

-كلش ضروري أروح لصديقي محتاجني بهذا الوقت صارتله شغلة..

-ها لعد واني؟..

-عادي ابقي بالعيادة أقل من ساعة واجي الچ أبقي گاعدة لحد ما أجي واخذچ وهاچ هاي الفلوس بقيهم بيدچ..

-اوكِ ماشي..

أخذتهن ونزلت من السيارة وهو راح صعدت ودخلت للعيادة..

ضليت گاعدة دقايق واطكطك بأصابيعي وچان تطلع البنية المساعدة من مكتبة واجت گبالي وهي تگول..

-حيدرة ينتظرچ .

أنتبهت مغيرين بالجام العيادة بحيث الباب المكتب صاير جام شفاف شلون المرايا ويشوف من داخل ومن الخارج ..

سميت بسم الله ودخلت وسديت الباب

رفعت راسي وشفته گاعد علئ الكرسي ورافع راسه للسگف ويغرس القلم بجبينه، حچه باللامبالاة وهو ما مخلي عينه بعيني .

حيدرة: اهلاً بيچ ناردين، اخوچ وين ؟ .

جاوبته راح عنده شغل وي صديقة گال من اخلص اجي عليچ .

هز براسه وهو يغرس القلم تفاجئت من حركتة قبل ما احچي شيء گالي نزلي البردة وتعالي گعدي، نزلت البردة صار محد يشوفنه من برا..

وگعدت متوترة، ثواني وچان يگول وهو على نفس گعدته ومستمر لازم القلم .

-ناردين شگد عمرچ ؟

أستغربت من سؤاله المفاجى..

-شنو مناسبة هذا السؤال؟..

-جاوبيني ناردين ممكن؟..

-17 سنة

سمعني ونزل راسه ايده علئ الميز باوع إلي بهدوء مُخيف ..

-17 وكل هذه التصرفات تبدر منچ ؟..

أنصدمت من كلامة ما عرفت شنو أرد؟ ردت اگوم صاح بصوت عالي:گعدي..

گعدت ولا أرادي گمت مثل الخبلة احتاريت شنو اسوي لحظة ادراك بحجم المشكلة الي سويتها..

-شنو عدنه قيام جلوس ؟

-اول شيء السلام عليكم وثاني شيء ليش هيچ تحچي وياي ما فهمت كلامك!..

-وصل سلامچ..

-شتقصد بالتصرفات ؟..

-أنا إلي لازم اسئلچ شتقصدين بتصرفاتچ وشنو غايتچ وين تردين توصلين؟..

-ما اقصد شي مجرد أني..

لزمت الساني بوقت المُناسب ردت اگُله أني معجبه بيك يمكن يتخبل ويطردني..

-هيچ ماكو شيء..

-شكو جايه للعيادة؟ نظرچ ما يعيبه شيء ترا..

-لا بلي صار إلية شهر ما أشوف وأجيت..

سكت وراح للميز مالته طلع سماعة وتقدم وجر كرسي قربه يمي وگعد

-تردين افحص نظرچ مو؟ تمام چَا مو تدللين

فتح عيني بيده حركة التكبر باوعتلة ساكت ضل صافن بعيوني وأستغرب..

همس :- هاي عيونج معقوله ؟؟

-آي عيوني لعد شنو عدسات؟..

-قبلها من اجيتي لونهن اخضر علئ زيتوني وهسه رصاصي

إبتسمت وگلتله وأنت شعرفك ؟ لهذه الدرجة مركز بلون عيوني وحافظهن ؟..

حك لحيتة وگال بحيره لا بس أنا ذاكرتي قوية..

ضحكت على رده، وظليت ساكتة..

-جاوبي علئ سؤالي

ضحكت -شنو البس اني يعكس علئ لون عيوني إذا البس رصاصي يصيرن عيوني رصاصي واذا البس اخضر او ازرك يصير عيوني بلون لبسي وهكذا

بلع ريگه وكال حلو

أبتسمت وجاوبته عيونك الحلوة..

خله السماعات علئ راسي من جهتين وبعد شعري خجلت من قربه..

وانتبهت لهذه إلي خلاها گلتله هاي شنو!؟

-تخطيط

-عزه صدگ والله؟؟

-اسكتي موتردين افحص نظرج الج الصافي بس اسكتي مو احترك شيب اهلي من وراج

-من وراي ؟ ليش داده شنو سويت

شال السماعات وأبتعد..

-تصرفاتچ شنو معناها ؟

رفع تك حاجب أستغفر ودار وجهة..

رجع جاب الأحرف E يختبرني من بعد وهو صابر علئ شوي ويعيط بيه هذه المره جاوبت صح وما چذبت..

رجع گعد علئ الكرسي گال گلت الچ تشوفين ليش تعاندين ؟ مو مساع گلتي ما أشوف شلون هسة رجع نظرچ تمام التمام ؟..

-ما اعرف قدرة قادر..

كلما ادور وجهي عليه يخزرني وأرجع ادنگ يا أخي حتئ خزرته حلوة..

حيدرة:- يصير خير يله خلص الفحص تگدرين اطلعين عيونج ما بيهن شي .

گلتله شكراً وطلعت ادور على سالار ماكو؟ گلت يمكن اشوفه بالكراج نزلت من الدرج العيادة آخر بايه .

حسيت علئ صوت حيدرة وهو يركض بإتجاهي أريد التفت علية بلحظة التفتت بيها لزم ايدي قوي وهو يگول..

-لحظة ناري أقصد ناردين اوگفي سالار أخوج خابرني وگال أوصلج لأن سيارتة عطلت بنص الطريق

بقيت صافنه بوجهة لازم ايدي بيده قوي كزبر جسمي من لمسته بعد ايده بسرعة من أنتبة وگال بهدوء..

حيدرة: أعتذر مو قصدي والكائنات بس ردت اوگفچ و هسه صعدي

هزيت راسي ماشي صعدت وهو سبقني يمشي على سريع وأني بظهرهِ، حتى مشيته هيبة وبكُل ثقة ورزانة، رافع إردانات قميصه الأسود، بارزة شرايينه، دخلت بمكتبة وگعدت على الكرسي .

حيدرة:- أنتظري هنا شويه عندي كتابة مهمة دقايق أخلصها ونطلع .

-أي عادي انتظر .

بقيت ربع ساعة گاعدة ما أعرف شنو يكتب بسرعة باللابتوب ..

تالي وگف خلص كتابة وكفت وياه تقدم بأتجاهي وأبتسم بهدوء .

حيدرة:- يله يابة أمشي

يتبع..

لا تنسون الضغط علئ النجمة 🌹

الكاتبة نمارق رحيم

- فإذا أبتسَمت ، تبسّمت كُل شِفاهِ العابرين

...

طلعنه سوية من العيادة فتح باب سيارتة وأشر إلية علئ مقعد الأمامي ما حچيت شيء صعدت بسرعة..

حرك السيارة وشغل الاذاعة أذان المغرب وعلا الصوت الهادئ..

طول الطريق ما حچينه شيء وچنت دايره وچهي على الجامه ما خليت عيني بعينه ..

دخلنه بشارعنه صف السيارة سالار گاعد يم الباب من شافنه گام ..

نزلت وهو نزل راح سلم علئ أخوية وگفت يمهم كرص خدي بخفة وتلمس شعري بأبتسامة مُحبة..

سالار:- ‏‏فتاةٌ فاتنةٌ فِتنةٌ للناظرين وليلُ شعرها شِعرٌ زادَ ليل الهائمين

ضحكت وحيدرة أبتسم .. تشكره سالار لأن وصلني جاوبه ماكو أي تعب تدللون..

دخلت للبيت لگيتهم يتعشون بالصالة أمي والبنات ..

أمي: وين چنتي بت الفگر..

-بالعيادة وين يعني..

-وليش تأخرتي؟؟..

-سالار اتأخر وصديقة الدكتور وصلني..

نور: تعالي أختاه اتعشي ادري بيچ جوعانة..

-بالعافيه بعدين أجي

صعدت فوگ غيرت ملابسي وأفكر بي هسه أني شنو موقعي من المشاعر معجبة لو مُحبة ؟

أني أحبة ؟ لا لا .. شبسرعة لحگت احبة ..

بس اني حبيته من أول نظرة ؟ ..

.. نچبي ماكو حُب من أول نظرة

فتحت كنتوري واني اطلع اللبوم الصور لفرقه BTS هسه همه بحلاة دكتوري

واني ٲئشر علئ صورهم .. ע بلي يجننوون لك فديت الخديدات چنهن موز مكشر

رحت سبحت ساعة باردة وساعه حارة مو شهر 12 الأ عذاب وضيم.. يخليك تفقد الأحساس الصبح البس قبوط وبليل البس نص ردن

أنفتح الباب ودخلت أمي بعصبية..

أمي: تتعشيين لو أحرمج من العشة ؟ من العصر اسويلكم فطاير وطايح حظ حظي علمودكم تالي ما تاكلون

-من شوكت تهتمين أكل أو لا ؟؟

أمي: أخوچ سئل عنچ گال خلي تنزل تاكل

-اهاااا سالار هنا الحچي تمام..

خزرتني وطلعت تنهدت بضيق ونزلت جوه أخذت فطيرة وكتاب الأحياء بيدي ..

رحت خابرت زينب صديقتي علئ التحضير وگلت إلها وين واصلين لأن ما أدري أنطتني رقم الورقة وسديته منها گعدت اقرا..

شطوول التحضير خرب يومچ يافخريه إذا ما تنطينه تحضير 8 أوراق وتشگنه بالنص ما ترتاح ابداً وغصباً علينا ندرس لأن تسجل أسماء إلي ما يحضر يومي

دخل بابا گعد يمنه لزمت قوطية ببسي ورحت گعدت بحضنة صحيح كبيرة بس هذه العادة ما أبطلها مُتعلقة بأبوية حيل وعندي يسواهم كلهم لو خيروني بي وبأمي أختاره هو!!

حتئ هو يحبني أكثر وحدة ودائمًا يهتم بية ويسئل علية بدراستي ومن يطلع يگلي شنو تردين اجيبلچ ومن يجي من دوام أستقبلة بأبتسامة وأحضنة

ما أتخيل حياتي بدون أبوية صُدگ أنكسر!

باسني بخدي وابتسمت اشرب وأباوع عليهم..

أمي: يكسر أعظامچ بنت الزفرة عوفي الببسي

أبوي: عوفي بنيتي سعاد بحالها أشربي معليچ بأمچ حبيبتي..

- فدوه أروح لشواربك بابا سارنغهي يو

أبوي: تموتين علئ الكوريين هههههه

-أي بابا أحبهم شسوي..

أبوي: إذا رحت للشمال أجيب الچ صورهم

-بعد روحييييي..

بسته بوسة قوية من فرحتي وهو بقئ يضحك متعود علئ شقاي وميانتي..

تحمحمت أمي مبينه عدها سالفة تغثني عدلت گعدتها وگالت..

أمي: هذا الخميس خطوبة كريم ابن اخوي الغالي..

سمعت أسمة وشركت بالببسي ضليت اكحكح..

مصطفئ :- لاتموت جيبولها مي متتحمل الكيوت هاهاهاها

خزرته وگمت شربت مي ..

أمي: أي جاسم أريد أروح للسوگ اني ومرت أخوي باچر لأن ما ضل وكت علئ الخميس بس يومين

أبوي: أي روحي واخذي ناردين وياچ..

أمي: لا رح أخذ نور..

أبوي: بكيفچ ما يفرق اي وحدة من البنات تروح وياچ..

أمي: اي خووش..

ضليت ساكتة أستمع الهم تالي سكتو أخذت كتابي وصعدت فوگ.. المشكلة ما أريد أروح للخطوبة .. كريم يصير أخو لؤي الصغير..

بس أمي شيقنعها ما رايدة أروح ؟ تبقئ تلح .. هي اصلاً كل ما تشوف لؤي تخلينه سوية وتطلع.. لو من تروح لبيتهم تجبرني أروح وياها حتئ يشوفني

دخلت للغرفة نور گاعدة بالگاع تدرس زفرت هوى وحچيت بقهر..

-أهوو شلون سالفة خايسة هاي

نـور: شبيچ يا سالفة

- كريمه رح تخطب لعد ما تدرين ؟

نـور: يا كريمة

-كريم ابن خالو

نـور: هههههههه عزه بعينچ كريمة سويتي

-اي اي اگلچ اني نعسانة أريد أنام شلوون بله؟ روحي أدرسي بغرفة مصطفى..

بعد عركة ومكافش من الشعر أنتصرت أني وطلعت نور من الغرفة وسديت الباب

رحت تمددت علئ چربايتي وحاضنت المخدة أول شي خطر على بالي حيدرة تعودت كل ليلة قبل ما أنام أتذكرة واحچي بي..

ما أدري من أشوفه شنو يصير بية ؟ انسئ كل شيء وأضييييع واسررح..

عقلي ما يرضى يفكر بغيره ما أدري مشاعري شنو بالتحديد ؟..

ماصار إلية شهرين من شفته وعرفته وهالكثر تعلقت بي..

أحلم بي بكل ليلة وبالمدرسة أعوف الدرس والشرح وكل درسي هو أبقه أفكر بي وأسرح..

تعبت مو حالة هذه صرت أسوي مسلسل خاص بينه وأتخيل مُستقبلي ويا لدرجه تخبلت أخر فترة ..

وهو بالمقابل ما مهتم وما رافع عينه بعيني ما مباوعلي أصلاً ومامفكر بيه..

عكس كميه تفكيري بي وأهتمامي الزايد هذا الأنسان عجيب غريب ..

اتقلب بالفراش وما أجاني نوم ... كل صفات إلي چنت أتخيلها وأريدها بفارس أحلامي موجودة بي

أخلاقة ؟ حلوة مثله ومبين عليه ما عنده سوالف موحلوة وطيب والنعم منه.. صارت أمنيتي بهذه اللحظة يطلع الفجر وأخلي من الكريم السحري إلي من اخلي علئ روحي أختفي..

وأروح لعيادته واگعد يمه وامتع نظري بشوفته وهو حتئ لو ما يشوفني قابلة!!

بس وين ياحسرة ؟ أشوفه بس بالكارتونات والفاره والبزون هالكريم السحري

من گد التفكير ضربت راسي بخفه ورفعت أيدي بتهديد ششش نامي أفضل ولا كلمة ولا حرف

وفعلاً خليت راسي علئ المخدة نمت مباشرةً

ثاني يـوم ..امي من الصبح رايحه لبيت خالي گعدت اتريگ بالوحدة الظهر ..

ونبراس بالمطبخ تسوي غده مدري شعجب .. اجت أمي من السوگ دخلت وكُل علاكه شكبرها جوا عبايتها ..

بعدما گعدنه كلنا گعدت تفتح بالعلاليگ وشحدها إلي تمد ايدها علئ غرض

جابت إلنه لبس للخطوبة كُل وحدة بنطرون وقميص بس أني تنورة!!

برطمت شفايفي وگلت إلها بضووجه..

- ليش اني بالاخص تنوره شنو معناها ؟

أمي: ما يلوگلج البنطرون التنورة احلى

-عود اقتنعت بكلامچ

أمي: روحي گدري لبسچ بدون لغوه يلااا

تنرفزت وطلعت رحت اگدر بيهن وأقيس تالي رجعت للصالة گلتلها علئ گدي..

دخل مصطفئ بيده تفاحة هز ايده وگعد علئ القنفة ورافع رجلية ليفوگ..

مصطفئ: أي وأني أبن البطه السوده ما جبتولي فد قاط اكشخ بي بعرس كريم الاجكم..

أمي: ولك مو هذاك العيد جاسم جابلك ثلث قوط يخبلن المن ضامهن ؟ شبيك رح تبچي بوجه العباس جبتلك داخليات يله لا تبچي

مصطفئ: نعم الله عليچ يمة ابدا ماقصرتي..

مرن يومين وأني ما مستعدة أروح لان أدري إذا رحت وشفت لؤي أكيد ما رح يجوز مني ويسوي إلية مصيبة..

أمي ركبت الغدة من الصبح وراحت واحنه العصر يودينه سالار لان چانت نور بالمدرسة ما نگدر نعوفها لوحدها..

أجت ورحنه بدلنه وكشخنه ورتبنه نفسنه كفيت ردان القميص للعكس وشعري خليته مفتوح على طبيعتة كيرلي..

اجه سالار چان يم الحلاق مرتب شعره ولحيته ولابس سمائي ..

سالار: بسرعة امشوو اوصلكم ..

ركبنه سوية و أني كل شوية اشمر اله بوسة بالهوى واكله لك فدوه طالع عمي صاك انت العريس مو كريمة فدوه لخلقتك چنها حلاوة هنيالها إلي تاخذك

سالار: هههههههه صبغي بعد صبغي

-هذه الحقيقة وليست صبغًا اخي..

سالار: بعد أخوچ افديچ بروحي أني..

-أحبك..

سالار: نچبي وخليني أسوق لا اسوي حادث..

ضحكت وسكتت وصلنه وراح دخلنه اني ونبراس لازمات ايدينه ونور ورانه ..

نمشي وعين منا ومنا هاي التكنس وهاي التمسح التخم وهاي الي ماخذتلها ركن وتسولف وتضحك بصوت عالي ..

واحنه مثل الثولات ما نعرف أحد طلعت أمي من المطبخ همزين شفناها وعرفناها ما تيهناها الـحمدلله

لزمتنا من ايدينا ودتنا لخالاتي ومرت خالي أم لؤي گالت إلنا نسلم عليهن

واني اكره هاي الفقرة تعال غصبًا عليك سلم علئ أقاربك واحد واحد حتئ لو أول مره تشوفهم بحياتك هم بوسهم

گاعدات وأسمع صوتهن الاححح والاحييي والاحووو "دا يشربن چاي"

رحنه نسلم واخذنه اكس مربع يمين يسار ..يسار يمين (بوس)

عليك يالله نقذت نفسي وخواتي وطلعنه من الغرفة بسلامة بعدما تحمرت خدودنه

صعدنه فوگ يم بنات خالاتنه وخوالنه كل وحدة بيهن لازمه قلم حمرة وتحمر..

وهاي التسحب شعرها وهاي الي تصبغ أظافيرها وتگول أووي بعد ما الحگ..

واحنه مثل الأطرش بالزفة مانعرف بهذه السوالف گعدنه مثل العاقلات المؤدبات ..

اجت امي باوعتلنه أني ونبراس..

أمي: ناردين گومي ساعدي البنات جوه بالمطبخ..

نبراس تغمزلي باوعت إلها صفح خوش كاييمه كاييمه..

نزلت وي أمي تالي راحت وعافتني دخلت للمطبخ وگفت اخلي الكيك بالصحون وأساعدهن

لـؤي: هـاي نارديـن!! ست الحُسن مشرفتنة

ومنورتنه الليلة ..

يتبـع . . .

لِا تنسون التصويت فضلاً ❤️⭐

الكاتبة نمارق رحيم

‏لأول مّره أشعر بأن

الطريق إليك باتَ منقطعًا

لأول مّره أشعر بأنك لا تخُصني .

...

باوعتله ومارديته مانطيته اي اهتمام

البنات صح موجودات واعرف مارح يسوي شيء بس!! بداخلي خايفة، هسه اني شورطني وشجابني لو گاعدة بالبيت افضل..

رجعت أمسح واقطع بالكيك وگف يمي ومد ايده لزم ايدي..بعدتها بخوف وشهگت..ضحك وهو قريب مني أخذ قطعه كيك وكال وهو ياكل ..

- شسالفه يا بنت عمتي ما رح اكلچ ولو انتي والكيك واحد..

سكتت متنرفزة طلع من المطبخ وهو يضحك

والبنات مستغربات من وضع عفت كلشي وطلعت گعدت يم أمي

يعني دام عرف بيه موجودة أكيد ما راح يجوز مني رح يلزك بيه ويشمر كلام ..

گلت اگعد يمهن وما اضل لوحدي افضل لحتئ تعدي هل خطوبة على خير ونرجع للبيت بسلامة

وره ربع ساعه النسوان لبسن عبيهن يطلعن، بيت البنية الي خطبها كريم تصير بنت خالي قريب حايط علئ حايط لذلك لبسن عبي شون ماچان ..

التمن النسوان وگالن يلا نروح لبيتهم،طلعنه واني لازمه بيد نبراس وهي تضحك..

نبـراس: شبيج يمعودة روحچ طافرة!

- أسكتي ولچ خلي تخطب كريمة ونرجع والتوبه اذا اجيت بعد

ضحكت ودخلنه وامي راحت وي النسوان الي يهلهلن ويهوسن

سلمت علئ بنين كاعدة وبيدها باقة الورد طالعة حلوة مسوين كوشه ورد و گعده حلوة

دخل كريم وامه لازمته عود يستحي وهيج ..

مرات اتسائل نفسي بيت خالي كلهم يستحون وخجولين وحبابين كلش وماعدهم سوالف مثل لؤي لعد هذا العار عليمن طالعه عينه فاكسه ومنحط ؟

عقد الهم السيد ولبسو الحلقات واخذها للغرفة ياخذون راحتهم بالكلام واني ماخذتلي ركن وصافنه علئ الاجواء..

البنات يركصن ومشغلات الدي جي أغاني عالية والجهال اتصيح والكُل فرحان

للحضه تخيلت نفسي بمكان بنين و "حيَـدرة" هو خطيبي واني هسه مرته عاقد عليه ..

مجرد تخيلات وتفكير خلاني أبتسم واخذني لعالم ثاني .. شگد حلو لو يتحقق ؟

تالي صفنت شلون اصلاً افكر هيچ منو ناردين بالنسبة اله ؟

فزيت من صفنتي علئ صوت مرت خالي كريم وهي تگول..

- نارديـن تعالي وياي

حچيت بگلبي: "يا ستار شبيها شتريد ؟"

جرت ايدي حتئ بعدني ماگايله شيء ،طلعتني من الاستقبال وگفتني بالممر الغرف،مدتلي ايدها بعد ماكتلها :- خاله شنو تردين مني ؟

انطتني صندوگ صغير ومفتاح وگالتلي هاچ لزميهم ..

اخذتهن: شنوو هذن ؟ شسوي بيهن ؟

-ناردين حبيبتي باعي الكل ملتهي محد موجود غيرج بنيتي اريدج تاخذين الصندوك والمفتاح لبيتنه ادخلي لغرفه لؤي بس حطيهن وارجعي بسرعه

استغربت ورجعتهن الها بسرعة: لا لاخالة عذريني ما اگدر ما اروح والله أمي ما تقبل

وهم البيت فارغ لا أحد يجي!!..

- لا ليش تخافين شسالفة فدوة اروح لهل وجهه الحلو لازم تخليهم ضروري ترحين..

ظلت تلح عليه وگالت بنات اختي موجودات هناك قنعتني گلت امي تدري قابلة لعد اروح اخليهن واجي دام هيه گالتلي وتوسلت بيه لازم اخلي بغرفته والبيت مو فارغ..

بس المشكله اخاف لا يجي تنهدت واخذته وطلعت دورت على نبراس ما لگيتها عود گلت اخذها وياي تالي اجت عمتي جرتني من ايدي وفتحت باب الشارع على كيف گالت يلا ولچ روحي..

طلعت والشباب والزلم مليانه الشارع ويهوسون بسرعة طگيتها ركضه ودخلت للبيت سديت الباب وراي..

طلع محد موجود..صابني الخوف..رحت صعدت فوگ غرفته صارت گبالي تراجعت..

تالي گلت لا بس اخليهم واطلع الغرفة مفتوحة ومطفيه الآضويه فتت رحت للميز موجود بـ آخر الغرفة كلش..

خليته والتفت ظهري اطكطك بأصابيعي بتوتر وبالي مشغول حيل وصوت انفاسي ينسمع..

اريد اطلع وچان يدخل "لـؤي" للغرفه

وهو مبـتسم!!.

صرخت وبنفس الوقت انخرعت والف فكرة وفكرة خطرت ابالي بهذه الثواني القليلة..

-لؤي هذاا ااا انت..

لؤي:- آي حبيبي اني شگد حلوو اسمي منچ..

تخطيته بخوف ونزلت راسي اريد اطلع لزم ايدي قوي..

لؤي :- وين حياتي تونه كلنه بسم الله خل اشبع منج وروحي براحتچ..

صحت بصوت عالي من الله ياخذ روحك وخرررر لك لااا تلزم أيدي عوفهااا..

لؤي:- دخول هالغرفة مو مثل خروجها..

ضربته حاولت انهزم چان يحضني بكل قوة لصدرة واني اصرخ واعيط ووخرررر لللللك حقييررر..

صرخت لحد ماصوتي راح وعيوني نشفن من البچي لازمني قوي بحيث ما اگدر ادفعه..

هجم عليه وهو يدفعني على الحايط ..

كميه القرف الي حسيت بيها بهذه اللحظة لاتوصف ردت بس أحد يجي ويخلصني منه

حسيت بعد ما عندي طاقة اقاومه چانت كلش قوي قبضتة

عضيته حييل بسرعة ردت اطلع لزمني من شعري واني اصرخ الله يااااخذك عوووفنيي..

شمرني علئ چرباية وهو يحاول ينزعني التنورة تفلت عليه وهو ما مهتم ويباوعلي بنظرة شهوة ورغبة

تمنيت تنشگ الگاع وتاخذني ولا يسوي الي يريده اختنگت كلش حسيت ضاقت بيه صحت بكل قوتي يااااااالله...

اللهم أنت سند من لاسندً لهُ

بلحظتها انرجت الغرفه بصرخة امي وخالتي وراها..

ابتعد وگام عني واني منتهيه قطرة دم مابقت بجسمي وهو اخذ السويچ وراح طلع يركض بسرعة..

ما حسيت بشيء وعيني ثقلت حسيت بروحي

دا احلم ما ادري شنو صار انغمئ عليه دعيت ربي بـ آخر لحضات كلشي يصير حلم ومو حقيقة

...

نبـراس

بالحفلة أمي صاحت ما شفتو ناردين؟ گلت الها لاا لان فعلاً ما ادري وينها..

-صخاام بعينها وين طفرت لعد وين راحت لمنو؟..

-يمه شنو لمنو؟ يمكن رجعت لبيت خالي؟..

- آي يمكن هسه رايحه اشوفها..

راحت هيه وخالتي وطولت خلصت الحفلة

ورح يصبون عشه وما رجعن ..

شفت نور صحتلها تعاي أمشي نروح يم ماما رجليه ما احس بيهن من الركص ..

رحنه ولگينه الباب مفتوح ..أستغربنه وصعدنه فوگ على صراخ و بچي أمي وخالتي دخلنه للغرفه وچان نشوفهن ملتمات على ناردين!!

گلبي راد يوگف تخيلتها ماتـت لو صار عليها شيء!!

متمدده بالفراش و ملابسها متخربطة ..

بعدنه ماحجينه شي من شافتنه أمي صاحت: "ولچن خابرن ابوچن يمه بسررعة"

انصدمنه مانعرف شنوو إلي صار وبدون كلام خابرت بابا من تلفون خالتي گـال:جاي هسه

دخلوو وشافونه نبچي أمي بسرعة راحت لخالي ووجها احمر ما يبشر بالخير وهي تصيح وتگوله: "ولـك حاااازم أبنك تربيتتتك أبنك الچبيير لؤييي إعتدى على بنيتي ناردييين!! "

هيه گالت هيچ والكُل صافن وما مستوعبين شنو وشجاي تخربط أمي بالحچي ؟

ما مفتهمين السالفة خالو گال الها: "شنو هذا الحچي ام سالار فهمينه وشبيها ناردين!!!

كالت وهي دگ علئ صدرها :"دخلنه للبيت واحنه نسمع صريخها فتنه للغرفه يا خوية ونشوف هلشوفه لـؤي نايم فوگاها

"سـالار" واگف يسمع أمي مابقى عقل براسه

من سمع ثواني حچيها ما بقئ بسرعة طلع

وهو يركض!!..

أبوي تخربط رحت جبت كلاص مي اله وخالي راح طلع من البيت وهو يتصل بـ لـؤي ..

گـعدنه اني ونور بصف ناردين ونحاول نگعدها .. واحنه مامستوعبين شيء .. ما ندري شنو يعني اعتدى عليها ؟ شنو لـؤي ليش هيچ سوه

بـ أختنه!!

...

ناردين

عيني صارت علئ امي من گعدت يمي ..

فزيت واني اصرخ أبوي دخل گـال بصوت عالي.. ولچ بابا حبيبتي بس فهميني وريحي گلبي بس گوليلي كلمة وحدة ياناردين لؤي لمسج واخذ الي يريده لو لااا ؟؟؟!!

گمت علئ حيلي و جاوبته بصـوت مبحـوح:

"لااا لاا بـابـااا ما سمحتله بهل شيء والله والقران اني بنية والنبي مُـحمد!!

ملامحه الي چانت كلها عصبية وخوف

تغيرت بكلامي وكانو انطفت النار الي بصدره..

دخل خالي وما ادري بمنو الي يدخل ويطلع تالي الكل عافني وبقت نور ما گلت الها شيء ..

ضليت ساكتة لان اني من نفسي ما مصدگه وما مستوعبة شنو الي صار أحس كل شيء صار

من احداث متسرعة..

نمت وفزيت على صوت أمي فتحت عيوني گاعده بصفي هي وخواتي .. أبوي وسالار

وخالي ومرته كلهم واكفين..

موقف نحرجت بي كلش وهمه يباوعولي ونظرات ما تتفسر.. قلق على خوف على شك..

سالار:- ناردينه احچي كلشي لا تخافين شنو سوالچ الكلب؟؟؟؟

سكتت كلهم يلحون عليه احچي واحچي لؤي شارد من المنطقة لذلك دا يستجبوني..

صافنه عليهم وما فدتهم بشيء لان ضليت ساكتة

ظليت افكر وامسح بدموعي قررت اگول لابوي.. بابا اقرب شخص واكثر شخص هادئ واذا حچيت رح يسمعني للآخير ويتفهمني!!

واگدر احچي ويا براحتي بدون ما استحي لو اخاف واتقيد.. ضليت ساكتة تالي گلت بابا اريدك اريد احچي وياك بس اني وياك فدوه..

امي:- ليش يمه اني مو امچ غير تگولين اليه؟..

جاوبتها هسه صرت بنتچ وعزيزة؟..

امي:- طايحة الحظ طبچ مرض فوگاها..

ابوي:- مو وقتچ سعاد الكل يطلع يلا بوويه..

امي:- نوب صارت البنيه تحچي لابوها مو لامها بسيطة يا ناردين..

جاوبتها هواي چنت اكلچ بس انتي ما تصدگيني من صغري تدرين بلؤي وسوالفه المكسرره بس انتي چنتي قابلة وتكتليني اذا ردت اسولف الهم وزرعتي الخوف بيه خليتيني ما احچي واتردد واختار الصمت علاج الي..

كله منجج خبلتيني والقران خبلتيني وكلشي دا يصير بحياتي بسببج..

ابوي ظل صافن على كلامي وسالار بهت لونه متفاجئين بالي حچيته تالي لزم ايد امي وطلعها والبقية طلعوا.. وسدو الباب

گعد يمي حضنته گال بحنيه.. احچي ولا تخافين اني ابوچ مو عدوچ ما اضلمچ لا تضمين عليه حرف وكل شيء يجرالچ واخذ حقچ إن چنتي مظلومة..

-بابا والله عندي حچي هواي بس فدوة فدوة افهمني و اسمعني للأخير فدوووه بااااابااا والله رح تنصدم هم بس والقران ما اچذب عليك بكل حرررررف!!..

-احچي وما اقاطعچ اسمعچ للأخير ياروح ابوچ..

تلعثمت ماعرف مين ابدي وبسرعه نزلن ادموعي علئ خدي: " بابا لؤي من اني وصغيرة بعمر الـ١٢ سنه وهو يتحارش بيه .. واني ما اعرف ماعبالي هلشيء عيب وحرام او مايصير چنت طفلة ما افتهم و أمي ما علمتني وما گالت إلي خلي مسافه بينچ و بين ولد خوالچ!!

چانت تشوفني بحضن "لـؤي" ويبوس بيه

وعادي ما تحچي شيء رغم اني چنت بالغه وچبيرة بالنسبة لعمري بس عقلي وتصرفاتي

كطفلة .. بسبب أمي

زادت تصرفاته وياي و اني بديت اتضايق منه وچنت اصده وهو يضربني .. واني چنت اگول بس أكبر اوقفه عند حده!!

بس چنت غلطانه ..لأن حتى وهذا عمري وبعد 5 سنوات وهو حاط عينه عليه وعلى جسمي..!!

حاولت والقران حاولت بأشد الطرق ما يتقربلي من بديت استوعب ونضج عقلي وعيت على هالاشياء وگلتله لا تتقرب بعد ومايصير تبوسني لو تمد ايدك على جسمي وتتلمس عيب حررااام مايصير لاا تتقررب عوفنييي بحااالي!!...

شهگت" بسس!! بابا تـدري حاول يعتدي عليه بعرس نرجس وخطفني وهددني ما احچي واكثر من مره وهسه هم وحتى قبل چنت اغلط اصيح عليه مايفيد...

اني مختنگه حيييل بس محد حاس بيه ويين احچي بس گلي اذا امي ما تصدگني واذا اشكيلها اطلعني اني الغلطانة وتكتلني...

والله اني چنت اخاف ما احچي وخاصتا أمي

ما تفهمني وراح تذب الصوچ كله بيه اني شگد

حاولت اگول الها وافاتحها بالموضوع ما تهتم

او تعوفني علئ نص الحچي وتروح عبالها دا اچذب او الفق حچي على ابن اخوها

وهو هم شگد هددني اذا اگولن يسويلي مشكلة چبيرة وفضيحة ويطلعني اني الچنت راضيه ومن شفت امي ما مصدگتني گلت انتوو هم ما رح تصدگوني مثلهاا!!

انهاريت واني احچي.. بابااا باابااا والله والقران ملـيييييت ..فدووووا طلعة من حياتي لؤي مثل الكابووس خلصني منه ابوسها لاييدك!!!...

صرت اضرب نفسي واملخ شعري سحبني

لصدره وباس راسي حسيت بحرارة انفاسه سمعت شهگته وصار يبچي وياي دموعه نزلت وي دموعي!!..

بلحظتها چان يفتح الباب سالار عيونه صايرات حمر دم..

صاح بابا عليه سالار بووويه تعال اسمع السمعته..

سالار:- يااابه سمعت كلشي ما يحتاج وهالعار اني اله..

رگع الباب وطلع بسرعة ابوي يصيح عليه يگله تعال وين رايح على شنوو ناوي..

ما سمع كلامه وطلع بره البيت فاير دمه ناوي نيه على لؤي..

لأول مره تشجعت حچيت عن شي الي چنت ضامته من 5 سنـوات وخايفه منه!! ..

سولفتله واني احچي على السريع ما جريت نفس وكل كلمة اتذكر موقف بيها..

حسيت هم وانزاح عني وما اهتميت لأي شيء بعد.. الحچي إلي حچيته فوگ طاقتي خلاني انهار وگعت بالگاع متمدده!!

تخبل بابا وسمعته من صاح علئ ماما وبعد ما

حسيت علئ شيء الأ واني بالمستشفى والكانونه مشكله بيدي! ..

يوم كامل ضليت والسمعته من الدكتورة إن صار بيه انهيار عصبي حاد..

طلعوني ورجعت للبيت گعد بابا يحچي وياي بحنيه..

-هاا ناردين شون صرتي بنيتي اريدج ترتاحين ولاتعبين نفسج وارتاحي عندج اب واخ يبيعون الدنيا علمود عيونج ابوج اني سندج ..

حضنته واني ابچي:" لا بويه ما يستاهل تبچين عليه دموعچ غاليه وداعتچ ناخذ حقچ ونطيح حظ حظه لهل سافل والكـلب"

بست ايده وبعدها باسني براسي الله يحفظك بابا فدوه أنت مصدگني موو بابااا؟..

- ياعيونه لـ أبوچ شلوون ما اصدكچ ولچ أنتي نظر عيني و رويحتي أرتاحي بويه ويجيلچ الصافي أخوچ يطلع حقچ من عيون السبع!!

غطاني وطلع .. ضليت أسبوع بالغرفه الآكل يوصل إليه وبس أصلي و ادعي كُل شيء ما اريد بس اريده يبتعد وما اشوف خلقته!!

نبراس ونور هم ما عافني واحچيلهن ويواسني بس الي مصدومة منه أمي!!..

الي الكل مصدكني حتئ اخواني ؛بس هيه !!

ماتباوع بوچهي وماحچت شيء وياي ولا كلمة بعد ما طلعوني من المستشفى!!

أستغربت كمية الخـوف من شافتني ومن انغمى عليه وهسه كُلش متـغيره وتباوعلي صفح

تخيلت بعد ماشافتني بهل حاله ومن سمعت بالي صار والكُل واكف وياي تكون اول وحده ساندتني لأنها امميي ....بس صار العكس!!

گلت يلا عادي ماكو شيء جديد طول عمري

هي هيچ وياي او وي خواتي..

والعرفته من نـبراس إنُ سـالار من سمع الحچي الحچيته لـ أبوي رايح وما اخذ المسدس من صديقة .. مدور عليه ولاگي بالشارع هاجم عليه دگ!! وتالي ضاربه طلقه بس لسوء الحظ طايحه بايده ..

ورايح شارد بسيارته وما ملحگ عليه سـالار وسمعت إن معالج روحه وما مشتكي لأحد على أخوي ..

ما اهتميت لـ لـؤي عسى ما مات ولجهنم

إن شاء الله ..

بس خفت علئ سـالار أخوي لا يروح بيها بسببي ويدخل للسجن اذا يقتله خلاص!! ..

مره اجه وحجه وياي بليل ..وهو مدنك راسه وبجه وهو حاضن وجه بيده ويكلي خجلان منج اختي كل هذا يصير بيج وبيتنه وماعرف وسفه علئ اخوتي الج والله مجنت منتبه ماشاك بي

راد يبوس ايدي وربي ماتحملت بست راسه ..وبجيت بحضنه..

ونبراس ونور اتقربن يمنه ويبجن حضننه ثلاثتنه وكال وعد اخليجن بعيوني واعتبرني ابوجن صديقجن المقرب لاتترددن اذا صار وياجن شي مادكلولي ..بأي وقت موجود لخواتي ..

بيومها نمت بحضنه حسيت بنعمه الاخ العندياه والاب حمدت ربي وشكرته لان من درو صدكوني ومافكرو بيه غلط وفهموني ..

مر ثاني اسبوع ..اصلي واكل وانام ..

وماادري بالدنيا طشت رشت ..

الليله اجت يمي نور وهي دكول :- بابا يكول البسي حجاب وتعالي انزلي للديوان كلهم جايين وشيخ هم وخوالنه وحتئ لؤي موجود جوه كاعد وهواي زلم

كال بابا احترام الهم لبسي حجاب وبسرعه تعاي ينتظرونج حبيبتي بابا وسالار يمج لاتخافين

هزيت راسي ..ان شاء الله هسه انزل نوره

لبست جادر الصلاة لان بس هذا الموجود عندي ..ونزلت

دخلت منزله راسي كلت سلام عليكم ردو عليه ..

كعدت يم بابا ..ومارفعت عيوني بوجهه احد ؛

كال خالي الجبير :- احجيلنه خالو صدك هلحجي اريد اسمع منج

سكتت كالي بابا لاتخافين رفعي راسج واحجي يمج انه

هزيت راسي وجان لؤي يكوم

لؤي:- جذابه ولعباس ابو فاضل

رده بابا :- العباس شالك واخذك محترمك لان ابيتي ولشيوخ الكاعدين ..

لؤي :- ياا عمي جذابه اتصدك بيها؟ صارلي سنين عايش وياكم وماطلعت مني العيبه والقران اتجذب اتصدكوها وتجذبوني اني الرجال العمري ٣٢ اجذب عليكم عمي؟؟

صرخت من مكاني: لا تحلف حقير معتبر روحك رجال أنت ؟ .

هداني بابا كمل كلامه

لؤي :- مستعد احلف علئ القران هيه التحارشت بيه وصاحتلي لبيتنه بعرس اخوي كريم ؛وهيه الجانت قابله

دخل سالار وكام اله هاد وهجم عليه لحد ماطلع الدم من حلكه ؛

..بععد ايدي ..

اباوعله بحقد واريد انه بمكان سالار وروح اطفي نار البصدري واخلي دمه بصفه

خالي :- ياجماعه اهدوو عندي حل نحلها لهلسالفه هسه دام محد يعرف ..لاتطلع السالفه بره وننفضح انللم السالفه احسن .

كال بابا :- وشنو هو ابو محمد

سالار :-اكتتتتله بس هو هذاا الححل

خالي :-اهدء خالي خلي نتفاهم نحجي

سالار :-شهلحجي خااااالي انننييي اختتي يتحاررش بيها وابقى ساااكت ؟؟؟؟؟ احجووو تقبلووووها؟؟؟؟؟

صار صريخ صواتهم عاليه لحد ما بقو لازمين سالار كم واحد من ولد خالي يهدو ويكلوله بس اهدء خمس دقايق

خالي :- اني اشوف الحل المناسب هو نعقد الهم هسه نجيب الشيخ وتنحل السالفه شكلتوو

رفض بابا رفض تام وسالار هم هلشي طمني وبقيت ساكته

لؤي:-ليييش عميي اني قاابل اتزوجها وانسى الي صار وبلعكس اعيشها وادللها واحسن عيشه وربكم

سالار:- عايشة أحسن عيشة ببيت أبوها يا **

لؤي :- سالاار متفهمك خويه مستعد اتزوج اختك بمهر عشرين مليون شرايك

گال هيج وچان يكوم ويدفع ولد خوالي وهو يصيح ..

-اختي مو سلعه وتنباع سمعت لو لا ؟؟ ولا ناقصه شرف حتى ازوجها الك

انت وفلوووسك جوا قندرتي ياحثالة لك انت اصلاً شكوو باقي اهنااا اطلع اطلع بسرررعة لاا اجرررم بيك اليوم وحق ربك..

لؤي:- تطردني يا ابن عمتي ؟

سالار :- لك مصدگ نفسك چنت أبن خالي هسه كلشي أنتهى لا تفكر مجرد تفكير تدخل لبيتنه لو ما ابوي كلبه طيب وكلشي صار ما قبل اكتلك تدرري شنووو گال؟ "حسبي الله ونعم الوكيل"

ابووي طيبة گلبه ابد ماتنوصف حتى على السويته بعده مخليك گاعد بيته لو غيره چان دفنك وأنت عايش

اسمع هذيج المره الطلقة بيدك هلمره افجر راسك يا عار الزلم

لؤي:-لاتتجاوز اضل اكبر منك واني كلتلكم هي تقربت مني وطمعتني بنفسها وخلتني احبها ومستعد انزوجها الليله

سالار:- اختي ماتزووج عارات مثلك وقندرة ازوجها لتاج راسك سيد الزلم يسواك مو ناقص شرف وغيره لعد انت شكد شارب حليب طليان ذره رجوله معندك..

..لك استحي علئ شواربك شوارب اختي ارجل منك والقران

لؤي:- لاتتجاوز سالار محترمك وحتى ماحجيت وماشتكيت من ضربتني وكلت اخترم القرابه البينه ومااكول لشرطه

اسمعوو ياخوالي وياعمي نارديين الي وماتصير لغيري

ولو ابن عمها اني جان نهيت عليها ..

وعلي اذا ماتنطوها اليه مايصير خير وها انه منطيكم اسبوع تفكرون وحتى لو شهر

طلعه سالار وكلهم طلعو صارت عركه بالشارع بقيت لوحدي ابجي بصوت ..دخلن نور ونبراس بجيت بحضنهن

شمسويه بحياتي وهيج يصير بيه؟..بعمري ما مأذيه احد وما حاجيه على شرف احد .. شنو الذنب الي ارتكبته؟..

رجعت لغرفتي وسالار وابوي اجولي وكالو تره بوخه لاتفكرين بعد بي انسي ..

حمدت ربي وشكرته مامصدكه كابوس لؤي اخلصت منه ..

بليلتها جنت نايمه وتحملت بحيدرا فزيت الفجر استغربت ليش اجه بحلمي اني ما مفكرة بي رحت صليت وظليت كاعدة للصبح يلا رجعت نمت..

...

كاعـد علئ الكـرسي ورافـع رجلـيه عـلئ المـيز رجـل عـلئ رجـل ويغـرس القلـم عـلئ جبـينه عـادة مايگـدر يتركـها بسـببَ التفكيـر

ايـده الثانـيه عـلئ خـده رافـع جانـب خـده بٲصبعيـن والاصابـع البقـيه جـوه حنچـه حركتـه المستمـره من يفكـر وصـافن عـلئ السگـف ...

"نـاردين ! صدگ خُـبلـه

وخبلـتني بشخصيـتها

شلون دخلت لحياتي وقلبتها راسي صدع من كثر التفكير بيها..

اندگ الباب ودخل حسن وهو يضحك..

-نعم دكتور تأمرني بشيء؟..

-شعجب دگيت الباب دنچب وتعال اگعد..

تقدم وگعد علئ الميز وشمر حذاءة بالگاع عادة ما يبطلها..

-ها يابه ليش اجيت خيرك يخوي؟..

حسن:- والله يانظر عيني اجيت واريد اطلب منك طلب..

-ها صارت بيها نظر عين بدون ماتكمل اسكت ادري بطلبك شنو هو!..

حسن:- چا اذا تدري ليش ما تقبل موحالة هاي تره..

-حساني شبيك مو گلتلك وارجع اعيد الي حچيته خاف بعدك ما مستوعب رجعه للبصرة ماكووو!..

حسن:- اني ما رايح اله! رايح اشوفها هيه..

-شيل الروحه من بالك ليش ماجاي تفهم! كافي گلتلك روحه ماكو..

حسن:- بس حيدرة انه مو صغير مو اخوك القبل سنين الدمعته بطرف عينه واعرف اتصرف اريد اشوفها مشتاقلها..

-تتذكرر قبل سنتين شنو سوت؟ وشنو اختارت احچي؟؟؟؟

حسن:- صح والله وحقك هم.. بس جاي اگلك مشتاقلها!..

هاي امي حتى لو غلطت بحقنه بس ابقى ٢٣ سنه من عمري عايش بسببها!!..

-تمام خلص تريد تروح روح بس دبر نفسك لا فلوس ولا سيارة دام معاند وميبس راسك الا تروح..

حسن:- عادي حبيبي اروح بسيارة صديقي سالار..

تنرفزت وصحت بصوت عالي..

-حساني اطلع بره كافي مصختها..

-احبك ولكعبه شعندي غيرك احبل اجيب..

شمرت عليه الملفات شمرلي بوسه بلهوى وهو يضحك تالي طلع..

بقيت اهز براسي واتنهد احاول اهدئ نفسي..

عيني على سويچ اخذته وطلعت قفلت العيادة وركبت سيارتي..

طول الطريق اصيح واضرب هورنات ما ادري وين اروح بالي مشغول بهواي امور..

وهذا الخبل شغلني بكلامة وروحته للبصرة

وكفت السيارة يم الرصيف ونزلت..

گعدت وفتحت دگم قميصي وذاكرتي رجعتني لقبل سنتين بالضبط..

( من حسن واگف بظهري ولازم قميصي وانا حامي من ابوي )

( من ابوي بعدما دخلت البيت ولكيته متهجم عليه )

( من سألتها يمه شبيچ ؟؟ )

( چان جوابها يمه معليك اني وابوك

لاتتدخلون بمشاكلنه )

( من يوم التهجم علئ حسن وريحه جسمه عرك ادركت بي سكير ويسكر .. )

صافن بالشارع والسيارات تعبر والناس تمشي گدامي..

الجكارة ما حسيت بيها من طفيتها بيدي تالي جريت نفس طويل وسحگتها شششش حيدرة صحصح لا تتذكر واتعب روحك بناس باعتك.. هه وهالناس اهلي..

....

ناردين..

مرت فترة وصارت أمتحاناتي النصف السنة.. الخوف والرعب جان يقره ألف بكل مادة..

اقرا هواي وسالار هو الي يدرسني.. چان اول امتحان اسلامية وعربي ..

جاوبت علئ اسلامية وكلش سهلة اما العربي اقرا على نفسي السلام..

اما التعبير چان عن الصداقه عبرت من يمي اجيب واحط واسطر بالحچي الصديق هو الصديق هو الصدوق الي يساعدنه بايامنه الصعبة..

لحدما صارو ورقتين شلون ماچان وخط مسماري ماينفهم..

اطلع من الامتحان اشوف البنات يبچن ويلطمن وينوحن لان الاسئلة صعبة واني اطبگ يم الحانوت اشتري بلفين چباسه وكيكات واگعد اكل تالي ارجع للبيت..

بابا اجرلي سيارة خاصة خايف عليه وافضل شي سوا.. بقى امتحان اخير وهو الأحياء ..

بيومها ردت اشوف حيدرة.. حسيت بكمية فضيعه من الأشتياق گلت ليش ما اروح لعيادته؟..بس منو الي يوديني وبحجه شنو؟

اجتلي فكرة بعد الأمتحان اخذ تكسي وأروح لعيادته أندلها محد يدري لان أمتحانات أطول اكثر من ساعتين..

بدلت ورحت امتحنت بسرعة ساعة وطلعت حليت شلون ماچان بس بدي اروح..

طلعت من القاعه الامتحان بسرعة والجنطة اخذتها شافني الحارس كتله خلصت واريد اطلع..

گال وتروحين مشي بيتكم قريب؟

-اي عموو هياته بيتنه..

هز راسه واني رحت طلعت من الفرع ورحت على شارع العام امشي اريد تكسي بهاي الظهرية ماكو؟..

صدفة وشفت واحد يريد يطلع كتله عموو اريد توصلني للعيادة الـ* **

صفن عباله وحده چذابه گال روحي منا عمي..

-عمو عندي فلوس الكروه بس وصلني..

-وين اهلج انتي؟ وچنج جايه من المدرسة طالعة منها بدون علمهم ها؟؟..

-لا عمو وبعدين ليش تسئل اي طلعت من امتحاني واريد اروح لاخوي لعيادته وهذا العنوان وهاي الفلوس توديني لو لا؟؟..

صفن وكال اركبي شدخلني بيج اني يابه رجال على رزق الله هلتكسي..

صدگ انطيته العنوان ونزلني گبال العيادة انطيته الفلوس وراح..

صفنت عزه هاي صدگ سويتها؟ زين هيه بس خمسه چانت عندي من ارجع شلون؟ استعجلت من خطيت هيچ خطوة كلش جبيرة..

هسه ادخل لو لا؟ الله ياخذني شصخمت..

دخلت وايدي على گلبي گعدت علئ الكراسي الموجودة العمال يباوعولي بأستغراب..

لان لابسه لبس المدرسه والدنيا الظهر مايفتح هسه عيادته بس ادري بي موجود..

شافتني البنية گالت خير شنو رايده عيني؟..

-الدكتور موجود؟ اريده..

-اي موجود لكن منو حضرتج؟ هو ما يفتح هسة بليل تعالي مشغول حالياً ..

-عمري كليله وحدة تريدك ضروري وتطلع انتي كليله هيجي واذا ماقبل اروح اني من اقاربة..

-حبيبتي عنده شغل ما يفتح هسه..

-جربي تگليله..

باوعتلي صفح من كتلها من اقاربه وكالت اي صح اني شايفتج من قبل اجيتي انتي واخوچ طلعتوا اقارب ما ادري بيكم..

گالت ادخلي اني رايحة دا اكتب دامج من اقاربه ما تحتاجين استأذن منه..

هزيت راسي بضحكة مجاملة.. هااا اي ما يحتاج..

وگفت يم الباب ورفعت راسي قبل ما ادخل ابتسمت واني اشوفه..

گاعد بالمكتب بكل هدوء ومناظرة الطبية محاوطه عيونه رفع شعره الطاغي علئ خده

لزم ورقه وقلم وبده يكتب

ما تحملت ابقة واكفه واباوعله من بعيد صليت علئ محمد وختمت القران بگلبي ودخلت للمكتب ..

وكفت گباله وايدي علئ عكسي وگلبي يدك قوي

انتبه عليه ورفع راسه بتفاجئ من دخولي المباشر وبدون استأذان..

كال بأستغراب:- أنتي ؟؟!

-اي لعد منو ابويه..

گام من الكرسي وگال لا تستهزئين بلا واحترمي ما احب الشقة الماصخ..

-اخلي ملح عادي؟..

-ناردين!!..

-اشاقة وروحه للنبي..

-شجابچ بهالوقت تخبلتي؟؟..

-عندي حچي وياك..

مسح وجهه بعصبية :- أستغفرلله بابا انتي مخبلة لو شنو احد دازج عليه شمسوي بدنياي والله يبليني بمراجعة خبلة رسمي شجابچ بهذا الوقت لعيادتي؟؟..

لميت شفايفي بأبتسامة وسكتت..

حيدرة:- اشو لابسه زي المدرسي والدنيا ظهر شجابج ومنو الجابج بس لا الي بالي؟؟..

-اي اجيت لوحدي.

-هاي صدگ تحچين لو تشاقين!!..

-لا صدگ اجيت اريد احچي وياك واروح..

-نعم احچي خير يارب؟؟..

-نعم الله ضلوعك شبيك ماتحترم الجنس الطيف ماعبالك واكفه كباله انثى شسمه

-اگلچ يابة گمتي تتجاوزين وما يفيد وياچ العين والاغاتي ما اريد اسمع كلامچ ورجعي لمدرستچ يلا يلا بويه..

-اتصرف لعد احد لازمك هياتني كبالك..

-بووويه مو بنيه قنبلة..

-اريد احچي وياك..

-شششش ماكو حچي..

-والله بس بس كلمة وحدة اسمعني..

-بدون حلفان اطلعي ورجعي لدوامچ..

-حيدرة!..

رحت ركض عباله راح اطلع بس العكس سويته سديت الباب وگفت يمه

-اگولك كلمة وحدة ليش ماجاي ترضى تسمعني..

رفع حواجبه وعصر ايده بصبر باوع على الميز وگال..

-گووولي يابه گوولي..

دگات گلبي تسارعت والحچي تبخر وايدي ترجف..وگفت قريبة منه وعيني بعينه بعدما گلبي ورم من حبه وكبت مشاعر قوي نطقت وگلتله بهمس..

-حيدرة..

-عيني؟..

-اني احبك !

وسع عيونه وملامح الصدمة بينت بوجهة ظل صافن بوچهي ابتعدت واني منزله راسي دقايق وهمس..

-باوعي بعيوني..

ضليت مرتبكه وارجف.. عاد مره الثانية صاح بنبرة اعلى..

-باوعي بعيوني يااا ناااري..

رفعت راسي.. گلتله شنو؟؟..

حيدرة:- رجعي عيدي الكلمة الي گلتيها؟..

أنصدمت بقيت متجمدة بمكاني عاد كلامه وگال احچيها بعيوني!.. وگفت يم الباب ردت اطلع لزم ايدي وقفل الباب..

-شكو عوفني اطلع..

حيدرة:- مو تفجريني بقنبلة من كلامچ وترحين..

-كافي حيدرا فدوه..

حيدرة:- شنو گلتي قبل شوي؟..

ظليت ساكتة وعيوني بالگاع رفع راسي بايده وگال وهو صافن بوچهي.. انتي تحبيني؟؟

هزيت راسي.. گال ارررريد اسمعها انتي تحبيني؟؟..

-اااايييي اااايييي..

-من يمتى!

-هههه من زماان..

-من يمتى بالضبط؟؟..

-من اول ما ساعدتني من الطين..

-حب من اول وگعه طين؟..

ضحكت بخفه وهو ظل ساكت..

-شلون حبيتيني؟؟..

-ما ادري..

-عادي تسولفين واسمعچ؟..

كتف ايديه وابتعد وهو يهز براسه ورفع تك حاجب بمعنى ابدي احچي..

-ما ادري بس نبضات گلبي تتسارع بقوة وبصوت مسموع من اشوفك احس نفسي فراشة گلبي يرفرف ويطير بـَس شعور ما اعرف اوصفه؟ ٩٩% من تفكير عقلي انت صرت اشوفك بأحلامي واسمك دوم على لساني اتذكرتك بكلشي صرت اقلدك بكلامك واحب كلمة بويه منك وحتى اضحك من اتذكر ضحكتك چَا والرجفه الايد والصفنات؟..

اظل اسولف وي روحي بيك! صرت اسهر اغني وتغير موعد النوم واشخبط تالي بنص بعثرة كلامي اكتب أسمك!!..صرت عيونه لگلبي لان ما داشوفك بعيوني دا اشوفك بگلبي! احسك گلبي المميز! حتى شكلي اختلف تغصن گلبي من الفرح من عرفت روحي متعلقة بيك..

حيدرة:- يابووويه هذا كله صاير بيج بسببي؟؟..

-ههه واكثر..

-ممممم..

وگف يم الباب واتچه عليه وظل صافن بوچهي..

-اريد اطلع..

-تدرين صدمتيني.. اول مره بنيه تعترف بمشاعرها وتبادر قبل الولد.. صح صعبة بس فاجئتيني بجرأتچ..

-لو اظل ساكتة ادري بروحي اموت اذا بقيت كاتمة هالمشاعر وما تدري بيهن..

-ادري بيهن!..

-شنو؟!..

ابتسم وگال.. چنت حاس بيچ وبأعترافچ هسه اكدتيلي شكوكي..

ظليت ساكتة وهو يمسح وجهة ويستغفر..

-ناردين... بويه انا ما افيدچ انسيني.. انسي حيدرة لا تتعلقين بيه اكثر رح ادخلين بمشاكل مو بگدج ما تتحملين حياتي صعبة وصعب تعيشين وياي!!

رح ادخلين بمشكلة وطبين بالثانية انتي مو حملها طاقتج قليلة وصبرچ اقل..

انتي بريئة ما اريد اللوث برائتج ناردين انتي مراهقة وحبچ فطير!..

مو بسهولة ابدا انا احب وارتبط بإنسانة لا تنتظرين بيوم من الأيام ابادلچ الحب

-بس اني احبك وما ارريد اعوفك اريدك وحبي الك مو قليل حتئ انساك رح تكمل سنة وگلبي ينبض بأسمك..

-شششش ناردين حبي مو سهل مثلما متخيله.. مو بهاي السهوولة الي متخيلتها مو الاحلام الوردية الي راسمتها..

اذا ادخلين وياي بعلاقة وتصيرين زوجتي رح تضحين هواي رح تبچين هواي بكل ليلة رح ينكسر گلبچ ويحترگ العشگ.. وانا ما رايد هالشي مستحييل اذيج!!

ناردين چؤؤؤ ماتعرفيني ما تعرفين حيدرة منوو..

طلعيني من عقلچ وانسيني .. كلامي يمكن قاسي بالنسبة الچ بس صدگي هذا كله لمصلحتچ..

-ههه قابله!..

حيدرة تدري شي؟ ما دا اصبر ابد اريد اوصل الك بسرعة اعرف ماكو شيء يجي بسهولة بس!! مليت من حياتي عايشتها بخوف من ابن خالي وقهر من امي إلي ما تتسمى ام..

رح تصير بيه حالة نفسية بسبب سكوتي وتضاهري بالقوة وصبري وتحملي وكبت هالمشاعر..

شهكت.. وما فد يوم اشتكيت لاحد وگلت ليش حياتي هيج!!

كلها دوم اگول عادي يابة وذا تهووون ما صار شي كلشي بسيط هـاي كلماتي!!..

بس هسة تعبت اريد تاخذني يمك اريد تصير الي ام واب أريد تصير الي صديقي حبيبي واقرب شخص لگلبي وأهلي وناردينتك الك وحدك!!

واصيرلك دنيتك الصغيرة!..

اريد اصير تحت جناحك حيـدرا وادري كلش زين ماكو أمان بهاي الدنياا كلها غير يمك انت وحدك!..

اريدك تقويني وتحميني تعبت وحييييل!!...

طول الحچي صافن بعيوني وساكت يستمع اليه بهدوء ..

-اتفهمچ وادري وحاس بيچ واعرف كلش زين بالي تمرين بي بس مستحيل ناردين الي تردينه يصير!! لا تتٲملين بيوم من الايام گلبي يحب.. صعبة يا ناردين صعبة..

-احچيلي ليش صعبة انطيني سبب؟..

-ما اگدر هاي المشكلة..

جريت نفس وهو تنهد ظل صافن وساكت ما گال شي..

-عليمن صافن؟..

-صافن على عيونچ!!..

-ليش!...

-عيونچ الخضر وكل يوم لون يحچن كل شي..

-شفت القهر والحزن بيهم صح؟..

-ااي بويه التعب واضح بعيونچ..

-التعب واصل حدر عضمي واگول تهون..

-الله يساعدچ يابه الله موجود..

-وتالي؟..

-الله العالي..

-صدگني مستعدة اصيرلك كلشي وحتى اذا اضطر اصير نارك وما ابتعد ولا اعوفك وابقى أحبك ليوم موتي..

-يا ناري..

-عيونها..

-صعبة يابه..

تنفست بعمق وهزيت راسي باوعت على الباب وگلتله كافي خليني اطلع..

-عندچ فلوس كروه الرجعه؟..

-اي عندي..

-لوما سمعتچ چان رجعتچ وصلتچ لبيتكم بس اكيد هسه اهلچ متخبلين عليچ زحمه اوصلچ انه.. اخاف عليچ يشكون..

-تخاف عليه؟..

-ناردين اخ ياناردين.. بالچ على نفسچ وانتي راجعة للبيت اعرفچ قويه وتعرفين تحمين نفسچ..

-احميها ليش؟..

-كلشي يصير..

-اني اگدر اشمر روحي بالشارع وادعم روحي بالسيارة هسه بس ما مستعدة دا اصبر واشوف وين توصل..

-مو اگلچ بالچ على نفسچ لان ادري بيچ هسه مصدومة من نفسچ وهم تعبانه.. ديري بالچ امانة! اذا صدگ تحبيني..

-ان شاءالله..

فتح الباب وطلعت سمعته يگول للمساعده مالته لا ادخلين احد للعيادة وانه اشتغل.. هزت راسها وگالت تأمر..

ضحكت بأستهزاء وطلعت چانت بالأربعة العصر يربي لا لعد شگد متأخرة هسه بشنو اقنعهم ربع ساعة باقية واكفه لعل اكوو سايق تكسي يمر يمي..

واكفه وصافنه بالأرض واشهك وامسح بدموعي..لحدما وگفت سيارة ..

صعدت وكتله للكاظمية دليته على منطقتنه

وشارعنه وصلني يم الباب..

-الكروه؟..

-عمو هسه ادخل للبيت اجيبلك الفلوس..

-لاتتأخرين مستعجل..

-خوش..

هزيت راسي ونزلت وكفت يم الباب فتحته واني اتنهد ..

انصدمت من شفت امي گاعده علئ الكرسي.. وسالار متجي علئ الحايط ولازم راسه..

اول مافتحت الباب وگلت السلام عليكم..

اجت تركض ماما عليه وضربتني راشدي قوي خلاني افقد توازني

وهي تصيح وادكول اليه :- منين ما اجيتي ارجعي سساااقققطه ..يتبع ؛؛؛))

لا تنسون التصويـت🔴.

جربت مرّة الأعتراف بالحُب

كان الأمرُ يسيّر جداً ، أعترفتُ ببساطة

من يفصح عن رغبتهِ بكوب ماء ،

اكملت يومي .. كان كُل شيءٌ طبيعيًا

توجهت الى تنظيف غرفتي ، رتبت سريري

وضعت الوسادة على الطاولة

ومزهرية الورد مكان الوسادة

كان كُل شيءٌ طبيعيًا

غير أنَ النار التي أُعدت للشاي ظلت مشتعلة

وماء الصنبور ظل مفتوحًا

وقلبي .. حتى الآن ، خارج جسدي بلا مِعطف !

..

ضربتني راشدي واني واگفه بمكاني وفاتحة عيوني بوسعهن بدهشة على تائير الصدمة عاطت بوجهي..

-وين ما اجيتي ارجعي لچ ساقطة ما عرفت اربيچ..

جرني سالار من ايدي يباوعلي بعصبية وعيونه توصف الخذلان مني دخلني جوه دفعني بحضن البنات وگال بحده ادخلي ما أرررريد اشوف خلقتچ..

اخذني للغرفة فوگ گعدن يلومن بيه وليش طلعتي وين چنتي ؟ ..

حچيت بصوت مبحوح":ابويه وين ؟..

نبـراس: طالع ما يدري بيچ ومساع خابر يسئل عليچ گالت إله أمي اجت من المدرسة حتئ ما تشغل باله وهو بالشـغل

ولچ غير هذا المعفن "لؤي" مخابر سالار..

-هذا ما يحل عني ابداً كرهني بحياتي كلها!! آي وشنو جاوبتوا؟؟..

نبـراس: لچ گال النه أختك طالعة ويا واحد من المدرسة و روح الحگ أختك لا تگو* براسكم!!

فتحت عيوني علئ وسعهن: عززه!! تحچون صُدگ!! صخام عزه بعينه كُلش تجاوز الحدود هذا صُدگ معتبر روحه زلمة ويستشرف براسي وهيج يحچي عليه؟ و انتو صدگتو ؟ "سـالار" شنو گـال ؟

نـور: سالار ما صدگه ابد و بقئ يدرس يدري بي چذاب و يريد نشك بيچ ويسويلچ سالفة بس ماما ضلت تدگ وتلطم وتگول امشي روح جيب أختك من المدرسة وسالار مطنش السالفة بس من صارت الساعه بـ2 الظهر و انتي ما اجيتي مثل كُل أمتحان خليتي الكُل يشك ..

لان كُلش أتاخرتي و أمي لحت عليه يروح وهو قبل ما يطلع و يجيبچ و يثيت كلام لؤي چذب دگ موبايله خابره السايق الي يوصلچ وگـال "كلهم طلعو من المدرسة واختك ماهيه ماطلعت شلقصة ؟"

-آي وشصار تالي؟؟..

نـور : بوقتها كلنه سمعنه المخابرة وأمي تغلط عليچ وصدگت كلام لـؤي، و سـالار راح يدور عليچ ما لكاچ حتئ راح لبيت صديقاتچ ماكو

ما بقى حل عدنه بعد ما يدور عليچ ساعتين وهو منتظرچ بالكراج عسئ ولعل ترجعين!!

شكينه لـؤي خاطفچ لو مسويلچ مصيبة، بـَس تالي اجـيتي ..

بقـيت صافنة وساكتة كُل هذا صار لأن رحت أشوف حيدرة غمضت عيوني بيأس وندم حقه سالار يسوي كل شي بيه لان أستاهل طلعت وما گلت الهم ولؤي مراقبني..

راحن وبقيت لوحدي بالغرفة..

دقايق ودخلت امي لزمتني من شعري وكفختني وغلطت غلط اخجل اسمعه ضليت ساده اذاناتي وگاعده بالزاوية وهي تفشر وتغلط وتصيح بصوت عالي..

دخل سالار وطلعها بالگوه من الغرفة وسد الباب..

باوعلي وكتف ايديه لصدره وگال احچي؟..

-شنو احچي؟..

سـالار: " نـارديـن وحق الله لازم نفسي عنچ وداعة أبـوي احچي وين چنتي ؟..

-طلعت لمكان..

-تحچين لو ادخل أبوي شتگولين؟؟..

-احچي والله احچي فدوه بس أنت لاتمد ايدك عليه راسي رح ينفجر امك ماقصرت سحلتني سحل..

-يمته ماد ايدي عليچ ؟ احچي وخلصيني تستاهلين الكتله خلي تسويلج جره اذن..

-رحت للمحل من طلعت من المدرسة گعدنة نسولف اني و صديقاتي واخذتنه السوالف وماحسينه الا الساعة بالاربعة..

-هي هاي السالفة؟؟..

هزيت راسي بـ اي وسكتت..

تقدم وهو لازم ايده بصبر:- السالفة والقصة الي الفتيها هسه حتئ المطي حشاچ ما يصدگها تردين اني اصدگ ؟ بعدني وياچ هادئ كُلش لا تجننيني عليچ

-سالار ترى لؤي چذاب مارحت لمكان موزين چنت يم صديقاتي..

-اعرف لـؤي چذاب شنوو عبالچ مصدگه؟ طبعاً لا بس انتي ماجاي تقنعيني ابداً احچي الصدگ ؟؟

سكتت وهو طلع ما حصل مني جواب رجعت ابجي هسه اني شوازاني ورحت!! الله ياخذنيي..

لو منتحنه وراجعة للبيت مثل الاوادم مو احسن من الي صار هسه أمي اكيد ما راح تسكت ولا سالار مصدگني!!

بعد المغرب اندگ الباب دخل بابا وشكله يدري بالسالفة ماما گالت اله..خفت حسيته معصب لا يگتلني هسه انه شسوي بروحي!!

صاحلي من جوا:"نـارررررردين تعالي بووية..

عززه گلبي يدگ حيل رحت أركض بعدما صاحلي مره الثانية دخلت للهول گاعدين كلهم وبابا گاعد بوسطهم ..

گال الكل يطلع ما عدا سالار وسعاد.. هزوا راسهم وطلعن البنات ومصطفئ ..

گـال إليه سدي الباب وگعدي يمي..

كمية الخوف بلحظتها ما تنوصف گعدت وبده يحچي إنُ ماما مخابرته وهيچي ..

وهو متفاجئ مني وسئلني لعد وين چنتي بوية ويامن طالعة ؟؟

سالار: ام عيون الملونه تگول ويا صديقاتها..

رديت اي صحيح..

أبـوي: ياصديقات ؟ روحي دگي عليهن بله..

-ما عندي ارقامهن..

-العنوان؟؟

-والله ما اندل بيتهم

كالت امي :- جذابه اعرف هاي الكلاوات ماتمشي عليه فاهمه كولي ويامن جنتي طالعه شسمه هذا الطالعه ويا وشارده من المدرسه علموده

سـالار: هوب يمه شنوو هلحچي ما اقبله تحچين علئ شرف أختي اعرف هيه طالعة بس مو ويا ولد شلقضية تعرفين تربيه بنتچ شبيچ!!

-لاطلعت مامربيه هلحيوانه ؛اذا نايمة ويا لؤي شتترجي منها؟

كلامها مثل الكزاز ينبت بگلبي باوعتلها وغمضت عيوني عصرت ايدي بصبر وضليت ساكته..

ابوي: ثمني كلااااامج سعاد شهالحجي ؟؟ ماكوو داعي لهل كلام وبعدين سالفة لؤي مو گلت سدوها عجيييب ؟؟؟

لحد يفتح هلموضوع بعد وانتي ناردين تعبنه واحنه انگلچ وين چنتي .. اذا ما تحچين بالطيب بوية رح استعمل القوة شتگولين ؟

هواي حچو وانه ساكته ماحچيت ولا كلمه كلام امي اثر بيه كلش اخر كلامها ظل يرن بأذني وبقيت داخله بصدمة.. معقولة تكرهني وحاقدة عليه ؟ شنو مسويتلها واني بتها ؟؟..

طلعت ما راضيه وأبوي لحگها..

بقئ سـالار باوعلي وگـال:- اني مصدگچ من ناحية ما طالعة ويا شخص بس سالفة ويا صديقاتچ ما اقتنعت بيها علئ العموم ابقي اهنا ورايح اشوف ابوي و ارجعلچ.

طبطب علئ ظهري وراح ..

حسيت بتأنيب الضمير وصراع بين عقلي وگلبي وهذه الـبداية..

عبالي رح ينتهي اليوم او ليلة هذه علئ خير ماضگت طعم الراحة ابد وحتى ما لحگت أفكر بحيدرة او اتذكر شنو صار بالعيادة!! ولا دقيقة

لأن اجو بيت عمي اخوان ابوي كلهم!! اجو بسبب لؤي گـايل الهم واجيين يفهمون السالفة وشصاير ؟..

نور كُل شوي تجيلي وتگلي شنو صار لأنُ حابسه نفسي بالغرفة ما اطلع ..

تالي دخلت وهي اتگول:- ناردين ولچ صارت عركة بين بابا وعموو قاسم!!..

-عزه والله ما ناقصني علئ شنوو يتعاركون؟..

نور :- هذا عموو المحترم سيد الاخلاق الكريمة والفاضله مايقبل بعد تروحين للمدرسه بسبب الي صاار اليوم وبسبب المعفن لؤي

-خلي يولي يا عم هذا ؟ بس بالعرك والطلايب اشوفه شنوو بكيفه يبطلني ابوي موجود هو الي يقرر هو ولي أمري ..

طلعت وأني بقيت گاعدة لوحدي وافكر وره نص ساعة دخلت نـور وگالت..

- ولچ اجه سيد "لـؤي" عــار الزلـم

سمعت اسمه شمرت الايباد من ايدي بسرعة عزززززه گووولي والله ؟ لچ هذا شنو بس اررريد افتهم!! شعنده جاي ؟

نـور: ما ادري بس هو هيچ دخل بدون ما أحد يصيحله يجي لبيتنه وابوي ما قابل

-رووحي انتي هسه جايه اني..

...

سالار

دا احچي ويا عمي ومعارضين كلامة ودخل لؤي من باب الكراج ..

اتفاجئنه من دخوله شلون اجه هذا!! سلم علئ أبوي بكُل صلافة ..

كمت من مكاني وصحت: " انت منو الي سمحلك تدخل على ما اتذكر اني طردتك ؟ ما عندك كرامة صح ؟ اطلع لا بالحُسين تصير دم..

لـؤي: روح بابا روح ما احچي ويا هيچي خلگ

دفرته برجلي: حييوووان هااااي علييمن لك أطلع بررررره

دخلت امي وهي ادكول :- لاتمد ايدك علئ اخوك الجبير عيب عليك

-شنووو شدتحچين يووم من كل عقلج اطلعي من الديوان مو مكانج وهذا الكلب خلي يطلع لا بالدم تصير اليوووم

-ماا يطلع انت معليك انه صحتله

باوعتلها مصدوم شنوووو صدگ تحچين انتييي!!!؟

-ااي لان يريد يكلكم علئ موضوع

-ياا مووضوع لاتخبليني عجيييب

التفتت لابوي :- بويه هلكلب هوو اللفق كلام علئ ناردين وسب بشرفها

لؤي :- عمي صح انه شفتها اخذت تكسي وراحت وماكدرت الحكها ويمكن صدك تسرعت بضنها المهم اجيت علئ موضوع

نفذ صبري :-دحچي واطللع گو*..

لؤي :- الحجي متوجهه لعمي مو الك لاتكمز من يمك

هديت عليه لك كلببببب انت فهمنييي ماعندك كرااامة اجرررم بييك اطلع دااگووووووول

لؤي :- لاتمد ايدك علمود عمي مارديت عليك ميل عني سالار

رد ابوي :- كول الكلام العندك وراها اطللللع

لؤي :- عمي اسمع وبعدين قرر انه اريد ناردين اريد اطلب ايدها علئ سنه الله ورسوله واليوم اجيب الوالده ....

سالار ؛- بدوون متكمل منقببببل

ابوي:كلااام سالار اضنك سمعته زين واني رافض

سعاد ؛- بس انه موافقه ازوج بنتي لابن اخوي

-تحچين صدگ لو تشاقييين تنطين بنتج وتبيعيها لهذا السسسطل

كام عمي الجبير :- ااي احسن حل هذا خل يزوجها ونسد الموضوع

صحت :- وررررررب الكعبة اسمعووو زين علئ جثتي إذا ازوج اختي لهذا العااااار

لؤي :- اني اريد اخطبها بالحلال ۉين المشكله ليش ماتقبل اريددهاا

-المشكله بيك يابه متفهم طلبت ورفضناك اطلع لا تصير بالنعل

دخل امجد وهو يتسمع لكلامهم وكف كبال لؤي وكال بضحكة وهو يباوع بعيون لؤي بتحدي

:- اني ناهي علئ بنت عمي ..

يتبع

لاتنسون التصويـت ⭐.