تحميل رواية «مواسم الذبول» PDF

مـــواسـم الــذبـول ....

البــارت الاول .... للكاتبه روزايه ( زهراء)

ايمان... ليش يابنتي ليش هيج ادمرين نفسج وانتي لا ام ولااب ومگطوعه من شجره متفكرين بروحج بمستقبلج ولج حسره عليج اللگمه اله بوجوده..

.... اذا تحبيني لتفتحين الموضوع تعبت والله مابودي اجي من الدوام حته لا اشوف ولا اسمع ليش تحجين ويايه بهاي الطريقه ترى بعده العمر گدامي اني اختار حياتي مااريد اعيش مغصوبه ..

ايمان.. اني نصحتج وانتي بكيفج باجر عگبه تذكرين حجايتي وانتي تربيتي بهذا البيت وتموتين بهذا البيت

خلدون مايخليج اطلعين منه وكولي خالتي كالت ابن حمايه واعرفه وانتي دتلعبين بالنار ...

... راح اكوم اقره اذا احتاجيتي شي صيحيني هياتني قريبه عليج مراح اطلع بره..

لؤلؤ.. الاسم زاهي ويلمع مثل نجمه بسماء ليل  معتم بس الحياة الوره هذا الاسم عكسهه تماما اني السماء المعتمه واي بريق مابيهه بس بصيص الامل البداخلي هو مقويني ومرات الامل المفرط يكون مرجعه سيء على صاحبه...

كتابي على رجليه واجبر نفسي على كلشي على الدراسه على الاكل على المقاومه الحياة باهته عندي بدون معنى وحيده

يتيمه.. اخاف حيل .. حيل اخاف من المستقبل ...

ايمان... لؤلؤ وينج؟؟

... هايوم اسمعج موكتلج قريبه عليج جنت كاعده اباب الغرفه

ايمان.. تعالي يمي اقري لا اطلعين يمهم

... تخافين عليه؟؟

... شعندي غيرج اني الماحبلت وجبت بس ربيتج بيدي الام مو التحبل وتجيب الام التربي وتسهر الليالي اني الضحيت بشبابي علمودج...

لؤلؤ..  لو اظل طول عمري اوافي حقج مااوصل لنقطه من تعبج عليه لو ماما الله يرحمهه ماتعبت عليه هيج انتي كلشي بحياتي مستعده اموت وانكتل علمودج بس اشوفج سالمه..

ايمان.. يابنيتي الجنهه جوريه لحد يلوم خلدون من گلبه مفرفح عليج وانتي بهذا وجهج جنه العافيه الله يحفظج ويعلي شأنج بعالي سما ...

لؤلؤ.. بستهه من خدهه وكعدت يمهه اقره بس بالي ابد مو يم الدراسه نفسيتي من الداخل متهشمه تعبانه محتاجه سند محتاجه عائله ام واب واخوان يحمويني من المستقبل...

صاحت صوت زرف اذاني وينج غضب نعاله امهات الولد

العايقات بلوه وابتليت بيجن ...

لا اكدر اسكت واظل بمكاني ولا اكدر اتحمل الكلام واكدر اردهه كل الي كدرت علي سديت كتابي وكمت وخالتي تأشرلي اتحملي واصبري...

طلعت من الغرفه صارت بوجهي بيدهه الزاهي وصاحت بوجهي امشي غسلي الطرمه كاشيه كاشيه بالزاهي اريدهه تلمع مثل وجهج ...

اذا احجي انكتل فوضت امري لله اخذت الزاهي وطلعت بره جان يوم جمعه والساعه ب١١ نار الشمس عموديه تحرگ حرگ

لزمت الصونده وهي على راسي وخلتني عبالك هندسه عندي

اغسل وحده وحده بالفرجه لحدما حسيت راسي صار نار

وراح ينغمي عليه ...

طب مروان واني انظف وشافهه شلون واكفه على راسي وبعز الظهر ماكلف نفسه وحجه وكالهه خطيه اريد اشوف صبري شوكت ينفذ لشوكت اتحمل حيل بعد ماعندي بس اكول من صبر ظفر ..

كملتهه وطبيت جوه اخلي ايدي على راسي جمر حته ماكدرت اتحرك نمت بفراشي البصف الحايط ودمعتي بعيني مويگولون كلشي بي صالح شنو الصالح بعذابي هذا ؟؟؟

اسمع صوت خالتي وهي تسبح بتسبيحات اسم الله واني دموعي تجري حاسه بذل موطبيعي رغم ما اشكي ولا احجي

بس داخلي منتهي

ظليت مغمضه عيوني واني اتذكر الصار مو كلشي اتذكر هيج مقطتفات لان جنت صغيره حيل ...

ماما جانت معلمه وبابا انسان من اهل الله عدنه محل طالع من بيتنه يشترون منه اهل المنطقه مرات اوكف ويه بابا جنت هستوني بصف اول ابتدائي واختي الاكبر اسمهه ياقوت عمرهه ١٤ سنه وولد عمره ٩ سنوات ...

اتذكر ماما سحبت سلفه واتفقوا يبيعون البيت واذا مجاب سعر يرمموا... ماما حريصه حيل ومره مدبره بشكل دائما دكول نتعب هسه حته من تكبرن تعيشن احسن عيشه بعز اهلكم ...

مااتذكر غير شكل ماما وسوالفهه.. مااتذكر غير ضحكة بابا وهو يكول لولوه ومن يكول اسمي يضحك بعده شاب بابا مكافح كل همه يكون ابهه صوره هو وعائلته ...

بيومهه جان دوامي اني واحمد صباحي وياقوت بغير مدرسه متوسطه هم صباحي نطلع كلنه ويه ماما ومن نرجع بالخط

دائما اني اوصل قبلهم كلهم لان احمد يجي مشي ويه اصدقاءه..

بهذا اليوم بابا من الصبح طلع كال اروح اسوگ للمحل وماما مثل كل يوم بالدوام دائما نخلي المفتاح جوه السندانه اي واحد يجي يفتح الباب ويفوت باب البيت بس نجر الحبل ينفتح ...

من وصلت للباب كل الي اتذكره طبيت جوه مااتذكر جان مسدود لومفتوح الباب لو شنو الوضع بس المرسوم ابالي

ماما مدده بالمطبخ والسجينه بگلبهه ومغمضه عينهه وياقوت كاعده يمهه ومثل المخبله تتلمس بيهه...

اي ذكره ماتسعفني بس هذا المنظر مسيطر على ذاكرتي

الاحداث الوراهه شكد حاولت اتذكرهه اختفت نهائيا

اشياء متقطعه تروح وتجي  او عقلي يرفض يسترجعهه من شدة قساوتهه...

....

حاولت انام حاولت انهزم من واقعي بس هوسه الجهال البره تسطر الراس ومنا اني مختنكه وشعور بشع عندي كعدت على حيلي وربعت على فراشي خاله لازمه السبحه بيدهه وتباوعلي...

ايمان.. لؤلؤه بعدج تشوفين هذيج الاحلام

... اااي بس مودائما..

ايمان... لو اكدر اطلع من البيت وعندي رجلين جان اخذتج

لشيخ يرقيج يشوف حالتج ليش انتي يصير بيج هيج خليني احجي لخلدون ..

لؤلؤ... شتحجين؟؟ دكليله لؤلؤ تشوف ناس انتو متشوفوهه

لو تسمع اصوات من غير عالم هسه راح يضحك علينه

ايمان... ااوف يابنتي حالتج امر من حالي مرات اخاف عليج خاف يأثر بيج ومرات اكول احتمال ارواح صالحه ومتأذيج..

لؤلؤ.. اي خاله ارواح صالحه مو سيئه هسه تلكيهم يسمعوني

اني ماعندي اذيه عليهم بس مااعرف ليش اني اشوفهم

بس اني ؟؟

ايمان.. الله اله بيهه حكمه بس انتي بنيه نظيفه واحتمال صدمه وفاة امج اثرت عليج وهيج صار بيج ديربالج تحجين لا لصديقه ولا تسمع ام خلدون تنشرنه على الحبل...

لؤلؤ... ظليت اسولف ويه خالتي عدنه هاي الغرفه النه على اساس خاصه بينه بس بيوم اليجي زوج خاله هو نفسه ابو خلدون اني انجبر اطلع بره مرات انام بالصاله بس من يجي خلدون هو ينام بالصاله وينطيني غرفته....

هي هاي حياتي عايشه ويه خالتي المتزوجه حماهه ويصير ابن عم بابا الله يرحمه موغريب بس مرته الاولى ماتقبلت خالتي ضره عليهه واني الجاي ادفع الثمن ...

صار العشه اخذت صينيه لخاله تعشت وغسلتلهه خاله مقعده وعدهه شلل نصفي رغم بعدهه شابه بس هاي مشيئه الله وحكمته ...

مااشتهيت اكل انتظرتهم كملوا عليه المواعين وكفت غسلت مواعين مرت مروان غريبه عنهم بس مدلله زايد تاكل وتعوف ماعونهه بالكاع لو مرات تصيحني ليفوك حته انزل ملابسهه اشرهم لو انظف غرفتهه ...

اني مو ضغيفه ابد بس اني وحيده ماعندي مكان وملجأ يلمني اذا شالوني اني وخالتي وشمرونه بالشارع منو النه وكل تحملي وهاي طاقتي البدت تستنزف لخاطر خاله ايمان لان مريضه ومااكدر على علاجهه واني بهذا عمري...

كملت المواعين ورتبت المطبخ ورحت للغرفه كملت دروسي

وحضرت ملابسي لثاني يوم بده الكل ينام وبدت رحلتي ويه عالمي الثاني..

خليت راسي على المخده بعد ماانطفت كل الاضويه ماكو كهرباء ننتظر الوطنيه تجي ومن تطفي افتح الشباك بلكي تجي نسمه هوه لان خاله متكدر تنام على السطح ولاتطلع بره ...

غمضت عيني بوسط غفوه صغيره واسمع صوت الاذان وهو يكبر الله اكبر الله اكبر يرن بأذاني فتحت عيوني واني

اكول بسم الله لايضر مع اسمهه شي...

ويه فتحة عيني تهيئلي شخص كاعد بالزاويه بس بدون ملامح مجرد هيئه دكات كلبي زادت لساني مستمر بسم الله الرحمن الرحيم وهو على كعدته ..

بديت اقره لا اله الا هو الحي القيوم ... اريد اكملهه ينعكد الساني ووكفت ماكدرت اكملهه اخذت نفس واني على نومتي

على ظهري وحجيت بصوت مسموع اقسم عليك بالقران الكريم

اقسم عليك بمحمد حبيب الله ابتعد عني ...

مغمضه عيوني واحجي حسيت هوه حار فات من كدامي فتحت عيني محد اكو صوت شخير خاله عالي جريت الغطه غطيت راسي واني اردد يا الله احميني  يا محمد ادركني ...

غفيت وماادري شلون بس كعدت على صوت الاذان كمت من فراشي اكو كهرباء بس الاضويه طافيه بس اسمع صوت بعيد حيل صوت اشخاص مو شخص واحد اسمع تلاوة قران مالهه مثيل الصوت مو صوت اهل الدنيا صوت غريب حيل...

مااخاف من الصوت بالعكس تعودت يوميه اسمعه كمت توضيت وفتحت الضوه صليت واني بعدني اسمع التلاوه

كعدت خاله تصلي وره مكملت كتلهه تسمعين صوت قران

كالت لا بس انتي تسمعي؟؟

هزيت راسي اي اسمعه صوت عذب حيل خاله تعودت عليه حته ماكامت تخاف رجعت نامت واني رجعت لفراشي

واتذكر المواقف ويه اشخاص العالم الثاني ...

مره من المرات انشلت من مكاني ليفوك مثل الطار بالهوه وانركعت بالكاع بحيث صرخت بصوت مروان بغرفته فوك ونزل يركض..

لكوني مااكدر اتحرك وركضوا بيه للمستشفى

طلع عندي فطر بالحوض والطبيب يصيح لادكولين ماوكعت

ويسألوني اكلهم جنت نايمه اني جنت بسابع نومه بس منو شالني وهيج ضربني وظليت اشهر اتعالج من وره ضربه

مااعرف سببهه شنو ومنو سوه بيه هيج ...

هوايه اشياء لو اسولفهن للمقابل يضحكون عليه ويكولون

مجنونه حته خاله ماصدكتني وكامت تخاف مني بس بمرور الايام وبعد الموقف الجبير يله صدكت...

طلعت للمدرسه ويه اخت خلدون بعمري اسمهه بيادر نسخه من امهه بس هي من النوع السكوتي كله من جوه ليجوه مسويه نفسهه مسكينه اني لا اكرهه ولا احبهه بس عدهه مواقف موحلوه وياي ...

وصلت للمدرسه حكوميه جنت صف رابع علمي بس عمري ١٧ سنه لان بطلت سنه ورجعت المدرسه بيهه اعداد هوايه ويمكن لمثل حالتي متوالمني بس جنت اذا الحايط يحجي اني احجي ...

حته من اخذ درجه المدرسات عبالهم اغش لان مااشارك ولا مبين عليه ... جنت كاعده بدرس الاسلاميه وعدنه سوره قرانيه تسمعنه بيهه كاعده بصفي بنيه اسمهه زينه وبيادر كاعده اول رحله بعيده عليه..

جنت اسمع صوت همس بأذني ووشه بس ممفهومه اسأل زينه تسمعين شي دكول لا اصلا الصف هدوء لان صوت ام الاسلاميه طاغي وصوت البنات وهن يقرن الايات القرانيه..

بس اني جنت اسمع اصوات كمت اصگ على اسناني واقره اعوذ بكلمات الله التامه من كل شيطان وهامه ...

بس الصوت يزداد ويتحول لضحك لو اصبعي السبابه يتحرك وحده عيوني بدت تغوش السره صار قريب عليه ولازم اكوم اقره الايه واكو شي يمنعني ...

من وصل اريد اكول اعوذ بالله مااكدر البنات كلهه تباوعلي والساني انشد الف شده عيون المدرسه وهي تخزرني عبالهه ممحضره وحدهه ينرادلهه حيل ..

هستوني كلت بسم الله الرحمن الرحيم واسمع بأذاني صوت تكسر مثل المواعين بحيث لزمت اذني وعبالهم تخربطت ...

طلعوني بره وغسلتلي زينه بلمي البارد راح الصوت ورجعت للصف وتسجل اسمي اني ممحضره وبيادر تحلفت تحجي لابوهه جواد حته يبطلني من المدرسه...

هيج ايامي صراع واني اتوسل بالمسيطرين عليه يعوفوني لوحدي مااخلي نبي ومقام ماامشي عليهم مرات اكول صالحين هذوله ومرات اكول لا نيتهم موزينه لان يمنعوني من قراءه القران...

خلص الدوام ورجعت للبيت سولفت لخاله مابيدهه شي ومرات احسهه تنطيني على كد عقلي ممصدكتني بس تماشيني بالكلام

لان انفعل اذا كالتلي يتهيئلج ...

للعصر واجه جواد ابو خلدون اصيحله عمو لان هو موغريب وجنت اتذكره من يجي على بابا الله يرحمه ونطلع نسلم علي

بس من عشت يمهم شفته شكد انسان فاسد ...

كمت وكفت وخاله عدلت نفسهه وتلم بشعرهه ومانحس غير الراشدي اجاني طاير وهو يغلط ويسب بأهلي واني مااصلح للدراسه واني وحده موخوش لان اختي عار واني مكاني بالشارع وهم مسوين فضل عليه ومخليني يمهم ابشع انواع الكلام سمعته ..

ايمان... حرام عليك ابو خلدون كل راشدي منك راح يسوي بيهه عائهه واذا ماحضرت يوم موهذيج بنتك تنجح دور ثاني لؤلؤه يايوم جابتهه اكمال..

جواد... لتقارنين بنتي بهاي الوسخه بنتي تدرس بفلوس ابوهه بعز اخوتهه مامجبور اصرف على هاي السكط عمهه شالهه وشمرهه عليه وذاك مات لو خالاتهه موهذنيج متوزعات بالدول ماياخذنهه لو بس انتي هم مگرمه وهم صايره حنينه تربيهه  بخيري..

ايمان... الله يسامحك على هالكلام الله يسامحك

جواد.. انتي سدي حلكج ايمان لا تعرفين شسوي بحالج هذا

وانتي بنت السگط دوام ماكو اذا شفتج عتبتي الباب رجليج اكسرهم ...

لؤلؤ.. مارفعت عيني علي لازمه خدي وكاعده بالكاع طلع وسد الباب رادت تحجي خالتي سديت اذاني مااريد اسمع كلامه صح هو مامجبور يتحملني عندي خالات وعمات وياخذني هو مامجبور ..

كلما تريد تحجي خاله اطلب منهه متحجي ثاني يوم مداومت يعني هي شبيدهه اذا حجت منو يسمعهه بالعكس راح تنهان وتنضرب من ورايه وتتخربط وحته طبيب مياخذوهه لذلك كل اليجي من الله هله بي سكتت ومادافعت ابد ...

مرن ٣ ايام على نفس الوضع جواد يطب يصيح يطلع يغلط

مرته حمديه الماتنوصف كل الكلام يضيع يمهه وصلت تسوي جدول للأكل اليوم اكلت لحم وره اسبوع يله مسموح اكل ...

جنت كاعده بالغرفه وره العشه واجت بيادر كالت خلدون يريدج باوعت لخاله بأسى مسجونه بين خلدون وابو لبست حجابي وطلعت جان كاعد بالصاله امه كاعده وابو ومروان ومرته وبيادر سلمت علي وكعدت ..

حمديه... يمه هاي بيادر وياهه والمديره دزت على ابوك كالت لاقرايه ولا كتابه عليمن هالخساير تكعد اداري خالتهه احسن

بيادر.. اي خلدون حته اسلاميه شكد سهله متحضر وبالمدرسه كلهه يكولون بنت عمج بيهه جني مخبله تمشي وتسولف

ويه نفسهه

خلدون.. سدي حلكج ... من يكولن هيج متعرفين ترديهن وادافعين عنهه

بيادر...اسألهه شكد اتعارك علمودهه بس هي لؤلؤ مدري شبيهه

ويايه حته متحاجيني

جواد... بويه عليمن متعب روحك بطلتهه وكعدت يم خالتهه وانشوفلهه واحد ونزوجهه ونخلص من مسوؤليتهه

خلدون.. لؤلؤ تريدين ادرسين؟؟مستواج زين مالج علاقه بأهلي

حاجيني الي...

لؤلؤ.. ماباوعتلهم بس باوعتله يدري بيه شكد اخاف منهم ومغلوب على امري هزيت راسي بحركه سريعه خاطفه حته ماانتبهوا عليه بس هو انتبه ...

خلدون.. اكو مدرسة اهليه بعيده علينه بس باجر اخذج واسجلج هناك ووحدج بيادر تظلين بالحكومي

جواد.. لاتكسر كلمتي اني بطلتهه هاهي انتهت

خلدون.. موانت صارف عليهه اني اصرف وماتبطل ومالك حق تمنعهه تريد اخذهه وياي بمكان شغلي ماعندي مانع اخذهه هي وخالتهه وانتو ظلوا هنا وهم اخلصوا من مسوؤليتهه...

حمديه.. ليش نزلت عليك من السما ترى البنيه موصاحيه واني شوف عيني اشوفهه تضحك ويه نفسهه وتسوي حركات يمه هاي ام عامر تريد مره لابنهه خلينه انزوجهه ونخلص ربيتهه انت من عمرهه ٩ سنين لسه كافي شوف حياتك تزوج وهي هم تنستر..

خلدون... الف مره حجيت بهالموضوع ودك بيده على الطبله مالكم علاقه بيهه ولحد يحجي وياهه ماكاعده ابيتكم ولاماكله من خيركم كسلانه على نفسهه تنجح مثل ماوصلن بناتج ...

لؤلؤ.. اشرلي براسه اكوم عفتهم وكمت وهم متعاركين صوتهم عالي لحدما صاح بيهم وطلع ...

خلدون سجينه ونابته بخاصرتي ... رباني هو وصرف عليه ووصلني وهو مسوؤل علينه اني وخالتي بس مااحبه ابد مااحبه ولاذرة مشاعر عندي اتجاهه ...

يروح للشغله بالنجف يظل اسبوع اكثر ومن يرجع عينه ادورني بكل مكان خالتي تحبه حيل تصيحله وليدي مرات اكعد الكه نفسي مغطايه ادري بي هو لان خاله متكدر تكوم بس ابد ماحبيته...

بأقل موقف اتذكر مراره الصار واجر حسرة على ماما الراحت والفضيحه ودمهه لحد هسه بين عيوني وهذيج السجينه البگلبهه ...

طلعت خاله بالكرسي العصر للحديقه تشتم هوه واني رجعت للغرفه مااعرف شصار وشنو؟؟ بس عادي مثل كل مره اسمع واشوف ذاك الشخص البدون ملامح لو الاصوات الغريبه ...

جنت واكفه بنص الغرفه اني ادري بنفسي وين بس بالحقيقه اني دااشوف عالم ثاني اشوف فضاء واسع لونه مومعتم حيل بس مثل من تغرب الشمس واشوف اشخاص طايرين اكو اشكالهم حلوه واكو بشعه ...

اشكالهم حلوه بعيدين عن البشعين بس المسيطر هذوله اليخوفون كمت احجي وياهم بس ماكو صوت بس صوتي اسمعه واني اكلهم انتو منين وشتردون ؟؟ احجي وياهم بس طلعت اني احجي ويه نفسي..

فزيت فزة قويه. على صوت خلدون وهو يكول ويامن تحجين وليش تضحكين ؟؟!!

.

.

.

للحكايه بقيه.....

حبايبي القصه مورعب لتخافون بس تستفادون من عبرهه هوايه وخاصه الامور الدينيه راح تفيدكم بحياتكم اليوميه

نوهت القصه مختلفه واول مره اكتب هيج نوع من القصص وراح تكون مختلفه عن طراز قصصي السابقه حته بالوصف

اتمنالكم قراءه ممتعه ....احبكم

مـــواسـم الــذبـول ....

البــارت الثاني .... للكاتبه روزايه ( زهراء)

خلدون.. ويامن تحجين وليش تضحكين وحدج؟؟

لؤلؤ.. هااا لا وين احجي ..

خلدون.. صار هواي واكف هنا واشوفج وكأنما تحجين ويه شخص لؤلؤ الكلام الجاي اسمعه صحيح؟؟

لؤلؤ... ياكلام؟؟

خلدون.. لاتراوغين بالحجي هواي كالولي عليج تحجي ويه نفسهه وعدهه تصرفات تخوف وهسه شفت بعيني احجيلي

اني موغريب محد يوكفلج غيري

لؤلؤ.. اني هيج طبيعتي اتخايل كلشي

... لااا موهاي طبيعتج ترى اني الربيتج واعرفج نقطه نقطه

لؤلؤ.. سد الباب مال الغرفه واجه كعد على جربايه خاله واني مرتبكه وخايفه مااعرف شحجي خاف يكول مخبله وخاف ميصدك بيه واصلا خلدون بالنسبه الي اشوفه شي جبير واخاف منه..

خلدون.. ماراح تحجين ؟؟ متعود عليج مااخذ اي حجايه منج لوماخالتج تحجيلي لو تموتين ماتحجين

لؤلؤ.. شحجي لاتجي امك وتلكاك هناا وترجع عليه

خلدون.. مخوفتج امي؟؟ شيصير بغيابي شلون تعاملج؟؟ احجي لاتظلين ساكته

لؤلؤ.. عادي مثل معاملتهه ماتتغير

خلدون.. بيج شغله احبهه ماتعرفين اتجذبين وبالذات عليه

ادري بيج مامرتاحه واكو اشياء جاي تصير بس ليش ساكته

يايوم ماوكفتلج وحميتج ليش جاي تسكتين

لؤلؤ.. ظليت ساكته ماعندي اي كلام اله مرات السكوت يجنبنه هوايه مخاطر بس الكتمان يقضي علينه بالتدريج لحد مانصير

مثل الرماد ومايبقالنه اثر ..

كام طلع وهو ماراضي عليه وماراح يحصل اي جواب من عندي

كعدت بمكانه وصافنه هم يجي يوم واخلص من عيشتهم من تحكمهم ؟!! هم اخلص من حب خلدون واصير حره واختار الشخص الي احبه بنفسي مو انجبر علي؟!!

بدت طاقتي تخلص بس بنفس الوقت مااكدر احجي امه حمديه بشعه حيل الاسبوع اليجي بي خلدون مالهه علاقه بيه وماتصيحلي غير بنيتي ومن يروح تشغلني خدامه الهه ولبناتهه وحته لاخواتهه ...

مره من المرات طگ گلبي وحجيتله بعد مااذتني حيل وجانت محذرتني اذا حجيت لخلدون راح اذي خالتي بس ماااتحملت من الكتل من الذله وشلون تهيني على الصغيره والجبيره

من اجه حجيتله..

بيومهه تمنيت اموت الف موته ولا حاجيه تعارك وياهه گلب البيت عليهم والكل خاضع وطائع وساكتين لان البيت بأسمه ويكدر يطردهم واعتذرولي بس الصار اكبر لو معاقبيني الي ولا خالتي..

ابو خلدون محبس بأصبع حمديه مسير شدكول يرد عليهه شبيك لبيك اني جنت صف ثاني متوسط ولا انسه هذا الموقف

حته بعدني مااعرف الصح من الخطأ ولا اعرف تفاصيل جبيره ...

اجه ابو خلدون على خالتي للغرفه وكالي روحي نامي يم البنات

وهو نام يم خاله وهو بالسنه مره يجيهه واله بأمر حمديه

ماجنت اعرف شيصير ثاني يوم الصبح رحت اريد اشوف خاله

هو جان طالع ..

لگيتهه واكعه من الكرسي بالكاع ومن كدما باجيه مثل الطفل لامه نفسهه والدموع جافه على وجناتهه كعدتهه واحاجي بيهه

تشهك بصوت عالي وكأنو طفل ولازمته العبره ..

طلبت مني اخذهه للحمام من تتأزم حالتهه متكدر حته ترفع ايدهه اني اسبحهه وامشطلهه وابدل حالهه من حال طفل عمره سنتين ..

بوقتهه من بجيهه وكلامهه وجان طلبهه الي بكل عبره بأن مااحجي لخلدون اي شي لان ابو يرجع عليهه وماكملت كلامهه من كدما تبجي ومتأذيه من الصار ..

دمعاتهه بين عيوني لو يرضون جسمي رض مااحجي خاف هم يجي عليهه ويأذيهه رغم ماحجتلي بالتفاصيل بس من كبرت كمت افتهم واتحمل لخاطرهه ...

انفتح الباب فزيت مرت مروان حنين كالت خالتج تريدج

طلعت للحديقه دخلت خالتي للغرفه واني صافنه احجي لخلدون لو اظل ساكته ...

صار الليل وهدئت الناس وكل واحد راح لفراشه واني بدت رحلتي من جديد وهالمره اتعس لان احس نفسي مقسومه نصين نص شرير ونص مسالم ..

خاله نايمه بس اني ماخليت ايه وسوره ماقريتهن اقره الاذكار قبل النوم بالسره واعيد بيهن تهدء روحي دقايق وبس يتوقف لساني يرجع الخوف والاصوات الغريبه..

ماحسيت على نفسي غير فاتحه الباب وراكضه لغرفه خلدون

دكيت الباب حيل حته خفت يكعدون وفتحته بدون مايكول تفصلي ويسمحلي جان نايم بس على صوت دكه الباب وفتحته كعد ...

جنت احتمي بي اركض من يريد يكتلني ابو ماعندي ظهر احتمي بي غيره مره ركضت للشارع جان كاعد ويه جماعته وجنت بالابتدائيه وختلت وره ظهره...

كعد على حيله وجر تشيرته من الكاع ولبسه وعينه عليه بخوف سألني شبيج لؤلؤ منو راكض وراج؟؟

لؤلؤ.. اريد احجيلك بس اطلع منا لايشوفونه اهلك

خلدون.. على كيفج هاي كمت بس ليش خايفه خالتج بيهه شي

لؤلؤ.. هزيت راسي بنفي اني بيه شي!!

خلدون.. امشي وياي بالاستقبال ولاتخافين

لؤلؤ.. طلعنه من غرفته للاستقبال مااعرف شلون احجي

بس حجيتهن دفعه وحده كتله اني اشوف اشياء انتو ماتشوفوهه اسمع اصوات محد يسمعهه وحته ريحه اشتم

مرات اخاف منهم ومرات لا بس صار شكم يوم اخاف

اني مو مخبله بس والله اشوف صدكني خلدون

خلدون.. اول شي اني مصدكج وعلى كيفج احجي ولاترجفين

وسولفيلي كلشي شدكولين اني اصدك بس لاتتلفتين وهدي حالج ...

لؤلؤ.. قبل ٤ سنوات او اكثر من جان عمري ١٤ سنه اني اشوف شغلات غريبه ومرات اشوف شخص كامل يباوعلي حته من ادخل للحمام واسمع اصوات تخوف ومرات لا حلوه اصوات قران ...

خلدون.. وتحجين وياهم؟؟

... اي بس محد يجاوبني

خلدون... تحلمين؟؟

... مااحلم لا حقيقه اني اشوفهم واندل مكانهم انت صدكني

والله اشوفهم

خلدون.. مصدكج واني مريتي بصدمه قويه واكو هواي مثلج يصير بيهم هيج لاتخافين اني وياج

اني ادري بيج بس ماادري بتفاصيل توقعت عندج انفصام بسبب الصار بس حسب كلامج الشغله اكبر هسه تهدين

وتغمضين عينج واخذي نفس شهيق زفير ٣ مرات

لؤلؤ... خلدون لتحجي لأحد امك وين متكعد دكول عليه مخبله وحته بيادر بالمدرسه محد تمشي ويايه اني موبيدي الصار

ومااعرف شلون اتخلص منه

خلدون.. انتي ليش ساكته انطيني سبب واحد على سكوتج اعرف مامرتاحه واعرف امي تأذيج بس ليش ماتحجين شفتيني شكم مره وكفتهم عند حدهم ليش تمثلين انتي مرتاحه

ودائما تخليني بشك خاف اظلم اهلي..

لؤلؤ.. ردت اجاوبه واحجي بس تذكرت خاله ووضعهه وهي الضحيه الاولى مااكدر احمي نفسي واوكع خالتي بالضيم

اذا اني مسالمه وفقيره هي ازيد مني بالف مره

رديت علي لا مرات تصير عصبيه وترجع عليه بس مايستوجب احجيلك اني الي اريده منك بس تساعدني اطلع من حالتي

واريد اكمل دراستي

خلدون.. باجر اني اخذج للمدرسة الاهليه اسجلج وبالاول احجزلج عند طبيب خاف شغلتج مرضيه او بسبب الصار لعائلتج ؟!

لؤلؤ.. شكرا

خلدون.. ذبلانه حيل كلما اجي الكاج متغيره للاسوء

... لا مابيه شي

.. لاتراوغين وياي اعرفج زين وادري جاي تتحملين فوك طاقتج واريد اشوف شوكت راح تحجيلي اليصير وراي

لؤلؤ.. كمت من مكاني وكتله تصبح على خير خفت اظل كاعده واحجي الاول والتالي رحت لفراشي خاله بسابع نومه

اخذت نفس لحد ماامتلئ صدري يله زفرته اخذني تفكيري

لخلدون..

بين ذكريات الماضي وايام الحاضر عقلي مرجوحه ياخذني

ويوديني بين السنين الراحت رجعت لليوم الراحت بي ماما

وعافتنه يتامى..

لحدماطلع الاربعين مالتهه احنه ابيت جدو اهل بابا بي عمو الجبير وليد هو وعائلته وصارت الفاتحه هناك لان بيتنه

مسدود للتحقيق وبابا وكل گرايبنه مشتبه بيهم يوميه ياخذون واحد يحققون وياه وماكو نتيجه...

ياقوت الجبيره جانت من صغرهه متكبره ومغروره من كدما حلوه حلگهه وحده محمر وجهه عباره عن خدود ودائري جان اليضوجهه يگرصهه من خدهه دخلت بطور العزله والوحيده البينه محد كدر يطلعهه من الصدمه...

رغم اني اصغر منهه بس جنت اني الي قايمه بواجبهه هي واخويه بعد مارجعنه لبيتنه وانسدت سالفه ماما ومحد عرف منو القاتل بس ياقوت لاتضحك ولا تسولف والاكل مالتهه قليل

اذا اجيت حاجيتهه تضربني الكل كال ياقوت بيهه حاله نفسيه

والناس كامت تستخطيهه ...

بابا كبر عشرين سنه بهذني الشهرين اسمعه بليل يبجي مثل الطفل ومن اجي يمه يسكت يكول راسي يوجعني جان يحب ماما حيل كلما يكولون احجيلنه عن امج اگلهم ماكو مثلهه جانت كامله من كلشي والكمال لله بحيث هوايه ناس تأثرت بوفاتهه ....

٣ اشهر ضبط خاله ايمان متزوجه وحامل جانت تجي علينه يوميه تغسل ملابسنه وتقرينه وتسوي الغده وتروح واذا موخاله ايمان تجي خالتي زمن يعني مسويات تبادل ...

احنه صغار والحزن يتلاشه عدنه شويه شويه ورجعنه لدوامنه بس ظل خاطرنه مكسور ومرسوم بوجهنه اليتم ...

بس ياقوت رفضت الدراسه وكعدت بلبيت شكد حاول وياهه بابا حته يطلعهه من حالتهه واخذهه طبيب ومراجعات بس مافاد ابد كامت تزود حالتهه تضرب اليجيهه ويحاجيهه بس

ماتحجي وبدت تگطع الاكل ...

بهذني ال٣ اشهر بابا ضغط وسكر صار بي وتعب حيل

وهو يشوف بيته شلون انهدم وياقوت صارت كل همه شلون

يعالجهه وترجع طبيعيه بس بالاخير راح هو ومارجعت ياقوت ...

جان يوم حاله من حال الايام البقيه عصريه ويمنه خاله زمن تنتظر بابا يجي يله تروح لان كلهن متزوجات نفس المنطقه

اذن الاذان وبابا واخويه ماكو كال راح اخذه نتسوك للمحل ونجي وجانت طلعتهم الاخيره ...

ننتظره يجي حته نتعشه بس عيونه على الباب ومااجه

من تأخر هوايه ومن عوايده خاله زمن ركضت لبيتهه تخابر

على عمي نص ساعه واجت تركض ومخرمشه خدودهه

وتبجي بسرعه اخذتنه وقفلت البيت وطلعت بينه لبيت عمو وليد

هناك جانن عماتي وصوت بجي وصريخ نفسه قبل ٣ اشهر انعاد

بابا واخويه هالمره اثنينهم راحوا بحادث سياره وميتين ابمكانهم وظلينه لا ام ولا اب ولا حته اخ وحده تباوع بوجه الثانيه ومن ايد لأيد...

فزيت من صوت خاله وهي تكح الليل لو انام منه ساعتين لو ماانام الاحلام ماتعوفني بحالي حالتي النفسيه متأثره موبس قصة اني اشوف غير اشياء النفسيه الهه تأثير واضح عليه

صليت الفجر ونمت كعدتني خاله ايمان وهي تصيح بأسمي لؤلؤه كومي خلدون ينتظرج حته ياخذج يسجلج بالاهلي بعناد بيادر لاتخربهه عليج ...

كمت غسلت ولبست ملابس مدرسه وطلعت همزين كلهه نايمه بس هو كاعد بالمطبخ صبحت علي وطلعنه الطريق كله ساكته

وصلنه للمدرسه سجلني واخذت الجدول ورجعنه ...

بالطريق مد ايده على المسجل فتح اغنيه من جنت صغيره اغني بيهه اتذكر اوكف على التخم وهو كاعد والزم دفتر اسوي مايك واغني...

امي نامت عـ بكير وسكر بي البوابه

وانا هربت من الشباك

واجيت لعند العزابي ...

شباكي بعدو مفتوح والبردايه عم بتلوح

ضحكت واني اسمعهه شكد اغني بيهه ولحد هسه

التفتت علي كتله بعدك تذكرهه؟؟

خلدون.. ليش اني ناسي حته اتذكر هاي تفاصيلج الزغيره

كلهن احبهن

لؤلؤ.. بس هالشي غلط؟؟

خلدون.. شنو الغلط بالموضوع لان احبج اقتنعي لؤلؤ انتي متصيرين لغيري انتي صغيره ومااريد اشغل بالج بس لو اخر يوم بعمري اخذج ومااعوفج

لؤلؤ.. بس هالشي بالغصب انت جاي تجبرني اني احبك كأخ وانت عزيز عليه بس مومال اتزوجك

خلدون... اني مو اخوج بطلي هالكلام شدكولين عني كولي اناني نرجسي المهم انتي الي

لؤلؤ.. انت تعرف ماعندي احد واصلا ماعندي عين بسبب اختي حته احجي واواجه بس حرام عليك اني ماافكر اتزوجك لاتجبرني

خلدون.. لتفكرين هسه بعده العمر طويل كدامج ادرسي واتخرجي ويجوز اني ابطل احبج اتشاقه وياج لاتضوجين

لؤلؤ.. درت وجهي وسد الاغنيه نفس كلامه ماتغير ابد واني يوم عن يوم اكبر وافتهم الحياة صح ويمكن ماكو مهرب من هذا الحب ...

وصلني للبيت وراح كالعاده تلكتني امه حته انظف كملت شغلي

ورحت يم خاله اسولفلهه عن كلتم خلدون وهي تسمعني ومابيدهه شي بس دكول الله يباوع لحالج ...

بديت اداوم بالمدرسه الاهليه خلدون يخليلي مصروفي يم خاله وراح لشغله بالنجف واني بدت رحلتي بغيابه اوامر ورزايل واهانات منا لمن يجي لازم ااتحمل ومن يجي الكل يصير ودود وياي والكل يحبني

تعرفت على بنيه ويايه بالصف اسمه سلسبيل حبابه كعدت بصفهه بس مبينه عائلتهه متمكنه بس وجهه بشوش ومرحه بسرعه رحبت بيه وكمنه اني وياهه نتمشه بالفرصه وتعلمني على نظام المدرسه ...

سألتني عن اهلي ماعرفت شجاوبهه بس كتلهه متوفين ومربيتني خالتي وره يومين اجت كالتلي حجيت لبابا وعرفكم

وكال اختهه موخوش بنيه وامهه انقتلت وابوهه مات وهاي ظلت وحدهه منو يكول خوش بنيه ...

جانت تحجي على نيتهه وكملت كلامهه وكالت اني مدحتله بيج كتله بابا لوتشوفهه شكد حبابه ومؤدبه مالنه علاقه بالحجي مال الناس ...

هي تسولف واني عيني مدمعه ليش ياياقوت هيج سويتي بينه شنو الصار وشنو السبب الخلاج هيج تسوين وليش اني ادفع الثمن وياخذوني بذنبهه...

ظليت طول اليوم ضايجه ومقهوره حته تشرح المدرسه واني مويمهه الموضوع حيل معقدني واتمنيت لو اكدر اتبره منهه واكول ماعندي اخت بس شئت ام ابيت هي اختي ونفس الدم...

خلص الدوام واكو خطوط المدرسه مسويتهن صعدت بالخط متل منطقتنه ووصلني للباب طبيت جوه المطبخ فارغ ام خلدون بغرفتهه وابو بعده ماجاي مروان بالدوام وبيادر وتقي بعدهم ماجايين  بس خاله بالغرفه ...

بدلت وغسلت ورحت للمطبخ بديت اصب غده لخاله سمعت صوت الغرفه مال حمديه انفتح وهي تصيح منو يطكطك بالگدوره ...

من طبت شافتني بيدي الماعون مال التمن هستوني صبيت بي جرته من ايدي حيل انطش بالكاع وهي تصيح مو خدامه ابوج واختج الكح... حته تجين على الحاضر تزقنبين اذا شفتج مديتي ايدج على الاكل اكصهه واخلي ابو خلدون يشحتج بالشوارع ...

ماكدرت احجي الغصه نامت ابلعومي اريد اكلهه موالي لخالتي بس الحسره والعبره ماتنبلع خلتني مااكدر انطق حرف بس دموعي تجري ...

ذبيت الماعون وركضت للغرفه ابجي خاله سمعت الصياح والغلط وتدري اني رحت اصب الهه وظلت تلوم بنفسهه بعد لاتصبين اكل سم اكل مرض اني دمرتج اني لو ماهيج معوقه محد استقوه عليج ...

نمت بفراشي ابجي عرفت من خالتي خلدون رايح ومخلي مصرف النه بس مانكدر نصرف الف لان محد يطلعنه واذا عرفوا هو يخلي فلوس ياخذوهن من عدنه...

حالتي نفسهه نفس الارواح التفتر وراي تعبت ومليت كمت اتقرب لسلسبيل هوايه احسهه اختي وحنونه وتحبني بعد دوامي بشهر حجيتلهه عن حالتي جانت تسمعني وافتهمت من عندي ...

هي امهه صديقتهه مدلله دائما دكول شيصير احجيلهه وتساعدني موماما صديقه الي وابد ماانحرج منهه من سمعت قصتي كالت راح احجي لماما لان امهه مهندسه ومتعينه ومثقفه ...

وره يومين اجتي كالت ماما راح تساعدج دكول اكو كتب عن هالشي خلي تقراهن وتفتهم وضعهه وبيهن ايات قرانيه

واسماء الله انتي اقري الكتب وشوفي حالتج بلكي تستفادين

حسب كلام امهه كايلتلهه هاي من اثر صدمه متعرضتلهه او روح احد عزيز عليهه سامعه هيج قصص بس ماعدهه حل

غير ثاني يوم جابتلي الكتب ..

مافتحتهن ضميتهن بالجنطه ورجعت للبيت وره مانامت خاله فتحت الجنطه طلعتهن كتب اثنين بأسماء غريبه من الاسم يخوفن

سحبت الكتاب الثاني وكمت اگلب بالصفحات وقررت ابدي اقره من اول صفحه بس ماعرفت اثار قراءه الكتاب شنو ومااستشاريت شخص جبير بديت برحله غريبه بدون محد يدري وماجنت اعرف ميصير قراءه هيج كتب بهذا العمر ....

.

.

.

يتبببببع..... احبكم