تحميل رواية «#من يعطيني_الامان» PDF

(يمة ترى الرجال مثل الطفل لازم تراعيه والمرأة الحوك هية الي تكدر تخلي رجلها كلشي يسويلها من تمشي حجايته وبعدين بهدوء تطلب الي تريده ...يمة اذا عصب رجلج لا تلاسنيه اسكتي ومن يهدى تفاهمي وياه ....تريدين تسعدين نفسج بسطي الامور لا توكفين على امور متسوة....حبيبتي الله منطي لكل انسان اربع وعشرين حباية ناس مطيها مال وبنين وزوج صالح وصحة بس بدرجات وناس رافع وحدة من ذني ومزيد عليه بوحدة ثانية..... لذلك يابنتي ابد لا تباعين لغيرج ارضي بلي كتبه الله ...وخافي الله بعيالج لان الدنيا دين ومديون باجر جهالج يراعونج )

هاي كلمات امي بليلة حنتي وابد مانسيتها وطبقتها ست سنوات زواج وجنت فعلا سعيدة بحياتي صح تعب بس المهم راحة البال لحد السنة السادسة ....وين الخطا صار ماعرف كعدت اراجع كل اموري بيمن الصوج هم ماعرف ....خلي احجيلكم وانتو احكموا....

اسمي هبة عمري حاليا ٣٠ سنة خلي اوصف نفسي طولي ١٥٨ عيوني سو د كبار بشرتي سمرة بس فاتح خشمي حلو صغير وشفايفي مرسومة يعني حلوة بس اني مليانة مو رشيقة وزني ٧٥ بس جسمي مرتب عندي اخوان اثنين واحد مزوج وشغله بالمحافظات الثاني مزوج وكاعد ويانا واختين مزوجات محافظات من ولد عمي وباقية اني واختي بالاعدادية..نقبلت كلية ادارة واقتصاد قسم محاسبة وجانت عندي صديقة اسمها غدير كلذ مقربة مني تعرفنا بالاول كلية وبقينا صديقات اطباعنا مختلفة هي مرحة واجتماعيةبس تحب تحجي هواي اني هم زينة اجتماعية بس اميل اسمع اكثر...

بالسنة الثانية للكلية غدير عدها فقر دم حاد فجأة تتخربط يوم جان عدنا امتحانات ومحاظرات نسينا ناكل وبالوحدة تنحجي فجاة وكعت غدير واني تخبلت صارت صفرة كركم كمت ماعرف شسوي عاد ولد كال خلي ناخذها للمستشفى وديناها وحطولها مغذي وكالو خلوها تبات ....من الهبطة والخبصة ماخابرت احد ودك موبايلي شفت الساعة ب٤ وطلعوا اهلي حجيت الصار بابا كال راح ادزلج فراس ياخذج...ذكرت كلت خلي اخابر اهل غدير ..دورت جنطتها ولكيت الموبايل مخليته صامت واكو رقم مكتوب عليه محمد هواي داك عليها واعرف هذا اخوها غدير حاجيتلي عنه ...رجعيت دكيت عليه

هبة....الو السلام عليكم

محمد....وعليكم هذا مو رقم غدير

هبة ....اي اخي اني صديقتها شوية تخربطت وديناها للمستشفى

محمد...مستشفى شوكت هاي ... شلونها هسة

هبة ...خلولها مغذي وبعدها ماكعدت...وب١ تخربطت

محمد.....هسة بالاربعة وين جنتي هسة ذكرتي تخابرين

هبة....نخبصنة ..

هذا شبيه فوكاها...نص ساعة واجوا اهلها امها وابوها واثنين شباب واحد سال....انتي صديقتها

هبة...ايي

محمد....ومكدرتي تخابىينا صار ٣ ساعات

هبة....كتلك نخبصنة وماعرف ارقامكم

محمد...لعد شلون خابرتي هسة

هبة ...فتشت جنطتها وخابرتك من موبايلها مثل ماشفت

محمد...وين جان هذا التفكير قبلها

هبة....انت شبيك ترى مو اني الي خربطتها شكو نازل علي

محمد....ليش ترفعين صوتج

ابو غدير اجى....هاي بابا شبيك وية البنية فوك ماجابتها وماعايفتها...التفت علي....ميخالف بنيتي خاف عليها....

بهاللحظة اجى اخوي فراس وطلعوا عرف لان احنة نفس المنطقة بس مسافة بينا سلموا ناس على ناس وفراس تحمدلهم على سلامة غدير

وطلعنا....بس حس بنفسي كلش رزالته ...والله ياالله فوكها ....صح والله سوي زين وذب بالشط....

يومين بقت غدير ماداوم وخابرتني ثاني يوم

هبة....هالو لج شلون صرتي

غدير....الحمد لله ....تسلمين ماقصرتي وياي

هبة....لا حبي لاتحجين هيج انا هم جان سويتي نفس الشي

غدير...صراحة جان عفتج ونهزمت....

هبة....ههههه ولا تبطلين من سوالفج عموما اني بعد مامشي وياج مابية حيل للهبطات

غدير...حبي باجر يمر عليج محمود اخوي ياخذ المحاضرات

هبة....اوكي

ثاني يوم اجني البنات هبة تعاي اخو غدير يدور عليج بس شنو شلون شاب صاك ....اني اعرف اخوها محمود حلو هي حاجيتلي عنه ورحت اشوفه...

شفت الي جاي محمد درت وجهي اريد ارجع حسيت سرع خطوت

محمد...هبة بس لحظة

هبة...خير رزالة جديدة لان تاخرت ماجبت المحاضرات

محمد...حقج بس اني حبيت اعتذر عن الي صار ...اني شوي عصبب

هبة...شوي

محمد...لا والله هواي وتعرفين غدير صغيرة البيت وظلينا بقلق والنوب اندك على التلفون محد يجاوب والوضع مزين وتخبلنا ...ماجان قصدي اتجاوز ...اسف

هبة....اعتذارك مقبول وهاي المحاضرات

محمد...تعبناج تسلمين

هبة....تعب غدورة راحة

محمد....هههههه هم ميخالف وحقج

مرت الايام غدير كامت متجي بالخط محمد يجيبها ويرجعها وتوسلت اكثر من مرة ارجع وياهم مقبلت

غدير...لج شبيج تشوفي اخوي شلون صاك والبنات يتحارشن بيه وانتي مثل الثولة ولا يمج

هبة....لج انتي غير صديقة زكاكة تمشين على الخطأ

غدير....هذا ياخطأ اريدج جنتنا تصيرين

هبة....اخوج ملعب مو مال زواج

غدير...لا والله كلهن زميلات واني تحس عينه عليج بس فكيها والله اذا احس بيه نيته غير شي مااقبل انتي مو بس صديقة اخت

هبة.....والله تحجين بكيفج هو من يكول باله يمي

غدير....كبر والله لعد شداحجي صار ساعة غير هو حاجاني ويريد يتعرف عليج

هبة...ماعرف خلي افكر....اخذت اسبوع فكرة توديني وفكرة تجيبني

بيوم ماجى الخط صار انفجار وسادين الطريق وهم ماخلوني الا اجي وياهم خابرت فراس كال ارجعي احسن ماترجعين كيات واني بعيد ماكدر امر عليج..

محمد...بعد موافقة الامم المتحدة يلا تقبلين نوصلج.

هبة...اذا راح تبدي تستهزء انزل

غدير...شبيج عوفي ديشاقة

محمد...لا خليها اريد شلون تنزل ...وراسا ساق السيارة

محمد ...مارجعتي خبر

هبة....على شنو

محمد...موحجت وياج غدير

اني كلش خجلت وضجت هم ...

غدير...اعتبروني هوى ماموجودة

محمد...بطلي ام لسان سوالفج...هبة اني نيتي صادقة بس اني مرحلة اخيرة ومن اخلص اتقدملج انتي خوش ابنية وعجبتيني حيل

غدير....انت هم خوش ولد واني ماعندي اعتراض..

دغيت غدير ...غدير ...اي شبيج انتي ماجاوبين كلت خلي احجي بمكانج

وصلني ...وقررت اوافق عليه صراحة اني من البداية عاجبني حيل بس خفت ليكون يلعب..وخلصت السنة محمد جان يجي ويكعد ويانا بس بحظور اخته وكل حجينا عام بس ينطي فكرة كل واحد شنو اهتماماته خلصت الامتحانات وهو تخرج وبدى يدور على تعين وراد رقمي حتى نتواصل

هبة...لا محمد ماتفقنة هيج

محمد...شلون يعني ماعرفتيني بس اكون نفسي والله بس اربد اسمع صوتج...

وانطيته رقمي وظلينا متواصلين بس علاقتنا ضمن حدود كامت شوي شوي تتطور بس ماتجاوز حد الادب وياي واني هم ماسمحله اخاف

تعين وبدت السنة الثالثة لي وبقى هو بين فترة وفترة يجي للكلية يشوفني بس بوجود غدير  ...مرة اجى لكة ولد واكف يمي يحجي وغدير قبل لحظة راحت تجيب كتابها نست بالقاعة...اباوع حسيت عيونه تريد تطلع من مكانها واجى بعصبية...اجى جرني على صفحه

محمد...منو حضرته

هبة....محمد شبيك عيب هيج تصرف كدام الطلاب

محمد...تعلميني العيب علمي نفسج واكفة تتمضحكين وياه وحدكم كدام الكل

هبة...اني ماعرف العيب اشكرك...وعفت ومشيت بس حيل حز بنفسي تصرفه والنوب حجايته جانت اقوى ....بقيت فترة اجنبه ووهو اول يومين هم بس بعدين ظل يدك تلفونات وماجاوب

غدير...هبة يمعودة جاوبي هذا مخبل حلف اذا ماجاوبين باجر يجي للكلية.....لايسوي شي مو تعرفيه يفقد من يصير عصبي

هبة...مشكلته

بالليل هم دك مارديت ....وثاني يوم الصبح رحت للدوام وبالبارك ماشوف الا سيارة طبكت وانجريت للداخل....

هبة....هاي شبيك من العالم

محمد....هس ولا كلمة

ساق سريع وطلع من الجامعة واني تخبلت وخفت كلش

هبة....وين رايح رجعني محمد...ماجاوب لحد ماوصلنا لمطعم ...انزلي

نزلت اتجنب الشر

محمد....ليش مجاوبين

هبة...ماعرف العيب شسوي

محمد....هبة تعرفين اني عصبي اكثر من مرة اكلج وانتي ماتقبلين نكعد سوة وحدنا بينما شفتج وياه وحدكم وتضحكون نجنيت وبعدين غدير شرحت الموقف

هبة...وين الثقة

محمد...اني من افقد اعصابي ماعرف شحجي ...اني راح اجي اتقدم رسمي وافضها مترهم هيج

هبة....محمد انت لسة ماكونت نفسك واني بعدلي سنة عدا هاي وابوي ميقبل خطوبة طويلة يريد خلال شهر تمم كلشي

محمد.....راح احول ارتب اموري منة للعطلة

هبة ...يلا رجعني

رجعنا...شكد ماجنت فرحانة لان ديفكر جدي بموضوعنا شكد ماخايفة ابد ماكال يوم احبج صح يخاف علي ويراعيني ويفكر جد بموضوعنا بس ابد مايكولها وبعدين كلش عصبي وبسهولة يفقد اعصابه ومن يعصب يكوم مايعرف يحجي حتى يجرح بالكلام....

محمد...خلي شوي احجيلكم عن نفسي عمري حاليا ٣٢ سنة مهندس كهرباء طولي ١٨٥ وجسمي متناسق اسمر عيوني عسلي وشكلي مرتب حيل طبعا كل واحد له جماله الخاص بيتنا ٢٥٠ متر والدي اجى ورث كام سوة شقتين فوكه كل شقة غرفة نوم وصالة ومطبخ وله درج خاص بيها باب ينفتح على باقي البيت حتى من نريد ننزل عليهم احنة ٣ اخوان محمود الجبير مزوج بنت خالي وماخذ كل الطابق الارضي لان امي وابوي وياه والثاني احمد هم مزوج بس غريبة وعنده ولد وماخذ الشقة المقابيلي واني اصغرواحد وعندي بس اخوات اثنين وحدة مزوج ابن خالي يصير اخو سمر مرت محمود وابزر الكعدة غدير ....

شفتو الموقف الي صار وية هبة باول لقاء اني نعجبت بيها حيل وتعبتني يلا قبلت بية بس هي حيل تخاف من اي علاقة واني مالومها لان هواي شباب غايتهم اللعب مو زواج .....بس اني حبيتها صح ماكول لها لان عندي الحب فعل مو بس حجي واني اكولكم ليش ....من جان عمري ١٨ سنة حبيت بنت خالي اصغر بسنة مني وجانت الكلمات ماتخلص بينا كلها حب وعشق بس اول ماجاها نصيب زين تخلت عني وازوجت لذلك صار مبدا عندي هاشي ...

محمد اتفق وية اهله النيشان عليهم وتجهيز الشقة عليه وسوة سلفة وبدة يجهز يروح للسوك يصور الاثاث ويجيب الصور اختار خلص الشقة بقت بس الغرفة كال اني وياج نختارها بهالوكت خلصت ثالث وصلنا لنص السنة بالرابع ....

محمد...هبة كافي كاعد كملت اموري راح اتقدم  كملي الرابع يمي

هبة...بكيفك

وتقدم واهلي سالوا عليه وفراس يعرفه سابقا وتمت الامور وعقدنا لحد يوم المهر لبست بدلة بصلي قصيرة لحد الركبة ومن ورة مثلث لنص الظهر ومثلث لحد الصدر من كدام وحذاء اسود عالي  وخليت مكياج خفيف مطوخت بس شعري اسود طويل خصلت عليه ورفعته بس خصل تنزل صغيرة...اجو اهله ودخلوا هو بقى يم الزلم

غدير...وج هاي شنو شطالعة الله يساعد اخوي

هبة ....غدورة خايفة لا يكوم يحجي....بعدها تريد تحجي كالو راح يطب العريس....شنو طالع حبيبي لابس غاط نيلي وقميص اوف وايت ورباط مقلم ظليت اباوع وهو اول مادخل عينه دور علي من شافتي عينه فتحه حيل كعد يمي وراسا شاورني

محمد....شطالعة اليوم لو ادري هيج جان من زمان خطبتج

من ديلبسني دنكت حتى يسد الكلادة وشاف ظهري

محمد...وج ذبحتيني هاي شنو ماكو بدلة استر...

ظليت بس مبتسمة استحي اجاوب الناس تباوع من خلص الذهب دنك وباسني من جتفي وجه كام ينطي الوان وغدير تصفر وكلهم يصفكون ويصيحون عيدها....عيدها

محمد...اعيدها شاورني....وجرني باسني من خدي

خلصت الحفلة ويده مانزلت عن ظهري وابهامه يحرك خفيف على طول ظهري خبلني كلشي مافتهمت من الحفلة ....كال راح اوصل اهلي وانتي لبسي صاية على البدلة

هبة....ليش وين نروح

محمد...استرخصت من عمي نروح للشقة اشوفيها

هبة....عيب غير مرة

خزرني وكال اليوم...ساعة واجى اخذني بس دخلنا من الباب الخارجي للشقة...اول مدخلنا كال انزعي الصاية ولزم ايدي

محمد....تعاي شوفي بيتنا بقت بس الغرفة شوفي مثل مارتيه

فررني بالشقة وهو لازم ايدي

محمد....حلوة

هبة...حلوة مدام انت وياي

محمد..اوووف هذا الحجي الحلو....جرني ولزم وجهي بين ايديه..ظل يباوع بعيوني ماعرف شكد بقينا واحد يباوع للاخر فجأة نزلت شفايفه على شفايفي ورحتا بغير عالم حاوط خصري بيده والثاني لازم راسي من ورة لحد مانكطع نفسنا باعد وجه يباوعلي اني رجلي بعد ماتشيلني جلبت بقميصه ورجع يبوس ويحظن فجأة حسيت تغير وطورت المسالة خفت ....

هبة...محمد عفية

محمد...شبيج هباوي شمسويلج

هبة...حمادة صرت تخوف عفية

محمد....جان صوته كلش تعبان ونفسه سريع ...لاتخافين ماسوي شي..

هبة....بس محمد لا عفية مو هيج....وللحكاية تكملة

دفعته هو حس على نفسه كعد وهو حيل تعبان واني بديت اعدل بنفسي ولبست صايتي واباوع عليه نقهرت وضجت بنفس الوقت

هبة....حقه بابا من ميقبل على خطوبة طويلة اثاري ماتكعدون راحة...كلتها بشقة بس مالكت صدى عنده

محمد ...امشي اوصلج تاخرنا....وصلني وسلم وراح وخابرني بالليل

محمد...هبة ماكدر اعتذر عن الي صار لان انتي مرتي واني صارلي سنتين ونص الوب عليج بس اعتذر ان جاوزت شوي

هبة ....شوي

محمد...لا تجلبين بالحجاية نهاية الاسبوع الجاي نروح نشتري الغرفة حتى تتفرغين لامتحاناتج وبالعطلة نزوج ...اشترينا الغرفة وامي راحت ويانا وبعدها التهيت بالامتحانات وهو كمل النواقص بس نتخابر بالليل مانطول لان عندي قراية وراها جانت ركضة حتى اكمل اموري والخميس الزواج ..سويت حنة  لبست بدلة ماروني ساك وشعري بقيت مفتوح بس الفيت الاطراف ومكياج من اجى تخبل كل شوي يدنك يكولي نروح للشقة كتله مابقى شي واجي يمك

العرس جان بسيط لان على كد امكانيته زفة للشقة ماقبلت روح للفندق ومن وصلنا لكينا اهله مسوين ميز اشكال الاكل

محمد....نورتي بيتج يااحلى عروسة

هبة....حبيبي منور بيك

محمد....بدلي وامسحي المكياج حتى نصلي

غسلت وبدلت سيت ابيض وهو هم غسل وبدل لبست جادر صلاة وصليت براه كال تعاي نتعشى ...اني ماماكلة من الصبح وهسة حتى الجوع راح رغم اتمنى العشى يستمر جان الخوف كاتلني هو يباوع علي ويبتسم اخر شي طكها ضحكة واني صافنة هذا شبيه

هبة..ضحكنة وياك

محمد...وكفني ويده على خصري حبي لا تخافين هي وراج وراج خلي نخلصها لان احسج راح تتخربطين من الخوف  ... محمد جان كلش حباب  وتمت على خير تاذيت شوي بس عادي

داومت ومحمد هواي يساعدني من ارجع من الكلية احمي الاكل ونرتاح واكعد العصر اسوي غدة ثاني يوم وعشى مرات يجب جاهز كال حتى تلحكين تقرين واهله ننزل يوميا بعد العشى يمهم سمر مرت محمود لسانه يخبل بالحجي بس مارتاح لها احسها لئيمة بس ريم مرت احمد ماتختلط هواي بس حبابة ...مرت الايام محمد متطلب من الناحية الزوجية بداية زواجنا هو ينام على صفحته واني اخلي راسي بظهره يلا انام جان يضوج بعدين تعود كام ماينام اذا مو محشوكة بيه....

خلصت الرابع وتخرجت وكدر يسويلي عقد بشركة تابعة لهم وتعينت مر على زواجنا سنة ونص

محمد...حياتي هسة لازم نفكر بالاطفال تعينتي يعني تكدرين تاخذين امومة عوفي المانع

هبة...اني هم فكرت هيج

وبعد سنة صار عدنا طه جبت طبيعي امي كالت لمحمد خلي تجي يمنا وافق يومين والثالث اجاني

محمد...حبي يلا ترجعين

هبة....محمد خلي تطلع السبعة على الاقل

محمد...وج ياسبعة مانايم صار يومين

هبة ....ليش ياروحي

محمد...ظهري للهوى ماكو واحد محشوك بيه .

هبة...هههه بس منو يداريني وماعرف شي للطفل

محمد...اني اساعدج وامي ونسوان اخوتي موجودين اذا تحتاجين شي

رجعت وياه للبيت اول شهر ماقصر ساعدني هواي ومنة بدت المشاكل جان مايعذر اكو طفل يريد مثل بداية زواجنا كون متفرغة كامل له وحيل متطلب لازم ليلة مكياج ولبس ...وهم ماقصرت لان جنت امومة ماعندي دوام....بس خلال هاي الفترة زادت علاقتي بعيالي وبديت اشوف الوجه الثاني لسمر بالوجه مراية وبراج طلع عيوب العالم بيج وعيالي حيل يسمعون لها خوب من تجي ام علي اخته الجبيرة يبوه يتكابلن وهنا وحدة ماخذة اخو الثانية اني مادزت وياهم بالصداقة بس انزل عشى لعمي ولعمتي بس سمر دائما تصعد لي وتحاول تسحب حجي عن علاقتي بمحمد شلونها

داومت وبديت حيل اتعب من طفل وبيت ورجاله ابد ميعذر المهم نفسه صارت مشاكل بس جنت اسكت من يصير عصبي ومن يهدى يتغير اسلوبه يعتذر بصورة غير مباشرة مثل يطلعنا او يجيب عشى من برة او يجيبلي هدية لان من يعصب يخيط ويخربط بالحجي واني تعودت

عموما حياتنا مستقرة وحلوها اكثر من مرها ونفس الحب بينا ونفس الاشتياق منه من يجيني ...مرت ست سنوات على زواجنا وقررنا نسوي طفل ثاني لان طه صار عمره ٣.٥ بس صارت لي مشاكل صحية وبديت اراجع دكتورة نسائية وبعدتني عنه ١٠ ايام بعد اربع ايام اشو هذا كام يلوب ويتحجج وبديت لاحظ هواي ينفرد بالموبايل ويسولف بعد ايام رجع طبيعي وياي بس احس اكو تغير ...المرة تعرف رجلها زين بقينا شهرين على هالحال اريد اوصل للعلة ماكو شنو الصاير ...

مرة بالليل حسيت ماكو هو لان تعودت وجهي بظهره كمت اشوف وينه لكيته كاعد بالمطبخ يسولف بالتلفون كله حبيات عمره ماحجاها وياي ...

بقيت صافنة شسوي بنفس اللحظة اندار شافني بقى يباوع علي منحرج...

هبة....ليش محمد فهمني

محمد...كعدي هبة اني احجيلج

وحجالي على بنت خاله وشكد جان يحبه واني نار شبت بصدري بس احجي بهدوء ماعرف مين جبته

هبة ....وهسة شنو جنت تحجي وية وحدة مزوجة

محمد...لا صار ٦ اشهر من طلكت

هبة.....والقصد من الحجي اطلع من حياتك حتى اخلي لكم الجو لو شنو

محمد....هبة شتدحجين انتي زوجتي وام ابني وحبيبتي

هبة...حبيبتك اصلا صار ٩ سنوات اعرف ماسمعت كلمة احبج منك وسار ساعة كل كلمات الحب كلته لها

محمد....ليش زوجتج اذا ماحبج

هبة...انت كول ايست منها لان زوجت وكلت تشوف حياتك وهسة تريد تستعيد حبك

محمد....هبة انتو حياتي وبعدين نتفاهم

يمكن تكولون ليش هالبرود عندي لا مو برود صار ٦ سنوات دربت نفسي ماتعصب لان هو عصبي واخذ الامور بروية بس اني داغلي بداخلي بدي اكسر كلشي كدامي اهزه اكول الي كدامك انسانة وانت تتجرح بيها الي كدامك استحملت كل عصبيتك وكل حالاتك النفسية وحافظت على بيتها لان تحبك

رحنا دنام واول مرة انام على طارف الجرباية ودموعي تجري شوي وجرني لحظنه بس ماكدرت بعدت نفسي

ثاني يوم رحت الدوام واثنينة ماحجينة بالدائرة ماكدرت كلشي اشتغل خابرت على غدير كتله راح اجيج اخذت ابني من الحضانة واجرت تاكسي ورحت لبيت غدير طبعا غدير تعينت وياي بنفس الدائرة وزوجت ولد ويانا وهسة امومة هاي ثاني طفل لها ...

غدير ...هباوي شبيج قلقتيني ...ليش تبجين

هبة حجيت لغدير كلشي وكتلها احجيلي الصدك شنو الموضوع ليش مكلتيلي

غدير....شكد حقيرات ..حبي جان حب مراهقة وراح شمدريني راح تطلك

هبة ....ياحب مراهقة صار ١٢ وباقي لسة يحبها

غدير....هباوي انت عاقلة وصبرت هواي وياه وتحملتي كل عصبيته الي احنة ماتحملناها بس خلي احجيلج لا تنطين مجال يهدمون بيتج

هبة....منو ذولة

غدير....خلي افهمج لان حاولت وياهم بس الظاهر هن نون خلاص..تعرفين البنية اسمها سحر تصير اخت سمر وحماتها لاختي ام علي سمر خبيثة بس من جوة لجوة وانت اكتشفتي هالشي وسحر بعد اتعس بس وكحة وتلاسن وابو علي جبير اخوته من طلكت اجت كعدت عنده وخبلتها لاختي  رادت بس تزوجها حتى نخلص وسمر استغلت هالفرصة حتى تمشي اختها واتفقنا بينهن على محمد

هبة....واني شنو ذبني شسويت لهن حتى يهدمن بيتي واختج ماتخاف على اخوها

غدير...هن ماهلكد يرغبن لج لان ماتغشبين وياهن وبعدين اختي تكولك مامسوية شي اخوية وازوجه ..صح تكولين احجي على اختي بس لان من عاشرت بيت خالي تغيرت  صارت تحب بس مصلحتها وتريد تستفاد شكد متكدر من اهلي وحتى وياي ياما سوتلي مشاكل

هبة.طلعت من بيت غدير دايخة شسوي ذني كيدهن قوي وادري اني ماكدر شسوي اذا هو سمع الحجي ....اووووف يارب ساعدني

ماغيرت شي من تعاملي وياه بالعكس زدت بالاهتمام وكل ليلة تبديل ومكياج وهو يجيني بواهس الاول ماتغير بس كلبي مامرتاح جيات ام علي كثرت

وهو مو مثل قبل يخابر بس شمدريني يجوز بالشغل يخابرها لحد ما فديوم

محمد....هبة نيمي طه عندي حجي وياج

هبة...هاحبي كول

محمد بخصوص موضوع سحر.

طبعا جنت بداخلي متحمسة اكول بلكت الله راح يعتذر ويكول غلطة

وينهي الموضوع

محمد....هبة اني اريد اتقدم لها

صار صمت ماعرف شنو اجاوب  ولا اكدر اوصف شعوري شايفين من تنضرب بسيارة اول رد فعل يكوم مابي شي من الصدمة وبعدين تبدي الالام اني بلحظتها كنت مصدومة مامستوعبة  الي حجاه

محمد....شو ساكتة

هبة...شنو المفروض اكول

محمد...انطيني رأيج

هبة....يعني اذا كتلك ماقبل تبطل

محمد...لا لان انطيت كلمة

هبة ...يعني جاي مجرد تبلغني....وكفت ...سوي اللي يريحك بس ورقتي توصلني لبيت اهلي..مشيت لزمني من ايدي

محمد...شنو تهدديني

جريت ايدي...لا بس انت اخذت قرارك واني هم اخذت قراري

محمد...طلاك ماكو تحلمين

هبة....ماجاوبت اكو شي بداخلي يريد يصرخ وحسيت اختنكت عفت ومشيت...

محمد ماجاوبت ولا كالت ليش تسوي هيج جان رد فعلها غريب خوفني بس تأملت تتاقلم بمرور الوقت هبة مابيها اي قصور واحبها  طول فترة زواجي ارتاحيت وياها بس سحر حلم عمري جان مستحيل يتحقق هسة بيدي تحقيقه ...

ثاني يوم جان جمعة كعدت اصلا مانمت سويت ريوك هو تريك وكال اليوم راح نخطب ماجاوبته بدل وتكشخ وطلع من نزل على الدرج سمعت هلاهل سمر ...ريم اجت تركض طبعا مرت احمد صرنا صديقات لان من جابت بنتها الثانية اني داريتها حيل وشافت طبعي ماادخل هواي حتى احمد علاقتي بيه كلش زينة

ريم....هبة شنو هالحجي صدك وافقتي على الخطوبة

هبة....باوعت لها بنظرة بس مانزلت دمعة من عيني

ريم....والله هذا مخبل عوف هيج وحدة ذهب

هبة...احمد راح وياهم

ريم...لا مقبل

هبة ...اريد يوصلني لاهلي

لميت ملابسي واني اباوع بالبيت على قطعة  واذكر

احمد...ام طه ليش ماتنظرين يجي وتحجين وياه

هبة....مايفيد الحجي هو ماخذ قرار وانت تعرفه...اذا تخاف يزعل منك اخابر فراس اخوي يجي ماريد اسببلك احراج

احمد...على بختج انت اختي ومواقفج ماتنسي

نزل الجنط واخذت ابني طول الطريق احمد يحجي واني بغير عالم ماعرف شنو يكول...من وصلت طلع فراس شاف الجنط تفاحا سلم على احمد وجلب بيه على الغدة ماقبل

اتلكوني اهلي ....هاي شنو شكو ....اني عمري ما بتت خارج بيتي بس بولادة طه ...حجيت لهم فراس تخبل وراد يتعارك

امي....على شنو يمة تتعارك هم الناس تلومك

فراس...شنو تلومني ليش بيش مقصرة خلي يكول

امي....يمة هذا الحجي من يجي احجيه

اني جنت تعبانة وماريد اسمع شي بالموضوع كتلهم اريد انام صعدت بغرفة سما اختي وبقيت طه يمها اخذت منوم ...جنت اريد اهرب من الواقع بلكت يطلع كابوس واكعد منه

محمد رجعت من الخطوبة جنت فرحان بس ضجت من سمر خبصتنا بالهلاهل كتله كافي خفت هبة تسمع وتضوج...صعدت ماكو صوت لطه والبيت صنطة معقولة نايمين مو عوايدها دخلتي تصير للصالة رحت للمطبخ ماكو رجعت لغرفة نوم هم ماكو دكيت على هبة ماجاوبت ظليت ادك ماتجاوب رحت لشقة احمد

محمد....احمد اسال ريم هبة ماكالت وين رايحة

احمد....اني وصلتها لبيت اهلها

محمد...ماكالت رايحة شعجب

احمد....ترى ام طه اخذت جنط وياها

محمد....شنو قصدك وانت شلون توديها بدون علمي....صعدت فتحت الكناتير لكيتها ماخذة ملابسها وملابس طه رجعت تعاركت وية احمد شلون يوصلها بدون مايخابر علي وصارت هوسة

سمر....يمة شلون نسوان تطلع ماتكول امنت الرجال الصبح وابراه فلتت وظلت ذب حجي اشكال واني منة شايط ادك ماتجاوبني ركبت سيارتي ورحت لبيت اهلها ....

فراس  جان وجه ثكيل وعمي كذلك

محمد...عمي اريد مرتي وابني

فراس....ليش انت فكرت بيهم من رحت تخطب

محمد...اني كتلها وبعدين مسالة تخصنا

فراس سار عصبي وكامو يصايحون...ابوي صاح بيهم

ابو فراس....عيب انتو جهال ...ابني  اني اسمع من بنتي الحجي واشوف شنو رايها يلا اتفاهم وياك

محمد...يعني شنو

ابو فراس...يعني ماعندك مرة يمنا لحد ماهي تقرر شتريد

محمد...عمي...ا

ابوفراس...كتلك المفيد ابو طه

طلعت  واني موجر ماحسبت هيج حساب والنوب ادك ماترفع التلفون من رجعت للبيت لكيت ام علي جاية

ام علي...ليش ضايج وعصبي هسة تهدى وترجعلك يجوز تبقة تتعزز بس من تشوفك ازوجت بعد مابيها مجال تستلم للامر الواقع

ظلن هي وسمر يقنعن بيه واني الي عمري مامشي بس برايي سمعت لهن او قنعت نفسي بحجيهن...صعدت لشقتي ظليت افتر بيها ويومياالعب وية طه هيج وكت ماتحملت رحت يم اصدقائي ورجعت بالليل حتى عشى اكلت برة اجيت انام ماكدر تعلمت راسها بظهري وصوت طه يوميا يسوي عرس يلا اينام...ماكدرت اطول يومين ورجعت خابرت عمي لان هي ابد ماترفع تلفون علي كال تعال نتفاهم ...طرت من الفرح بلكت تقتنع ترجع احس روحي تايه بلاها وبلا ابني....

رحت وكلي لهفة بلكت تقتنع ترجع يجوز تصورون عندي ازدواجية بس الرجال من يزوج ثانية مو معناها مايحب زوجته الاولى لا ....اني احب هبة واحب حياتي وياها ومامستعد اتنازل عنها بس هم احب سحر واتمنى ازوجها ....ليش ماتتقبلون هالشي راح اعدل بينهم ...

وصلت وتلكوني وضيفوني بس احس مو مثل كل مرة ....عيوني ظلت على الباب تراقب بلكت اشوفها اجاني طه ظليت ابوس بيه واشمه

ابو فراس...عمي الله بالخير عليك...احنة مانكدر نكلك لا تزوج بس من حقنا نشوف وضع بتنا شلون راح يصير راح اصيح هبة وخلي يصير الحجي كدامها...

دخلت واريد اكوم اتلكاها بحظني ....السلام عليكم

محمد....وعليكم السلام  شلونج  ام طه

هبة...الحمد لله

ابو فراس..ابني بنتي قصرت وياك بشي

محمد....لا عمي ابد

ابو فراس..شنو سبب زواجك

محمد....عمي اني من حقي ازوج اذا مراح اقصر على بيتي ...وهبة تبقى بيتها محد يدنة لها...زوجتي الجديد تكعد وية اهلي جوة ...واي شي تربده هبة جاهز

ابو فراس...بابا الرأي رأيج مانكدر نجبىرج على شي

هبة...الخيار له

محمد....يعني شنو

هبة...يعني تعوفها ارجع ...تكمل زواجك طلكني

محمد....يرضيك هالحجي عمي

ابو فراس...والله يابى اني هم مايرضيني تزوج على بنتي بدون سببب

محمد.التفت على هبة ...استهدي برحمانج اني شاريج ارجعي لبيتج ولاتهدمي بلحظة عصبية

هبة....جان استهديت انت ومابعتنا

محمد...كومي هبة خلي نرجع لببتنا اني انطيت كلمة للناس لا تسويه شغلة عناد

هبة....اني كلت العندي

محمد.... وطه مافكرتي بيه

هبة ....ليش انت لعد مافكرت بيه

محمد....اذا تريدين الطلاك ...انطيني ابني...كلتها الويت ذراع ادري ببها متعلقة ومامكن تعوفه...سو هاي كامت وطلعت من الصالة ورجعت ايد بيها تكود طه وايد شايلة جنطة

هبة....تفضل ماعندك بعد شي يمي

محمد...روحي طلعت وبدي اكوم اسحلها بالكاع ....هيج بعتي العشرة حتى ابنج تعوفيه

هبة....ههههه.ضحكتني على اساس شلون اشتريت العشرة انت

محمد اخذت ابني  طلعت ...من وصلت لاهلي خليت يم امي طه وصعدت لشقتي واني مختنك....

هبة....بعد مكعدت بقيت افكر شسوي كلت محاولة اخيرة وياه بلكت يىجع لعقله ويبطل وخابرتني غدير فهمتني سمر وام علي مسهلات كلشي له حتى سمركايلة له افرغ غرفة الجهال لكم وازوج بيها وهي ماعدها طلبات ...من اجى اكذب ماحنيتله بس لازم اقوي كلبي  وخيرته وللاسف ماقبل سجينة ودخلها بكلبي ....من راد طه انطيتياه لان ادري راح يرجعه منو يداريه سمر هي جهالها ماحاملتهم لو امه لو العروس الجديدة وفعلا ثاني يوم جابه كال طك بجي يريد امه....

ظل شهر يدز ناس يقنعون ابوي على رجعتي  وسط زوجات اصدقاءه المقربين بس  بنفس الوكت اعرف مستمر  بزواجه وعقد حتى بدون مااحضر لان ابن عمه محامي كدر يسويها له

فراس راد يدخل اني ماقبلت ومن حسيت اهلي لانو  ويريدوني ارجع كتلهم اذا ضايجين من كعدتي يمكم اني اجر وابوي زعل من حجايتي ...يوم خابرتني غدير...هلو هباوي

هبة...هلو حبي

غدير....راح اكولج شي بس عفية لا تزعلين علي وتنقهرين

هبة..شكو لج خوفتيني..

هبة ...احجي غدير ماكو شي بعد يزعل

غدير....اليوم حنة محمد وباجر زفة بسيطة والخانم تريد يعوضها عن الحفلة سفرة للشمال

هبة   ...سجينة بلكبي حطت ....الله يسعده كلت لها

مر على يومين بس الله يعلم بحالي لحد اليوم واني متأملة يتراجع واحلم يجي يعتذر ونرجع هذا حب حياتي فتحت عيني عليه ليش هيج يكسرني احجي وية نفسي لا فوكها يدز رسايل يكول لا تنسين البينا رجعي لبيتج الي سوينا سوة ههههه يضحكني هو منو الي نسى صار الليل وروحي تلوب اليوم زفته

مهنى يالعريس وشايف خير

اوووف ياتعبي وياك ضاع وهدمت حيلي

شنوالي سويت وياك وهيج تجازيني

تحرك كلبي عليك وتريد تواسيني

نار شابة بصدري وروحي محروكة ماينوصف احساسي اختنكت وحسيت ماكو هوى طلعت بالحديقة حسيت كلبي من كد مايدك راح يوكف ظليت اسحب نفس بس احس الهوى مايوصل الصدري نحطت ايد على جتفي نداريت لكيت فراس

هبة...ليش هيج ماقصرت وياه

فراس...مايستاهل تأذين نفسج

حسيت حتى جواب ماكدر كمت افرفح مثل الطير المذبوح واشر على صدري ضاق نفسي شفت فراس كام يصيح على ياس زوجته وسما اختي اجوى ركض وبعد مادري شصار صحيت لكيت نفسي باامستشفى وبالعناية لان صاير عندي خفقان قوي بقيت يومين وطلعوني ....

اني من عفت بيتي جنت شاكة حامل  فحصت طلعت حامل ٣ اشهر كملت فوك راسي غدير اجت خلال هاي الفترة وظلت خطية متواصلة وياي ورادت تكول لمحمد على المستشفى وام علي وسمر مانعيها كايلين لها اول وتالي ميكدر يسوي شي وهو يومين وراجع

مرت ٦ ايام على زواجه اني صحتي بعدها الدكتور كال لازم ارتاح وبقوني بفراشي قليل اتحرك لان راسا يصير خفقان عندي

يوم نايمة بفراشي واحس واحد يتلمس وجهي فتحت عيوني شفت محمد رجعت غمضت عبالي احلم

محمد....شلونج حبيبة

رجعت فتحت عيني وظليت اباوع عليه شكد مشتاقة شكد مقهورة منه كسرني....دنك علي وباسني وخله وجه بركبتي

محمد....شكد مشتاق لريحتج ولحضنج

هبة....مبروك عريس

محمد....اشش لا تقهرين نفسج

هبة...خايف علي

محمد...طبعا حبيبتي ومرتي وام جهالي ...وخله ايده على بطني

هبة....ليش محمد ليش قصرت وياك ليش تكسرني....اني مو حبيتك هي حبيبتك عمرك مكلت لي احبج وسمعت اشكال حجي تكول لها ...ليش  شنو سويتلك ......ماوكفت وياك ...ما ساعدتك .....عليت صوتي عليك خالفتك يوم..ليش حرام عليك ...اني نهاريت اصيح وابجي قهر شهرين طلعته حرك كلبي كلها طلعتها وهو يحاول يسكتني

محمد....على كيفج حبي مو زين عليج لا اني ولا غيري ننفعج اذا صار بيج شي ....والله احبج ...اصلا روحي فرفحت من سمعت انتي داخلة مستشفى ولو اعرف جان اجيتج ...اهدي وهسة نحجي ونوضح الامور

هبة ....خلص انتهى كلشي بعد ماكو داعي للحج

محمد...شنو قصدج...

هبة....طلكني

محمد...اولا انتي حامل يعني ميجوز ثانيا فكري باجهالنا

هبة....هو بس طه والثاني علمه بالغيب ومو اول وحدة اطلك وعندي جهال

محمد...باعي اياج تفكرين تسوين شي بالطفل...وطلاك ماكو افتهمتي لو لا

عافني وطلع ....واني ظليت ابجي شكو دموع حابسته طلعن هسة

محمد ...دزيت هواي ناس وسطت حتى اصدقاء وهبة ظلت مصممة على رأيها ومتقبل ترجع حتى اهلها لانو وهي لا وصارت شغلة عناد واهلي ظلو يضغطون علي بقى امل عندي تستسلم للامر الواقع وترجع وزوجت ورحت للشمال صح تونست ومرتاح وسحر مريحتني بس يوم الي رجعت وغدير كالت هبة مدخليها مستشفى حسيت روحي راحت وبوجهي طلعت على بيت اهلها لو عرف اتعارك لازم اشوفها وفرحت من عرفت حامل صار سنة نريد نسوي اخ لطه ومن شفتها حبيبي شلون ضعفانة وجعني كلبي عليها وقهرتني من عاتبتني بس تحلم اطلك لا اول ولا اخر رجال يزوج على مرته.....مر اسبوع اني اتفقد اخبارها من غدير لان هي ماجاوب من ادك تلفون عليها لحد يوم ندك الباب....

محمد صاحولي جاي تبليغ من المحكمة هبة رافع قضية طلاك روحي طفرت واعصابي فارت ...رحت لابن عمي محامي كال مايجوز طلاك لان حامل وتكدر تطعن انت باالطلب بس المشكلة هي طالبة خلع انت اعكس واطلبها لببت الطاعة ....فكرت بالموضوع كلت لا مااكبر الموضوع خلي بلكت نتفاهم ....بس للاسف جانت قافلة

هبة بعد ماطلع محمد كلت خلاص هاي عبرة لي لازم اكون قوية صح نار بكلبي بس قابل ابقى انوح وابجي كلت لاهلي على رفع قضية.... اهلي رفضو واني اصريت كتلهم ماخذتوا حقي خلوني اطلعه منه واتفقت وية المحامي واخذت  الاجراءات مسارها اول جلسة ماحضر محمد

كم يوم بعدها ورجع اجاني تبليغ طالبني لبيت الطاعة عيوني صارن براسي فوك الي سواه والله الا اشلع كلبك بسيطة محمد

محمد صار شهرين على زواجي .... اني وهبة بين بالمحاكم ونشغلت والبيت اشتغل النكرة بين سحر وسمر مو عبالك خوات على الشغل والجهال وطبعا سحر متكعد لل١١ وسمر متعلمة على تكمل شغل من الصبح....هسة اشتغلو موال جديد خلي سحر تصعد بشقتنا ....اني مطنش لان لازم مكان ملاىم للزوجة بالقضية وبعدين هاي تعب هبة ميصير عالجاهز يجي غيرها ياخذه....

سحر....محمد يعني شلون اني موهم زوجتك وهذا تعبك

محمد.....اني اتفقت وياج وكتلج انتظري لان احمد راح يطلع ونزوج بشقتهم مقبلتي هسة مابقى شي يكمل احمد واصعدي بالشقة مالتهم

سحر....زين خل اصعد موقت مو طكت روحي من الجهال

محمد....تعرفين حجايتي وحدة لا تظلين تناقشين والجهال جهال اختج

سحر....عباله اخلي يرجعها احجي وية نفسي والله اذا ماخاليتك طلك اني علمها تشوف منو تبقى اني لو هي

هبة رحت للمحامي كال لازم تنفيذ لان ينشزج وتبقين سنتين مايحق لج التصرف وهواي امور مترتبة  فراس اخوي راح تعارك وياه

محمد....انت  المفروض تعقل اختك مو تشجعها تهدم ببتها

فراس...انت بديت بهدم البيوت

محمد...ماسويت شي يغضب ربي الزواج حلال ومن حقي  مامن حق احد يدخل

ماوصلوا لنتيجة هو مصر واني مصرة اخر شي اجى مبلغ لازم انفذ الحكم واهلي ظلوا يلحون نفذي وعلى كيفج سوي الي تربديه بعدين

مابيدي شي بس قررت املله لحد ماهو يطلك ..

اجى اخذني اني بهالوكت صرت بشهر السادس صعدت بالسيارة بدون اي حجاية لحد ماوصلنا صعدت لشقتي من الباب الخارجي ميعجبني اشوف واحد بيهم احسهم كلهم مشتركين وياه

من دخلنا لكيت البيت نظيف

محمد...نورتي بيتج...ريم اجت نظفت البيت كالت خطية حامل متكدر تنظفه

اني ماجاوبت اصلا هو دخل الجنط للغرفة

محمد...راح اجيب غدة لا تطبخين اليوم

هبة...قبل لا تطلع خلي نتفاهم

محمد....كولي

هبة ....ماريد احد يدخل علي وغرفة النوم لو لي لو لك

محمد....يعني قابل اطرد اهلي اذا جوي

هبة....تعرف لمن اقصد

محمد...مالج علاقة بيها ولا هي

هبة ...الحجي يشمل سمر هم

محمد....براحتج...بس مال غرفة النوم هي وحدة بالشقة  هاي اولا ثانيا انتي زوجتي وشيلي من بالج غير شي

هبة...خلص رجعني

محمد....هبة بلا خبال هسة ارتاحي وهاي الامور بتدريج ناخذها

كلت ماضغط عليها خليها براحتها المهم رجعت للبيت ..حسيت هسة ارتاح كلبي بشوفتها واحب شكلها من تصير حامل احس هاي شي ملكي الي جنت بطه من يتحرك تجي تخلي يدي على بطنها تكول شوف شلون يدفر ابنك هسة نفسي احس بهالشي حتى ماعىرف بشنو حامل

مرت الايام والحجي على كد الجواب والسؤال شكد حاول وياي مافاد ويوم الي اجى يتقربلي تعاركنا وكتله روح لها مو زوجت شتريد مني بعد وهو صار عصبي كال صبرت لج هواي ولوما حامل جانت شوفتج شلون تمنعيني....هذا كله اني مشايفة سحر عمي وعمتي وريم وحمويني وغدير يصعدون يمي بس سحر وسمر وام علي لا

مرة اندك الباب فتحته

من فتحت الباب لكيت كدامي وحدة سبحان الخالق عين خضرة مرسومة وملاحم نازكة وبيضة طويلة بس برشاقة ....عرفتها حقه يتعلق بهيج جمال ...النوب النار زادت ماقلت....

سحر ....السلام عليكم

هبة.....وعليكم السلام

سحر....انت اكيد هبة ..اني سحر

هبة....اهلا بيج

سحر...ممكن نحجي...دخلت للصالة كبل وكعدت

هبة....عن شنو

سحر ...ماكو قاسم مشترك بس محمد

هبة ....والمطلوب

سحر....انتي موتريدين يطلكج اني اخليه يطلك بس ساعديني

هبة ..بقيت صافنة شنو هالصلافة معقولة اكو هيج بشر بداخلي احجي ....اعتقد هذا موضوع بيني وببن محمد مالج دخل ببه

سحر.....لا شلون مالي دخل اني اريد استقر وطول ما محمد مشتت بينا ماراح نكدر نرتاح

هبة....ليش هو من الي دخل على الثاني وهدم حياته

سحر ...كامت ...حبيبتي اني ماضربته على يده هو ركض وراي وعموما انتي مالج مكان بعد هنا فاحسن انسحبي بهدوء...عافتني وطلعت واني افور مودي املخها

دخلت بالتاسع يعني اصار اكثر من شهرين ونص من رجعت .....علاقتي نفس ماهي وية محمد اليوم الي يجي يبات اطلع ابات بالصالة وشكد تعارك وياي اخر شي كال راح ابقيج على راحتج لحد الولادة بعدها الي غير تصرف...سحر بعد ماشفتها لان طلعتي وطبتي من الباب الخارجي ريم واحمد طلعوا بيتهم الجديد وصعدت سحر بشقتهم ....

يوم حسبت الالام كلش قوية ادك على محمد مايجاوب اخر شي حسيت اريد اموت والجوة طالعين عدهم مناسبة عرس

دكيت على فراس اجى يركض نقلوني للمستشفى جان عندي ولادة وتعسرت حيل شفت الموت اخر شي دخلوني عملية وجبت بنتي  سرى ووهو ماكو

محمد...من رجعت هبة للبيت لحد الان ماتقبل اوصل لها مع ذلك يومها ابقى يمها حتى لو تنام بالصالة حيل مشتاق احضنها مشتاق اشم عطرها

سحر صعدتها لشقة احمد بس تبهذلت تريد احدث اثاث كمت اشتغل عصريات حتى اكدر اوفر  طبع سحر يختلف عن هبة مو قنوعة وتريد كلشي يعجبه وماتعذر

فد يوم جنة معزوين بعرس ابن خالتي  وهبة ماجت ويانا ابتعدت عن كل اقاربي ومن خلص العرس ورجعنا صعدت اطمن ما لكيتهم ردت اخابر اذكرت تلفوني بقيته عد سحر من وزعنا الاكل وبعد ماخذته رجعت لها دكيت على هبة ردت مرت اخوها كالت بالمستشفى عدها ولادة ...من وصلت فراس تعارك وياي كال شلون تعوف مرتك وهي عدها ولادة كتله ليش ماخابرت ...ومن طلعت الدكتورة كالت وضعها جان خطر لان هي المفروض ولادة طبيعية بس الرحم متقلص حيل وزين ماميت الطفل برحمها

طبيت شفت بنتي تخبل احب البنات وفرحت حيل بيها

محمد...حمد لله على سلامتج ام طه وبستها من راسها بس ماجاوبتني

رجعت لبيت اهلها وجنت اروح اودي لها الاغراض بس متقبل تحجي وياي

محمد...هبة شنو الموضوع ...هو المفروض اني ازعل تخابرين اخوج وماتخابريني ليش هي مو بنتي

هبة....شنو ماخابرك دكيت ١٠ مرات ...سحبت الموبايل وشفوفته المكالمات الصادرة

محمد....صفنت فتهمت سحر ماسحتهن...من رجعت

محمد....سحر بعيطة ...اجت تركض

سحر...خير شكو

محمد.....بالعرس من جنة هبة داكة علي

سحر..لا مادكت عليك

جريتها من شعرها...لاتكذبين اني شفت المكالمات

سحر...اني شمدريني يجوز جان تلفونك صامت

محمد....منو ماسحهن

سحر....ماعرف والله...اخ شعري هدني

هدني وظل يغلط علي ويتوعد بس اني اعلمها احجي وية نفسي

محمد...طلعت للشغل العصر واني ضايج تبهذلت مارتاحيت بين هاي وهاي شلون شسوي من خلصت رجعت للبيت بس صعدت لشقة هبة غسلت واجيت انام خابرت سحر

انت وين ماتجي تتعشى

محمد...لا ماريد زقنبوت ولا دكين اريد انام ....مر شهر وكلت كافي لازم تىجع هبة وجنت ناوي اجيبها اليوم وصيت سمر تجيبلي وحدة تنظف الشقة وطلعات للشغل من رجعت دابدل واسمع رجة موبايل بس وين ظليت ادور ورجة متسكت وترد تنعاد كانما شخص يتصل وينكطع ويرجع يتصل ...تالي لكيته محشور بالفراش مال الجرباية وبين الكوميدي من جهة نومة هبة....

فتحته واباوع بيه وجانت الصدمة