تحميل رواية «مغامرات عائلية» PDF

بارت 36

( بارت طويل )

غادة بقهر : دي انيسة الخبيثة

دينا : هيا يا غادة ؟!

غادة بحقد : اه

دينا بغضب : و ازاي تيجي البيت بكل بجاحة بعد الي عملته

زياد بتوتر : احم احم .. هقوم اسلم عليهم

دينا بحدة : اترزع هنا يالا .. و ديني لو عملت حركة كدة و لا كدة لانفخك قدام الكل

زياد باحراج : عيب يا دينا دي مش الاصول

حلا : ما شاء الله فاهم بالاصول اوي يا زبالة الاجانب

زياد : انتو هتبتدو تهزقوني من دلوقتي ؟!

قامت كارما متحمسة لاستقبال خالتها ... و اتجهت لها و حضنتها بقوة ثم حضنت ابنة خالتها

توجه الضيوف الى المجلس و سحر ترحب بهم .. وقف جميع الشباب لاستقبالهم عدا دينا و غادة .. تجولت عيون ناصر في المكان و كانت نظراته مركزة على البنات بشكل خاص .. كان توأم مطابق لأخيه نادر فلا احد يستطيع تميزهم الا عندما يدقق النظر الى الوشم الصغير في رقبة ناصر

اوس بهمس : اطلعي فوق يحبيبتي

حبيبة باستغراب : ليه

اوس و هو يجز على اسنانه : بعدين هقولك .. اطلعي انتي و دلوقتي البنات هتحصلك

حبيبة : اوك

غادرت المكان بهدوء و ذهبت باتجاه اوضتها

زمزم بابتسامة : ازيك يا زياد

زياد : الحمدلله

زمزم : ايه مش هتترمي بحضن خالتك يا واد ؟

زياد ببرود : كبرنا على الحركات دي يا خالتي

مد يده لغادة التي استجابت له و امسكتها

زياد : اه صحيح يمكن حضرتك مش عارفة ان انا و غادة كتبنا الكتاب

زمزم بغيظ :فريدة قالتلي .. الف مبروك

اتجهت انيسة الى غادة و حضنتها باندفاع

انيسة : الف مبروك يا حببتي .. اتمنى ننسى الي فات و نبقى صحاب .. احنا خلاص بقينا قرايب مش معقول يعني نقطع بعض كدة .. اصفيلي يا غادة لو سمحتي

غادة بحقد : اممم انا مفيش اصفى من قلبي يا انيسة

انسية و هي تمد يدها لزياد : ازيك يا زياد

زياد بتوتر : الحمدلله .. اسف ما بسلمش

انيسة باحراج : اه اوك انا اسفة

صافح مجدي اوس بحرارة و قال : ازيك يا استاذ اوس

اوس : اهلا مجدي بيه .. ازاي حضرتك

مجدي : بخير الحمدلله

عدنان : بس بلاش القاب يا جماعة احنا اهل

جلس مجدي و قال بغرور : ازاي شغلك يا اوس؟ سمعت انك هتفتح فرع لشركتك هنا

اوس : امم .. الشغل ماشي كويس و ان شاء الله هنقل فرع الادارة و استقر هنا

مجدي : ليه بس ؟ الشغل بانجلترا مريح و الناس هناك عندها خبرة و تطور اكتر من هنا

عدنان : اصله هيتجوز هنا يا مجدي

مجدي : اه بنت عمه مش كدة ؟

عدنان : تقريبا .. بنت حسين ابن عمي

مجدي باستخفاف واضح : ما توقعتش يعني اوس الي قضى عمره ببلاد برا و بقا رجل اعمال قد الدنيا يرجع يتجوز من العيلة

عدنان : الحب يا مجدي اقوى من كل حاجة

اوس و هو يجز على اسنانه : مجدي بيه اتفضل اشرب القهوة قبل ما تبرد

كتم فارس ضحكته و قال : انت مش ناوي تتجوز يا نادر ؟ دن انت بقالك سنتين خاطب

نادر برزانة : لسا بدري .. بالمناسبة الف مبروك سمعت انك خطبت

فارس : ربنا يبارك فيك يا اسطا .. اوعدك هتجوز قبلك

نادر : ليه هو سباق ؟! الجواز مش بالسهولة دي يا فارس

فارس بخبث : ليه عندك مشكلة و انا مش عارف ؟

نادر بحدة : فارس

فارس : اهو سكت خلاص

ناصر و هو يتكىء بارتخاء : ايه اخبار شغلك يا زياد .. لسا بتشتغل عند اوس ؟

اوس بحدة : بيشتغل معايا مش عندي يا ناصر

ناصر : ما تفرقش طالما بياخد اوامره منك

زياد بغرور : و ده شرف بالنسبالي .. اوس اخويا و صاحبي و انا الكسبان لما اشتغل معاه

ناصر : بس جاتلك فرصة من اربع سنين تدير شركة لوحدك و انت رفضت

زياد بحدة : اشتغل مع عيلتي اولى

ناصر و هو ينظر لغادة : امم .. ازيك يا غادة

نظرت له بذهول و لم ترد

زياد بخفوت : اطلعي لاوضتك

غادة بحدة : مش هطلع و اسيبك مع الجربوعة دي

زياد بغيرة : غادة لو سمحتي ما تخلينيش افقد اعصابي .. اطلعي و انتي ساكته

غادة بعناد : مش طالعة غير لما تيجي معايا

زياد بنفخ : طب امشي خلصيني

زمزم : على فين يا زياد انا لسا ما شبعتش منك

زياد بملل : معلش يا خالتي انا تعبت اوي النهاردة و هطلع انام

سحر : عيب يا زياد .. دول لسا واصلين

زياد بابتسامة صفرا : معلش هما مش غرب .. عن اذنكم

حلا بهمس : شكلها ليلة سودا

دينا : و ديني ما هسكت لحد لو فكرو يدايقونا

زمزم : مين البنات دول يا سحر ؟

سحر بابتسامة : دي حلا خطيبة فارس و تبقى بنت حسين برضو .. و الي جنبها دي دينا بنت خولة

زمزم : اه دينا سمعت عنها قبل كدة .. مش دي صاحبة زياد ؟

انيسة : ايوة .. كنت على طول بشوفك معاه

دينا : اممم اصل احنا اخوات اوي يعني

ناصر و هو ينظر لدينا : بس اتغيرتي اوي عن زمان .. كبرتي و بقيتي احلى بكتير

دينا برفعة حاجب : و انت ليه بتحشر نفسك بكلام الستات ؟ رامي ودنك معانا ليه ؟

فارس بضحك : رد عليها يا عم

ناصر : محنا كلنا قاعدين مع بعض و بنتكلم عادي

حلا بهمس : انا مش مرتاحة للراجل ده

دينا : باين من شكله .. في حد بيرسم تاتو على رقبته كدة ؟! الاسلام بريء منه

حلا : انتي مش شايفة ازاي بيبص و بفصفص البنات من فوق لتحت

دينا : امشي نطلع انا مش مرتاحة

نادر بجدية : اوس انت ليه رفضت تصاميم الشركة الالمانية ؟

اوس ببرود : ما عجبونيش

نادر : بس الشركة دي ليها تاريخ عريق و عندهم مصممين كبار و اصحاب خبرة

اوس : مش مهم طالما مش عارفين يطلعو بحاجة جديدة .. كل تصاميمهم الي قدموها كانت كلاسيكية و مفيهاش ابداع و عملناها السنة الي فاتت .. الناس زهقت منها

نادر : بس هما كلموني و طلبو مني احاول اقنعك يعني لو تديهم فرصة يعملو شوية تعديلات

اوس : مفيش وقت كوليكشن الشتا هينزل بعد كام يوم مش فاضيين ليهم

نادر : اممم .. قولتلهم كدة بس هما فضلو يزنو عليا

فارس بضحك : يعني سبتو كل الدنيا و جايين تتكلمو على الجزم و احنا قاعدين ؟

نادر : الجزم دي اغلى منك انت شخصيا .. الناس بتدفع فيها دم قلبها

مصطفى : ثانية وحدة ! .. احنا عمالين نقول مدير مدير و بالاخر تطلع بتاع جزم يا اوس ؟

اوس : ايوة عشان لما تطول لسانك احدفهم بوشك

فارس : دي الجزمة الواحدة تيجي قد ثروتك كلها يا مصطفى

دلف عبد الله و رحب بالضيوف ثم توجه الجميع الى طاولة العشاء عدا اوس الذي ذهب للاعلى

************************

في اوضة البنات

حلا بغضب : و ليه سمعتي كلامه ها ؟ معندكيش شخصية مثلا ؟ انتي مش حاجة تكسف عشان اول ما يشوف ضيوف يطردك

حبيبة : حلا اخرسي .. و انا ايه الي يقعدني مكان فيه رجالة ما اعرفهمش .. راجل و بيغير على مراته انتي ايه الي حشرك ؟!

حلا : انتي بجد غلبانة .. دي بيستعر منك يا عبيطة .. و حتى لما جم يتكلمو عليكي اوس قفل الموضوع بسرعة

دينا بنفاذ صبر : سيبو الهيصة الي احنا فيها دي و ركزو مع تصرفات اوس بقا .. ما تتلمي يا حلا الراجل بيغير على مراته و انتي شوفتي الزفت الي تحت كان بيبصلنا ازاي .. ده عاكسني السافل

حبيبة : يعني اوس كان عنده حق

حلا : خليكي كدة زي العبيطة و هو بيمسح بكرامتك الارض عشان يخلاله الجو مع الصفرا الي تحت

حبيبة بحدة : حلا اخرسي اوس مستحيل يبص لوحدة غيري

دينا : و هي تيجي ايه البت الزبالة دي جنب حبيبة و جمالها .. ده كل بنات العيلة احلى منها بنت الكلب

حلا : طب تفتكرو هتعرف تعمل مشكلة بين غادة و زياد ؟!

دينا باندفاع : هيا تجرب و انا اوريها ... احنا لازم نتحد يا بنات و نجيب البت غادة و نهديها شوية .. دي كلت زياد بعنيها

حلا : انا مقهرنيش غير لما البت دي حضنت غادة و حاولت تبان الملاك ابو جناحات .. دي وحدة مش سهلة و لازم نطفشها

حبيبة : يا بنات اهدو شوية .. كدة هتزعلو فريدة و كارما دي مهما كانت بنت خالتهم

دلفت لارا باندفاع و قالت : انتو هتسكتو للولية الي تحت دي ؟!

دينا باستغراب : و انتي مالك محموقة كدة ليه ؟

لارا بغيظ : انا مش بطيق البنت دي و لو جربت تزعل غادة هقطعها

حلا : جدعة يا بت .. احنا كلنا معاكي و هنعمل مجزرة لو فكرت بس تبخ سمها

لارا : انا هنزل و اخلي عيني عليها و لو عملت حاجة هبقى اجيلكم

دينا : شاطرة .. انا لازم اروح احضر لحفلة بكرا .. فريدة هتبقى مشغولة معاهم و البيت هيبوظ

حبيبة : انا هاجي اساعدك .. الدريسات وصلت النهاردة الصبح بس لسا ما شوفتهاش كويس

دينا : معلش امشي احنا نجهز الاوضة

حلا : ما نعملها على البلكونة احسن .. الجو حلو بكرا

حبيبة : مينفعش يا حلا البيت فيه رجالة و فريدة هتقلع الطرحة

حلا : هففف هنتخنق بالاوضة ... دي حفلة توديع عزوبية يعني لازم تكون روشة و اجواء كباريهات

حبيبة : لا دي قلة ادب رسمي .. اتلمي يا حلا

في اوضة غادة

زياد : ايه الجنان ده يا غادة ؟ منا ما عبرتهاش اهو .. ليه عاملة الحوار ده ؟

غادة بضيق : انت ازاي تسمح لفريدة تعزمهم بعد الي عملته بنتهم ؟ معملتوش اي اعتبار لمشاعري ؟ البنت دي عملت معايا حاجة مستحيل تتنسي و حتى لو اعتذرت مش هسامحها

زياد بهدوء : غادة حببتي اسمعيني شوية .. فريدة يتيمة و ده فرحها .. كل الي حضرو كانو من اهل ابوها الي هما اهل العريس برضو ...و هيا عايزة حد من قرايب امها يحضر عشان تحس بقيمتها .. خالتي الوحيدة الي فضلت من ريحة امي يا غادة .. و انا ما نسيتش الي عملوه و لا هسامح بس عشان خاطر اختي بستحمل .. لو سمحتي يحببتي ما تعمليش مشكلة من ولا حاجة .. و الله العظيم لو حد دايقك ما هسكت و هطردهم بنفسي

غادة بهدوء : طالما كدة ماشي .. بس ما تزعلش من الي هعمله لو دايقتني

زياد بابتسامة : مش هزعل .. انتي يحقلك تعملي كل حاجة

ابتسمت بخجل و حضنته بقوة

زياد باستمتاع : ياااااه قد ايه كنت مستني الحضن ده يا غادة ... حتى بعد ما كتبنا الكتاب معرفتش ازنقك زي كل الشباب

غادة بضحكة : عشان خايب

توجهت حبيبة للبلكونة الخلفية وجدت اوس يقف و يتحدث بالهاتف

حضنته من الخلف فابتسم و اغلق الخط ثم استدار لها

اوس : ده انتي بقيتي شقية يا بت

حبيبة : ما تقولش بت

اوس : ماشي يا حبيبة قلبي

حبيبة بعبوس : ليه مشيتني لما كنا قاعدين تحت ؟

اوس بحدة : المكان كان في رجالة .. انا مستغرب اصلا ازاي بابا سمحلهم يقعدو مع الستات

حبيبة بدلع : يعني بتغير عليا ؟

اوس بهيام : اكيد طبعا مش حببتي و مراتي

حبيبة بخجل : طب كلمت زياد و فهمته ما يقعدش معاهم ؟

اوس : مع الرجالة ؟!

حبيبة : لا .. قصدي بنت خالته

اوس : هو فاهم لوحده .. غادة علمت عليه و مش هيكررها تاني

حبيبة : طلعت قوية بنت الايه .. انا مش مرتاحة للبت انيسة الخبيثة دي

اوس بضحك : و كمان عاملالها اسم ... هيا فعلا بنت لعبية و مش سهلة

حبيبة بشك : و انت تعرف عنها الحاجات دي منين ؟

اوس : ابوس ايدك ما تعمليش حوار .. انا ما اعرفهاش غير من كلام زياد عليها .. ما تركزيش معاها ..دي عملت ليكم رعب من ساعة ما وصلت

حبيبة بغيظ : هه .. دي واحدة تافهة اصلا و مش فارقة عندنا .. بس احنا خايفين على غادة عشان اتدايقت منها

************************

في الطابق السفلي

لارا بخفوت : دول اولاد خالتك ؟

كارما : ايوة ناصر و نادر

لارا : ما اهم حلوين ليه ما علقتي واحد منهم

كارما : انتي هبلة يا بت ؟ دول زي اخواتي و نادر خاطب و هيتجوز قريب .. و ناصر ده صايع و قليل الادب

لارا باعجاب : بس حلو .. زي الجانب .. عامل تاتو و حطط بيرسينغ بودنه .. و السلسة للي لابسها تحفة

كارما : و ده حلو بالنسبالك ؟ شكله يقرف الكلب .. بصي على صباعه الصغير

لارا باستغراب : ماله ؟

كارما بقرف : مربي الضفر بتاعه

لارا : و مالو عادي .. كل الشباب بيعملو كدة

كارما : كل الشباب ؟ محدش بيعمل كدة غير الصيع يا لارا ... بس اقول ايه منتي بتريلي على اي راجل و خلاص

لارا بغيظ : اخرسي يا كارما

اتت انسية و جلست وسطهن

انيسة : بتتكلمو بايه ؟

لارا : انتي انيسة الخبيثة بقا

انسية بضحك : يخربيت لسانك الطويل ده انتي مش هتتغيري يا بت

لارا : بت لما تبتك

كارما : بس بقا يا لارا

انسية : فين البنات ؟ ليه مش سهرانين معانا ؟

لارا : نايمين .. اصل مفيش ضيوف بيطبو علينا بالوقت ده

كارما : لارا اتلمي .. انيسة انتو مش ضيوف البيت بيتكم

انيسة : اممم .. ايه اخبار زياد و غادة ؟ لسا بيتخانقو على طول ؟

لارا : لا يحببتي زياد بيموت في غادة و شايلها على كفوف الراحة

انيسة : امم .. طيب و البت الي شوفتها مع اوس دي مراته مش كدة ؟

كارما : ايوة فرحهم الاسبوع الجاي

انيسة : البنت حلوة .. ذوق اوس دايما حلو مش زي بعض ناس

لارا بغيظ : احنا كلنا عيلة زوقها حلو كدة .. و مهما لفو و دورو مش هيلاقو احسن من بنات البيت ده

انيسة : هه و انتي مطلعلكيش نصيب و لا ايه ؟ اصل محدش اختارك يعني

لارا : طبيعي عشان لسا صغيرة يا حببتي .. الا انتي بقا عندك كام سنة ؟! ليه ما تتجوزي ؟

انيسة : مش عايزة اتجوز دلوقتي .. انا لسا صغيرة برضو .. هطلع اسلم على فريدة و انام .. اصل تعبت بالطريق

لارا بتمتمة : غوري يكش تولعي و نرتاح منك

*****************************

في اليوم التالي

فريدة بحماس : الفستان كدة مضبوط يا انيسة ؟!

انسية : اممم .. بس ليه ما لبستي بينك زي الكل

فريدة : و ازاي هيبان اني عروسة يا انيسة

انيسة : منتي هتلبسي الطرحة التل و هيبان عليكي

فريدة : مش ملفت اوي يعني

انيسة : عادي دي حفلة بنات مش فرح يا فريدة

فريدة : حيرتني يا بت انتي .. يعني البس بينك زيكم ؟

دلفت حبيبة و قالت بانبهار : الفستان حلو اوي يا فريدة

فريدة : انيسة بتقولي البس واحد بينك

حبيبة بضيق : ايه الهبل ده .. انتي العروسة لازم تكوني مختلفة

انيسة : بس البينك احلى من الابيض

حبيبة : مفيش احلى من الابيض للعروسة .. لما تتجوزي انتي تبقى تلبسي بينك .. اوعي تغيري يا فريدة البنات على وصول

فريدة بضيق : حاسة اني اتلخبطت .. قولولي بجد الفستان حلو ؟

حبيبة : حلو اوي يا فريدة ما ترديش على حد و تتسرعي .. البنات وصلو امشي نروح نستقبلهم

في اوضة البنات التي جهزتها دينا للحفل

غادة : انا صورت كل حاجة .. يلا يا فريدة

امسكت فريدة مقص و التمت البنات حولها .. كان المكان مزين بالاضواء و الستائر الوردية و في المنتصف طاولة كبيرة تحتوي على قالب جاتوه كبير باللون الوردي و حوله الكثير من اصناف الحلويات و المسليات

قطعت فريدة الحبل الذي يفصلها عن الطاولة .. و كانت كل فتاة تمسك بشمعة و تغني مع صوت الاغاني

اقتربت من الطاولة و تناولت سكينا كبيرا و قطعت الجاتوه

حلا : انا هاخد اول واحدة

فريدة بضحك : يا بت ارحمي معدتك شوية

حبيبة : حلا انتي وزعي الحلو .. امشي يا فريدة نرقص

فريدة بحماس : يلا يا بنات

بدأت البنات بالرقص وسط ابتهاج الجميع و حلا استلمت توزيع الحلويات على الحضور

بعد وقت

غادة : يلا يا بنات فضو الساحة عشان دلوقتي فقرة اللعب

انيسة : لعب ايه هو احنا عيال ؟ ايه الهبل ده

فريدة : اقعدي انتي بس و هتفهمي

وزعت غادة مجموعة من الظروف على البنات

غادة : دلوقتي كل وحدة معاها ظرف فيه بطاقة و فيها سؤال عن فريدة .. الناس القربية منها بجد هما الي هيعرفو يجاوبو عليه .. و الي هتجاوب صح ليها هدية

فريدة بحماس : ابتدي انتي يا سارة

سارة : السؤال هو ايه اكتر اكلة بتحبها فريدة .. الملوخية

فريدة بسعادة : صح يا احلى بيست فريند بالدنيا .. هاتي بوسة

قبلتها على خدها و اعطتها كيس

غادة : انا سؤالي بيقول ايه اكتر لون بتحبه فريدة .. الاخضر

فريدة : صح يا قمر

اتجهت لها و قبلتها ثم اعطتها هدية

حبيبة : سؤالي بيقول ايه اكتر حاجة بتزعل فريدة ... اكيد الاهمال و قلة المسؤولية

فريدة بضحك : انتي مش لازم تتسألي اصلا منتي بتعرفي عني كل حاجة .. هاتي بوسة

حبيبة : لا انا الي هبوسك

قبلتها على خدها و حضنتها بقوة

حلا وهي تأكل : ايه اكتر حاجة بتكرها فريدة

فريدة بضحك : رخامتك

حلا : لا يا شاطرة انتي بتكرهي الفوضى

فريدة : ايه ده طلعتي بتعرفي عني حاجات اهو

حلا : انتي مفضوحة اصلا من غير ما اعرفك

انيسة : السؤال بيقول ايه نوع الموسيقى الي بتحبه فريدة

حلا بخبث : ها قولي

انيسة : الاوبرا

فريدة بصدمة : اوه ماي جاد .. انا من امته بسمع اوبرا يا انيسة ؟ انتي شايفاني عجوزة ؟

فرح صديقة فريدة : فريدة بتحب الراب مش الاوبرا

انيسة : ايوة قصدي على الغنى السريع ده الي ما يتفهمش منه حاجة

حبيبة بضحك : ايه الي جاب ده لده يا انيسة ؟!

حلا : فعلا ده حاجة و ده حاجة تانية ... هو لسا في حد بيسمع اوبرا ؟

كارما : ده للناس الكبار اصلا

دينا : انا مش بغني اوبرا الا لما صباعي الصغير يخبط بطرف الطربيزة

انيسة : فريدة انا عارفة بتحبي ايه بس ما اعرفش اسم الحاجة بالزبط .. يعني استاهل هدية

فريدة بضحك : طب امسكي هديتك اهي

دينا بخفوت : اللعبة دي فيها احراج يا بنات .. افرضي يا فريدة حد معرفش الاجابة و اتكسف وسطنا .. انا بقول عيب

فريدة : لا مش عيب .. دول صحابي و لازم يبقو عارفيني كويس

***********************

في الحديقة الخلفية التي اقيمت فيها حفلة الشباب و حضرها اصدقاء تميم

فارس : على فكرة في الحفلات دي لازم نجيب نسوان

نادر : انت مش هتبطل سفالة ؟ احترم مشاعر خطيبتك على الاقل

فارس : في ايييه ؟ هو انت قفشتني مع واحدة ... انا بقترح مش اكتر

زياد : فارس اتلم ... انا اول مرة اسمع ان عندنا بيعملو حفلات للشباب طول عمرها للبنات بس

فارس : ليه هما البنات على راسهم ريشة يعني ؟

زياد : طب ايه المفروض يتعمل بالحفلة دي غير الاكل و الرغي ؟

فارس : عادة الحفلات دي في امريكا الناس بتجيب رقاصة و كام مزة كدة يطرو الجو .. ده غير بقى الوي..سكي و النب..يذ و الخمو..ر بكافة انواعها

اوس بحدة : و انت عرفت الكلام ده منين يالا ؟

فارس : اكيد يعني ما روحتش للاماكن النجسة دي ... بس عرفت من صحابي الاجانب

ناصر : على فكرة عنده حق حفلات الاجانب كلها كدة .. و بيكون في ليلة خاصة للعريس عشان يذاكر الي هيعمله ليلة الدخلة

زياد بغضب : دي سفالة و قلة ادب .. ده زنا

فارس : على اساس هما مسلمين يعني ؟! ما دي ثقافتهم

زياد : و انتو جايين تطبقو التخلف ده عندنا في الصعيد مش كدة ؟ انتو عايزين جدو يضربنا بالنار ؟! ده تقليد اعمى

فارس : على فكرة ده كان مجرد وجهة نظر مش اكتر

اوس : فارس اتلم و بطل سخافة .. لا دينهم دينا و لا عادتهم عادتنا .. اتلهو بالجو ده

فارس : يا جماعة بهزر اقسم بالله ما تعملوهاش درس دين دلوقتي

اتى تميم و قال باستغراب : انتو قاعدين كدة ليه ما تيجو

اوس بحدة : نيجي فين ما تزبط كدة انت الاخر

تميم بضحك : انت فهمت ايه يا متخلف .. قصدي تعالو حضرو اللحمة عشان نشويها .. يزن اتفحت بالشغل مع الشباب

اوس : طب غيرو المهرجانات الزبالة دي و حطو موسيقى هادية

زياد : ده فرح يا اوس مش عزا ... انا هروح احضر الشيش طاووق و انت يا فارس اعمل الكفتة

فارس : ده انا هاكلها نية من الجوع .. امشو يا شباب

عند البنات

فريدة : ريحة اللحمة تفتح النفس يا بنات

حبيبة : دول الشباب عاملين باربكيو و بيحتفلو تحت

حلا بجوع : قولتلكم هتبقى سهرتهم احلى ما سمعوش مني .. انا هنزل اطب عليهم

دينا بحدة : تنزلي فين انتي اتهطلتي يا بت ؟! في رجالة تحت و باباكي هيطين عيشتك

حلا : اومال افضل اتحسر كدة ؟؟ ريحة اللحمة خرمت مناخيري هموووت و اكل

حبيبة : كلمي فارس يجيبلك طبق

حلا : طبققق ؟!!! انا عايزة طربيزة عاملة و هنسفها بدقيقتين

دينا : ما ترحمي معدك شوية يا طفسة .. ده انتي من شوية سفحتي قالب جاتوه كامل لوحدك

حلا : اعمل ايه ؟! الحلو بيجوع

دينا : يا سلااام ؟!

غادة : يا بنات انا هكلم فارس و زياد و اقولهم يعملو حسابنا ... الريحة فعلا ما تتقاومش

حبيبة : ما احنا طلبنا بيتزا يا بنات و اونكل عدنان هيستلمها خلاص

حلا : و مالو ناكل الاتنين

انيسة : مش معقول في حد بياكل الكميات دي و ما بيتخنش ؟!

حلا : اه عادي

غادة بغيظ : صلي ع النبي لتتحسدي يا حلا .. العين فلقت الحجر

حلا باستغراب : كارما .. فين لارا ؟!

كارما : معرفش .. كانت هنا من شوية و خرجت تتكلم بالموبايل

غادة : ليه بتسألي يا حلا ؟

حلا : مش عارفة قلبي واكلني عليها .. تكونش بنتي و انا مش عارفة

غادة : ده انتي بقيتي طيبة خالص يا بت

حلا : طب هروح اشوفها و اطمن

اتجهت حلا للبحث عن لارا

**********************

في اوضة لارا

ناصر : كنت متأكد انك هتكلميني .. حلوة صورتك الي على الانستقرام دي

لارا بتوتر : انت ليه جيت الاوضة بتاعتي ؟ دلوقتي حد يشوفنا و يعملنا فضيحة

ناصر : فضيحة ايه ؟ محدش فاضي يا لولو .. كلهم ملهين بالحفلة

لارا : مهما كان عيب نتقابل باوضتي .. انت عايز مني ايه ؟

ناصر : انتي الي عايزة مش انا .. انتي الي عملتي فولو الاول

لارا : و الله ؟ و اي وحدة تعملك فولو تبقى عايزاك ؟

ناصر بتلاعب : ما قولتش عايزاني .. بس واضح انك عايزاني فعلا

لارا بتوتر : لا .. انا بس عملت فولو عشان قريبنا يعني

ناصر بخبث : امممم .. هعتبر ده تقل بنات .. تصدقي عمري ما شوفت بنت بالحلاوة دي

لارا بصدمة : بجد ؟!

ناصر : طبعا .. شعرك الاشقر ده فرنساوي و عنيكي بحر واسع ... و شفايفك ..

لارا بمقاطعة : انهي احلى انا و لا مرات اوس ؟

ناصر بخبث : انتي طبعا

ابتسمت بغرور و قالت : بجد ؟

ناصر : اكيد

اقترب منها و وضع يده على شعرها ببطىء

ناصر : عمري ما شوفت بنت فيها كل مواصفات ملكة الجمال عن حق و حقيقي كدة

لارا بتوتر : لو سمحت ابعد .. لو حد شافنا بالوضع ده ممكن يفهم غلط

ناصر : بالعكس .. هيفهمو اني معجب بيكي

لارا بذهول : بجد ؟

ناصر : طبعا يا حبيبتي

لارا بصدمة : حبيبتك ؟

ناصر : اممم .... انا وقعت بحبك من اول ما شوفتك

وضع يده على خصرها و سحبها نحوه .. حاولت دفعه و قالت بفزع : انت بتعمل ايييه ؟!

ناصر بفحيح : بدلع حبيبتي

لارا و هي تدفعه بقوة : ابعد كدة .. حرام الي بتعمله ده

ناصر : الحرام ان الحلاوة دي تروح من ايديا

فتحت حلا الباب بعنف و قالت بصدمة : ايه الي بيحصل هنا ؟؟!

افلت ناصر لارا و دفع حلا بسرعة و خرج

حلا بصعقة : ايه الي بيحصل هنا ؟؟ هيا حصلت يا لارا ؟! بتجيبي راجل غريب لاوضتك ؟

لارا ببكاء : اقسم بالله هو الي جيه عندي و بدأ يتحرش بيا

بدأت تتنفس بسرعة و تبكي ... اتت حبيبة بسرعة و قالت : حلا في ايه ؟!

حلا بغضب : خليكي معاها لغاية ما اخلص على السافل الي هرب و ارجع اربيها

اتجهت حلا للاسفل بسرعة ... بينما حبيبة لاحظت بكاء و رعشة لارا ... اتجهت لها بسرعة و حضنتها

حبيبة بخوف : مالك يا لارا ؟ ايه الي حصل بالزبط ؟

لارا بشهقات : ات.. ات .. اتحرش بيااااا

حبيبة بصدمة : هو مين ؟! انطقي ؟

لارا بخوف و دموع : ن.. ناصر

حبيبة : ابن خالة فريدة ؟!

لارا : اه

حبيبة و هي تملس على ظهرها : طب اهدي اهدي .. دلوقتي حقك هيرجعلك

وصلت حلا الساحة الخلفية و هي بحالة غضب شديد ... لمحته يقف بجانب فارس و يتحدث

حلا بجنون : انت هنا يا زبالة

نظر لها باستغراب

حلا بغضب : واقف و كأنك معملتش حاجة .. و ديني لاحمرك دلوقتي

هجمت عليه كالاسد الجائع و بطحته على الارض و بدات تسدد له اللكمات و الركلات بقوة وسط صراخه و صدمة الجميع و محاولة فارس و زياد انتشالها عنه

حلا و هي تضربه : سيبونيييي عليييه .. هطلع مصارينه بايديا دول

فارس : انتي اتجننتي يا حلا .. سيبي الراجل هيموت بايدك

حلا بهمجية : ما ده الي انا عايزاه

زياد بغضب : اهدي يا حلا و سيبيه كفاية بقا

لكمت زياد بيدها ثم اكملت عملها

حلا بوعيد : انا تقرب لوحدة من بنات عيلتي يا زبالة .. و عزة جلالة الله لانفخك يا ناصر الكلب

تميم و هو يحاول ابعاد حلا : استني .. هو قرب لميين ؟

نادر بصراخ : انا نادر مش ناصر يا بنت المجنونة ..... يتبع

مغامرات عائلية

همس كاتبة