هو أنت بجد شايف كدة؟
__ أه يا همس شايف كدة
هزيت راسي بعدم استيعاب كلامه مش داخل دماغي أبداً :
__ لا بجد انت بتهزر ، عمر انت بتستعبط بجد تسافر فين؟
__ هدور على أهلنا
عقدت حاجبي وأنا ببصله بعدم فهم وقلت :
__ أهلنا مين؟ عمر فوق انا وانت ملناش أهل
لمع في عينه اصرار أول مرة أشوفه :
__ لا لينا أنا قولتلك اللي سمعته
بصيت حواليا على جدران الاوضة وقلت :
__ ممكن تقولي إزاي؟ إحنا لو فكرنا بس نهرب مديرة الدار هتجيبنا وساعتها هنتعامل أسوأ معاملة واحنا داخلين على عيد يا بابا حرام عليك
قام وبص على الشباك الصغير اللي فوق :
__ هنقدر من الشباك ده واحنا جسمنا صغير يعني نقدر ندخل من دي
قعدت على السرير برفض تام وقلت :
__ انسى تعرف يعني إيه تنسى أنا مش هروح للموت برجلي احنا مش عارفين العالم برة فيه إيه؟
__ ما لذة الحياة هي المخاطرة
__ مش لازم على فكرة
كان لسه هيرد عليا لكن الباب اتفتح وظهرت أكتر ست مش بحبها “مديرة الدار” :
__ قاعدين سوا ليه مش عندكم شغل
بصينا لبعض بتوتر وعمر قال :
__ عادي يعني بنتكلم وهنفطر سوا
فضلت مركزة علينا شوية كعادتها قبل ما تلف وتمشي فقلت :
__ يا نهار أبيض بجد إيه ده الست دي مش طبيعية بجد لازم تخضنا بنظراتها دي يا ستير يارب
أول ما خلصت كلامي لقيته قعد جنبي وقال :
__ مش نفسك بقى تغوري من وشها
ابتسمت قبل ما أقول بسماجة:
__ غورة تاخدك نقي ألفاظك ثم أنا مش عايزة يا عم خليك انت في روح المخاطرة بتاعتك
قام وقف وخد كوباية العصير اللي كانت جنبي أول ما سمع الأذان وقال :
__ المغرب أذن اشربي وعموما براحتك لكن أنا همشي
كلامه خوفني أنا وعمر اخوات توأم وفكرة أنه يمشي دي وجعتني لأنه لو مشي هيسيبني لمين؟ أنا مليش غيره في الدنيا هيعمل إيه وأنا هعمل إيه؟ شربت شوية وبعدها قلت وأنا ببلع ريقي :
__ ع..عمر هو أنت هتسيبني بجد؟
اتنهد بيأس تنهيدة كانت شايلة كل همومه وقعد وحط راسه بين إيده :
__ أنا زهقت يا همس احنا خلاص كبرنا وعدينا السن القانوني ليه نفضل نشتغل غصب عننا أنا حرفيا بتبهدل مع العمال وأنا اصلا مش عايز الشغلانة دي أنا عايز أمشي ، ثم إنتِ كمان متبهدلة في المطبخ إيه سر تمسكك بقى بالقعدة هنا
طبطبت على كتفه ولمعت الدموع في عيني قبل ما أقول بصوت مبحوح :
__ عمر إحنا لو كنا طلعنا كنا هنترمي في الشارع الحمدلله إنهم خلونا هنا
ضحك بسخرية قبل ما دمعة تنزل من عيونه ويمسحها بسرعة :
__ خلونا عشان نبقى خدامين ليهم مش أكتر فوقي يا همس
ساد سكوت تام في الأوضة إلا من أنفاسنا وكل واحد قعد سرحان في حاجات مختلفة وكالعادة فطرنا بساندويتش بس في كل الأحوال نعمة وبعدها روحت في نوم عميق
>>>>>>>>>>>>>>>>>>>>>>>>>>>
بليل قومت براحة خالص وخطوات تكاد تكون مش مسموعة أصلاً وطلعت برة أوضتي وبدأت امشي في الممرات
ودخلت مطبخ الدار جايز الاقي أي أكل لكن للأسف ملقتش غير عيش خدت رغيف ورجعت بنفس الطريقة لكن سمعت صوت همس غريب
كان قصادي اختيارين : يا اروح أوضتي واتجاهل شعوري أو أمشي ورا فضولي ، وطبعا مشيت ورا فضولي وروحت وقفت قصاد المكتب بس داريت نفسي كان باب المكتب موارب شوية وسمعت حوار داير بين المديرة وبين شخص مش شايفة ملامحه بيقول :
__ صفقة الولاد والشباب جاهزة
__ اه جاهزة من بدري بس فيين الفلوس
رجعت لورا شوية وعيني برقت صفقة ولاد؟ هي حصلت!!!!!
فضلت ارجع بضهري لحد ما خبط في حد وغصب عني…صرخت
ببص لقيته عمر اللي بصلي باستغراب ملحقتش أقول حاجة لأنهم سمعوني وفي لحظة لقيتهم قدامي ، مسكت ايده وجرينا بسرعة لحد ما وصلنا للسور
__ إحنا بنجري ليه؟
__ مش مهم اطلع بس
وفعلا طلع ومد ليا ايده مسكتها بسرعة وطلعني وقدرنا ننزل أخيرا ، فضلنا نجري ونجري لحد ما وقفنا تحت شجرة فقال :
__ ممكن أعرف في إيه بقى ؟
__ كنا هنتباع يا عمر
__ يعني ايه؟
__ سمعت هناء وهي بتتكلم مع راجل انهم هيبيعوا الشباب والأطفال اللي عندهم
بص حواليه
عينه كانت تايهة كأنه بيفكر في حاجة
بصلي شوية وقال :
__ والولاد … هنسيبهم؟
سكت شوية وبصتله :
__ مش عارفة .. بجد مش عارفة
سكتنا وقعدنا تحت الشجرة ، فضل سرحان فقولت :
__ مالك يا عمر
__ مش عارف الدنيا جاية علينا أوي حتى لما هربنا حاسس إني خايف يا همس
بصتله بدموع وسندت راسي على كتفه ، نفسي أقف قصاد أهلي واحط عيني في عينهم واسألهم سؤال واحد بس “ليه؟”
فضلنا قاعدين لحد ما الصبح طلع غصب عني نمت وفوقت على صوت عمر وهو بيصحيني :
__ قومي هنمشي مش هينفع نقعد كدة
غمضت عيني بارهاق وببص للشمس وحرارتها الحامية :
__ الوقتي؟ الجو حر أوي
نظراته كانت مختلفة عني فيها اصرار وأمل :
__ قومي بس
حطيت ايدي في ايده وقومنا سوا بالفعل ، فضلنا نمشي بلا هدف فقولت :
__ أنا تعبت بجد الشمس حامية أوي يا عمر
__ معلش هنقعد أهو
__ طب إحنا رايحين فين إحنا حتى مش معانا فلوس
سكت ، فعرفت إن مفيش مكان معين وبعد سكوت طويل قال :
__ بإذن الله هتتحل بس قولي يارب في الأيام المفترجة دي
بصيت للسما شوية وقلت بحرقة:
__ يااارب
لحد ما خبط في حد بالغلط فقلت:
__ أنا أسفة بجد
لقيته بصلي بعصبية مش مبررة وفضل يزعق يزعق ويقول :
__ هو انتِ عامية ولا ايه ؟
عمر خدني ورا ضهره وقال :
__ ما خلاص يا عم هي قالتلك أسفة ليه الغلط يعني
زقه فرجع لورا بسبب قوة الدفعة:
__ هو أنت هتعرفني أتكلم إزاي
وكلمة منه على كلمة من عمر مسكوا في بعض ، كنت خايفة دموعي نازلة وأنا بصرخ :
__ عمر خلاص عشان خاطري عمررررر
الناس اتجمعت وسمعوا مني اللي حصل فقال راجل كبير في السن باين على ملامحه البشاشة وهو بيبص للشخص التاني :
__ خلاص يابني حصل خير البنت مش قصدها حاجة
وطبطب على كتف عمر :
__ معلش يابني عندي دي
تقبل عمر كلامه باحترام وكذلك الراجل نظرا لسنه ، وخدني ومشينا فقلت :
__ مكنش له داعي يا عمر
بصلي باستنكار وقال :
__ انتِ شايفة أنه عادي بجد اسيبه يقل في ادبه وعادي ليه ماشية مع سوسن ؟
ضحكت وقلت بهزار :
__ ياختي كميلة بيخاف على أخته يا ناس
ضربني بخفة وضحك غصب عنه ، ورجعنا قصاد نفس الشجرة :
__ تقريبا الشجرة دي هتبقى بيتنا لفترة محدودة يا عمر
__ رضا ، أهم حاجة في مكان يحمينا من الشمس دي
__ عمر هو أنت بتكرههم
بصلي شوية بعد ما قعد وعرف إني قصدي بابا وماما :
__ مش بكرههم بس عايز اعرف ليه؟ ممكن يكونوا اتوفوا أو
اتخطفنا مثلا في الف مبرر ليهم عندي يا همس
سرحت
وعيني دمعت
أنفاسي كانت سريعة من كتر كتمان العياط :
__ بس أنا زعلانة أوي يا عمر..أوي
خد نفس طويل ومسح على شعري زي ما كان بيعمل واحنا صغيرين وقال:
__ أكيد ربنا شايل لينا العوض يا همس وبعدين مش أنا عيلتك ولا إيه
ضحكت بخفة وضربته في كتفه :
__ هو أنا ليا غيرك أصلا
فضلنا قاعدين بصمت أحيانا بنهزر بنتكلم بنقرأ القرآن اللي حافظينه ، لحد ما المغرب أذن :
__ هنفطر إيه؟
__ قومي بس نصلي وربنا هيسهلها
بصتله بيأس لأني عارفة انه بيحاول يهون عليا وخلاص ، أنا دخلت مصلى النساء هو مصلى الرجال
>>>>>>>>>>>>>>>>>>>>>>>>>>>>>
“عمر”
كنت عارف إن ممكن منلاقيش اي لقمة حتى ، بس عندي أمل في ربنا حتى لو مش هاكل بس هي بنت ومش هتتحمل
اتوضيت ووقفت بين ايد ربنا ، فضلت متماسك لحد ما سجدت وغصب عني دموعي نزلت على كل حاجة وقولت :
__ أشكو إليك يارب ولا حول ولا قوة إلا بيك يارب
وفضلت أعيط ، حسيت إني ثباتي كله وقع ، خلصت صلاة وخلصت كل الهموم اللي كانت على كتفي، قعدت اذكر ربنا شوية لحد ما تقريبا المسجد بقى فاضي
حسيت بإيد على كتفي ببص لقيته الراجل اللي كان فض الخناقة بيني وبين اللي زعق لهمس وقال :
__ مالك يابني؟
__ ولا حاجة يا حاج تسلم
قعد قصادي ملامحه كانت مريحة أوي :
__ اعتبرني ابوك
أول ما سمعت الكلمة دي ضحكت بسخرية وسكت شوية
وبعدها حكيتله إني مش لاقي شقة صغيرة أو أي حاجة بايجار متأخر مش مقدم بس مقولتلوش إني كنت في ملجأ فقال :
__ في شقة في بيتنا فوق كانت بتاعت أخويا بس الله يرحمه ويرحم أمواتنا جميعاً كان شاب بس مات بدري ، هي نص فرش يعني فيها الأساسيات يابني والايجار براحتك فيه
ابتسمت ومش عارف ليه كان جوايا شعور سخرية جزء مني فكر أنه هيسكني فيها ببلاش لكن الظاهر أن مفيش حاجة ببلاش لكن قلت :
__ تسلم يا حاج والله طب..طب هي جاهزة إمتى؟
__ هي متربة شوية تعالى معايا بس
قومت فعلا سألني على همس فقلت إنها في مصلى النساء خرجت لقيتها مستنياني فقلت :
__ إيه يا حبيبتي اتأخرت ؟
هزت راسها برفض :
__ لا متأخرتش ولا حاجة ، بس مين ده؟
__ الراجل اللي ساعدنا الصبح
وخدتها على جنب وشرحتلها الموضوع ابتسمت أوي وروحنا معاه وفي الطريق وقفنا عيل صغير وقدم لكل واحد تمرة وعصير
ابتسمت أكتر لما شوفته رايح لابوه وفرحان باللي عمله حسيت إن الدنيا لسه فيها خير وتربية صح
لحد ما دخلنا حارة صغيرة مكنش فيها ناس كتيرة لان كلهم بيبقوا متجمعين حاليا
كانت زينة بسيطة متعلقة وريحة أكل مختلفة خارجة من كل بيت
صوت صراخ الأمهات لعيالهم عشان ياكلوا
حاجات كنت دايما بسمع عنها في الأفلام بس
وجنبي كانت همس بتراقب كل حاجة عينها فيها نظرات مش مفهومة مش عارف ده حنين ولا ألم ، طلعنا في عمارة كانت هادية شوية الا من صوت معالق واطباق فقال :
__ تعالوا كلوا لقمة
بصينا لبعض كنت هوافق عشانها بس هي قالت :
__ لا يا عمو شكرا مش جعانين ممكن بس المفتاح
استغربت بس ابتسمت لأن دي طريقتها مش بتحب شفقة دي وافقت على الشقة بس عشان هندفع في الآخر على ما اشوف شغل
طلعنا واول ما فتحنا قابلتنا ريحة التراب بسرعة كأنها بترحب بينا
لكننا مهتمناش كل واحد اترمى على كرسي من سكات
حتى السكوت بقى تقيل علينا
>>>>>>>>>>>>>>>>>>>>>>>>
“همس”
كنت جعانة أوي بس أنا مش بحب الشفقة بحسه إحساس صعب
فكرة إن حد يشفق عليك احساس صعب أوي
كنت ببص قصادي بتعب وأنا مش عارفة هقدر انضف كل ده إمتى
فلتت ضحكة مني وأنا بقول :
__ ياه هو الواحد هيجرب تنضيفة العيد بجد
لقيت عمر بادلني الضحكة لكن نظراته كانت كاشفاني كالعادة
كاشفة حزني المتداري تحت مليون طبقة قلق تانية
قام ببطء وقف في البلكونة :
__ تفتكري دي ممكن تكون بداية لحياة نضيفة؟
__ مظنش ، مش تشاؤم بس على رأي المثل اللي اتلسع من الشوربة ينفخ في الزبادي
لف بضيق فجأة وبصلي:
__ ليه ما انفخ في الشوربة وخلاص بت أنا مش بحب جو خالتي اللتاتة ده
ضحكت جدا لأن عمر بطبعه يحب الحاجة المنطقية فقلت :
__ خلاص آسفة
الباب خبط فجأة روحت افتح وأنا مستغربة ، لقيت بنت جميلة أصغر مني تقريبا وقالت بصوت هادي :
__ أهلا يا قمر أنا تقى بنت عم اسماعيل.
عقدت حاجبي بعدم فهم :
__ مين عم اسماعيل
ابتسمت لما فهمت اني مش عارفة اسمه :
__ اللي اجرلكم الشقة
هزيت راسي بتفهم فقدمت ليا صنية :
__ ابويا بيقولكم الف هنا
اتحرجت جدا وقلت :
__ بس احنا مش عايزين…
قاطعتني بسرعة:
__ عيب والله تقولي كدة إحنا اهل وبعدين شكلك عسولة أنا ارتحتلك
استغربت أوي إيه العيلة اللي بترتاح للناس بسرعة دي بس قلت :
__ شكرا
جه عمر لما حس اني اتأخرت وهي على طول اتكسفت :
__ معلش أنا لازم أنزل بقى
لسة هسألها على اسمها لقيتها مشيت ، لفيت لقيته بيبصلها بتعجب وقال:
__ تقريبا حرجتها
ضحكت وقلت :
__ عيلة غريبة أوي بيثقوا في الناس بسرعة
__ عشان غلابة زينا ما إحنا كمان روحنا معاه بدون ما نعرفه
فكرت في كلامه شوية فعلاا منطقي
بشيل الغطا اللي على الصنية بس صرخت برعب وهلع لما..