تحميل رواية «لك ياذا الجمال اليوسفي» PDF

صار صياح بصوت عالي ركضنه للاستقبال للشباك اليم الديوانيه فتحنه وذبينه البردة ضلينا نسمع الزلم تتصايح

طغى صوت عمي فاضل على اصواتهم وهو يزمجر بغضب

:- ما تطلعون منا هسة يطلگ المرة الامنتها يمكم انهانت وانطعن بيها وبعد ماتصيرلكم مرة هاي عگالي وشاربي وانتم هنتوهن وما حفظتو كرامتهن

بعد ي رهف ما ترجع لو تتثالث الدنيا ..

:- مو خوش ابو ليث لا تهجم بيت بت اخوك حرام بعدها عروس

فاضل :- لا تشمركم الخوش شني جايلي الافندي يگلي ماكو دخان بدون نار فوك ما مرته وبته طاكات بنيتنا وتاهماتها جاي يكمل

ابو نور :- بعدكم هم طاكة بنيتي

فاضل :- رد فعل طبيعي اليوم اي واحد بينا تنهان كرامته وينطعن بي وينطگ يخلص صبره وينطي رد فعل مشابه ، مثل ما مريتك وبتك طكنها ثارت ونفذ صبرها وردت الها

هسة لو واحد عايل ابتك وطاكها بتك تضل ساكته وخاضعه وتنتظر يموتونها كتل

حجة غير زلمة :- حكها هاي هيه بس يا ابو ليث مو مال طلاك وفاقد مريته واثق بيها ويريدها

فاضل :- ما الكم مرة يمنا بعد

ابو فاقد :- ابو ليث شاهد الله انه مو بالبيت وام فاقد ما كادرة الهن

فاضل :- شلون نسوان الحل والربط بيديهن يكتلن ويطردن بنيتنا بهدوم البيت جا الزلم شني شغلها

مالهم احجاية

ابو فاقد :- يمي ابو ليث انه احلها ، بس خل ترجع المرة وما يصير خاطرك الا طيب

فاضل :- لا ابو فاقد لا ماترجع البت واريد هاي الوجوه يردون عليه نوبة ثانية وياهم بتهم الطكت بتنا وتهمتها يحلفن على كلام الله

وبت اخوي تحلف على كلام الله وراها انطلگ

صاحو لا مو خوش ما ينحلف بالقران لا صادك ولا جاذب

فاضل :- هذا هو مايحلفن يعترفن ام نور وبتها بجذبتهن ويكفن شرهن عن بت اخوي وراها عودك اكلكم تعالو اخذو جنتكم

غير هذني لخيارين ماعدكم

يا يصير حلف وكل واحد يحجي لعنده وبت اخوي تطلك ماترد لعالم ماكدرو يطلعون حكها ويبيضون وجها

يا يعترفن بجذبتهن وانه عندي ثقة واعرف بيهن جذابات من هيج مترررهي ومرتاااح وحاط رجليني بماي بارد

ابو نور :- انه مرتي وبتي ما يحلفن

فاضل :- يعترفن بجذبتهن كدام الخلگ غير حجي ماعندي

بعدين يا ابو نور بنيتك نور المصون منين جابت هذا الحجي ويامن تتواصل ؟ ياهو هذا لمحرضها على بت اخوي

صار حجي ومصايح وفاقد طلع صوته يحجي لعمي ويكله واثق بيها وانه عفت مرتي نايمة وطلعت وهي بت اصول ماتطلع منها العيبة ، وان شاءالله حگها يطلع

ترخصو العالم وطلعو بس مبينين زعلانين وما عاجبهم الحجي عمي ضل فاير دمه وبس يحجي ويغلط ويسب بليث يخابرون بي طلع مغلق

راحولة عمي صادق وفالح للبيت محد يفتح الباب مع العلم يكولون نسمع صوت الاطفال والاضوية شابه يعني موجودين ..

تعبنا كلش هاي اخر شهور بس مشاكل طكت ارواحنه شبعنة قهر وضيم ، عفتهم كاعدين يتناقشون وصعدت بعد ماعندي طاقة لكيت رهف نايمة ندستها كعدت فركت عيونها وباوعتلي

:- ها اجو؟

:- وراحو هم .. حجيتلها الصار ضلت تهز براسها ورجعت تمددت

رهف :- هاي شهر ونص زواج ماشفت بيهن الراحة خلصتهن مريضة ومقهورة

درة :- غير مقهورة على الجوا

رهف :- بس الجوة غير هاي عمته تهاني لزگة يومية تسد بابها وتجينه وتشمر حجي وتركض ورانه انه وعمتي وحمواتي تدور وصخ تدور ماعون ممغسول وتكعد ترزل بينا وحسرة على عمتي تفك حلكها تطلعها تهاني من الملة

وعمي اخرس يم اخته ما يفك حلكة ويحجي

درة :- يعني مشاكل عمة وجنة ههههه بس مو ويا عمتج ويا عمة رجلج

رهف :- هههههه والقهر عيالي فقرة ومايحجون والله لخاطرهم ساكته ولا عاركت ولا اشتكيت

درة :- عمي يكلهم اطلكها

رهف :- ما اعتقد يريد يضغط عليهم علمود يعترفن بجذبتهن

درة :- ما يعترفن منو يجذب روحه

رهف :- من حجيج تبين الي شي

درة :- وهو؟

رهف :- عمي راح يضل وراهم حتى يعرف نور منين جابت الحجي وهذا الشي مو بمصلحتهم الواضح نور وليث صاير بينهم تواصل

ونور ماتكدر تعترف بهذا الشي اتوقع تطلع روحها جذابة وما تكول اتواصل ويا ليث لان اهلها ينهونها نهي

درة :- منو ينهيها تهاني

رهف :- لا تهاني ولا ابوها كولي عمامها لان تهاني تكرهم تكول عليهم متشددين ويدورون الزلة

درة :- والله وعساها تولي لا ذمة ولا ضمير تفضح ببنات الناس وتتهم وين تروح من الله

رهف :- ولج انه يمكن حامل ..

درة :- لا والله

رهف :- ههههه اي والله من عرست بعد مانزلت واحس بروحي متغيرة نفسيتي كلش وشهيتي وكل شي مو انه القبل العرس بس لا تحجين هسة بعدين اتاكد يله

درة :- ياا وعمي يصيح اطلكها

رهف :- مايطلكني شبيج انتي شنو هيه لعبه وهيج بسرعة ننهيها خية هذا زواج

درة :- تحبين فاقد

ابتسمتلها هزت راسها :- خية الرجل عزيز شما كان ما بالج بفاقد خوش رجال ويحبني ومدللني؟

اعزة واحترمة وحياتي ويا حلوة الحمدلله

درة :- يعني تحبينه تحبينه لو هيج حياة روتينية عادية

رهف :- لا حياة عادية مو حب تعلق احترام والدنيا ماشية الحمدلله

درة :- اريد انطي همام فرصة

ضحكت وكعدت على حيلها :- والله ما تخسرين بس فتحي كلبج وباوعلي الايجابياته وعيشي ويا لحظات تلكين روحج تعلقتي بي هاي اذا ما حبيتي وعشكتي

درة :- اخاف اظلمه واظلم روحي الحب الحقيقي ما ينسي

رهف :- ما ينسي بس اكو شي اسمه تقبل وتعلق والله علاقتي ويا فاقد هيج بنيتها تقبل وبديت افكر بي واعيش ويا لحظات ومواقف وتعلقت بي

انتي هم تلحلحي شوية شبيج سادة البيبان كعدي ويا امشي ويا طلعي ويا شمالج يحظي تضلين هيج اموته روحج

درة :- وگلبي خية گلبي غير هوا الكاضني ومجتفني اتجتف الله وكيلچ والمشكلة ماعرف اخبار حر ومن اسأل امي تكلي شيلي من بالچ بديت اقتنع واتعود على فراگه بس ما ادري .. فجأة الگى روحي ابجي علي ومشتاقتله

رهف :- راح وعافچ تكملين حياتج جيف يريدلج الزينية ورادج تتقبلين همام وتكملين ويا الطريق

درة :- كتله راح اتطلك

حجيتها ونصيت راسي

رهف :- درة من رجع لگاچ مخطوبة وبذمة رجال تتوقعين خالي ناقص ويطلكج من زلمتج وياخذج؟!

فتحي عيونج احنه مو بمسلسل احنة هنا بالواقع كلشي يختلف

ماتكدرين تطلكين واذا تطلكتي صدكي ماينطوج اله لان راح يعرفون طلاكج صار علمودة ويحقدون علي

وبعد هواي امور حتى خالي شكد شجاع وقوي بس ماعندة الجرئة يساندج بقرارج ويخليج تطلكين علموده ، ولا هو ناقص وماعنده اخلاق ودنيء ..

درة :- كل هذا الحجي اعرفه ومفكره بي ليش اريد انطي فرصة لهمام انه؟ لان هاي قسمتي وماريد اضل مثل سداد عذب روحه لحد ماخسر صحته وقوته وتمرض

رهف :- عفيه عليچ ماتوكف الدنيا بس انتي حركي روحج شوية

هزيت رأسي ما جنت مقتنعة كلش وصارلي شهر وفوگ اقنع بروحي بهذا الحجي بس ما جاي اقتنع بشكل كامل

تجيلي لحظات اتقبل الفكرة وفجأة انفر منها ..

جنت مثل الغرگان ببحر أفكاره القاسي المظلم وما يگدر يطلع ويشوف النور مرة لخ ..

دك نقالي باوعتله رقم غريب جاوبته خايفة

من يدك رقم غريب كبل بالي وتفكيري كله يروح على حر وكل اعضاي ترجف

درة :- الوو؟

فاقد :- مساء الخير هلا درة شلونچ

درة :- هلا بيك فاقد الحمدلله اسأل عليك

رهف :- طفرت مديت ايدي اشرت الدرة تنطيني المبايل هزت راسها وكلتله

:- هاي رهف يمي اكيد مخابر علمودها مو علمود تسلم عليه انه بيش الكيلو هههه

فاقد :- انتي الخير والبركة ..

اخذته منها حطيته على اذني همست الو

درة كامت طلعت عافتني وحدي

فاقد :- هلا بهل صوت شلونج بوية بالي كله يمج واخابر امج ماتشيله شسالفة زعلت شني

رهف :- ما ادري يمكن مو يم المبايل لان هيه جوة خطية ملتهية

احجيلي شصار ماصار

فاقد :- هوا انه الاحجيلج لو انتي التحجين ترة ماضل براسي عقل صدك فاقد من صدك من بعد طلعتج من البيت والله حتى عقلي عافني فقدته

رهف :- شنو ما حجولك الجماعة

فاقد :- لا حجو وتعاركت ويا بيت عمتي والحك كله وياج انه واثق بيج وادري بنور تدور خرابنا علمود يخلالها الجو ويصفالها الوضع بس اريد اعرف الوضع يمكم شو ابو ليث متعصب كلش ويصيح اطلكها وماترجع

رهف :- شلون فاقد انه انهانيت وانطعن بعرضي

فاقد :- سهله محلولة يمي اخليهن يعترفن بس احجي ويا عمج باجر امر علي خلي يهدي اعصابه شوية شني عباله سهله عليه طلعت مرتي من بيت اهلي بهيج وضع الله شاهد من العصر لسه ريجي مر علقم وميت ميت

حتى امي وخواتي مقهورات لا عبالج بس انه

رهف :- اي ادري عمتي ماراضية وطلعتلي عباية وشال من الشباج وجانت مدمعه

فاقد :- اي والله مو سهلة علينا وما جارعين الصار ان شاءالله محلوله وحكج يرجعلج من يعترفن بجذبهن ويطلعن بالكباحه والوجه الاسود

رهف :- بدون زعل فاقد عمتك رعنه ماتنكدر وابوك يمها يصير اخرس يخاف مادري يحترم الله يعلم

فاقد :- انه احجي مالج شغل من رديت سويتها عليهم كربله وما اخليهم ينامون ليلهم مرتاحين لحد ما يعترفن بجذبتهن البرابيك

رهف :- ههههه صدك برابيك وانه شكيت بيهن يردنك والقران بس ما ظنيت يوصلن لهاي المواصيل ويتهمني

فاقد :- بلوة والله مصدوم شني من نسوان انتقام وانتي نفذتي كلامج كتيلي امطلها ههههههه

رهف :- والله مطلتها لنور ومطست بمصارينها خل تولي هيه بدت وتهجمت لا تكلي غلطانه ترة هواي داسوني انه مو ملاك واتحمل واسكت انه بشر وصبري اله حد

فاقد :- هههههههه والله ما ادري شكلج تولي هسه عينج على روحج انه راح اطب اسبح والله احس هدومي ثكال عليه من القهر واهوس عليهم شوية حتى ما يبرد الجو

رهف :- نعيمًا مقدمًا ،، حجيتها وتثاوبت

فاقد :- اووف نعسانه وبعيده عن حضني وانه الناذر ماتنامين ليله بعيدة عن حضني شلون بيه شلون انام وما اشم انفاسج واحس بحرورتج بحضني

رهف :- هههههه بعد شنسوي من ورا عمتك الحية يلا رايحة انام تعبانه جسمي متكسر

فاقد :- متكسر كد ما داكة بنور

رهف :- ههههههه تصبح على خير

فاقد :- تلاكينا ..

نهيت الاتصال شمرت المبايل ورجعت تمددت بس غمضت غفيت ما فتحت الا ويا اذان الظهر كمت مكسرة وفايتتني صلاة الفجر

فتت غسلت وتوضيت وصليت بنص صلاتي وصعدت ترف صاحت

يله كملي ونزلي ..

كملت صلاتي ونزلت جوة لكيتهم متجمعين نص بالهول ونص بالمطبخ صبحت عليهم

بيبي صاحت :- صار ظهر يمة منين صبح

تعاي جاري

مشيت كعدت يمها باوعتلي بتأني وكالت

:- طاكة مطكوكة

تثائبت وهمست :- طاكة ومطكوكة بعد تدرين حجيتلج امس

سعدية :- عسى ايدها بكسر ما يتجبر تمد ايدها على جعيفر الجلبة ، والله ما تردين اذا ما نحطلهم كلوب بصف كلوبهم ونطلع نخله بروسهم

فاضل :- هية التوكف بالعين زينية عيالهة واخلاقهم بس ان شاءالله محلولة

كمت من يمهم للمطبخ لكطت خضرة لل1 كمل الغدة وصبينة تغدينا كل احنة سوية مثل قبل وسوالفنة وشقانه وضحكنا ولا عبالك عدنا هموم

حمودي يخنزر بترف وهي تجر عيونها بغرور وتذب كباله فاصولية علمود تغثة لان مايحبها

وعمي فاضل يسولف ويا بيبي ويضحك

وغيث وسداد ياكلون ويحجون بصوت خافت ما ينسمع

امي وعمتي نجوى بعالم ثاني يحضرن لولادة فدك

وهاني الوحيد مموجود خطية بالشغل حتى عطله ماعنده نادرا مانشوفه بالبيت احسه يشرد من همومة للشغل حتى ما يموت بقهره

للعصر اجة فاقد لعمي وحجة ويا وراح انه ما شفته بس ناطي وعد راح يخليهن يعترفن بجذبتهن ويعتذرن وما يعتبن البيت

دزلي مبايل جديد وخط وحاط رقمة خابرته سلم وسأل عني وكال مخلصها عليهم هوسة وابو يستحي من اخته وما ينطي بأخته

هو شمسوي ماخذ مستمسكاته وكايللهم هذا هو مرتي طلعت رايح اطلكها واهج وبعد ما تشوفون خيالي لان استحي اراوي وجهي بعد سواية عمتي وبتها واستحي اضل هنا والناس تشوفني وتكول هذا استاذ فاقد الي اهله شوهو سمعة مرته وطردوها وتطلكت مظلومة

امه ضاله تلطم وعمي يصيح ارجع تنحل نحلها ويا تهاني شامر المستمسكات وطالع معصب منهم

يعرف شلون يطلعها هيج عمي راح يعارك اخته وبس عمي يطلع لسانه ويا اخته راح تنحل

ورايح لرجل عمته مهوس فوك راسه وكايله عمتي راجعه النه بس نور غريبة اذا ما تعترف بجذبتها وتبرأ مرتي الي وياك كعدة عشاير مو انه الينطعن بعرض مرتي ويطمطمها والله اسويها فضايح واخلي الما يشتري يشوف

هم جار بوشة وكايله سهلة يمي .. وداك صدرة الطلي وهو البارحة يهوس وما ينطي ببنته ولا جنها هي وامها مسويات مصيبة

طلعت للحديقة علمود انتفه صدري ضايج كلش كعدت جوة شجرة ومديت رجليني طلعن البنات لحكني

ورا شوية طب غيث وطلعتله عمتي تصيح فلك تعاي اختج تطلك تعاي عاونيها

طفرنة كلنا وصعدنا فدك تتلوة وتبجي وتون

طلعت فلك غراضها واحنه ساعدناها تلبس اخذوها بسيارة غيث للمستشفى وخابرو هاني علمود يعوف الشغل ويلحكهم ..

ل12 بالليل يله جابت خطية وصار عدها ولد وصرنا عمات الحمدلله

بعد ما طلعوهم ضلو للصبح ايسنه نشوف البيبي كمنه لفينه روسنه ونمنا

وكعدنا الصبح على اصوات الفرح الطلي مربوط بالباب وعمامي واولادهم ملتمين يباركون صادف يوم عطله والربع ماعدهم شي

ولادة طفل جديد يعني روح جديدة وبداية جديدة شكد اتمنى روحي هيج انسى كل شي بالماضي وتنولد بروحي بداية جديدة مثل ولادة هذا الطفل

سماه اخوي جعفر على اسم والدي طب شايله وفدك تمشي بصف عمتي مبتسمة

قدمه النه شلنا كلنا جانت عيونه تلمع بفرح وكل شوية كال

هذا ابني صرت اب صرت والد

وعيونه تلمع ، يشمه ويصيح افيششش هذا قطعة من روحي وطينته معجونه بطينتي

فدك ضحكت وضربته على ايده وكالت

:- ترة انه الحملت بي وجان برحمي والمشيمة مشيمتي وكلشي اله اطلع منها حبيبي

هاني :- ما ارضى ها ها ما ارضى سدي حلكج اخذه واهج وبعد ما تشوفون وجهي هههههه

اربي وحدي اغار على ابني

فدك :- شنو تغار مني على ابني اوف يمة بطني وظهري وين انام ميته

نجوى :- بغرفة فلك لا تصعدين ولا تنزيل هاي اليومين

كامت اخذتها عمتي تنام ، مشيت وراهم وبأيدي جعفر حطيته بالسله مال الطفل الصغيرة

باوعتله ومررت صبعي على خده ناعم ترف مغمض عويناته حبيب عمته

باوعت لفدك مبتسمة :- الله يرزقچ ويترس حضنج بس مو هسة من تنحل مشاكلكم وتتصافون حتى تعرفين راسج من رجليج

ضحكت ورديت :- والله جنها قربت

فدك :- بيها الخير شنو حللتي

رهف :- لا بعدني بس حاسة وهم ماجتلي من عرست

فدك :- حللي علمود تتاكدين وتدارين روحج واذا ماطلع حمل تراجعين وتشوفين الخربطة والمشاكل الصايرات عندج وتعالجيهن

هزيت راسي وهمست :- الله كريم ارتاحي نامي

فدك. :- وريحة الحسو تضل تدگ براسي اريد اكله

رهف :- ههههه هاي عمتي نورية من الصبح غبشت وهية جاي تسويلچ الحسو وراح تسويلج محمر وسمج يلوك لهذا الحلك

فدك :- الله محمد فدوة كليلها تكثر شكر وتمر احبه حالي راح انام ارتاح ومن اكعد اكلهن

رهف :- تدللين .. عفتها تنام وطلعت يمهم

للساعة 12 ودخلنا عليها نايمة امي راحتلها ندستها وكلتلها عمة فدك كعدي اكليلج لكمة

فدك ضلت تأن ما تجاوب كضتها امي مصخنه نار

اجت عمة نجوى وشافتها البنيه صايرة تنور من الحرورة

نجوى :- امي حاجيني تسمعيني

هزت راسها

:- وينجن تعالن نجهزها ونشيلها للمستشفى البت مصخنة وهي نفسه موزين كلش موزين

ضلينا نتراكض كملناها جهزناها واخذوها للمستشفى جعفر سويناله مميه وشربناه ورجع نام ، وضلينه نلوب

نورية :- دخيلج ياا ام الحسن والله كلبي خلص يا هل راحة ماتصير النه والفرحة ما يوم تمت

سعدية :- المؤمن مبتلى يمة نورية

نورية :- الحمدلله يمة الحمدلله بس كلبي نار مو طبت شحلاتها وتضحك وتسولف نامت وكعدت متخربطة هم حظنا وحظها وحظ هاني المايرتاح بعمره يضل معلعل

درة :- كولو يالله ليش مفاولين بالشر ان شاءالله تكوم سالمة

همام :- مساء الخير

ردينا مساء النور

وكف باوعلي وكال :- درة ماعليج امر بس تعاي صبي جاي بالمطبخ

هزيت راسي وكمت فتت من يمه وطبيت للمطبخ همس يم اذني شلونج

باوعتله بحيرة لميت شفتي للداخل. واباوعله بنفس النظرة

درة :- موزينة جاي احسب بفدك خطيه

همام :- ماعليها شي ان شاءالله

هزيت راسي حطيت القوري وباوعتله ابتسمت

:- هاي شبيك هيج تباوعلي وترتني راح احترك ترة

همام :- اغمض؟

:- لا بس دير وجهك ولا تباوع هيج

تنهد ارتفعت اكتافه ونزلت ضل يباوعلي بنظره عتب وهمس

:- يمته نحلها وشلون راح تصفى بيناتنا واحنة كل واحد بوادي ، يمته تفتحيلي كلبج وتنطيني فرصة مو الشيب ترس راسي من ورا همج درة وكلبي خلص من الصبر

درة :- انطيني فرصة اصبر هاي العالم تضل خاطبة سنين شمالكم كم شهر ومليت

همام :- مو قصة مليت بس احس سجين ومحطوطة بركبتي ماجاي ارتاح حتى بنومتي علاقتي وياج بالنسبة الي مثل حبل النجاة درة واذا انكطع يابوية اذا انكطع كلشي يخرب

درة :- ما ينكطع ان شاءالله انه قررت قرار

همام :- قرار ايش؟

درة :- نبدي صفحة جديدة اريد تصبر عليه وتنتظرني وتتحملني لحد ما احبك

همام :- يا حب كولي لحد ما اتقبلك الحب بعيد مايجي منج بشهر شهرين

صحكت ونصيت رجعت رفعت راسي كتله

درة :- صح اريد نكعد نحجي نطلع اذا ممكن ونتخابر اريدك تكون وياي على طبيعتك اريد اعرفك زين واعرف كل شي بيك خليك وياي بشكل دائم علمود اتقبلك واتعلق بيك ويصير بيناتنا اندماج

ابتسم برضا وفرح وهز راسه :- هذا الاريده انه والله يا درة الدنيا ما توسعني من الفرح بهاي اللحظه بس الله يعلم بحال كلبي شلون جاي ينبض وشعوري شلونه

درة :- الله يديم الفرحة عليك

تقرب يم الطباخ صار قريب مني كلش شلت راسي اباوعله يتامل وجهي تنهد انفاسه ضربت وجهي

همس :- سمرة وسمارج حيل هد حيلي

وانه كبال عينج ما ينعرف حيل لي

ماي واتبدا

فالح :- الله الله ابن العم حاصرها بالمطبخ ويشعرلها والربع منتظرين الچاي عبالك مفطومين

يحجي ويصفك ..

جفلنا وكمزنه ثنيناتنا نصيت خجلانه وبلعت ريك وهمام يضحك ولا يمه وفالح يشمر حجي

فالح :- شوف الوجه احمر ردتلك روحك شكلتك الله عليك شكالت وسوتك شاعر واحمر

درية علمي فلك خلي تگلي نفس الحجي اريد اصير شاعري مثل همام

همام :- هذا مو مال معدان

فالح :- هجم بيت البامية عمي صبيلنا جاي خل نشربهم ونولي لبيوتنا شجابني شورطني بس اشوف مشاهد رومانسية وانقهر وحسرة عليه شوفتها واذا شفتها مالحك امد براطمي اريد ابوس يطلعلي عمي فاضل يطلعلي غيث يطلعلي حتى الجن الازرگ

صبيتلهم جاي وطلعو ورجعت للهول ساعتين وطمنونة عنها شوية ارتاحينا

وهنا بدينا ويا جعفر الصغير لحمه حمرة وصار بمسؤوليتنا ومن ايد الايد مانخلي يطيح بالكاع

يومين وفدك بالمستشفى يتناوبن عليها امي وعمتي نجوى وجعفر صحته زينه

شايلته بحضني اباوعله وانعصر كلبي كتله بحسرة

:- بس لا حظك يطلع نفس حظ عمتك حبيبي بس لا تورث مني سواد الحظ

شفت روحي بي جنت بعمره توني صايرة وماتت امي وعافتني يتيمة ، خفت يصير شي لفدك ... تعوذت بليس ودعيت ربي يرجعها سالمة

حطيته بالسلة وطلعت للمطبخ فتحت الثلاجة شفت الحسو ، من حجي رهف جانت مشتهيته ومشتهية محمر وسمج ما ضاكتهن حتى سودة عليه ماتستاهل

والله رابع يوم وطلعوها كالو زينه وصدك وضعها احسن ، بس وجهة اصفر خوفنا عليها عيشنه بجو من التوتر والقلق

صعدت سبحت حسيت اعصابي ارتخت ولا جن مر اسبوع بعدها الخوفة بينا والوجوه ماتتفسر

جنت احط مرطب لأيديني وطبت امي ضايجة

رهف :- شكو فدك بيها شي

وعد.. لا اسم الله زينه جنها وردة بس عمجن كال البيت كمل ناقص بس تجن وتكعدن بي وشو ضاج خلكي

رهف :- او يمة تضلين بهذا وضعج جرئي روحج بس اول فترة وتتعودين

وعد :- اي اخذ الشور من راس الثور

كتله اصبر جم يوم نتطمن على فدك وترجع رهف وننتقل يمك كال براحتكم

درة :- ههههههه رهف شكلها ماترجع اذا ست تهاني ماتقبل تعترف

رهف :- كافي بتها معترفه وابوها راح يجي ويا الناس ويكللهم بتي اعترفت بجذبتها وجذبة امها

وعد :- وكلولة منين جابت نور هذا الحجي شيكللهم من جيبة الناس تكلك ماكو دخان بدون نار ، احنة نريد حجي مضبوط ونريد نعرف منو دافعها

رهف :- شيسووون بعد يمة ماجاي تعترف بكل شي تكللهم من جيبي الحجي ماترضا تكول منو دافعها والله ويجوز صدك من جيبها ديرة صغيرة ويمكن واصللها حجي ان ليث خاطبني ورايدني قبل استغلن الفرصة وسوووون هاي اللعبة هية وامها الماتستحي

وعد :- هم فكرت بيها بعد يم عمج هوا اذا مايشوف حجي ابو نور يردلج اعتبارج ف لا يرجعج

رهف :- بس ابو نور حتى عمي ابو فاقد كايل لاخته بعد ماتعتبين بيتي ومتعارك وياها فاقد يكول صارت حرب وطلعت تردودم تصيح جايبين حيه شهرين خربتني ويا اخوي وخلته يطردني

وعمتي خابرتني فرحانة تكلي راح نرتاح من شرها

وعد :- عساها لا طبت للبيت خفة وراحة غدي ..

رهف ... جنت متطمنة ومرتاحة من حجي فاقد لان صدك وكف ابو على تك رجل وخلاه حتى يطرد اخته من البيت وابو نور كال بنته اعترفت هي جذابة وراح يحجي كدام العالم ويتعذر وبهيج تكون برائتي طلعت وارجع لرجلي مرفوعه الراس

باوعت لامي جانت ضايجة كتلها يمة ماتاخذيني احلل تحليل حمل

باوعتلي متفاجئة كملت كلامي :- كاطعة وهسة راح يصير شهرين بعد مابيها مجال لازم اتاكد

وعد :- وانه اخر من يعلم؟

رهف :- جا شنو احطلي سماعة واصيح الدورة كطعت ويمكن اطلع حامل

وعد :- هم بيتج يله يله بدلي هسة انزل اشوف محمود يوصلنه للمختبر ونحللج بس مانكول كدامهم عيب لحد مانحلل

هزيت راسي وكمت بدلت ورتبت وجهي ولبست شالي وجريت حذائي كلتلي :- نزلي لمحمود البس شيلتي وعبايتي والحكچ

طلعت امشي بايدي حذائي وكفت يم باب المطبخ البسه رفعت راسي شفت سداد بباب المطبخ الجوة ابتسم عادي من شافني

شحيت نظري عنه كال يعاتب

سداد :- شسالفة هيج الابتسامة صعبة لو ما اعجب وماتشتهين تتبسميلي ست رهف

رهف :- لا والله بس صعبة ماتطلع مادري ليش

هز رأسه وضل واكف كال وين رايحات

رهف :- للمختبر احلل تعبانة يمكن عندي نقص دم

سداد :- اوصلجن

رهف :- لا نخينا محمود راح يوصلنا

سداد :- لا خله يولي انه اوصلجن راح انتظرجن يم السيارة

عبرني وطلع بلعت ريكي مرتبكة طلعت امي خرطت خدي وكتلها

:- فلك سداد راح يوصلنا كتله احلل يمكن عندي نقص دم لا تحجين كدامه

وعد :- لا شسالفة امشي بس كون ما نبطي العالم راح يجون عليج يرجعونج

هزيت راسي وطلعت صعدت امي يمه وانه وراهم اخذنه للمختبر حللت تحليل حمل ، بشرتني المحللة اكو حمل ضحكت وغمضت عيني

الحمدلله حمد كثير الحمدلله على هذا الرزق السريع

طلعنة بالسيارة رجعنة وابد ما سأل شبيها مابيها دك نقالي فاقد جاوبته بعد السلام كلي وينج انه يم عمامج

رهف :- جنت بالمختبر ويا امي راجعة دقايق ويامن اجيت

فاقد :- ويا ناسنة الكبار جوة يم عمامج كاعدين يحجون وراح يطلعون الحمدلله صفت بعدين احجيلج الصار

راح اتانيج وارجعج وياي عمج قبل

رهف :- هذا هو انتظرني ما اطول ..

سديته ورقة الاختبار بايدي اباوعلها برضا مبتسمة الحمدلله هذا احلى عوض بالنسبة الي ، شي يجي مني روح جديدة تعوضني خساراتي السابقة

وصلنة للبيت طبيت جوة ورقتي بايدي راويتها لدرة وفلك وهمست حاااامل

فكن عيونهن بفرح ، ولكفنها مني فرحانات

فلك :- صلاوات متلهف بسرعه حبلج

رهف :- دجيبي جيبي خليني ابشره والله هسة يطير من الفرح يمكن نلكا واصل للسگف هههههه

فلك :- اي عيني اخذي اخذي روحي كليله الحب الزايد شنو جانت نتائجه

درة :- اذا عرست ما اسويها واحبل بسرعه يمة اسم الله الرحمن

رهف :- شمعرفجن انتن .. عفتهن ودخلت سألت محمود

:- وين فاقد مو هنا

محمود :- بالاستقبال يتانيج امج سلمت علي وطلعت

هزيت راسي وفتت متلهفة للاستقبال شافني كام استقبلني حضني بلهفة وباسني

فاقد :- كلبي جمر عليج يمن اندارلج فدوة

بس اضحك وعيوني تلمع ، رفعت الورقة عقد حاجبة وكال يستفسر

فاقد :- شني؟ امج شبيها

رهف ،، حجيت بحماس ولهفة :- حاااامل حبيبي حاااامل انه مو امي ههههه التحليل الي راح نصير ام واب ويجي طفل احنه اهله انه ويااااك

سداد :- صلاوات على محمد خال للمرة الثانية