تحميل رواية «لك ياذا الجمال اليوسفي» PDF

في المستشفى ، يوم النهوة ..

بارق _كلمتين وياها لا تصير مادري شلونك ما راح اخذ نصها

فالح _مو انتَ سماني ولسانك ينگط سم ما اريد تأذيها بحجاية وهي بامانتي

بارق _صدگ ما راح تتأذة ،، باوعلي شحيت نظري عنه لحظات ورجعت باوعت لفالح

_عادي فالح انه متعودة على لسانه اذا سمعت منه شي يضوج ما اهتم

بارق _سمعت؟ اطلع يله ما عليك امر

فالح خزره وانطاه نظرة بمعنى لا تجفص وتأذيها بس وين هذا بارق ابن هناء السم يمشي بداخله اذا تشرحو مايطلع دم يطلع سم عرابيد ..

طلع فالح باوعلي بارق وكعد على السدية لميت روحي وكتله بجزع

_طالعة روحي لا تطلعها بالزايد والله ما اطولها هاي الكهرباء موجودة احط ايدي كلها دقيقتين واسمع من هو ربك من هو نبيك

رفع ايدينه يهدأني ويسكتني وكال بهدوء

_ اريد اطلب منج شي واحد مو اكثر

_اخذ اخوك

_ذكية ما تعبتيني

_ اي ولان ذكية ماراح اخذ اخوك وما تلزمني نهوة عمي فاضل موجود

_ جاوبيني على سؤالي ، انتي ماتردين همام لانه همام لو اكو سبب ثاني

مثلا تعلقچ بالمرحوم حر

عقدت حواجبي ورفعتله ايدي استفهم

_شقصدك؟ لا تشمر

_ما مشمر انطيني جواب

_معليك

_زين عوفي الشطر الثاني وجاوبيني همام همام رافضته لان بي شي بي لوله لو هيج منها والدرب ما عاجبج

_منها وللدرب ما عاجبني

_ما تشوفين بي شي

گلبت عيوني بضجر وكتله بأعصاب

-مابي شي همام احسن منك وشريف ومحبوب وكلبه نظيف لا يأذي لا يجرح بس انه ما اريده هيج من الله احسه مو مناسب ما احس راح نتوافق سوية

_ويمكن اكو توافق بالاخير البشر ما تعرفينه زين الا تعاشري همام يطلع احسن من ما متصورته بعد

انسان نظيف وحقاني وبي من الصفات زينه ما لا تعد ولا تحصى انه اخو يومية انبهر بي

_منو حماد العروس؟

_لا والله مو قصة احمد بأخوي ترة انتي بنفسچ مدحتي وانه ادري رفضچ لهمام ورا سبب

يمكن انتظارج للعزيز الغايب هو السبب؟

مو شي منطقي واحد ينتظر بشر نايم جوة التراب

فزيت من سمعت كلامه وكعدت اباوعله بأستغراب كل الكلمات ضاعت لساني عجز حتى عن النطق

بارق _استغربتي ؟ حر ما يرجع بعد يرادله نبي يحيي العظام وهي رميم يله تشوفي واگف گبالچ

يحجي مبتسم

بكل صدمة كلت بصوت باهت _انغام؟

بارق _اشتريتها بالفلوس ولا تنفعلين احنة بمستشفى واكو ناس مرضى ومرافقين عيب بنيتي

حطيت راسي على المخدة الدنيا كلها افترت بيَ فر حسيت بصدري اكو شي انملخ

عبالك بارق مد ايده بين ضلوعي وشلع گلبي بكل قسوة

رجفت شفايفي ما اعرف شلون سألته

_تلاعبت بمشاعري شهور؟ وهمتني حـر عايش وهو ميت صدگ؟

بارق _للاسف ..

درة _ هم حاسب روحك بشر؟

بارق _ مو بشر ، انه عاصفة، برق، انه الصاعقة النزلت على راسچ بيوم الفشلتيني ورفضتيني گدام كباريتنا واصحابي وما حسيتي بوجعها الا بهاي اللحظة

درة _دفتر مذكراتي !!

بارق _ اخذته بفاتحه حر اجيت بيومها ويا عمتي نجوى اخذت الجن ملابس وغراض استغليت انشغالها وفتشت ومن وكع الدفتر بايدي ورسائل حر لمحت منهن كم سطر ما كدرت اكمل ضميته جوة قميصي ثبته بالبنطلون ، ومن صرت وحدي قريتهن ويا بوية على الحبيات والغراميات والمواقف الوفيرة الي خلتني اعرف كل تفاصيل علاقتكم ..

قريت كل شي اكثر من عشر مرات وعرفت شلون اجيج ، اخذت الاوراق الي بيهن كلام حر

ورحت لخطاط اعرفه كتله حاول شگد ما تگدر تكتبلي هذا الحجي الاريده بنفس هذا الورق طلعلي ورق مثله لو من جوة الگاع

اخذله شهر تقريبا ونفذ ..

وقبل لا يطلع قبولج كاعد يم سداد سألته عنجن

كال كلهن قدمن وبدن التربية بجامعة الكرمة ومعدلاتهن زينه واثقين من قبولاتهن

هنا انه شسويت بحكم عندي علاقات بهواي ناس نخيت واحد من جامعة الكرمة گتله اريد على عرفك بنيه نگدر ندفعها وتسوي الي نريده بمقابل مادي

گلي هاي سهلة حبيبتي لو تگللها امشي للموت وانطيج عشرة تركض ..

_انغام حبيبته اتفقت وياها ضدي

_عفية عليج وانطيتها صورتج وصورة حر وكلشي مطلوب ودفعتها بفلوس وهاي شوفة عينج شهور ما حسيتي وجنتي فرحانة مت عيني عليچ

فقيرة والناس تمشيچ بمزاجها وشلون ما تحب

نشغت مسحت دموعي استرسل بالكلام ... جنت متمني تحجين لامج وتخليها تتأمل وياج وتالي تنكسر

_ما حجيت

ضرب فخذه حيل _حرامات جان انقهرت وياج ورديتلها شوية من عذاب امي

_من امداك وجيرة بفرگك وبفرگ امك

_حبيبتي ..

_كوم اطلع منااااااا حيوان

_خليج هادئة بنت عمي ضغطج نازل ومعلگيلچ مغذي والحجي الجاي هواي

ضربت راسي حيل بأيديني وضليت احجي ويا من بين اسناني بغضب

_اطلع اطلعع نذذل حيواااان اطلع اطلع

بارق _طالع بس ردت اوضحلج وابينلج الحقيقة حتى ما تضلين عايشة بأوهام

ضيفي عليها همام ماايدري لو يدري جان خرب واجة كلج ماله ذنب لا تحقدين علي

حقدي عليه انه قاطعيني انه سبيني انه بس همام ماله ذنب والله وان كسرتي كل شي بدفترچ ينفضح

وضيفي عليهم دفتر حر الصار يمي

فكيت عيوني على وسعهن _شووووصله الك؟

بارق _سفانه صلاوات شلون تكرهجن بس كتلها فتشيلي ودوريلي دفتر اوراق شي ركضت ماصدكت واستغلت سفرنا للزيارة وفتشت لگتلي الدفتر وجابته الي

ضحك مستهزء _خرب بعرضها ولا تحب الفلوس بت الفگر

گام وكف على حيله وگال بنفس النبرة المستفزة الهادئة الي ما يوم شفته غيرها ..

_ترجعلج الدفاتر من يعقدلچ همام ، وانه اعترفت حتى ماتضلين متأملة وتأيسين

نكدر نكول هسة صرنه متصافين رديت اعتباري واخذت الاريدة وزيادة

بت عمي العزيزة من اليوم وصاعد مابيناتنا حسابات ولا كتابات

بأستثناء الدفاتر المتروووسة اسرار ..

طلع ضليت ارجف ما مستوعبة مصدومة واحس انسلبت روحي ، اجة فالح وطلعوني للبيت

اول شي عمي فاضل يرزل بيهم ويحجي عليهم وانه يم بيبي سعدية اسمع كل شي هي جانت تقرأ على راسي

لهناك وطب عمي فاضل وسد الباب كعد على الجرباية واحنة بالكاع صرنه كباله

فاضل _شلون صرتي بوية

درة _زينه

فاضل _ابن عمج ما رايدته انه وياج بس احنة مجبورين ننطيج اله ما نريد ننطيج للعار مؤمل ابن فرهود الناقص ابن النواقيص

كعدت ارجف باوعتله بكل صدمة فتحت شفايفي اليابسة احس اريد انطق ما اكدر مسح وجهة حيل بحيث صار احمر

فاضل _بوية احنة ندري من انخطفتي وكل شي نعرف وتدخلنا وخذينا حگج مربع بس هسة هذول ردو ويردون يستغلونه ويهددونا بيج يعني الا اكلج لو ما تاخذين ابن عمج تاليتج تصفين لابن فرهود

بجيت ضليت اناشغ وابجي عمي نزل للكاع ذب عكازته ومشى على اركبه لزمني حضني حيل وكال بحنيه

_عسى دموعچ غسلني وللگبر نزلني بوية درة

درة _راااح اموت رااح اموت الف صدمة والف سر عدكم والله تعبتووووني وعلعلتوووني من الله يااخذني واررتاح الله ياخذنيي وارررتااااح

فاضل _والله علمودج ساكتين غير ما ردنا نفتح دفاتر مسدودة

درة _شلون رجع وليش يريد ياخذني عمووو لا تنطيني اله هذا راد يعتدي عليَ والله اذا ذيج المرة ما متت هاي المرة انه بنفسي اصب على روحي نفط واحرگ روحي

فاضل _ابوج فاضل موجود وراسه يشم الهوى وتصيرين لمؤمل؟

سعدية _ابو ليث فهم البت اشرحلها علمود تعرف شكد يعزونها عمامها وشسوة علمودها وليش يردونها تاخذ همام

جنت اشهك وهوا حاضني يمسح على زندي وراسي

فاضل _ سمعي بوية كبل سنتين اخوج هاني سوا طركاعه

سعدية _جا انته تكرها باخوها؟!!

فاضل _لزوم تعرف كل شي حجية

درة _شسوة هاني؟

فاضل _سمعي هاني من جان زغير متعلك بنهى بت خالج المرحومة مرت حر هي جانت مثل لمربيته فهمتي شلون وان جان فارك العمر مو كلش بيناتهم بس شايله مسؤوليته سنتين ثلاثة من جان يم جدتج عايش

صارت وحر كتل نهى وحرگ جهاله وانسجن

بعدت راسي وكلت مستنكرة _لا تجذبون مايسويها حر هذا اعرفه اكثر من روحي حمامة ما يأذي

فاضل _وهوا اعترف وانسجن بعد شلنا غرض غير من لسانه ومحد يعرف الاسباب بعد الله يرحمه هم تاب هو وربه ينجازون

درة _لا تكمل ما اصدك الباقي

سعدية _سكتي وسمعي كلشي لا تكاطعين عمج

فاضل _سمعي بوية هاني حقد على حر ورجع حقد علي اضعاف من عرف انتن مرتاحات يم حر وهم تعذب يم خواله ورا ماماتت الحجية جدتج

شلون صار عندة مرض نفسي

سعدية _تسودن الولد وعقلة ماهو اله الحقد عمى عيونه

فاضل _الحقد صار على امج وخواتج رهف وترف شلون ماادري بس هوا تعقد ويكوم ويكعد يكول اكره حر لان كتل نهى واكره وعد لان خذت درة وعافتني يم خوالي متعذب ، لهناك اجة مخبل علينا رجعو خواتي جيبو خواتي

كلناله بوية مانكدر هي اصلا وعد حرمة عمك وعمك راضي ماطولها ماماخذة وكاعدة على البنات

وهم شرحناله الاسباب والحروب الصارت هنا كال هذا هوا واقتنع بوجهنا

بس بالظهر زاد كرها ما قل

روح لفرهود يدري بي يكره حر وبيناتهم عداوات واتفق ويا تعاال يا فرهود اخطف رهف علمود اجي لعمامي اكلهم ترة ماحافظو على البنات وبعدين رجعها واريدك تسوي سالفة كون تبين خطفك لرهف هو بسبب عداوتك ويا حر

بس بدون ما تكشف روحك كون ما ينعرف الخاطف منو ..

هو شايف رهف يم الباب عباله انتي ومصورج من بعيد مراوي الصور لفرهود وكايله الثانية رهف اخطف التمشي وياها لا تخطف درة هاي اختي من امي وابوي مااريدها تتأذى

شلون استنتج البنية الشافها درة ما ندري يكول شفتها تشبه النه ما تشبه وعد ورهف بيضة هاي حنطية مايله للسمار يعني هاي درة

اجة فرهود خطف درة ،، صارت السالفة احنة ما ندري ورجعتي واحنة ماندري

ورا مارجعتي اجة هاني يكول وصلني خبر درة مخطوفة عباله ماراح نسأل ونشوف وندور ..

شلون منو خاطفها كال ما يدري ، احنة والله رحنا ونشدنا بالمنطقة عرفنه الخاطفينها ذابين تهديد وعدهم عداوة ويا حر بطريقتنا عرفنا فرهود الخاطفج وانسجن

بدينا نشتغله وهو بالسجن اول شي ما اعترف بعدين زاعها كلك بعد انه انفضحت خل افضح هاني وياي خو ما بس انه اطيح بيها ويعلگ ويا عشيرتنا والعيبة تصير علي وحده

درة _وفرهود هيج غبي ويورط روحه

فاضل _مو هيج بلاش غير بفلوس وهم راد ياخذ دفاتر من حر وما جان محسب حساب ينفضح عبالهم كل شي راح يصير بالسكته

وهاني عرف المخطوفة درة من فرهود كايله طلعت درة هاي مو رهف

درة _وليش ما انسجن هاني

_ماكو دليل وانتي ماذكرتي هاني

درة _لان ماشفته لو شايفته جا ذكرته بس اريد اعرف مؤمل شعنده فوك ما انه المخطوفة والمتأذية

_احنة ما عبرناها عوقنا فرهود خليناه تك رجل ومؤمل عدمنا رجولته جيف راد يعتدي عليج

هسة طلع مؤمل وفرهود شارد من السجن ، دزولنه تهديد يتوعدون ما ندري شراح يسوون

خلينا واحد من كرابتهم يشمشم النه خبر كال يردون يجون يخطبون درة لمؤمل واذا رفضو يفضحها يكول صاحبتي وطلعت وياي وسلمتني روحها ما جانت مخطوفة

ناس بربرية ما يستحون ولا يخافون ما يهمهم شي المهم يكسرونه وياخذون حقهم مثل مايدعون

واله هم مالهم حك يمنه الصار بيهم مستحقينا

سعدية _ما ظنتي صدك هذول نيتهم گشرة لزوم نحافظ على بناتنا وحتى الويلاد بخطر

فاضل _ادري حجية ادري

سمعي درة احنة طردناهم كبل يومين كلنالهم مالكم مرة يمنه وضلو يهددون بينا احنة مستعدين نتكتل كلنا ولا يكعدون بنص ديوان ويجيبون سيرتج بالشين

الله يعلم شني اكو بداخلهم ولشني ناوين الظاهر راح يسوولنه طركاعه احنة هسة لنريدة منج تقبلين بهمام حتى تكونين بذمة زلمة عاد شما يوو وعملو انتي مرة معرسة ومايصير ننطيج لمؤمل تحت اي حجة او ظرف

مو بس انتي وداعتج اتفقنا انه وصادق حتى فلك راح ننطيها لفالح حتى ما تضل عدنا بنيه ويسوولها كولبة وتعالو انطونا مرة تالي يلزمونا من ايدنا التوجعنا وتصير وحدة من بناتنا حدر رحمتهم

درة _وهاني؟ ماشاءالله مكافئه وناطي بنتك فوك عملته

فاضل _والله عذبناه اسوء عذاب لا خلينا ضرب ولا اهانة ولا حتى حبس وهو ندم وبچى وتوسل يله غفرناله

درة _وين انه اجيت ورا فترة كصيرة وكلشي مابي

فاضل _هسة هسة اذا ترحيله وتشوفين .... انفتح الباب طب هاني عبالك جان يتسمع عيونه تدمع

سد الباب ونزع تيشيرته جسمة يخوف كله اثار جروح

هاني _انه اشوفها عمي هاي اثار الضرب والجروح السووها الي ولد عمامي لزموني وكتلوني وكل ما تصير مشادات كلامية بيني وبين واحد منهم بسبب الموضوع يضربني جانت اعصابهم نار لان بسببي واحد دنس العرض

وحتى سلمت روحي للشرطة يومين وطلعوني عمامي

هناك انه بنفسي خليتهم يعذبوني علمود اخذ جزائي وندمت اشد ندم والله وروح امي خالد عماني ويوز بيَ عليجن وعلى حر

غطيت وجهي بايديني مو كل شي جان منطقي بالسالفة والي خلاها سالفة مؤذية هو كونها ماجانت منطقية بالشكل الي يرضيني ويخليني استوعب واكول اي والله لازم اخذ همام واسامح هاني وكل شي يمر طبيعي ..

بيومها جانت صدمة تمرضت عمي فاضل يشرحلي

ويوضحلي ماراح يصير شي وان صار هم عشيرة قوية وراح يندمونهم بس الخوف كتلني كتل

رجعت امي وحجتلي نفس السالفة عمي حاجيلها من هيج رادت تنطيني الصهيب حتى ما اروح واصير مرة لمؤمل تحت اي ظرف او حجة

وافقت على همام بالاخير انه طلعت مخدوعة وحبيبي صدك جوة التراب عافلي الاه والونه وراح وحياتي بعد ما تسوة شي

شنو يريد يصيرلي خل يصير اكثر من المريت بي؟ لو هناء تسببلي اذية اكبر من الاذية السببها الي مؤمل؟!

ورا العقد بارق اشرلي اطلعله للمنور وسلمني الامانه

باوعتله وعيني مدمعة

_حسبنا الله ونعم الوكيل بيك عيشتني بچذبة جبيرة طيرتني للسما وفجأة نزلتني اسفل السافلين

خليتني افقد روحي من روحي

بارق _بعد يا بت عمي الفات مات وهسة انتي حرمة اخوي ما بيناتنا

درة _تضحك؟! امدا شاربك هم حاسب روحك زلمة ولك انته عار الزلم

عفته ودخلت اغلي ضميت الدفاتر وحسيت روحي ميته ضليت اطلع دفتره وكروته احضنهن لصدري وانام ابجي

_____

دخلت ام فالح تلطم وتكطع بروحها ذبت شيلتها وضلت تكطع بشعرها وتعيط

_راااح وحيدي رررراح فااالح ..

نجوى _يمة الزهرة يمة

سعدية _حضرينا يَ ام الحسن والحسين ولج شمالچ رحاب شمالچ الولد شجراله

ام فالح _گابليني حجية ولطمي وياي على حظي يمة راح وحيدي يمة

سعدية _فتيتي افادي فت تحجين لو شلون؟

ام فالح ضلت تنعى وتبجي

_شحجييي يا حجيييية شحجييييي

وليدي وحيدي وهل كسررر ظهررري

ايده تعدت على بني ادم وطگه والولد موااات

ويمة لو مااات شگولن للعمات وللخوااات

وليدي وحيدي وصار بل ظللمااات

وما يشوف النور لو هل ولد مااات

نجوى صرخت وضلن يگولن ويلطمن _يبووووووووي

اسم الله عللولد من نشغه المووووت

رحاب _ صدك مسجون يالبراسك يحلفون

سعدية _يبوووووووووي

نجوى _هذا ابن اختنا صدگ شااالع گلوبنااا يبوووي

رحاب _انا ردت الولد بنعشي يتمشى يبووووي فليح يبوووي

وعد _يمعوووودات شبيجن تفاولن وتلطمن وانتي حجية تلطمين وياهن خذاج الواهس وتصرخين

سعدية _هيهووو الحضيرية تريد تعلمني جا غير تكلك جاتله واحد شلون ما الطم واصرخ

وعد _هذا فال موزين خية ام فالح فهمينه السالفة كلوبنا راح توكف

ام فالح _ ماادري خية ما ادرررري

نجوى _يبوووي راح الفرخ راااح

رحاب _ولك يممة فليييح يمة انه ردتك بيدك تغسلللني

نجوى _يممممه

رحاب _يمة وللگبر بيدك تنزللللني

نجوى _ولججج خييية

رحاب _وبيدك تهل تررراب گبرررري

سعدية _يبووووووي

رحاب _يمة فالح من كون السجن لمني

سعدية _اي والله لام رحيب ولا فليح المكرود توة عريس ماشابع بعده

رحاب _يمة فلييح يمه

وعد _والقران ما تصير الجن جارة ترف ركضي لعمامج بالديوان تأكدي شوفي شصاير ورجعي

ترف _خوش يمة

طلعت للديوان شفت الولد سوولي حركة بمعنى دخلي

كتلهم

_دزوني يردون يعرفون شصاير

_سالفة طويلة دخلي بس فالح مابي شي والولد ما ميت

قوست شفايفي ما عاجبني ودخلت كلت الامي هذا الحجي كالت الحمدلله الله يستر

عمة رحاب ونجوى وبيبي سونها فاتحة

وفلك كاعدة ع درج تبجي وتمسح بدموعها بطرف ثوبها

الحجية تباوعلها وتصيح _جبح حظج يفلك جبح حظج حتى ما حبچ (باسج) وعافج وراح للسجن

وفلك تزيد بالبواجي والنحيب يحسسوني فالح مات اسم الله علي واحنة لسه ما فاهمين شي

حد ما طب سداد رهف جانت واكفة يم الدرج تلگته تكله هاا

سداد _فالح متخالف ويا ولد وطاگة والولد موات

رهف _فالح وين؟

سداد _بالتوقيف

رهف _ياا منو بلغ علي

سداد _توة السالفة وبكتلته طابين الجيش للفرع وكبل شايلينه

رهف _واذا مات الولد

سداد _طبه مرض لجهنم وبئس المصير

وعد _عمة فهمني وليد عمك ليش طاك هذا الزلمة

سداد _واحد ناقص غيرة وشرف ويستاهل عساه بالموت ونلم فصله على العشيرة الف الف

وعد _وفالح غير ينسجن

سداد _يتنازلون ونطلعه غصبا ماعليهم طفح عدنا الكيل وصار لازم نخوفهم ونخليهم يلزمون حدودهم

رهف _يااا يعني اهل العركة نفسهم من الله لا ينطيهم

سداد _لا غيرهم ناس سرسرية يدورون حك ويانه وهم مالهم شي يمنه

درة .. من حجة هيج عرفت المقصد هذا يقصد خوالي وسالفتهم ماكو غير فرهود وابنه

كعدت يم فلك ابجي واناشغ ياربي فالح بسببي راح ينسجن ويمكن ينعدم امسح بدمعه وينزلن اربعة

فلك بهمس _كله بسببي الله ينتقم مني

سمعتها مستغربة ورديت عليها بهمس وانه امسح دموعي

_لا بسببي انه الله ياخذني راح يروح فالح من وراي من الله خلقني عذاب بعذاب لو بية خير ما ماتت امي من جابتني

ضلينا ننحب ونبجي عيونه ورمن من البجي لليل والدنيا كايمة فوك روسنا لا اكلنا شي ولا النه خلك لأي شي ثاني

عن طريق حجيهم وعياطهم من برة سمعت اسم فرهود ومؤمل يعني انه السبب بكل شي فعلًا

ل12 صعدت ابجي طلعت صورة حر حضنتها وانه ابجي مختنگة

تعال شوف شصار من وراك تعاال ولو ما بيك جية واعاتب الصور وماكو فايدة

ماراح تجي وتمسح دمعتي وتشيل عني همي وغمي وتبرد كلبي بحجاياتك

بعد ماراح اسمع منك كلمة عطري ولا تگلي جعب گلبي ، امسح بدموعي واعاتب الصور والمشكلة الصور مثل ما گلت سابقًا لحظة سعيدة نجمدها ونرجع نشوفها وتعتصر گلوبنا ونتمنى لو يرجع بينا الزمن دقيقة وحدة لوراا

اعرف ما الك جية

وانه وداعتك هم كلت هاهيه

بس حتى من اصد والتهي بغير اشياء

بالصدفة ذكرياتك يتحارشن بيَ

نص الليل ودگونه وهسة ماندري يا عشيرة دگتنا جنة بوحدة صرنه بثنين

طكت روحي وكرهت روحي سحبت روحي ونزلت جوة ابجي واشهك كعدت ع درج منهارة

وكف الرمي مشيت للمطبخ اجر بروحي جر سديت البيبان وفتحت الغاز وكعدت جوة الطباخ ابجي

ياربي كون اموت هاي المرة ويرتاحون مني ومن مشاكلي وضيمي

انه عاله على العالم ومأذيتهم ومسببتلهم قلق وضيم بسببي هسة فالح بالتوقيف ويمكن ينحكم مؤبد والله يعلم اذا اكو شي اسوء من المؤبد

امسح دموعي وارجف ، كلساع ارفع راسي اشم ماكو ريحة غاز جا يمتة اختنگ واموت؟

تمددت كلت خل انام شوية واختنگ واموت بدون ما احس

قريت الشهادة والفاتحة الام البنين بنية تسهيل امري

وغمضت عيوني گلبي ينبض بقوة وجسمي كله يرجف اكو غصة بداخلي اريد انفجر واصرخ واكللهم كتلوني موتوني ولا تضلون متعذبين بسببي

غمضت عيني وما حسيت غير صوت واحد يگلي

_منو هو ربك

درة _الله ربي

_من هو نبيك

_محمد نبيي

_منو زوجچ

_ما متزوجة

_مخطوبة

_اي همام خطيبي

_ثول حتى ثول هو اليفتح الغاز غير يتأكد من راس المنظم

فتحت عيوني متفاجئة شفت سداد وحمودي واكفين يضحكون رفعت راسي خجلانة همزين لابسة طويل والحجاب يمي ..

حطيته على راسي وهم بعدهم يضحكون

محمود _محاولة انتحار فاشلة مو خوش مفتحة العيون ومنظم القنينة مگلوب

سداد _حظًا أوفر

درة _لا تستهزئون حرام عليكم والقران عبالي متت حتى كلبي راد يوكف من سمعت حمودي كلي من هو ربك عبالي منكر ونكير

حمودي _والله بطرانة على شنو منتحرة هية كلها يومين تلاثة تنحل المشاكل وتصير سوالف

درة _فالح ما ينحكم مؤبد

سداد _لا نسويها عشاير ونحلها ويرجع بعد المن شايلة هم ومقهورة وجاية تنتحرين

محمود _وما كتل مؤمل علمودج اكو سبب ثاني

درة _شنو

سداد _شعليج يله صعدي كملي نومتج نريد نتريگ هنا

كمت صعدت لفراشي كملت نومتي بس كله اتحلم وافز مخروعة

ساعة ابجي وساعة اتخيل فالح بركبته حبل الاعدام ويباوعلي بحزن واضل اناشغ من البجي الا شوية جان عقلي ضرب ما اعرف شلون سيطرت ..

رهف _ايامنه صارن سود من جهة فالح

ومن جهة ثانية درة وفلك ثنينهن مريضات وحدة نكعدها تطيح الثانية تموع علينا المغذيات صارن بالبيت اكثر من الاكل والشرب من ورة فلك ودرة

وبس ينوحن ، والرمي تعودنا علي من يضلون يرمون ننزل نسأل هذول يا عشيرة دگونه؟

تكول مو الگرنة صارت الارض الطيبة

هم زادت غياباتنا احنة كلنا خل تولي السنه اهم شي سلامتنا بس بعد درة الشاطرة كالت الا نداوم

عمي فاضل بدل السايق واجانة واحد غيرة اخذنة ثلاثتنا ومرينا ع ياسمين وجمانة خذيناهن ويانه

صعدن بالسيارة جمانة جانت ضايجة حيل حقها غير اخوها وبالسجن وماينعرف ليش بس الزلم يدرون وما يحجون گدامنا

ياسمين _الحمدلله تخطينا مرحلة الخطر منا وهيج ما نسمع لا اصوات البيكيسيات ولا البنادق من كون الله هلكهم موتونه موت

شاركتها الحديث وكملت كلامها

_عوزهم بس بذبون علينا رمان صايرة مسلسلة الارض الطيبة

ياسمين -والله انه گلت وادي الذئاب والبارحة كله ابجي طبت امي كلتلي شبيج

كتلها بس لا ياخذوني فصلية واشبع كتل

رهف _شنو بكيفهم

جمانة _ ن ناقص يدورون ف فصليات ن نهد عليهم ن نسويهم مزق

ياسمين _اي والله نطب بيهم طول بعرض بس المشكلة العشاير ما يعترفون بالنسوان وما يهدون عليهن بس ع الزلم

رهف _بعد احسن محد يحاسبنا

استمر حديثنا شوية طلعنا من جو الحزن والاكتئاب وحتى كدرنا نضحك جمانة

وصلنة للكلية اخذنا محاضراتنا وطلعنه ننتظر درة بملل

وهسة تجي هسة تجي ماكو كالت ياسمين بأهتمام

_خاف طاحت؟

جمانة _ ا اي صدك

رهف _هسة لو ميته هم يمها عالم ترد على نقالها والله راح اروح اشوفها

ياسمين _نجي وياج ونطلع سوية ما نضل نجرجر على السايق

فلك _انه ما اكدر امشي رجلي تأذيني راح اكعد هنا انتظركم لا تتأخرون

رهف _جمانة ضلي يمها انه وياسمين نشوف درة ونرجع

هزت راسها وكعدت بصفها انه وياسمين اخذنا الطريق سوالف وضلينا ندور بالوجوه ماكو

نخابر ماتجاوب ، فوك النص ساعة ماكو اهل المسائي دخلو محاضرات وفلك تخابر تكول ما اجت

السايق خابر على عمي فاضل ، گله خليك شوية والولد جايين بالطريق

رجعنة يم السيارة نخابر وماكو رد منها تقريبا ساعة وكسور وصلو هاني وسداد ونجم

گلوله للسايق اخذهن وارجع انه جنت ابجي وخايفه دكيت رجل وكلت ما ارجع

سداد خزرني وتقرب مني حيل

_كتلج رجعي احنة راح نخلي اسمها ومعلوماتها ونطلع للمستشفيات ندور يمكن طاحت لو صار عليها قدر

رهف _اضل وياك

سداد بغضب - رهف كتلللج رجعي رجعي هي عناد

رهف بتوسل _مو عناد بس هااي اختي

هاني طكت روحه كال _غير اختنا احنة هم صعدي يله حط ايده ع راسي ونزلني خلاني اصعد غصب باوعتلهم بتوسل وعيوني تجري

_خابروني من تحصلونها لو تعرفون خبر عنها

رفع ايديهم ومشى السايق

ضليت اتلفت اباوع لسداد بقهر وهو يباوعلي

انتبهت سيارة همام طبكت ونزلو منها بارق وهمام

راحت تصير مصيبة بس لا درة انخطفت لو!!!

لو شردت!!

النجف الأشرف ، مقبرة وادي السلام

وحيد قبره مسافة عن باقي القبور مطل من بعيد على نهر

الطيور طايرة والسما مغيمة بيومها كعدت يم گبره اتحسس أسمه بأيدي

وابجي دموعي صارت تنزل من عيني گبل على شاهد الگبر ، نصيت ابوس بأسمه وابجي

ما مصدگة انته صدگ رحت ما مصدكة والله جان عندي امل بس يا حيف خابت كل امالي

وين من جنت يمك وهسة وين محد يكدر يحميني مثلك ولا اكو بشر احس بالامان يمة بكدك

الدنيا صارت تخنكني اريدك يمي اريد احس بالامان من جديد

حطيت راسي على قبره ابجي ونمت مرت ساعات وانه على گعدتي رفعت راسي الدنيا صارت حمرة مغرب الخوف دب بگلبي بس مجرد ما لمحت اسمه اختفى كل شعوري بالخوف وحلت السكينه محل الخوف

حتى وانت جوة التراب احس بالامان وانه يمك ..

ابتسمت وحاجيته _راح اضل يمك حد ما اموت واندفن بصفك

اجاني صوت من وراي مو غريب على أذني

حر الدين _عندما اشتدت رياح الحنين في قلبي قلت ربي ارني اياه حتى لو حلم

واذا بكِ حقيقة تعادل الف حلم سعيد

شهگت مصدومة من الشافته عيوني واگف بطوله گبالي بأيده عكازة وجهة ذبلان ولحيته طويله

غمضت عيني وفتحت ابتسم وتقدم خطوتين بأتجاهي

طفرت من مكاني وركضت الحضنه ، جنت مثل الحمامة ولكت عشها لف ايده على ظهري وحضني حييل

حر _يَ عطري الماكو هوى من بعد هواچ ملئ ريتي .................