تحميل رواية «لك ياذا الجمال اليوسفي» PDF

ي

رهف :- هسه فهمت سالفتچ كلها وعرفت حبچ لعباس ومنين بدت علاقتكم و وين انتهت بس الماعرفته لحد هسة شذكرچ بي؟

جمانة :- ص صارلة ش شهور يهدد بيه ي يريد ارجع علاقتي ب بي وانه على ذ ذمة بارق

و انه لو ا اموت ما اسويها ش شرفي ر ردت اضحي بي م مرة ما ا اعيدها م مرة ثانية

رهف :- و بشنو يهددج صخام الصخم عينه من لا عرفه العباس كون المسمينة بأسمه

جمانة :- ي يدز كل صورنه س سوية لفالح ي يكلي ابن ع عمج سترچ وانه ا افضحچ ب بس انه ما جاي ارد ع علي وا احظرة يجي من ر رقم ثاني

رهف :- شوفي مبدئيًا لازم تعرفين شي وتكونين واثقة منه ان عباس ما يسويها ويدز الصور لفالح ويفضح روحه قبل لا يفضحج اذا سواها معناها تنفتح علي بيبان جهنم بدون ما تنسد

جمانة :- ش شبيجج انتي ه هذا ساقط

رهف :- ساقط بس جبان حسب كلامج مبين كلش جبان وما يسويها لان تصير طلابة ويكومون الدنيا على راسه وتعال ضل خاتل طول عمرك واهله يتورطون لان هاي سالفة شرف

ولو يريد يسويها جا سواها من زمان شمعنى شهور وممسويها .. ولك جووون لا تطيييح

بس اوكفي جمانة انتظري لحظة

تعال انزل من احترگو

كاتي :- صشيشششة تعال انزلي

رهف :- اخذي ابنچ وداري لا يتعور خطية وشلون تحطين هذني هنا ماغير يتعور بيهن شيليهن فدوة

كاتي :- هاي صشيشة وكيهة (وكيحة) اكول لـ هر تگول خلي تلعب صشيشة صغير

رهف :- هههههههه داخذي اخذي ياعيني

اي جمانة وين وصلنه مثل ما كتلج سالفة شرف ما يورط روحه ابد لا تخافين وارتاحي وتطمني لو اذا كلش كلش احجي لبارق

جمانة :- ا احجي لبارق و ي يسوووي شي وتعاي الزلم ت تتكاتل من و و وراي واصير ع علج بس احجي ل لبارق تكبر السالفة

رهف :- هذا هو لا تحجين بدلي رقمچ ولا تنطينه لأي بشر من خوالچ حتى ما يوصل اله ويرجع يهدد

جمانة :- ا اي ه هااي مشكلتي ش شلون ابدل رقمي اذا ا اكسره بارق ي يشك و اذا ا اكلله احد مضايقني ا اكيد. راح يطلب ر رقمه عل علموود يطيح ح حظه وشلووون؟

رهف :- هاااا لازم تضيعينها يعني

جمانة :- ش شلون؟ ش شوفي انه ا ادري م ما يسويها بس بس لازم اغير ر رقمي لان ن نفسيييتي تدمرت ا الخوف ذ ذبحني ذبح ص صرت اوهووس و وبس ابجي م من الخوف بالحمام

رهف :- لحظة اصفن الها شوية .. شتسوين شتسوووين؟ بيش الساعة بارق يرجع من الشغل

جمانة :- اكثر شي بالثنتين ونص

رهف :- بعد ساعة يعني سمعي راح اعلمچ شنو تسوين ونفذي بالحرف علمود تبدلين خطج هاي الخطة اتوقع تفيد

جمانة :- ا اي اسمعچ

رهف :- ترحين تنكعين مبايلچ بالماي تنگع و شتسوين تفتحينه تشيلين البطارية وتشيلين الشريحة يعني تفتحين غراض المبايل كلهن وتحطينهن ع هذا الميز شفته عدكم مال الاكل بالمطبح حاطينه يم الكاونتر

جمانة :- اي ا الميز

رهف :- تفرغين غراض الثلاجة والنواعم مال الكاونتر الجياس القواطي كون تترسين الميز ترس غراض خوش وزباله اريد تصير زبالة

وتعوفيهن من يجي بارق كون انتي بالمطبخ من يدخل يشوفج عباله جاي تنظفين شتسوين هنا تستقبلي عادي لا تحسسي بأي شي وتغدينا وهيج بالغدا بالسوالف تگليله مبايلج طاح بالماي يمكن عطل

واذا سألج وينه ومن هذا الحجي گليله ذاك على الميز فتحت غراضه كلهن

و ورا الغدة ترجعين للمطبخ تشتغلين وتلمين علاكة زبالة هنا شتسوين تذبين الخط بمجرى الماي ويروح

وتنزلين علاكة الزبالة وتصعدين عادي تحطين البطارية بالمبايل وتشغلي عطلان ما يشتغل تجين لبارق تكليله المبايل عطل احترك بالماي وتذبينه بالكنتور بالجرار بأي مكان بعيد عن ايد بارق حتى ما يگلبه وخاف يفتحه وشي

هنا شنو تكليله تردين جديد طبعا هو عنده خير من الله ماراح يرفض بس شنو اريدج تماطلين تكليله اريد مبايل على ذوقي ها اريد سامسونگ ها تريد ايفون خليني اصفي بالي ماطلي كون يومين هيچ

بعدين ثبتيلج على مبايل خلي يجيبه الج خوش

من يجيبه سوي روحج رايحة تطلعين شريحتج حتى تحطينها بالمبايل ومن ما تلگيها سوي روحج مستغربة وتدورين وكولي يااا بس لا كنستها ويا الزباله لو لميتها ويا غراض المطبخ وراحت ويا الزبالة

هنا الزبالة مموجودة البلدية ماخذينها يعني وحتى اذا مماخذيها صايرة هواي ماتعرفون العلاگة الذابتها انتي يهي علمود تدورونها

وسوي روحج تدورين ومتضايقة لان بيها ارقام صديقاتچ وراحت

هو ماراح يحس وراح يشتري خط جديد مثل الورد ولا تنطي لأي بشر من خوالچ خلي يولون

جمانة :- ا اذاا نكع ب بالمااي ماتخرب ال الشريحة

رهف :- لا مرة نكع نقالي ماكو ماخربت ضلت تشتغل بلوة

جمانة :- ر راح ا اطبق خ خطتچ لو ب بالهدف ل لو بالنجف

رهف :- بالهدف بس صيري سباعية احنه مانريدة يحس انتي مخربته حتى ما يشك بشي

جمانة :- خوشش ... نهيت الاتصال منها جبت مبايلي وحطيت دولكة ماي جوة الحنفية وذبيت المبايل ابطنها بس كلبي انمرد على مبايلي شسوي مجبورة علمود ما يشك ، خليته فترة

طلعته من الماي غركان اشغله شاشته صارت سودة

ذبيت الماي وضميت الدولكة وفتحت غراضة حطيتهن على الميز وبديت افرغ بالغراض اجيب واحط ع ميز وسويتها هوسة وطشرت شوية فاصولية اعذرني ربي طشرت النعمة بس مجبورة لا ينهجم بيتي

وعندي بهارات بكوارتين فرغتهن بعلب وشمرتهن ع ميز وسويتها هوسة وهم من التوتر ضليت الهي روحي بالتعزيل وعزلت جزء والهوسة هي هي على الميز

لحد ما اجة فتح الباب باوعلي اشتغل فتحت الحنفية اغسل ايديني

جمانة :- ا الله ي يساعدك ح حبيبي

اجة حضني بسته بخدة و هو يباوع ع الهوسة

بارق :- اليوم تعزلين الله يساعدج

جمانة :- اي والله ا اعزل الكاونتر والثلاجة و و وصخااات

هز رأسه ابتعد وتمغط : شنو الغدة ميت تعب اسبح واجيج لو ماطابخة؟

جمانة :- ل لا شلون مسوية م مركة بامية وتمن ع ما تسبح اسوي ز زلاطة

هز رأسه جاي يطلع و وكف كال :- شنو هاي مبايلچ شبي مفصخته

بلعت ريگي بتوتر گتله :- طاح بالماي

اخذ الجهاز گلبه نكته يطفر منه ماي

:- وين مطيحته هذا

جمانة :- ا انكع ت تمن و هو ب بيدي اشوف مسلسل و فجأة طاح بالماي بس ط طلعته محروگ ف فتحته ب بلكي يشتغل

اخذ البطارية ركبها فتحه محروگ گال وهو يقوس شفايفه :- هذا عطل وتصليح ما يتصلح نقال بنية وبي صورچ الطرگاعة اجيبلچ واحد جديد

جمانة :- ب بس ت تجيب الي ي يعجبني و أريده

بارق :- خوووش تدللين

شمره ع ميز وراح للحمام سبح كملت زلاطة ونقلت الاكل للصالة طلع تغدة و راح نام كملت تعزيل المطبخ سويت بالضبط مثل ما حجت رهف

سألني العصر وهو واكف ع مراية يمشط

بارق :- تردين بدربي امر على صاحبنا عنده محل تلفونات واجيبلچ واحد

جمانة :- ل لا ببالي اكثر م من نوع خليني ابحث ب بعدين و اختار نوع من ا اصفي بالي ا اكلك تجيب

ابتسم و خصم عيونه بمكر :- چنچ راح تختارين واحد يكسر الظهر و تهلسيني هلس

رديت بدلع :- يغلى ع ع عليه المبايل؟

بارق :- يخسى المبايل جنج على اغلى مبايل يرخصلچ

حضنته وبست كتفه

:- الله ل لا يحرمني م منك ح حبيبي

نصه باس طرف شفتي :- اروح فدوة لهذا اللسان الحلو بس حبيبي الي يجييبلج اغلى مبايل ما اله هدية؟

عمزلي بمكر غطيت شفته بأصابعي

جمانة :- ل تطلب تفقد ق قيمتهة الهدية ا اذا نطلبت خ خليها عليَه حبيبي

كرص خدي ورفع حواجبة بأعجاب :- تخوووووف مرتي حبيبي

درة ... چانت ذكرياتنا حلوة بس بعد الوكت مشى وكبرنا وكل واحد اخذ نصيبه من الدنيا

حر ... شلونه وياچ

درة ... والله زين همام گلبه طيب ويخاف الله بيه الحمدلله

حك حاجبة ونصة يباوع على الگاع و بعودة صغيرة لازمها وبالكاع يخطط بيها

حر ... تستاهلين واحد يرفعچ فوگ الغيم هنياله فاز بيچ انتي اعظم شي كسبه همام

هزيت رأسي وابتسمت بدون رد

ترف ... خالووو وين هديتي مال المعدل مو گتلي الج هدية جبيرة شو ضربتها تغليسة لا عبالك انه استحي وما اذكرك لو ما اطالبك

رفع رأسه يضحك وباوعلي مستغرب ...هاي يمتة طلع لسانها

درة ... من قبل بس ما جنة ملاحظين

ترف ... لا تغير الموضوع خاااالو

حـر ... طلبي التردي واجيبه ما اعرف بسوالف البنات انه ، باوعلي وكال

...شنو اجيبلها همام شيجيبلچ هدايا؟

درة ...ليش؟ تاخذ افكار قصدددك هااا

هز رأسه بالموافقة قوست شفايفي ورفعت عيوني للسما اتذكر و رديت

:-اخر مرة اشترالي سترة وبنطلون قماش وحذاء تكرم وجنطة ومرة جابلي ساعة حلوة مممم ومرة جابلي محبس ذهب جان عيد ميلادي

ترف ... التنسيقة تموووت خالي شنو الجنطة تعجب اخذني للسوگ واشتريلي نفس المشتريهن همام لدرة يخبلن

حـر ... هاي هيه تدللين كومي بدلي وجيبي سويجي ومحفظتي وتعاي

هزت راسها وطفرت حضنته وباست خده ...شكرااا خالوو

راحت للبيت تركض ضلينه بس انه ويا وحدنة كاعدين الدنيا عصر والهوى حلو بي برودة اليوم شمال

ضل منصي ويسوي بحركته نفسها بالعودة يشخط بالگاع ، گتله بحسرة

درة ...فوگ السنتين

حـر ... اييي بعدها جروح الزمن تنزف بگلبي روحي تشوهت عطـ... درة

درة ... صرت عطـر غيرك

حـر ... لا والله

درة ... ممممم يحضني وعطره يختلط بعطري من اشم ثوبي الگه عطره بيه ومن يرجع للبيت يگلي عطرچ تارس هدومي ترس

حـر ... واكيد يشم قميصه ويضيع بريحتچ

درة ... ممممممم

حـر ...تردين تحرگيني

درة ... يعني

حـر ... ليش؟

درة ... مرتين عفتني بدون وداع مرتين تدير وجهك تروح وكلمة وحدة ما توصلي المرة الاولى بله نگول معذور والثانية؟

حـر ... اخاف من الوداع درة

درة ... خوفك خلاني اصير بحضن واحد غيرك ثق واعتقد لو ادري بيك عايش ما قبلت بهمام بس انته ... رحت وما حسبت انه بنية شابة وعندي اولاد عمام وعمات وعمامي ناس معروفين والعالم تتخطب منهم بأي لحظة ممكن يجي شخص ياخذني و ها شوفة عينك اخذني همام

حـر ... انه ما محملچ شي ولا الومج ادري بروحي غلطت بس يا حيف الزمن جبرني والمصايب اخذتني اخيذه ورجعت الدنيا خسرررتني اعز ناااسي من جديد

كمت بدون جواب ماكو رد وانه گلبي جاز اصلا والحجي مايفيد جاي اعبر حسيت رجلي تشنجت والتوت وطحت بسرعة تلگيت الگاع بأيديني زين ما طحت ع وجهي ، طفر الي بسرعة جريت رجلي تعورت وعيوني غورگن دموع

لزم رجلي بايدينا يتفحصها سحب من جيبه منديل قماش ( چفية ) وحطها على الزلغ

حـر ... هاي عيني حسدتچ قل اعوذ برب الفلق

سحبت رجلي بسرعة باوعلي صفن بلع حسرته و گال متألم

... متعود اركضلچ من تطيحين وايدي تداوي جرحچ قنعتي روحج والعالم صرتي لغيري بس جيبي اليقنع گلبي

جيبي اليقنعه درته وعطره صارت لبشر ثاني

يحجي ويضرب بقبضة ايده على گلبه ..

مسحت الدم من رجلي لان تلزغت ما كدرت احجي اختنگت بعبرتي وبس افك حلگي ابجي اجت ترف تركض بيدها السويج ومكملة لبس

حاجاها مختنك صوته كوة يطلع

:- بس وصلي اختج للبيت تعورت

كلت لا شسالفة كمت ع حيلي

مشيت للبيت غسلت ونفضت ملابسي ورحت للصالة تمددت يم رهف وكاتي جانن يحجن ع اطفالهن غمضت عيني بدون شعور غفيت

كعدتني رهف تحجي ... كومي صار المغرب حضري روحج نروح لبيت خالي قصي

كمت متضايقة غسلت و صليت وجهزت روحي شلت منتظر ابن رهف افتر بي على ما تلبس

طلعت اخذته مني امي صاحت حرر خوية حر خلصنا

اجة اخذنا كلنا حتى كاتي ويانه وخالي اسامة بس راحو بسيارتهم وياهم ترف واحنه ويا حـر ..

شغل النه اغنية خذانا الواهس من بعيد وضل يغني وياها لحد ما وصلنه هو يعيدها ويغني بنبرة مجروح

انقبض كلبي ما صدكت خلص هذا اليوم ورجعنة للبيت الساعة 12 كبل صعدت فوك عزلت روحي الم شتات نفسي ارجع لتوازني وامسح دم جروحي

مشت الايام داومنا صرت مرحلة ثالثة وباول يوم دوام اعاتب رهف لان رفضت تداوم بالوقت الحالي تكول الا اكبر منتظر يله

طلعت من البيت لگيته واكف بالطارمة منتظرني يكتب ع شجرة بسويجة شافني ابتسم بفرح لان لابسة هديته افتريت اراوي صفك وصفر

:- ملكة الدنيا كلها واحلى كيكة بالدنيا كلها

درة ... صدك حلو

... اي بس يرادلج عباية سمنانة و

درة ... no حبيبي لا لا لا انه هيج مرتاحة عباية ما اريد

عفس وجهة طلعت ويا صعدت بسيارته حرك وطلع

اقترح عليَ يوصلني اول يوم دوامي وانه قبلت ما رفضت لان هاي رغبته

همام ... حبيبي فتحي الجكمجة انطيني الشسمة هذا

مديت ايدي افتحها واحجي ... شنو الشسمة

فتحت عيوني وضحكت باوعلي وابتسم من شافني تفاجئت

تارسها ورد احمر واكو علبة سودة صغيرة

درة ...الي؟

همام ... طبعا اكو واحد غير وليددداااتي يستاهل الورد والهداية

درة ...لا طبعا بس انه بهاي الدنيا استحق منك وها طبعا امك عيب انساها

همام ...الحنين يمة فدوة غديتلج

مديت ايدي سحبت العلبة والورد نصة تطشر وطاح يم رجليني جان اوراق جوري احلف علي مشلع نص ورد حديقتهم وعابر ع حدايق الجيران بحيث طالع بهاي الكمية الزينه

سديتها و خليت العلبة على رجلي فتحت الشريط الاحمر الناعم الي مشدود على العلبة مبتسمة وعين علي وعين ع علبة جان مبتسم على فرحتي

فتحت و فكيت عيوني بصدمة

درة ...شمدرررريك هذا السوارررر عاجبنييي؟

همام ...شفتچ قبل شهر معلقة بالفيس على صورة ممثلة لابسه هذا السوار كاتبة السوار يجنن ومخلية سمايل يبجي كلت عفا مرتي تبجي ع سوار شو الا اسويلها مثله

درة ...يممممة والقران من كد ماحابته حافظه صورتها وشكله بعيني كلت بس احصل مثله اشتري منينن جبته

همام ... خذيت صورتها للصايغ كتله اريد مثل سوارها صياغه وصاغه الچ ان شاءالله يكون مثل ممتخيله ويعجبج

درة ... عمررري شلون ما عجبني غير يجنن وجنت متمنيته

فتحت القفل ولبسته ومديت ايدي اراوي

...شلونه؟ حلوووو على ايدي

لزم ايدي باس باطنها و همس ... شگد محظوظ الذهب صار بأيدچ ياريتني مكانه

الذهب صار بيد الياقوت

درة ...انه؟

همام ...ياقوتي ودرتي

درة ... انتَ شگد صافي وگلبك حنين؟

همام ... بس وياج ههههههههه

اليوم تجين لبيت عمي فاضل للعزيمة

درة ... لا مالي خلگ بس ارجع اطكها نومة لليل

همام ... البنات راح يلتمن مساع جمانة من طلعت للخط كلتلي كول لدرة تجي كتلها هي راجعة وياج وكليلها

درة ... مو احس اول يوم اتعب شيجيبني

همام ... العزيمة بمناسبة زيارة الولد للعراق سداد وجاسم تعاي سلمي تحمديلهم بالسلامة صارلهم هواي ماجايين

درة ... هاي هيه اروح

وصلني للجامعة وراح بيومها رجعت نمت كعدت المغرب بدلت لكيت رهف مبدلة عبالي تروح وياي بس تفاجئت من كالت عيالها عازمينها ومشتاقين لمنتظر اخذها عمي ويانا وصلنه ورجعنة لبيت عمي فاضل

دخلنا وكل عادة ما شفنه غير سداد جاسم ما نشوفه ردنا نتحمدله على السلامة ما شفناه

واكفة بالمطبخ وطب سداد باوعلي وابتسم

:- ولج انتي شنو طلعتي بنات آل نعمان كسر

درة :- نفسك انت هم مطلعهم كسر

جر عيونه بغرور وعدل ياخته ... طبعا طبعا غير انه سداد فاضل، يحجي وياي وعينه تتجول بالمطيخ وتروح على باب الهول

درة ... لا تدور ما جاية معزومة عند عيالها وبعدين كلبك شنو ما مات بعدة

سداد ... لا والله هناك ميت بس من ارد يشب نار ويضل يرجف بين ضلوعي يرجف عليها شسويله ذالني

درة ... ها وما الك نيه تتزوج؟

سداد ... الغلط الغلطته قبل ما اعيده وما اورط بت ناس وياي وانه كلبي ما هاوي اتاني جرحي يطيب وكلبي يجز منها يله

درة ... سالفتك طويله

ترف ... سدادددددد

خزرتها لان امي محذرتها ماتلگف

سداد ... هااااا يحجي ويقلد عليها

ترف ... وين بطبوط اخوك

سداد صاح بصوت عالي من باب المطبخ

... بطبووووووط يصيحولك

اجانه صوت محمود متذمر ....بوووية فاضل ابنك صار اسمه بطبوووووط

طبت ياسمين للمطبخ تشرب ماي ضل سداد يحجي وياها ويشاقيها يضحكها كللها بصوت ناصي

:- وين مرت ابوج يكولون حيه

ياسمين ... ركطة بعدها ما لافيه ، انه من الجامعة ويا جمانة من بيتهم لهنا ماشفت خلقتها اليوم

طب محمود ورا فالح رفع ايدينا ثنينهن للسلام

:- مساچن الله بالخير خواتي الما جابتهن امي مساكم الله بالخير خانة الشواذي

درة ... هلو مساء النور وين همام؟

فالح ... هذا اوكفي يحجي ويمد ايده بجيبه

كلبت عيوني بضجر ... ماكو جيبي مزروف يمكن طايح منه

درة ... ولا ترد عدل الا اذب سبحتك وبعد ما اسبح بيها علمود مايجيلك اجر مني ماتستاهل

فالح ... حيييل بعدج محتفظه بيها

درة. .. يا صار سنين اسبح بيها واتذكرت بدعائي بس بعد هذا هو اذبها مو وجه نعمة انته

فالح. .. دررررية

درة ... والله

التفتت شفت ياسمين وسداد يحجون وهي متضايقة جانت تشكيله من سماهر

بنهاية الحديث كللها احجي لأبوي

كلتله ماكو داعي هي سوالف تافهة بس تنرفز وعيب نحجي بيها

هز راسه التفتنه على صرخة محمود يخرط بخدوده

محمود ...ولج صفي نيييتج واختارررري اطك راسي بالحايط والله

ترف ... يلا يلا جبس و كرزات اصلية اريد بيهن كاجو والباقي على ذوقك

جر الخمسة من ايدها فالح گله ... ثول حتى ثول خذاها من ايدها من جيرة بفرگك غير تجيبلها على حسابك شلون تخلي بت عمك تدفع

ترف صفگت وركصت بحواجبها ... لان حمووودي مو ابنه يشتغل ميجيب النه عايف امه وخواته ويشتغل لحبيباتتته ويشتغل لحبيباته يحمودي يحمووودي

محمود ... صوجي انه وبعدين شني عندي بنگ الخلفكم

عفس وجهة ترف رفعتله حاجبها خزرها كلتله بصوت ناصي يلا بطبوط

محمود ...انه الج

عفتهم بالمطبخ صايرين مطاحن وفتت جوة يم النسوان

لكيت عماتي وبيبي سعدية يتناقشون وسمعت اسمي بنص حديثهن بس كعدت باوعلي

سعدية ... هي لو تگله يرضا

درة ...شكول

سعدية ...لهمام كليله تعرسون كافي نشف ريجة الولد جا شني وين اكو خطبة سنة ونص مادري شكثر الله عليجن مو من الطلابة شكد صارلها؟

نورية ... يا هواي هواي مايجوز عمة كليله عرسو بس مو هنا سافرو انتي ويا وسوو عرسكم بغير ديرة روحي لتركيا حلوة هم تونسو وهم فضوها مايصير

درة ... لا شلون ترة لا فاقد ولا نجم وعمة لمياء دارت سنتهم ما اكدر ولا همام يكدر

سعدية ... جا ليش نكللكم روحو لغير ديرة وعرسو علمود تاخذون راحتكم وبعد هو ابن عمج مو غريب

رفعت اكتافي وقوست شفايفي ... ما ادري نشوف الله كريم

نورية ... مو تغلسين عن الولد وانتي نجوى دوري مرة لغيث وسويله عرس سكتة ولد مطلك مايصير يضل بدون مرة وصارله هواي

سعدية ... ما يرررضا تطلع سفن ساحرته غضب الله على رأسها

جفلنه على صوت طبه طفرت فدك وصرخت ... يمةةةة جعفررر

طفرنا وراها ركضت للدرج جرته يمه جعفر طايح من الدرج هي شالته والدم ينزل من حلكة وراسه انخبصت ضلت تبجي وتصيح يمه جعفررر وين هاااني صيحوووو الهاني

جريت باكيت لكلينس وركض اخذته منها حطيت على رأسه وضغطته عماتي وامي والبنات كلهن انخبصن طب هاني ركض وغيث وعمي فاضل

وجعفر فرت روحه يبجي ودمه يسيل

فاضل ... شنيي منين طاح

نجوى ... من الدرج سودة بعيني

نورية ... لا تضلون واكفين هااا هاي عباتي يله للمستشفى بساع تعاي درة انتي شايلته بسرعة تعاي

فدك ... انه انه

نورية ... على ما تلبسين دهر امشي درة بساع

هاني ... انطينيا

نورية ... عوفة وسوق امشي

طلعت شايلته واخذنا للمستشفى فارة روحه فر بس يصرخ فحصو الجرح يحتاج خياط خيطو راسه ولسانه مشكوك بس ما خيطو ولا سووله شي بس انطونه ادوية وابر

هاني جان اصفر وروحه فايرة ... شبيك هاني مو هاي مابي شي

... ردت اموت من شفته غركان بدمه

... الحمدلله مابي شي

نورية ... دخيلك ربي مانرتاح لا بطلعه لا بزيارة ولا بلمة

اشيله عنج عمة

درة ... ياريت

اخذته مني عمة رجعنا للبيت لگينا فدك مفرفرة روحها اخذته هاني عاط بيها ... وينچ عنننه هاا

فدك ... لتصيح! غير يلعب شسويله يعني احبسه لو اربطه ربط طفل يريد ياخذ راحته

هاني ... ما فگدتي كاعدة تدكين فج وشامرته بحجة يلعب

سعدية ... صلي على نبيك يمه مابي شي مابي تعداه الشر وروح اطلع يم اولاد عمك يله

نورية ... يله عمة كول يالله

جرته عمة نورية برة البيت فدك كعدت تبجي بالزايد مهضومة لان صيح عليها كدام الكل

باوعت وشفت الوجه الي لعبت. روحي منه كله شر وسم وجه سماهر مرتاحين من هناء ماتحضر لماتنا من ورا طلاكها طلعت النه سماهر

رجعو كعدو وكالو يله مابي شي باوعت لسماهر جانت تتصنع اللطف والحب وهي من عيونها مبينة اكبر شرانيه

ياسمين بهمس ... مسلسل زوجة الاب الحنون

فرت ايدها ما عاجبها سماهر باوعت الها وعقدت حواجبها وبسرعه فكتهن ورجعت تحجي

كل واحد رجع لبيته واحنة رجعنا سبحنه ورهف جابها عمي ورانه جانت ليلته ويا امي وضل عدنا كاعد بالصالة مشغلين التلفزيون على فلم وحاطين حلويات وعصاير وشامية وكاعدين كل احنة نباوع

جنة صافنين ع تلفزيون التفتت اريد احاجي امي

شفتها نايمة متمددة وحاطه راسها على رجل عمو تباوع للتلفزيون مندمجة وهوَ يلعب بشعرها ويتأملها وباله مو يم شي ثاني غيرها ، عيونه كلها حب الها وعبالك هي كل انتصارته او اعظمها

ابتسمت براحة

درت وجهي اكمل الفلم بس ضليت اضحك مرتاحة وكل شوية اسرق النظر الهم

باب البيت اندگ عمي كال مستغرب

... يهو هذا جاينه هسة

درة ... اذا ما طلع همام تعال عاتبني هههههههه

... ولج بس لا كايلتله يجي ويكطع رزقنه

جان يحجي وهو يبعد راس امي يحطه ع مخده كرص خدها وهي مبتسمة تباوعله

درة ... ماكايلتله بس هو يجي فجأة

كمت للاستقبال اشوف الكامرات وهو طلع للباب عقدت حواجبي متفاجئة الشكل شكل بنيه ما جانت واضحة فتحت باب الاستقبال وطلعت شفته توة فتح الباب وطلع خطوة برة البيت وبثواني دخلت ياسمين حجابها لنص راسها وبتراك مال بيت اسود

نشغت مصدومة وهي تبجي وعيونها حمر دم

حضنها عمي واجة يمشي وياها من وصل يمي عافها اجتلي حضنتها وهمست ... شبيج؟

ياسمين ... سماهر طردتني واصيح ابوي مايسمع مادري يسمع وساكت الله يعلم

درة ... شلون يعني شلون

ارفد ... طبن للبيت هسه طبن يله

طلعن البنات على صوت شهكاتها وراهن امي انصدمن كلش وهيه تبجي بحضن امي

وتحجي تناشغ

.. بس نام ابوي لزمتني بالحديقة وكتلتني بالصوندة مال السگي تكلي شلون مساع تباوعيلي وتفرين ايدج وانه اصيح بوية وينك بابا تعاال ولا اجة تكلي صوتك هوس هوس ابوج نايم وتكتل بيه اخير شي تكلي بس تصرخين بعد الا اكوله لابوج لكيتها تخابر زلم

وفتحت باب البيت ودفعتني برة البيت انه تخبلت وماعندي غير شال على اكتافي

ضليت ادك بالباب وادك بالجرس محد يطلعلي وفوك الربع ساعة ابجي وادك بالباب اخير شي تمشيت لبيت صاحبتي كلتلهم يجيبوني الكم

حتى مبايلي بالبيت ما اكدر اخابر احد

وعد ... يا عمت عينها وهاي شني مالها رداد يردها شلون تطرد بنية شابة بنص الليل

ياسمين ... والله كلبي طاح من الخوف وطلع جلب ينبح عليه ابجي واركض والله بضلمة الليل وهسه لو شايفني احد مو يذب عليه مصيبة فوك ضيمي

عمي طلع نقاله يخابر لعمي خالد ولا يجاوب مل اخير شي خابر لعمي فاضل كلتله امي عوفها للصبح

كلللها ... خاف الجلبة تذب شي على ياسمين خلي فاضل يتدخل من هسه

جاوبة عمي فتح سبيكر ونسمع صوت عمي فاضل مخترع

كله عمي ارفد ... لا ماكو شي يخوف بس هاي سماهر مرت خالد طاردة ياسمين من البيت واجتلنه البنيه بتراك وزين من اكو شال ساتر راسها

فاضل ... هسه؟

ارفد ... اي والله كاتلتها وطاردتها واخابرة مايجاوب الجلب مغلس هذا مررض مرض البت اذا تضل عده تتبهذل

فاضل ... سده انه اله

سد الخط ورا عشر دقايق رجع خابر عمي ارفد وكله. .. خليها يم البنات وتعال نروحله للبيت وهاي مرت ابوها شوفلي اهلها وين بالضبط وين بيتهم وجيبلي ارقامهم اذا تكدر

ارفد ... همام يعرف اخوها

فاضل ... خابرة جيب رقمه اذا ما اسود ليلتها

سده عمي وخابر همام وطلع بتراكسودة حتى ما بدل وراح لعمي فاضل ضلينه ننتظر اكثر من ساعة ونص بحيث وحدة ونص تقريبا يله رجع عمي جنة تك عين من كد النعس

ارفد ... نامن هسه الصبح نحجي

وعد ... واحنة متانينك نريد نعرف شسويتو

ارفد ... سالفة طويلة نامن مرتاحات ماكو شي وين ياسمين

وعد ... من كد البجي غفت ذبت روحها هي والميت سوية

ارفد ... يله وعد يله بابا نامن تصبحن ع خير

ردينا اجمعين وطبينه للغرفه

نايمة بسابع نومتي وفزيت على صوت عمي يصيح طلعت فاتحة تك عين والبنات يطفرن وراي

ارفد ... ز** عليك من زلمة وعلى شاربك ولك بتك بتك تجذبها وتصدك وحدة توها اجتك

خااالد لا تخبلني واذا مرتك والخدامة كالن هي طلعت من كيفها شنو انته تصدكهن طبعا خدامتها تجذب عليك وياها

سكت ورجع عاط ... وصياحهااا ماسمعته

ما صيحت؟ ما صيحت؟ روح انته طلي حشى الطلي بريء من امثالك

حجاها وسد المبايل بوجها تقريبا فهمنة كل شي وما نحتاج يشرح ياسمين ضلت تشهك وتحلف

... وروح امي ونجم هي كتلتني وطردتني وصيحت صياح الدنيا ما طلعلي

ارفد ... ابوج كواد وناقص وشادلة كرون ستيل لو ما مكرن مايستر لمرته لجلبة

يله يله غسلن وتريكن وروحن للدوام يله

لا تحسبن زايد محلولة

كملنا وطلعنه للدوام ، وبطلعتنا بالكراج لكينه عمي خالد واكف والشرر يتطاير من عيونه

اجة وكدام كل العالم جرها من ايدها حيل بكل همجية وضربها راشدي وجرها حيل وهو يتوعد الها

... السا** انه الج اذا ما حرمت عليج عتبة باب البيت ولج انه تطلعين من بيتي شاردة بنص الليل؟ الا افصم ظهرچ ........