تحميل رواية «قطة حطمت اسواري» PDF

رواية قطة حطمت اسواري – الفصل الثاني عشر

غيرة وحيرة – 12

غيرة وحيرة – 12

….قصــه….( قطــــه حطمــــت اســـــوارى )….

نستطيع ان نقول ان احدا فى هذا البيت لم ينم ليله جيدا الا سلمى التى كانت تشعر ببعض الصداع من اثر الضربة جعلتها تنتاول المسكنات تخفيف لها استيقظت لم تجد جاسر بجوارها وجدته يخرج من حمامه ليرتدى ملابسه

جاسر:صباح الخير ….

سلمى:صباح النور هى الساعة كام

نظر فى ساعته:الساعة 5…ايه اخبارك ايه دلوقتى

سلمى:الحمد لله بس انت بتلبس رايح فين بدرى كده

تنهد بقوة ونظر اليها :مخنوق اوى ياسلمى عايزة اخرج اتمشى مش طايق البيت

سلمى:هتروح فين بدرى كده

جاسر:مش عارف هخرج اتمشى شوية وارجع

صمتت قليلا:اجى معاك

نظر اليها بدهشة:تخرجى دلوقتى

سلمى:اه اتمشى معاك عمرى ما خرجت اتمشى فى الوقت ده

جاسر:مش عايز اتعبك

قفزت من فوق السرير:تعبك راح ياجاسر باشا عشر دقايق واكون جاهزة

ارتدت ملابسها وخرجا سويا كان يمشى تائها شاردا فيما حدث وجدها تمسك بذراعه بطفولية:يعنى مراتك تبقى ماشية معاك وتسرح ………..ها قولى بتفكر فى مين

نظر امامه بحيرة:هيكون فى ايه غير سالى واللى عملته ……..مش عارف عملت كده ليه ليه

سلمى:اقولك ولا تزعلش

جاسر:قولى

سلمى:جاسر بصراحة انت السبب

جاسر:انا طيب ازاى هو انت قلتلها روحى امشى مع واحد من ورانا واعملى اللى عملتيه

سلمى:لاطبعا مقصدش ……جاسر هو انت مش حصل بينك وبين جودى ……..تجاوزات

نظر اليها ولاحظ حزن وجهها:سلمى الحكاية دى عشان كنا هنتجوز

سلمى:لكن انتم متجوزتوش ……..يعنى اللى حصل بينكم كان حرام مكنتش مراتك ……تقدر تقولى سالى عملت ايه غير كده …….قالها بحبك وهنتجوز ضحك عليها بكلمتين يضحك عليها تحت ستارة الحب والجواز ……..استحل حاجة هى اصلا حرام حتى على المخطوبين …….جاسر داين تدان

جلسوا على احد المقاعد فى احدى الحدائق رفع راسه للخلف مغمض العينين

جاسر:عندك حق ……اللى انا عملته قبل كده اترد فيها …..وانا قلت من يوم مااتجوزتك انى هبعد عنها عشان محدش يقرب منك انتى اتارى ذنبى اترد فيها هيا……..بس هى برضه غلطت لو مكنتش سهلة مكنش قدر يقرب منها

سلمى:مقدرش اشيل عنها الغلط …..بس انتوا برضه غلطتوا لما تدوها الحرية فى كل حاجة فلوس ولبس وخروج وترجعوا تقولوا دى الصغيرة دى اخر العنقود يعنى دلع كافى انه يدمر

جاسر:خايف يا سلمى ……..خايف ليكون حصل بينهم حاجة ساعتها مش عارف انا ممكن اعمل ايه

سلمى:ان شاء الله خير ……قوم قوم تعالى نتمشى احنا هنعد هو الجو برد بس كويس قوم

قام سويا وهو يضمها بذراعه ظلوا يمشوا مدة دون حديث حتى اشتمت سلمى رائحة الفلافل الساخنة

توقفت فجاة تشم الرائحة

جاسر:ايه وقفتى ليه

سلمى:انت مش شامم ريحة الطعمية تجنن

نظر اليها بدهشة ثم ضحك بشدة:طعمية …….عايزة طعمية

سلمى بيده بطفولية:اه يا جاسر تعالى المطعم اهوو من زمان نفسى فيها وانتوا ناس كده غريبة فى حد مياكلش الطعمية

ضحك بشدة:يا سلام حارمك انا من حاجة

سلمى:اهوو مش عايز تجبلى سندوتش طعمية سخن كده يا سلام والبدنجان المقلى ……يا خرابى

جاسر:ايه ده هما وحشوكى اوى كده

سلمى:اه طبعا يلا بقى ونروح نشرب بيبسى كمان

نظر باتجاه المطعم وجد مجموعة شباب يجلسون :بصىى انتى مش هينفع تروحى ……..اقعدى فى الحتة دى عشان فى هناك شباب مش ناقص انا يخطفوكى ولا حاجة ساعتها اعمل ايه …………وانتى حلوة كده

ضحكت بشدة وهى تمسك بكفه :خلاص هقعد هنا بس اوعى تتاخر

جاسر:اوعى حد يشوفك سامعة

سلمى:حاضر حاضر بس متتاخرش

تركها وذهب كانت خائفة ان يراها احد فى هذا الوقت وحدها جلست فى مكان غير ظاهر كان جاسر يلتف اليها من حين لاخر وينظر الى الشباب الجالسين يلاحظهم اطمئن انهم لم يروها انشغل يشترى لها طلبها كانت جالسة تراه من حينا لاخر تطمئن قليلا حتى سمعت صوت يقترب منها وجدته رجل يترنح وفى يده زجاجة حاولت ان تختبئ ولكنه لاحظها فرك عينيه ليتاكد انها امراة امامه

لاحظت اقترابه منها قامت من مكانها لكنه لاحقها وهو يتمايل يمينا ويسارا

تعالى بس هقولك حاجة

صرخت به :ابعد عنى ……جاسر ……جاسر

نظر الجميع نحو الصوت راوها تحاول ان تفلت من يده سمع جاسر صوتها نظر اليها بسرعة جرى عليها ومعه الشباب الذين يجلسون فى المطعم امسك الرجل يضربه امسك به الشباب

معلش يااستاذ حصل خير …..معلش ربنا يهديه هو على طول كده

لكنه لم يتراجع وظل يضربه ثم التفت اليها يضمها “عاملك حاجة

امسكت به خائفة :لالا

احد الشباب :يلا امشى من هنا يااض انت واتلم بقى مش كل شوية مشكلة ………معلش يااستاذ بس انت برضه غلطان محدش يسيب مراته لوحدها كده

جاسر:انا مرضتش ادخلها المطعم ….قلت هتقعد فى مكان محدش يشوفها

احدهم:معلش حصل خير ….اتفضلوا فى المطعم احسن من هنا

ذهبا سويا الى المطعم ينتظرون الطعام

جاسر:ايه يا حبيبتى انتى كويسة

سلمى:اه الحمد لله كنت خايفة اوى …..بس الحمد لله ربنا ستر

وضع الطعام امامهم وظلوا ياكلون ويضحكون مدة انتهوا من طعامهم وعادوا الى البيت ودخلوا الغرفة يضحكون بشدة القى جاسر جسده على السرير

من زمان مضحكتش كده

سلمى:يارب تفضل تضحك كده على طول

جذبها اليه على السرير:وانتى معايا يا حبيبتى

التقت العيون لفترة حتى قامت سريعا :انا عايزة انام اوى

جاسر:اه وانا كمان ….مش هروح المصنع النهاردة عشان اروح للدكتور

سلمى:انت لسه مصمم برضه

جاسر:طبعا لازم اطمن ياسلمى

سلمى:طيب ممكن اجى معاك

جاسر:ليه خايفة من ايه عايزة تحميها منى

سلمى:جاسر انت مشوفتش نفسك امبارح كنت عامل ازاى انا خفت منك اوى

جاسر:كنت عاوزانى اعمل ايه بعد ما شوفتهم فى المنظر ده كنت حاسس ان هتشل مكانى

لحقته بسرعة:بعد الشر عليك متقولش كده

جاسر:سلمى انا عارف اننا غلطنا فى تربيتها ……بس على الاقل تحترم نفسها مش احنا تحافظ على شرفهاوسمعتها مش اى واحد يقولها كلمتين حلوين تخضعله ….لايا سلمى لا

سلمى:طيب اهدى بس ان شاء الله خير تعالى نام واما تقوم يحلها الف حلال

ناما سويا حتى اذن الموذن لصلاة الظهر قامت سلمى وجدته نائم دخلت الحمام توضات وصلت سمعت صوته خلفها :حرما يا حبيبتى

ابتسمت له:جمعا ان شاء الله

جاسر:انا داخل اتوضا واصلى عشان نخرج

سلمى:طيب وانا هروح اشوف سالى

خرجت من غرفتها ودخلت غرفة سالى وجدته مستيقظة تبكى وعيونها اشبه بكرات الدم

سلمى:سالى انتى صاحية

سالى :انا منمتش اصلا

سلمى:معلش انا عارفة ان اللى عملوه كان كتير بس متنكريش انك غلطتى برضه

سالى:عارفة يا سلمى …….عارفة انى غلطت بس هو قالى انه هيجى يخطبنى ونتجوز

سلمى:حتى لو كان خطيبك مينفعش اللى حصل بينكم

سالى:ماهو …….

سلمى:ما هو ايه ……..سالى حصل بينكم حاجة اكبر من كده

سالى:لالالا والله اصل جودى قالتلى انها بتعمل كده مع جاسر

صمتت سلمى وهى تشعر بوخزة فى قلبها :وتفتكرى انها لو كانت بتحبك كانت تخليكى تعملى كده والله اعلم الموضوع كان ممكن يتمادى لحد فين ساعتها تبقى خسرتى كل حاجة …..نفسك واهلك وحياتك اللى جاية اللى بايدك انتى ترسميها بالصح او بالغلط وفى كل الحالات انتى اللى هتخسرى او هتكسبى

هى مش هيفرق معاها انك تعملى صح او غلط شجعتك على كده وهى نفسها عملت حاجة حرام متعرفيش جاسر مضايق من نفسه ازاى انه عرف واحدة زيها عارفة بيقول ايه ……ان مفيش واحد يامن على نفسه وبيته مع واحدة سلمت نفسها ليه …….تحبى حد يقول عليكى كده يا سالى

سالى:لا طبعا

سلمى:حلو اوى معلش اللى هيعمله صعب عليكى بس معلش طاوعيه بس موقتا

سالى :حاضر عشان بس يطمئن

سلمى:قومى يلا البسى وانا ممكن اجى معاكى لو مش هتضايقى

سالى:بالعكس …..انا كنت هطلب منك كده…….سلمى انا اسفة

سلمى:على ايه

سالى :على اللى عملته معاكى وعلى ………حاجات كتير يعنى

اقتربت منها تقبل راسها:وانا مش زعلانة منك ياحبيبتى ………قومى يلا البسى

ذهبواالى احدى طبيبات النساء اصر جاسر على الدخول معهم حتى يتاكد من حديث الطبيبة بنفسه بعد الكشف عليها اخبرتهم انها مازالت بكرا لم يمسها احد

على قدر غضبه منها على قدر سعادته بما عرفه عاد الى البيت وبهيرة فى انتظارهم

بهيرة:ها يا جاسر عملت ايه

نظر جاسر الى سالى:متخافيش ياامى هى بخير

وضعت يدها على صدرها تنتفس الصعداء بعدما اطمئنت على ابنتها

جاسر:تعالى ورايا على المكتب يا سالى

امسكت بسلمى خائفة :متخافيش هيكلمك كلمتين

سالى :طيب تعالى معايا

سلمى:لا مينفعش عايز يقولك حاجة بينك وبينه مينفعش حد يسمعها …….يلا يا حبيبتى يلا

دخلت الغرفة وجلست امامه خائفة وهو ينظر اليها محدقا

جاسر:ادينى سبب واحد للى انتى عملتيه مين الواد وعرفتيه منين

سالى :انا عارفة انى غلطت ياابيه ……انا اسفة والله

جاسر:ردى عليا تعرفيه منين

سالى:اصله ……..معرفة جودى

صرخ بها جاسر:جودى …….جودى

سالى :ايوه والله ….

جاسر:انتوا اتقابلتوا قبل كده فين غير فى المكان ده

سالى:ابدا دى اول مرة اروح هناك والله وهى قالتى انك بتروح معاها هناك

جاسر:انا …..انا عمرى ما عرفت الاماكن دى ولا دخلتها غير امبارح وانا رايح اجيبك بس هى قالتلك الكلام ده امتى

سالى :يعنى من كام يوم كده قبل سلمى ما ترجع البيت

جاسر:بقى كده ………جودى كانت عايزة تنتقم منى بيكى انتى عشان سيبتها …….كانت عايزة تضيعك يا سالى فهمتى ولا لسه

سالى:انا فهمت بس متاخر ……انا اسفة والله انا غلطت ومعدتش هتكررتانى والله

جاسر:اتفضلى قومى ذاكرى عشان امتحاناتك …….واعملى حسابك اول ما تخلصى امتحانات هنسافر المنصورة عند عمك وحسك عينك اعرف انك بتكلمى البت دى ……المرة دى هقتلك بجد يا سالى

سالى:لاوالله خلاص منها لله ………عن اذنك

تركته لتخرج التفت اليه واسرعت تحتضنه :انا اسفة ياابيه ……..انا بحبك اوى

قبل راسها:وانا عملت كده من خوفى عليكى ومش اسف انى عملت كده لانك كان ممكن تضيعى يا سالى بس الحمد لله ربنا ستر يلا بقى بلاش تضيعى وقت روحى ذاكرى

مر حوالين اسبوعان وانتهت امتحانات سالى وسافروا جميعا الى مزرعة فاروق فى المنصورة

انبهرت سلمى بالمزرعة وجمالها واللون الاخضر الذى يسر القلب كان فى استقبالهم حازم رحب بهم جيدا ودخلوا الى البيت الكبير كما يطلق عليه فاروق فهو يعتز بهذا البيت لانه ميراثه عن والده هو اخوته ويحبه كثيرا ولم يغيربه كثيرا الا بعض الترميمات ومع ذلك يحتفظ بشموخه وسط الاراضى

فاروق :اهلا اهلا نورتوا يا ولاد

اقبل عليه جاسر “ازيك ياعمى وحشتينى والله

فاروق:وانت كمان يا جاسر ……..ازيك يا سلمى …..ازيك يا سالى افتكرتى ان ليكى عم دلوقتى

سالى”معلش يا عمو الامتحانات وكده

فاروق:ماشى يا ستى ربنا ينجحك يا بنتى

اقترب من حنين وقبل راسها:ازيك يا حنين …..عاملة ايه

حنين:الحمد لله يا عمو انا بخير

فاروق :وحشنى والله يا ولاد

اتت زوجة فاروق (فاطمة )سيدة بسيطة فى كل شئ الا انها جميلة الروح والخلق

فاطمة:اهلا اهلا يا حبايبى .وحشنى والله

بهيرة:وانتى كمان والله يا فاطمة وحشانى اوى اخبارك ايه

فاطمة:بخير يا حبيبتى …….هى مين دى يا ولاد

واشارت الى سلمى فقالت بهيرة:دى سلمى مرات جاسر

وقفت امامها تتاملها:بسم الله ماشاء الله عرفت تنقى يا واد يا جاسر احسن من الملزقة التانية

ضحكوا جميعهم بشدة من حديثهافاكملت :اه والله اصلها حاجة كده ملزقة وملونة وشها ولااللى البيض فى شم النسيم ……بس انتى الله اكبر عليكى …….هى دى عدسات

ضكت سلمى :لايا طنط …..عنيا

فاطمة:لالا محبش طنط دى قولى يا طماطم زى العيال دى

سلمى:حاااضر يا طماطم

فاروق:خدى يا سلمى تعالى

ذهبت اليه فهمس لها :اوعى تقولى لفاطمة ان نورا تبقى عمتك الله يرحمها لاالاقى نفسى انا وانتى فى اقرب ترعة

كتمت ضحكتها وهم ينظرون اليها:خلاص يا عمو مش هقول حاجة خالص

فاروق:يلا يا ولاد اطلعوا غيروا وتعالوا عشان نتغدى سوا

صعدوا غرفهم وقفت سلمى تنظر امامها وجدت جاسر يحيطها بذراعيه:حبيبتى ايه شغلك اوى كده

سلمى:الجمال ده يا جاسر الخضرا والنيل شكلهم حلو اوى

جاسر:اه الخضرا والماء والوجه الحسن

ادراها امامه واقترب بوجهه منها :هو انتى حلوة كده ليه النهاردة

سلمى:جاسر خلاص بقى يلا عشان ننزل انا جعت

جاسر:طيب ماانا جعان برضه بس استنى شوية ……انتى لسه مش هترجعى عن قرارك

سلمى:احنا قلنا ايه اما نطلع شقتنا ونبقى لوحدنا

جاسر:طيب مااحنا لوحدنا اهو

وضعت يدها على صدره تدفعه برقة:خلاص بقى يا جاسر حد يسمعنا

جاسر:يابت انتى ده انتى مراتى ….

اقترب من شفتيها يقبلها بحب حتى لاحظ ان احدهم راه ……..لقد كان حازم كان يعتقد انه لايوجد احد فى الحديقة الخلفية

التقت عيونهم سويا فانزل حازم راسه بحزن واغلق جاسر النافذة بغضب

سلمى:مالك ياجاسر

جاسر:لاابدا مفيش يلا ننزل انا جعت

تركها وخرج وهى لاتفهم ما سر غضبه فجاة……نزل الجميع الى الطعام جلس جاسر فى مواجهة حازم كانوا ينظرون الى بعضهم بين حينا واخر ثم ينظر الى سلمى يجدها تتحدث مع فاروق وفاطمة التى انسجمت معها سلمى بشدة واحبتها كثيرا

انتهوا من الطعام وجلسوا يحتسون الشاى حتى قال حازم

على فكرة ياسلمى فى هنا مزرعة خيول ايه على ذوقك

سلمى:بجد فين

جاسر وهو ينظر اليهم :فى هنا اسطبل تحبى تروحى

سلمى:اه يا جاسر بعد اذنك يا عمو

فاطمة :انتى بتحبى الخيل يا سلمى

سلمى :اه اوى

حازم :ده بتدخل سباقات كتير وغلبتنى كذا مرة

فاروق:ومش عيب عليك …..فرحان بنفسك اوى بنت غلبتك

جاسر:ههههه انا شفت بنفسى وهى بتسبقه وغلبت الكل

فاروق:”خلاص خد مراتك ….وريها الاسطبل

امسك بيدها وذهبوا الى اسطبل الخيول كانت فرحة بشدة وهى تقف مع الخيول تطعمهم بنفسها

جاسر:اد كده بتحبى الخيل

سلمى:اوى يا جاسر ……بس استنى الفرسة دى مالها كده

جاسر:مالها

اقتربت منها تتحسس جسدها:دى سخنة اوى

جاسر:طيب استنى اشوف دكتور

سلمى:بقى كده اومال انا ايه يا باشمهندس

ضرب على جبينه :حبيبتى والله انا ناسى خالص ….اعملك ايه محدش يقول عليكى دكتورة بيطرية ابدا

سلمى:ماشى يا سيدى اتفضل هات ورقة وقلم اكتبلك حاجات وابعت هاتها بسرعة اصلها تعبانة اوى

احضر سايس الاسطبل ومعه ورقة وقلم كتبت به بعض الادوية وبدات تعطى بعض التعليمات له واقترب حازم منهم :ايه يا جماعة

فى ايه

جاسر:الفرسة دى تعبانة من امتى

حازم:بقالها يومين والدكتور فى اجازة وطلبته موبيله مقفول على طول……..بس يا سيدى الدكتورة سلمى تقوم بالواجب ولا ايه يا سمسم

نظر اليه جاسر بغضب فانتبه حازم لنفسه :معلش بهزر معاها انت عارف زى اختى بالظبط

لم تفلت سلمى لهم كانت منشغلة مع الفرسة تعالجها اعطت التعليمات للسايس وبعض الادوية

جاسر:خلاص يا حبيبتى

سلمى:اه خلاص بس مكنش ينفع تستنوا عليها كنت جبت دكتور تانى

حازم :الحمد لله انك جيتى

امسك جاسر بيدها :تعالى اوريكى الفرس بتاعى

اشار الى احد الخيول :ده بقى رهوان ……ايه رايك انا بحبه اوى وكل اما اجى هنا اركبه والف بيه

وضعت يدها عليه تطبطب عليه :ده حلو اوى يا جاسر ….شبه ادهم بالظبط مش كده يا حازم

حازم:اه ما هما نفس السلالة

جاسر:مين ادهم

حازم:ده الفرس اللى سلمى بتحبه االلى كانت راكبه يوم ما غلبتنى فاكر

جاسر :اه افتكرت هو اسمه ادهم

سلمى :اه بحبه

حازم:اه وهو كمان بيحبها اوى

التفت اليه جاسر بعيون تشبه النار :مين اللى بيحبها

حازم:ادهم مكنش يرضى ياكل ولا يشرب طول ماهى موجودة غير منها فاكرة يا سلمى

سلمى:اه والله وحشنى

جاسر:يعنى حد يوحشك وانا معاكى برضه يا حبيبتى

ابتسمت له بخجل فاستئاذن منهم حازم وخرج

سلمى:جاسر ينفع كده

جاسر:ايه مش مراتى

سلمى :ايوه يا حبيبى ……..بس احنا مش لوحدنا

جاسر:ولا يهمنى تعالى اطلعى على رهوان

حملها لتركب فنظر اليها بحب:سلمى …..انا بحبك اوعى تبعدى عنى

سلمى:المشكلة انى مقدرش ابعد عنك

انزلها وامسك بيدها يقبلها :بحبك يا سلمى

دخل حازم فجاة فوجدهم كذلك :معلش انا اسف بس عمك عايزك

نظر اليه بتفحص :خير فى ايه

حازم:خالى حامد جاى بكره وخالى فاروق خايف لتمسكوا فى بعض عشان هيجى هو ومراته وعياله ……..وسمعت ان هانى خطب

جاسر:ايه ده فجاة

حازم :مش عارف حامد بيقول لخالى فاروق قال يعنى بيستاذن انها هتيجى معاهم

جاسر:كمان ….مش غريبة دى

حازم:هى غريبة بس يا خبر النهاردة بفلوس بكره يبقى ببلاش