تحميل رواية «خمس جثث» PDF

ن

مفيش مبرر للقتل، بس تخيلوا ان جريمة واحدة تكشف جرايم تانية إتقفل فيها التحقيق واتقيدت ضد مجهول

الموضوع بدأ لما جالنا بلاغ من واحد اسمه شوقي عبد الحميد، كان بيقول في البلاغ انه دخل بيته لقي مراته مدبوحة ومرميه على ارضيه الصالة

اتحركت ومعايا قوه من القسم على مكان البلاغ، ولما وصلنا هناك اكتشفنا ان الجثة لواحدة معروفه في مجال الازياء اسمها زينب، الشقة كانت في عماره فخمه في منطقة المعادي، المكان كان هادي تماماً وفي عماير كتير مش ساكنة

بعد نص ساعه وصل رجال الطب الشرعي والمعمل الجنائي ووكيل النيابة عشان يتم فحص الجثة ومسرح الجريمة

انا المقدم سعد محفوظ.. كنت واقف لسه في شقه الاستاذ شوقي اللي قدم البلاغ، وكان هو قاعد على الانترية منهار من العياط، قربت منه وطبطبت عليه وقولتله

_ شد حيلك يا استاذ شوقي البقاء لله.. الله يرحمها كانت عارضه ازياء مش كده؟!

= لا يا فندم.. هي شبه عارضه الازياء زينب ولكن انا مراتي اسمها ياسمين، عارف ان الشبه كبير ما بينهم وفي ناس كتير قالت الكلام ده

_امممم.. هو فعلا الشبه كبير اوي ما بينهم، طيب ممكن تيجي معايا بس بره الشقه على ما الرجاله تخلص شغلها هنا

= اكيد يا فندم اتفضل

...

خرجنا من الشقه وكانت الجيران متجمعة قدامها، طلبت من العساكر يفضوا اللمه اللي قدام الباب وبدأت اتكلم مع الاستاذ شوقي

_ انا عارف ان حضرتك مش مستحمل اي كلام دلوقتي، بس انا عاوزك تساعدني نوصل للي عمل كده في مراتك

= انا تحت امرك يا فندم، انا عايز اعرف مين اللي عمل فيها كده؟!

_ مراتك كان عندها اي عداوات مع حد؟!

= مراتي كانت متجوزه قبلي، والشخص ده هددها اكتر من مره بالقتل، وهو كان محبوس اصلا على ذمه قضية وبعد ما اتطلقت منه انا وهي اتجوزنا

_ طيب والشخص ده مين اسمه ايه؟!

= صابر عبد المنعم، وعاوز اقول لحضرتك ان المدام عملت ليه محضر عدم تعرض قبل كده، وانا وقتها كنت مسافر

_ طيب بالنسبه لعلاقتها بالجيران كانت عامله ازاي؟!

= العلاقه مع الجيران محدوده جداً، وفي اضيق الظروف

_ تمام يا استاذ شوقي، عموما بعد ما الرجالة تخلص انا هعوزك شويه معايا في المكتب عشان ناخد بس اقوالك في محضر رسمي ونقدر نحقق مع اللي اسمه صابر

= انا تحت امرك يا فندم

....

رجعت دخلت الشقه تاني وقربت من دكتور الطب الشرعي، اللي كان خلاص بيخلص اخر حاجة وسألته

_ ها يا دكتور في تقرير مبدئي كده عن الجثة ولا ايه؟!

= ايوه فيه، الست دي اتعذبت قبل ما تتقتل وده واضح من اثار التعذيب اللي على جسمها، واضح انها تعرضت لضرب مبرح قبل وفاتها.. ده غير انه في اثار حروق على الجلد وان شاء الله بعد التشريح هنعرف اذا كانت في حاجه تانية ولا لا.. واكيد هنوفيك بتقرير

_ تمام يا دكتور بانتظارك ان شاء الله

...

اترفعت البصمات من الشقة والرجاله لمت الاحراز واتشمعت الشقه بالشمع الاحمر، واتنقلت الجثة لمصلحه الطب الشرعي عشان التشريح

ورجعت على مكتبي كان لسه الرائد أسامة راجع من اجازه وأول ما قابلته قولتله

_ حمد لله على السلامه، فينك يا راجل؟

= الله يسلمك يا باشا، واضح كده انك جاي من مأمورية.. جريمه قتل ولا حاجة تانية؟

_ جريمه قتل.. بس فيها حاجه غريبه ومش مريحاني

= خير يا باشا احكي

_ الست اللي ماتت شبه عارضه الازياء اللي اسمها زينب ولكن بسؤال جوزها قال انها شبهها بس وان المجني عليها اسمها ياسمين، بس مش عارف ليه ما كنتش مرتاح للراجل اللي بيحكي

= طيب وايه سبب عدم ارتياحك للراجل؟

_ مش عارف، بس الست اللي ماتت شبهها اوي، هو ممكن الشبه يوصل للدرجة دي؟!

= هو ممكن، بس واضح انك تعرف عارضه الازياء دي من بعيد قصدي يعني انك مش متابع الاخبار

_ مش فاهم؟!

= يا فندم عارضه الازياء دي اتقتلت من سنة، كانت متجوزه واحد بره وحصل بينهم خلافات وكانت نازله مصر عشان عندها عرض ازياء مهم ووقتها قعدت في فندق ولكن تاني يوم عمال الفندق دخلوا عليها الاوضه لقيوها مدبوحة

_ انا اول مره اعرف الكلام ده، واضح فعلا اني مش متابع، طيب وتعرف مين اللي عمل فيها كده ولا القضيه حصل فيها اي؟!

= على حسب الكلام اللي اعرفه ان القضيه اتقيدت ضد مجهول، في الاول كان متهم مجموعه من الشخصيات المهمه خصوصا انهم كانوا على خلاف مع المجني عليها ولكن كلهم قدروا يطلعوا منها رغم تواجدهم في الفندق وقت الجريمة

_ طيب والراجل اللي كانت متجوزاه ده مصري ولا اجنبي؟!

= لا مش عارف التفاصيل دي، بس كانت عايشه معاه برا فالارجح انه مش مصري

_ تمام يا اسامة، معلش انا عارف انك لسه جاي من اجازه بس اتعب معايا شويه عشان نخلص القضيه دي الراجل اللي بره ده اسمه شوقي جوز المجني عليها.. هتاخد اقواله في محضر رسمي عشان هو متهم حد معين، وبعدها هتشتغل على الاسم ده وتبلغ فريق البحث الجنائي بعمل تحريات عنه والتحريات دي تكون مفصله.. تمام

= تمام يا باشا حاضر

....

خرج اسامه من عندي، وكان عندي احساس ان القضيه دي فيها لغز.. قعدت افكر شوية وبعدها نزلت من المكتب ورجعت على البيت وبلغت اسامه ان لو في اي مستجدات يكلمني في التليفون ورجعت على البيت رميت جسمي على السرير وحاولت انام شوية ونمت فعلاً لكن صحيت على صوت تليفوني بيرن، واللي كان بيتصل أسامة واتكلم وقال

_ حضرتك صاحي يا فندم؟!

= خير يا اسامه في ايه؟!

_ احنا عملنا تحريات عن الشخص ده، كان محبوس في قضيه مخدرات القضيه كانت تعاطي وخرج من 3 شهور، وفي نفس الشهر اللي خرج فيه مدام ياسمين عملت فيه محضر عدم تعرض وقالت انه بيتعرضلها كتير في الشارع وانه هددها بالقتل

المشكله مش بس في كده يا فندم، المشكله ان الشخص ده متجوز في الوقت الحالي بس البنت اللي هو متجوزها متغيبه بقالها شهر، واهلها مبلغين عن اختفائها وفي اتهامات من اهلها ان جوزها هو اللي ورا اختفائها

= كل حاجه بتقول انه الشخص ده وراه بلاوي، ومش بعيد هيكون هو اللي قتل ياسمين.. عموما انا هقوم اخد دش كده واجي على المكتب

...

قومت من مكاني اخدت دش ونزلت ركبت عربيتي وكنت لسه هتحرك لكن لقيت اسامه بيتصل تاني وبيبلغني ان في بلاغ جديد متقدم من واحد اسمه عبد العال بيقول انه في ريحه وحشه اوي خارجه من الشقه اللي قصاده.. والمفاجاه ان الشقه دي ملك صابر عبد المنعم المشتبه الاول في القضيه بتاعة ياسمين، وانا كنت رايح المكتب عشان اطلع على الكلام اللي بلغهوني اسامه وبعدها اطلع اذن نيابه باستدعاءه او بالقبض عليه

اتحركت على العنوان بتاع صابر عبد المنعم اللي جاي منه البلاغ وصلنا قدام باب الشقه اللي فعلا كانت خارجه من وراه ريحه وحشه اوي.. كسرنا باب الشقه ودخلنا وكنت فاكر انه مش موجود لكن احنا لقينا صابر جوه لكن..

لقينا صابر عبد المنعم.. قاعد قدام لوحه وماسك ريشه وبيرسم، ولكن في طيور وحيوانات ميته حواليه والريحه كانت وحشة أوي

كنت مستغرب المنظر اللي قدامي، ولقيته بص علينا ورجع يكمل رسم واتكلم وقال وهو باصص لللوحه

_ خطوه عزيزه يا باشا، بس هو في حد يدخل بيوت الناس كده.. مش المفروض تخبط الاول وتشوف اهل البيت موجودين ولا لا

= ايه اللي انت عامله ده، الناس بلغت عنك بسبب الريحة المقرفه اللي طالعه من البيت، وكانوا خايفين يدخلوا يلاقوك...

_ ما تكملش، يلاقوني ميت.. وانا عارف ان المنظر اللي انت شايفه مش مفهوم، بس ده بالنسبه ليك.. اما انا فبستخدم دم الحيوانات في الرسم، بحب استخدم دم حقيقي مش لون

= بس دي جريمه في حد ذاتها، ليه تقتل روح ما هو الحيوان ده روح برضو

_ وهو حضرتك جاي عشان الحيوان، ولا عشان اختفاء مراتي والمحضر الخايب اللي عاملينه اهلها فيا

= لا ده ولا ده، طليقتك ياسمين لقيناها مقتوله في شقتها، وعلى حسب التحريات انت بعد ما خرجت من السجن اتعرضت ليها وهددتها.. فانت مشتبه رئيسي في الجريمة دي

_ مش هتفاجئ، لانها عايشه مع راجل مجنون واكيد هو اللي عمل فيها كده

= ايه الثقه والهدوء اللي انت بتتكلم بيهم دول، انا جاي اقبض عليك مش ادردش معاك

...

وامرت العساكر تمسكه، واخدناه معانا على المكتب واول ما وصلنا كان وصل تقرير الطب الشرعي وتقرير المعمل الجنائي والبصمات على مكتبي.. خليت صابر قدام الباب ودخلت انا واسامه المكتب وفتحت تقرير الطب الشرعي اللي كان قدامي وكان في انتظارنا مفاجأة كبيرة، لاحظ اسامه اني باصص للتقرير ومركز معاه فاتكلم وقال

_ خير يا باشا، هو التقرير في حاجه مهمه للدرجه دي؟!

= في حاجه مهمه أوي... مدام ياسمين كانت حامل في شهرين، وماتت نتيجه الدبح ولكنها اتعرضت لضرب مبرح وفي اثار حروق تبين ان الجاني استخدم آله حادة اشبه بسيخ حديد مستخدم على النار

تقرير المعمل الجنائي بيقول ان ما فيش كسر في باب او شباك، ورغم العنف المستخدم مع المجني عليها لانه الشقه كانت مرتبة ما فيهاش اثار تكسير

والبصمات الموجوده هي بصمات المجني عليها وبس

...

بصيت لاسامه اللي كان لسه مش فاهم قصدي ايه؟ وقولتله

: الجاني دخل بمفتاح الشقة او عنده خبره في تطفيش الابواب، دخل الشقه وفضل يضربها لحد ما فقدت الوعي وبعد كده دبحها

وهنا احنا قدام احتمالين

ان القاتل كان عنده خبره في تطفيش الابواب وهنا الشك ممكن يروح مع صابر، او ان القاتل استخدم مفتاح الشقة وساعتها الشك هيروح لجوزها الاستاذ شوقي

_ طيب تفتكر لو جوزها هو اللي عملها، كان عارف انها حامل ولا لا؟!

= ما اظنش، اكيد لو عارف ما كانش عمل فيها كده ده لو كان هو يعني، ومش عارف ليه انا عندي احساس انا اللي بره ده هو اللي عملها وان هو كمان اللي ورا اختفاء مراته وعموما هي هتظهر قريب وهنعرف كل حاجة

...

بعد ما خلصت كلام مع اسامة طلبت من العسكري يدخل صابر عشان نبدأ تحقيق معاه

_ معاك بطاقة يا صابر؟!

= وقعت مني يا باشا من فترة

_ طيب ما طلعتش بدل فاقد ليه؟!

= مش معايا فلوس عشان اعمل اي حاجه، وبعدين هو انا جاي هنا عشان البطاقة حضرتك قولتلي اني هنا عشان طليقتي اتقتلت وانك فاكر ان انا اللي قتلتها بس انا بقولك لا ومتاكد ان اللي عمل كده جوزها.. بس انا لو حكيت لحضرتك مش هتصدقني

_ لا هصدقك، بس اتكلم

= ياسمين هي اللي طلبت تقابلني بعد ما طلعت من السجن، مش زي ما مكتوب في المحضر اني اتعرضت ليها، بس هي طلبت مني طلب صعب شوية، عارفين طلبت مني ايه؟

_ طلبت منك ايه؟!

...

وقبل ما يتكلم التليفون رن.. وكان بلاغ جديد عن جثة مرمية على طريق صحراوي ولكن اللي بلغني قال ان الجثه اللي موجوده قدامه اوصافها تنطبق على مرات صابر.. طلبت من العسكري ياخد صابر على الحجز واتحركنا انا واسامه على مكان البلاغ واول ما وصلنا.. لقينا جثه قربت توصل لمرحله التحلل، كانت ملفوفه في قماش والريحه كانت بشعه اوي.. ولكن اللي خلاهم يقولوا ان هتنطبق عليها المواصفات اللبس والسلسله اللي موجودين على الجثة.. اتحركت ناحيتها ولكن رجلي جت على حاجه شلت رجلي من على الحاجه دي ومسكتها بايدي.. كانت بطاقه صابر ابتسمت وبصيت لاسامه وقولتله

_ اظن ما فيش، دليل اكبر من كده بطاقه صابر موجوده في موقع الجثة

= خلاص يبقى هو اللي قتلها.. واكيد اول ما نواجهه بالدليل ده هيعترف على طول واكيد كمان هيعرفنا قتل مدام ياسمين ازاي وليه

_ هو بيقول ان مدام ياسمين هي اللي طلبت تقابله، هناخذ منه الاول الكلام اللي عنده وبعدين نواجهه باللي عندنا ونشوف هيعترف ولا لا

..

وبعد ما رجاله المعمل الجنائي والطب الشرعي خلصوا شغلهم واتنقلت الجثه على المشرحة رجعت على المكتب من تاني وطلبت من العسكري يجيب صابر من الحجز وفعلا بعد 10 دقايق كان واقف قدامي.. وبدات اتكلم معاه

_ كمل يا صابر كلامك، احنا وقفنا عند ان مدام ياسمين طلبت تقابلك، واحنا عاوزين نعرف كانت عاوزه تقابلك ليه؟!

= ياسمين كانت بتكره شوقي، اهلها اجبروها على الجواز منه كانت بتقول عليه مريض نفسي، وانها مش مرتاحه في العيشه معاه ولما طلبت منه الطلاق ضربها ورفض يطلقها.. ومن يومها والعيشه اتحولت لجحيم كان كل يوم يرجع من شغله وبدون سبب يضربها وكان بيحرقها بسيخ حديد.. تعبت من العيشه ولما عرفت اني خرجت من السجن طلبت تقابلني وطلبت مني اني اخلص على شوقي، بس انا رفضت اعمل كده وقولتلها اني مش عاوز ارجع السجن تاني ولما رفضت اتفاجئت انها عامله محضر ضدي بعدم تعرض وقالت اني انا اللي بحاول اعترض طريقها واضايقها رغم ان ده ما حصلش

_ طيب وبالنسبه لمراتك، كانت علاقتك بيها عامله ازاي؟!

= عشان اكون صريح العلاقه بينا كانت متوتره والمفروض اني كنت هطلقها، لكنى رجعت من شغلي في يوم ما لقيتهاش قلبت الدنيا عليها وما كانش ليها اي اثر وبلغت اهلها، وعشان هي كانت بتشتكي مني كتير شكوا اني انا اللي عملت فيها حاجه بس والله العظيم انا ما اعرف عنها اي حاجه، والله ما اعرف هي راحت فين

...

في اللحظه دي طلعت البطاقه بتاعته.. وقولتله

_ مراتك اتقتلت، ولقينا دي جنب جثتها.. وانا مش عاوز لف ودوران قتلت مراتك ليه يا صابر؟!

= ما قتلتهاش، والله العظيم ما قتلتها ومش عارف البطاقه دي راحت ازاي جنب جثتها، صدقني انا بريء ما قتلتهاش

_ للاسف كل الادله ضدك، وانا كان نفسي تساعدني عشان اعرف اساعدك بس خلاص التهمه لابساك لابساك ولسه يمكن كمان تطلع انت اللي قتلت مدام ياسمين

....

طلبت من العسكري ياخده على الحجز.. ولكن في الوقت ده لقيت الاستاذ شوقي جاي وكان معاه واحده وعرفت انها اخته ساره حالته كانت صعبه ودقنه طويله ومش متزن.. كتر خيره

كان جاي يسأل هل في جديد في القضيه ولا لا؟

وكنت بتكلم معاه عن اخر التطورات في القضية لحد ما جات سيره ان مدام ياسمين كانت حامل وده اللي خلى شوقي يا نهار ويعيط بحرقه

ولكن المشكله مش هنا المشكله ان ساره اخته قالت

: ازاي حامل؟.. وانا اخويا اصلا عنده عقم ومش بيخلف

اخوها رفع راسه وبصلها وكانت المفاجأة..

شوقي بان عليه الارتباك، واتكلم وقال

_ لا ما انا اخدت علاج، والدكتور قال اني اقدر اخلف

ردت عليه اخته

= بجد وازاي تخبي علينا حاجه زي دي، كده خليتني ظنيت في الست الله يرحمها ظن سوء

_ انا كنت عاملها مفاجأة.. بس ما كنتش اعرف ان ده هيحصل اكيد

....

كلام شوقي ما عداش عليا كده وخلاص، الارتباك الواضح اللي ظهر عليه ولسانه اللي تقل خلاني اشك فيه اكتر، اه كل الادله بتقول ان صابر هو القاتل ولكن موضوع انه مش بيخلف ده ومراته حامل بيفتح القضيه على احتمالات تانيه خالص

ممكن يكون عرف انها مش حامل منه وعشان كده ق. تلها، وكمان في حاجة، موضوع التعذ. يب بالسيخ اللي ذكره صابر في التحقيقات وقال ان ياسمين قالتله ان شوقي بيعذ. بها بيه

اضطريت اكمل كلامي معاهم وعرضت عليهم اخر التطورات في القضية وهنا سجلت الملاحظة التانية، لاني بمجرد ما ذكرت صابر في الكلام وقولت ان هو المتهم بق. تل مدام ياسمين وق. تل مراته كمان وان كل الادله ضده اتغيرت نظره شوقي من التوهان للفرحه حاول يخبيها بسرعة ولكن انا لاحظتها

وانا من البداية ما كنتش برتاح لشوقي وعشان كده قررت اني لازم ادور وراه... وبعد ما مشي هو واخته طلبت من اسامه يعمل تحريات عن شوقي عاوز اعرف كل حاجه عنه من يوم ما اتولد

وبعد 48 ساعة ظهر تقرير الطب الشرعي الخاص بجث. ة مرات صابر

والتقرير كان بيقول ان الجث. ه وصلت لمرحله صعبه من التحلل ولكن الست دي تعرضت للاعتد. اء وطبعا معروف يعني اعتد. اء من غير ما اوضح قبل وفاتها

..

والسؤال هنا هل الراجل هيعتدي على مراته قبل ما يق. تلها؟ والمقصود هنا بالاعتداء مش الض. رب، مش عارف ليه كنت حاسس ان صابر مش هو اللي ق. تل مراته ولكن الموضوع لا يعتمد على الاحساس الموضوع يعتمد على ادلة، وحتى الان كل الادلة ضده، فاتت كمان 24 ساعة وده اللي خلاني اكلم اسامه

_ ايه يا اسامه، 72 ساعه في تحريات انت مش شايف ان الوقت ده كبير، انا عاوز التحريات عن اللي اسمه شوقي ده النهارده

= يا فندم المعلومات كتير، ورجاله البحث الجنائي بتحاول تحصر كل المعلومات عشان ما تبقاش في حاجه ناقصه بس اقدر اقولك ان الراجل ده وراه بلاوي

_ النهارده يا اسامه تكون عندي كل المعلومات

...

قفلت مع اسامه اللي نص ساعه ولقيته بيخبط عليا وداخل المكتب، كان معاه ملف كنت فاكر انه ملف التحريات ولكنه اتكلم وقال

_ ده مش ملف التحريات، حضرتك فاكر لما قولتلي ان ياسمين شبه عارضه ازياء اسمها زينب وانا قولت لحضرتك ان زينب اتق. تلت من سنة وكانت متجوزه واحد بره، حتى حضرتك ساعتها سالتني هو مصري ولا اجنبي

= ايوه ايوه فعلا

_ طيب حضرتك بص على الصوره دي كده، دي صوره جوزها واسمه طه سليمان

= انت بتهزر، دي صوره شوقي!

_ بالظبط يا فندم، صوره شوقي.. شوقي هو طه سليمان وهو اللي ق. تل عارضه الازياء زينب وبعدها رجع مصر بشكل جديد وباسم شوقي اللي اكيد ده اسمه الحقيقي اللي مولود بيه في مصر

= الكلام ده خطير جداً.. انا هستنى منك التحريات النهاردة ولو اكدت نفس الكلام ده هنجيب اذن من النيابه بالقبض عليه وتفتيش شقته

_ تمام يا فندم

....

خرج اسامه من عندي، وبعد كام ساعه رجع ومعاه ملف التحريات

واتكلم وقال

_ حضرتك جاهز اذن النيابه من دلوقتي بقى، التحريات دي هتخلينا نقبض على شوقي

= طيب هات ملف التحريات خلينا نشوف في ايه؟!

...

وكالعادة اسامه اداني ملف التحريات وقبل ما افتحه وبدأ يتكلم

= شوقي ده طلع فيلم يا فندم، اول حاجه شوقي سافر تركيا مع والده من وهو صغير وعاش هناك 15 سنة لحد ما وصل لسن الشباب وبعدها رجع على مصر بس كان معاه بيزنس هناك والظاهر انه كان شغال في الشركه بتاعه والده استيراد وتصدير ولكن دي كانت مجرد صورة، شوقي اتمسك هناك في قضيه تزوير في اوراق رسمية وكل الادله كانت ضده بس عشان المصالح والعلاقات هناك كانت مع ناس تقيله، كل الادله دي اختفت وشوقي نفسه اختفى فتره وبعدها رجع تاني تركيا وكان مغير شكله مربي دقنه وطريقه تسريحه شعره ووقتها اتعرف باسم طه سليمان وكان متجوز عارضه الازياء زينب، وعلى حسب التحريات قبل ق. تل زينب بشهر صرحت هي في جريده وقالت انها بتعيش اصعب ايام حياتها وبتتمنى تخلص من الكابوس اللي في حياتها بس ما قالتش مين هو الكابوس ده، وقالت للناس قريبين منها ان طه بيعاملها معامله صعبه وبيض. ربها مش عاوزها تنزل عرض الازياء بتاع مصر وهددها انها لو نزلت هيق. تلها وبعد ما اتق. تلت دوروا على اللي اسمه طه سليمان ولكن ما كانش ليه اي اثر، ورجع على مصر بشكل تاني وهيئه تانية او نقدر نقول هيئته الاصليه ورجع لاسم شوقي والارجح انه اتجوز ياسمين عشان هي شبه عارضه الازياء

...

قفلت ملف التحريات وقدرت اجيب اذن من النيابه بالقبض على شوقي وتفتيش شقته.. وبعد ما حصلنا على الاذن اتحركنا على بيت شوقي اللي تفاجئ بينا اول ما دخلنا عنده وبتفتيش الشقه لقينا اربع باسبورات واربع بطايق وكلهم باسماء مختلفه

احنا نعرف منهم اتنين شوقي وطه ولكن زاد عليهم كمان ممدوح وعماد، اخدناه معانا على المديرية عشان نبدأ تحقيق معاه

وطلبت من اسامه يعمل تحريات عن الاسامي دي ممدوح الشريف وعماد حافظ

وطبعا واجهنا شوقي بكل حاجه عندنا.. انهار وما كانش عارف يتكلم كان ساكت، وفضل ساكت لحد ظهور التحريات عن الاسامي التانية تورطهم في جريمتين ق. تل ممدوح الشريف المفروض انه ق. تل مراته واختفى وما حدش عرف يوصله وعماد حافظ ق. تل مراته واختفى وما حدش عارف يوصله، احنا كنا قدام سفاح.. مش عارف اقول عليه سفاح النساء ولا هكون ببالغ

في الوقت ده اخته جات المكتب عندي ومعاها تقرير من دكتور نفسي ان اخوها مريض ومحتاج يدخل مصحه ولكن ده نفذ اربع جرايم وممكن هو كمان يكون اللي ق. تل مرات صابر

وفي عز ما احنا بنحقق معاه اعترف بق. تل الخمسه وقال

_ كنت بتعالج عند دكتور نفسي انا عندي هوس اسمه الخيانة، من يوم ما امي خانت ابويا قدام عينيا وانا شايف كل الستات خاينة ولما سافرت معاه تركيا كنت فاكر ان ابويا انسان نضيف لكنه طلع مزور عرفني كل حاجه عن شغله قبل ما يموت وانا كملت لحد ما قابلت زينب اتجوزتها لكن هي ما كانتش بتقدر مشاعري وكانت بتعمل علاقات مع رجالة ق. تلتها.. ولما نزلت مصر وشوفت ياسمين ما كنتش مصدق ان زينب لسه عايشه اصلها شبهها بالملي اتجوزتها عشان شبهها ولكنها ما كانتش بتحبني، اهلها اللي اجبروها تتجوزني بعد ما اتطلقت من اللي اسمه صابر وفي يوم رجعت من السفر وشفتهم مع بعض كان ممكن ادخل واخلص عليهم هما الاتنين ولكن انا دوقته من نفس الكاس وضيعت شرف مراته زي ما ضيع شرفي ايوه انا اللي ق. تلت مراته بس في الاول اعتد. يت عليها، وبعدها ياسمين هانم جايه تقولي انها حامل وهي مش عارفه اني اصلا مش بخلف ق. تلتها.. وكان لازم اق. تلها عشان خاينه وتستاهل المو.. ت

= طيب والشخصيات اللي انت ظهرت بيها وقتلت بها اتنين كمان

ممدوح وعماد؟

_ الدكتور انا ان المشكله هتتطور عندي لدرجه اني لو اتجوزت اي واحدة هشوفها خاينه وهق. تلها حتى لو هي ما عملتش حاجه وبريئة

انا مش عارف ليه عملت كل ده، ولسه مش مصدق اني ق. تلت خمسة مش مصدق

....

كنت قاعد قدام واحد مريض نفسي طبعا اترحل للنيابة ومن النيابة للمحكمه اللي امرت بوضعه في مستشفى الامراض النفسيه بالعباسيه 45 يوم والافاده بتقرير عن حالته

ولكن بعد اسبوع واحد شوقي انهى حياته ورمى نفسه من شباك اوضته وانتح. ر.. ما حدش يستهون بالمرض النفسي لانه اصعب بكتبر من المرض العضوي.

انتهت احداث الرواية نتمني أن تكون نالت اعجابكم وبانتظار آراءكم في التعليقات