الفصل الخامس

رواية خلف الظلام الجزء الخامس 5 بقلم عادل عبدالله خلف الظلامرواية خلف الظلام الحلقة الخامسة عماد : وسايبك واقفة مع العمال كده لوحدك ؟ رضوي : وفيها ايه ؟ عماد : لأ طبعاً مينفعش ، معندناش ستات تقف مع رجالة لوحدهم . رضوي : دول الصنايعية اللي بيعملوا شغل في المحل ، وبعدين انت مالك ؟ عماد : مالي أزاي ؟ رضوي : أيوه مالك ؟ انت تحكم علي مراتك مش عليا . عماد : بقي كده ،طب أنا ليا كلام تاني مع جوزك .

صعد عماد مسرعاً إلي منزل اخيه ، وبمجرد دخوله وجد رضوي تتبعه وتقول لطارق ” في غضب ” : بقولك ايه يا طارق ، فهم أخوك ملوش دعوة بيا . عماد : أنت أزاي قاعد هنا يا طارق وموافق إن مراتك تقف مع الرجالة اللي شغالين تحت لوحدها ؟ طارق : ايه اللي حصل ؟

رضوي : أقولك أنا اللي حصل ، اللي حصل يا سيدي إن أخوك كان جايب واحد يركب كاميرا قدام البيت ، وشافني واقفة مع الصنايعة بكلمهم عن الشغل اللي عايزاه في المحل ، راح جاي ومزعقلي قدامهم وخلاني واقفة في نص هدومي في الشارع . طارق : كاميرا ليه يا طارق ؟ عماد : مش موضوعنا دلوقتي ، المهم إنك …. تقاطعه رضوي : المهم لازم تشوف حل مع أخوك ده . طارق : ايه اللي عملته ده يا عماد ؟ عماد : عملت اللي أي راجل حر لازم يعمله .

رضوي : ليه ، أنا معملتش حاجة غلط . عماد : لأ غلط طبعاً ، ميصحش أنت تقعد هنا وتسيب مراتك واقفة وسط الرجالة لوحدها . طارق : وأنت زعلان ليه يا اخي ؟! أومال مين يقف مع العمال ؟ عماد : أنزل أنت أقف معاهم أو أقف أنا معاهم . طارق : و أنا هقف اعمل ايه وأنا مبشوفش ؟! وأنت كمان طول اليوم في شغلك ، يعني مفيش حد غيرها يقف معاهم . عماد : يبقي تسلم المحل لمقاول وتستلموا منه ع المفتاح بعد ما يخلص كل حاجة .

رضوي بعصبية : أنا مشوفتش حد بيتدخل في حياة حد بالشكل ده ! عماد : أنا مش حد ، أنا أخو جوزك . رضوي : وأنت دخلك ايه ؟ عماد : أنا ليا الحق لما أشوف غلط اتكلم وأمنعه ، فاهمة ولا مش فاهمة ؟ طارق : كفاية لحد كده يا عماد ومتكلمهاش بالأسلوب ده وأنا موجود . عماد : يعني ايه ؟ طارق : يعني أنت مش وصي عليا وعلي مراتي علشان تتدخل في حياتنا بالشكل ده . عماد : هو ده اللي قدرت عليه يا طارق ؟

طارق : كفاية بقي لحد كده ، خليك في حالك يا أخي وأحنا في حالنا . عماد : بقي كده يا طارق ! ماشي . إنصرف عماد يتطاير الشرر من عينيه ، بينما بقي طارق الذي قال لها : متزعليش يا رضوي ، حقك عليا . رضوي : خلاص يا طارق ، حصل خير . طارق : أصل عماد ده طول عمره الصغير والمتدلع بتاع أبويا وأمي الله يرحمهم . رضوي : بس لازم يعمل حسابك أكتر من كده ، أنت برضو أخوه الكبير .

طارق : طول عمري أنا وعماد بنختلف مع بعض ، ودايما أبويا وأمي كانوا بيبقوا في صف عماد ، لدرجة إنه خلاص بقي فاكر نفسه صح في كل حاجة ، ولما حد يعترض عليه بيقلب الدنيا زي ما شوفتي . رضوي : وأنا ذنبي ايه يا طارق ! ده كسفني قدام الناس ! طارق : خلاص بعد اللي حصل مش هيتجاوز حدوده معاكي تاني . رضوي : متزعلش مني يا طارق أنا من النهاردة مليش أي علاقة بأخوك أو بمراته . طارق : هتقاطعي مراته كمان ؟

رضوي : أيوه يا طارق ، أنا مكنتش عايزة أقولك من زمان ، لكن دلوقتي لازم تعرف كل حاجة . طارق : فيه ايه ؟ أنتي مخبية حاجة عني ؟ رضوي : أيوه يا طارق ، أخوك ومراته بيغيروا مننا ، بعد جوازنا لما سافرت وكنت بتبعتلي فلوس و هدايا ، كنت دايماً بشوف الغيرة والحقد في عينيهم ، لكن كنت بخبي عنك . طارق : ليه ؟ رضوي : علشان متخسرش أخوك ، حتي لما أشتريت البيت ده كانوا هيموتوا من الغيرة . طارق : يااه كل ده ؟! رضوي : وأكتر كمان .

طارق : طيب يا رضوي ، أطلبي أوبر بقي دلوقتي . رضوي ” بدهشة ” : ليه ؟ هنروح فين ؟ طارق : هروح ليوسف صاحبي . رضوي : لكن أنا تعبانة النهاردة يا طارق ، خليها يوم تاني . طارق : لأ خليكي أنتي أنا هروح لوحدي . رضوي : خلبها يوم تاني علشان أكون معاك ، مش معقول هتروح لوحدك . طارق : مش عاوز اتعبك وكمان علشان أقعد معاه علي راحتنا ، ما أنتي عارفة يوسف مش متجوز .

رضوي : طيب خلاص يا حبيبي ، أنا هأكد علي سواق أوبر أنه ينزلك في العنوان مظبوط . في منزل عماد يعود إلي منزله وتلاحظ أميرة علامات الغضب تكسو ملامحه ، فتسأله : مالك يا عماد ؟ عماد : طارق ومراته . أميرة : مالهم ؟ عماد : من النهاردة ملكيش أي علاقة بيهم . أميرة : ليه ؟ ايه اللي حصل ؟ عماد : روحت بقوله ميصحش مراتك تقف مع الرجالة لوحدها ، زعقلي وقالي أنت مالك ، متدخلش في حياتنا ، ومراته كانت بتسخنه بكلامها عليا .

أميرة : حتي بعد الكلام اللي قولتهوله المرة اللي فاتت عنها ؟! عماد : الظاهر كده أنه مصدقش كلامي و مش مقتنع فعلاً إن مراته ممكن تعمل كده . أميرة : وبعدين ؟ دي لو كانت بتخونه فعلا … يقاطعها عماد : بتخونه ، أنتي كمان مش مصدقة إنها بتخونه ؟! تحبي أحلفلك علي المصحف ؟! أميرة : مصدقة ، مصدقة خلاص ، أنا قصدي إنها دلوقتي هتاخد راحتها ع الأخر .

عماد : طبعاً هتاخد راحتها وتعمل اللي نفسها فيه بدون خوف ، لكن كده أحسن ، علشان الحبل اللي أتساب ده هو اللي هتخنق نفسها بيه من غير ما تحس . أميرة : نفسي أفهم ليه أخوك مش مصدقك وصدقها في كل حاجة ؟ عماد : ده مش غريب علي طارق ، طول عمره علشان الكبير فاكر نفسه هو الوحيد اللي صح وكل الناس غلط . أميرة : لكن أنت أخوه والمفروض يعرف إنك أكتر واحد عايز مصلحته وعمرك ما هتكدب عليه .

عماد : بقولك هو صوته من دماغه ، مبيسمعش لحد ولا بيثق في حد إلا نفسه ، إنسان مريض معقد . أميرة : خلاص يا عماد ، أهدأ دي زوبعة في فنجان وهترجعوا كويسين تاني . عماد : مش دلوقتي يا أميرة ، لما يعرف ويصدق إن كل كلمة قولتهاله كانت صح ولمصلحته وإن الحية اللي متجوزها دي بتضحك عليه . أميرة : وهنفضل نراقبها ؟

عماد : طبعاً ، هنفضل نراقبها لحد ما نمسك عليها إثبات ، و أنا جيبت كاميرا ركبتها قدام البيت ، لازم مسيرها تقع في شر أعمالها . في منزل يوسف ( صديق طارق ) يستقبل يوسف صديقه طارق بالأحضا,ن … يوسف : أهلاً وسهلاً يا طروق ، نورت الدنيا كلها . طارق : بنورك يا جو ، بقي كده يا راجل متزورنيش ولا مرة من يوم ما زورتني لما رجعت ! يوسف : سامحني يا طارق ، الحجة عندي تعبانة جداً وكنت مشغول معها . طارق : ألف سلامة عليها .

يوسف : الله يسلمك ، المهم هتشرب ايه بق ؟ طارق : ولا أي حاجة . يوسف : أزاي ، ده أنت أول مرة تزوني في بيتي ، لازم تشرب . طارق : يبقي قهوة ع الريحة . يوسف : حاضر ، هعمل اتنين قهوة وأجيلك بعد دقايق ، بيتك ومطرحك . ذهب يوسف ، بينما بقي طارق ينتظره ، ولأول مرة يجلس في مكان لم تراه عيناه من قبل ، ولأول مرة يوجد في مكان مظلم تماماً ! عاد يوسف بقدحين من القهوة … يوسف : منور الدنيا كلها يا طارق . طارق : الله يخليك يا يوسف .

يوسف : مالك بقي ؟ ايه اللي تعبك بقي ، ما أنت كويس وزي الفل أهو . طارق : مين اللي كويس يا يوسف ، أنت متعرفش أنا جوايا ايه . يوسف : ايه اللي حصل يا طارق خلاك ترجع للحالة دي تاني ؟ طارق : أول مرة أحس إني أعمي بجد . يوسف : متقولش كده يا طارق ، كلنا حواليك . طارق : أنا واقع في مشكلة كبيرة أوي . يوسف : مشكلة ايه ؟ اتكلم وفضفض ، يمكن نلاقي الحل مع بعض .

طارق : أنا بثق فيك يا يوسف أكتر ما بثق في نفسي ، علشان كده هقولك كل اللي جوايا . يوسف : ثقتك في محلها يا صحبي . طارق : عماد أخويا . يوسف : ماله ؟ طارق : عماد بيقول إنه شاف مراتي في موقف مش كويس . يوسف : معقول ؟! لأ مش ممكن ! وأنت صدقته ؟ طارق : مش قادر أصدقه يا يوسف ، رضوي هي الإنسانة الوحيدة اللي واقفة جنبي في كل حاجة ومسبتنيش لحظة واحدة من وقت الحادثة .

يوسف : أيوه ، أنا شوفتها مرات معدودة ، دي ست محترمة فعلاً وبتحبك ، مستحيل تعمل كده . طارق : لكن في نفس الوقت خايف يكون كلامه حقيقي وأبقي عايش مغفل مع واحدة بتخوني ، وتكون كل أفعالها معايا لغرض تاني لسه معرفوش . يوسف : لأ ، صعب أصدق حاجة زي كده . طارق : و عماد هيكدب عليا ليه ؟ يوسف : معرفش ، يمكن عينه خدعته ، مش كل حاجة بنشوفها دايماً بتكون صح . طارق : علشان كده عايز أشوف الحقيقة بنفسي .

يوسف : علشان كده نويت تعمل العملية اللي قولتلك عليها . طارق : أيوه بس لازم محدش يعرف حاجة عن العملية دي ، و يارب تنجح ، علشان ساعتها بس كل واحد أشوفه علي حقيقته .