تحميل رواية «قضية طلاق» PDF

مرحبا حبايبي ..

قضية طلاق ..

بقلم Aseel ..

بارت٢٢..

بارت لعيونكم ..

......

كمت اتلوة ..واصارخ بصوت تعبان ..

محسيت غير اندفر الباب..

مشفت منو .. جان النظر مغوش وبديت اشوية اشوية افقد ..

الم بطني كان مو طبيعي .. جنت فاقدة بس احس بالم ببطني ...

صحيت واني بالمستشفى وامي فوك راسي تبجي وابوية حاط ايدة على راسة وكاعد على كرسي. . واخواني واكفين ..

رشا :ماما ..وبجيت .

ام سامر ليش ماما هيج هنت عليج .. هيج تكرهيني وتريدين تحركين دمي ..

رشا: ماما والله تعبت بعد مااتحمل .. بشر اني مو حجر... مهيمن بعد ميريدني .. خسرت كلشي اني ..

ابو سامر: يعني اذا هوة ميريدج واحنة شنو .. المن ربينة وكبرنا حتة تموتين روحج علمود شخص مصارلج سنة من عرفتي ..

مع الاسف عليج .. عبالي انت الي على كلبي..طلعت مااهمج ولا الي بكلبج مكان ..ما درتي بال لاحد ..

رشا: بابا والله اسفة .. اختنكت واحس بذنب مو طبيعي ..تعبت كل مااريد افرح لازم يجي شي يخرب فرحتي ..

سامر: دكومي كومي ام فرحة ... هية هاي المسلسلات التركية شحصلنة منها ..

خل اروح اشوف الدكتور شوكت نطلع حتة تتحضرون .

رشا: راح سامر يشوف الدكتور .. احس معدتي تخبط من وجع ولعبان نفس

ماما بطني دتموتني ..

ام سامر: لعد هينة الي سويتي .. الله يساعد معدتج على الحبوب الشاربتها .. زين ما صارت قرحة ..

رشا :صيحي احد خل يضربني مسكن ماكدر اتحمل الوجع ..

ام سامر :هاي مال غسيل المعدة الي سووه الج .. خليج هيج تتوجعين حيل بيج حتة كل متفكرين تعيدها تذكرين الوجع ..

رشا :عمي والله ماعيدها بس خلصوني ..

ام سامر : مو زين اي دوة حاليا اتحملي اشوية لا تصيرين مايعة ..شلون تريدين تصيرن ام لعد

رشا: وشجاب الام بالنص متكليلي..عمي ماريد بطلت حلو الوجع يخبل ..

درت وجهي بتعب وحاولت انام ...

اسمع ابوية يحاجي احد بتلفون بس سويت روحي نايمة اريد اعؤف شيحجي..

ابو سامر: لا حالتها مستقرة ..

اي الحمد لله لحكنا عليها باخر لحظة .

اي والله منعرف شلون نجازيك لوماانت مخابر جان ماتت وملحكنا عليها ..

ولو عندي عتاب وياه بس هلة بي .

اي بعدنة بالمستشفى..

هلة بيكم .. الله وياك.

رشا :ماكلكم كلبي شلون كام يركص ويضرب دقلات..

عرفت الي يحاجي مقداد لان بس مقداد حاجيتة اخر مرة ..

يربي يكون الي ببالي صحيح وميهمن يجي وياهم ..

اجة سامر ..

سامر :يكول خلوها تبات اليوم هنا وباجر الصبح تطلع

رشا: ليش هسة شنو ..

ام سامر: هسة عصر ..

رشا: يعني اني من البارحة لهسة نايمة ..

ام سامر :اي واحنة من البارحة لهسة كاعدين فوك راسج .

رشا :يمة حتعيريني لخاطر الله متصدكين تلكيلج شي علية .. شبيج شادة وياي هليام

ام سامر :لان تصرفاتج متعجبني ..

رشا :ماما والله مابية حيل اسولف ..اجلي العركة للبيت

اشوية واجو عيالي جان جاي مقداد وعمتي ورفل ..

ضليت اباوع وراهم بلكت مهيمن جاي وياهم ..

بس ماكو .. وصلو يمي وتحمدو للسلامة ..

رفل :انتي صدك خبلة اكو وحدة تسوي هيج علمود مهيمن ..

رشا :دنكت وفشلت لان ابوية ومقداد وخواني كاعدين ...

رفل: والله عمي مهيمن نيالك على هيج حب وين تلكاها ..

رشا :دتحجي وانفتحت الباب طبتلي ريم تركض ...

ماكلكم شنو جان احساسي بس انتو تخيلو ..يصير وياكم هيج شي .. شخص يزعل منك ويروح ومتعرف اخبارة ويطبلك فجأة...

اذكر شهكت بجي من حضنت ريم وراها طب مهيمن ..سلم على اهلي . وعيوني تركض وراه..اريد احصل كلمة منة الي ...

ابو سامر :يلة خل ياخذون راحتهم .. بلكت يتصافون ويفضونا عاد ..

مقداد :اي والله لعبت نفسي من المكالمات صرت مرسال حب بينهم ..

رشا: طلعوو ... واجة مهيمن كعد على الجرباية ..

فتحلي ايدة واني ماصدكت حضنتة وشابكة بي وابوس بركبتة .. واقوي بحضنتي واعصر بهدومة ..

عبالك راح يطير .. اشم بي وابجي .. وهوة هم جان حاضني قووي .. جانت ايد بضهري وايد على راسي شابكني بيها ..

اشهك بصوت عالي وخرني ولزم راسي ..كال .

مهيمن :ليش تعذبني .. ينطيج كلبج انحرم منج وتموتين نفسج ..

رشا: مو انت عفتني .. ماكدر بدونك مهيمن .

مهيمن: مجنت اتصور لهدرجة تحبيني ..

رشا :واكثر بعد انت روحي من الدنيا ..

مهيمن: ياروحي انتي ..

رشا: يعني سامحتني ..

مهيمن: اني مازعل منج حتة اسامحج ..بس جنت محتاج اكعد وحدي واصفي دماغي اشوية ..

رشا: ٣ اشهر واشوية لعد لو هواي شكد تضل ٣ سنوات..

مهيمن: بعد ما تتكرر.. بس ماريد بعد جذب .. نرجع لبيتنة وتحجيلي كلشي ..من البداية للنهاية.

رشا :سد الموضوع حباب.

مهيمن :اذا تريدين نسد الموضوع لازم نحجي بي ونخلص منة حتة منفتحة بعد ...حتة مااضل كل اشوية اتذكرلي سالفة واسألج ونضل هواي .

رشا: ماشي الله كريم ..

هيج انطاك كلبك متشوفني ..

مهيمن: واني اكدر ماشوفج هوة اسبوع والباقي جنت اراقبج من بعيد ..

رشا: يعني جنت هنا .. ممسافر ..

مهيمن :اول اسبوع رحت لاربيل بس مكدرت بلياج رجعت وجنت كاعد ببيتنا بس محد يعرف ردت ابقة وحدي .. بس مقداد يعرف

رشا :وانطاك كلبك تعوفني اتلوع عليك ..

لزمني من اذاني وجرها ..

مهيمن :حتة تتوبين تضمين علية شي مهم مثل هذا

رشا :اسفة والله

مهيمن: بس تدرين شغلة ...اول مرة اعرف اني عزيز عند احد لهدرجة ..

رشا: وشمدريك بية اني ردت اموت

ميهمن :جان مقداد يمي من انتي خابرتي ..

وعرفت بيج خبلة فاتصلت على سامر يلحك عليج ..

رشا: ترة زعلت منك هسة اني ..

مهيمن :وليش بالله زعلانة ..

رشا: هيج ينطيك كلبك متشوفني كل هلمدة ..

ميهمن: ترة للعلم يومية اراقبج تروحين وتجين ..بس ردت اسويلج درس .. والصراحة اني الي زعلان منج .

ليش هاملة دراستج خابروني الدكاترة يشكون من مستواج ولا محاضرة داخلة واذا دخلين تتصفنين..

رشا :ماكدر بدونك انشلت حياتي وانت ماكو ..بعد لتسويها وكمت اضرب بصدرة .. لتسويها بعد اموتك اموتك ..

ضحك وحضني .. كال..

مهيمن :يلة جيبي الصحيبة ..

رشا: ضحكت ومديت اصبعي الصغير وسوينا مثل الجهال تصاحبنا ... تصاحبنا اني ومهيمن ..

..يشهد الله لو جنت اعرف من البداية اسوي هيج حتة اشوفك ..

مهيمن :دنجبي انجبي .. دسويها بعد حتة اذا متموتين اني اموتج بيدي..

رشا :لا توبة ..بس اذا عفتني اموت روحي..

ضل وياي لليل وبات وياي والصبح طلعت لاهلي حتة الم غراضي ..

تغدينا ورجعنا لبيتنا .. بس اني ومهيمن ...عمتي اخذت ريم يمها كالت انتو اليوم عرسان وراحت لبيت مقداد ..طبيت لغرفتي شفتها نظيقة وفرشة جديدة .

رشا :هااي شنو منو منظفها ..

مهيمن: مو عيب علية عروس ودخلين لغرفة متربة .

خليت رفل تنظفها الج..

رشا :خطية ليش هيج متعبها ..

مهيمن: وانتي هم خطية تتعبين اليوم ..

رشا: ليش شكو اليوم .

مهيمن: ترة هاي دروبج مو علية ...

رشا: ههههههه ترة هستوني طلعت من المستشفى..

مهيمن :مشكلتج مو مشكلتي ..

رشا: اوكف خل اسبح خل ابدل ريحتي كلها احسها مستشفى..

ميهمن :يلة انتظرج مو تتاخرين ..

رشا: ماشي .. اخذت البرنص لان ماحب ابدل بالحمام .. سبحت وكملت وطلعت ..

رحت للغرفة لكيتة مشغل التدفئة الجو يجنن دافي مال نوم وساعة تقريبا ب١ ونص الظهر يعني جو ينعس ..

صاحني ورحتلة ...

...........

جنت نايمة على ايدة وحاضني من ورة ..

ميهمن :صايرة ضعيفة مابيج لحم ..

رشا :من الراحة غير ..

مهيمن: هيج فراكي يعذبج ..

رشا: كافي مامليت عبالك مامصدك ..كلساع هيج فراكي وهيج فراكي ..

درت وجهي عليه ...اي فراكك عذبني وموتني وضعفني وجنت مستعدة اموت ولا افاركك بعد ..رتاحيت ..

لكفني ببوسة بشفتي ودارني صعدني فوكة ..حط شعري الي نزل على وجهي ورة اذاني ..كال ..

مهيمن :الله لا يحرمني منج .. احبج ياحلى حب بحياتي ..

رشا :ولا يحرمني منك يا عشكي انت ....

........

حجيت لمهيمن كلشي طبعا بس شلت البوسة من السالفة لان يشعل جدجدي .. (مو تكولولة )

مرت الايام احلة من العسل حياتنا كلش حلوة ..

ساعدني مهيمن اعدل درجاتي وتوسطلي للدكاترة يعيدولي الامتحانات.. الحمد لله عديت المرحلة الثانية وخلصتها ...

فديوم خابرت امي كالتلي عرس عماد هلاسبوع ..

فرحت يمهم ثاني يوم حتة نبدي تحضيرات للعرس ..

رحت لاهلي واجواء فرح مو طبيعية لان لمة حبايب .. طبعا مايخلة الحجي بسالفة ليش ماحبلتي ..

اكتفي بكلمة اكمل دراسة يلة ..

مع العلم متشوقين اني ومهيمن حتة يصير عدنة اطفال بس هلشي بيد الله ..

قبل يوم الحنة اخذني مهيمن وتسوكت ورحت عدلت شعري بالصالون...طلعت عروس من جديد خاصة بهاي الفترة وزني رجع وخدودي تفحن اكثر

مهيمن متخبل على شكلي خاصة من سويت شعري اطرافة ثلجي وجان قليل الي يسوي هيج صبغ واني تجرأت وسويتة برز ويا شكلي مو طبيعي ..

رجعت بعد مااشتريت فستان  فضي قصير والظهر مفتوح .. يجنن تصميمة .. شغلة كرستال .

صارت الحنة وتونسة من صدك لبست فستاني ومكيجت سموكي اسود وحمرة حمرة ..

غيرت من لوكي اشوية .. طلعت غريبة قليل عرفوني لان ممتعودين على جرأتي

المهم طلعت ملكة الساحة .. اجت زهرة وصايرة تخبل خاصة من حملت وسمنت وحلوت اكثر الظاهر مرتاحة ويا ابن عمي ..

مصار حدث غير عادي بالحنة .. مرت بخير وسلام وونسة وسوالف ورحنا حنيناها .. طبعا مجان شكلها عبالك عروس لان متعودين على شكلها بالمكياج يعني ماكو تغيير

طبعا بغض النظر على لبس بناتهم صار منظرهم عادي ...

بس بليل من رجعنة فاجأني مهيمن من طلع بية كبل لبيتنة ..

رشا :وين مهيمن بس لا تريد تاخذني للبيت .

مهيمن :لعد افوت هلحلو مني ..

رشا :لا مهيمن عليك الله لا تسويها ..اليوم البنات يباتن كلهن مشتاقة للمتهن ..

مهيمن: يعني بربج .. ممشتاقة للمتنة صارلج اسبوع يالظالمة ماحنيتي علية ..

رشا: بس اليوم حبيبي انتة ..والله باجر بس يزفوهم ارجع وياك ...

مهيمن: لا حبي اني مسافر باجر بليل ..

رشا :وين مسافر اشو ماكتلي ..

مهيمن :اختي عذراء الي بالبصرة متعاركة ويا عيالها بيت عمي وخابرتني تبجي تريدني اجيبها ..

رشا :يا خطية .. وليش مارحت اليوم ..

مهيمن: لا عيب شلون اعوف العرس علمود زعلة مرة وعيالها .. كتلها باجر اجيج..

رشا: زين رجلها وين ..ليش ميجيبها ..

مهيمن :رجلها عسكري .. مخابرتة كايللها خل اخوج ياخذج لان يعرف امة متنطاق

هسة انتي وين وديتينا بالسوالف ..

يلة نزلي وكبل للغرفة بدون متسوين شي غير تذبين الصاية وبس اجي الكاج بالغرفة ..

رشا :ماشي يلة بس عيب من امك ..

مهيمن :امي هيج وكت بسابع نومة اطمني ..

رشا: طبيت للبيت وصعدت بوجهي للغرفة ..نزعت الصاية وعدلت شكلي بحركات سريعة وعدلت شعري ..

طب مهيمن ..

مهيمن: هذا كلة وتريدين تحرميني يا حقيرة ..

رشا :انت متبطل غلط ..

مهيمن: والله من اغلط عليج ابرد ناري الي شاعلتها .

رشا: اوووف شنو هلنار لعد الي متطفة الا بالغلط ..

تقرب مني وسحبني الة ودنك يبوس بركبتي ..

مهيمن: تعالي اشوفج النار مالتي شلونها ..

رشا :ضحكت بهمس... اخاف تشتعل ماتطفة ..

..................

كعدت الصبح ب٧ تقريبا .. طبيت سبحت وكعدت مهيمن هم ضل يبوس

كافي مهيمن ماضل وكت ..

مهيمن: شبيج بس شوية حبابة ..

رشا: اهوو يلة كوم اسبح ماضل وكت ..هم يلة نروح قبل الهوسة عيب والله ..

مهيمن: دتعالي اشبع منج واكوم عود ..

رشا :يمعود سابحة وكتلني البرد ..كوة دفيت ..

ولا كانو احجي سوة الي يريدة ..

.......

تقريبا ب٩ وصلت لاهلي ..

اشتغل الغمز والبسامير والنصب والضحك من البنات

بالكوة سكتتهن خاصة من شافن شعري مبلل وحايرة بشسوار

خلصنا تحضيرات واني لبست رسمي بنطلون قماش وسترة لون ماروني ومطعم بكرستال  لان مهيمن طلب مني هيج حتة اخذ راحتي ومااتضايق بلبس..

خلصت الزفة بخير وسلامة وزفيناهم للفندق .. ودعني مهيمن من وصلني لاهلي وكالي يومين ويرجع ..

طبعا حضرتلة غراضة الصبح حتة ميضل حاير رغم كلي انو هوة يحضرهن ..

راح ودرت مي وراه ودعيتلة يردلي بسلامة ..

طبيت للبيت وبلشنا تنظيف اني وسهام خلصنا ب٩ تقريبا .. رحت سبحت ونمت بغرفتي. .

ثاني يوم الصبح جابوهم وهم هوسة وخطاطير مافضت لليل .والي كتلني بنات خالاتها ادري مشايفات ..

مكابلاتها من الصبح لليل وين متروح يروحن وياها ..

ب٨ او هيج راحو كلهم ...هم نظفنا...

هلكت تعب ..وخطية سهام تركض للتنظيف وتركض لبناتها الي حاطتهن يم امي ..

كملنا رحت سبحت وسولفنا اني ومهيمن اشوية وكالي انو باجر بليل هوة يمي انشالله..

ثاني يوم نزلت لكيت سهام وامي ديحضرن الريوك ..جانت ب٩ تقريبا ..

التمو كلهم.. امي وابوية وسامر وسهام بس بناتها نايمات يكعدة ورة ال١٠ ..

اشوية ومنحس غير نازلة سجى بسيت نوم وردي وفوكاه روب ستن قصير .. بس شنو احس الكمة كوة طبت ..

دنك سامر وعاط...

سامر :استغفر الله يالكعبة ...اشتغلت رحمة الله ..

رشا :والي يقهر ماهتمت جتي علينة وصبحت حتة وجها مامغسلتة ..

سجى :صباح الخير .. وتتمعصر بجسمها مال نوم ..

سهام :تعالي سجى وياي ..

رشا: طبعا سهام كامت عليها بعد ما سامر شمر خبزتة بالماعون واستغفر ربة وطلع ..

................

يتبع ...

لا تنسون التصويت .. والدعم ..

وعلى كولة سامر اشتغلت رحمة الله .. صوتو حبابين

يعني المشاهدة تعبر ال١٥٠ والتصويت بس بالعشرينات حتة الكائنات مترضاها ...

احبكم ...

تحياتي Aseel.

♥️♥️♥️