تحميل رواية «قاتل متسلسل» PDF

كنت قاعد بقلب في الجرايد، اه زي ما سمعت كده الجرايد انا راجل قديم وبحب اقراها لحد دلوقتي، معلش بقى لواء متقاعد

وانا بقلب في الجرايد لمحت اسم عيلة المولى، وده رجعنا لذكريات 20 سنه ورا، رجعني لقضية تخص العيلة دي وكانت اغرب قضيه انا مسكتها وحققت فيها

في اليوم ده وصل بلاغ للشرطة عن جريمة قتل في حي المعادي، اتحركت قوه من القسم على مكان البلاغ ولما وصلنا كنا قدام بيت جميل وفخم وواضح ان الناس دي العيشه عندهم مرتاحة، دخلت البيت وكان في انتظاري واحد اسمه صالح واخته الانسه ياسمين، والاستاذ صالح هو اللي قدم البلاغ واتكلم وقال

_ اهلا وسهلا يا فندم، انا صالح اللي قدمت البلاغ في الحقيقة انا مذهول من اللي حصل انا صحيت زي كل يوم والمفروض انه مرات ابويا بتصحى بدري عشان بتصلي الفجر وتحضر فطار عشان هي عارفه ان انا وياسمين بننزل الشركة بدري، والنهارده لما ماصحيتش.. قلقت عليها وطلعت خبطت على اوضتها ولما ماردتش اضطريت اني ادخل، ووقتها لقيتها واقعه على الارض وفي حاجات كتير متكسره حواليها ولما قربت منها لقيتها قاطعه النفس

وعلى طول بلغت الشرطة

= طيب ما يمكن ماتت موته طبيعيه، ليه بتقول انها اتقتلت؟!

_ الفوضى اللي حواليها اللي حضرتك هتشوفها دلوقتي، هي اللي خلتني قولت كده

….

دخلت الاوضة الخاصة بالمجني عليها.. كانت ست في اوائل الخمسينات لابسه لبس النوم وواقعة على الارض وحواليها كذا حاجه متكسرة، اباجوره وكوباية ازاز

وداخل لاني قربت منها ونزلت بركبتي على الارض وبصيت عليها كويس، ووقتها اتأكدت فعلا من كلام الاستاذ صالح، في اثار خنق واضحة على رقبه المجني عليها

بعد نص ساعة وصل رجاله الطب الشرعي والمعمل الجنائي عشان يتم فحص الجثة ومسرح الجريمة، وعرفت ان الاستاذ صالح اللي اسمها الست نعمة.. البيت كان مكون من دورين واشبه بالفيلا الدور اللي تحت في الصالون والسفرة والدور اللي فوق في الغرف، وعرفت ان الاستاذ صالح انه عايش في البيت ده هو واخته ياسمين ومرات الاب نعمة واللي هي المجني عليها وعايشه معاهم الشغاله واسمها شهد، الاب لسه متوفي من ست شهور وكمان عندهم اخ اسمه كريم اتوفى من اسبوعين بسبب ازمه قلبيه حادة

الانسه ياسمين كانت منهاره ومش قادره تتكلم وكان باين عليها الخوف وان في حد غريب دخل البيت وقتل مرات ابوها، ما كانتش هتقدر تتكلم وعشان كده قربت ان الاستاذ صالح وسألته

_ بتتهم حد معين يا استاذ صالح؟

= لا يا فندم احنا ناس في حالنا، اه احنا عندنا شركه كبيره استيراد وتصدير واكيد في منافسين طبعاً بس ما توصلش لحد القتل ولو هتوصل مش هيقتلوا مرات ابويا اللي ما لهاش علاقة اصلا بالشركة

_ طيب الست نعمة، ما كانش عندها اي عدوات مع حد، ماكانتش عاملة مع حد اي مشاكل؟!

= في الحقيقه انا ما اعرفش، ما اعرفش حاجه عن علاقتها الشخصية خالص بس من يوم ما بابا توفى وهي مش بتخرج من البيت خالص

_ طيب وعلاقتكم انتم بمرات ابوكم عاملة ايه؟

= الحمد لله علاقتنا كانت كويسة أوي، هي ربنا ما رزقهاش بخلفة وكانت بتعتبرنا عيالها

_ معلش انا عارف ان الاسئله كتير، بس احنا عاوزين نوصل للي عمل كده في اسرع وقت، للاسف حضرتك والانسه ياسمين والشغاله شهد في دايره الاتهام

= ازاي يا فندم؟.. ده انا لسه بقول لحضرتك ان احنا زي عيالها، وبعدين ده انا اللي مبلغ عن الجريمة

_ استاذ صالح انا عاوزك تهدى، حضرتك فعلا اللي مبلغ عن الجريمة، بس في نفس الوقت انتوا بس اللي كنتوا في الفيلا وقت وقوع الجريمة.. وانت اول واحد اكتشفت الجريمة فلازم تكون مشتبه فيه وبعدين انت خايف من ايه طالما انت بريء خلاص

= انا مش خايف من حاجه يا فندم انا بس مستغرب

_ دي مجرد اجراءات لازم نحطها في الحسبان، بس اطمن هنوصل للي عملها في اقرب وقت

….

خلصت كلام مع الاستاذ صالح اللي بصراحه ما كنتش مرتاحله خالص وحاسس انه مخبي حاجه كبيره عني، طلعت على فوق تاني وقربت من الدكتور الطب الشرعي وسألته

_ ها يا دكتور، في جديد؟!

= اه يا باشا.. الست دي اتقتلت بحبل عريض وده باين من الاثار اللي على رقبتها الحبل ده كسر عضم الرقبة وده اللي تسبب في الوفاة.. كانت بتقاوم الجاني اثناء قتلها وده باين من الخدوش اللي على ايديها وضفر ايدها اليمين المكسور

ولكن النقطه الاهم هو الاتجاه اللي وقعت في الجثة، لو افترضنا ان الست دي كانت بتشرب مية فكده وشها كان للحيطه والباب وراها وفجاه ظهر القاتل وخنقها حاولت تدافع عن نفسها فوقعت من ايدها الكوبايه واتكسرت وحاولت في انفاسها الأخيرة تمسك اي حاجة تدافع بيها عن نفسها.. فمسكت الاباجوره ولكن في اللحظه دي عضم رقبتها اتكسر فوقعت منها واتكسرت

وبكده وقعت ووراها الباب، وده معناه ان القاتل دخل عليها من باب الاوضة وده بيرجح احتماليه ان القاتل من جوه البيت

…

تحليل الدكتور كان منطقي جداً، وكمان كلام المعمل الجنائي اللي اكد ان ما فيش كسر في اي كالون، يعني الجاني دخل من غير ما يكسر كالون يعني معاه مفتاح

خلصت الرجالة شغلها واتنقلت الجثه للمشرحة واترفعت البصمات، ورجعت على مكتبي وقتها قابلت الرائد عزت وعرفت ان هو اللي هيمسك معايا القضية واول ما شاف نتكلم وقال

_ والله ليك وحشه يا سالم، بقالنا كتير مشوفناش بعض

= اهو اطمن يا سيدي، هتشوفني كل يوم.. المهم دلوقتي انا عاوز تحريات عن الست اللي اسمها نعمه دي اللي اتقتلت النهارده في حي المعادي.. بس توصي فريق البحث الجنائي انا عايز تحريات مفصلة عنها كل كبيرة وصغيرة.. اكيد فاهمني مش كده؟

_ ايوه طبعا يا باشا فاهمك.

…

بعد 24 ساعة وصلت التحريات.. واتكلم عزت وقال

_ التحريات مليانه تفاصيل واظن انها بتوضح شويه مين اللي عمل كده.. شوف يا باشا التحريات اللي قدامك بتقول ان الست نعمه اتجوزت الاستاذ ساهر من 10 سنين ووقتها كانت لسه مراته متوفيه من سنة، والسبب الرئيسي ورا جوازه انها تاخد بالها من عياله والست كانت بتعامل عياله كويس جداً.. الاب اللي هو ساهر معاه شركه استيراد وتصدير وكان اللي دايما مسانده في الشغل هو كريم وكبر مع الشركة لحد ما وقف على رجله

والتحريات بتقول ان بعد موت الاب اكتشفوا انه كاتب كل حاجة لكريم ودي عملت خلاف كبير ما بين كريم واخواته ومرات ابوه وكل واحد فيهم كان عاوز حقه بالشرع والقانون ولكن كريم كان رافض يديهم اي حاجه وكان بيقول ان الفلوس دي تعبه وشقاه السنين اللي فاتت

وبعدها بحاجه بسيطة تيجي ازمه قلبية لكريم وره وبينقلوا على المستشفى بسرعه ولكن

للاسف بيموت، ولكن بعد موت كريم كل حاجه بقت بتاعه اخواته وليهم نصيب فيها

لحد كده تمام نيجي بقى لجزئية الشغاله شهد اللي اتحبست قبل كده على ذمه قضيه سرقة واللي كان ملبسها القضية هي الست نعمة نفسها وبسبب دخولها السجن والمشاكل اللي اتعرضتلها جوه، شهد سقطت العيل اللي كانت حامل فيه

ودي نقطه مهمه وجايز هي اللي قتلت الست نعمة وده دافع قوي ان هتعمل كده وتنتقم منها، وفي نفس الوقت انا مش مصدق ان كريم ده مات موته طبيعيه اصلها مش صدفة، ممكن يكونوا اخواته والست نعمه هما اللي قتلوه عشان الميراث

…

كنا لسه بنتكلم انا وعزت وبنتناقش في الموضوع، عشان يجي بلاغ جديد عن جريمه قتل في نفس المكان اتحركنا بسرعه انا وعزت ومعانا قوه من القسم ولما وصلت هناك ودخلت البيت لقيت جثه متعلقه في السقف وكانت الصدمه عشان دي تبقى جثة

جثه ياسمين اخت الاستاذ صالح، واللي كان قاعد منهار من العياط قربت منه وسألته

_ هو ايه اللي حصل يا استاذ صالح؟

= معرفش، احنا كنا في الشركه مع بعض وفجأة هي تعبت شوية وقالت انها هترجع على البيت وانا طلبت منها انها تروح ترتاح، ولما رجعت البيت لقيتها بالمنظر ده

_ طيب وشهد الشغالة فين دلوقتي؟

= هي واخده اجازه من ساعه موت الست نعمة.. بس حضرتك بتسأل ليه؟!

_ لا مفيش كنت عايز اعرف بس مين اللي كان موجود في البيت وقت الجريمة، كنت فاكر انها موجوده وقولت يمكن تكون شافت حد غريب دخل هنا

= انا مش عارف مين اللي بيعمل فينا كده، مستحيل يكون اللي بيعمل كده هما المنافسين، اكيد ما توصلش لكده معاهم

_ استاذ صالح، مفيش حد مش داخل دايرة الشك بس انا عايزك تطمن اكيد هنوصل للي عمل كده

…

قربت من الجثه وبصيت عليها ولاحظت انه في كدمه في وشها واضح انها شافت القاتل وحاولت تقاوم ولكنه ضربها قبل ما يخلص عليها.. وفي الوقت ده وصل رجالة الطب الشرعي والمعمل الجنائي عشان يشوفوا شغلهم.. نزلوا الجثه على الارض وبدأ الفحص

وفي الوقت ده نادي عليا دكتور الطب الشرعي وطلب مني اقرب عشان عاوز يوريني حاجة.. قربت وبصيت وقتها كان بيشاور على الرقبة واتكلم وقال

_ نفس طريقه القتل، نفس العنف المستخدم في الجريمه الاولى مستخدم في الجريمه التانية وده معناه ان القاتل واحد في الجريمتين، كمان في اثار ضرب على وجه المجني عليها وفي اثار لجروح في الجسم، وده معناه انه كان في مقاومه قويه من المجني عليها مع القاتل

وعلى فكرة رجاله المعمل الجنائي بياكدوا على نفس الفكره برضو، اللي دخل دخل من الباب وده معناه انه انسان محترف وعارف هو بيعمل ايه كويس او واحد من اهل البيت

الاستاذ صالح كان سامع كلام الدكتور وفي الوقت ده قرب واتكلم وقال

_ حضرتك تقصد ان انا اللي عملت كده، ما اهو مفيش حد غيري باقي من اهل البيت

رديت عليه انا قبل ما الدكتور يتكلم وقولتله

_ استاذ صالح حاول تكون هادي، محدش وجهلك اتهام لحد دلوقتي، بس ده مش معناه ان حضرتك مش في دايره الاتهام، واكيد لو في دليل عليك كنا مش هنستنى وهنقبض عليك ممكن حضرتك بقى تهدى وتقعد لحد ما الرجاله تخلص شغلها

…

قعد الاستاذ صالح بعد ما خلصت كلامي وشكرت الدكتور وقولتله اني مستني تقرير الطب الشرعي سواء في الجريمه دي او الجريمه اللي فاتت ووعدني انه هيسلمهمني في اقرب وقت وبعد ما الرجاله خلصت شغلها كالعاده اتنقلت الجثه للمشرحة واترفعت البصمات وطلبت من الاستاذ صالح يشوف مكان يقعد فيه لاننا لسه مخلصناش خالص والبيت هيتشمع بالشمع الاحمر لحد ما نخلص تحقيق في الجريمتين

ورجعت على مكتبي من تاني.. بس اول ما رجعت لقيت في واحده مستنياني في المكتب والعسكري بلغني انها تعبانه شويه وكانت مش قادره توقف على رجلها وعموما دي كانت تعليماتي لاي حد يجي وانا مش موجود.. دخلت المكتب ولقيت الست قاعده على الكرسي في اواخر الاربعينات وشكلها محترم وبنت ناس.. سلمت عليها وقعدت قدامها عشان اسمع الموضوع.. فاتكلمت وقالت

_ انا مدام ولاء مرات الدكتور عابد ابو الحسن معرفش حضرتك تسمع عنه ولا لا؟

= اه طبعاً اسمع عنه، دكتور كبير ومعروف

_ طيب كويس ان حضرتك تعرفه، انا جوزي مختفي من فترة كبيرة في الاول كنت فاكراه انه مسافر لانه بعتلي رسالة بعد اخر كشف عمله وقال انه جاتله سفريه مستعجلة وانه هيطول في السفريه دي شويه وهيكون مشغول وطلب مني مقلقش عليه

ودي مش اول مرة يعملها، بس لما السفرية طولت وهو ما بقاش يكلمني خالص، ولما حاولت اتصل بيه كان بيديني ان تليفونه مقفول اضطريت اني اروح السفاره بتاعه الدوله اللي سافر ليها وبلغتهم بكل حاجة.. وقالوا انهم هيعملوا استعلام وهيردوا عليا وفعلا ردوا عليا النهارده وقالوا ان جوزي ما سافرش اصلا

وده اللي خلاني اجي عشان ابلغ النهاردة.. انا جوزي داخل في ست شهور غياب معرفش عنه اي حاجة

واخر حاجه اعرفها عنه انه كان راح يكشف على واحد اسمه ساهر في المعادي وبعدها اختفى

= حضرتك قولتي ساهر؟.. الراجل ده معاه شركه إستيراد وتصدير مش كده؟

_ انا معرفش كل اللي اعرفه عنه انه رجل اعمال

= طيب يا مدام ولاء، انا عاوز كل المعلومات عن جوزك اسمه الثلاثي والعنوان ورقم التليفون ولو معاه عياده خاصه يبقى عنوان العياده كمان ومتقلقيش ان شاء الله في اقرب وقت هنوصل لجوزك وباذن الله يكون بخير

….

مشيت مدام ولاء بعد ما فتحت خيط جديد في القضية، الدكتور اللي كشف على ساهر والد صالح اختفى بعد الكشف عليه وبعت رساله لمراته بيبلغها بسفرية مفاجأة وانه هيتاخر هناك وبعدها تكتشف مراته ان هو مسافرش اصلا

كل حاجه بتحصل في القضيه دي مش صدفه، ايه اللي ممكن يكون عرفه الدكتور وبسببه اختفى.

….

ولما النيابه عرفت البلاغ اللي متقدم من مدام ولاء.. قررت تستدعي الاستاذ صالح والشغاله شهد

وحضر الاستاذ صالح قدام النيابة.. وبدأ التحقيق معاه

_ استاذ صالح، حضرتك بتتهم مين في قتل زوجه والدك المجني عليها نعمه عاشور وقتل اختك ياسمين ساهر؟

= مش بتتهم حد، معنديش مع حد عداوه توصله انه يعمل كده

_ طيب على حسب التحريات كان في خلاف بينك وبين اخوك المرحوم كريم ساهر والخلاف ده كان بسبب الميراث وده طبعا بعد وفاه والدك مش شايف انها صدفه غريبه شويه ان اخوك يتوفى بازمه قلبيه رغم انه كان شخص رياضي ومهتم بنفسه

= والله يا باشا دي اعمار، والخلاف اللي حصل بيني وبين اخويا بيحصل بين اي اتنين بس في الاخر انا اقتنعت ان ده تعب وشقاه فعلاً لان هو اللي كبر الشركه مع والدي

_ طيب هل حضرتك على علم ان في بلاغ متقدم من واحده اسمها مدام ولاء ودي تبقى زوجه الدكتور عابد الدكتور اللي كشف على والدك وقال انه مات موته طبيعية.. الست بتقول في البلاغ انه بعد ما كشف على والدك وصلت رساله على تليفونها ان الدكتور مسافر ولما طالت الغيبة طالع من الدكتور مسافرش ولا حاجه وانه اختفى بعد الكشف على والدك.. هل دي كمان صدفة؟

= حضرتك بتلمح لايه انا مش فاهم؟

_ لا يا استاذ صالح انا مش بلمح، انا عندي صدف ما بتحصلش غير مرة في المليون، وعشان كده صدر قرار باستخراج جثه والدك وعرضها على الطبيب الشرعي عشان نعرف اذا كان ميت موته طبيعية ولا اتقتل

…

وفعلا في الوقت ده كان معانا اذن من النيابه باستخراج جثه الاستاذ ساهر اتحركنا وكان معانا عربيه اسعاف عشان تتنقل فيها الجثه للمشرحة ولكن لما وصلنا كانت

في انتظارنا مفاجأه كبيرة.. كان في قبر جنب قبر الاستاذ ساهر ومكتوب عليه كريم ساهر الازمه مش هنا.. الازمه ان القبر ده كان مفتوح ولما دخلنا القبر كانت الصدمة..