للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
كأنما السعدُ مرهونٌ بضحكتها
تُشِعُ في الروحِ أنوارٌ إذا ابتسمتْ
: الحياة رحله قصيره جداً تبدي وتنتهي واحنه منحس بيها نبقى نزعل اللي نحبه بدون معرفة باي لحظة ممكن نخسره ،هوايه أشخاص ودعناهم بدون مقدمات فجأة ختفوا من حياتنه وماكو رجعه، جنت دائما اخاف من شعور الخساره وهذا الخوف صار واقع ،يكولون اللي تفكر بيه مع الوقت يصير واقع تعيشه خسرت والدي وهاي الغصه تبقى بكلبي طول العمر بالأضافة لخسارة خالتي الغير متوقعه عرفتها كم يوم وخسرتها واني مشبعانه من عدها،
وكبرت وصارت الحياة مزعجه بتفاصيلها، خطف، مخدرات ،عملية عسكرية غريبة، وشخص غامض ،وماضي اسود اله وإليه، مجنت اعرف نهايتي وياه قصة حب مليانه هموم وحزن عشناها من مشكله لمشكله أشهر قليله عدت سنوات المفروض تكون السنه الأولى هي اسعد سنه باي زواج لكن يكون العكس تماما من تكونين زوجة عسكري، هيبه وشموخ ورتبه، سمعه وفلوس مثل ميفكر البعض، لكن الواقع مختلف تماماً، كل الرغد اللي يتخيله الناس عن حياة اليشتغلون بالسلك ميجي ذره وحده من الخوف والقلق أللي تعيشه زوجته وعائلته والأهم امه، نكون على استعداد تام وي كل مره يطلع بيها عملية احتمال وارد جداً يرجع للبيت ملفوف بعلم، الموت محاوطه من كل الاتجاهات وين ميدير وجهه اكو أعداء خاصتا اذا كان عملهم سري او خطر وتعال جيب اللي يطمنك حتى لو بكلمه ويكلك لتقلق ماكو شي اذا حتى اتصال ميرد عليه، ومن تفقد شخص عليك فلوس الدنيا متعوضه، حبه، احترامه، اهتمامه،
ليالينا وايامنا اللي قضيناها سوا، ضحكتنا وشقانا وهمومنا اللي شاركناها، والأمان اللي احس بيه من يكون موجود، شكله، هيبته، طوله، عيونه، كل شي بيه، هذا كله يصير مجرد ذكرى مراح اعيشها مره ثانيه ولا الزمن يرجعه شكد مندبت، خليت أيدي على بطني ونزلت دموعي معقوله رب العرش فرحني بيك يخسرني هَيْصَم؟ يعني اني مكتوبلي ما اعيش سعادتين مع بعض؟ ثواني صارت دقايق و الدقايق ساعات وماكو اي خبر عنه اخير شي عرفنا هو موجود أبيت بيه لغم واكيد المعلومه مينطيها غير لائِث،
دعاء ويدين رفعت لرب السماء
عسى الغائب يجمعنا به لقاء
على أرض ورزق من واسع العطاء
قلب اخفق بالدعاء
وعين تذرف دموع بكماء
غير ناطقه وصماء
وحروف أبت الخروج من أفواه خرساء
قلوب محرقه والقدر يريد القضاء
فهل سيعود غائبي؟
ام حٌكم الأمر لرب العظماء؟
الخاطره بقلمي ( زهراء احمد )
لائِث: هَيْصَم لتدخل البيت يمكن فخ ويصير شي موزين محاسبين حسابه.
هَيْصَم: مراح اضيع هيج فرصه يمكن بعد هذا اليوم مراح أكدر القي عليه القبض تعبت كل هاي السنوات على شنو اذا مجازفت؟
لائِث: على الاقل انتظر الفريق اللي يفحص المكان ويتأكد من سلامته، المنطقة مهجورة والبيوت معدومه، من منو اطلب المساعدة اذا صار بيك شي، هَيْصَم عندك زوجه وام وخواتك كلهم بركبتك اذا متت منو الهننن؟
هَيْصَم: مراح يصير شي غير اللي كاتبه رب العالمين، لتخاف راح ادخل ولتخلي احد يجي ويايه.
لائِث: رجلي على رجلك للموت والله مستحيل تفوت وحدك لهيج مكان خطر.
هَيْصَم: لتصير مثل الأطفال هاي مو اول مره ادخل بيها مكان خطر خلصنا حياتنا واحنه بين الموت شنو بيك اليوم؟!
لائِث: كلبي يلعب وانت تعرف عدل احساسي ميخيبني هَيْصَم بداعة خوتنا لتسوي شي عندك عائلة بركبتك لتضيعها علمود الاستعجال.
هَيْصَم: مراح اخليه يضيع ليش متفهم؟
لائِث: واني اللي معتمد عليك تالي متفكر بعقل!!
بشرفك وين اكو واحد يسكن اطراف بغداد بمكان خالي من الناس والله لان مجرم؟
انت تعرف المجرم بالعراق مقدس، بيته وسيارته افخم شي واصلا عنده حمايه، ليش تريد تخاطر وانت تعرف انو هاي مصيدة حتى يوكعوك؟
هَيْصَم: واني هيج أريد.
لائِث: شلون يعني؟!
هَيْصَم: مو كل شي قابل للشرح اكو اشياء لازم نعيشها لائِث.
لائِث: حيرتني تره شنو الموضوع فهمني حتى اعرف اتصرف.
هَيْصَم: ميحتاج اصبر شويه وانت تعرف شنو راح يصير.
: بقينا واكفين شويه وصل فريق المسح علمود الألغام دخلوا للبيت وتأكدنا صدك اكو لغم، الخطه جانت يدخل الهَيْصَم للبيت بحجه انو بيه الأسود اول ميدخل يدوس على اللغم وينفجر بيه وبهاي الحاله نخسر ضابط كفوء بسبب الأعمال الإرهابية اللي دمرت البلد وحطمت أمنه،
نظرلي وابتسم وابتسمت على ابتسامته.
هَيْصَم: لّهيم والأسود اغبى أشخاص تعرفت عليهم بكل حياتي.
لائِث: وهسه شنو تسوي؟
هَيْصَم: لّهيم الغبي انطاني معلومات عن المكان اللي راح يسلم بيه الأسود بضاعته ومفكر اني واحد حمار ومراح اتأكد من صحه كلامه جان عندي علم مسبق انو البيت بيه لغم وممكن ينفجر باي لحظه المعلومات اللي وصلتني دقيقه لكن لازم نسير وي التيار حتى يصدكون مدا ذكاء غبائهم وبهاي الحاله اني المنتصر الوحيد، اتصل بالوالدة انطيها علم اني داخل البيت وممكن ينفجر بيه باي لحظه خلي تدعيلي.
لائِث: انت على يوم تجلطها بسبب سوالفك.
هَيْصَم: موبايلك مراقب لازم نخليهم يصدكون اني داخل البيت وخطتهم ناجحة والا كل شغلنا ومخططنا كل هاي السنين بححح، لتخبلني اتصل وخلي نروح للمكان اللي راح يجتمع بيه الأسود وجماعته علمود البضاعة خلي نكتشف هاي المره على شنو مخططين غير تجارة الأعضاء وبيع المخدرات.
لائِث: راح اموت من وراك على يوم صدكني.
هَيْصَم: اذا بقيت عايش لذلك اليوم وقتها موت بسببي.
: اتصلت بيها اسمع صوتها شلون يرجف واغم نفسي لان اسمع كلامه هسه اذا صارت بيها جلطه وماتت بسببي شنو اكول، صعدنا بالسياره والفريق بقوا يفككون بالغم، انطلقنا للبيت الأساسي اللي راح يصير بالاجتماع صاير بمنطقه شعبية وبيوت فقيره وصلنه للمكان المطلوب توقفنا.
هَيْصَم: انزل.
لائِث: ليش؟!
هَيْصَم: شايف الرجال اللي لابس قميص كريمي وبنطلون اسود؟
لائِث: تريد تخطبه؟
هَيْصَم: عجبني والله شنو رأيك ازوجه ريهاف امبين كلش راقي باختيار الملابس.
لائِث: هَيْصَم هي وقت ضحك بشرفك!!
هَيْصَم: شكو بيها بس انت تحشش يعني؟!
لائِث: شنو المطلوب من عندي كول.
هَيْصَم: وليش تحجي بهاي الطريقه؟!
لائِث: لان خايف عليك وانت محاسب احساب للي تسويه هسه.
هَيْصَم: من كل عقلك؟!
لائِث: اي لان ما اشوف ولا واحد من العناصر مطلعني بس اني وياك.
هَيْصَم: لأنك كل جنودي اني بيك استقوي اعرف انت تعادل المركز بأكمله.
لائِث: ممتفقين هيج خجلتني دادا.
هَيْصَم: مشكلتك تصدك بسرعة.
لائِث: اشرح وضحلي خطتك خليني افهم عزيزي.
هَيْصَم: اكو عناصر من ضمن الاجتماع راح يكونون حاضرين بالاضافه عاين للمكان زين كلهم جماعتنا هاي السيارات اللي واكفه والناس اللي تمشي بهدوء وذلك الرجال اللي كاعد على الدجه مال الباب اللي مخلي جكاره بحلكه تعرفه منو؟
لائِث: شكله مألوف بس لحظه، ملعون هذا ضَرْضَم.
هَيْصَم: فريقي اكيد يكون موجود ويايه بهيج مهمه لازم كلكم تترقون على هذا العمل والتفاني لخدمة البلد.
لائِث: ولشوكت راح نبقى منتظرين؟
هَيْصَم: حتى يخلص الاجتماع يتم تسجيلهم صوت وصورة حتى نكدر نلقي عليهم القبض بالجرم المشهود وتتحقق العدالة.
لائِث: وهذا اجتماعهم شوكت يخلص؟
هَيْصَم: ليش شنو عندك؟
لائِث: متحمس نلقي القبض عليهم وداعتك.
هَيْصَم: سنين مرت واني انتظر هذا اليوم متعرف شنو احساسي.
لائِث: راح نغلق أبواب الماضي من صدك ونكدر نكمل حياتنا بدون هم.
هَيْصَم: راح أكدر اقرأ الفاتحه على قبورهم واني ماخذ الثأر، هذا انتصاري الوحيد.
لائِث: اني وياك عشنا هوايه تفاصيل صغيرة، معاناتنا وألمنا تشاركنا كل شي من الطفوله الشكر لله خلانا ناخذ الانتقام على كل جرح تسببوا بيه النا.
هَيْصَم: الحمد الله جان والدي رجال أدمي دمه اكيد ميروح هدر هو اكثر شخص تعذب بالخطف وسرقة الاعضاء خاصتا هو رجال جبير الله يرحمهم، خلينا نغلق الماضي ونبقى على تواصل وياهم حتى نعرف شوكت يخلص الاجتماع ونعتقلهم.
: بقينا منتظرين ساعتين من التعب نعست ونمت بدون ما احس.
هَيْصَم: لائِث، لائِث، لك لائِثثثث.
لائِث: وسممم شبيك؟
: جحظ عيونه من شفته هيج ضحكت بصوت عالي من انام انسى نفسي بدون ما احس.
هَيْصَم: الاحترام يفيض من عندك.
لائِث: نايم لذلك لتحجي تعرف أخلاقي شلون تصير اذا غفيت.
هَيْصَم: عاملها بهذا الأسلوب وشوف إذا ما طيحت حظك.
لائِث: شبيك شنو مسوي؟!
هَيْصَم: هي مو مثلي متعودة عليك لازم تخلي منبه يم راسك قبل نص ساعه من تريد تكعد حتى من تجي تكعدك متكلها وسم لان اصير اني السم اللي يطيح حظك، خواتي معودهن على الدلال اذا انت مو كدها لتتورط.
لائِث: اعودها على الدلال وداعتك انت بس كلي ليش كعدتني حلمت حلم يخبل وحرمتني اشوف النهاية.
هَيْصَم: بالليل نام ويكمل الحلم.
ضَرْضَم: سيدي خلص الاجتماع انداهم المكان؟
هَيْصَم: داهم بعد خمس دقايق.
ضَرْضَم: أمرك سيدي.
لائِث: ليش؟
هَيْصَم: بعدهم ممكملين كل شي خلي ينتهي الحديث من تجي اشاره من عدهم انباشر بالعملية.
لائِث: تعبت شوكت تخلص وارجع للبيت انام.
هَيْصَم: خلصت مبقى شي هاي النهاية الهم.
لائِث: والبداية النا.
: صارت المداهمه وتم إلقاء القبض على كل الموجودين خمس أشخاص من ضمنهم الأسود ضحكنا بانتصار ورحنه للمركز علمود التحقيق.
هَيْصَم: حي الله الأسود.
الاسود: واخيرا التقيت بيك وجه لوجه، اشبع من عندي شوف لان بعد فتره قليله راح اطلع من السجن وتقدم اعتذار خاص اليه لان اعتقلتني.
هَيْصَم: صاير هوايه تحلم احلام يقظه هذا الشي مضر بالصحة إذا متعرف.
الاسود: اني وانت نعرف شكد تتمنى موتي لهذا السبب لتحاول تضحك عليه بهاي الأمور.
هَيْصَم: اعترف على جرائمك افضل، اهنا ممكن يخففون العقوبة.
الاسود: جرائمي تاخذني إعدام وين التخفيف اللي تقصده؟!
هَيْصَم: ممكن تعيش يوم زياده الله أعلم.
الاسود: ما أريد اعيش ولايوم داخل السجن لذلك مراح احجي اي شي.
هَيْصَم: ليش قتلت والدي؟
الاسود: والدك مو اني اللي قتلته.
هَيْصَم: لتحاول تستخدم حيلك وياي احنه نعرف انت السبب بقتله وسرقة اعضاءة ليش تكذب؟
الاسود: اني صادق وياك صحيح اني اللي دزيت ناس تخطفه بس مو اني اللي قتلته مجان اليه علاقه بالموضوع.
هَيْصَم: جنت جندي خائن وهربت لغير بلد لو النظام السابق موجود جان نعدمت بأكثر طريقه بشعه وعلى رغم والدي تجمعك بيه علاقه زماله قويه الا انك خنت بيه وخطفته بس حتى اترك القضيه برأيك انت تستحق المسامحة؟
الاسود: كلامك صح عندي علاقه صداقه مو زماله وي ابوك المرحوم ولهذا السبب اني مقتلته كل اللي صار بذلك الوقت جنت بدايه عملي وي المجرمين وتجارة المخدرات عرفت من عدهم معلومات يردون يضغطون عليك حتى تتنازل عن القضيه لان عندك ادله حقيقية توديهم وره الشمس وجانت الورقه الرابحه بأيدهم هي والدك اني مكدرت اتحمل صديقي يصير بيه شي لهذا السبب بالتحديد اني خطفته حتى ابعده عنهم وماعرف شلون عرفوا بمكانه بعدين وخطفوه من عندي وقتلوا واخذوا أعضاءه مجان اللي علاقه بلي صار.
هَيْصَم: ومنو الشخص اللي سوا هيج؟
وشنو الدليل اللي عندك يثبت صحة كلامك.
الاسود: كلامي هو دليل.
هَيْصَم: ههههههههههههه.
الاسود: ليش تضحك محجيت نكته اني.
هَيْصَم: من الغباء تفكر الناس أغبياء مثلك، شوف وافتهم كل الادله اللي تثبت ادانتك وبالجرم المشهود موجودة عندي واللي انطاني اياهم ابن اختك لّهيم اللي فكرت تكدر تستغله وتخليه لصالحك وضحكت عليه بكم كلمه حتى يتعاون وياك ويصير يتبعك بدون تفكير اعترف على كل شي لان غدرت بيه وانطيتنا معلومات على خطته وشلون يخطف زوجتي ويستغل خطوبه لائِث من اختي، مجرم وكع مجرم هيج هي الدنيا اصدقاء السوء يجيبون نهايتك لامحاله.
الاسود: حتى لو عندك كل الادله متكدر تسجني يمك فتره طويله راح اطلع براءة وغصب عنك وراح تشوف.
هَيْصَم: ارتكبت جريمة قتل بحق والدي وزوجتي وابني، حرمتني من عدهم وراح احرمك من عائلتك، الموت هو الانتقام العادل لأرواح كل الناس اللي قتلتها ولهذا السبب أريدك إعدام.
الاسود: غلطان اذا فكرت اهنا تنتهي القصه بأنتصار الهَيْصَم وخسارة الاسود لان متعرف منو الأشخاص الأكبر المتعاونين وياي وبكل جرائمي السويتها واذا ينعدم الاسود فاكو ميت واحد غيره ياخذون بثاري من عندك، هاي مو النهاية سيادة النقيب هَيْصَم.
هَيْصَم: النهايه لانتقامي وإغلاق ملفك وسعي وراك كل هاي السنين كعدك ربي على كرسي التحقيق وباجر راح توكف بالمحكمة وانت متهم واللي بعدها يلف الحبل على ركبتك وناخذ الثأر لكل الأرواح الماتت بسببك، لكل امرأة ترملت وطفل تيتم حتى ينتشر السم الأبيض بالعراق ويقضي على شبابنا وابناءنا، كم شخص خسر مستقبله وعقله وحياته بسببكم وحتى تاخذون فلوس، وكم ام نزلت دمعتها ومكدرت تنام علمود ابنها؟
تبيعون عليهم المخدرات واللي ماعنده فلوس تاخذون اعضاءة كسداد دين وتبيعون أعضاء مريضه على ناس فقراء بمبالغ ضخمه، بسببكم ادمر البلد واحنه موجودين حتى ندمركم ان طال الزمان وان قصر العداله لازم تاخذ مجراها واذا تكول لا شوف الطغاة شكد عاشوا وستعمروا بالدنيا وشلون جانت نهايتهم وبيا طريقة ماتوا، طريق الظلم وان طال لابد تجي نهايته وهاي هي نهايتكم.
الاسود: كلامك مؤثر بس الأشخاص اللي مثلي ميتأثرون بيه، الاجرام مشى بدمنا لدرجة الدين هو مجرد غطاء حتى انمارس أعمالنا الغير قانونية وخليني ازيدك من الشعر بيت لّهيم واني مجرد أشخاص عملاء لأعلى من عدنا والا برأيك ثنين بس يكدرون يخططون وحدهم؟
هَيْصَم: واحد وره واحد الكل راح يسلم للعداله قضيتك فقط اللي راح تنغلق اما قضيتهم راح تنفتح وبعملية عسكريه ثانيه راح اكون اني المنتصر اكيد بيها مثل متعرف الهَيْصَم ميتقبل الهزيمه.
الاسود: حتى لو نتصرت اهلك مراح يرجعون للحياة للأسف لو تعرف والدك شلون جان يترجاني حتى ما اعذبه بس اني جنت استمتع بتعذيبه الى اكبر درجه.
هَيْصَم: هههههههههههههه، ضحكتني هوايه اليوم، خليها ابالك اللي يربي أسد ميذل نفسه حتى يشم الهوه، علمني على عزة النفس مستحيل يطخ راس لواحد مثلك، الهيبه والوقار مبين بوجهه حتى وهو مستشهد لذلك متكدر تحجي شي يعكس حقيقته وشلون جان عايش، طول عمره راسه مرفوع مراح ينزله على آخر لحظة، اللي خلص عمره يطلب رضا الله ومغفرته مراح يطلب رضاك.
اهنا ينتهي الحديث راح يجي لائِث ياخذ أقوالك وتنحال محكمة لان كل الادله ضدك محاكمتك مراح أطول هوايه وحتى لو يجي محامي ميكدر يطلعك من عدها هاي المره حظر نفسك، الموت هو نهاية طريقك الحتمي.
الاسود: كلنا نموت وين المشكله؟!
هَيْصَم: اكو فرق بين الموت بشرف والموت بالذله وانت راح تموت ذليل.
الاسود: للأسف مراح اشوف نهايتك.
هَيْصَم: من نلتقي اهناك راح اكلك باي طريقه صارت نهايتي وعلى حد علمي مراح نلتقي لان انت حتكون بجهنم.
: واحد واحد راح يتم اعتقالهم وتسليمهم للعداله أخذنا أقوال الاسود وعرفنا شلون جان يخطط هو ولّهيم وكم عمليه قاموا بيها سوا تم تحديد موعد المحكمه بعد سبوعين وقضيتهم شبه نغلقت من جهة المركز وصار وقت نتنفس الصعداء ونحتفل بهذا الانتصار العظيم.
فيروز: خلص اليوم وماكو اي خبر بقيت اني وخالتي وحده تواسي بالثانيه هي خايفة واني مو اقل من عدها، الساعة عشرة بالليل نفتح الباب ودخل وهو مبتسم كامت خالتي بسرعة حضنته واني نزلت دموعي لان هاي المره من صدك حسيت مراح يرجع.
هَيْصَم: باركيلي اللي دمر حياتنا القينا عليه القبض ونحال محكمة وراح يتم تنفيذ الحكم بيه ان شاء الله.
كلاثم: جنت اعرف دم ابوك مراح يروح هدر والحمدلله مخاب ظني برب العالمين حاشه اله يترك عبده.
هَيْصَم: سامحيني لان اللي صار اليوم جان مخطط حتى أتم العملية بنجاح ونكدر نلقي عليهم القبض.
كلاثم: شلون يعني مجنت أبيت بيه لغم؟
هَيْصَم: لا.
ابتعدت عنه وحجت بعصبيه.
كلاثم: وسفه عليك هيج تسوي بينا تعرف انو اجيت انجلط واني اتخيل باي لحظه يتصلون بيه ويكولون البقاء بحياتج ابنج استشهد؟
نستاهل من عندك كل هذااا جاوبني؟!
هَيْصَم: يوم اهدي شوي، راح يرتفع ضغطج لتسوين بنفسج هيج ياعيني.
كلاثم: يضربني ألم على اساس انت كلش مهتم، لو ذرة اهتمام عندك مسويت هيج ويانه هاي مرتك اجت تموت من الخوف ولحد الان ماكلت شي وكلما حاجيتها كالت راح يموت مثلهم ويعيفني هسه اني متعودة عليك بس هي شنو ذنبها تسوي وياها هيج؟
هَيْصَم: لو مسويت هيج مكدرت القي عليه القبض ليش متفهمين اهميه الموضوع بالنسبه إليه مجنتي تردين نلزمه؟!
مو يوميه تبجين للصبح ونفس الدعاء على السانج يارب تاخذ حقي من كل شخص دمر بيتي وعائلتي وحرمني من ضحكتنا وفرحتنا هسه من ألقيت عليه القبض صرت مو أدمي واني الغلطان؟!
كلاثم: لا عاشت ايدك حبيبي عاشت ايدك.
: تركته ودخلت للغرفه كعد على القنفه وخله راسه بين أديه من شفته هيج عز عليه اعيفه وحده صحيح اللي سوا غلط بس المهم رجع سالم وهذا هو المطلوب، وصلت وياه لدرجه من الحب أخطائه مو مهمه بنظري المهم هو عايش وبخير اذا اني صرت ضده مثل ميسوي الكل منو اللي يطبطب على كتفه ويكله اني وياك؟
تقربت من عنده وخليت أيدي على كتفه رفع راسه وباوعلي بعيون حمر ابتسمت بوجهه وحجيت.
فيروز: من خوفها عليك حجت هيج بس انت تعرف شكد هي تحبك اكيد مراح تبقى زعلانة.
هَيْصَم: وانتِ؟
فيروز: شنو بيه اني؟
هَيْصَم: مضجتي هم لأن هيج سويت؟
فيروز: متفهمه اللي تمر بيه واعرف شكد تعذبت حتى توصل للي تريده مستحيل ازعل من عندك لان رجعتلي عايش ومبيك شي، المهم كدرت تلقي عليه القبض وخلصنه من واحد مجرم.
هَيْصَم: انتِ انتصاري بعد كل الهزائم اللي عشتها محظوظ بيج لَّباءَة الهَيْصَم.
فيروز: لتسويها مرة ثانية مراح اتحمل خبر خسارتك هَيْصَم.
هَيْصَم: ان شاءالله ميصير شي لتخافين، متعشيه؟
فيروز: لا.
هَيْصَم: تعالي نعيد أمجاد الماضي ونسوي عشا مع بعض روحي حضري اللي راح نسويه واني راح احجي وي الوالده لازم نراضيها.
فيروز: تمام.
كام من مكانه قبلني بجبيني وراح للباب طرقها ودخل واني دخلت للمطبخ اجهز عشا.
هَيْصَم: ميهون عليه تبقين زعلانه كولي شنو اسوي وتسامحيني اني مستعد اسويه.
كلاثم: مرايده شي من عندك خليني انام تعبانه.
هَيْصَم: متنامين وانتِ زعلانه عليه ما أقبل، انتِ اكثر وحده تعرف شنو عشنا وشلون تبهذلنه بعد وفاة والدي تقبلين اسمح يصير شي غلط يدمر خطط سنين من حياتي؟
كلاثم: بس مو بهاي الطريقه اجينه نموت بسببك تدري لو لا؟
اشكر ربك الله انطاك فيروز وحده غيرها متبقى وياك لحظه شوف شنو مسوي بحياتك من عمل زين والله عوضه ألك عن طريق فيروز.
هَيْصَم: شنو دخل فيروز بالنص؟
كلاثم: برأيك وين اكو وحده تعرف زوجها متزوج عليها وعنده طفل وثنينهم ميتين وهو محاجي اي شي عنهم وتبقى ساكته ومتزعل وتتحمل كل شي يسويه وياها؟
هَيْصَم: ليش ام الهَيْصَم الله يرضى عليج شنو مسوي اني؟!
كلاثم: يوميه جالط البنيه بسوالفك شنو تريد تسوي اكثر من هيج؟!
هَيْصَم: بدون قصد والله، العمل هيج يطلب شنو بأيدي اسوي يعني؟
كلاثم: بدون قصد هاي الكلمه ادمر هوايه علاقات، الحب افعال هَيْصَم مو بس سوالف احبج واموت عليج وما اعيفج وانت يوميه جالطها للبنيه، الكلب يتحمل يتحمل بعدين ينفجر يجي يوم وتلكيها مو يمك انسى الماضي وطلعه من عقلك اللي مات خلص مات وانتهى لتعيش وي نجاة وعندك فيروز انسى ابني وحرك الماضي ولي بيه كمل حياتك فيروز تستاهل تره.
هَيْصَم: ومنو كال اني عايش بالماضي؟!
من اول يوم شفت بيه عيونها نسيت كل شي صار بحياتي السابقه ولهذا السبب بالتحديد تزوجتها لان هي مو بس حبيبتي هي سيطرت على كل نبضه بكلب الهَيْصَم مع هذا مكدرت انسى انتقامي والثار سنين طويله واني انتظر هاي اللحظة، حبي اللَّباءَة ميعني ابد انسى انو اني جنت متزوج قبل وعندي طفل وثنينهم ماتوا بجريمة قتل بشعه هذا الشي ميحتاج تزعل عليه لَّباءَة، الوفاء من شيم الرجال واني بقيت وفي بوعدي الها لو نسيتها اطلع مو رجال.
كلاثم: لتذكر سريتهم يمها وأجبك هذا تره.
هَيْصَم: مذكرت اي شي عنهم وجنت مقرر ما افتح ملفات الماضي حتى ما اخليها تعيش هيج وضع بس صار اللي صار اني حتى اسمها مذكرته لو مو هي طلبت، اعرف مو هين هيج ماضي احد يتحمله لهذا السبب سكتت وقررت ما احجي وتفاجأت انو سمعتني وملامتني ابد على رغم اعرف انو غلطان وجان لازم احجيلها من البداية.
كلاثم: اصيله على أهلها الله يرحمهم.
هَيْصَم: بهاي صدقتي على رغم صلابتها تبقى لطيفة من الداخل عرف عمي يربيها بطريقه مبهره صعب تلكين بنيه مثلها بهذا الوقت.
كلاثم: تستاهل تفتح وياها صفحة جديدة هَيْصَم ازعل من عندك اذا زعلتها يوم.
هَيْصَم: مستحيل اسوي شي يزعلها أبد، كومي ويايه حتى نتعشا سوا.
كلاثم: روح يم مرتك سووا عشا ومن تكملون صيحني.
هَيْصَم: ادور فرص ام الهَيْصَم حتى اختلي وي لَّباءَة ماعرفتج!!
كلاثم: ملعون قبل جنت بس خاطبها بس هسه زوجتك كوم شوفها يجوز عدها شي تكوله خلصني يلاا.
هَيْصَم: اكو شي؟
كلاثم: اسألها اذا اكو شي شلون اعرف اني اكو شي لو لاا؟!
هَيْصَم: تمام صدكت.
: واكفه اسوي زلاطة وحسيت على أدين حضنتني من خصري قرب راسه من اذني وهمس باغنيه.
هَيْصَم:
يام العيون السود ماجوزن انا
خدك الكيمر انا اتريك منه
لابسه الفستان وقالت لي انا
حلوه مشيتها دتمشي برهدنه
لو تحب خادم خادمها انا
ولعوف الدوله واعوف السلطنه
ابتسمت والتفتت اله.
فيروز: صاير تحفظ اغاني سيد افندي؟!
هَيْصَم: كسرتي قواعد الهَيْصَم كلها بقت على هاي!!
فيروز: اكو شي بعيونك اسمعك هَيْصَم.
هَيْصَم: فديت اللي تقرأ عيوني والله.
فيروز: جديات والله شنو صاير؟
هَيْصَم: اسف واحبج.
فيروز: احبج اعرفها بس اسف ليش؟!
هَيْصَم: اني انسان محظوظ بيج لَّباءَة إلى درجه متتخيليها احبج من صدك ونسيت وياج كل همي وحزني يمكن كلامج صح واني غلطان لان محجيت ماضيي الج بس وداعة عيونج السود مقصدت ابداً وإنما مردت ازعجج لا أكثر، اني وياج فعلياً نسيت كل شي صار بحياتي قبل، وقررت افتح صفحة جديدة من اول مره اشوف بيها عيونج الحلوه اللي اخذت نبضاتي من اول لحظة، صرت وياج اؤمن بالحب من النظرة الأولى لدرجة اليوم اللي يمر بدون ما اشوفج ما احسبه من العمر، غيرتيني هوايه وبدون متسوين شي وجودج بكلبي كفيل يخليني اكسر قواعدي اللي بنيتها من زمان، مردت شي غير تبادليني الحب ونصير واحد ومن الحظ ربي حققلي هذا الحلم، انتِ انتصاري الوحيد بعد هزائم لسنين طويلة، الربح والمكسب اللي ابقى طول عمري اشكر ربي عليه، أنثى الأسد ولَّباءَة الهَيْصَم ومالكة كلبه لآخر يوم بعمري راح تبقين هذا مكانج وماكو واحد يكدر يزحزحج من عنده.
: خله أيدي على صدره ويحجي ويايه نزلت دموعي وحضنته بسرعة.
فيروز: مستحيل اتركك بسبب ماضيك واني اعرف كمية الألم اللي عشته بوقتها شلون تريد من عندي اتخلى عنك بوقت اللي لازم ما اترك بيه ايدك ابد؟!
علاقتنا ممبنيه على مصلحة معينه لو هدف، قسمنه وانطينه وعد منترك بعض بالسراء والضراء شلون تتوقع اعيفك وسط حزنك وأبتعد؟!
صحيح ردت اعرف لكن ابد مجان عندي خيار تركك وحيد، احاله اسوي هذا الشي يوماً ما حتى نفسي الاخير مراح ابتعد عن حضنك اللي اعتبره ملجأي وآماني من مصايب الدنيا، احنه عوض البعض ويكفي سعادتي وراحتي من اشوفك قريب من عندي وبخير ما أريد شي أكثر من هذا وعيونك حبيبي.
هَيْصَم: احبج ولج فيروزة.
فيروز: احب لَّباءَة أكثر لان يمثل اعتراف مميز اليه من تصيحني بيه.
هَيْصَم: خاص بس الج لَّباءَة الهَيْصَم.
فيروز: خليني اكمل العشا راح يصير نص الليل واحنه بس نسولف.
هَيْصَم: تعالي اعلمج شلون يقطعون طبخج كله غلط.
فيروز: لتعيب على طبخي سيد افندي.
هَيْصَم: هو وين اكو وحده مثلج مثل ميكولون الهنود القدير خلقكي وكسر القالب.
فيروز: دتكفر تدري؟
هَيْصَم: كلت الهنود وناقل الكفر ليس بكافر.
: ابتسمت وبديت اقطع هو لازم أيدي ويقطع ويايه على اساس يعلمني شلون اطبخ راسه يم ركبتي وكل دقيقه مقبلني مسويت شي وخليته على راحته الأوقات اللي يكون موجود بيها يمي اعتبرها نعمه اللهيه لذلك ما اعارض حركاته ولا امنعه من اي شي اصلاً سوالفه اني استمتع بيها، رجع يغني نفس الأغنيه بقيت ادندن وياه حتى كملنه العشا سوا خلصنه وغسلت المواعين وخلصت روتين قبل النوم المعتاد من عنايه وغيرها، طلعت من الحمام لكيته نايم تذكرت اني حامل ولازم اكله تقربت من عنده وخليت راسي على صدره حس عليه وخله ايده على راسي يمسح على شعري حجيت بهدوء وياه.
فيروز: هَيْصَم عندي سؤال.
هَيْصَم: جواب حبيبي.
فيروز: اذا صار عدنه طفل شنو تحب نسميه؟
هَيْصَم: خلي يصير بالأول والله كريم لتستعجلين بهيج موضوع.
فيروز: فرضا يعني هو مجرد سؤال.
هَيْصَم: ماعرف مفكرت بهذا الشي من قبل.
فيروز: طيب شنو تريد بنيه لو ولد؟
هَيْصَم: شنو يجي من رب العرش حلو المهم سلامتج وسلامته.
: رفعت راسي ورفعت نفسي قريب رأسه خليت عيني بعينه وأخذت ايده بداخل أيدي وخليتها على بطني ابتسمت بوجهه وهمست بفرحه جبيره واني احس بأبنه بداخلي.
فيروز: اني حامل.
هَيْصَم: اي وليش تهمسين هيج كل وحدة متزوجة تصير حامل شنو الغريب؟!
فيروز: هَيْصَم راح نصير ام وأب، حامل اني ركز ويايه راح نصير اهل ونكون عائلتنه الصغيرة، ماما وبابا مستوعب؟
: صفن بوجهي شويه يحاول يستوعب واني كل ثانية رجعت عدت نفس الجمله حتى ترك أيدي وكام من مكانه تصرفاته مو طبيعيه خفت ميكون فرحان مثلي عبست وجهي واني اشوفه ياخذ الغرفه طول بعرض حتى صحت بيه بصوت عالي.
فيروز: شنو فلمك هَيْصَم ليش هيج ردت فعلك غريبة؟!
رجع يمي ولزم أديه وكال بتساؤل.
هَيْصَم: كولي والله حامل؟
فيروز: والله حامل.
هَيْصَم: حللتي؟
فيروز: بالبيت.
هَيْصَم: ليش مرحتي للمستشفى؟
فيروز: نشغلنا بلي صار اليوم هسه يلا تذكرت وكتلك.
هَيْصَم: باجر نروح من الصبح تمام.
فيروز: تمام ان شاء الله.
: حضني لصدره ويحجي بلهفه اول مره اشوفه بهاي الحاله.
هَيْصَم: اشكر ربي على السعادة اللي عشتها اليوم عوضين على كلبي هوايه حيل الله يحميلي إياكم من كل شر ويكحل عيني بسلامتكم ثنينكم يا احلى شي صار بحياتي، عوضي وحبي لَّباءَة.
فيروز: الله لايحرمنا من عندك حبيبي ويحفظك النا ان شاء الله.
هَيْصَم: ويحفظكم اليه يرحمة ربي وعطائة.
: بتعد عني وراح صلى ركعتين شكر رجعت راسي على الجربايه واني اشوفه شلون يدعي بهمس ويشكر رب العالمين ودموعه تنزل نزلت دموعي وياه صدك عوض رب العرش ماكو افضل من عنده جان علاج لجروحنا ثنينه ومرهم ينسينا الألم والهموم اللي عشناها، السعادة الحقيقية والحب والأمان كلهن عشتهن وياه، سندي، مسندي، واتكائي ،وحبي الأول والأخير ،وصلت وياه إلى مرحله حب مجنون وبنظري يستاهل كل شي أقدمه اله يكفي انو كان سندي بوقت مجان عندي احد حماني واعتنا بيه وحافظ عليه حتى من نفسه لذلك يستحق كل شي أقدمه اله واصلاً لو شنو مقدمت اعتبره قليل مقارنه بشعوري ناحيته، خلص صلاه واجه يمي نام وخلاني على صدره قيدني بحضنه وخلص هذا اليوم بسعادة مفرطه على رغم بدايته جانت حزينه صدق الإمام علي عليه السلام من كال،
دع الامور تجري في اعنتها
ونم نوما قريرا هانئ البال
فما بين غفلة عين وانتباهتها
يغير الله من حال الى حال
: كعدت الصبح على لمساته فتحت عيوني قابلني بابتسامة ريحت كلبي وخلتني سعيدة حيل.
هَيْصَم: صباح الخير ياخير ايامي وجماليتها.
فيروز: صباح النور يانور حياتي انت.
هَيْصَم: راح ادخل للحمام حضري نفسج بعد الريوك نروح للدكتوره سوا.
فيروز: تمام.
: جهزت الريوك وكعدت خالتي اللي اعتبرتها بمقام امي الثانيه ويمكن لو امي عايشه متعاملني بنفس الطريقه تخاف عليه أكثر متخاف على بناتها وتحبني هم ،صرت احبها بشكل مو طبيعي واشتاقلها لو راحت شويه يم البنات على رغم هي تتركهن يم خالتهن وتبقى يمي لان هَيْصَم ميقبل اعيش هناك وهي متقبل تخليني وحدي هوايه تعاركت وياه وطلبت من عنده نعيش بيت واحد بس هو ميقبل يكلها اذا تردن تعالن اهنا نعيش سوا لان هذا البيت قريب من شغله بنفس الوقت ميريدني اروح هناك وهن ميقبلن يعيشن اهنا وماعرف ليش ثنينهم معندين.
خلصنه ريوك وجهزت نفسي حتى اروح للدكتورة وخالتي ويايه اكيد صعدنا بالسياره وعينه عليه، كل الطريق مشغل قرآن حتى وصلنه نزلنا وهو التوتر واضح بعيونه ابتسمت وطمنته حسيته خايف ليكون التحليل بيه مشكله واطلع مو حامل والصراحة اني همات نفس الشعور، دخلت وسويت تحليل دم بقينا منتظرين نص ساعة وهو طلع يتصل بماعرف منو صاحوا اسمي اجت تروح خالتي شفته اقترب هو من الممرض اخذ التحليل وماعرف شنو حجه وياه التفتلي وعيونه حمر خفت ليكون سلبي ومو حامل عيوني تغرغرت بالدموع اتقرب من عندي وهمس.
هَيْصَم: مبروك لَّباءَة الهَيْصَم شبل الأسد راح ينور بعد تسع أشهر.
فيروز: ضحكت بنفس الوقت نزلت دموعي، كامت خالتي وحضنتني وتحجي بحنيه.
كلاثم: الف مبروك حبيبتي يارب تنسعدون واشوفكم افضل واجمل عائلة يارب.
فيروز: آمين وبوجودج اكيد ماما.
كلاثم: حبيبتي يمه فدوة للي تكول ماما عسى ربي يفرح كلبج ويسعدج ويوفقج ويكحل عيونج بضناج وميشوفج إيام سوده يارب.
فيروز: ربي ميحرمني من حنيتج وحبج حبيبتي.
هَيْصَم: شنو هاي لعد اني وين رحت؟!
كلاثم: الله يسعدك يا أمي ويفرح كلبك دائماً ويكحل عيونك بسلامتهم يارب.
هَيْصَم: وانتِ موجودة وتربيهم على ايدج ام الهَيْصَم.
كلاثم: آمين حبيبي.
هَيْصَم: خلونا نرجع للبيت عاجبني اضمها لكلبي ولازم نفسي كوه عيب من الناس.
: ابتسمت بخجل وضربته خالتي خفيف على صدره هذا اليوم ثاني يوم اشوف بيه هَيْصَم فرحان من كلبه بعد يوم زواجنا وسعادتي هي سعادته اكيد، خلصت هاي الأيام على اجمل مايكون وصار يوم المحاكمه غير ملابسه وطلع يريد يشوف نهاية الأسود وعلى رغم كل الادله تثبت ادانته بس خايفين ليطلع شي بعدين يخرب كل هاي الفرحة..
يتبع..
البارت اكثر من 4500 كلمه.
ملاحظه صغيرونه شمعاتي هذا البارت هو الجزء الأول لنهاية قصة هَيْصَم وفيروز والبارتين الجايات حيكونن عن حوري ومحمد اما البارت الاخير راح نجمع بيه جميع أبطال قصتنا،
للي تسأل عن لائِث وريهاف ليش الكلام عنهم مختصر الجواب هو وباختصار هم مو من ضمن البطولة ممكن تنكتب قصتهم يوما ما ويمكن لا لحد الان ماعرف كل شي نتركه للقدر ورب العالمين شنو كاتب،
شغله ثانيه خفوا على فيروز بالتعليقات شمعاتي هي مغلطت من سامحته واصلا مجان داعي انو تزعل من عنده هَيْصَم انسان فقد زوجته وابنه بعد سنين حب وانتظار اكيد مراح يكدر ينسى بسهوله بعيد عن انو هو حبها تبقى ذكرى عايشه وماضي دام سنوات ولننسى شنو قدم وبأي طريقه عامل لَّباءَته من البدايه لحد الأن هذا كله جان دافع قوي حتى تصير وفيه وتبقى وياه وداوي جروحه، هذا الحب الحقيقي انك متترك اللي تحبه باصعب ظروفه هي مو مجرد كلمات تكتب برساله تندز بآخر الليل وإنما مواقف وأفعال قليله جداً نشوفها بهذا الوقت.
تصبحون على الف خير وعافيه شمعاتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!