تحميل رواية «هَيْصَم» PDF

لتنسون التصويت والتعليق ومتابعة الحساب شمعاتي ❤️

هَيْصَم

(الكاتبة زهراء احمد)

_____

كان يرى ماذا حل بقلبي وماذا جرى

هو استأصل من القلب عرقاً لم يروى

بماء الحب وطول حياتهِ لم يُسقى

كُنت معهُ وردة مزهرة حتى حال بيننا الصدى

انا وانت ياعزيزي لم يعد هناك بيت يجمعنا ولا حتى مأوى

وليس كل سقفٍ نسكُن تحت ظلهِ يُعتبر وطن وللروح ملجى

ان لم يكن الحب عنوان مابدأ معنا وما إنتهى

بقلمي زهراء احمد

الحياة بيها منعطفات هوايه، مرات تاخذك للهاويه بلمحة بصر ومرات تصعدك للقمة بذات اللمحة النزلتك بيها، مرات تشوف نفسك فوك بالعلالي ومرات ثانية تكون باسفل السافلين، الحياة ياحبيبي مو دائماً منصفة ويانه لازم تضرب وتقاتل وتصمد بهاي الحرب لنهاية مسيرتك بيها، بدون تعب وبدون متاخذ وقت أستراحة،

أيدي على خدي، الهدوء يعم البيت، لكن العاصفة الحقيقية هي بداخلي، افكار متضاربة، وهم وخيال صنع حكاية أقرب منها للواقع، وشنو يعني واذا سامحني ونسى الصار واذا بررلي الخيانة وكال فكرت بسلامتي وخافت عليه، شنو يصير مثلاً؟ شكو بيها لو نرجع أيد وحده الأسد ولبوته؟ شكو بيها لو تنحل الخلافات الصارت حاجز من حديد بينه قطعت كل وسائل التواصل ومنعت الغفران، الذنب كبير والحمل أكبر والهم، الهم اللي بكلبي منو يكدر يحمله؟ احس نفسي عايشة بالذل صحيح بيت زوجي وهو مسؤول عني أو واجبه يصرف عليه بس تبقى الفجوة اللي بينه أعمق تمنعني اسوي اي شي او لو ما اكون مجبورة بسبب الجوع حتى الأكل ما أمد أيدي عليه،

رجعت راسي على القنفه مغمضة عيني وعقلي سرح لبعيد لذلك اليوم البدت منه سالفتي.

Flash back

هَيصَم: كوني واثقة بيه ولتخافين بس سلمي عليهم وطلعي.

فيروز: هَيْصَم هاي ثاني مره يجون واني أرفض ماكدر افوت والله ما ارتاحلهم ابد ماعرف ليش.

هَيْصَم: اني وياج، اكسر ضلوعه اليسمعج كلمة، ماريد منج بس ثقين بيه.

سمعت كلامه وتبعته كلي ارجف دخلنا للاستقبال، كلهم كاعدين اكو بيهم ثنين معكلين والبقية ثنين لابسين دشاديش بس وثنين لا لابسين ملابس عاديه، بلعت ريكي وأخذت نفس سألني واحد بيهم لحيته كلها بيضه بس بعده صغير يعني مو حيل جبير بالعمر.

ابو رضا: انا عمج ابو رضا بنيتي، بعد سنوات جنت ادور بيها على أبوج وسألت واستفسرت وماخليت شبر بهاي المحافظة يعتب عليه عرفت انو هو مات صار خمس سنوات بس عنده بنية وأخذت عهد على نفسي اخوي الما وفيت وياه بسبب ابوي اوفي وي بنته، فشنو رأيج تجين ويانه اليوم، القرار بيدج وكدام الكاعدين وكدام زوجج تختارينه وتنسين عمامج طول عمرج لو تجين ويانه وتنسين رجلج وبكيفج انتِ.

هَيْصَم: عمامها صرتوا من تالي!! وين جنتوا بهاي السنين كلها؟ لو هسه تذكرتوها من سمعتوا عدها بيت وراتب وكلتوا ناخذ فلوسها والورث، بأسم عمامها موو؟

ابو رضا: احترم على الأقل شيبتي عوفك من الكاعدين أو اوزن كلامك وثمنه عدل، العدنا يغطي عين الشمس ما محتاجين جم فلس من وحده يتيمه وماعدها أحد، بس الصار مايرضينا، تزوجها بدون علمنه ومشورتنا واحنه اهلها وعزوتها عايشين ونشم الهوه.

هَيْصَم: ابو رضا هسه تذكرت عندك اخ ويتيمه كاسره خاطرك وتريد تعوضها وترجعها لحضنكم بعد هاي السنين كلها؟! بعدين شنو هاي الما عدها احد؟ وليش اني وين رحت؟ انا هَيْصَم زوجها شرعاً وقانوناً أمام الله وأمام الناس واللي يفتح حلكه اسوي وصله مال مسح لتاير سيارتي، مرتي بنص بيتي وأم بنتي ما اسمح لأي واحد بيكم يهينها ويسمعها كلمة وحده تغثها، ستقبلتكم عبالي خوش أوادم تردون تسلمون عليها وتشوفوها شمحتاجه ولو انا خشمي يشم الهوه لو تطلب الطير الطاير بالسما اصيدة وانزله الها وتدلل عليه، بس كلت واجب وما اكسر بخاطرك جايين وسائلين ودخلتوا بيتي وكاعدين على بساطي ماردكم وانا ابن شيوخ وناس معروفه منرد الضيف، بس اليجاوز حدوده اجاوز وياه القانون والعن والديه وابن منو ما كان واضح؟

ابو رضا: تجاوزت هوايه حدودك وانا ولدي حامين ولازمهم كوه اذا تريد الطك احنه أهلها.

قاطعه كايل بنتفاضه.

هَيْصَم: تهددني بنص بيتي ابو رضا؟ اذا تجيني بالقانون انا محامي سابق ورائد هسه والعن والديك بالقانون واذا تحجي بالطك انا ابن ولايتك نفسها وايدي معلمه على الرمي اسويك منخل وانت بعدك ما ساحب أقسام.

كام من مكانه لاف عبايته وكال جملة بعدها طلع.

ابو رضا: اللي جيه ثانية وصدكني وكتها لو كاتل لو مكتول.

مافهمت شنو قصده، بس داخلي ماعرف ليش رتعب وحسيت اكو معنى ثاني للي كاله غير المفهوم منه، يعني ما قصدة يقتل وانما شي ثاني، غميت نفسي على حظي المايل عمامي وين اني وين همه وجايني هسه يردوني اعوف هَيْصَم وختارهم والله بطرانين.

صحيت من صفنتي على ايدها المخليتها على بطني.

رويم: ماما اخوي شوكت يجي؟

ابتسمت على كلامها مجاوبتها.

فيروز: بعد كم شهر.

رويم: اريده هسه.

فيروز: قابل هو جبس وانطيج اياه هسه ميصير يا حبيبتي لازم تنتظرين.

رويم: ماا اريده هسه، ماريد انتظر.

فيروز: شنو رأيج نسوي كيكة وناكل وننتظره يجي؟

رويم: يعني اذا سوينا الكيكة يجي؟

فيروز: اي يجي بس لازم ننتظر.

رويم: ماريد انتظر اريده هسه.

فيروز: ماما لتعبيني منين اجيبه هسه متكليلي؟

رويم: اخلي بابا يجيبه.

فيروز: اي مو ابوج دكتور شو كومي مني مالي خلكج.

ماعرف ليش ضجت فجأة ونزلت دمعتي صار عندي واهس وره اول وحده واستمريت ابجي واحجي واغلط عليه جنت بكامل قواي العقليه لأن اللي ديمر عليه ميتحمله شخص، بعد سنين حب وعلاقة تجنن فجأة بسبب الميخافون الله تغير كلشي،  احلف واقسم وتوسل وكله والله معليه اني جنت مجبورة بس هو راسه والف سيف: ابوج فد واحد ماينحمل ومحد يكدر يعيش وياه معتبر الحياة عبارة عن مجرمين وتحقيق لا يتفاهم ولا يسمع احد ينفذ العقوبه حتى بدون ميسوي جلسة استماع بالأول، ينطي الحكم بظلم والله، يعني اني شنو ذنبي اذا يهددوني بيه ويكلولي راح نموت ابو بنتج المثلي شنو تسوي!!!

هَيْصَم: تجي تحجي لابو بتها وهي تعرفه عدل يشك حلوك ومحد يكدر يخطي اله خطوة ومتاخذ قرار بنفسها بدون متفكر بالعواقب.

رفعت راسي اله من سمعت صوته متفاجأت لأن هو ميخليني وحدي بالليل أبد لازم يجي حتى لو نص الليل اذا عنده شغل الا اذا جان الوضع كلش مايسمح.

فيروز: كل العواقب تهون كدام حياتك وانت تعرف هذا الشي عدل بس معند ومتريد تسمع مني.

هَيْصَم: وما راح اسمع لأن السويتيه ما ينغفر أبد.

فيروز: خلص ماطول انت مصر على قرارك طلكني.

نزع ساعته وحجه وهو يمشي بإتجاه الغرفة.

هَيْصَم: بالأول ولدي ابني وبعدين يصير اللي تردي تدللين ام رويم.

فيروز: اللهي راح انجلط من هذا الرجالللل.

سمعت صوته وهو يصيح.

هَيْصَم: اعصابج ليصير بابني شي واحملج المسؤولية.

فيروز: تعال اخذه ودير بالك عليه لتبقى محسسني بمنيه لأن ابنك ابطني.

هَيْصَم: شبل الأسد هذا ليش تردين اتهاون بيه مثل مسويتي وي ابوه؟

ماتحملت أكثر رحت دافعه الباب ودخلت.

فيروز: شوف اني اعصابي صايره بطرف خشمي وحق ربك هسه اخليك تطلع عاجل بالشرقية نيوز وتصير ترند بالمواقع.

هَيْصَم: اي بلا شسوين؟

فيروز: جريمة قتل.

هَيْصَم: بالأول فتحي بطن السمجة يلا تجين ترتكبين بيه جريمة قتل هسه.

فيروز: لا خطية السمجة ممسويه شي بس انت مسوي وهوايه هم.

هَيْصَم: من ايدج اللي صار كله، ماضربتج على ايدج وكتلج طعنيني بكلبي وعوفيني وروحي اختاري عمامج وخليني وحدي عايش بغصتي، لا بررتي من طلعتي ولا كلتي حرف، سحبتج وكتلج لَّباءَة وبيتنا وحياتنا شكلتيلي؟ كتلج هذا الكلب من تعتبين بره البيت خطوة وحدة يموت شنو جان جوابج يمرتي وام بنتي؟ تذكرين لو اذكرج؟ ههه وهسه تجيني تردين اسامح!!!

اربع أشهر لا واحد ولا ثنين رسالة منج بالغلط ماشفت تردين بعد تعب كلبي ولوعته اغفر افاااا وانا هَيْصَم وانتِ تعرفيني عدل وتعرفين اني شخص انتقامي إلى حد وما انسى احاله.

فيروز: بس كتلك جنت مجبورة والله العظيم واصلاً ماعندي موبايل وممنوع عليه اطلع بره الغرفة الا بوقت الضرورة.

هَيْصَم: انتِ مالج غير هَيْصَم، تردين تسميه بلاء تسميه حب لو إنتقام، فيروز نكتبت بأسمي والدليل هسه محد سأل عنج واخذتج كدام عيونهم ومحد فتح حلكة لأن يدرون من يصير الموضوع بيه أهلي وبيتي ادوس جدهم السابع عشر ابسطالي، احفظيها عدل الصار مستحيل يجي يوم اسامحج عليه ولا اقبل منج اي عذر أو تبرير وياريت مترجعين تكررين ذات القضية لأن هي مختومة من يمي.

فيروز: اني غلطانه اعرف واللي سويته اكبر غلط بس منو بينه معصوم؟

هَيْصَم: اكو غلط واكو جريمة واللي سويتيه جريمة بحقي، انا ما استاهل منج الصار ابدد.

فيروز: وداعة رويم لخاطر سلامتك وروح أبويه كل اللي سويته حتى ماشوفك متأذي.

هَيْصَم: لتخبليني منو هذا الإبن ابوه يكدر يطخ شعرة مني؟ الأسود من حاول دسته وعبرت وهسه وينه؟ ميت وانا عايش ليش؟ اني اجاوبج لأن أني شجاع كفاية وعندي ثقة برب العالمين اللي مو يومه ميموت، متكدرين تغيرين قدر الله اذا مكتوب فسوالف الانقاذ والمسلسلات الهندية والتركية بطليها وحجيلي بالواقع،

من لزمت ايدج وكتلج ابقي وترجيتج شنو سويتي؟ عفتيني بحسرتي وبغصتي واذيتي كلبي ودمرتيني وعفت أيدي وطلعتي وشمتيهم بيه، نظرتهم واستهزائهم بيه وبكلامي وطعنج بروحي والدمار الصار بحياة الهَيْصَم والتغيير اللي يعيشه هسه والدخان والعجرفه والشيطان المولود بكلبي كله بسببج، اي اي بسببج انتِ السبب وعمري كله ما اسامحج عليه، وبس تولدين ارجعج للمزبله اللي رجعتج منها العمامج الفضلتيهم عليه.

فيروز: تعبت وانا ابرر واكول اللي سويته جان غصب عني، انت مقتنع بفكرتك وخلص قافل عقلك من انو تسمعني واني خلصت طاقتي بالكلام.

هَيْصَم: محد جبرج تحجين وتبررين شي صار كدام عيوني، هذا يسموه استغباء للطرف المقابل وانت اعرف بيه اذا كنت من هذا النوع أو لا.

فيروز: لهاي الدرجة كرهتني؟

هَيْصَم: بعلم النفس يكولون اللي كلبك دكله بيوم من الأيام مستحيل تكرهه، لكن الصار سبب ندب بكلبي وجرح مايجي يوم يلتئم.

فيروز: أكدر أصلح اللي صار؟

هَيْصَم: بيا طريقة تصلحيه؟

فيروز: استاهل فرصة هَيْصَم.

هَيْصَم: انتِ ام أولادي ومرتي اكيد تستاهلين.

فيروز: ليش مانفتح صفحة جديدة لعد؟

هَيْصَم: نفتح صفحات بس هسه الوضع مالتي مايسمح افتح اي صفحة.

فيروز: تمام ما اضغط عليك بقرار مقتنع بيه.

تركته وطلعت بداخلي هم جبير، اني اعترف بغلطي واستحق العقاب بس نفسيتي تعبت وماكدر اتحمل أكثر من هيج، قررت ابتعد اني عنه واتجاهله وما اهتم اله واعامله بالمثل، اللي صار علمود ماخلي يتعرض للخطر شكد مجنت غلطانة حاولت أصلح غلطي صار شهرين احاول وهو رافض يسمع ويسامح لذلك انسحب وعيش لنفسي وبنتي وما إليه اي علاقة بيه، ادوس على مشاعري كلها وما اطخ راس إله بعد.

حوري: هاي شنو بيدك؟

محمد: قضية الرجال الحجيتلج عليها، باجر اخلي هَيْصَم يلتقي بيها ويسمع منها.

حوري: شلون تثق انت؟

محمد: ما اثق ولهذا السبب اريد اعرف الفلم كامل ومنو المخرج والكاتب مالته.

حوري: بمنو تشك؟

محمد: مثل هيج قضية خطرة ما أعتقد احد يكدر يحجي بيها خاصة وهو نقتل الا اذا كان شخص مقتدر لو عنده أيد بالموضوع ويريد يخلي شخص ثاني يتحمل ذنبه.

حوري: اذا هيج راح تعرض حياتك وحياة هَيْصَم للخطر.

محمد: لهذا السبب دخلت هَيْصَم.

حوري: ليش تريد تموته!!

محمد: شغلي مخج وياي، هَيْصَم مو انسان عادي رائد بالجيش غير هو مايخطي اي خطوة بدون علم مديرة والاقربين اله، عنده جماعة مخصصة توصله المعلومات بكل مكان يعني هيج شي مو صعب عليه يعرفه بلمح البصر.

حوري: بس هم يبقى خطر عليكم.

محمد: والله ماكو خطر على روحي غيرج انتِ، يا قوري كلبي.

حوري: هاي شنو قوري وين لكيت هاي الكلمة؟

محمد: ذلك اليوم سويت جاي ونتبهت شلون يفور، هيج يصير بكلبي من اشوفج.

حوري: ههههههه، انت تحطم الرقم القياسي بالغزل الغريب.

محمد: جسر للحلوين اصير.

حوري: متخاف اعبر عليك وتتأذه؟

محمد: دوسي براحتج الجرح يلتم من يدوسه البلاستر.

حوري: هاي وين لكيتها؟

محمد: بالمتنبي نازله بيه شلون كتب جديدة تنهي.

حوري: انت والله فاصل فد مره.

محمد: اريد إعادة شحن ممكن؟

حوري: ممكن ليش لا ذيج النقطة وهاي الشاحنة روح اشحن شكد متريد.

محمد: شحن ولج شحن.

حوري: لعد الشاحنة شنو غير شحن!!

محمد: شحن معنوي حياتي انتِ.

حوري: روح نام تكعد البطارية فول.

محمد: اروح اجيب أقمار وخليها تنام بحضني وانتِ تنامين بالكاع هاي عقوبة الج.

حوري: ومنين تشحن؟

محمد: معليج بيه.

حوري: اوكي براحتك حبيب.

ابتسمت واني دايره وجهي حتى ميشوفني اضحك، اعرفه ميتحمل بعدي عنه، رحت كعدت بالصالة وشغلت التلفزيون شويه وسمعت صوته يصيحني درت وجهي محجيت وياه اجه سحبني من أيدي واخذني للغرفة غصب ضحكت بداخلي عليه فعلاً الحب الحقيقي الصادق هيج يكون محد يكدر يبتعد عن الثاني تحت أي ظرف كان.

هَيْصَم: بحثت عن الموضوع الوصيتك بيه؟

: نعم سيدي، الرجال صدك متوفي بجلطة قلبية وبالفعل كان بريئ والتهمة تلبست بيه.

هَيْصَم: شلون تأكدت؟

: الدليل الجان يدينه مقدم قبل شهر بأسم واحد ثاني كل الجرائم المكتوبة بملفه موجودة باسم ذلك الشخص، هذا غير التهمه السابقة سقطت بالكامل عنه واسمه نحذف وهذا الملف لكيته موجود بالارشيف.

هَيْصَم: شنو اسمه المتهم الأصلي؟

: نعمان قاضي سيدي.

هَيْصَم: هذا الأسم مار عليه مو غريب.

: اي جان من ضمن المتهمين اللي بحثنه عنهم قبل سنة وملكينا شي.

هَيْصَم: وين بيته؟

: راح ادزلك العنوان برسالة.

هَيْصَم: انتظرك.

صعدت سيارتي رايح لدجلة لابس مدني، هذا المكان دائماً نجيه اني و لائِث، من وصلت لكيته موجود نزلت من السيارة ورحت سلمت عليه مشتاقله حيل، الأنسان الوحيد اللي أكدر اخذ راحتي وياه بالحديث، صديق العمر واخ بالمواقف والوكفات لو شكد ماحجي عنه ماكدر اوصفه.

لائِث: مال هسه اشمرك بنص دجلة يا ناكر المعروف والعشرة.

هَيْصَم: سلامتك عندي اهم من المعروف والعشرة.

لائِث: شنو صاير وياك ليش تغيرت لهاي الدرجة؟

هَيْصَم: السالفة لازم تبقى سر هاي الفترة علمود سلامتك خاف كل شي يصير.

لائِث: مشتاقلك ملعون، كل هاي الفترة مبتعد ومن اجيت تحجي من وره خشمك أجيت اضربك طلقة والله.

هَيْصَم: وتنسى العشرة والزاد والملح!!

لائِث: انسى امك وابوك مو بس العشرة على سوايتك وياي.

هَيْصَم: بلا انت تفرح بس تريد شي علمود تعوفني وتنكر عشرتنا.

لائِث: افاا تتوقع اني اسويها؟

هَيْصَم: بعيد عن انك صديقي واخوي بس انا فقدت الثقة بالكل، وصرت اتوقع اي شي من اي أحد، العشته علمني درس قوي حيل مامكن يجي يوم أكدر انساه.

لائِث: ليش متشوف الجانب الثاني من الكاس؟

هَيْصَم: سواء الكاس مليان أو فارغ بالحالتين وكع من أيدي ونكسر وجرحني جرح ما يلتئم حتى لو مرت عليه سنين.

لائِث: مصعب الأمر حيل عليك.

هَيْصَم: اللي تخلي روحك بين أديه ويروح يدمرها رد فعلي جان بسيط جداً على الصار غيري مايرجع ويعيد نفس الغلط وهو ماعنده ثقة.

لائِث: بطلت تثق بيها؟

هَيْصَم: للأسف اي لان الصار مو هين أبد ولا انا انسان آلي وكدر اعبره بسهولة.

لائِث: ماكلك انسى بس تناسه هيج بس تكدر تكمل الطريق بأقل أذية ممكنه.

هَيْصَم: الاذيه سكنت بداخلي وستوطنت بكلبي شلون اكدر اتخلص منها؟ نظراتهم الشمتانه بيه، ايدها التركت أيدي باكثر وقت جنت محتاجها بيه وطعنتني وراحت شلون انسى؟ اكدر؟ يجي يوم اكمل بدون ماشوف كل شي صار بكل مره تمر كدامي بالبيت؟ كل خطوة تخطيها وهي رايحه للمطبخ لو لأي مكان بالبيت تصير كدامي روحتها، كدامكم كلكم سوتها لو بينه الموضوع باقي جان ماحجيت ولا ذكرته وكلت تغلط بس هي نزلت راسي كدام الكل واني الجنت مفتخر عندي لّبوة لو غبت هي تشيل البيت وتعتني بيه تالي كدامي واني موجود هيج سوت، انسى من اذكر يزيد قهري قهرين وكلبي مابيه طاقة بعد ويتحمل.

لائِث: تغيرت هوايه بهاي الكم شهر ماتوقعت هَيْصَم يجي يوم ويدخن ويترك مبادئة.

هَيْصَم: واني هم ماجنت اتوقع هيج يصير بيوم من الأيام بس شاء القدر وصارت بعد.

لائِث: احجيلي بعد شنو صار وياك بهاي الفترة.

هَيْصَم: كاعد ادور عليه بكل جهد وأعتقد هسه وصلت لراس الخيط مابقى شي ان شاء الله ونلقي عليه القبض بالجرم المشهود.

لائِث: لهذا السبب جنت غايب ذيج الفترة؟

هَيْصَم: جانت عملية سرية وخطرة حيل لدرجة ماكدر احجي وياكم بشكل طبيعي وبيتي مخلي عليه حمايه خاف كل شي يصير واني مادري غير كاميرات المراقبة المخليها ومع هذا كله كلبي يمهم بس ماكدر اسوي شي هذا واجبي ولازم انفذه بأحسن وجه.

لائِث: تحبها؟

هَيْصَم: لدرجة ماتحملت اخليها بعيده عني وباسرع فرصة سنحت رجعتها للبيت.

لائِث: مانوي تنفصل عنها؟

هَيْصَم: بحاله وحدة وهي موتي.

لائِث: سامحتها؟

هَيْصَم: من أول ماصارت عيني بعينها، اني ماسمعت منها اي تبرير لأن واثق اللي صار على رغم شكد اذاني بس سوته من خوفها عليه.

لائِث: لعد شبيك قبل شويه خبصتني ما أنسى وما انسى؟

هَيْصَم: ما انسى قدرتها على تركي، ما انسى شلون شافتني ضعيف وسوت شي من راسها بدون متجي تحجيلي شي، ما انسى شلون طاوعها كلبها تنسى كلشي عشنا سوه وتروح بدون ماتلتفت، سلامتي مو مهمه واني كايللها الف مره، الحياة حق والموت حق كل شي يصير مكتوب من رب العالمين ومقدر بورقة وقلم، على شنو تخاف بعد اذا الروح مياخذها غير صاحبها؟

لائِث: هي بفترة صعبة لا تقسي عليها.

هَيْصَم: اني اعرف شنو أسوي لتخاف، المخبر دزلي عنوان البيت تعال وياي نروح نشوفه.

لائِث: وربك شكد مشتاق لأيامنا بالمراقبة والطفرات على البيوت.

هَيْصَم: اليوم ندخل من الباب مانطفر.

كلاثم: لشوكت تبقين صافنة بالحايط بدون ماتحجين حرف؟

آمندا: تعبانه ومالي خلك اشم الهوه، اذا ممكن عوفيني وحدي اريد ارتاح شوي.

كلاثم: ياضوه عيوني بنيتي الغالية كافي تسوين بنفسج هيج انتِ ما الج ذنب بلي صار، ذكري ربج وستهدي بيه وحرام عليج تسوين بروحج هيج يا أمي انتِ.

آمندا: اريد احجي وي غضنفر اتصلي بيه.

كلاثم: اي حاجي صار شكد يريد يحجي وياج وانتِ متقبلين، هسه اتصل عليه وسولفي وياه براحتج ياماما.

اتصلت بيه ونطتني الموبايل وطلعت، خليته على أذني اجاني صوته بسرعة بجيت، من سمعني هيج كال.

غضنفر: فدوة يروحلج هَيْصَم والقضية والمهمه وغضنفر وعشيرته من أصغر واحد لاكبرهم ليش تبجين ياعيوني؟ منو مزعلج واني موجود؟ اكسر راسه وراس الخلفه بس كولي.

آمندا: ماكدر.

غضنفر: على شنو متكدرين؟

آمندا: اكمل بهذا الزواج ماكدر، خلي نترك انت تستاهل وحده احسن مني.

غضنفر: امج بالبيت؟

آمندا: اي.

غضنفر: دقايق واني يمج.

غلق الخط بدون مايسمع مني كلمة، شمرت الموبايل وصرخت صرخة حسيتها طلعت من روحي، اني شنو ذنبي وتعذب هيج؟ ليش هيج اعيش وشنو مسويه حتى استاهل هاي العقوبه؟ صفنت وعقلي اخذني لبعيد لذيج الأيام وشلون تعذبت بيها، كمت من مكاني اسحل نفسي سحل، رحت يم أمي فتحت الباب وحجيت باصرار.

آمندا: غضنفر راح يجي من تشوفيه كليله ماريد اكمل خلي يفصخ الخطوبة واذا هَيْصَم سألج كليله والله العظيم انتحر وموت نفسي اذا عاندوني وخلي يزفوه بجنازتي.

كلاثم: اسم الله الرحمن الرحيم شنو هل حجي وهاي عاد انتِ بنيتي الربيتها وكبرتها على حب الله والإيمان بقضاءه وقدرة، انتِ مو نفسها ذيج أبد غيروج الشيطان لعب بعقلج.

آمندا: لا الشيطان لعب بنتج، الشيطان دمر حياتها، الشيطان خطفها، الشيطان خلاها تكره نفسها، تكره شكلها، تكره روحها، الشيطان خلاني اتمنى الموت وماريد غيره، الشيطان هيج سوه، الشيطان الحقيقي بريئ من شياطين الإنس، بريئ، سمعتيني بريئ، زواج ما ازوج لو تطلع نخلة بروسكم كلكم، حتى لو تذبحوني ما زوج سامعتني؟

كلاثم: يمه ستهدي برحمانج انتِ شنو ذنبج بلي صار.

آمندا: مظلومه مالي ذنب، تعاقبت بسبب ابنج و شغلة، راحت حياتي بسبب هَيْصَم، هو السبب، جنت اتوسل بيه يعوف شغله وشوفي شنو صار بعدين منو وكع بيها؟ اني ذلك هو عايش حياته طول بعرض صار عنده أولاد وبيت عامر ما شاء الله واني؟ جاوبيني واني؟ ههه راح يتقبلني بكل شي بيه؟ مراح يجي يوم يعيرني ويطلع بيه عيب؟ مراح يحجي جاوبيني مراح يحجي ويفتح حلكه ويكول انتِ الرحتي برجليج منو جبرج تبقين يمه ليش ماشردتي منه، راح يصدكني من اكله حافظت على نفسي على رغم كل اللي صار، راح يثق؟

كلاثم: هو لو ما يثق جان مابقى داك رجل يريدج ومايريد غيرج وكم يوم يجي هنا ويبقى يتوسل بس يريد يشوفج كدامه ولو دقيقة ويطلع منا زعلان وضايج لأن براسج اليابس والمعند تقفلين الباب عليج ومتردين تحجين وياه، هاج تفضلي على سيرته ندك الباب، اسمعي وحق ربج الخلقج تجين تكعدين هنا وتحجين وياه مثل الأوادم وتسمعين منه وتحلين كل شي بينكم ماكو لا اني اعرفج ولا تعرفيني واعوف البيت وروح اكعد يم اختي ولا اجيكم، كافي تعبت ، مليت اني مره عجوز رجليه بالكبر وانتوا بعدكم نفس المشاكل، صبري نفذ ماكو هيج حياة، وين راح حيدر وعافني يم ولده المخابيل ان شاء الله يجي ياخذني ورتاح منكم خلص ماعندي طاقة بعد واتحمل.

آمندا: لا تدعين على نفسج هاي هي احجي وياه.

كلاثم: ورجليج فوك راسج، وريدج تغثيه بكلمة وحق ربج البس عبايتي وروح يم اختي بهل الليل ولا اريدكم بعد وما اعترف بيكم نهائياً.

آمندا: لتصيرين عصبية ويرتفع ضغطج اسوي مثل متردين بس لتقهرين نفسج هيج.

كلاثم: امشي روحي عدلي وجهج ولبسي شي بيه حظ يكول طالعة من الحاويه، واني اروح افتح الباب وكعت رجليه من الوكفه صار ساعة يدك.

دخلت الغرفة لبست بدون نفس ومشطت شعري شلون مجان ولفيته وخليت عطر وشال على راسي وطلعت، رجليه منعتني افوت يمهم بس من سمعت صوتها بلعت ريكي ودخلت غصب ماكدرت ارفع راسي وشوفه ماعرف شبيه خجلانه اريد هسه تنفتح الكاع وتبلعني بأي طريقة، رفعت راسي من سمعت صوته يحجي وي امي.

غضنفر: خالة اذا ممكن فد دقيقة وي بنيتج.

كلاثم: اي يمة دلل.

اول مطلعت امي حجه وياي هو.

غضنفر: تره هَيْصَم عنده علم انو راح اجي خاف تنحرجن يعني لأن جاي بهيج وقت بس بعد ماكدر اتحمل أكثر، وماعندي صبر، كلت اجي وحجي العندي وطلع بدون ماسمع منج حرف، شوفي يابنت الناس، اني ماخطبتج على الأدب والأخلاق مالتج وان كان هذا سبب مهم اكيد حتى اتقدم بس مع هذا ما كان السبب الرئيسي حتى اتقدملج، اخوج صديقي وعزيز عليه واني وياه نتشارك بالشغل وهو مديري هم مع هذا ماخلي قرار مصيري مثل الزواج يكون لهيج سبب وعلمود علاقتي باخوج، اني تقدمت لأن حبيت وكلبي دك ومستعد اسوي اي شي علمود يتم هذا الزواج، تردين تعتبريه تهديد أو تعتبريه حب وماكدر استغني عنج اللي يعجبج بس طلاك ماطلك وزواج يتم بغض النظر عن رأيج، ماجتبج بالساهل اني تعبت حتى اتقدم وماممكن اوصل للعنب وكول حامض وشمره وياريت وصلت لأن إذا مو بالرضا اوصلها بالغصب واخوج يعرف شكد اني خبل وما عندي تفاهم بلي اريده.

آمندا: هذا إجبار إليه على علاقة اني ماريدها.

غضنفر: تحبيني بعد الزواج ماكو مشكلة، مو اول وحده تزوج تقليدي.

آمندا: بس اني ماريد اتزوج.

غضنفر: اني ما عرفتج اليوم الصبح، صار سنة كاملة بنهارها ولياليها اراقب وباوع وخطط وخليت كلبج يدكلي، وهذا الشي ما يحتاج تعترفين بيه وتكوليه اني اشوفه بعيونج الحب يشع منهن بدون متدرين.

آمندا: متوهم ماحبك.

غضنفر: واضح من رجفة ايدج وعينج الما خليتيها بعيني من دخلتي لسه، شوفي باباتي اني اقرر وسوي ورأيج مو مهم، كولي همجي، كولي متخلف كولي عاشق مغرم،

بآخر جملة اجه وكف يم بلعت ريكي ورجعت ليوره شويه لزم أيدي وسحبني حاضني بين أديه، هامس بأذني.

: اني انسان مجنون بكل شي اسويه بحياتي، ادخل للموت واني أضحك ومستعد اسوي اي شي بالحياة ماطول دماغي عاجبه الأمر، ما بالج بالحب؟ احارب واحارب حتى اوصل واخذ اللي أريده، واني حبيتج ولو اعرف كلبج الصارت دكاته موسيقى بأذني مو بأسمي جان ماسعيت، اني من تأكدت حبيتيني تقدمت خطوة ومن وثقت بحبج تقدمت خطوات، وعلى هاي دكات كلبج وانتِ بين أديه هسه مستعد اتقدم أميال.

قبلني بخدي وطلع بدون مايسمع مني كلمة بقيت واكفه بمكاني وميته خجل هسه يلا بديت أستوعب انو اني تقبلت الصار وما دفعته غميت نفسي وطلعت لكيتها كاعده وبيدها ستكان جاي من شافتني غمزتلي ودزتلي بوسه بالهوه وبتسمت عفتها ورحت للغرفة بسرعة وحس كلبي صار طبل من صدك، احبه اي صح بس ماكدر اخطي هيج خطوة بعد كل الصار وياي.

نعمان: منوو، جاي، جاي، كافي دك بالباب سطرتنا.

فتح الباب رفعله هَيْصَم حاجبه وهو مكتف ايده لصدرة بقى نعمان صافن مثل الحمار بوجهه حتى فززه كايل.

هَيْصَم: شو ماكو تفضلوا خطارك احنه عيب توكفنا بالباب.

نعمان: ماعرفكم اني منو انتوا؟

لائِث: لا عيب عليك ماتوقعتها منك هيج تنكرنا واحنه جماعتك أو وياك من سنين.

نعمان: انتوا اللي دزكم عليه وصارلكم شهر تراقبوني مو؟

هَيْصَم: النا ثار وياك ولازم ناخذه حتى نكون متعادلين.

نعمان: اني سويت كل اللي طلبه من عندي، وجنت اوصل الجرعات للناس على الوقت مثل ميطلب هو، والفلوس اسلمها بأيد الشخص اليدزه بدون نقص ربع، بعد يا ثار ويايه تطالبوني بيه؟!

هَيْصَم: ثار تعرفه انت واحنه نعرفه.

نعمان: اني شاك بيكم، بعدين اني عمري كله مالتقيت بيكم من قبل منين عرفتوني؟

هَيْصَم: الواضح انت مثكل هوايه ودماغك فاصل عن العمل، راح اشوفك الصورة وانت جاوب تعرفه لو لا.

فتح الموبايل وطلع الصورة مخليها كدام عيونه ذلك فتحهن عشرة على عشرة بقى وجهه ينطي ألوان وبدون أي كلمة دخل وقفل الباب، رجعنا للسيارة اول مصعدنا نزعنا اللثام، باوعلي كايل.

هَيْصَم: جيب جماعتنا خليهم يراقبوه عدل بهاي اليومين راح يلتقي بيه لو بواحد من جماعته.

لائِث: شلون عرفت راح يحجي شي بخصوص تجارتهم؟

هَيْصَم: وصلتني معلومات اكو ثنين مراقبيه يلبسون اسود وجسمهم ضخم شويه وسيارتهم رصاصي، عرفت لو اجينه بنفس الهيئة راح يغرد مثل البلبل خاصة هو خايف والإنسان الخايف مرات يتصرف بدون تفكير، صار عدنا تسجيل صوتي وأن شاء الله يجي الدليل بعد حتى من نلقي عليه القبض يروح محاكمة ومحد يكدر يتنازل عنه.

لائِث: ايا ملعون اي والله وانا اكول منك من الشيطان تجيبني لدجلة بهل الليل طلعت تريد تاخذني وياك علمود شغلتك.

هَيْصَم: كُل مانقوم به هو لخدمة الوطن.

لائِث: ذكرتني بناعماً منعماً، هو شبقى منه وطنه متكلي تاه بيد الحرامية والما يخافون الله.

هَيْصَم: نأدي العمل هذا واجبنا وغصباً علينه نلقي القبض على كل الحرامية واللي يتاجرون بأرواح الناس.

لائِث: شغل اغنية وطنية اريد يصعد عندي الحماس.

هَيْصَم: انزل عزيزي وروح كمل طريقك وعوف حماسك على صفحة مايفيدني تأخر الوقت اريد ارجع للبيت، وذكرك كدامهم اني وياك بينه قضية قتل هيج تعاملني.

لائِث: هاي اخلاقك عزيزي مو اخلاقي.

هَيْصَم: عمت عينك وعين أخلاقك ابو أخلاق امشي روح خلصني منك.

لائِث: قبل ماروح اخوك مو تخرج لو اني غلطان؟

هَيْصَم: ليش تريد تنطي اختك؟

لائِث: سألتك سؤال جاوب مثل الأوادم بدون هاي اللغوة الزايدة مالتك.

هَيْصَم: راد يرجع واني كتله ابقى خلي تخلص قضيتنا وطمأن عليه يلا.

لائِث: هو ما يعرف شي من الصار مو؟

هَيْصَم: معرفته مراح تسوي شي بس ينحرك كلبه لا أكثر، عوفه بعيد وسعيد احسن من ما قريب ومتأذي واني ما ناقص.

لائِث: وصلني لدجلة خويه خليني اروح لسيارتي ومناك ارجع للبيت.

هَيْصَم: باجر اخذ ريهاف للبيت يم أمي وآمندا.

لائِث: ليش شكو صاير شي؟

هَيْصَم: خليهن ذني اليوم كلهن سوه قريبين بيت خالتي علمود حماية وحده كل شي يصير مادري، كل الهَمْاس هم ياخذ آريا للبيت، وصلوهن بسيارتكم ومن يدخلن للبيت يلا ترجعون ولتخلي احد يشوفكم لأن انتوا كلكم مراقبين مثلي اي حركة يضيع الأول والتالي.

لائِث: اويلي شكد اخرب على الاكشن دلل من عنيا ياباشا.

هَيْصَم: انزل، انزل لتصيرلي عادل إمام بعدين.

لائِث: سلمنا.

هَيْصَم: يوصل ان شاء الله وانت سلملي بطريقك.

: نايمة بسابع نومه وشلون حلم يجننن، فزيت على حركة قريبه فتحت عيوني مرعوبه بسرعة صارت أيده على حلكي مانعني احجي...

يتبع..

البارت 4143 كلمة..

التفاعل مالتكم يبجي حماسكم واضح كلش شمعاتي..

مسائكم عافية وخير وجمعة مباركة يارب..

لأي شي يخص القصه تعالوا يمي انستا..