تحميل رواية «جثة نبوية» PDF

ن

الجريمة المره دي غريبة، ليه بقول غريبة؟!

عشان دي اول جريمة قتل وسط جرايم خطف اطفال وانتحار ستات وشباب بدون اي سبب وفي وسط ما احنا مسحولين في المحاضر والتحقيقات والتحريات، يجي بلاغ لرجال الشرطة من واحده اسمها سوزان وكانت بتقول في البلاغ انها دخلت البيت لقيت امها مقتولة ومرمية على الارض.. اتحركت قوه من القسم على مكان البلاغ.. وهناك لقيوا جثه ست في الخمسينات من عمرها واقعة على الارض وراسها متهشمة تماماً.. واضح ان القاتل ضربها على دماغها أكتر من مرة لحد ما وصلها للمرحله دي

ولكن اللي مكنتش اعرفوا ان موت الست دي هيكون كلمه السر في كل الجرايم اللي بتحصل.

...

انا المقدم حمزة.. القوه اللي وصلت لمكان البلاغ كانت بقياده الرائد خالد عبد الفتاح وانا وصلت المكان متأخر، ولما دخلت لقيت رجاله الطب الشرعي بتفحص الجثة ورجاله المعمل الجنائي بيفحصوا مسرح الجريمة.. قربت من الجثة واللي كانت ست في الخمسينات من عمرها مقتولة وواضح استخدام العنف في الجريمة.. اتحركت في المكان ووقتها لمحت بنت في العشرينات كانت واقفه على جنب وبتبكي قربت منها وعرفت منها ان الست دي تبقى والدتها وانها هي اللي قدمت البلاغ.. الوالده اسمها نبوية وعلى حسب كلام بنتها انها كانت في حالها خالص ومش بتتكلم مع حد، ولكن في الفترة الاخيرة.. بدأت تكون عصبية ومش عارفه ايه السبب؟

خلصت كلام مع البنت اللي واقفه واللي كان اسمها سوزان واتحركت ناحيه دكتور الطب الشرعي اللي كان بيفحص الجثة بص ناحيتي وهز دماغه وقال

_ انا متاكد ان القاتل ده، قتل بغرض الانتقام لانه ضربها بغل في راسها لحد ما قتلها، والتشخيص المبدئي يخليني اقول لك ان اللي قتل شخص قريب منها ومش بعيد، لان الضربه الاولى كانت في الوش وده بيرجح احتمالية المجني عليها كانت تعرف القاتل والا كانت هترفض تدخله البيت..

= كلام الدكتور كان منطقي، وعشان كده سبته يكمل شغله وبعد مخلص اتكلم وقال

_ الجثة هتتنقل للمشرحة عشان ناوي ابدأ تشريح فيها على طول، وفي اقرب وقت هيكون التقرير عندك

شكرت الدكتور وبعد شوية رجاله المعمل الجنائي والطب الشرعي خلصوا واتنقلت الجثة للمشرحة عشان التشريح، لكن رجاله المعمل الجنائي مقالوش عن اي ملاحظات في المكان

...

رجعت على مكتبي وانا الصداع هيفرتك دماغي ولحد دلوقتي عندي اربع بلاغات عن اختفاء اطفال، ده غير انتحار شاب وست في اوائل التلاتينات ومفيش اسباب لانتحارهم

دخل عليا الرائد خالد وهو عارف اني تعبان ووقتها طلبت منه تحريات عن الست نبوية وكل معارفها وقرايبها والعدوات، وكل حاجه بنطلبها في اي تحريات عن جريمة قتل.. وعلى طول بدا الرائد خالد شغل مع رجاله البحث الجنائي عشان نوصل للقاتل في اقرب وقت

وبعد حوالي 48 ساعة داخل علي الرائد خالد وفي ايده ملف التحريات الخاص بالست نبوية.. الست نبوية كانت عايشة لوحدها هي وبنتها سوزان ومعندهاش قرايب غير ابن اختها سليم وده عايش في اسكندرية من فترة كبيرة ومتجوز ومستقر هناك، وملهاش اي عدوات او مشاكل مع حد

ولكن الست نبوية عندها بيت تاني غير البيت ده، وعلى حسب التحريات هي بتخرج كل يوم وبتروح على البيت التاني ده، ومحدش عارف هي بتعمل ايه هناك، وفي ناس كتير قالت انها مربية طيور وبتبيع منهم وبتسترزق

...

ملف التحريات مزودش اي حاجة، وخلى في غموض حوالين الست نبوية بس انا مش عارف ليه كنت حاسس ان البيت اللي هي بتتردد عليه ده وراه حاجه، وعشان كده جبت اذن من النيابة بتفتيشه عشان نعرف ايه اللي جواه عشان الست نبوية تتردد عليه كل يوم.. وفعلا بعد وصول اذن النيابة اتحركنا على هناك واقتحمنا البيت واول ما دخلنا شمينا ريحه صعبة أوي، أشبه بريحة عفن وده اللي خلاني انا والرائد خالد نطلع مناديل ونحطها على بوقنا ومناخيرنا من كتر ما الريحة بشعة

وطلبت من العساكر تفتح اي شباك على الشارع عشان الريحه دي تخف شوية، وبعد ما عملنا كده بدأنا تفتيش البيت حتة حتة وفي البداية كان الموضوع مقتصر عن شوية طيور ميتة، وقولت جايز تكون هي اللي عامله الريحة دي، ولكن في اوضه دخلها الرائد خالد ووقتها لقيته بينده عليا ولما دخلت الأوضة اتصدمت

عشان الاوضه كان فيها عظام بشرية ده غير ان احنا لقينا اربع جثث لاطفال.. ودول نفس الاطفال اللي اختفوا واللي اهاليهم قالبين الدنيا عليهم وعاملين محاضر باختفائهم

ومن كل حاجة حواليا.. كان الاستنتاج حاجة واحده بس ومش عاوزه تفكير.. الست نبوية دي كانت دجاله وبتعمل سحر وكانت بتأذي الناس بس ليه تخطف اربع اطفال وتقتلهم؟!.. وهل هي السبب في الراجل والست اللي انتحروا كمان؟!

الدنيا اتقلبت ووكيل النيابه جيه وبص على البيت واللي جواه، وكان مذهول من كل حاجه شايفها

الجثث اتنقلت على المشرحة.. وبلغنا اهالي الاطفال ان احنا لقينا عيالهم ولما الاهالي وصلت القسم مكنتش عارف اقولهم ايه؟!

الناس كانت مستنيه تسمع مني كلمة تطمن بيها على عيالها ولكن لما طلبت من الرائد خالد ياخدهم على المشرحة سمعت الصراخ واللي ضرب على دماغه، واللي وقعت من طولها.. وفي الوقت ده كنا قبضنا على سوزان بنت الست نبوية اللي كانت مش فاهمه اي حاجة وكانت بتنكر معرفتها بالبيت ده وعلى حسب الكلام اللي قالته في التحقيقات انها بتشتغل في محل ملابس من الساعة 9 الصبح للساعة 7 بليل وبعدها بتروح وبتلاقي امها في البيت، ولما واجهناها باللي كانت بتعمله كانت رافضة انها تصدق

...

وبعد 24 ساعة ظهر تقرير الطب الشرعي وتقرير المعمل الجنائي الخاص بجثة الست نبوية واللي كان مكتوب في تقرير الطب الشرعي يتماشى مع التقرير المبدئي للدكتور اثناء فحص الجثة في مسرح الجريمة.. وانها تعرضت لضربه في الوش في البداية ولكن الضربه اللي ادت للوفاه هي الضربة اللي من ورا واللي كانت بآلة حادة.. اما تقرير المعمل الجنائي فمكنش فيه اي حاجة تدل على شخصية القاتل حتى البصمات اللي في مسرح الجريمة هي بصمات الست نبوية بس

قفلت التقرير وفي الوقت ده دخل عليا الرائد خالد بسرعة وأتكلم وقال

_ انا عملت تحريات عن الصور اللي كانت موجوده في بيت نبوية التاني، والمفروض اصحاب الصور دي هما اللي بيتعملهم اعمال سحر وقرف

= تمام ايه المشكلة؟

_المشكلة في الصورة دي، صاحبة الصورة دي تبقى مرات سليم ابن اختها، واللي عايش دلوقتي في اسكندرية، وبنسبه كبيرة الست دي بتعاني من حاجة دلوقتي او ممكن تكون عملت في نفسها حاجة

...

بعد ما سمعت الكلام من الرائد خالد، قررت اني هسافر اسكندرية عشان اقابل الاستاذ سليم بنفسي والحق واحده من حاله انتحار او من مصيبه ممكن تعملها بسبب السحر والقرف

وطلبت من الرائد خالد يخليه هنا لحد ما ارجع، جبت العنوان بتاعه من التحريات وسافرت اسكندرية وكان ساكن في منطقه خالد بن الوليد واول ما وصلت هناك ومشيت على العنوان لقيت نفسي قدام عماره مكونه من ست ادوار.. قربت من البواب وسألته عن شقه الاستاذ سليم وعرفت انها في الدور الرابع

ولقيت البواب بيشاورلي على البلكونة اللي كانت واقفه فيها ست وكانت شايله بنت صغيره عندها حوالى اربع سنين.. حمدت ربنا انها بخير وكنت لسه هطلع عشان اقابل الاستاذ سليم لكن فجأة حصلت حاجة خلتني مصدوم ومش عارف اتحرك من مكاني

الست اللي هي المفروض مرات الاستاذ سليم من غير سبب وبدون سبق انذار رمت بنتها من الدور الرابع ونطت وراها.. اتجمدت في مكاني ومكنتش مصدق اللي شوفته وفجأة...

لقيت في عربية وقفت قدام البيت، ونزل منها راجل وسمعت البواب بيقوله يا استاذ سليم، الراجل كان مصدوم وهو شايف مراته وبنته مرميين على الارض قدامه والاتنين ميتين وغرقانين في دمهم.. كان بيصرخ وبيحضن فيهم.. وفي لحظة ناس كتير اتجمعت عشان يشوفوا المنظر البشع ده

وانا كنت واقف مكاني مش عارف اعمل ايه؟!.. انا لسه مصدوم من اللي عملته الست دي، ومستحيل اللي بيحصل ده يكون طبيعي.. والسؤال اللي كان بيدور في دماغي

ليه الست نبوية تعمل عمل لمرات ابن اختها؟... ايه المشاكل اللي ما بينهم اللي توصل الموضوع للاذى ده

الشرطة وصلت المكان وبدأنا نبعد الناس عن موقع الحادث واتحطت شرايط تحذيرية عشان محدش يقرب، ووصل فريق من الطب الشرعي والمعمل الجنائي ووقتها قابلت المقدم عادل واللي ماسك في مديرية امن اسكندرية

سلمت عليه وعرفته بنفسي وكان مستغرب وجودي في اسكندرية ولكن انا فهمته ان انا هنا عشان قضية تخص الاستاذ سليم اللي مراته رمت بنتها من فوق وانتحرت وحكيتله كل حاجة شوفتها لما وصلت قدام العمارة.. وبعد ما خلصت كلام كان لازم المقدم عادل يطلع الشقة بتاعتهم عشان يشوف هل الموضوع انتحار ولا جريمة قتل؟!

ورغم اني ما ليش حق اطلع معاه ولكن الراجل كان ذوق وسمحلى اكون معاه.. طلعنا الشقه اللي كانت منظمة ومترتبة ومفيش اي حاجه تدل انه في سرقه حصلت او في جريمة قتل حصلت

اتمشيت في الشقه كلها مع المقدم عادل لحد ما دخلنا اوضة النوم ووقتها لقينا ادوية اكتئاب موجوده في درج الكمودينو، ولقيت المقدم عادل بص ناحيتي وقال

_ واضح ان المجني عليها كانت بتمر بظروف صعبه الايام اللي فاتت، بس المشكله ان الادويه دي بتعمل مشاكل صحية وبتأثر على الاعصاب ومن الواضح كده انها كانت بتمر بحاله نفسيه صعبة

= انا مش متعود استعجل، انا اصلا كنت جاي للاستاذ سليم عشان الموضوع ده، وهتعرف كل حاجه بعد ما اتكلم معاه واشوف رده فعله

_ في الحقيقه انا مش فاهم حاجه، بس ماشي زي ما تحب

...

نزلنا من الشقة وكانت رجاله الطب الشرعي والمعمل الجنائي خلصوا شغلهم.. الكل كان بيحاول يهدي الاستاذ سليم اللي كان منهار تماماً واستنيت اسبوع بحاله عشان اقدر احقق معاه واشوف رد فعله في موضوع قتل خالته نبوية، وبعد ما الاسبوع ما خلص قعدت مع الاستاذ سليم عشان نتكلم

_ استاذ سليم البقاء لله، انا عارف حضرتك بتمر بايه بس بعد اذنك ساعدنا لان الموضوع كبير مش صغير

= انا تحت امرك اسال وانا هجاوبك على اي سؤال

_ في البداية ايه مدى علاقتك مع خالتك نبوية؟!.. وهل انت على علم انها اتقتلت ولا الخبر لسه موصلش؟!

= لا لسه عارف من حضرتك دلوقتي، اتقتلت ازاي؟!

_ في حد دخل عليها وضربها على دماغها بآلة حادة أكتر من مرة، بس كنت عاوز اعرف مدي علاقتك بيها، واخر مره شوفتها كانت امتى؟

= علاقتي اتقطعت بخالتي من مده كبيرة اوي، اصل انا كنت خاطب بنتها سوزان ولكن مكنتش مرتاح معاها وعشان كده فسخت الخطوبة وطبعا هي زعلت وحاولت اراضيها كتير بس هي كانت بترفض كل مرة، وبعد ما اتجوزت وخلفت تقريبا مسافرتش القاهره غير مره واحدة عشان شغلي، وكانت من كام يوم بس مروحتش ناحية بيت خالتى

_ طيب وعلاقه سوزان بوالدتها كانت عامله ازاي؟!.. بما انك كنت خطيبها يعني؟

= بصراحه العلاقه ما بينهم كانت صعبة شوية، وخصوصا بعد ما رفضت خالتي نبوية انها تكتب البيت القديم بتاعها لسوزان، اصل البيت القديم ده بيمثل لسوزان كل حاجه لانه كان بيت والدها الله يرحمه

...

كلام الاستاذ سليم خلاني اتأكد ان سوزان كذبت علينا، خصوصا انها قالت في التحقيقات انها متعرفش اي حاجة عن البيت ده، بصيت للاستاذ سليم وطلبت منه يكمل فقال

= بس الموضوع ده كان عامل خلاف كبير ما بين سوزان وخالتي

ودي كل حاجة اعرفها

_ طيب تعرف انه خالتك كانت شغاله في السحر والاعمال وشغل الشعوذه ده ولا متعرفش؟!

= عشان اكون صريح مع حضرتك، ده سبب من الاسباب اللي خلاني افسخ الخطوبة.. ولما واجهت سوزان قالت ان هي ملهاش ذنب في اللي بتعمله والدتها ولكن انا صممت على فسخ الخطوبة

_ طيب تعمل ايه لو اكتشفت ان خالتك هي اللي ورا موت مراتك وبنتك.. وقبل ما تتعصب احنا لقينا صوره مراتك في وسط الاعمال والقرف اللي كانت بتعمله خالتك وانا كنت جاي عشان اشوفكم بعد ما في ناس كتير في البلد اتاذت بسببها، ولكن للاسف ملحقتش

وحصل اللي حصل.. بس لو افترضنا انك كنت عارف مكنتش هتفكر في الانتقام من خالتك نبوية؟

....

الصدمة كانت على وشه واتكلم وقال عن حاله مراته في الفتره الاخيره واللي كانت فعلا مش طبيعية وكل الناس طلبت منه يعرضها على طبيب نفسي، وفعلا هو عمل كده.. ولما حسيته انه بدأ ينهار، طلبت منه يروح ونكمل تحقيق في وقت تاني

...

على حسب كلام سليم سوزان كذابه في كل حاجه قالتها.. هي قالت متعرفش حاجة عن البيت وقالت كمان انها ما تعرفش ان والدتها كانت بتعمل سحر واعمال، وكذبها ده بيخليها المتهم الرئيسي في قتل والدتها، اصل لو موقفها سليم هتكذب ليه؟!

في الوقت ده طلبني العميد كرم في مكتبه عشان يعرف اخر تطورات القضية ولما حكيت اللي عندي كان رد فعله متوقع، اتعصب عليا وقال

_ انا طلبت اسمعك عشان وصلني كلام انك بتخرف يا حضره الظابط، عفاريت ايه وسحر وجن ايه؟!.. احنا من امتى بنمشي ورا التخاريف دي؟!.. احنا عندنا واحدة اتقتلت ودورنا نعرف مين اللي قتلها، مش هي كانت بتعمل اعمال لمين؟!

قدامك اسبوع لو معرفتش تقبض على اللي عملها القضيه هتروح لحد تاني وده مش هيكون كويس علشانك

...

خرجت من مكتب العميد كرم وانا على اخري، كان نفسي اطلع غلي في حد... وفي الوقت ده قابلت الرائد خالد طلبت منه يعمل تحريات عن سليم ابن اخت الست نبوية وان التحريات دي تكون على مكتبي في اسرع وقت

وبعد 24 ساعة وصلت التحريات فتحت الملف وبدأت اقرأ فيه واللي لاحظته كان حاجه غريبة شوية، وهي الجوازة اللي اتجوزها سليم.

على حسب التحريات سليم من عيلة فقيرة ومراته من عيله غنية اوي ومعروفة.. وكان السؤال اللي يخلي واحده مثقفة ومتعلمة وغنية تبص لواحد اقل منها بالشكل ده، وقبل ما حد يقولي عادي وبتحصل، هقولك مش في الواقع ده في المسلسلات والافلام

وسليم كان على خلافات مع مراته والموضوع وصل قبل كده انه طلقها ولكن رجع ردها تاني.. ولكنه مذكرش ده في التحقيقات

...

شخصية سنين بالنسبالى كانت مريبة وكنت حاسس انه مخبي حاجة.. ولكن انا مكنتش ناسي سوزان اللي كذبت علينا في كل حاجه قالتها.. وكان لازم استدعيها عشان نحقق معاها

ولكن في الوقت ده وصلني بلاغ من جيران سوزان انها حاولت تنتحر وتولع في نفسها وان الجيران تدخلوا ولحقوها ولكن البيت بيتحرق.. بسرعة اتحركت وكان معايا قوه على البيت اللي اتقتلت في الست نبوية ولما وصلنا هناك كان في اجزاء اتحرقت من البيت ولكن الناس قدرت تسيطر على الحريق.. مش عارف ليه وقفت قدام الدولاب بتاع سوزان وكانت جوايا مليون حاجه بتطلب مني افتحه.. كان احساس غريب اول مره احس بيه في اي جريمه حققت فيها.. مديت ايدي وفتحت الدولاب واتصدمت لما لقيت اخر حاجة كان ممكن اتوقعها.. حاجه عرفتني مين هو القاتل؟...

كان شاكوش غرقان دم.. أداة الجريمة اللي اتقتلت بيها الست نبوية بصيت لسوزان اللي كان على وشها الصدمة لما لقيت الشاكوش ده طالع من دولابها.. وخلاص عرفنا مين اللي قتل الست نبوية.. كانت اخر حاجه كان ممكن اتوقعها ان البنت هي اللي قتلت امها.. قبضنا عليها وحرزنا سلاح الجريمة

وبعد اقل من ساعة كانت واقفه قدامي في المكتب.. ساكته ومصدومة وكانت فاكرة انها لما تنتحر هترتاح من عذاب الضمير وجايز ربنا يسامحها.. ولكن ده وهم بيحاول بيه دايما المجرم انه يقنع بيه نفسه.. ويحط مبررات عشان يقنع بيها غيره

بصيت لسوزان اللي كانت عاوزه تتكلم ولكن في حاجة منعاها وقولتلها

_ احنا كده كده كنا هنستدعيكي، عشان اكتشفنا انك كدبتي علينا، في كل حاجه قولتيها.. ولكن موضوع محاوله انتحارك واكتشاف سلاح الجريمة في بيتك، خلى الموضوع اسهل شوية وبدل ما كنا هنسألك كدبتي ليه؟.. دلوقتي السؤال هيكون قتلتي امك ليه؟

فضلت ساكته ومش عاوزه تتكلم، حاولت معاها كتير بس كانت ساكته.. لحد ما جبت قدامها سيرة سليم وعرفتها ان هو اللي كشف كذبها.. نظره الانكسار اللي في عينيها اتحولت لنظره صدمه عيطت وانهارت وكانت بتقول حسبي الله ونعم الوكيل.. بس انا كنت شايف ان اللي بتعمله ده ما الا محاوله عشان تكسب بيها التعاطف.. سبتها تمثل الانكسار شوية لحد ما هديت وقالت

= هو انا لو اتكلمت حضرتك هتصدقني؟

_ هصدقك بس خليكي صريحه معايا من البداية، واحكي ايه اللي حصل بالظبط، وصدقيني لو كلامك اللي هتقوليه دلوقتي طلع مظبوط انا هقف جنبك في القضية

= انا ما قتلتهاش.. والله العظيم ما قتلتها، انا رجعت البيت لقيتها مقتولة بس كل اللي اقدر اقوله لحضرتك ان اللي قتلها هو سليم، عشان هو ملتزمش بالاتفاق مع امي، سليم هو السبب في كل حاجه وحشه حصلتلنا.. وهو السبب ان مش هعرف اعيش زي اي بنت واتجوز

_ لا واحده واحده عليا كده، وفهميني ايه الاتفاق اللي كان بين سليم ووالدتك، وتقصدي ايه بانك مش هتعرفي تعيشي زي اي بنت؟!

= حاضر انا هقول كل حاجة.. انا وسليم كنا مخطوبين لبعض زمان رسم عليا دور الحب وانا صدقته، بس مكنتش متخيلة ان الحب ده هيكون لعنة والشخص اللي حبيته هيعمل فيا كده، للاسف سليم ضحك عليا وانا غلطت، والله العظيم عارفه اني غلطت ولما والدتي عرفت قالت ان هو لازم يكتب عليا في اقرب وقت ولكن هو كان بيحاول يتهرب لحد ما في يوم عرفنا انه هيتجوز بنت من بنات الاكابر عيشتها مرتاحة.. وقتها والدتي كلمته بس هو اقنعها مش عارفه ازاي؟!.. ان هو متجوزها مصلحة عشان ياخد منها فلوس وبعد كده يطلقها ويرجع يتجوزني، وللاسف هي صدقته ولكن ده ما حصلش.. وسليم خلف من مراته بنت واختفى وقفل تليفوناته والاتفاق اللي كان بينه وبين امي.. انها تعمل سحر لمراته الجديدة عشان تموت ولكن لما امي حست بالغدر خصوصا لما خلف منها عملت عمل لمراته ولكن مش بالموت بالجنون.. وبقت خطر على بنتها.. واخر مرة شوفته فيها كانت قبل الحادثه بكام يوم هددنا احنا الاتنين ان الموضوع بتاع السحر لو متحلش، هيفضحني وهيخلي سيرتي على كل لسان

دي كل حاجه اعرفها.. وبعد كده رجعت لقيت امي مقتوله بعدها بيومين.. والله العظيم هو ده اللي حصل

...

كنت بسمع كلام سوزان وانا مصدوم من تفكير الشيطان ده، اتجوز واحده غنيه عشان تموت ويكوش على اللي وراها واللي قدامها بالاتفاق مع خالته اللي كانت المفروض تعملها سحر بالموت.. وعرفت من سوزان ان والدتها كانت بتعمل سحر وبتاذي ناس كتير وان الاطفال كانت قرابين عشان الاتفاق يتم ما بينها وما بين الجن

وطبعا الكلام الاخير ده مش هكون مهتم بيه، انا اللي يهمني دلوقتي هو كلام سوزان عن سليم اللي استدعيناه بعد ما سمعنا كلامها.. واول ما جه وقعد قدامي بدأت اواجهوا بكل كلام سوزان واتهامها ليه بان هو اللي قتل والدتها.. فضحك وقال

_ ده كلام فارغ.. البنت دي طول عمرها متعوده على الحوارات والكذب، انا كنت خاطبها بس ما حصلش بيني وبينها اي حاجة ولا كان في اي اتفاق بيني وبين خالتي عشان اخلص من مراتي، وهي بتقول الكلام ده عليا دلوقتي عشان تهرب من تهمة قتل والدتها وعلى حسب كلام حضرتك، سلاح الجريمه كان خارج من دولابها فانا ايه دخلى بالموضوع

= يعني حضرتك بتنكر كل الكلام ده، جميل احنا هنواصل التحقيق وهنعمل تحرياتنا بس انا بقولك لو انت اللي عملتها اعترف عشان صدقني انا مش هسيب حد مظلوم يتاخد في الرجلين، وكل قضيه انا مسكتها اتحاسب فيها الجاني عن عملته وعمري ما ظلمت حد ولو هي بريئه وانت اللي عملتها صدقني هجيبك وهتتحاسب

...

كان بيحاول يظهر انه واثق في نفسه، ولكن انا كنت حاسس انه بيكدب.. البصمات اللي على سلاح الجريمه كانت ممسوحه ولو جيت فكرت في الموضوع بشكل منطقي هلاقي انه مستحيل انه سوزان هي اللي قتلت امها، ببساطة ايه الذكاء انك تقتل حد وتخلي سلاح الجريمة في مكانك، واللي حصل ان اللي قتلها هو اللي دس سلاح الجريمه في دولاب سوزان

وبعد ما عملنا التحريات اتاكدنا انه كذب علينا، وانه فعلا راح زار خالته قبل ما تتقتل بيومين.. وهنا كانت النقطه اللي انا ضغطت عليه بيها عشان يعترف وكذبت عليه عشان اشوف التوتر هيبان عليه ولا لا لما قولتله

_ القاتل ممسحش البصمات كويس من على سلاح الجريمة وفي بصمه فضلت موجودة.. ولما طابقنا البصمه دي ببصمات سوزان

طلع انه مفيش تطابق، وده معناه ان سوزان بريئه من قتل والدتها وعشان كده احنا هناخد منك دلوقتي فيش وتشبيه عشان نشوف بصماتك هتتطابق مع البصمه اللي على سلاح الجريمه ولا لا؟

التوتر بان عليه.. ورفض وقال ان هو بريء وانه مش هيعمل اي حاجة.. خلاني ضغطت عليه وخلاه اتكلم وقال

= ايوه انا اللي قتلتها، قتلتها عشان حولت السحر من موت لجنون، وانقذت بنتي من ايد امها كذا مرة بسبب السحر ده اللي خلاها مجنونة وشايفه بنتها عدوتها.. انا اه كنت عايز اخلص من مراتي عشان اكوش على الفلوس كلها اللي عندها، بس كنت عاوز اعيش مع بنتي وعشان بنتها اللي انا غلطت معاها وبرضاها على فكره مش غصب عنها، غيرت الاتفاق

ولما روحت هددتها كنت فاكر انها تخاف ولكن ده محصلش، فاضطريت اخلص عليها وكنت فاكر زي ما سمعت انه لو مات الساحر بينتهي السحر، ولكن السحر منتهاش وبنتي ومراتي ماتوا بسبب السحر اللي عملته خالتي

انا كنت رايح اتفاهم معاها والشاكوش كان عندها، مكنش عندي نيه القتل ولكن هي كانت مستفزه وقالت انها مش هتفض السحر وهتفضل تتفرج لحد ما مراتي تخلص على بنتي.. اتعصبت ومقدرتش امسك نفسي عيني وقتها وقعت على شاكوش موجود على ترابيزه الصالة كانت بتستخدمه قبل ما ادخل مسكته وضربتها اول ضربة وبعدها محسيتش بنفسي غير وانا بضربها كذا مرة لحد ما اتاكدت انها ماتت.. انا عارف اني خلاص هتعدم ولو سالتني انت ندمان هقولك اه، يا ريت الايام ترجع وانا ساعتها والله كنت هتجوز سوزان وهرضي بفقري وهقول الحمد لله

= ويفيد بايه الندم، ما خلاص اللي حصل حصل، وانت في النهاية اخترت طريقك.. يا ريت تدعي ربنا يسامحك على الذنب اللي انت ارتكبته

....

اتحول سليم للنيابة اللي امرت بحبسه وبعدها حولته للمحكمة وبعد ما أعترف بجريمته قدام الكل اتحكم عليه بالاعدام لانه قتل عمد مع سبق الاصرار والترصد

ويمكن المظلوم في القضية دي هي مراته وبنته اللي ملهمش ذنب في كل حاجة حصلت.

انتهت احداث الرواية نتمني أن تكون نالت اعجابكم وبانتظار آراءكم في التعليقات