كان شاكوش غرقان دم.. أداة الجريمة اللي اتقتلت بيها الست نبوية بصيت لسوزان اللي كان على وشها الصدمة لما لقيت الشاكوش ده طالع من دولابها.. وخلاص عرفنا مين اللي قتل الست نبوية.. كانت اخر حاجه كان ممكن اتوقعها ان البنت هي اللي قتلت امها.. قبضنا عليها وحرزنا سلاح الجريمة
وبعد اقل من ساعة كانت واقفه قدامي في المكتب.. ساكته ومصدومة وكانت فاكرة انها لما تنتحر هترتاح من عذاب الضمير وجايز ربنا يسامحها.. ولكن ده وهم بيحاول بيه دايما المجرم انه يقنع بيه نفسه.. ويحط مبررات عشان يقنع بيها غيره
بصيت لسوزان اللي كانت عاوزه تتكلم ولكن في حاجة منعاها وقولتلها
_ احنا كده كده كنا هنستدعيكي، عشان اكتشفنا انك كدبتي علينا، في كل حاجه قولتيها.. ولكن موضوع محاوله انتحارك واكتشاف سلاح الجريمة في بيتك، خلى الموضوع اسهل شوية وبدل ما كنا هنسألك كدبتي ليه؟.. دلوقتي السؤال هيكون قتلتي امك ليه؟
فضلت ساكته ومش عاوزه تتكلم، حاولت معاها كتير بس كانت ساكته.. لحد ما جبت قدامها سيرة سليم وعرفتها ان هو اللي كشف كذبها.. نظره الانكسار اللي في عينيها اتحولت لنظره صدمه عيطت وانهارت وكانت بتقول حسبي الله ونعم الوكيل.. بس انا كنت شايف ان اللي بتعمله ده ما الا محاوله عشان تكسب بيها التعاطف.. سبتها تمثل الانكسار شوية لحد ما هديت وقالت
= هو انا لو اتكلمت حضرتك هتصدقني؟
_ هصدقك بس خليكي صريحه معايا من البداية، واحكي ايه اللي حصل بالظبط، وصدقيني لو كلامك اللي هتقوليه دلوقتي طلع مظبوط انا هقف جنبك في القضية
= انا ما قتلتهاش.. والله العظيم ما قتلتها، انا رجعت البيت لقيتها مقتولة بس كل اللي اقدر اقوله لحضرتك ان اللي قتلها هو سليم، عشان هو ملتزمش بالاتفاق مع امي، سليم هو السبب في كل حاجه وحشه حصلتلنا.. وهو السبب ان مش هعرف اعيش زي اي بنت واتجوز
_ لا واحده واحده عليا كده، وفهميني ايه الاتفاق اللي كان بين سليم ووالدتك، وتقصدي ايه بانك مش هتعرفي تعيشي زي اي بنت؟!
= حاضر انا هقول كل حاجة.. انا وسليم كنا مخطوبين لبعض زمان رسم عليا دور الحب وانا صدقته، بس مكنتش متخيلة ان الحب ده هيكون لعنة والشخص اللي حبيته هيعمل فيا كده، للاسف سليم ضحك عليا وانا غلطت، والله العظيم عارفه اني غلطت ولما والدتي عرفت قالت ان هو لازم يكتب عليا في اقرب وقت ولكن هو كان بيحاول يتهرب لحد ما في يوم عرفنا انه هيتجوز بنت من بنات الاكابر عيشتها مرتاحة.. وقتها والدتي كلمته بس هو اقنعها مش عارفه ازاي؟!.. ان هو متجوزها مصلحة عشان ياخد منها فلوس وبعد كده يطلقها ويرجع يتجوزني، وللاسف هي صدقته ولكن ده ما حصلش.. وسليم خلف من مراته بنت واختفى وقفل تليفوناته والاتفاق اللي كان بينه وبين امي.. انها تعمل سحر لمراته الجديدة عشان تموت ولكن لما امي حست بالغدر خصوصا لما خلف منها عملت عمل لمراته ولكن مش بالموت بالجنون.. وبقت خطر على بنتها.. واخر مرة شوفته فيها كانت قبل الحادثه بكام يوم هددنا احنا الاتنين ان الموضوع بتاع السحر لو متحلش، هيفضحني وهيخلي سيرتي على كل لسان
دي كل حاجه اعرفها.. وبعد كده رجعت لقيت امي مقتوله بعدها بيومين.. والله العظيم هو ده اللي حصل
...
كنت بسمع كلام سوزان وانا مصدوم من تفكير الشيطان ده، اتجوز واحده غنيه عشان تموت ويكوش على اللي وراها واللي قدامها بالاتفاق مع خالته اللي كانت المفروض تعملها سحر بالموت.. وعرفت من سوزان ان والدتها كانت بتعمل سحر وبتاذي ناس كتير وان الاطفال كانت قرابين عشان الاتفاق يتم ما بينها وما بين الجن
وطبعا الكلام الاخير ده مش هكون مهتم بيه، انا اللي يهمني دلوقتي هو كلام سوزان عن سليم اللي استدعيناه بعد ما سمعنا كلامها.. واول ما جه وقعد قدامي بدأت اواجهوا بكل كلام سوزان واتهامها ليه بان هو اللي قتل والدتها.. فضحك وقال
_ ده كلام فارغ.. البنت دي طول عمرها متعوده على الحوارات والكذب، انا كنت خاطبها بس ما حصلش بيني وبينها اي حاجة ولا كان في اي اتفاق بيني وبين خالتي عشان اخلص من مراتي، وهي بتقول الكلام ده عليا دلوقتي عشان تهرب من تهمة قتل والدتها وعلى حسب كلام حضرتك، سلاح الجريمه كان خارج من دولابها فانا ايه دخلى بالموضوع
= يعني حضرتك بتنكر كل الكلام ده، جميل احنا هنواصل التحقيق وهنعمل تحرياتنا بس انا بقولك لو انت اللي عملتها اعترف عشان صدقني انا مش هسيب حد مظلوم يتاخد في الرجلين، وكل قضيه انا مسكتها اتحاسب فيها الجاني عن عملته وعمري ما ظلمت حد ولو هي بريئه وانت اللي عملتها صدقني هجيبك وهتتحاسب
...
كان بيحاول يظهر انه واثق في نفسه، ولكن انا كنت حاسس انه بيكدب.. البصمات اللي على سلاح الجريمه كانت ممسوحه ولو جيت فكرت في الموضوع بشكل منطقي هلاقي انه مستحيل انه سوزان هي اللي قتلت امها، ببساطة ايه الذكاء انك تقتل حد وتخلي سلاح الجريمة في مكانك، واللي حصل ان اللي قتلها هو اللي دس سلاح الجريمه في دولاب سوزان
وبعد ما عملنا التحريات اتاكدنا انه كذب علينا، وانه فعلا راح زار خالته قبل ما تتقتل بيومين.. وهنا كانت النقطه اللي انا ضغطت عليه بيها عشان يعترف وكذبت عليه عشان اشوف التوتر هيبان عليه ولا لا لما قولتله
_ القاتل ممسحش البصمات كويس من على سلاح الجريمة وفي بصمه فضلت موجودة.. ولما طابقنا البصمه دي ببصمات سوزان
طلع انه مفيش تطابق، وده معناه ان سوزان بريئه من قتل والدتها وعشان كده احنا هناخد منك دلوقتي فيش وتشبيه عشان نشوف بصماتك هتتطابق مع البصمه اللي على سلاح الجريمه ولا لا؟
التوتر بان عليه.. ورفض وقال ان هو بريء وانه مش هيعمل اي حاجة.. خلاني ضغطت عليه وخلاه اتكلم وقال
= ايوه انا اللي قتلتها، قتلتها عشان حولت السحر من موت لجنون، وانقذت بنتي من ايد امها كذا مرة بسبب السحر ده اللي خلاها مجنونة وشايفه بنتها عدوتها.. انا اه كنت عايز اخلص من مراتي عشان اكوش على الفلوس كلها اللي عندها، بس كنت عاوز اعيش مع بنتي وعشان بنتها اللي انا غلطت معاها وبرضاها على فكره مش غصب عنها، غيرت الاتفاق
ولما روحت هددتها كنت فاكر انها تخاف ولكن ده محصلش، فاضطريت اخلص عليها وكنت فاكر زي ما سمعت انه لو مات الساحر بينتهي السحر، ولكن السحر منتهاش وبنتي ومراتي ماتوا بسبب السحر اللي عملته خالتي
انا كنت رايح اتفاهم معاها والشاكوش كان عندها، مكنش عندي نيه القتل ولكن هي كانت مستفزه وقالت انها مش هتفض السحر وهتفضل تتفرج لحد ما مراتي تخلص على بنتي.. اتعصبت ومقدرتش امسك نفسي عيني وقتها وقعت على شاكوش موجود على ترابيزه الصالة كانت بتستخدمه قبل ما ادخل مسكته وضربتها اول ضربة وبعدها محسيتش بنفسي غير وانا بضربها كذا مرة لحد ما اتاكدت انها ماتت.. انا عارف اني خلاص هتعدم ولو سالتني انت ندمان هقولك اه، يا ريت الايام ترجع وانا ساعتها والله كنت هتجوز سوزان وهرضي بفقري وهقول الحمد لله
= ويفيد بايه الندم، ما خلاص اللي حصل حصل، وانت في النهاية اخترت طريقك.. يا ريت تدعي ربنا يسامحك على الذنب اللي انت ارتكبته
....
اتحول سليم للنيابة اللي امرت بحبسه وبعدها حولته للمحكمة وبعد ما أعترف بجريمته قدام الكل اتحكم عليه بالاعدام لانه قتل عمد مع سبق الاصرار والترصد
ويمكن المظلوم في القضية دي هي مراته وبنته اللي ملهمش ذنب في كل حاجة حصلت.
انتهت احداث الرواية نتمني أن تكون نالت اعجابكم وبانتظار آراءكم في التعليقات