تحميل رواية «جريمة أسرية» PDF

كنت قاعد في مكتبي في اول يوم ليا في مستشفى الامراض النفسية، وكان قدامي مجموعه من الملفات الخاصه بالحالات ولكن كانت كتير شوية، فقومت من مكان وروحت ناحيه الشباك وولعت سيجارة وفي اللحظه دي لمحت راجل قاعد في الجنينه بتاعة المستشفى وكان بيكرر جمله واحدة

بكره بنتي هتبقى عروسة.. بكره بنتي هتبقى عروسة

وفي الوقت ده دخل عليا عامل البوفيه واللي عرفت ان اسمه صلاح وهو من اقدم الموظفين هنا ولما لاحظ اني ببص على الراجل ده اتكلم وقال

_ لفت نظرك الراجل اللي هناك ده يا دكتور طه مش كده؟

= لماح يا عم صلاح.. فعلاً انا مركز مع الراجل ده وهو عمال يكرر في جملة واحدة بكره بنتي هتبقى عروسة

_ الله يرحمها بنته، يا عيني عليه اتجنن من ساعة ما ماتت

= شكلك كده عارف حكايته يا عم صلاح

_ ما فيش مريض هنا في المستشفى غير وانا عارف حكايته، انا راجل دقه قديمه هنا يا دكتور وسمعت كل الحكايات اللي تخطر على بالك وحكاية عمك شحاتة من اكتر الحكايات اللي اثرت فيا

= طيب احكي، احكي وانا هسمعك

_ اسمع يا سيدي

….

_ الراجل ده اسمه شحاتة كان متجوز وعايش حياة طبيعية مع مراته وبنته سلمى وابنه طارق، طارق هو كان الاكبر وكان بيشتغل في مستشفى ممرض والعيشه كانت مستقرة

شحاته في الوقت ده كان معاه ورشة تصليح سيارات وكانت الدنيا ماشية معاه بس كان عنده مشكله واحدة انه راجل مش مظبوط، كان بصباص يعني، وقاعد يعاكس في اللي طالعه واللي خارجة

ومراته الست عفاف كانت عارفه وساكته بمزاجها

لحد ما في يوم حصل خلاف ما بين شحاتة وعفاف وقرروا انهم لازم ينفصلوا.. الدخل طارق وحاول يحل المشكله اللي ما بين والده ووالدته ولكن الموضوع كان وصل لحيطه سد وما فيش حل غير الانفصال.. وفعلا حصل الانفصال في كل واحد بقي في حياته

في الوقت ده سلمى كان عندها 11 سنة غير اخوها اللي كان عنده 27 سنة في الوقت ده.. بس الغريب انه بعد ست شهور بالظبط شحاته اتجوز واحده تانية وكان اسمها سارة.. وعفاف اتجوزت واحد تاني اسمه شريف، وبدات الازمه وقتها على بنتهم اللي للاسف دفعت تمن العند ما بينهم

وبعد كذا قعدة من الاهل.. كان الاتفاق ان سلمى هتقعد اسبوع عند والدها واسبوع تاني عند والدتها

والحل ده كان مرضي لجميع الاطراف، والموضوع هدى والدنيا مشيت وبعد مرور سنة كاملة

يروح الاستاذ شحاته قسم الشرطة ويبلغ عن اختفاء بنته سلمى ويقول في البلاغ

: يا باشا انا بنتي كانت قاعده عند والدتها، والمفروض كانت رجعت من امبارح بس هي ملهاش اثر لحد دلوقتي كلمت والدتها وسالتها قالت انها خرجت من عندها وقالت راجع على البيت والمسافه ما بين بيت والدتها وبيتي 10 دقايق بس البنت مارجعتش وقالب عليها الدنيا من امبارح وما لهاش اي اثر

= طيب اهدى يا استاذ باذن الله هنلاقي بنتك

_ انا شاكك ان الراجل جوز امها ده عمل فيها حاجة، وانا بقول كده عشان بنتي قالتلي ان الراجل ده كان بيعملها معامله وحشه وبيزعق معاها وفي مره كان هيمد ايده عليها بس انا كلمت والدتها وقولتلها لو ده حصل تاني مش هخليكي تشوفي بنتك، وبصراحه من بعد كلامي ده والبنت قالت ان جوز امها تجنبها تماماً ومبقاش بيضايقها زي الاول

= طيب وبالنسبه لمعامله مراتك لبنتك كانت عامله ازاي؟!

_ ساره كانت بتعامل بنتي كويس، اصل ساره ربنا ما انعمش عليها بموضوع الخلفة فكانت بتعتبر بنتي سلمى بنتها وبتعاملها احسن معاملة

= يعني انت بتتهم، ان اللي متجوزه طليقتك هو اللي ورا اختفاء بنتك

_ انا ما اقدرش اتهم حد بحاجه، انا بحاول اساعد يا باشا مش اكتر

= طيب روح يا عم شحاته، وانا لو في حاجه جديدة هبلغك على طول ان شاء الله

….

رجع شحاته بيته في اليوم ده، وهو مرعوب على بنته كان بيطلع يمشي في الشوارع وينده عليها، والناس كلها كانت بتقول عليه انه اتجنن..لكن بعد مرور خمس ايام يجي بلاغ للشرطة من واحد من اهل المنطقه انه لقي جثة لبنت صغيرة في الخرابة وده مكان مهجور ما حدش بيقرب منه، رجال الشرطه اتحركت عن المكان ولما وصلوا شافوا جثة لبنت في نفس عمر سلمى ولكن كانت بملامح متشوهه.. وشها كان محروق وهدومها كانت متقطعة وحالتها كانت تصعب على الكافر

طبعا الدنيا اتقلبت، وفي رجاله طب شرعي ومعمل جنائي وصلوا المكان واتفحصت الجثة واتنقلت للمشرحة.. وجيه استدعي لعم شحاتة عشان يروح يشوف الجثة ويتعرف عليها وكمان لمدام عفاف والدتها وراح معاهم الاستاذ طارق اخوها، وللاسف اول ما شافوا الجثه التلاتة انهاروا لانهم اتاكدوا انها فعلا سلمى

الظابط خرجهم من التلاجة بالعافية.. وطارق كان منهار من العياط وكان بيقول للظابط

_ هما اللي قتلوها.. اقبض عليهم هما الاتنين هما السبب في موتها، اقبض عليهم

= اهدى يا استاذ طارق، انا مقدر تماماً اللي انت فيه.. احنا هنعمل تحقيقاتنا وهنعرف مين اللي عمل كده واوعدك في اقرب وقت هنقبض عليه وهياخد جزاته بس لازم تهدى انا محتاج مساعدتكم عشان نعرف مين اللي عمل في بنتكم كده

_ حسبي الله ونعم الوكيل فيهم، حسبي الله ونعم الوكيل

….

طارق كان شايف ان والده ووالدته هما السبب في اللي حصل، ووصول المشاكل للحيطه السد والطلاق كانت بداية الطريق لكل البلاوي اللي حصلت بعدها

الشرطة بدأت تحقق في الموضوع وعشان تبدأ صح كان لازم تحقق مع اقرب اطراف للموضوع.. وهما الاستاذ شحاتة والأستاذة عفاف

والاستاذ شريف والاستاذة ساره

وفي الوقت ده وصل للشرطة كذا بلاغ اختفاء وكل البلاغات كانت عن اختفاء اطفال، وهنا الشرطه اتاكدت ان المقصود بالخطف مش سلمى لوحدها ده واضح ان الموضوع شبكه كبيره

وقبل ما التحقيق ما يبدأ يجي بلاغ للشرطة عن حريقه في بيت وان الناس مش قادره تسيطر على الحريق، ولكن الموضوع مش في الحريقة الموضوع بعد ما خلصت الحريقة وقدر رجال المطافي يسيطروا عليها لقيوا جثث كتير محروقة جوه وباين عليها من حجمها انها جثث اطفال.. المنظر كان صعب واهل المنطقه كلهم اتلموا عند البيت ده وكل اللي مقدم بلاغ عن اختفاء ابنه او بنته راح هناك يجري عشان يشوفوا جثث عيالهم موجوده ولا لا

حاجه كانت تقطع القلب.. والصراخ ملي البلد كلها بس الغريبة ان ما حدش من اهل البلد كان عارف البيت ده يخص مين؟!

كل اللي كانوا يعرفوه انه بيت مهجور، وانهم مش بيشوفوا حد بيدخلوا خالص من زمان

ولكن لك ان تتخيل الشرطه لما عملت تحرياتها عن البيت طلع البيت باسم مين؟!

= باسم مين يا عم صلاح؟

_ البيت طلع باسم…

_البيت طلع باسم الاستاذ شحاته نفسه؟!

= نعم.. يعني شحاته هو اللي قتل بنته وقتل الاطفال دي كلها

_ كنت عارف انك هتقول كده يا دكتور، بس ما تستعجلش عشان الحكايه لسه ما خلصتش

= طيب اتفضل كمل يا سيدي، حصل ايه لما الشرطه اكتشفت ان البيت ده بيت الاستاذ شحاته

_ التحريات اللي اتعملت اثبتت ده وده بعد تفتيش البيت مره تانيه بعد الحريقة، ووقتها الشرطه لقيت ورقة كان فيها حرق كبير بس كان لسه فيها كلام ينفع يتقري، والورقه دي كانت عقد البيت وطبعا اول ما اتعرف ان البيت ده بيت الاستاذ شحاته الدنيا اتقلبت، وقتها الراجل كان قاعد في بيته حزين على بنته وقلبه بيتقطع عليها لكن فجأة لقي الشرطه داخله البيت وبتقبض عليه، ما حدش كان فاهم ايه اللي بيحصل بالظبط

واول ما وصلوا القسم.. دخلوا الاستاذ شحاته على مكتب الظابط

واللي بدأ تحقيق معاه وقال

_ قتلت الاطفال دي كلها ليه يا استاذ شحاته.. ومش بعيد كمان تكون انت اللي قتلت بنتك

= حضرتك بتقول ايه؟!.. انا مش فاهم اي حاجه؟!

_ لا انا هفهمك بس الاول عاوز اقولك ان في ناس كتير قوي واقفه بره القسم دلوقتي مستنيه بس انك تخرج وساعتها هتتقتل، الناس دي كلها كانت زيك مقدمه بلاغ ان عيالهم اختفوا والنهارده لقينا عيالهم جثث متفحمه في بيت كان بيتحرق ولقينا في البيت بعد ما الحريقه همدت صوره العقد دي، مش دي امضتك برده يا استاذ شحاته مش ده اسمك ولا انا بتهيألى

= لا، دي مش امضتي.. انا ما اعرفش اي حاجه عن البيت ده وربنا ما اعرف حضرتك بتتكلم عن ايه؟!

_ للاسف يا استاذ شحاته، ده الدليل الوحيد اللي موجود دلوقتي واللي بسببه هتضطر اتحفظ عليك لحين انتهاء التحقيقات والله كنت بريء هتخرج والناس كلها هتعرف انك ما عملتش حاجه لكن لو كنت مذنب فهتاخد حسابك في الدنيا قبل الاخره

تخيل انت وجعت كام قلب، وخليت الناس مستنياك بره عشان تاكلك باسنانها.. انا عاوزك تقعد مع نفسك وتفكر الاعتراف هيفيدك اكتر ما هيضرك اما السكوت فالعكس

…

دخل شحاتة الحجز وهو مش مصدق نفسه، ازاي انا تبقى بنتي مقتوله والمفروض مستني اعرف مين اللي قتلها عشان اخد حقها هو في الاخر خالص الاقي نفسي لابس قضايا خطف وقتل اطفال؟!

وازاي صوره العقد دي عليها اسمي؟!

وفي نفس الوقت اتبعتت صوره العقد دي لخبير عشان يشوفوها متطابقه مع توقيع شحاته ولا لا، وهل هو اصلا عقد البيت ده ولا لا؟

فضل شحاته في الحجز اربع ايام وبعدهم لقي العسكري جاي بينادي عليه طلع معاه ووصل مكتب الظابط ووقتها لقي عفاف قاعده في المكتب كان باين عليها العصبيه واول ما شافته قامت من مكانها ومسكته من رقبته وبسرعه الظابط اتدخل وفصلها عنه وكانت بتقول

_ قتلت بنتي، لا وعامل فيها بريء وبتقول انها ما جتش عندك اصلا.. انا مش هسيبك ده انت طلعت قتال قتله

= انا ما قتلتش حد، الموضوع فيه سوء تفاهم وهينتهي.. وبعدين فكري فيها بالعقل انا هعمل كده ليه هستفيد ايه من ورا ده كله؟

_ عقل.. هو انت خليت فيا عقل.. يا شيخ حسبي الله ونعم الوكيل فيك ربنا ينتقم منك على اللي عملته فينا

…

في الوقت ده الظابط تدخل في الكلام وقال

_ مدام عفاف انا عاوزك تهدي لحد دلوقتي ما فيش حاجه ثبتت على طليقك الاستاذ شحاته، العقد بيتفحص من خبير خطوط عشان نتاكد الاول اذا كان ده خطه ولا لا

ولو ثبتت عليه التهمه هيتحاسب وبالقانون، وانا هستاذنك دلوقتي تروحي واحنا هنبلغك لو في جديد في موضوع بنتك

….

الست عفاف كان عندها يقين ان شحاته ليه علاقه بالموضوع، بس الظابط فسر ده انهم متطلقين واكيد بينهم مشاكل

ورجع شحاته على الحجز تاني، واقدر اقولك يا دكتور ان الوحيد اللي كان مصدق شحاته هو ابنه طارق كان عارف ومتاكد ان ابوه ميعملش كده

وفات يومين كمان وظهرت براءه شحاته.. خبير الخطوط اكد ان ده خط شحاته فعلا ولكن العقد عقد البيت اللي شحاته قاعد فيه مش البيت المهجور اللي اتحرقت فيه الاطفال

طبعا شحاته كان فرحان انه طلع براءه من القضيه ولكن شحاته فرحته ما كملتش عشان طلع تقرير الطب الشرعي الخاص بجثه بنته واللي كان صادم لشحاته ولكل اهل سلمى.. لدرجه ان الاستاذ شحاته ما استحملش اللي سمعه ووقع من طوله

…

_ للدرجه دي يا عم صلاح، ليه هو تقرير الطب الشرعي كان فيه ايه يعني يوصل للراجل انه يقع من طوله مش عارف حاسك بتبالغ يا عم صلاح

= لا مش ببالغ ولا حاجه يا دكتور، ده انا اللي بحكيه ده هين عن اللي حصل فعلاً، اصلك انت ما تعرفش يعني ايه يطلع تقرير طب شرعي ياكد ان بنتك اللي لسه ما كملتش 15 سنه اتعرضت لاعتداء قبل القتل

_ لا حول ولا قوه الا بالله… قصدك اعتداء من اللي في دماغي ولا اعتداء بالضرب يعني فهمني؟!

= هو اللي في دماغك يا دكتور، يبقى ليه حق الراجل يقع من طوله ويطب ساكت كمان ولا لا؟!

_ ده لو انا كنت روحت فيها، لا حول ولا قوه الا بالله هو لسه في ناس كده، ايه الجحود اللي عند البني ادم ده لا بني ادم ايه ده حيوان

= خليني بس اكملك.. تقرير الطب الشرعي اكد على ان في اعتداء تم قبل القتل وبعدها القاتل شوه الجثة، وكان في اثار ضرب واضحه على الجسم وده حتى لو هيتم في الخرابه فهيتم بالليل مستحيل يتم الصبح

ولكن في حاجه ظهرت تقدر تقول انها كانت بريق الامل في انهم يعرفوا مين اللي عمل كده.. والحاجه دي كانت في شهاده شاهد راح القسم وقال

_ انا عندي كلام عاوز اقوله في موضوع قتل البنت سلمى، جايز الشهاده اللي عندي دي توصلكم باللي عمل فيها كده

= الاول انت مين؟!

_ انا اسمي مرزوق ومعايا سوبر ماركت في الطريق اللي ما بين بيت الاستاذ شحاته وطليقته وفي اليوم ده انا شوفت سلمى وهي راجعه على بيت ابوها بس بعد ما عدت السوبر ماركت الواد الصرفي اللي معاه التوك توك وقف قدامها وقالها ان بابا باعتني عشان اوديكي ليه بسرعه والبنت صدقته وركبت معاه.. ولما سالته عنها لما اختفت قال اني لو اتكلمت هيخلص عليا بس انا عندي بنات وبعد الحادثه بتاعه البيت والحريقه اللي حصلت خوفت على اللي عندي وقررت اجي وابلغ

….

بعد شهاده الراجل اللي اسمه مرزوق اتحركت قوه من القسم على بيت اللي اسمه الصرفي كان عيل صايع ومعاه توك توك بياكل منه عيش بس كان عايش على مرزايه خلق الله.. ولكن لما رجال الشرطه دخلوا بيته لقيوه

مقتول وسايح في دمه… ولكن لفت نظر الظابط ان في بطاقه واقعه بالقرب من جثته مسكها عشان يعرف مين القاتل من الشخص اللي مدوخهم كل الدوخه دي والصدمه ان الشخص ده هو…