لقيتها مسنودة على الحيطة، جسمها ما ثابت، كأنها بتحاول توازن نفسها، وشعرها مفكوك و مبعثر كأنه مبلول بموية..
حتى فستانها كان ما مظبوط كويس ، اتجمدت في مكاني من الصدمة.
قلت ليها رنا؟!.
رفعت راسها ببطء شديد ، عيونها كانت محمرة وفي إثر دموعي ، ملامحها كانت غايبة و شاحبة لدرجة تخوف.
قلت ليها.. رنا العمل فيكِ كدا منو؟ بس م اتكلمت!.
مسكتها من يدها الكانت باردة ، حاولت أسندها ، بس جسمها كان تقيل علي وما قادرة تقيف ، دخلتها الغرفة وقفلت الباب بسرعة وأنا بتلفت وراها ، وديتها لغاية سريرها كل خطوة كانت بتمشيها بتتأوه بألم.
قعدتها على طرف السرير ، و بقيت واقفة قدامها ، تاني سألتها… رنا الحصل عليكِ شنو ؟.
ما ردت عليّ. فضلت قاعدة، عيونها مثبتة في الفراغ، وإيدها بتضغط على طرف فستانها بقوة ، و جسمها بهتزّ بشدة.
قلبي انقطع من شكلها ، مديت يدي لمستها من كتفها..
فجأة اتنفضت بسرعة كأنها خافت مني أنا ، قالت لي صوت مخنوق.. ما تلمسيني يا مروة!..
رجعت خطوة لورا ، قلت ليها.. طيب الحصل شنو في الحفلة؟.
سكتت مسافة وبعدها قالت لي..
مشكلة.. حصلت مشكلة كبيرة ، هجموا علينا حرامية مسلحين ، الناس بدت تجري و أنا وقعت وسط الزحمة.
ما قدرت أصدق كلامها ولا دخل لي عقلي.. لا الحرامية و لا الزحمة بخلو الزول بالحالة دي ، سكتت و ما قدرت أضغط عليها أكتر.
بعدها همست لي.. انا عايزة أنوم.
رقدت مكانها بنفس ملابسها ، وسحبت الغطا، ولسه صوت تنهيده واصلني.
فضلت واقفة ، وما عارفة أعمل شنو ، في الآخر رجعت سريري ، لكن النوم ما جاني.
غمضت عيوني أكتر من مرة ، بس كل مرة أفتحها بنفس الخوف ، و الاحساس المقبض.
قعدت في نص السرير، و بقيت أعاين ليها من بعيد.
حاولت أهدأ و القى راحة ، بس عقلي كان مربوط بيها
لما سمعت صوت الأذان التاني ، قمت صليت ، و بقيت أستغفر و اسبح ، الواطه فتحت ، و الشمس بدت تدخل من الشباك.
تلفونها بقى يرن.. نغمة ورا نغمة ، و هي كأنها مخدرة لا حركت يد ولا رجل.
بعد الضهر بدت تتحرك وهي نايمة ، الغطاء اتزح من رقبتها شوية ، شهقت بصوت خفيف ، قمت قربت منها اكتر وانا حابسة نفسي..
شفت رقبتها كان فيها آثار أصابع مطبوعة ، وكأن في يد قوية كانت ماسة فيها.. و خدوش كتيرة ع كتفها.
ختيت يدي في خشمي وانا برجع لورا ، مستحيل الزحمة تعمل فيها كدا ، رنا اكيد بتكذب علي..
فتحت عيونها فجأة ، أول ما لمحتني واقفة بعاين ليها،
سحبت الغطا بسرعة ، و غطّت رقبتها.
وفي الحركة السريعة ، لمحت آثار ضرب خفيفة في يدها.
عاينت لي بنظرة طويلة و تقيلة ، قالت لي.. في شنو؟
النظرة دي خلّتني أنزل عيوني على طول ، قلت ليها.. رنا شكلك ما بقول انك وقعتي لكن؟.
ردت لي بصوت جاف و ناشف.. مروة انتِ بتحققي كتير مالك؟ قلت ليك وقعت انا ، ف شنو تاني؟
حسيت نفسي تقيلة وسخيفة من اسألتي ، قلت ليها.. ما قصدي احقق بس انا خوفت عليكِ.
سكتت مسافة و قالت لي .. “الساعة كم؟”
قلت ليها قريب للضهر..
طلعت تلفونها عاينت للشاشة مسافة.. ورجعته مكانه.
قامت قعدت في طرف السرير ، و لسه لافة الغطا حول رقبتها بقوة ، قالت لي.. مروة! جيبي لي موية.
مديت ليها الموية ، مسكت الكباية شربت بسرعة ، و رجعتها لي من غير أي كلمة.
اتوجهت على الحمام بخطوات بطيئة ، وقفلت وراها الباب.
قعدت لفترة طوييلة شديد ، تلفونها رجع يرن تاني اخدني الفضول اعرف المتصل منو؟ ، اتلفتت حولي ومشيت عاينت للشاشة شفته اسم “أمجد” ..
للحظات فكرت ارد بس سحبت يدي بسرعة ، في النهاية خليتو يرن لغاية ما سكت.
الحظات و سمعت صوت الباب فتح و جات طالعة.. بقيت اعاين ليها باستغراب شديد..
كانت لابسة لبس طويل ، مغطى جسمها بطريقة ملفته من غير عادتها ،كأنها بتحاول تخفي حاجة أو تتفادى سؤال.
قلت ليها تلفونك كان برن ، مشت شالته و هزت رأسها بضيق ، المره دي قفلته تماماً وجدعتو باهمال ، تاني رجعت نامت.
مرت يومين و رنا ما حاولت تطلع من الغرفة ، و لا حتى تتكلم ، و نومها بقي متقطع ، حتى الأكل مرات تاكل لقمات بسيطة ، ومرات ما تقرب ليه.
كنت بعاين ليها بعيوني ، راسي يودي ويجيب ، عايزه أعرف الحصل ليها شنو بالضبط ، خلاها تحبس نفسها كدا؟!.
والأغرب..
مافي زول جاء سأل عنها ، أو ليه ما بتطلع ، كأنه دا شيء عاادي.
في اليوم التالت.. الباب اتفتح بهدوء ، و دخلت بت أول مرة أشوفها ، كانت مختلفة عن باقي البنات..
مرتبة ، هادية ، ملامحها فيها راحة غريبة ما شبه المكان.
ابتسمت لي أول ما عيونا اتلاقت ، وقالت لي..
إنتِ مروة.. صح؟
اتوترت شوية ، بس هزيت ليها راسي.
سلمت علي كأنها بتعرفني من زمان.. قالت لي..
أنا.. وتين!
بعدها عيونها مشت مباشرة لرنا ، قالت ليها بنبرة عادية جداً.. كيفك هسي يا رنا؟.. سؤالها كان كأنها عارفة في شنو!
رنا ما ردت ، ولا حتى رفعت عيونها ، بس قبلت على الحيطة..
وتين سكتت ثواني ، بعدها قالت ليها.. ماما نفسية بتناديك!.
مجرد ما سمعت اسمها قلبي قبضني ، عاينت لرنا بسرعة.. أول مرة اشوفها تتوتر بالطريقة دي.
ردت ليها بصوت واطي من غير ما تلتفت عليها..
قولي ليها تعبانة ، ما قادرة.
وتين ابتسمت بهدوء وقالت ليها.. هي قالت لازم تجي و هسي!.
كنت بتنقل بنظري بينهم ، حاسة انه في كلام كتير بتقال.. بدون صوت.
رنا زفرت بضيق.. و قالت طيب ، بس صوتها كان صوت زول ما عنده خيار تاني.
أول ما رنا طلعت ، حاولت أقنع نفسي إنو البشوفه ده ما بخصني ، لكن كان في حاجة جواي بتحركني بفضول ، قمت براحة مشيت ع الباب ، لمست المقبض وأنا مترددة ، لفيته الباب فتح من غير صوت.
طلعت وانا بعاين في المكان ما شفت زول ، مشيت ناحية باب الشقة الكان فاتح ، نزلت خطوات ع السلم وانا حاسة بقلبي ح يطلع من الخوف.
بقيت اسمع أصوات حادة من بعيد ، نزلت اكتر لغاية ما قربت للأرض، انحنيت شوية جاني صوت ماما نفيسة حاد قاسي..
“إنتِ عارفة القوانين كويس يا رنا ، ماف زول بكسرها
ويمشي بمزاجه ، كنت متوقعة منك تكوني أذكى من كدا”..
رنا كانت ساكته ما سمعت ردها.
بعدها قالت بصوت حاسم.. المرة الجاية ما ح أتحمل النتائج.
رنا ردت بصوت مكسور و واطي.. و الله ما كنت قاصدة كنت فاكرة الموضوع عادي و م ح يوصل لكدا.
للحظات حسيت بخوف شديد من حوارهم ، والقوانين البقولوها ، ما قدرت اقيف اسمع اكتر ، اتراجعت لورا على اطراف أصابعي بحذر من غير ما أعمل صوت.
لما وصلت باب الشقة قفلتها وراي ، مجرد ما التفتت لقيت وتين! ، قاعدة في الكرسي خالفة رجل على رجل ، و ماسكة تلفونها بكل برود ، م عرفتها طلعت متين ولا كيف؟.
اتسمرت مكاني لثواني ، بعدها واصلت مشي ، كأني ما شفتها ، و من غير مقدمات قالت لي..
“الفضول هنا ممنوع ، والأسئلة الذايدة ما بتفيدك”
و رجعت عاينت في تلفونها بكل بساطة ، و لا كأنها قالت حاجة أصلا.
فتحت خشمي عشان أرد ليها، بس ما لقيت حاجة أقولها.
دخلت الغرفة بسرعة و قفلت الباب ، اتسندت عليه ، و أنا باخد نفسي بالعافية .. ما عارفة الحاجات البشوفها دي طبيعية ولا أنا البقيت ما فاهمة.
الحصل لرنا؟ كلام نفيسة عن القوانين ، و كلام وتين البارد ومحذر.. كانوا كلهم نفس الإحساس بطريقة مختلفة.. انه في البيت ده ، ماف مكان للأسئلة.
وفجأة خطرت لي فكرة ما قدرت أهرب منها..
حتى لو قررت أطلع ، ح أمشي وين؟ و أنا ما عندي طريق واضح أساسا.
_________
أواب…
الفترة الفاتت.. ما كانت ساهلة علي نهائي، عقلي كان عالق ، بحاول يركز مع امتحانات الفاينال..
و من جهة قلبي عالق في نفس النقطة.. مريم! صورتها!، صوتها!.
و السؤال البسيط البقى تقيل شديد.. هي وين؟
أيام عدت بالسهر ، و التوتر ، وتركيز غصب عني.
كل مرة أحاول أقنع نفسي..أخلص امتحاناتي أول بعدها أشوف الموضوع.
لكن الحقيقة؟ ، ما كنت قادر أفصل ، كل حاجة كانت بتفكرني بيها.
لغاية ما جاء آخر يوم..
طلعت من قاعة الامتحان وأنا حاسي بخفة في راسي..
زي زول كان شايل حمل تقيل ، و فجأة انشال منه..
وقفة مسافة ، و أخدت نفس عميق ، ولأول مرة من أيام، حسّيت إنو ممكن أفكر براحة.
ما كان عندي مزاج اقعد مع الشلة ، طلعت ومشيت على المواصلات ، وانا بفكر في خططي الجاية!
أثناء ما الحافلة ماشة ، وانا بعاين في الطريق وبقول يمكن ألمح طيفها ، فجأة لمحت بنت في الشارع ، نفس شكل مريم! في وقفتها! حجمها! طولها! ، كانت لابسة عباية سوداء ، لمحت وشها لثواني ، قلبي ضرب بقوة ، من غير ما أشعر قلت بصوت عالي مريم!.
لقيت نفسي بوقف الحافلة بسرعة و بنزل ، قطعت الظلط حتى من غير ما أشوف العربات.
كنت بناديها وأنا بقرب عليه ، مريم!.. مريم! ،الناس كانت بتتلفت علي باستغراب ، بس هي ما اتلفتت خالص.
قربت منها وهزيتها من كتفها بقوة لدرجة صرخت بصوت عالي ، و تلفونها وقع ف الأرض التفتت و هي مخلوعة ، في اللحظة دي الوش الكان قدامي ، ما وشها ، اتفاجأت من الصدمة وحسيت بإحراج شديد ..
كانت متوترة و خايفة ، بتحاول تستوعب ، شالت تلفونها بسرعة ونفضته، رفعت راسها و بكل غضب وضيق قالت..
إنت مجنون ولا شنو؟! ماسكني كدا ليه؟!..
كنت لسه مصدوم من الموقف ، قلت ليها بصوت متقطع.. أنا آسف افتكرت زول تاني.. والله ما قاصد..
قاطعتني بصوت أعلى.. افتكرتني منو؟! دي طريقة تسأل بيها؟! ولا دي قلة أدب منك؟!.
الناس بدت تتلم حولنا ، بنظرات تقيلة ، حاولت أهدّي الوضع..
قلت ليها.. أنا غلطان، حقك علي ، بس فعلاً كنت مفتكرك..
بس ما سكتت ، بالعكس زادت عصبية وصراخ.. لا لا! الموضوع ما بسيط ، إنت مسكتني في الشارع قدام الناس!
فجأة سمعت صوت من وراي بقول.. في شنو؟
التفتت لقيتهم ولدين ، واضح من شكلهم إنهم بعرفوها.. واحد فيهم قرب منها وقال ليها…
مالك يا أسماء بتكوركي؟ في شنو؟ ، أشرت علي وهي بتقول..الزول دا مسكني من كتفي هنا في الشارع!.
الولد التاني جاء وقف قصادي ، وضيق عيونه علي..
قال ليها.. مسكك؟!
حاولت أتكلم بسرعة اني شبهتها بزول ، بس قبضني من ياقة قميصي وقال لي..
شبهتها؟ يا زول أنت بتعرفها؟
كنت شايف نظرات الناس ،صوت البت ، و الولد القدامي كلهم ضدي.
مسكته من يده وقلت ليه.. زح يدك يا حبيب ، سوء فهم ما اكتر ، اخوه التاني قال ليه.. ما تسأله خلينا نتفاهم معاه في القسم شكله حرامي…