تحميل رواية «جحيم قلوب عاقه» PDF

الاول...بعد ما جابتهم ٣ رجاله فى الدنيا اخدوها فى الصحرا وتركوها لأنها عمياء بس اللى اكتشفوه بعد كدا مستحيل يتصدق....

حسين رجل اربعينى كان واقف مع شابين فى التلاتين دول صابر وامين اخواتو.. وامنيه اختهم فى العشرين قالت بغضب...

يعني ايه الكلام ده هي مش امكم انتم كمان عايزينا نلقحوها يعنى ولا ايه....

حسين... ايوه بس لا مؤاخذه يعني في الكلمه.. امك مش بتشوف وانتى بتها لو حمتيها لو غيرتيلها عادى.. حريمنا مش بناتها..

امنيه... لا مالكش صالح انت بالموضوع ده امك مابتتكسفش...

صابر.. حسين كلامو صوح مين هيجيله جلاده عليها

امنيه.. اه طب هقولهالكم بالعربي كده جوزي مش راضي يخلي امي عندي... وانا مش ههمل بيتى وجوزي وعيالي واجي اقعد جنب امكم... عشان ما فيش واحد قادر يزعق لمرتو ويقولها اخدمي امي اهى عندكم بره اهى انا جبتهالكم وانتو شوفوا هتقعدوها عند مين فيكم.. يلا سلام عليكم

وسابتهم ومشيت...

حسين... خلاص خدها عندك انت يا امين هى بتحب تروح عندك...

امين... مين انا بصراحه كده وعلى بلاطه مرتى ما بترضاش تخدمها

ضحك صابر وقال... سيبك منه ده ما يقدرش يحكم على مرته ولا يقولها اخدمى امي ده تلاقي مرته بتخليه هو يخدمها في البيت...

امين.. والله على الاقل انا معترف ان مرتي هى اللى مش راضيه بامي مش عامل نفسي كان انا اللى مش عايزها

صابر.. مين ده انا مرتي اللي مش عايزاني اجيب امي في البيت... طب والله انا مرتي ما تقولي ما تجيبش امك في البيت لاكسرلها عضمها واجيبها غصبا عينها واقعدها في البيت وان تكلمت اتجوز عليها واجيب اللي تخدم امي...

امين.. وليه ده كله ما هي اللي هتخدم امك هي اللي تقول ايوه او لا ليه تطلقها...

حسين بغضب... بس انتو الجوز انتو شابطين في بعض وسايبين اللي احنا فيه... احنا لو قعدناها عندي مرتى هتقول اشمعنا وشمعنا... لو راحت عند امين مرتو هتقول ليه انا... وانت يا صابر نفس الموضوع... احنا هنعملوا ايه هنقسمو نفسنا تلاته... على تلات اسابيع كل واحد هياخدها عندو اسبوع.... لما مرتك تاجي تتكلم هتقول لها امي اعمل ايه القحها في الشارع ما اهي مرت صابر خدتها اسبوع ومرت حسين خدتها اسبوع وانت يا صابر هتقول نفس الجمله وانا هقول نفس الجمله لحد ما ربنا يسهل ويفتكرها

صابر... هى بس لو تسيبنا نقسم فلوس ابونا وكل واحد ياخد حقه.. كنت سبت البلد دي كلها واشتريتلي حته بعيده وسبتكم تخبطو ترقعو.. .

حسين... ما هي عارفه عشان كده مش راضيالنا نقسم.. عارفه ان احنا لو كل واحد مسك قرشينو في يده ما حدش هيرد عليها السلام... يلا هى ما هتعيشش قد ما عاشت انا هاخدها اول اسبوع حدايا...

وحسين اخد امو ناجيه ست فى السبعين وراح بيها على بيته ودخلها الاوضه وحطها على السرير وغطاها وطلع...جات مرتو سعيده وقالت....

.. هو انت هتقعدهالي هنا خلاص انا اللى هلبسها... مش كفايه عليا البيت والعيال..

حسين.. اش اكتمى انا تفقت مع اخواتى امين وصابر كل واحد هياخدها عندو اسبوع وكلى عيش ها كلى عيش... يلا ادوبى الحق شغلى..

وسابها ومشى.. سعيده لوت بقها بضيق وراحت اوضت الاولاد التلاته لقتهم بيذاكروا شالت منهم الكتب وبصيتلهم وقالت

عيزاكم تمرحو فى قلب الشقه.. وتزعقوا وتهوسوا وتخلوا البيت ده كانو جنينه الحيوانات... زعقو وخبطوا اعملوا اللي انتم عايزينه كله...

الولد... نخبط كيف يمه وجدتي نايمه..

سعيده... انا بقولك كده انت مالك يلا ولو اتكلمت معاكم انا اللي هرد...

والاولاد ما صدقو والدتهم قالتلهم يلعبوا براحتهم.. وودانكم ما تسمع الا الزعيق والصويت ودوشه ليها اول مالهاش اخر.. وناجيه قامت من النوم على صوت الاولاد وقالت..

فى ايه يا عيال بتزعقو كده ليه صحتونى مش عارفه انام من الهوسه..

سعيده بسخريه.... معلش يا حماتي عاد ما انتى عارفه العيال ودوشتهم لا نوم ولا راحه والله

وقالت للولاد... بس يا ود انت واختك ما تلعبوش بصوت عالي.. مش قلتلكم جدتكم نايمه وطو الصوت شويه..

وشاورتلهم بايدها بمعنى يكملو لعب وقالت...

ولله يا حماتي لسه قايلالهم ماتهوسوش جدتكم نايمه يا عيال ما حدش يهوس.. بس ما فيش فايده..

ناجيه... طيب خلاص يا مرت ولدى انا جعانه ما فيش اي حاجه تتاكل...

سعيده... على عيني يا حماتي بس انا اصلي مدبره خالص وما بخليش الاكل يتكب فبطبخ على الكد واحنا صراحه اتغدينا... ما كناش نحسب انك جايه...

ناجيه... طب ايه يعني ما فيش حته جبنه ما فيش اي حاجه تتاكل

سعيده... معلش يا حماتي ما فيش..

ناجيه.... طيب هتعمليلي..

سعيده.... لا عاد استنى العشا..

ناجيه.. طيب ابقى اسلقيلى بيضتين عشان انا ما باكلش الحاجات اللي فيها زيوت الحكيم مانعني منيها..

سعيده... معلش بقى يا حماتي احنا بنحب الزيوت وبنحب الملح وبنحب الفلفل والشطه وبنغمسو غميس في الاكل وانا مش هقدر اطبخ على مرتين كلى معانا يعنى هم الدكاتره مين قاعد على قصاد كلامهم....

وسابتها وطلعت وقالت هى وماشيه قاصده تسمعها...

ما اللي احطه على الصينيه كلي منه هو انتى هتقومي تطبخيه يعنى مش تحمد ربها انى جبته لحد عندها لا بتتشرط

ناجيه بضيق... هو شكلو يوم باين من اوله..

٢...

ما اللي احطه على الصينيه كلي منه هو انتى هتقومي تطبخيه يعنى مش تحمد ربها انى جبته لحد عندها لا بتتشرط

ناجيه بضيق... هو شكلو يوم باين من اوله..

في مكان تاني كان في شاب في ال 30 ده عمار واقف مع بنت في العشرين دى دهب مراتو فى بيت مش متشطب كويس.. وبيقول... شفتي قربت اخلصها اهه فاضلي بس هكمل الارضيه الرمله دى واحط سيراميك او بلاط ارخص باللى حيلتنا.. وهننقل على طول باذن الله..

دهب... لا وعايزين عفش كمان.. الحاجات الاساسيه يعني هاتلنا كرسيين وترابيزه وهاتلنا سرير... وو

عمار..... وانا هنسى السرير... السرير ده هيجي اول حاجه في العفش... على راى المثل.. البيت من غير سرير... زى الصيف من غير عصير...

دهب ضحكت بس جات ست فى الخمسين دى رقيه امها وقالت بضيق....

طب انزل هاتلي عصير يا جوز بتي حكم ريقي نشف من السوهاجه اللي انت جايبني فيها.. لو علبه زبده كانت ساحت... النهار جهنم من الحر والليل سقعه وطل..

عمار.... انتى بتجيبي امك معاكي ليه محرم.. خايفه تاجى عندي يعني..

دهب.. والله هى اللى شبطت فيا..

رقيه.. كلمنى انا اللى بكلمك..

عمار.... معلش يا حماتي لما نبقى نطلع على الشارع بقى اصل ما فيش دكاكين قريبه...

رقيه.. قصدك جايب بتى فى جبل فاضي ما فيهوش غير ديابه الجبل البنت هتقعد مع مين لما انت تطلع تروح شغلك.... هي دي عيشه دا البيت مكركب لا في عفش ولا في نيله...

عمار.. ما احنا هنجيب عفشنا اللي كان في بيتي القديم يا حماتي..

رقيه... صوح انت كل يوم والتاني تجيب البنت وتقعد تقولها قربت اخلص البيت.. ما تدقش بابنا واصل لما تبقى تخلص بيتك ابقى تعال خدها.. انا مش عارفه رجاله ايه اللي غلبانه في البيت دى يا اخواتي.. ده اخو خطيب اختها اتقدم لدهب الشهر اللي فات عارف عنده ايه عنده بيت في دبي وعنده بيت هنه.. هناك في دبي عشان لما يسافر.. واللى هنه عشان ما تقعدش ويا امه..

عمار بغضب... ايه الكلام ده... كيف اتجرا يتقدملها وهي على ذمتي انتى يا وليه جرى لعقلك حاجه...

رقيه.. زمتك.. هؤ لا ما هى لامعروفه مطلقه ولا متجوزه مش رجعت بيت امها تانى... ده انت حتى مش عارف تعملها بيت كيف الخلق...

عمار... والله دي كانت ظروفي من الاول من ساعت ما جيت اتقدملها وانتو رضيتو بيها...

دهب... بس بس عشان خاطري.. خلاص خلاص ياما اطلعى بره استنينى وانا هحصلك... ايوه ايوه انا رضيت بيها وراضيه... راضيه اعيش وياك.. باقل من كده..

عمار... راضيه بايه مش سامعه امك بتقول ايه مين ده اللي جى يتقدم..

دهب.. ياما اطلعي استنيني بره خاطر النبي انا قلت لك ما تقوليش حاجه...

رقيه... خايفه على زعل المحروس اما اطلع انا قبل ما اتشل ...

وسابتهم وطلعت.. عمار بص لدهب وقال بضيق...

ما قلتليش ليه ولا كنتى بتفكري في الموضوع

دهب بدلع... ما فكرتش وانا خاليه.. هفكر وانا على ذمه راجل مالي عيني ومالي عليا الدنيا... ودنيتي من غيرو ما تسواش.

عمار... لا ما تثبتنيش بالكلمتين دول اخو خطيب اختك ده اتقدم ليه ها..

دهب.. ولا شفتو ولا جيه من اصلو دول كلمتين بايخين قالهم خطيبه اختى لاختي في التليفون امي زى ما انت عارفها زودت عليهم.. بعدين خلاص حتى لو الارضيه رمله انا راضيه.. جيب عربيه كده من بتوع صحابك وحط فيها عفشنا القديم حبه منو كيف ما قلتلك الحاجات المهمه البوتاجاز الغساله التلاجه... وتعال خدنى هنعيش فيه كدا وبعد كده نبقى احنا نجيب حاجه ورا حاجه لحد ما ربنا يسهل ونعمر البيت...

عمار... كيف ما هو كده من غير ما نلونه ولا نعملو ارضيه صلبه

دهب.. يا سيدي نكملو براحتنا

عمار... طب وامك هترضى تجيبك دلوك

دهب.. وقفت قدامها مره زمان عشان اتجوزك وهوقف تانى عشانك.. انت خليك وياي وانا اتحدى العالم بيك.. يلا هحصل امى..

وطلعت بره وبصيتله ورجعت تاني وقالت... عمور اوعى تنسى السرير....

ومشيت بسرعه تحصل امها... عمار ضحك على شكلها بس اتنهد بضيق وقال... ربنا يفرجها عليا يا دهب واجبلك نجوم السما يارب ما خسرش دهب انا ما عنديش غيرها يا رب

عند ناجيه اتصلت بابنها امين وقالت...

ايوه يا امين تعال خدنى من هنا يا امين انا مش قادره اقعد واصل..

امين.. دلوك حتاجى تقعدى عندي يعني على طول..

ناجيه... ايوه يا ولدي انا مش قادره اقعد هنا واصل

امين... حاضر هاجي اخدك

وراح امين اخد ها بيتو عند مراته سميه كانت بالعاده بتعملها نوعا ما عن الباقين... بس والدتها كانت عندها وقالت..

يعني ايه انتى اللى تخدميها وتخدميها ليه عيالها التانيين ما يخدموهاش ليه.. ولا احنا كل اللي نتلم عليه حبيب امه...

سميه.. انا اعمله ايه ارجعها يعنى هى طلبتها منو مش عاوزه تقعد هناك.. هيتردلى فى عيالى انتى ترضي ولدى يلقحني يعنى

امها... ليه هى مش امك عشان يترد فيكى.... اذا كانو ولادها وبتها لقحوها هتشيلي انتى... قال على راي المثل ربي يا خايبه للغايبه..

سميه... يعني اعمل ايه يعني

امها... زى سلفتك كشري فيها.. اهى سلفتك كشرت في وشها طفشتها انتى كمان طفشيها ايه ما تعرفيش تكشرى في وشها.. لو قعدتلك هنا لا هتعرفي تطلعي ولا تدخلي ولا تروحي تجيبي حاجه هتفضلي قاعده تحرسيها وتخدميها وعلى ايه... بتها مرتاحه وانتى تعلعلي فى امها

سميه... حاضر يا اما..

وباليل نادت ناجيه لسميه وقالت.. بقولك يا سميه يا بنتي عايزه الخلقات بتوعي عشان عايزه اروح استحمى انتى غسلتيهم صح...

سميه بحرج... لا والله يا حماتي ما غسلتش حاجه معلش ما فقتش

ناجيه... طيب يا بتى لما تفيقى براحتك ابقي اغسليهملي بالله وانا هخلي السبوح بكره...

سميه... لا ما هو يا حماتي انا بصراحه كده مش هفيق اه انا يعني يا دوبي على العيال وما هفضاش ليكى واصل

وسابتها وطلعت بحزن.. ناجيه فهمت انها مش حابه وجودها واتنهدت بضيق وقالت... حتى انتى ده انتى كنتى اخر امل ليا..

٣... .. ناجيه فهمت انها مش حابه وجودها واتنهدت بضيق وقالت... حتى انتى ده انتى كنتى اخر امل ليا..

وراحت عند صابر يمكن مراتو حسنه تتقبلها.. وكانت قاعده معاها فى الصاله وقالت..

بقولك يا حسنه عطشانه عايزه ميه

حسنه.... ماشي يا حماتى استني اللقطه تخلص اول ما يجيبو اعلان هقوم اجبلك حكم انا متابعه المسلسل ده من زمان قوى..

ناجيه.. يا بنت بقالك ساعه بتقوليلى كده المسلسل جاب ٣ اعلانات والحلقه قربت تخلص وانتى ما جبتليش ميه

حسنه... يا سلام وانتى شفتيه فين يا حماتي جاب اعلان ولا ما جابش انتى عايز تقولى علي كدابه ولا ايه

ناجيه... انا ما بشوفش بس بسمع انا سمعت الاعلان لما جيه وجيه واحد تاني وجيه واحد تالت وانا لسه عطشانه وانتى ما قومتيش يعني شويه ميه مش هتتعبك..

حسنه.... يا سلام ولما هي ما بتتعبش ما تقومى تشربي لحالك... ولا كانت بتك عملتهالك..

ناجيه... انا لو كنت بشوف كنت قومت عملت حاجتى..

وسابتها ودخلت اوضتها بضيق وتانى يوم جمعت اولادها التلاته وحسين قال....

خير يا اما جمعتينا كلنا عندك يعنى..

ناجيه.... متجمعين عند النبي ان شاء الله بصو انا هرجع بيتي بيت جوزي الله يرحمو وهجيبلي بنت تخدمني

حسين... ايه عايزه تجيبي واحده ما نعرفهاش تدخليها الدار عشان تشفط اللي وراكي واللى قدامك وتطلع.. دى لو شالت دهبك مش هتشوفيها...

ناجيه... ما فيش حد هيشفط حاجه انا مش عيله صغيره ولا واحد فيكم مرته بتعبرني وحتى اختك سابتنى... انا مش قادره اقعد معاكم اذا كانوا عيالي سابوني الغربه هيسندوني.. ده اخر كلام عندى...

صابر... ايه الكلام اللي بتقوليه ده يا اما انتى عايزه الناس تقول عليكى مخلفه تلت رجاله وبت وفي الاخر جايبه خدامه.. انتى عوزاهم ياكلو وشنا فى البلد

ناجيه... لو ماراعيتش امك اللي خلفتك وسايبها زعلانه يبقى ما تراعيش الناس انا احق بالرضى ده من اى حد

طلعو من عندها وحسين قال....

وبعدين في امكم دي اللي عايزه تخلينا سيره على كل لسان وتجيبلنا كلام مع اللي يسوى واللى ما يسواش على اخر ايامها

امين... انا من رايي كلامها صح واحنا هنشق عليها كل يوم..

صابر... تتشق مصارينك انت عايز الناس تشمت فينا تقول علينا ان احنا ملقحين امنا

حسين... المشكله مش بس في الناس ولا في كلامهم المشكله ان احنا ايه ضمننا ان البت اللى هتاجى دى زينه ما يمكن تاخد حاجه كده ولا كده وانت شايف امك اساسا مش طايقانا... دى مش بعيده تديها الدهب بتاعها

صابر.... خلاص يبقى نقول انها اتجنت ونحجر وندخلها في مستشفى المجانين وكده الناس مش هتقول علينا ولا كلمه

حسين.. لا هيعرفو انها كويسه وهيرجعوها احنا نطلع على اقرب صحرا ونسيبها ونرجع وهى مش هتعرف ترجع هنه تانى... وهنقول مخها تعب صحينا مالقينهاش... ونقسم فلوس ابونا اللى هى مش راضيه تخلينا نقسمها.. وكل واحد ياخد قرشينو ويتوكل على الله موافقين

امين.. ايه بس دي امنا يا حسين

صابر... خلاص مرتاتنا مش راضين خدها انت وطلق مرتك وخرب بيتك بيدك وهمل عيالك وقعد فاحم فى امك

امين.. طب خلاص

حسين... بس لو وافقت وعملنا كده وحكيت لحد لو حتى مرتك ساعتها انت هتتاخد في الرجلين..

امين.. طب واختكم ما هتعرفش

حسين... لا ما هتعرفش حاجه... هندوها ارض ولا بيت عند ما لقيتهم هتنسى امك واللي جابوها

صابر.. ومن ميتى الحريم ليها فلوس

حسين.. لاهى الكلب بعضمه هنديها ارض او اي حاجه كده عشان تتلهي... بس ما حدش فيكم يطلع صوت واحنا بنودي امكم الصحرا عشان لو لا قدر الله بعد ايام عرفت ترجع عايشه يعني ما تعرفش ان احنا اللى رمناها الليله باذن الله...

وعزمو على رميها من غير ما يفكرو فى العواقب... كل همهم يخلصو منها...من الام التى يكرمنا الله لاجلها...

بالليل اخدوها وكممو نفسها بقماشه عليها مخدر لحد ما فقدت وعيها وطلعو بيها على الصحرا وسابوها هناك مرميه لوحدها.... سابو اكتر حد بيحبهم ورجعو...

عند عمار كان واقف تحت بيت دهب بالموتسيكل بتاعو وقال...

ركبى ورايا يا احلى دهوبه في الدنيا..

رقيه بضيق... انت ازاي هتاخدها بالموتوسيكل ما كلفتش خاطرك تجيب عربيه تقفل بابها عليها من البرد ده... ولا عربيه كاروا بحمار حتى اقلو تاخد راحتها في القعده

عمار بسخريه... ولزمتو ايه الحمار يا حماتي انا موجود

رقيه.. كويس انك عارف

عمار.. طبعا حد يشوفك ويقولولو دى هتبقى حماتك ويقول خليها تبقى حماتي وما يبقاش حمار لازما يبقى حمار وبلغه كمان .

وساق السيكل ومشى... دهب قالت...

بطل ترمي على امي الكلام الدبش ده بالراحه عليها شويه

عمار... روحي شيخه قال يعنى ظالمها ما نتيش شايفاها...

دهب... معلش بقى انت مش قلتلي اللى يعشق الورد يستحمل الشوك اللي فيه

عمار.. مش عايز اسئ الادب معاكي واقول كلام ما يصحش للاطفال القصر.. هو انا مش مستحمل مش ساكت يعنى.. ده انا اللى متحملو من امك لو جبل كان انشق

بس قطع كلامو وقال... ايه ده الحقي ايه اللي هناك ده

ونزلو ولقو ناجيه مرميه على الارض عمار حط دماغها على رجله وقال... الحقى دى ست كبيره دى كد امى الله يرحمها..

دهب... تعال خلينا ناخدها على بيتنا.. بس لا ليكون وراها مصيبه ولا حاجه سيبها...

عمار.. وهى عشان وراها مصيبه نسيبوها متلقحه كده دى كد امك الله ياخدها... قصدي يعني الله يطول في عمرها

وشالها ومشى بيها لان السيكل مش هينفع للتلاته وهى نايمه ووصل بيتو بتعب نيمها على السرير وبقو يقوموها فاقت ناجيه وقالت...

اه راسى

عمار بلهفه.. انتى زينه نجيب حكيم...

انا زينه قوى.. انتم مين..

عمار... انا عمار ودى دهب مرتى

دهب.. كيفك يا خاله

ناجيه... الحمد لله يا بتي انتو لقيتوني فين

عمار... انتى كنتى مرميه في الصحرا بتاعه الجبل خفنا عليكى وجبناكي عندنا

ناجيه... ربنا يخليكم يا ولدي

عمار.. طب ايه اللي حصل انتى ايه اللي جابك هنا عنوانك ولا حتى عنوان حد من عيالك او كده نرحلو

ناجيه... انا ما ليش حد يا ولدي

دهب.. ما لكيش حد كيف يعني هو في حد ما لوش ناس

ناجيه... ساعات بيبقالك ناس بس بتبقى كيف قلتهم انا عندى ٣ رجاله وبت والتلت رجاله اللي جبتهم على الدنيا وخليتهم بقوا رجاله هما اللى رمونى عشان مش بشوف وحريمهم مش عايزين يخدمونى وهما تقلت عليهم... انا قلت اقعد في بيتي واجيب خدامه خافوا للخدامه تاخد حاجه كده ولا كده وانا اما اشوفهاش ولا تضحك عليا وتاخد مني حاجه يلا الله يجازيهم

دهب... لامؤاخذه يعنى انتى عرفتى كيف ان اللى رموكى عيالك.. شوفتيهم ازاى مش بتقولى انك...

٤.... دهب... لامؤاخذه يعنى انتى عرفتى كيف ان اللى رموكى عيالك.. شوفتيهم ازاى مش بتقولى انك...

ناجيه... هما كانو فاكرين انهم عشان ما تكلموش انا ما عرفتهمش بس انا حسيت بيهم... شميت ريحتهم... تعرفو ريحتهم قعدت على جسمي اهى شماها... حسيت بيهم وهم بينوموني ببجاحتهم وقسوة قلوبهم دخلوا كمموني وانا صاحيه تخيلو عشان مش هشوفهم وهما داخلين من الباب مايعرفوش انى بشوفهم بقلبى..

عمار.. ازاى يعملو كده ده انا هروح اولعلك فيهم كلهم كيف يعملوا حاجه زي كده.. ايه ده.. ده في ناس هتموت كده موت وتاخد امها في حضنها مره واحده.. ده انا هموت وشم ريحة امى بس... او اشوف وشها مره واحده

ناجيه.... قلوب بقى يا ولدي ما تقلقش هيندمو لان اللى هيعرفوه بعد غيابى هيشقلب حياتهم كلها هيخليهم لا طايلين سما ولا طايلين ارض

عمار... طب انتى ارتاحي دلوقتي والصبح تتسهل... ولو احتجتى حاجه نادى علينا..

ناجيه.. ماشي يا ولدي

عمار.. طلع بره الاوضه وقال....

في حد يعمل كده

دهب... طب هنعمل ايه في الست دى

عمار... هتقعد معانا طبعا لو رجعنهالم يمكن يعملو فيها حاجه.. قومي خلينا ننام والصباح رباح

دهب.. ماشي وناموا فى الاوضه التانيه على الارض

وناجيه فضلت قاعده معاهم كذا يوم وكانوا جابولها هدوم وبياكلهو وبيعملولها كل حاجه.. وفى يوم كانت دهب بتحضر العشا وعمار قاعد جمب ناجيه وبيكلمها لحد ما العشا يجهز وناجيه قالت...

يعني انت ما شوفتش امك ولا مره

عمار.. تؤ انا امي ماتت وهي وبتولدنى.. ابويا راح اتجوز لوحده على اساس يعني تربيني وكده الله يرحمها كانت ست كويسه مش وحشه يعني خدت فتره وماتت هى وابويا... ما كانش عندي غير شقه ورثتها من ابويا شوفت دهب حبيتها قوى بعد معاناه مع امها وافقت عليا اخيرا واتجوزت بعدها بشهر.. جانا قرار ازاله.. ما الشقه بتاعتى دي في الدور الخامس والعماره قديمه قوي الحكومه جت قالت ان العماره هتقع ومشونا...

ناجيه...العروسه وشها حلو عليك...

عمار بحسره.. لو كان ليها حظ كانت اتجوزت واحد غيرى يكون معاه فلوس..

ناجيه.. لا انت احسن واحد فى الدنيا انت عملت كتير معايا جبتلى هدوم واكل ودوا وسكنتنى معاك انا الغريبه اشحال مرتك وحبيبتك.. يا ريت كنت ولدى

عمار.. اعتبرينى كده

جات دهب بالعشا..

وناجيه قالت.. انا كنت عايزه اقولك حاجه يا ولدي

عمار.. عيني

ناجيه.. تسلم عاوزاك تلاقي اقرب دار مسنين توديني فيه وتمشى

عمار بذهول... ايه الكلام اللي انتى بتقوليه ده ليه..

ناجيه...انا عارفه ان انتوا ناس كويسين واديلى عندكم اسبوع شايلينى على كفوف الراحه والله العظيم انا بنتي ولدي معملو معايا اللي انتم عملتوه ده.. بس مش هينفع افضل قاعده معاكم على طول انت عارف انتم حالتكم على كدها ما انتمش ناقصين اقعدلكم انا كمان..

عمار.. احنا قصرنا معاكي في حاجه

ناجيه.. لا يا ولدي انا عليك انت ما عوزاش ابقى حمل على الحمل وانت مش ذنبك فيه ريحني ووديني بالله عليك انا ما هعرفش اروح لحالى

عمار.. طب

ناجيه... من غير طبطبه لو ما ودتنيش هروح لحالى بدال ما طلع وحدى وتوه ودينى انت

عمار.. نامى دلوك والصبح تتسهل..

فى صباح جديد.. كانو عيال ناجيه اتلمو وجابو المحامى عشان يقسمو الفلوس وحسين قال بصدمه..

ايه الكلام اللي انت بتقوله ده يا متر

المحامى... زى ما سمعت كل الفلوس بتاعت ابوكم ابوك كاتبها باسم امك الست ناجيه لو ظهرت الست ناجيه عايشه هي اللي تقدر تتحكم في الفلوس ولو ظهرت جثه الست ناجيه وكانت ميته ساعتها بس تقدرو تورثو الفلوس حتى البيوت اللي انتم ساكنين فيها باسم الست ناجيه

صابر... كيف ما نعرفش حاجه زي كده قبل ما ن

حسين عشان يسكت بسرعه... كنا ايه... ماشي روح انت يا متر

المحامى مشى وحسين قال.. هتسيح وتقول قدام المحامي ان احنا رميناها

صابر.. امك كانت عارفه اننا ما هنعرفش ناخد الفلوس من غير ما تديهالنا طب هى زمان ديابة الجبل كلتها هنجيب الجثه ازاى كده ضاعت منا الفلوس..

حسين... يلا ندور عليها بسرعه يمكن لسه عايشه...

وطلعو يدورو عليها فى كل مكان.. وعمار كان جاب تاكسى وطلعو على دار المسنين... ووووو

الاخير... وعمار كان جاب تاكسى وطلعو على دار المسنين بس قال...

معلش لف ورجع تانى يا اسطى..

ناجيه... عمار ليه كمل

عمار.. لا مش هخليكى هناك مش هوديكى الله اعلم هيعملوا ايه فيكي هناك.. وهيعملوكى كيف... خليكى معانا وعلى قول رسولنا الحبيب عليه الصلاه والسلام طعام الاثنين كافي الثلاثه...

ناجيه.. بس يا ولدي

عمار... ما تقوليش بس يا ولدي مش هوديكى هناك خلاص خلصنا الكلام خلصان مش هوديك هناك انتى هتسكنى معايا... احنا ما عايزينش حاجه منك انتى خليكي معانا ان شاء الله ربنا يقدرني وما ناقصكش ولا حاجه انا احسن من الدار اكيد..

ورجعها البيت... ناجيه قالت..

طب رجعنى بيتى وارجعو معايا

عمار.. ايه تانى ارجعك ليهم .

ناجيه... همشيهم من البيت وملكى..

عمار ماشى اوصلك.. وافضل معاكى لحد ما تقعدى وترتاحى ونرجع

وراحو على بيت ناجيه.. اولادها قالو بفرحه..

اما انتى روحتى فين من ساعت ما مشيتى واحنا بندور عليكى...

ناجيه.. امكم ماتت في الصحرا اللى رمتوها فيها

صابر... ايه اللي انتى بتقوليه ده ياما احنا معقول نعمل فيكى كده ده احنا كنا هنموت عليكى

ناجيه... بس انا صوح ما شفتكوش بس حسيت بيكوا بيقول اني امكم.. المهم كل واحد فيكم ياخد شنطته ويفضي البيت اللى عايش فيه عشان ما لكوش مكان عندي..

امين... هنروح فين ياما

ناجيه...مكان ما كنتم عايزيني اروح

امين... قلبك كبير وهتسامحيني

ناجيه.. وانتم قلبكم حجر... قلبكم ما شالنيش وانا كمان قلبي ما هيشيلكمش

حسين بص لعمار وقال... انت اللي ضحكت على امي

وقفت ناجيه قدام عمار وقالت... بعد انت وياه انا اللي بكلمكم يلا كل واحد ياخد مراته وعياله ويروح يعيش بيها بعيد مني تقتلوني وتعيشوا بفلوسي مش قادره ادعى عليكم بس كمان مش قادره اشوفكم فى البيت يلا غورو...

طلعو التلاته من عندها..... وقعدو التلاته قدام الجامع بحسره....

وعمار قال... يلا اديكى رجعتى لفلوسك ولبيتك هنروح احنا وهناجر نزورك كل فتره...

ناجيه... وتهملوني لحالي

عمار... جيبي خدامه

ناجيه... اذا كانوا عيال بطنى طلعوا كده الخدامه هتصون انا اصلا كنت من شهرين عملت تحاليل وقالو اخرى السنتين دول ما قولتش لعيالى عشان كنت فكراهم هيزعلو... اقعدو معايا سنه ولا اتنين بالكتير واموت خليكم عشان اما اموت تدفنونى بدل ما اعفن واما اموت امشو...

عمار... ربنا يطول في عمرك

ناجيه بابتسامه... العمر راح ما بقاش في حاجه تنفع خليكم وياي السنه دي

دهب بصت لعمار وقالت... خلاص يا عمار الوليه في اخر ايامها وما ينفعش نزعلها.. صح عيالها هيقولو ان احنا ضحكنا عليها بس انت ما تبقاش شايل هم دول والله العظيم يا لولا العيبه كنت تفيت في وشهم

عمار... هدي شويه.. وبص لناجيه وقال... هقعد وياكى حاضر بس حاولى تسامحى عيالك

ناجيه... المشكله مش فيا قلبي مهما عملو مهما قالو ما بيقدرش يزعل منهم المشكله انو بيبقى عند ربنا مشيول واللي عملوه فيا هيعملوه فيهم عيالهم بعدين

وطلعت اوضتها.. وعدو سنه ونص... عمار كان قاعد هو ودهب مع ناجيه.. بس بعد السنه ونص كانت ناجيه ماتت... وجم اولادها جرى عشان يورثو بس اتفاجاو بناجيه كاتبه لعمار ودهب كل الاملاك بتاعتها وكتبت بيت صغير واحد بس لاولادها الاربعه لانها ما قدرتش تسيبهم في الشارع... وكانت كاتبه وصيتها لعمار...

انت تستاهل اكتر من كده انت كان نفسك في ام عشان اتحرمت منها انا بجد حسيتك ولدي في الفتره دى وكتبتلك كل حاجه.. اوعى تفكر انو حرام انى منعتهم من ورثهم ده مش ورثهم دي فلوسي جوزي كاتبهالي انا هما ما كتبلهمش حاجه... وانا حره فى فلوسى ابقى طلع منها حاجه كل شهر على روحي ما تنساش... عشان انا ما عنديش اللي يطلعلي.. وقرالى الفاتحه لان عيالي مش هيقراوها يلا استودعتكم عند الله يا اطيب قلوب شفتها في الدنيا....

عمار ببكى... ليه ليه عملت كده دى امانه تقيله قوي وانا ما اقدرش عليها

دهب.... انت هتقدر هى ادتلك الفلوس عشان انت تستاهلها..

وعدت فتره وكان عمار عايش فى سرايا وكان فعلا عامل بوصيه ناجيه وبيطلع كل شهر من الفلوس وبيقرالها الفاتحه وبروزلها صوره كبيره في مدخل البيت...

واولادها فضلوا هم الاربعه في البيت بس ما كانوش مرتاحين خالص في العيشه..

حسين جاتله امراض كثيره وحشه وما بقاش يقدر يجيب لنفسو اقرب الحاجات ومعامله مراته ليه ما كانتش تختلف عن معاملتها لامه وكانت بتحسسوا كل يوم بالعجز بتاعه وحتى اولاده نفس الفكره...

امين كمان.. كان بيمشى من كل شغله يروحها مابيتوفقش فى اى حاجه وما بقاش عارف يجيب الفلوس ابدا اولاد ومراته كانوا بيتخانقوا معاه وبيقولواله انه زيه زي قلته انه مش نافع لاي حاجه وبيحسسوا بالعجز المادي دايما

اما صابر وهو راجع من الشغل ضربته عربيه وعجز عن الحركه وقعد على كرسي متحرك مراته ما قبلتش انها تفضل معاه وسابته ورجعت لاهلها واخدت اولادها معاها وهو فضل وحيد...

وامنيه جوزها اتجوز عليها واحده مطلعه عينها وبيعاملوها معاملة الخدم.. بتخدمو هو ومراتو وعيالو الجداد..

الدنيا كاس داير وكل ساقى سيسقى مما سقى... فما بالك بامك..... مش هتلاقى لاتوفيق ولاراحه لا فى الدنيا ولا فى الاخره.. وده كان عقاب في الدنيا على اللي عملوه واللي عند ربنا لسه اكبر بكتير لان ربنا عز وجل قال فى كتابه العزيز

بسم الله الرحمن الرحيم

{وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا}

لقراءة ومتابعة روايات جديده وحصريه