كانت بتفتش في الأكياس بسرعة بعد لما طلعتهم من تحت السرير قبل ما جوزها يرجع عالبيت.
قالت لنفسها:
لازم أشوف الأكياس اللي خباهم دول فيهم إيه، حاسة ورا الموضوع دا واحدة ست أصل بقاله كام يوم تصرفاته غريبة.
اتصدمت أول ما شافت الحاجات اللي جايبهم وقالت:
كريمات غالية وبرفانات كمان غالية دول لو جايبهم ليا ماكنش خباهم مني.
طب ما ممكن يكونوا ليا وأنا ظلمته ومخبيهم مني عشان يعملي مفاجأة، بس دول كلهم للبشرة الدهنية وهو عارف إن بشرتي جافة.
وقفت تستوعب الأمر وشكت أكتر إنه بيخونها، دموعها نزلت لما الشك زاد إنه لواحدة غيرها، وفضلت مسهمة ربع ساعة والأفكار عمالة تودي وتجيب ودموعها لسه على خدها.
مسحت دموعها وقالت:
لازم تتصرف بعقلانية عشان ماتطلعش هي الغلطانة في الآخر والخسرانة.
لما حست بيه بيفتح باب الشقة رجعتهم بسرعة مكانهم ووقفت مسحت دموعها وعملت نفسها بتحط ميكاب عشان لو دخل عندها مايشكش إنها كانت بتدور على حاجة.
دخل عندها وهو بيقول:
إيه يا حبيبتي مش هنتعشى ولا إيه؟
سابت نورا الفرشاة وقالت بابتسامة مصطنعة:
أكيد يا أسامة ثواني ويبقى جاهز.
أسامة بابتسامة:
طب أكون غيرت لحد ما تطلعيه عالسفرة.
طلعت من غير ما ترد عليه وهو قفل وراها الباب بسرعة ووطى جاب الأكياس وطلع شنطة هدايا عشان يحطهم فيها ويبقى ينزل لما تدخل تغسل المواعين.
بعد لما خلص رجعهم تاني مكانهم وكانت نورا بتنادي عليه، قال:
ثواني وطالع يا حبيبتي.
بعد دقيقتين طلع وقعدوا ياكلوا فقالت نورا بمغزى:
ما تيجي نخرج بعد لما ناكل بقالي كتير ماخرجتش، وكمان عايزة أشتري دريس لفرح بنت خالي اللي بعد أسبوع.
أسامة:
مش هينفع النهارده يا حبيبتي وبعدين الفلوس اللي معايا يا دوب على قد مصاريف البيت ويا دوب تكفينا لآخر الشهر شوفي أي دريس عندك مالبستهوش كتير وروحي فيه.
نورا بزعل:
بس يا أسامة دا يعتبر فرح أختي مش بنت خالي وخلاص وكلهم هيبقوا لابسين فساتين سواريه بس أنا مش بقولك هجيب سواريه عشان غاليين فهجيب واحد عادي بس يبقى شيك.
أسامة بعصبية:
هو عشان ساعتين الفرح هتعوزي فستان جديد عشان المنظرة؟ قولتلك قبل كدا ماتعمليش حساب الناس احنا مش هنمشي على مزاجهم ورأيهم فينا ونخرب بيتنا وندّين عشان الناس هتقول جابت فستان جديد ولو روحتي بواحد لبستيه قبل كدا هيبعدوا عنك.
يا ستي مش مكمل أكل قفلتي نفسي كل شوية طلبات وهات فلوس مش عارفة ظروفي عاملة إزاي.
وسابها ودخل الأوضة وقفل وراه.
أما هي فكانت بتبص عالباب بدموع وكسرة نفس وخذلان قطع نظرتها إضاءة الموبايل وكان عامله سايلنت فهو نسيه عالسفرة فقررت تنتهز الفرصة وتشوف إيه الرسالة اللي وصلتله دي.
أكيد هتوصل لحاجة تأكد شكها أو تنفيه، جربت الباسورد اللي لمحته بيكتبه من يومين وهي كانت بتكنس وبعد لما كتبته فتح معها.
بصت عالباب بسرعة وهي بتدعي بداخلها إنه مايطلعش دلوقتي ولا يلاحظ إنه ساب الموبايل هنا.
أما هو فكان بيلبس عشان أول ما يتأكد إنها دخلت المطبخ ينزل يقابل البنت اللي بيكلمها ويديها الهدية دي زي ما طلبت منه.
دخلت عالواتس أول حاجة لقيت الرسالة اللي واصلة دلوقتي بتقوله:
هستناك في الكافيه اللي بعد بيتنا بشارع يا حبيبي.
حطت إيدها على بوقها بصدمة وقررت ماتفتحش الرسالة عشان مايعرفش إنها عرفت عنه حاجة.
بصت على صورة البروفايل لقيتها صورة خطيبته الأولى وهي كانت عارفاها عشان حماتها مورياها صورة ليهم لما كانوا مخطوبين.
جه سؤال في دماغها:
طب ليه بيكلمها طالما سابها ولو بيحبها ليه سابها واتجوزها هي؟ وكذا سؤال بيتردد في دماغها ومش عارفة توصل لحل.
سابت الموبايل قبل ما يطلع ويشوفها ماسكاه وهي تايهة مش عارفة تعمل إيه، تواجهه وتعمل مشكلة وتروح على بيت أهلها ولا تسكت ولا كأنها عرفت حاجة وتكمل حياتها معاه وتفضل كاتمة حزنها جواها عشان الناس ماتقولش عليها إنها خربت بيتها ولسه ماكملتش سنة جواز مع إن خيانته هي سبب في دمار وخراب البيت.
وفضلت على حالها دا شاردة مش عارفة تتصرف إزاي.