تحميل رواية «فزعة المظلوم» PDF

اسمي رويدة اني ولدت الوسطية بين خوتي عندي زوز ولاد اكبر مني و زوز بنات اصغر مني كنت دلوعة امي و بوي و كل اللي نبيه يصير و متفوقة في الدراسة و أنيقة و نازكه في لبسي كل بنات العيلة يتكلمو عليا كيف نلبس و كيف متفوقة و هذا خلاني بنت مغرورة و متكبره المهم اني كنت نقرا في الثانوي و كنا نسكنو في مربع واحد مع عمامي و حوش جدي و كل جمعة نتلاقو في حوش جدي بو بوي من كنت صغيرة كنت نحب ولد عمي واسمه ايهاب ايهاب هذا اكبر مني بسنتين و هو ولد عمي الكبير بنات العيلة كلهم بيهبلو عليه لان وحيد عمي و عمي غني و الولد مشاءالله زين و نازك اني كنت ديما نحاول معاه لكن مكانش يعطي فيا وجه بالعكس كان يطنش فيا و ينفر مني و اني كنت نحاول معاه بلا فايدة لدرجة خلاص أيست منه ومعاش مشيت لحوش جدي بديت نمشي لخوالي وحوش جداي ام امي اكثر جداي كنت مربية ولد خالتي هو ولد قزون اسمه زكريا

عايش مع جداي و موجود ديما وين ما نمشو هو في نفس عمري كنت لما نجي يحاول يهدرز معاي و اني نفوت فيه لكن شي هو ما يخليني في حالي اني مكنتش نحبه ونكرها لان كان نياتي و نشوف فيه درويش و اني بطبعي مغرورة ومنشوفش فيه من مستواي ابداً وصلت بيا الدرجة ان نسمع فيه في كلام جارح زي يا مهبول و متخلف عقلياً لكن هوا مكرهنيش بكل بالعكس كان طيب معاي وكل شي درتهوله وسمعتهولا كانه مافي شي جداي تقولي عيب يا بنتي راهو زكريا مش مهبول ولد طيب وبعدين قزون وتربى بلا اهل ما تظلميشي لكن اني ما تغيرتش معاه ابداً

وحقرته المهم برغم غروري مكنتش مقصره في قرائتي بالعكس كنت ممتازة وكان حلمي نطلع مهندسة معمارية و نصمم الحياش و ما إلى ذالك بنات فصلي كانو كلهم يحترمو فيا و الولاد بيطيرو على ما نعطيهم شوفه وحده لكن اني كنت ما نفكرش إلا في ايهاب كانو معاي زميلات في فصلي مخطوبات و قالو بيكملو الثانوية و يوقفو باش يتزوجو و اني كنت نحس بالغيرة منهم المهم مشت الايام لعند ما جي العيد الصغير و لأني نعرف ان ايهاب بيجي لحوش جدي تلبست لبس حلو وبخيت ريحة و درت مكياج كنت نبي نلفت انتباهه ولما مشينا لقيته فعلاً جي قعدت نستنها فيه يخش بعيد ولما خش بيعيد جيت بنسلم عليه لكن هوا فاتني و عيدش بكل الموضوع هذا دمرني روحت قعدت نبكي ليلة كاملة ثاني يوم مشينا لحوش جداي ام امي و اول ما خشينا لقيت زكريا قعد يعيد عليا و لما جي بيعيد عليا ما عيدتش عليه و فته خشيت عيدت على جدتي وقعمزت بحداها و جو خالاتي و باقي العيلة و عيدنا على بعض و هدرزنا اني عطشت مشيت بنشرب مية من المطبخ واني نشرب لقيت زكريا قالي اني شن درتلك يا رويدة باش ما تعيديش عليا قتله اقلب زومتك عليا قالي بكل عفوية لكن مشاءالله اليوم نازكه اني تعصبت منه و عيطت التمو خالاتي قالولي خيرك شن فيه قتلهم زكريا عاكسني و اني نعيط امي وخالاتي مشو هزبوه و لزوه من الحوش ومشيت اني وامي بنروحو لقيت جدتي واقفه قالتنا تذكرو ان الظلم ربي ما يحباش و زكريا ما غلطش معاك يا رويدة لكن تو تشوفي اني ما عدلتش عليها و روحت ثاني يوم واني نفطر جتني امي قالتلي …

جتني امي قالتلي رئتي يا بنتي ربي خذ بالك حقك من هذاك التافه أخوالك بعد ما صارت المشكلة جو لزكريا و عاركوه و خالك الكبير ضربه كف قتلها احسن ما داروله خلي يتربى هالمريض و من هذاك اليوم معاش مشيتلا حوش جداي و رجعك لقرايتي و حياتي العادية خشيت ثالثة ثانوي و كانت عندي صديقات نتلاقو ديما ونهدرزو و نزورو في بعضنا وما إلى ذالك كانت وحده من صديقتي مقربه مني واسمها شيماء و الثانية اسمها اروى كنا اعز صديقات المهم في يوم الجمعة مشيت لحوش جدي واني خاشه لقيت جدي يعارك في عمي عراك قوي في المربوعة قلت يستر الله اول مرة نشوف جدي متعصب هكي شكله موضوع كبير لكن ما اهتميتيش لما خشيت لقيت نساوين عمامي وجداي سلمت عليهم و مشيت بمقعد في الدار اللي فيها بنات العيلة و ماشية سمعت جدتي تعارك في مرة عمي ام ايهاب قعدت نتصنت عليهم قلت شن فيه جدي يعارك في بو ايهاب و جدتي تعارك في امه اكيد فيه موضوع قعدت نسمع لقيت جداي تقول هذي اخرتها مش ناقص انه وقف قيده في الجامعة و مستواه ادنى توا خش على البلا الأحرف قلت اني شن صار شن دار ايهاب و اني نفكر في وحده حطت ايها عليا نخلعت تلفتت لقيتها تقوى بنت عمتي قالتلي شن اديري قتلها شن صاير قالتلي تعالي معاي وبلا حركات صغار مشيت معاها للدار و لقيت بنات العيلة كلهم مقعمزين قتلهم شن صاير قالولي ايهاب انحبس قتلهم انحبس قالولي ايه شداته دورية يدخن في الحشيشه و البنات كلهم بدو يندبو فيه و يقولو طاح من عينا بعد ما كانو بيكلبو عليه اني في داخلي قلت يقولو ما يقولو ما زلت نحبه وحتى كان انحبس هذي غلطت بسيطة اكيد حا يتوب لان عمي مش يرضى ان وحيده يضيع و يرجع للجامعة و يكمل كلامي كله دليل على ان الحب اعمى وهذي حاجة حا نندم عليها

المهم روحت اني وامي و بوي نسمع في بوي يتكلم قال كله من خوي مدلع هذا الفرح لين ولا هكي ويستر الله كان ما يدير احرف من هذا بعد ما روحنا لقيت بوي يوقض في خوتي قاللهم ردو بالكم تحادوه هذا الفرخ ايهاب ايوا مش ناقصين احنى واحدين زيه المهم بعد ايام صديقتي اروى معاش جت للمدرسة انشغلت عليها قلت لشيماء شن صار معاها اروى قالتلي نقولك لكن سر قتلها تكلمي قلبي يغلي قالتلي بوها وخوتها ضربوها و رقدت في عناية مسكينه قتلها خيرهم هبلو شن هذي الوحشية في العناية قالتلي انتي تعرفي اروى مخطوبة قتلها ايه قالتلي هذاك اليوم قالت لاماليها بتروح معاي اني لحوشنا لكن ما روحتش معاي طلعت مع خطيبها يدهورو و مشو لمطعم و لما جت بتروح لقت اماليها يستنو فيها لرو خطيبها و ضربوها حتى الخطوبة فسخوها قتلها باهي هو خطيبها قالتلي ولو مش محرم ليها هيا صح غلطة لكن اماليها بالغو لان يشوفو فيه عار في عائلات يدبحو في بناتهم على الفضايح يا رويدة روحت مو المدرسة واني متغششة عليها مشيت للمستشفى وزرتها لقيت امها معاه مشت وخلتنا نهدرزو قالتلي تحسنت و ترجع انشاءالله للمدرسة قتلها وبوك سامحك قالتلي امالي خطيبي جو وتعذرو باش بوي تراجع على الفسخ و قاللهم بشرط العرس في نهاية العام الدراسي وهكي نتهى على البنت قالوله تمام قتلها الف مبروك حبيبتي الحمدالله ربي يحبك

مشيت روحت فرحانه ليها مشت الايام وتم العام الدراسي و نجحت بتقدير ممتاز الحمدالله درت حفلة كبيرة و جو العيلة كلهم لكن جداي ما جيتش قلت اكيد زعلانه على اللي صار مع زكريا و اهتميتش الحق و كملت الأجواء في الحفلة ثاني يوم واني نفطر جتني امي قالتي عيب جداك ما جتش يا رويدة قتلها …

قتلها أكيدة زعلانه على اللي صار بيني و بين زكريا قالتلي اكيد لكن لازم نمشو نراضوها يا بنتي في الاخير هي جداك قتلها علاش المفروض هي تراضينا لأنها ما جيتش أصلاً تعرف ان زكريا غالط علاش توقف معاه و تزعل عليه قالتلي و لو يا بنتي اللي صار صار هيا نوضي و خلي نمشو نزورها قتلها حاضر لكن ما نبيش نشوف زكريا قالتلي ما تخافيش مش حا نلقوها قتلها كيف صار كيف عرفتي قالتلي اركبي في السيارة و تو نقولك ركبنا في السيارة و في الطريق قعدت تهدرز قالتلي لما صارت هذيك اليوم المشكلة خالك الكبير ضرب زكريا كف قدام العيلة وحلف ماعاد يقعد في حوش جدته ثاني يوم قال هذا حوش عيلة و مستحيل يقعد انسان زي هذا ولزه قتلها و شن صار معاه زكريا اني على حد علمي قزون وما عنده حد يمشيله قالتلي مش عارفه تو نوصلو غادي ونعرفو وصلنا لحوش جداي و لقينا الجنان حايس ما تقولش عليه هذاك الجنان آلمتكم و الحوش الداخل خامر و الكوجينة حاله خشينا لقينا جدتي مريضة و قاعده في دارها بروحها على السرير قالتلها امي خيرك يام لاباس عليك و خيره حوشك حالته حاله قالت جداي خيركم انتم جيتوني بعد ما دمرتو حياتي امي تقولها شن دمرنا حياتك يام قالت يوم تبليتو على زكريا و خليتو خواله أيلزوه قعدت بروحي. في الحوش من غير حد يساعدني خوتك هذم من يوم ما لزو زكريا ما جوني ولا وقفو عليا زكريا هو اللي كان يضم في الحوش و الجنان و يطيب و يرد في باله مني كله منكم الله لا تسامحكم اني عارفته قال كلمة لكن أ عكسش رويدة ابداً اني مربياته ونعرفه اكيد قالها بعفوية لكن انتم كبرتو الموضوع و طفشتوه قالتلها امي باهي شن الحل يتم انردوه زكريا يعني قالت وين تلقوه هونا هج جي عمه و رفعه برا البلاد بكل فارقني و عيونه تصب في الدموع زي المطر شن ذنبه وليدي هكي يصير فيه حرمتوني منه بعد ما ربيته من يوم ما توفو امه و بوه و قعد تبكي جداي قعدت امي تكست فيها وتراضي فيها امي وركبتها في السيارة رفعتها للمستوصف قاللها الدكتور عندها مشكلة من قلت الماكله و الاكتئاب اعطاها دوى وروحنا بيها و في الطريق وقفنا على محل اني وامي ونزلنا شرينا مواد غذائية و مواد تنظيف وروحنا ضمينا الحوش و طيبنا الغدى ناضت جداي تاكل مسكينه شكلها ليها ايام ما كلتش شي امي اتصلت لخالاتي وقالتلهم تعالو ولما جو قالتلهم مفروض كل وحده منه ادير يوم وتجي امي معاش تقعد بروحها و تفاهمو بين بعضهم بعدين جداي ناضت قالت والله ما نسامحكم كان ما تكلموش زكريا و تعتذرو منه اللي صار معاه كله ظلم و اسألو هالبنت تقصدني اني وقالت اسألوها شن قاللها و اني تحت ضغط جدتي و امي قتلهم ايه اني كبرت الموضوع ونسيت ان عفوي و ما يقصدش خالاتي تفهمو الموضوع لكن حسو بالذنب على اللي صار لزكريا بالنسبة لخوالي لا عدلو ولا بو يجو و احنى مروحين في نهاية اليوم قلت لامي هو عنده امالي من بوه زكريا قالتلي ايه عنده عم واحد عايش برا ومش متزوج هذا باش رباته جداك المهم بدو خالاتي يقسمو في ايام الاسبوع بينهم بحكم هما سنه مع امي و يوم الجمعة يتلقطو مع بعض في وحده من الجمعات اتصلو بزكريا يراضو فيه قاللهم …