تحميل رواية «في ميزان القلب» PDF

- وأخيراً رمضان جيه وهرجع أسمع صوته من تاني

= انا أكتر حاجة هبلة مجنناي إنك بتحبي شخص من صوته

- يا بنتي ما هو اللي قرأته للقرآن تجنن صوته هادي وجميل وفيه خشوع ترتاحي اوي لما تسمعيه

لوِت شفايفها بسخرية= ده على أساس إني معرفش يا بنتي ما هو انا حافظه صوته

- طب يلا انجزي يا بت المغرب هيإذن خلينا يلا نحط الأكل في الاطباق

انا جميلة عندي 25 سنة خلصت كلية متخرجة من أداب انجليش اللي بنتكلم عنه ده يبقى الشيخ مصطفى هو شاب في العشرينات بس الحقيقة معرفش سنه بالظبط معرفش غير صوته ولا مره شوفته ولا مره اتقابلنا هو ساكن في الشارع اللي جنب جنبنا بس بيجي يصلي بينا التراويح بس مش بسمع صوته طول السنه غير في الرمضان بس

بجد صوته في تلاوة القرآن حلو اوي مش عارفه ليه مش بينزل يحَفْظ قرآن

انهارده اول يوم رمضان وانا متحمسة جداً علشان انزل اصلي التراويح واسمع صوته

خلصنا الفطار ولبست العبايا بتاعتي وطبعا واسعة جدا ونزلت انا واختي اه نسيت اعرفكم اللي كانت بتكلمني في الاول دي تبقى اختي سما سنة21 في كلية تربية طفوله

نزلنا انا وهي وروحنا نصلي بس انصدمت مش ده صوته مش هو اللي بيصلي بينا طب ليه مش هو انا بجد أضيقت جداً و روحت وانا مخنوقه ماهو انا كنت متحمسة علشان صوته في التلاوة بس اللي كان بيصلي بينا هو شيخ المسجد عادي جداً

جيه وقت السحور لقيت بابا اتكلم عنه ف انتبهت - عارفه يا وداد انا كنت مستني الشيخ مصطفى هو اللي يصلي بينا بس للأسف حصلت ظروف معاه وسافر ومش هيجي إلا بعد اسبوع ربنا يفكها معاه يارب

انا زعلت جداً ليه ودعتله ربنا معاه وبصراحة اللي زعلني أكتر اني مش هسمع صوته لمدة الأسبوع اللي جاي ده

على آخر الأسبوع كان يوم سبت كنت بجهز الفطار مع ماما وسما خلصنا وكان لسه العصر هيأذن روحت اتوضيت وجهزت نفسي علشان الدرس

انا بدي دروس انجليش يا جماعة ببلاش للاطفال لحد إعدادي كده بكسب ثواب وفي نفس الوقت اللي مش عارف ياخد درس ويتعلم علشان الفلوس انا بديله ربنا يجعله في ميزان حسناتي يارب المهم صليت العصر ونزلت في سنتر على آخر الشارع بتاعنا انا بدي في

لحد ما المغرب يقرب يأذن بخلص وبرجع كده كل يوم

كنت ماشيه رايحه ناحية السنتر لسه هدخل خبط ف واحد من كتفه اعتذرت وانا عيني في الأرض

بس سمعت صوت وقفني - ميس جميلة

ابتسمت لأني عارفه صوته - براء

لفيت لقيته بيجري عليا براء في سنة رابعة واد عسل كده قمور و وشه بريء اوي وضحكتة تلقائيا تخليك تضحك بس تفكيره يحسسك انو لمض اوي

حضني وانا لفيت ايدي حواليه وحضنته بقاله مده مش بيجي انا كنت بدي قبل رمضان دروس برضو يا جماعة

خرجته من حضني - ايه يا عم براء الغيبه دي مش بنشوفك خالص ينفع كده

- معلش يا ستي اهو الواحد متمرمط مع العيلة دي كل شوية يطلعوا بحاجة شكل

ضحكت على طريقته - معلش يا عم بقى الواحد لازم يستحمل ولا ايه

- ايوه ما انا مستحمل اهو هو أنا اتكلمت يعني

ضحكت بصوتي عليه وعلى طريقته وقد إيه هو لمض

وقفت ضحكتي فوراً اول ما سمعت الشخص اللي كان معاه بيحمحم أضيقت من نفسي جداً لفكرة أنو شاف ضحكتي أو حتى سمعها قمت وقفت وعيني في الأرض سمعتهُ بيكلم براء - براء انا هستناك بره لما تخلص تيجلي بره هاخدك نروح نصلي المغرب بعدين نروح ماشي

هز براء رأسه بطاعة ومسك إيدي وقالي - يلا يا جيمي ندخل

ابتسمت وانا بمسك أيده انا كمان ودخلت معاه وانا بفكر في صوت الشخص ده حاسه كأنه مش غريب عليا

نفض الأفكار دي من دماغي وبدأت اشرح

اما عند الشخص ده

" في ايه مالك يا مصطفى اول مره تشوف حد بيضحك كده يعني ما هي اللي ضحكتها جميلة زي إسمها.... استغفر الله العظيم يا بني انت صايم ماينفعش كده هتاخد ذنب فوق ذنبك ..أنت ماكنش ينفع تبُصلها اصلاً ..شوفت هي كانت عينها في الأرض ازاي .. بس انا عندي فضول إزاي بتشرح الواد براء كان ديماً يحكي عنها بس مكنش بيهمني بس دلوقتي حاسس بالفضول ناحيتها اوي .. لا ماينفعش خليك .. ادخل مش هيحصل حاجه انت اسمعها بس وهي بتشرح متبصش عليها "

وفعلاً دخل وقف قدام الباب ومن غير ما يبص عليها سمع واحدة بتسألها - ميس جميلة هو إحنا ليه بنتعلم الانجليزي ده ملهوش لازمة إحنا لغتنا عربية والقرآن نزل بالغة العربية يبقى لزمتها ايه ندرس لغة مش بتاعتنا

عجبُه سؤال البنوته دي وكان عايز يعرف هترد عليها تقولها ايه سمع صوتها - احنا اه اللغة بتاعتنا هي العربية وكمان القرآن عربي بس عايزه افهملك نقطة كويسه جداً اللغة دي مش بس هما اللي بيستخمدوها احنا بنستخدمها علشان نتواصل معاهم لأن في أجانب كتير أوي مسلمين وبيشجعوا للإسلام يمكن أكتر مننا دلوقتي و كمان ربنا أمرنا بالعلم وإن إحنا نتعلم أول سورة نزلت على سيدنا محمد صلى الله عليه وسلم كانت "إقرأ" وحديث سيدنا محمد" اطلبوا العلم ولو في الصين" وحديث تاني بيقول "مَنْ سَلَكَ طَرِيقًا يَلْتَمِسُ فِيهِ عِلْمًا، سَهَّلَ اللَّهُ لَهُ بِهِ طَرِيقًا إِلَى الجَنَّةِ"

كمان اصلاً انو يكون متوفرلك انك تتعلمي وأنتِ متتعلميش فَ ده هتتحسبي عليه قدام ربنا والتعليم هنا مش المقصود العلوم وبس التعليم هنا بكافة أنواعه سواء كان علم أو لغة فهمتي يا نوره

هزت البنت رأسها وشكرتها وأنا كان في بالي عايز اعرف مين البنت دي وازاي شطره كده سواء في الإقناع أو التعليم أو كمان في دينها

خلصت شرح وأنا طلعت بره استنى براء طلع براء وكانت هي معاه ماسكه أيده وبتضحك معاه مقدرتش أمنع إبتسامتي بس بعدت وشي فوراً وانا بستغفر وبحسم قرار جوايا لازم اخده

كنت ماشيه مع براء اتكلمت وقلت له وانا على باب السنتر - يلا سلام بقى يا جميل علشان تلاقي باباك مستنيك وأنا اروح علشان مينفعش اطلع معاك وهو واقف مستنيك كده

- ماشي بس ده مش بابايا ده اخويا يا جيمي يلا سلام

وطيت عليه حضنته وهو باس خدي وطلع وأنا طلعت بعديه بسارع خطواتي علشان الحق اجهز الفطار معاهم

وأنا بحط الفطار على الاطباق سمعت صوت انا اعرفه جدا سمعت صوته وهو بيإذن فرحت جداً واخيراً جه وهيصلي بينا التراويح خلصت الفطار بسرعة وجريت على الاوضة البس العبايا ونزلت وانا بسارع في خطواتي واخيراً هسمع صوته من تاني أنا بجد الفرحة مش سعياني خلصت صلاة ومشيت أنا وسما

واحنا مروحين - خلاص سمعتي صوته يا أختي اتبسطتي

بصتلها وانا بضحك - جداً

اتكلمت بغيظ مني - تعرفي إنك برده بجد سبتيني ونزلتي وهو اصلاً ماكنش لسه بدأ

- ايوه ماهو علشان الحقهُ لما يبدأ

بصيتلي بضيق وراحت مشيت وسبتني وانا ضحكت عليها بس هصالحها يعني هصالحها روحت وجبتلها الشوكولاته اللي بتحبها بعدين روحت طلعت على السلم ولسه بفتح باب الشقة سمعت بابا بيكلم ماما صوته باين عليه مبسوط أوي - في عريس متقدم لبنتك يا سماح

اتنهدت بضيق وانا بفتح الباب وبدخل وانا بسمع ماما بتقوله - يا ألف نهار ابيض مين يا أبو سما

- الشيخ مصطفى و........

الفصل الثاني من هنا

روحت طلعت على السلم ولسه بفتح باب الشقة سمعت بابا بيكلم ماما صوته باين عليه مبسوط أوي - في عريس متقدم لبنتك يا سماح

اتنهدت بضيق وانا بفتح الباب وبدخل وانا بسمع ماما بتقوله - يا ألف نهار ابيض مين يا أبو سما

- الشيخ مصطفى

انا سمعت الكلمة دي الحاجات اللي في ايدي وقعت انتبهوا ليا وانا بصتلهم مش عارفه اوصف الموقف اتكلمت بتوتر باين عليا - هو... هو مين اللي اتقدم يا بابا

بابا اتكلم باستغراب - الشيخ مصطفى..انتي كويسه

- انا.. اه ..اه كويسه بس يعني هو الشيخ مصطفى هو نفسه يعني الشيخ مصطفى اللي بيصلي بينا

- اه

انا مكنتش مصدقه فعلاً انا حاسه اني طايره بجد هو هيتقدم ليا انا يعني انا هبقى مراته يعني واخيراً...وقفني صوت بابا اللي صدمني - ايه رايك يا بنتي متقدم ل اختك سما

ايه.. متقدم لمين اختي لا لا ازاي يعني مستحيل لا انا انا مش هقدر وفجأة الدنيا لفت بيا واخر حاجه سمعتها كان صوت ماما وهي بتصوت وبتقول بنتي

صحيت تاني يوم وانا دماغي تقيله قمت اعدل نفسي على سرير افتكرت اللي بابا قاله روحت فتحت في نوبة عياط ملهاش اخر يعني انا بقالي سنتين بحبه وفي الاخر يتقدم لاختي انا عمري ما اتنملها السوء أبدا بس انا مستحيل مستحيل استحمل ده مستحيل اني اشوفه مع حد تاني وكمان الحد ده يبقى اختي مش هقدر... لا مش هقدر أعدت اعيط مش هقدر اعمل حاجة غير كده

باب الاوضه اتفتح ودخلت منه سما لقتني ضمه نفسي جريت عليا وقعدت قدامي والدموع في عينها - وحيات عيونك ما اعرف اصلا ازاي بس كده كده هرفض مستحيل اعمل كده مستحيل اخلي قلبك يتقطع بالطريقة دي انا اسفه يا جميلة اسفة

مسحت دموعي وانا بحاول ابتسم - بتعتزري على ايه بس انتي عملتي ايه وبعدين مين قالك اني عايزاكي ترفضي لا انتي توافقي هو الموضوع صعب عليا اه بس مستحيل اخليكي ترفضي حد محترم وخلوق كده احنا مش بنلاقي راجل يصون ويحفظ في الأيام إلا قليله فَ أنتِ هتوافقي فاهمه

سما بدموع - لا مستحيل مستحيل اعمل كده مستحيل اشوفك بتتوجعي قدامي وانا اتبسط عادي مستحيل

مسحت دموعها وانا ببتسم - وانا مستحيل اشوف أن الحاجة دي فيها مصلحة لاختي وموافقش طب بصي انتي مش هتخسري حاجه هو هيجي وابقي ترفضي براحتك بس ماينفعش ترفضي من الباب لطاق كده علشان خاطري شوفي بس واحكمي

- علشان خاطرك هشوفه لكن انا مش هحكم لأن انا كده كده هرفض ومستحيل اوافق بس علشان زي ما قلتي معنديش سبب بس لما يجي هقول أن اننا مننفعش لبعض أصلا

ابتسمت لها واخدتها في حضني وانا قلبي بيتقطع بس هعمل ايه النصيب واكيد لو كان خير ليا كان هيبقى ليا

عرفنا من بابا انو هيجي بكره يتقدم طبعاً قاععدنا نروق الشقه وكل شويه سما تفضل تبصلي تتأكد إذا كنت كويسه أو لا هي عارفه اني مش كويسه مع اني بحاول أبين غير كده انا عارفه انكم مستغربين ازاي أخليها توافق بس ماما وبابا ميعرفوش اني بحبه أو اني بتمنى لو كنت مكان سما دلوقتي فَ مش هينفع هما أصلاً حاسين أن في حاجه مش طبيعيه أخليهم يتأكدوا لا طبعاً وكده كده أصلاً سما ولا في دماغها مصطفى أصلا خلصنا ترويق وروحت قعدت في الاوضه كان فاضل على المغرب ساعة لقيت موبايلي بيرن بصيت لقيت براء ابتسمت الواد ده انا بحبه أوي فتحت وسمعت صوته - جيمي انتي كويسه

ضحكت عليه وعلى لهفته - انا كويسه يا قلب جيمي انت عامل ايه

- انا كويس طب طالما كويسه لغيتي الدرس ليه ومجتيش السنتر

- علشان كنت بساعد ماما هنا يا حبيبي كنت بروق البيت معاها أنا وسما

اتكلم بضيق طفولي واضح - يعني ماكنش ينفع سما تساعد طنط وانتي تيجي

ضحكت - لا ماكنش ينفع علشان الحاجات كانت كتيرة مكانوش هيقدروا يخلصوا لوحدهم

- طيب خلاص يا جيمي بقولك..

استنتوا يتكلم بس لقيتوا سكت وحسيت ان في حد جمبه وقفه عن الكلام

اتكلمت باستغراب - قول يا براء سكت ليه

- لا ..لا خلاص يا جيمي مش حاجه مهمه انا لازم اقفل دلوقتي علشان بابا عايزني

- ماشي يا حبيبي سلام

- سلام

قفلت وانا مش فاهمه في ايه وليه سكت ومين اللي كان بيوشوشه ده بس قاطع تفكيري ماما وهي بتندهلي روحت اشوفها

اما عند براء

- انا عايز افهم انا مش قولتلك متتكلمش كلمة زيادة انت عايز تعرفها يعني

- هو ايه اللي عايز تعرفها ما هي اكيد عارفه انك رايح تتقدملها

- يا عم هي تعرف منين اني اخوك هي تعرف أن في شيخ مصطفى رايح يتقدم لكن متعرفش انا مين

- طب مقعدني جمبك ليه ومخليني اتصل بيها

ابتسم لما افتكر - علشان كنت عايز اسمع صوتها

- ايوه انا مالي ومال الكلام ده يعني.... اتقي الله ده أنت في شهر رمضان ايه الناس دي استغفر ربنا استغفر

- تعرف انك واد رزل امشي يلا من هنا

براء قام وهو بيمثل الضيق والعصبية وكان شكله يضحك - ايوه ايوه امشي و واد رزل تاخد اللي انت عاوزه وتمشيني صح

قال اخر جملته وهو بيطلع من الاوضه مصطفى اتكلم - ايه الواد الّمض ده قال تاخد اللي انت عاوزه وتمشيني قال

بس افتكر صوتها وافتكر وهي بدلع براء وبتقوله حبيبي وقال في نفسه نفسي اسمع الكلمه دي منك وإن شاء الله هتبقى قريب يا وصية الرسول

صباح يوم جديد

ماما دخلت علينا الاوضه وفتحت الساتير - يلا قوموا يا بت انتي وهي يلا خلينا نلحق نجهز الفطار علشان هيفطروا معانا يلا

اتكلمت بضيق - يلا ايه بس يا أمي انا عايزه انام الضهر .. الضهر صاحيني

- الضهر ايه اللي اصحكي قومي يا بت

وراحت ناحية سما وهي بتشد الغطا من عليها - قومي يا عروسة يلا

سما اتكلمت بضيق - عروسة ايه بس يا ماما انا لسه موافقتش ده هو انا بس هشوفه ونعرف إذا كنا ننفع لبعض أو لا وإن شاء الله هيبقى لا

ماما - وإن شاء الله لا ليه يا اختي كان ناقص ايد ولا رجل ماهو راجل زي الفُل اهو

- لا ولا ايد ولا رجل هو بس اللي.....

بصيت لسما علشان تسكت ومتكلمش هي بصيتلي وفهمتني واتنهدت بضيق

ماما - ما اتكلمي يا بت هو هاخد الكلام منك بالعافية

سما وهي بتقوم من على السرير - ولا حاجه يا امي ولا حاجه

انا فاهمه سما وفاهمه أنها مضايقة علشاني وهي أصلا مش بتفكر في الجواز دلوقتي هي عايزه تكمل تعليمها الاول بس طبعاً الحجج دي مش بتدخل على ماما ف مش هنتكلم

فضلنا طول النهار نجهز في الاكل المغرب أذن وكان صوته انا سمعته من هنا دموعي اتجمعت في عيني من هنا حاولت أتمالك اعصابي علشان سما ما تشوفنيش مع اني عارفه انها عارفه كويس اني مخنوقه بس علشان ها بحاول بابا جيه وكانوا جم معاه دخلهم اوضة الضيوف ولقيت براء فجأة بيجري عليا وبيحضني وانا في المطبخ استغربت و وطيت اسأله - ايه المفاجأة دي يا براء

ابتسملي وهو بيقول - حلوه مش كده

ابتسمت - ايوه طبعاً يا حبيبي حلوه بس انت جيت لوحدك ازاي

- جيت لوحدي ايه بس يا جيمي العيله الكريمة كلها جوه اه ما أنتِ متعرفيش ماهو الشيخ مصطفى يبقى اخويا يا ستي

- ايه اخوك ازاي و.....

قاطع كلامها دخول ماما وهي بتقوله - مامتك عايزاك يا حبيبي روحلها

مشي من قدامي وانا مش فاهمه حاجه جهزت الفطار مع ماما وقلت لها إني بس هدخل اصلي المغرب وكده علشان اتهرب طبعاً دخلت اوضتي وكانت جمب المطبخ اصلا مش بعيده ومحدش اخد باله دخلت صليت وانا حاسه بحمل على قلبي لقيت سما بعتالي رساله بتقولي - ماما بتقولك هاتي صنية العصير من المطبخ بسرعة

اتنهدت بضيق هما مصرين يخلوني اشوفه دخلت واخدت صنيه العصير وجيت أتحرك ناحيه ما هما قاعدين

سمعت صوت وتقريباً كانت مامته - امال فين العروسه يا سماح

ماما ضحكت -ما هي جنبي اهي

- بس دي مش جميلة

بابا اتكلم باستغراب - جميلة ايه بس ...مش انت طالب ايد سما يا بني

سمعت صوته وانا كنت خلاص دخلت - لا يا عمي انا طالب ايد جميلة مش سما و..........

الفصل الثالث من هنا

سمعت صوته وانا كنت خلاص دخلت - لا يا عمي انا طالب ايد جميلة مش سما

انا في اللحظة دي كأن جسمي اتكهرب انا وقفت مكاني وعيني في الأرض مش عارفه ارفعها الدموع اتجمعت في عيني ودي دموع الفرحة طبعاً

لقيت بابا بيتكلم باستغراب - ازاي وأنت قولتلي شوفتها بتدي دروس للأطفال انا فهمت كده علشان سما في تربية طفوله وكمان بتدي دروس في حضانة

سمعت صوته اتنهد بضيق واتكلم - الظاهر أن في سوء تفاهم يا عمي انا طلبت ايد جميلة علشان شوفتها لما جيت وصلت براء ل السنتر واأُعجبت بيها

بابا اتكلم - ماهو يعني يا بني ماينفعش كده انا عشمت سما ويعني العريس جاي ليها وفجأة يكون ل أختها و....

قاطعته سما بلهفة وفرحة حاستها من صوتها - لا لا ... انا معنديش مشكلة يا بابا طبعاً واصلا انت عارف اني مش بفكر في الجواز دلوقتي وانا وفقت علشان تبقى مقابلة وبس يعني

الكل بصولها باستغراب وفجأة حسيت ان الكل بيبص عليا انا..انا اه عنيا في الأرض بس حسيت انهم بيبصولي انا اتوترت والصنية اللي في ايدي كانت هتقع من كتر ما هي بتتهز خدت بعضي ومشيت من قدامهم وانا خلاص هموت من ضرابات قلبي من كُتر ما هي سريعة جداً روحت على اوضتي وقفلت الباب وأنا بحط ايدي على قلبي وببتسم بفرحة وانا بردد هو عايزني انا ...هو عايزني انا ..هييه.. قعدت اضحك ده كمان طلع معجب بيا ..ياربي بقى انا كان نفسي اشوفه .. بصراحه انا كنت متوتره وانا واقفه بسمعهم مكنتش هقدر ارفع عيني عليهم أصلاً قعدت على السرير وانا في وشي ابتسامة بلهاء... يعني دلوقتي هيكون ليا يعني ولا ايه يعني ..يعني انا هبقى مراته..اوف ياربي انا من الفرحة مش مصدقه أصلا

مشيوا ولقيت بابا بيدخلي قعد جنبي ومسك إيدي بحنيه واتكلم - انا ماشتهم وقُلت اعرف رأيك ايه اختك سما اما صدقت اصلا شكلها كانت موافقة بالاجبار بس انا عايز أعرف رأيك من غير ما أمك تقولك وافقي أو تضغط عليكي

بصتله وانا ببتسم وعيوني فيها لمعة جميله كنت عايزه أقوله تضغط عليا ايه بس يا بابا ده يوم المنى لما عرفت أنه عايزني ده انا لحد دلوقتي مش مصدقه وحاسة نفسي بحلم بس حلم جميل اوي حلم محسسني اني طايره لفوق

اتكلمت - أنت شايف ايه يا بابا

- انا شايف أنه راجل محترم وغير أنه حافظ القرآن وما شاء الله صوته يجنن وعارف دينه وهيعَملك بما يرضي الله ورسوله

اتكلمت بكسوف - يبقى اللي أنت شايفه يا بابا

ضحك عليا وقالي خلاص هيحدد معاهم أنهم يجوا بكره وخَير البر عاجله

صحيت تاني يوم بنشاط وانا بصحي في سما - قومي يا بت يلا قومي يا سما بطلي رخامه يا سماااا

سما وهي بتقوم بعصبية - اوف منك بقى هو مافيش غير سما يعني

- لا مافيش وقومي يلا علشان نلحق نجهز

كنت همشي بس لقيتها مسكت ايدي وقفتني و قامت وقفت قدامي واتكلمت - انا مبسوطه اوي علشان شايفه الّمعه دي في عينك .. علشان شايفاكي مبسوطه ربنا يديم ضحكتك يا حبيبتي و ما تفارقكيش ابدا

حضنتها وانا ببتسم واتكلمت-ربنا يديمك في حياتي يا حبيبتي ربنا يخليك ليا انت احسن اخت في الدنيا بجد انا فعلا بحبك اوي يا سما

ضحكت وقالت بخبث - متقوليش بس اوي دي احنا عارفين انتي بتحبي مين اكتر

ضربتها بغيظ - طب يلا يا أختي انجزي خلينا نلحق

- طب استني بس انتي هتلبسي ايه اكيد مش هتلبسي أي حاجة طبعاً ده الشيخ مصطفى يعني

ابتسمت بخجل - ايوه طبعاً مش هلبس أي حاجة... فاكره الفستان الاوف وايت اللي انا كنت جايباه من شهرين

- اه فاكره الفستان ده تحفه اوي وسيمبل وجميل ايوه بقى يا عم هو ده الاختيار الصحيح ذوقك حلو

- طبعاً ذوقي حلو مش اخترته

- ايوه بقى على الرومانسيه ربنا يوعدنا يارب

- طب يا بت يلا خلينا ننجز

قاععدنا نجهز الأكل ودخلت جِهزت.... الباب خبط بابا استقبلهم ودخلهم اوضة الضيوف ماما جاتلي علشان اروح اجيب العصير وأدخل علشان اضيفهم كنت متوترة اوي وانا داخله وكل ما اقرب خطوة ناحيتهم قلبي يدق عشرة

دخلت وضيفتهم براء كان فرحان اوي ابتسمت له ورحت ضيفت باباه وضيفت ماماته وكانت سُكر اوي وكمان أخته كانت عسولة اوي روحت ناحيته وانا ضربات قلبي بتعلى اكتر انا محتاجه برشام القلب بسبب ضربات قلبي دي ضيفتله العصير وانا عيني على الأرض مقدرتش ارفعها عليه

قعدت جمبه بس في مسافة ما بينا طبعاً قعدوا يتكلموا وانا مش سامعاهم مش سامعه غير نبضات قلبي فوقت على صوت ماماته - طب نسيب العرسان لوحدهم يتعرفوا

فجأة لقيتهم خرجوا وانا معاه لوحدي فوقت على صوته - طب لو مضايقة مني اتكلمي ساكته ليه

اتكلمت باستغراب وانا لسه عيني في الأرض - مضايقة ليه مش فاهمه

- علشان مش بصالي وحطه عينك في الأرض ولا كأننا متخاصمين

اتكلمت وانا ببصله - لا مش حكاية كده بس... سكت لما شوفته وانزهلت من جماله ايه الحلاوة دي اتكلمت وأنا مصدومه - أنت الشيخ مصطفى

اتكلم باستغراب - اه ليه

اتكلمت بدون وعي - أنت حلو أوي

ضحك عليا بصوت عالي اتحرجت بصراحه أنا مش عارفه ايه اللي انا بقوله ده ياربي بقى هيقول عني ايه

- مش هقول حاجه

بصتله بصدمه - انت عندك الحاسه السادسة

ضحك تاني ياربي بقى هو كل شوية يضحك هو انا قُلت حاجه تضحك طب بس ضحكته حلوه... استغفر الله العظيم ايه اللي انا بقوله ده

- روحتي فين

-ها

- من غير ها ... انا معنديش الحاسه السادسة ولا حاجة انا بس اتوقعت ممكن تفكيرك يودي لفين بعدين أنا عارف اخلاقك ولو كده مكنتش جيت ولا ايه

ابتسمت لما فهمت قصده

- بس قوليلي

لما لقيته سكت بصتله باستغراب - اقولك ايه

- هو انتي كنتي مفكرة اني وحش ولا ايه

اتكلمت بسرعه - لا لا مقصدش انا بس اللي كنت مفكره انك علشان شيخ هتبقى دقنك طويلة وبتلبس جلبيه والكلام ده لكن أنت.....

ابتسم وقال- لكن انا ايه

مقدرتش اكمل ما أنا بصراحة مش هوصف جماله يعني ده هيقول ايه مش متربيه فهمي نظمي رسمي .....بس لا ايه الحلاوة دي جنتله ايه وعيون ملونه ايه هو القمر ده هيبقى من نصيبي يا بركة دعاكي يا سماح ياما

فهم أن اكيد مش هتكلم عن جماله اتكلم بجدية - هو انا عايز اسألك سؤال

اتكلمت بهمس - اتفضل

- هو انتي اضيقتي علشان يعني رفضت أختك وكده هو فعلاً كان سوء تفاهم انا كنت عايزك انتي من الأول

ابتسمت بخجل على اخر جمله قالها وانا بحاول اتكلم - انا مش مضايقة وأكبر دليل أن ...انا ...يعني ...قاعده معاك دلوقتي..هو سوء تفاهم وراح لحاله عادي

ابتسم وحسيته فرح اوي من كلامي ده بابا دخل سألنا وأنا طبعا كنت مكسوفه اوي اتصدمت لما طلب من بابا كتب كتاب على طول بس يعني هو معاه حق انا مرتاحه له وهو مرتاح لي يبقى خلاص ايه اللي يمنع يعني

بعد شهرين

كان واقف معايا في بلكونة بيتنا اللي هو بيت بابا يعني

- جميلة عايز اقولك حاجه

بصتله بانتباه

- أنا بحبك يا وصية الرسول

انا اتصدمت هو قال ايه انا ومصطفى اتكتب كتابنا من شهر ديما كان يقولي يا وصية الرسول وأنا كنت بحبها منه اوي وديما كان يهتم بيا وكان بيحسسني أنه بيحبني بس بالأفعال وعمره ما قالها ليا دايركت كده يعني أنا فعلاً في اللحظة دي مكنتش عارفه اعمل ايه كأن لساني اتلجم

- ايه محستيش كل ده اني بحبك

- لا بس علشان انت اول مرة تقولها يعني

- هي اه اول مرة اقولها بس دي مش اول مرة احس اني بحبك فيها انا حبيتك من اول يوم شوفتك فيه ومن ساعتها وانا حسمت قراري إني اول حاجة هعملها اني اطلب إيدك قُلت مستحيل دي لازم تكون على اسمي وانا مش هرتاح غير لما تكون ليا وفعلاً بقيتي ليا وعلى اسمي بس أنا اتأخرت علشان اقولها لأني مكنتش حاسس اني لازم اقولها اصلا لأني

اتكلمت وانا عيوني بتلمع- لأنك ايه كمل

- لأن اللي حاسس بيه اكبر من الحب حاسس أن الحب دي كلمة صغيرة مافيش كلمة في الدنيا توصف اللي انا حاسهُ ناحيتك يا جميلة

- انا فاهماك لأن ده نفسه إحساسي اتجاهك يا مصطفى أنا من أول مره سمعت صوتك فيها وهو دخل قلبي كنت كل مرة اسمعه فيها قلبي يدق اكتر من المره اللي قبلها وكأنه كل مرة بيسمعك فيها بيبقى عايز يصرخ ويناديك ويقولك كفاية.. كفاية اللى بتعمله فيا ده ...أنا بحبك يا تيفا

- وتيفا بيموت فيكي يا جميلة القلب 🫶🏻

تمت