الفصل الثامن عشر

رواية في قلب القريه الجزء الثامن عشر 18 بقلم نوسة حمد في قلب القريهرواية في قلب القريه الحلقة الثامنة عشر

انجبرت علي وضع بسبب اخواني غصبا عني ما قدرو يغصبوني علي راجلي غصبوني علي الاكعب منو وبقيت عايشه في توتر وكل ما احاول اقنع الممرضه اني انا كويسه وجيت هنا غصبا عني بتديني حقنه بكون ما واعيه بعديها وبنوم فترات طويله وطبعا حته اني اهرب دي مستحيله الناس ديل مقفلننا بطريقه غريبه شديد قلت انا لازم الزم الصمت وعشان ما كل ما اتكلم البت دي تديني حقنه بقيت اشحد في ربنا انو الممرضه دي تخلي الشغل ولا اي شي يحصل يخليها تطلع من

المركز وبقيت ساكته وبعاين بعيوني وقاعده في الركن ادوني اكل باكل وساكته وطبعا الحولي كلهم مجناين رسمي وشعبي والعجب الدكتور مجنون اكتر منهن انا لمن يجي داخل بجيني اكتئاب عديل بس لاحظت لي واحده زيها زيي ساكته وحركتها عاديه ما زي المجنونات الفي العنبر بليل قلت لازم اشوفا مالا بعد الممرضه تمشي تنوم المهم بليل كده لقيتا تصلي سلمت عليها قلت ليها انتي م مريضه صاح ابتسمت وقالت لي اي وانتي م عيانه صاح قلت ليها اي طبقت المصلايه

وجات جنبي برضو كنت خايفه منها لاحظت لي قالت لي م تخافي مني انا طبيعيه قلت ليها طيب جيتي هنا ليه قالت لي خليك مني انتي جيتي هنا ليه قلت ليها انا جيت هنا غصبا عني وبقيت احكي ليها في القصه من اولها لي اخرها قالت لي اقول شي وما تزعلي قلت ليها ابدا قالت لي البسمع القصه دي لازم يصفك بالجنون قلت ليها ليه قالت لي انتي اسمك منو قلت ليها نوسه قالت لي شوفي ي نوسه ماف بت ناس بتمثل انها متزوجه اتنين والغريب في القصه العميد قال

ليك وبصم بالعشره انها زوجتو اكيد في شي غلط ولا فعلا زي ما قالو اخوانك انتي بتهيأ ليك قلت ليها انا والله صادقه في اي حرف قلتو بس م قادره اثبت قالت لي معليش يعني اخوك دا غبي لدرجه انو اتزوج ويقبل واحده لعبت بي شرفها قلت ليها وما كده بس بعد شهر ونص من فضيحتا اتزوجها ومبسوط حد الانبساط قالت لي قصه غريبه ياخ وبتجنن عديل انا هسي راسي بقا جايط معاك قلت ليها انتي لو في مكاني تعملي شنو قالت لي انا وانتي بنختلف انا لو كنت في

مكانك مالي ومالا ماعندي فيها شغله اركز في قرايتي الطلعت عشانا واخليها لربها واخوك م صغير قلت ليها فعلا انتي م زيي انا كنت لمن اشوفها كانو كشحو فيني نار بقرب اكتلها دي عرض اخوي واخوي زول صعب وكلمتو سيف بس انتي عارفه يستاهل لانو حزرناهو منها وعامل فيها راجل وكلمتي واحده وما بتراجع وووووو قالت لي واحتمال اكونو عاملين ليهو شي اصلو البتقولي فيهو دا ما بكون طبيعي قلت ليها والله دي الحاجه الوحيده الانا ما بعرفها وانا هسي

بقيت في نفسي ماقادره ع الوضع دا بجن فعلا لو خلوني هنا قالت لي لو الوضع بجنن كان جنني انا لي سنه هنا قلت ليها كيف وانتي مالك قالت لي انا جيت بنفسي هنا والمركز دا مجنونه م مجنونه بقبلوك دايرين قروش مالن ومالك قلت ليها لاحظت ليهم وكل ما اتكلم البت بتديني حقنه قالت لي شايفاها اي انا بفرق عنك انو ما باخد حقن وخشمي عندي قلت ليها طيب انتي مالك جيتي هنا قالت لي قصه طويله انا ي ستي اتزوجت لي ولد اصغر علي كان شغال في نفس

الشركه الشغال فيها وانا كنت المديره حقتو المهم حبيتو وهو وهمني بالحب وكنت مفتكره انو فعلا بحبني واتعلقت بيهو واتزوجتو غصبا عن اهلي واهلو برضو واشتريت لي بيت وقروشي كلها ليهو قال عاوز يعمل مشروع قلت ومالو راجلي اديتو حتي دهبي وعمل شغل ونجح فيهو اول جميل قدمو لي طلقني واتزوج بت عمو وخلا خشمي ملح ملح رجعتا بيتنا وخليت الشغل وجاني اكتئاب واهلي كلامهم كان كلو زي الزفت وما خلو لي كلام كعب ماسمعوني ليهو وكانو متغاظين انو

انا عصيت كلامهم وكتر علي الكلام حتي الجيران بقو يدخلو فيني وابسط عقوبه بعاقبها لي نفسي اني ادخل مصحه وجيت هنا ورغم الوضع الانتي شايفاهو بس انا مرتاحه قلت ليها انتي عارفه اقسم بالله انتي هبله وغبيه قالت لي احتمال قلت ليها في زول عاقل اجي مكان زي دا قالت لي امشي وين قلت ليها ومالك قايلاها وانتي ضعيفه كده انتي زوله كنتي مديره وزوله فاهمه كيف تجي هنا اهلك تطلعي منهم تمشي اي داخليه ولا اي مكان قالت لي وكلام الناس انا هنا

مرتاحه احسن اقولو هديك ليها جنت من اقولو طلعت من البيت قلت ليها كلام الناس شنو يعني الناس في كل الحالات بتكلمو كونو انك تتزوجي الولد الاصغر منك دا دي قسمه ماف مفر من القسمه بس كونو انك تديهو كل املاكك ابقا دا غباء منك قالت لي كنت عميانه بي حبو وهو كان لسانو حلو وانا الغبيه مصدقه انو بحبني فعلا م كنت متخيلا انها لعبه منو قلت ليها طيب سؤال ليه م ولدتي منو قالت لي غباء مني كان بقول لي م عايزين اطفال هسي نخليها بعد خمسه

سنين وما كنت مفتكره انو هو عاوز يغدر بي

قلت ليها حركاتو واضحه بس انتي م كنتي بتفهمي ولازم تطلعي تشيلي حقك وما تنكسري ليهو ولا فعلا ح تكوني مجنونه قالت لي ما بقدر قلت ليها م علي كيفك انتي زوله واعيه ما تمرضي نفسك بالغصب ختي يدك مع يدي وخلينا نطلع خليني انسند بيك ونشوف حياتنا انا متاكده اخوي بكون ساق امي معاهو يعني انا هنا م عندي قبله خلينا نعمل اي شي ونطلع ساعديني الله يساعدك قالت لي ح اساعدك والله بس انا م عاوزه اطلع قلت ليها لا ح تطلعي يعني ح تقعدي هنا

لمتين قالت لي لمن اموت قلت ليها تدفني روحك بالحياه حرام عليك نفسك صلاتك دي زاتا ما ماشه تطلعي وترجعي شغلك وتتزوجي وتلدي اولاد ينفعوك ويسندوك بعدين واهلك امشي ليهم بعد ترجعي احسن من اول بقيت اقنع فيها عشان تطلع وشكلها انصدمت شديد بس بقيت أترجا فيها لانها املي الوحيد الح يطلعني بتكون عارفه اي شي عن المركز انا مسافه اعرف اي شي بجن والله قلت ليها انتي متوضيه استخيري وفكري في كلامي وخلينا نشوف طريقه نشرد بيها قالت لي

الفيهو خير يعملو ربنا قلت ليها انا ماشه انوم انتي فكري تمام مشيت منها وقلبي مقطوع عليها وكرهت الرجال اكتر مما كرهاناهم يعني عشان الانثي ضعيفه يلعبو بيها كوره نومتا صحيت الصباح بالبت بتصحي فيني وانا نسيتا عديل قومتا مخلوعه افتكرتها مجنونه عاوزه تدقني وشغاله اكورك وهي تقول لي نوسه انا اشتياق وانا ما فاهمه هي منو لمن جات الممرضه ادتني حقنه وساقتا مني صحيت بعد زمن وراسي لافي وشامه الوضع شديد والممرضه ما مدياني فرصه امش

لي البت انتظرت لغايه بليل مشيت ليها حسيتا زعلانه مني قلت ليها مالك بسم الله قالت لي الصباح احرجتيني وبدت تحكي لي ف الحصل قلت ليها اقسم بالله م بتزكر اي شي غير انو الممرضه ادتني حقنه قالت لي جيت اقول ليك انا خلاص استخرت وح اطلع معاك بس نفكر نطلع كيف قلت ليها ايوا كده ودي عندك انتي لاني انا مافاهمه اي شي في المكان دا واستنجدتا بيك وحمدت الله اني لقيت زول واعي هنا قالت لي والله انتي زرعتي فيني امل وكل القلتي صاح ليه

ادفن نفسي بالحياه لازم اطلع واوجهه الحياه والمجتمع قلت ليها دا الكلام وصدقيني ربنا ح يرزقك زوج صالح يعوضك كل الشفتي قالت لي امين ي نوسه بس انا مشكلتي عاطفيه خايفه تاني اتخزل قلت ليها لا تاني م ح تنخزلي باذن الله وعوض ربنا جميل انتي بس ورينا صرفه نطلع بيها قالت لي دي محلوله قلت ليها كيف قالت لي الممرضه دي كريهه وما عندها رحمه لمن تشتغل بتزيد للناس امراضهم بس في واحده بت طيبه وحنينه لو شفتيها ملاك بس دوامها تقريبا بكره

انا بتفاهم معاها لانها طوالي بتقول لي حرام انتي تكوني هنا ولو شافتك انتي صدقيني حقنه واحده ح تديك ليها ماف لانها عندها رحمه قلت ليها بس كده ظابط معانا وما نهم لاي شي لا اكل لا شراب لا محل سكن نتوكل علي ربنا وربنا ح يهونا قالت لي تمام

مشيت منها مبسوطه عدينا كم يوم الممرضه الحنينه جات اشتياق اول ما شافتها اشرت لي عليها وسبحان الله من شكلها حنينه جات جنبي وسلمت علي بكل ادب قالت لي انتي نسيبه صاح قلت ليها اي بقت تسال فيني وارد عليها قالت لي انتي كويسه صاح جيتي هنا لشنو قلت ليها انا م لقيت زول اسمع لي لا الدكتور لا الممرضه الكانت قبليك انا جيت هنا غصبا عني وبقيت احكي ليها بقت تستغفر وتتعوذ كانت شايله ليها حقنه كانت عاوزه تديني ليها لمن عرفت اني كويسه رمتا في السله وقالت لي حرام انتي تاخدي حقن مهدئه وانتي كويسه قلت ليها ساعدينا انا واشتياق قالت لي بجيك بعدين لانو الدكتور لو جا لقاني واقفه وما اديتك الحقنه رزقي بنقطع قلت ليها تمام

انتظرنا لي بليل الممرضه جاتنا واتكلمنا معاها قالت لينا طيب بساعدكم بس ع شرط لو قبضوكم ما تجيبو سيرتي قلنا ليها تمام المهم قريب للصبح الممرضه جات طلعتنا وودعتنا وفاتت وطلعنا من غير م نشيل اي شي بس بي عباياتنا وكنا جيعانين شديد ولا جنيه ما عندنا لقينا لينا مطعم راقي كده دخلنا وقلنا ليهم م عندنا قروش ادونا ناكل ان شالله بواقي الناس بتاع الكاشير زول طيب قال لينا العفو انتو ضيوفنا وقعدونا وجابو لينا اكل اكلنا لمن شبعنا

وادونا عصير وما كده الولد حلف ادينا قروش شكرناهو ومشينا قلت ليها شفتي ربنا كريم لمن نتوكل عليهو بسخر في طريقنا اولاد الحلال قالت لي الحمد لله قالت لي هسي نمشي وين قلت ليها لازم نفكر انا عندي زول لازم اصل ليهو قالت لي وين هو قلت ليها شغال في جامعه ام درمان الاسلاميه قالت لي تمام نمشي ليهو وبعديها نمشي الشركه بتاعتي بس ان شالله نلقا المدير لانو بثق فيني شديد وح يرجعني الشغل من غير تفكير قلت ليها انا متفائله ح تلقي

المدير باذن الله قالت لي تمام مشينا بالقروش الادانا ليها الولد لحدي الجامعه ومشيت المكتب سالت من استاذ وليد ودوني ليهو في مكتبو لمن شافني لمن انخلع قال لي نوسه الف سلامه ليك مشيت الجامعه سالت منك وقالو مريضه قلت ليهو لا م مريضه انا بس دي مهاد قال لي مهاد مالا حكيت ليهو انها صورتنا وورتا لي اخواني قال لي بتوقع منها اي شي ي نوسه قلت ليهو وليد ممكن تحكي لي الحاصل بي امانه قال لي نوسه انا اتصلت ليك الف مره عشان احكي ليك

بس م قدرتا اصل ليك والقصه معقده جدا قلت ليهو شنو احكيها قال لي الولد المع مهاد دا ولد وزير وزول قادر شديد العميد قال لي وراني قسيمه حقتهم هو ومهاد انا راسي شطب قلت ليهو يعني مهاد متزوجاهم الاتنين……….تتوقعو شنو متزوجاهم الاتنين ولا القسيمه مزوره ؟؟؟؟؟؟؟