الفصل الثاني عشر

رواية في قلب القريه الجزء الثاني عشر 12 بقلم نوسة حمد في قلب القريهرواية في قلب القريه الحلقة الثانية عشر

فتح لينا الباب محمد لمن شافني لمن انخلع بقا يدعك في عيونو و يتمتم قال لي نوسه قلت ليهو اي نوسه طوالي امي جات وقفت في وشي وزحتني قالت ليهو بعد السلام دايراك في كلمتين وتعتبرن كلمه رجال لانو انا ولي امرها بعد وفاه ابوها محمد قال ليها كلامي مع احمد اخوها انا م بتكلم مع ولايا قالت ليهو لا تاني كلامك معاي انا والبت دي انا مسؤوله منها امام ربنا ومافي تاني قول طالما هي قالت م عايزاك وم بتقدر تعيش معاك قال ليها الزواج م لعب

خسرت فيها دم قلبي قالت ليهو ونصيبك انقطع وبالحسنه يا ولدي ادينا القسيمه قال ليها لا انا طلاق م بطلاق لو دايرين الطلاق ديك المحكمه قالت ليهو قلت كده طيب وعايزين نمش جات مرتو وشكلها حامل لمن شفتها اتزكرت انها حرمتني من بتي وقتلتا لي في بطني حسيت نفسي قلبي اتجاها اسود ودعيتا دعوه مظلوم قلت ليها ما تتهني انتي ومحمد يوم بالفي بطنك افتكرتني غيرانه منها عاوزه تنبزني محمد قفل ليها خشمها وامي ساقتني ومشت قالت لي اتفشيتي قلت

ليها لسه يمه قطعو قلبي وحرقو حشاي جرابيع المجتمع قالت لي انسي ولو عارفاك يا بتي بتبقي كده ما كان جينا من اساسو بس جيتي دي لخير الزول دا ما ح يطلقك بالساهل احسن بالمحكمه قلت ليها يمه نحنا بنقدر علي تلتله المحاكم دي قالت لي نسيتي ود سعاد محامي نستشيرو ونشوف البحصل شنو وخلاص نحنا كراعنا انقطعت من الحلتين وما بجي الا مرت صهيب تلد حسيت امي بطنها طمت بالذات لمن احمد اخوي ما سمع كلامها وهي عايزه مصلحتو رجعنا وامي رجع معاها

الهم ساعات تقول لي اتحمل نتايج غلطو وساعات تقول لي كان ولد من البت دي صعب يطلق والله يستر قلت ليها كان نفسي اقول ليك ان شاءالله البت دي تطلع احسن من اهلا بس شكلها كبيرهم العلمهم الفسق قالت لي الله يستر يارب براها تقول ما عايزاهو قلت ليها ان شاء الله وصلنا متاخرينا نومنا نومه لمن صحينا بصوت خالتو سعاد ومواعيد الجامعه فاتتني وكانت المحاضره الاولي بتاعت استاذ وليد. لو مشيت بلفت نظرو صرفت نظر من الجامعه كلها وقعدت نظفت

البيت نظيف من فوق لي تحت بقا يفتح النفس والجو كان لذيذ ومقيم امي قالت لي النعمل لي عجين زلابيه واعزم سعاد للقهوه قلت ليها الليله انتي راحه اي شي بعملو انا مشيت عملت العجين وجهزتا صينيه القهوه وقليت البن وصبت مطره خفيفه وولعت البخور مشيت ناديت خالتو سعاد وعملت ليهم الزلابيه وكان الجو رهيب والقهوه طلعت ظابطه واتونسنا ونسه شديده امي فتحت لخالتو سعاد موضوعي وقالت ليها راجلها حالف م يطلقا قالت ليها م علي كيفو ولدي بقوم

ليك بي اجراءت الطلاق سبحان الله خالتو سعاد براها القالت قبل ما نحنا نقول ليها عاوزين ولدك يقوم لينا باللازم ومشت نادتو وجات وحكت ليهو بالقصه كلها قال لي انتي ما عايزاهو قلت ليهو اكيد عمري م ح افكر ارجع ليهو لو اقعد معلقه كده قال لي ليه تتعلقي حرام كده وما تشيلي هم انا عايز عنوان ليهو واضح وبياناتو كلها والقسيمه وح احتاج ليك في المحكمه وح احاول اختصر حضورك في المحكمه شديد قلت ليهو م عندي مشكله امي قالت ليهو حقك بندي

ليك علي داير مليم قال ليها معقوله يا حاجه نسيبه دي اختي اشيل منها قروش مستحيل وقت م وقفت معاكم في عز حوجتكم دي اعتبروها وقفتي معاكم وربنا يسهل ويستر ان شاءالله طبعا هو محترم ما بتزكر زاتو عاين لي ولا عينو وقعت فيني ولاول مره حسيت اتجاهو احساس غريب بس اتملكني الخوف معقوله اهبل بي نفسي واقع بمشاعري بس في حاجه جواي بتقول لي م ح تقدري تتحكمي في مشاعرك وع قدر م اقدر ح امسك نفسي قصاد اي مشاعر لاي ولد لاني ما ناقصه

مرت الايام وولد خالتو سعاد رفع طلبي المحكمه واستدعوني واستدعو محمد وساقني ولد خالتو سعاد اول مره اقيف قصاد زول في محكمه سالوني هل مضرره من الزواج ولا المشكله شنو قلت ليهم مضرره شديد حكيت ليهم بي بتي الماتت في بطني وهو واقف اعاين والكانت سبب في موت بتي هي الان زوجتو وام اولادو وانا مستحيل اقبل اعيش معاهو وسئلوني اسئله كتيره جاوبت عليها بكل ثقه ومحمد قال م بطلق لانو خسر في الزواج مني وحجج فارغه رجعنا متاخرين قلت لي امي محمد صعب شديد قالت لي ما اصعب علي العداله اتركي امرك لله وطالما وصلنا المحاكم بطلق بأذن الله

طبعا مشيت الجامعه وليد قال لي احلي خبر سمعتو انك طالبه الطلاق بالمحكمه قلت ليهو القال ليك منو قال لي عرفت بي طريقتي وبعد محمد يطلقك ما عندك حجه انا بجي لي امك اطلب يدك قلت ليهو بالعافيه يا وليد انا تاني م عايزه اتزوج عايزه انتهي من الهم دا اول وتاني عرس م بعرس وكان مصر انو يتزوجني طمم بطني فكرت اني اتحول في جامعه وابعد منو بس سالت ولقيتا صعبه صعبه شديد ماديا ومعنويا بقيت اتحسبن علي وليد بنات الدفعه ديل كلهن ما عجبتو

بت شكلو عاوز يتزوجني ويقهرني عشان انا رافضه مجتمعهم مسكتني منو خوفه بقيت اتجنب الاقيهو وهو تركيزو كلو معاي والبنات تحتو اكتر من التراب بس ما عارفه ليه م شغال بيهن وشغال بي انا لمن اسالو بقول لي مزاج حيرني شديد من ناحيه اقول ارتبط بيهو وهو اصلا ساكن هنا واشترط عليهو اني اكون هنا ومن ناحيه تانيه اقول انتي جنيتي دا ولد خاله راجلك يعني نفس الخصال والطبع ما يقرك هو دكتور في الجامعه ما محمد مهندس ومخو مطبل زيهم وانا اساسا

ما عندي قدره ارتبط عاوزه انتهي قرايتي دي واشتغل واريح امي الرجال مرض بس

مرت الايام وجلساتي كترت في المحكمه وولد خالتو سعاد ماقصر مني لغايه ما جاب لي ورقه طلاقي وعملنا كرامه عديل وحسيت الهواء ضربني زمان بحس اني واحده هاربه من راجلها وربنا بسالني احساس ذنب عظيم كان ملازمني بس الحمد لله قدرت اتخلص منو ووقعت في حب ولد خالتو سعاد وهو ما شغال بي الشغله بس حسيت نفسي بحبو عديل لدرجه بقيت اهتم بنفسي مرات م بلبس نقاب لمن امشي ليهم عشان هو يشوفني وهو اتبرمج علي انو لو سمع صوتو ينزل راسو الارض وانا بموت موت لمن ما يعاين لي لدرجه امي قالت لي اوعك تمشي لي ناس خالتك سعاد كتير مالك حاسه بشنو بقيت اتمتم ليها وقلت ليها سمح

يمه وخفيت كراعي منهم

وليد قال لي انتهي الشهور وح نتزوج كنت بحس انو مجنون وما واعي وكنت بقول ليهو كويس بمشيهو عشان ما يسقطني في المواد وكانت نهايه سنه وطبعا من اول مره شفت فيها خطيبه اخوي تاني م شفتها الا وجنب باب الجامعه لابسه لبس مبالغ فيهو وفاكه شعرها وهي النصيحه سمحه ولونا سمح وقواما سمح ليهو حق اخوي ينبرش فيها كنا طالعين انا وزميلاتي لمن شفت منظرها انخلعت ووقفت اعاين جا ولد من اولاد الخرطوم البنشوفهم في التلفزيون وركبت معاهو العربيه

انا لمن شهقتا البنات قالن لي مالك اول مره تشوفي بت خالطه صراحه البت مزه والولد امز منها قالو دي منجضه اولاد دفعتهم قلت ليهم منو قالو لي الركبت دي قلت ليهم مالا اعوذ بالله قالو لي البت دي مارقه مروق وبي شيشتا وسجارته انا قلت ليهم سجمي سجمي قالن لي مالك بتسجمي كانت اختك ولا اختك ليك بنفسك الجامعه دي فيها البدع نعاين بعيونا بس انا بالي بقا ما معاهن وماشه ما شايفه قدامي من شده التفكير قلت كان علي القول والقطيعه في الحله

هينه دي جابت ليها قله ادب راسا عديل الولد دا منو وماشه معاهو وين ياربي اكلم احمد ولا ما ح يصدقني ومابعيد تكون ساحره ليهو وما بشوف عيوبا والله يستر علي اخوي الدكران الكلمتو سيف اللمن يقول احم كلنا بنسكت يا خوفي البت دي ما تنزل راسو ……