تحميل رواية «فَجيـعه الدَهر» PDF

بقلم:هند الطائي

فجيعة الدهر🍂

تعليقات بين الفقرات+تصويت لطفا

الحَلقه التاسِعه عَشر

_________________________________

زينب الحوراء

بللت شفايفي روحي رايحه وگلت :

_ احجي كنان راح اموت

_ هشيم نجحت عمليته

صرخت فرحانه مامصدكه:

_ صدك تحجي ؟ الحمدلله الحمدلله يارب شلونه زين كعد لو بعده يلا تعال اخذني خلي أشوفه هم سال عليه

ضحك وكال :

_ يواشج ولج هلكد ميته على هشيم الخايس شو أنا ما تسويلي هيج ؟

اجت زينب مرعوبه تصيح شكو كتلها كعد خطيه فرحت على فرحتي

ضحكت وي كنان كتله:

_ اسم الله حبيبي شطالب روحك؟

ضحك وسده اتفقنا اول ما يكعد هشيم يجي يأخذني ،انداريت على ساره حضنتها احس الدنيا ما سايعتني من الفرحه،كعدت كل شويه اضحك من الفرحه گمت رحت للمطبخ كفيت رداني وكعدت انظف مع انو كلشي مابي المطبخ نظيف منظفته ساره بس هيج من الفرحه دخلت ساره تضحك:

_ حبيب الگلب هيج خلاج تفرين المطبخ ولج غير منظفته

ضحكت عليها رجعت كملت :

_ وتكولين ما احبه الجذابه

انداريت عليها :

_صدك ترا ما احبه بس كتلج متعلقه بي لا اكثر لا تنسين اول شخص حن عليه هو وصارلي سند

_ لا تصيرين جذابه ليش مو اني ورضا موجودين ؟

_ اي بس هو غير

_شلون يعني؟

_ اقصد هو رجال سندني وصارلي ظهر بعد ما جنت بدون سند

كعدت على الكُرسي تستمعلي..كملت كلامي

_ بالوقت الي جنت اشتغل محد سندني غيره بالبدايه كلام بعدين بأفعال وكلها تُعرف ..فـ تعلقت بي لا اكثر واصلا مقرره قبل العرس اخصم هالموضوع احسن ما اعذبه اكثر

باوعتلي باستغراب وكالت :

_ شنو تخصمين الموضوع ؟ شنو قصدج

_ يعني إذا بقيت ما احبه على شنو اتزوجه؟ إذا بس تعلُق راح أتعبه اكثر وأكثر

فزت من مكانها اجت يمي تحجي:

_ صدك تحجين تنفصلين عنه! شبيج زينب تخبلتي لعب لو شنو هو؟ جاي تحضرون لزواجكم ترا وانتِ هسه يلا تكولين شنو ناويه تكسرين گلبه للولد حرام عليج هاي انتِ عود الي تعرفين الحلال والحرام هيج

_ شبيج اكلتيني وشربتيني ساره الله كريم منا لقبل العرس

باوعتلي صفح وكعدت ،اعرفها شكد تحب علاقتي بهُشيم ودائما تنصحني بهيج موضوع بس شسوي لگلبي..الي ناوي يوديني بتهلكه..

ثاني يوم..

خابر عليه كنان كال جاي حتى يأخذني أشوف هُشيم حضرت نفسي حتى العباة لبستها وكعدت انتظره وصل دك على ساره كال خلي تطلع بالباب واكف هيه عود مسويتها زعله على سالفة البارحه فتحت سبيكر كالت عيد الكلام طلعت لكيته صعدت بالسياره

_ ها شلون صار هُشيم؟

باوعلي صفح وكال :

_ اكو شي اسمه السلام عليكم سامعه بي لولا ؟

ضحكت وكلت :

_ شبيك شبيك انتَ ومـرتك كلساع واحد زعلان

ابتسم وكال:

_ الله شكد حلوه

_شنو هيه؟

_ مرتك ..

ابتسمت دعيت الهم بگلبي الله يتمم الهم على خير ويتزوجون،وصلنا طبك السياره ونزلنا دخلنا باوعلي وكال :

_صبري خلي أشوف احد يمه لولا

سكتت راح شاف ماكو احد كال :

_ نايم خلي يكعد ودخلي خطيه تعبان حيل

_ تمام .

كعدت مثل الحبابه انتظرت كل شوي ممرضه داخله شنو يعني معقوله ما كعد انداريت على كنان :

_ شوفه ما كعد

سال الممرضه كالت :

_ عيني المريض مابي شي نوم اعتيادي واصلا يجوز كعد بس رجائا إذا تدخلون واحد واحد مايصير هواي هذا المريض هواي اجوا مايصير هالشكل

باوعتلها صفح ليكول تحاسب بعدين دقيقه منو اجاه سالت كنان كال:

_ اصدقائنا هاي من غير عمامي بعد ما كايل الهم

هزيت راسي كتله :

_ هسه شلون هاي تكول بس نفر يدخل

_ دخلي انتِ حبيبتي اني دخلت قبلج وشفته

باوعتله خجلت انوب، فتحت الباب على كيفي باوعتله نايم اهوو هذا شنو مو كالت يجوز كاعد تقدمت يمه هسه شسوي اكعده لو شنو صافنه افكر ما حسيت غير وهو يكول:

_ راح تضلين صافنه

فزيت هذا مو جان نايم :

_ انتَ مو جنت نايم؟

_ كاعد وانتِ ضاربتها صفنه ردت أشوفج شتسوين

وغمز،ضحكت وكتله

_ الحمد لله على سلامتك

_ اشكرج مرتي يلا تعالي كعدي هنا

واشر على الجُربايه الي نايم عليها بلعت ريكي متوتره مادري شجاني

رحت كعدت على الطرف ايدي قريبه على ايده تلمس أطراف اصابعي وكال:

_ من تصاوبت ما فكرت بروحي بس بيج

بللت شفايفي وكلت بتوتر:

_ ليش

ابتسم وجاوب وهو يباوع بعيوني:

_ اعرف كنان الج من بعدي بس فكرت بيج فكرت اموت وما عشت وياج جوه سكف واحد ببيتنا وبغرفتنا وما..

سكت ما كدر يكمل كتله:

_ لا تحجي موزين خلي اسولفلك شصار بغيابك متت والقران حسيت كلشي صار بسرعه شكد دعيت بصلاتي على الجان سبب بحالتك هاي كلش تعبت وكنان شلع گلبي بالاتصال يلا كال نجحت عمليته و

سكتت من رفع ايده بصعوبه مررها على خدي رفعت عيني اباوع لكلشي عدا عيونه ضحك وكال :

_ هيج تحبيني؟ وخفتي عليه ؟

بسرعه جاوبت :

_ لا

تغيرت ملامحه بسرعه استوعبت طريقتي شبيج ملگوفه شبيج هسه شسوالج هذا هم تصرف كلت :

_ مو قصدي بس تعرف أنا..

_ مو مشكله حوريتي يلا خلي كنان يرجعج للبيت خابرني صديقي راح يجون عالم

فزيت وانا أترجاه :

_ لا عفيه حباب شنو ارجع ما ارجع والله اريد اضل يمك ما صدكت تكعد

انتبهت اله يباوع عليه بتركيز ما شفت احد مركز بيه من قبله طبعا تحمحمت وعدلت كعدتي وسكتت بس داخلي ادعي يقبل اضل يمه للأسف خاب ضني من حجه:

_ لا حورية دنيتي لا شلون ابقى صوبج والزلم هم تصد عينهم عليج تعقليها ؟ دكومي لفي سالفتج وروحي بعدين نسولف بيها من ارجعلج

إيست بعد ما يقبل لو اكطع روحي يمه ، كمت ترددت احضنه لولا باوعلي چن أفتهم عليه ابتسم وكال :

_ تعالي

تقربت حضنته ما يكدر يقوي الحضن بس احسه جاي يجاهد حتى يحسسني انو هو هم يريد يحضني ودعته بطريقتي الوديه وطلعت من يمي بعد ما وصاني اصيحله كنان طلعت لكيت كنان كاعد باوعلي :

_ ها زنوبه

_ هُشيم يصيحك

هز رأسه بتفهم ودخل ما طول خمس دقايق وطلع كال :

_ يلا امشي ارجعج حتى ارجع

طلعنا ركبنا السياره طول الطريق صمت محد حجه باختصار لان محد اله حيل يحجي ، بقه سؤال ببالي قررت اكسر الهدوء واسأل بلكت يجاوبني :

_ كنان اريد اسألك

_ ها

_ منو سوه بهُشيم هيج

بس گلت هيج نگلبت ملامحه للعصبيه بحيث تندمت بس اول وتالي اسأل مستحيل ما اعرُف منو الي سوه هيج قاطع تفكيري وهو يجاوبني جواب أصلا مو يم الي أنا سألته:

_ لا يضل بالج ينلزم بس لا تفكرين بهاي السالفه بعد

سكتت ما حجيت عرفت مراح يحجي بعد بس اعرف اكيد يجي يوم واعرف هاي السالفه ما ينسكت عنها ،وصلنا نزلني دك على ساره تاكد دخلت يلا حرك السياره وراح نزعت عباتي وكعدت شويه واجت ساره بأيدها كلاص ماي ابتسمتلها واخذته شربت وكالت :

_ شلون صار هُشيم شفتي حجيتوا ؟

بديت اسولفلها كُلشي لحد جيتي لهنا سكتت هيه هم حايره وياي شوي وكالت :

_ زينب عوفج من هالسوالف انتِ تعبانه ما الج خُلگ هسه اي شي ارتاحي سبحي تمددي نامي اسويلج اكل

_ اي والله خلي اسبح واصلي حتى صار قضاء استغفر الله

_ مو مشكله دخلي سبحي وصلي يلا

سمعت كلامها كلت خلي اصلي بعدين اسبح توضيت صليت كملت دعيت ربي يحفظ هُشيم ويبعدنا عن المشاكل الي صرنا ما نتلاحك عليها ، دخلت سبحت وطلعت ساره ماقبلت اله تصبلي اكل ماكو بس حطيت راسي تجيته على المخده نمت ما حسيت اله سارت تكعدني على الاكل :

_ كومي زنوبه ولج ماكو خمس دقايق لكيتج نايمه سوده عليه ادري تعبانه يلا كملت الاكل كومي

ابتسمتلها وكعدت اكلت لكمتين وشبعت باوعتلي من ردت اكوم اغسل :

_ هاي شنو عود أكلتي ؟

_ اي الحمد لله شبعت والله

_ انجبي لج وكعدي بسرعه كدامي مسحي الماعون

ضحكت وكلت :

_ ما اكدر ولج شبعت كافيني هذا الاكل

_ شماكله مفطح ترا ما مأكله شي انتِ معدتج فارغه زينب مو مال تهملين روحج نهائي لان الولد خطيه ملتهي بمشكلته ومريض مايكدر يكوم وكنان رايح على هشيم راجع علينا وأنا لا حول ولا قوه منو يعينج ما تكليلي

لزمت راسي وصحت :

_ دوختيني راح آكل راح آكل والله

ضحكت وكالت :

_ همزين كلامي جاب فايده وياج عكس اخوج

_ ها تعاركتوا ؟

هزت راسها بـ "اي" :

_ شلحكتوا تتعاركون اشو هو اكثر الأحيان يم هُشيم ملتهي ويا شنو قبلها ؟

_ اي بعدين اسولفلج هسه ارتاحي انتِ

جريتها من أيدها وكلت:

_ لا اشو اله هسه تحجين شكو شصاير

_ كُلشي ماكو هيج سوالف ، صدك ما حجيتي شصار على سالف بنت عمج !

صفنت أتذكر :

_ منيه ؟

_ ولج هاي أسيل مادري منو

_ هااا قصدج اسيا شوكت حجيتلج عليها ؟

_ ثول غير ذاك اليوم ، المهم شصار ما صار

_ كلشي ماكو بعدين ما تهمني أنا واثقه بهُشيم نهائي ما تهمني هيَّ

هزت راسها ساكته تضحك من جوه لجوه ، كتلها تنطيني تلفونها اتصل على كنان اتطمن على وضع هُشيم انطتني التلفون وطلعت

دكيت على كنان اول رنه ما جاوب الثانيه فتح الاتصال بسرعه كلت :

_ كنان أنا زينب شلون صار هُشيم ؟ ما كالت شوكت تطلعونه لو يبقى م....

عاط بيه :

_ شبييييج خلييي الحككك اجاوبج اكلتيني و******

سكتت صدك ما لحك عليه ثواني وحجه :

_ راح نطلعه باجر الدكتور كال ومابي شي زين بس يحتاجله عنايه بالبيت

_ اي ميخالف احنا نعتني بي

قاطعني:

_ ما راح يجي للشقه ، للبيت يروح

بهتت ملامحي شنو هاي يابيت صدك يحجي ، شوي وكال :

_ وياي خويه؟

انتبهت على المكالمه ورديت:

_ اي اي وياك أنطيني هُشيم اريد احجي ويا

_ صبري اشوفه كاعد لا

انتظرته شوي وسمعته يكول"هاي زينب تريد تحجي وياك"

سمعت صوت هشيم :

_الوو

_ هُشيم

رد:

_ حاله ومـاله مريتي أمري؟

صفنت أتذكر شردت احجي هذا نساني خرب رجع حجه:

_ ها بعد سنتين ترديلي الجواب؟

تذكرت وحجيت بسرعه عود متعصبه حتى أنسى الخجل :

_ عود صدك الي گاله كنان تريد ترجع للبيت مو للشقه ؟

_ اي حوريه

_ ليش؟

رد علي :

_ هناك احسن ولو ماكو احسن من الكعده يمج بس هناك الولد يداروني إذا اكعد هين اربط كنان وياي وشغله شنو اربط الرجال وياي

_ الولد لو اسيا تداريك

سمعت ضحكته شوي ورد علي:

_ يا طلابة اسيا ولج بويه ياهو الگلج أنا مهتم الها؟

ليش العنده مثلج حوريه هم يباوع على باقي النساوين؟

صحت بي:

_ لا تنسيني عود بهذا كلامك شنوه هشيم شنوه تعرف كلش زين هيه تحوم وراك تعرف لو ماتعرف لا تسوي نفسك ماتعرف وتريد تروح تكعد يمها

_ شنو تغارين ؟

صفنت هذا شبي أنا وين وهو وين :

_ شبيك يا غيره ؟ كتلك وارجع اكول ما احبك بس اي مره طبيعي تغار على خطيبها لو زوجها يعني مابيها غلط حتى لو ما احبك ومتعلقه بيك لا اكثر بس تبقى رجلي تبقى لو ماتبقى ؟

_ ابقى يابه ابقى

_ خلاص جا لا تناقشني

_ بويه وانا وين اكدر اناقشج اكلتيني المهم جا إذا ما تقبلين اروح وحدي هناك تعالي وياي

رديت بدون تردد،بهل أثناء دخلت ساره :

_ شبيك هُشيم تعرف أنا يم ساره ومستحيل اعوفها بعد شكو تكلي هيج

_ لان اعرف كتلج جا ماترضين اروح ولا ترضين تجين ؟

سديت الحاكيه وكملت كلامي :

_ بكيفك روح روح بكيفك انتَ تريدها حجه حتى تروح يمها هيه گوه تكيف عليها اشبع بيها

ماسمعت بس عيطته:

_ زيـــــنب حسچ لا تعلينـــــه عليه اسلوبج هذا بطلي أنا رجلج مو صاحبتج

ستوني اريد ارد ما اسمع اله سد الخط بوجهي الدمعه صارت بعيني كلش اختنكت كعدت يمي ساره وكالت :

_ زينب ليش شبيكم

اول ما حجت هيج بجيت عبالك چن منتظره هالسؤال سولفتلها كامت تلوم بيه ليش مارحتي وشكو باقيه هنا وشو أنا وصرت زينه بعد شكو وووالخ...رزايل ساره الما تنتهي لحد ما فعلا طلعتني أنا الغلطانه :

_ يعني هسه صرت أنا الغلطانه؟

_ ونص همين غلطانه ونص يعني تصيحين على الولد وتريدين تفرضين رأيج بهيج موضوع وتتجاوزين وتريدين يسكت ؟

مهما يكون زينب هذا زوجج حتى لو ما تحبي شنو ترا الحب وحد والاحترام وحد وباجر من الصبح تدكين عليه تكليله اروح وياك وإلا ازعل منج وتنسين عندج اخت فهمتيني

_ شبيج ساره مخبله مستحيل اعوفج وحدج

_ وين عايفتني بصحراء؟ ترا عندي تلفون وأكدر اتصل بيج وكنان موجود على كد شغله ويجي بعد شكو ، زينب انتهى الكلام باجر ترحين يعني ترحين كعدت ولكيتج ما متصله على هُشيم اخرب وياج

حرت صفنت عليها شوي وكالت :

_ يلا نامي الوقت تاخر

هزيت راسي بقبول عفتها وكمت توضيت وصليت ركعتين دعيت ربي يهديني على الطريق الصح لان أنا ذات نفسي ما جاي اعرف شنو جاي اسوي ، بس حطيت راسي على المخده نمت ..

ثاني يوم....

كعدت بالتسعه اول ما كمت فكرت بكلام ساره البارحه باوعت تلفونها حاطته يمي لوتيه عود يعني خابري لزمته اتصلت النومه بعيني بس شسوي خاف يروحون اول دكه ما جاوب رجعت اتصلت جاوبني :

_ كنان أنا زينب

أجاني صوته تعبان:

_ ها زينب

_ مرني اريد اروح وي هُشيم للبيت

سكت شويه وكال:

_ ماشي بالعشره يمج تحضري خويه

سديت الخط كمت غسلت وتوضيت وصليت ولبست عباتي وحطيت كم بجامه وشي احتاجه بجنطه شوي جبيره ورحت اشوف ساره طبيت لكيتها نايمه بستها من راسها وغطيتها وطلعت انتظر كنان دك عرفته وصل رفضته وحطيت تلفون ساره يمها وطلعت على كيفي طلعت من الشقه باوعت سيارة كنان هُشيم بالصدر هم يباوعلي ماهتميتله درت وجهي وصعدت صعد كنان الجنطه وصعد الطريق كله ساكتين لحد ما وصلنا تلگونا الولد بالهوسات وجايبين ذبيحه ما خلوني انزل سووا طريق يلا نزلت دخلنا تلگونا النسوان بالهلاهل والجكليت ليكول حامل وجابت مو طلقه ، الكل اجه تحمدن بالسلامه اله ويرحبن بيه باوعت اسيا تقدمت باوعت لهشيم طبعا المكياج خريطه حمره ورديه وخدود حمررر الكحله جارتها تقربت عليه حضنته فتحت عيوني هيج صلافه ماكو كالت :

_ الحمد لله على السلامه عيوني انتَ بعدوينك ولابيك شكثر خفت عليك شحلات طولك هسه وانت تصد ليه

رد عليها بـ:

_ الله يسلمج خويه .

من شافته هيج كلبت وجهه اجت ناحيتي كالت :

_ هلاو حبي شعجب اجيتي؟

رديت وانا مبتسمه :

_ يم زوجي خو ما اعوفه وحده بهل ظرف اكيد يحتاج مرته ويا مو احد غيرهااا

شددت على كلمة غيرها باوعتلي بحقد ابتسمت كدام العالم وراحت روحه بلايه رده كعدنا شويه وهُشيم كال اريد اصعد ارتاح گام رُفدان صعده وهو سانده ورحت وراه ما احس اله انسحبت من ايدي حيل باوعت اسيا جرتني من ايدي وهيه تكول :

_ شنو عبالج من سويتي هيج راح أخاف منج لج لا تسوين هاي السوالف وياي خاف عبالج انه عفتلج هشيم لا والله بسيطه

ضحكت وكلت :

_ شنو عفتلج هشيم؟ حبي استوعبي رجلي رجلي يعني هاهيه تخطي شبيج لزگتي بعدين تعالي شلون تجريني هيج

بهل أثناء اجت رسيل بس شافتنا هيج اجت تركض :

_ شكو شبيجن

مارديت سحبت ايدي بسرعه وضربت اسيا راشدي بقوه شهكت رسيل كلت :

_ هاي حتى تتعلمين ما تمدين ايدج على شغلات مو الج ولا بعمرها راح تصيرلج

كلتها ورحت جاي اريد اصعد ركضت وراي رسيل :

_ ولج هاي شسويتي

التفتت الها احجي بهدوء :

_ شنو

_ شنو شنو ضربتي اسيا شكو شبيجن ما لحكنا حتى نكعد وياج وصار هالشي

_ بعدين تعرفين بس عرفي هاي حيه واذا ما نكطم راسها تلدغنه كلنا

عفتها وصعدت دكيت الباب مال غرفة هشيم صاح "دخلي حوريه"

ابتسمت ودخلت لكيته على جربايته كاعد ابتسم واشر اروح يمه رحت كعدت كتله :

_ شلون صرت ؟

_ بشوفتج اكيد زين

ابتسمت وكتله :

_ اروح أنا خاف تريد ترتاح

_ ارتاح وبعيد عنج؟

مردت اصابعي كلما احجيلج كلمه يتغزل هسه شسوي ضحك وشال ايدي باسها وكال :

_كافي تمردين بيهن باعي صارن حمر من وراج

هزيت راسي بقبول سكتت هو هم ضل ساكت شوي واستأذنت منه اروح يم البنات ما صدكت كال روحي طلعت برويحتي رحت غرفة البنات لكيت بس فيروز كاعده صافنه بس دخلت باوعتلي وابتسمت :

_ هلو حوريه شلونج عمري مشتاقتلج والله

كلت بضحكه :

_ هاي منين سامعتها حوريه

_ من هُشيم جان يروح ويجي حوريه ما حوريه عاد حفظته وصدك انتِ جنج حوريه

ابتسمت وكلت:

_ عمري فدوه ، جا وين البنات ؟

_ جوه تلكيهن اصيحهم؟

_ لا لا عليش ما اريد هيج كلت اكعد عادي هسه شوي من يجن نكعد

هزت راسها وكعدت بقينا نسولف سوالف عامه لحد ما لاحظت البنيه منعسه كلت خلي اكوم عيب بعد شنو :

_ يلا فيروزه اروح أنا

_ وين ابقي بعد وكت

_ الساعه ب١١ اسلم على البنات وانام وانت هم تعبتج وياي بالسوالف

ابتسمت وكالت :

_ بالعكس كلش تونست والله

ابتسمتلها وطلعت من الغرفه ماكدر اروح للبنات عيب استحي خاف هم نعسن الشغل لاحظت كله عليهن كلت خلي اطلع بره اشتم هوه وادخل انام نزلت على كيفي اكو باب من وره اندله يطلع كبل على الحديقه والبستان طلعت منه اتمشى واسولف وي روحي كعدت بنص الحشيش واحجي:

_ هسه شحال ساره خطيه وحدها صوجي عفتها

أدردم وي روحي شوي وكلت خلي ارجع مشيت بنفس الطريق كل شوي اندار من الخوف صارت دنيا ظلمه ما اشوف ما احس اله وكعت يبوووو شسويت بروحي كمت انكث روحي بالكوه يلا وصلت للبيت دخلت على كيفي لا احد يحس وشيخلصني دخلت المطبخ شربت ماي توني جاي اصعد جان اسمع صوت اسيا تبجي انصعقت اول ما نطقت :

_الله يخليك استر عليه وعلى الي ببطني ابنك هذا ابنك..

يتبع....

عن حَـال زَينب الحـوراء:

_ ما طول يَم غِيري رحَت

گل صَلح ماظل بيها

عَديتلك دَمعه وچَرح

بَس هاي ما أعِديها !.

_________________________________

ها شلونها القفله ؟

طبعا الجاي أصعب وأصعب هاي بسيطه القفله

اتحضروا نفسيا للبارتات الجايه

التنزيل موعده بالقناة مال تليكرام

هاي قناة التليكرام

حسابي الانستا

‏hiz_li0

الباقِياتُ الصَّالِحاتُ:

-سُبحــانَ الله

-الحمــــدُ لله

-لا إلهَ إلا الله

-اللهُ أكبـــر

-لا حَول ولا قوة إلا بالله

-سُبحــان الله العَظيــم

-سُبحــان الله وبِحَمـده

-أستَغفِــر الله وأتوبُ إليه

-اللهُمَّ صلِ علّى مُحمد وآل مُحمد.