تحميل رواية «ضحكات الأموات» PDF

تم العثور على جثة لفتاة في الثلاثينات من عمرها صباح اليوم.المثير في الأمر أن الجثة كانت بلا ثياب نهائياً كما ولدتها أمها والأغرب من ذلك أنها كانت مبتسمة وكأنها تشاهد حلم جميل كيف لشخص قد قتل للتو أن تظهر علي وجهه علامات الفرحة هكذا. كان هذا لغز غريب لم يستطع أحد فك شفرته . ثم بعدها بشهر واحد فقط يتم العثور على جثة أخرى تحمل نفس الصفات تقريباً فتاة جميلة في الثلاثينات من عمرها ،بدون ملابس تماماً، مبتسمة بشكل غريب،

جثتين في أقل من شهر بنفس الشكل يبدو هذا أمر مريب ، وعندما تم سؤال بعض الأشخاص ممن قد شاهدوا الجثث قالوا بأن ما يحدث لهو بسبب الجان ، هناك جني يقوم بقتل الفتيات ثم يتلبسهم ويضحك ضحكة أخيرة تظهر علي وجه القتيلة في رسالة تحذيرية منه ولكن لا أحد يعلم سبب هذه الرسالة ، انتظرونا معنا وسنعلمكم بكل جديد اعزائي المشاهدين.

************

اظن انت كده فهمت إيه القضية اللي أنا هديهالك الموضوع دخل في جن وعفاريت والله اعلم هيكون في ايه تاني . أنا اخترتك انت علشان عارف انك ظابط ذكي ومجتهد وهتقدر تحل اللغز ده، بس لازم يكون في أسرع وقت زي ما انت شايف الموضوع عمال ينتشر والناس خايفة ومش عارفين يعملوا ايه . والإعلام ما بيصدق يلاقي حاجة زي كده علشان يكبر الموضوع..

/تمام يا أفندم إن شاء الله اكون عند حسن ظن حضرتك واقدر احل اللغز الغريب ده .

خرج الظابط حسن وهو يحمل عبء كبير على كتفه كيف يحل لغز مستحيل كهذا..

حسن هو ظابط قوي ذكي لا يعترف إلا بالدلائل والحقائق الملموسة. يصعب خداعه وهو حاد الطباع بعض الشيء لكنه عادل دائماً ويحب أن يحقق العدالة هو في الأربعينات من العمر حليق الرأس بملاح حادة تعطيه هيبة ووقار كبيران ..

جلس يفكر من أين يبدأ و أي طريق سيسلك حتى يعثر على إجابات يقدمها لمديره .

حسن يفكر…

دلوقتي جثتين ميتين بيضحكوا وعريانين ومفيش اي علامات تعذيب عليهم لا وكمان مفيش اي علامة أنهم يكونوا تعرضوا للاغتصاب حتى، بس زي ما بيقولوا الأهالي إن اللي بيعمل كده جن والجن مش هنقدر نمسك دليل ملموس علي أنه اغتصب الجثتين قبل ما يموتهم. إيه ياعم حسن؟ انت هتمشي ورا التخاريف دي ولا ايه هو في حاجة اسمها كده يعني ايه جن يغتصب واحدة ويقتلها وبعدين يتلبسها ويضحك علشان تظهر الجثة إنها بتضحك هي كمان. كلام مش منطقي خالص . ..

يدخل العسكري محمد.

بعد أذنك يا فندم عندي خبر مهم.

/قول يا محمد.

/يا افندم تم العثور على جثة تالتة النهاردة فى المترو.

/جثة تالتة!! الظاهر كده إحنا داخلين علي سواد جهز العربية ويلا بينا بسرعة علي هناك.

يصل الظابط حسن في عربة الشرطة التي يقودها العسري سيد تتوقف العربة امام محطة المترو ويترجل الظابط حسن منها وتبدو عليه علامات الحيرة والتفكير.

يقترب أكثر من موقع الجريمة ليجد أمامه مشهد قد اعتاده في الآونة الأخيرة.

فتاة جميلة في الثلاثين من عمرها . مقتولة بدون اي علامات تعذيب أو اغتصاب في مشهد حير كل من رآه…

يبدأ حسن في التساؤل مع من حوله من العساكر والأطباء الشرعيين والشهود عسي أن يصل لأي نتيجة او خيط صغير يدله على حل لهذا اللغز الغريب.

حسن للطبيب الشرعي.

/ لقيت اي حاجه مختلة بين الجثث التلاتة دول يا دكتور فتحي؟ اي حاجه تكون غريبة غير اللي بنلاقيهم كل مرة ؟

/لا يا فندم للأسف مش قادر احدد اي حاجه مختلفة نفس الطريقة ونفس الأسلوب. اي ان كان اللي بيعمل كده فهو محترف وعارف هو بيعمل إيه بالظبط ومش بيسيب وراءه أي أثر أو علامة تدلنا عليه.

/يعني ممكن يكون جن زي ما الناس بتقول؟؟

/والله يا فندم كل شيء جايز اللي احنا بنشوفه في القضية دي مش طبيعي ابد….

وقبل أن يكمل حديثه يقاطعهم العسكري محمد.

/يا فندم مراقب الكاميرات بيقول انه شاف حاجة مهمة جداً ولازم يقولها لحضرتك شخصياً ..

/هاته بسرعة طيب ..

/تعالي يا عماد كلم حضرة الظابط .

يدخل عماد بعيون خائفة وجبين يسيل من العرق وارجل متوترة وكلمات مبعثرة وكأنه قد شاهد ملك الموت منذ قليل.

/تعالي يا عماد متخافش قولي شوفت إيه ؟

/اااانا شوفت حاجة مرعبة يا فندم لساني مش قادر حتى ينطقها وكل ما افتكر المشهد بحس ان قلبي هيقف من الخوف والرهبة …

/متخافش استجمع نفسك بس واحكيلي ..

يبدأ في التحدث ولكن تخونه الكلمات مرة بعد الأخرى يصمت ويتأمل وكأنه يتذكر ما قد رآه من قليل وكلما كان يحاول أن يتحدث كانت تخرج من فهمه كلمات مهزوزة يغلب عليها الخوف . لذلك قرر الظابط حسن أخذه إلى مركز الشرطة حتى يستطيع أن يأخذ إفادته هناك..

عندما وصلوا إلى قسم الشرطة وبعد محاولات كثيرة من الظابط حسن لتهدئة عماد.

بدأ أخيراً عماد في سرد قصته. كانت الكلمات تخرج من فم عماد كصاعقة برقية تضرب حسن. جلس حسن مذهول مما سمعه للتو اي عقل يصدق ما يحكيه عماد هذا .. تأكد حسن بأن الأمر أكبر مما يتخيل..

يتبع…

بقلمي..

الجزء الثاني.

قصة..

أنا شوفت شئ عملاق كده كان طويل ولونه كله أسود زي سواد الليل بالظبط كان له انياب بارزة وشكلها مخيف جداً وتحس انه مش من عالمنا خالص كان داخل المحطة وشايل على يده جثة . انا كنت قاعد مرعوب وانا بتفرج علي الكاميرات وبشوف المشهد ده بيحصل قدامي ،

بعد ما أتأكد إن مفيش حد شايفه بدأ يفوق الجثة الظاهر كده والله اعلم أنه كان مخدرها قبل ما يجيبها هنا ، بعد ما فاقت ابتدأ يقول تعويذة بصوت عالي كده تعويذة كانت غريبة ومش مفهومه وبعدين قرب من الجثة وابتدا يخنقها بايده لحد ما

الروح خرجت منها وهنا لقيته اتحول لطيف أسود ودخل جو الجثة من بوقها ومن عنيها وهنا حصلت حاجة غريبة الجثة ابتسمت وفضلت علي الوضع ده لحد ما سيادتك والناس اللي معاك جيتوا شوفتوها الصبح.. بس ادي كل اللي حصل حضرتك..

/بس انت يا عماد ليه محاولتش تنقذها او تعمل أي حاجة بدل ما انت وقفت تتفرج من وراء الكاميرا كده؟

/انقذ مين يا بيه ودي حاجة حد يقدر يعملها دنا كنت هعملها علي روحي وانا قاعد بس بتفرج واي حد تاني مكاني مكنش هيقدر ينقذها حتى لو كنت سيادتك بنفسك آسف في الكلمة يعني..

/طب انت بتقول إن الحادثة حصلت على الساعة تلاتة الفجر كده صح؟؟

/ايوه صح

/امال انت مبلغتش غير الصبح ليه؟

/يا فندم انا كنت قاعد مرعوب ومكنتش قادر أتمالك أعصابي خالص ورجلي مكنتش شيلاني ولحد ما قدرت اتمالك اعصابي كان الصبح طلع واتصلت بيكم علي طول..

/بص هو الكلام مش داخل دماغي اوي بس خلينا معاك للاخر ، انا بعدت اجيب حد يحللنا اللقطات اللي في الكاميرا بتاعتك دي علشان أشوف الواقعة بنفسي ولحد ما اشوفها مش عايزك تتكلم مع اي حد عن اللي حصل تمام؟

/ماشي يا فندم تحت امرك..

*************

في اليوم التالي يشاهد الضابط حسن الأخبار ليعرف إذا كان قد تسرب شئ ما عن الواقعة للصحافة ، فيجد امامه المدعو عماد وهو يجلس في برنامج تلفزيوني ويقص كل ما رآه علي المشاهدين بل ويزيد بأحداث من عنده ليجعل القصة مثيرة أكثر.

فجاة وفي اقل من يومين أصبح عماد وقصته هما حديث الساعة في البلد . ودب الرعب أكثر في نفوس الناس،

وأصبح الجميع يتحدث عن الكائن الغريب الذي يقوم بقتل الفتيات ويتركهن عرايا مبتسمين في مشهد حير كل من رآه أو حتى سمع عنه..

يدخل محلل الكاميرات ليبلغ الضابط حسن بالمستجدات..

/ اديني الفيديو بسرعة دنا مستنيه على نار يمكن نلاقي فيه اي حاجه توصلنا للي بيعمل كده..

/للأسف يا فندم مش هتلاقي اي حاجه تفيدك ..

/ازاي يعني والحاجات اللي عماد بيقول إنه شافها بنفسه؟

/زي ما بقول لحضرتك كده إحنا فرغنا الكاميرات كلها و اتفرجنا عليها اكتر من مرة وكان الوضع عادي جداً مفيش اي حاجة مريبة. لكن في حاجة لازم حضرتك تعرفها من الساعة تلاتة صباحا لحد تلاته ونص مش موجوده ليها أى أثر خالص.

/ازاي وضح لي؟؟

/يعني مقصوصة حضرتك .

/ودي ممكن تحصل عادي يعني غلطة في الكاميرا ولا ايه بالظبط ؟.

/لا حضرتك دي بتحصل بفعل فاعل بس ، يعني لازم يكون حد هو اللي عمل كده وقص اللقطة دي.

/طب شكراً ، لو احتجتك تاني هبلغك.

كده في حاجات كتير مش مظبوطة ومش راكبة علي بعضها وكل حاجة فيهم هي طريق غلط والواحد بقي واقف قدام طرق غلط كتير أوي بس ثانية واحدة الطرق الغلط دي كلها نهايتها عند عماد، الواد ده لازم ييجي واقعد اتكلم معاه علي رواقة بقي…

بعد ما تم إحضار عماد لمركز الشرطة جلس أمام الضابط حسن وهو تبدوا عليه الفرحة الغريبة والغير مفهومة..

/ايه ياعماد وشك فرحان كده ليه انت كسبت اليانصيب ولا حاجه ؟

/لا أبدا يا فندم ،بس من يومين وانا بقيت مشهور أوي وكل القنوات عايزة تعمل معايا لاقئات وبقيت حاسس إني نجم سيما ولا لاعب كرة مشهور..

/اه، طب ياسيدي مبروك ، بس مش ده اللي انا عايزك فيه انا عايزك في حاجة اهم ، إحنا راجعنا الكاميرات وشوفنا كل حاجة وكلامك طلع مظبوط يا عماد الله ينور عليك.

/مظبوط ازاي حضرتك وشفتوا كل حاجة إزاي ؟

/ايوه ياعم شوفنا كل حاجه ،بس مش عيب تضحك عليا ومتقوليش إن انت اللي قتلت البنت.

/قتلت مين حضرتك ، انت بتقول ايه أنا مقتلتش حد

/ازاي ياجدع ده الكاميرا جيباك وانت بتقتلها بس مش الكاميرا اللي انت قصيتها وقطعت منها نص ساعة كاملة اللي قتلت فيها البت لا دي الكاميرا الي كانت في الحيطة التانية واضح انك نسيتها دي يا عمدة بس متخافش احنا منسيناش ..

/والله ما قتلت حد يا بيه ده انا عبيط ولا يمكن اقتل حد أبدا

/ يا عماد بقولك شفناك تقولي عبيط عيب عليك.

/شوفتوني ازاي بس وانا أصلا كنت….

/ ها ما تنطق كنت ايه.

/هفهم حضرتك كل حاجة دلوقتي بس اديني فرصة اشرحلك ……

يتبع..

بقلمي..

الجزء الثالث..

قصة.

/ طب احكي يا عماد واوعي تكدب عليا علشان ورينا هعلقك من رجليك لو كدبت علشان انا القضية دي تعبتلي اعصابي ومش ناقص أي حوارات خالص.

/لا هحكي لحضرتك كل حاجة بالظبط . الساعة اتنين بالليل بتبقى الدنيا هاديه دايما ومفيش اي حاجه خالص علشان كده بستغل الوضع ده و بريح شوية على الكرسي قدام الشاشة، بعد ما صحيت على الساعه سته الصبح كده ببص في الكاميرات قدامي لقيت الجثة مرمية على الأرض اترعبت ومكنتش عارف اعمل ايه و ركبى كانت بتخبط في بعض راجعت الكاميرات علشان افهم ايه اللي حصل وشفت شخص لابس اسود في اسود ولكنه شكله إنسان عادي بس كان لابس قناع ومغطي وشه وكان شايل الجثة دي وحطها علي الأرض وابتدأ يخلع عنها ملابسها كلها وسابها زي ما ولدتها أمها وبعدين ومد ايده ناحية وشها وسحب حاجة كده مقدرتش اشوف ايه هي مكانتش واضحة اوي في الكاميرا ولكنها والله اعلم تشبه القناع كده و بعدها اخرج كاميرا من شنطته وابتدا يصور الجثة ومشي بكل هدوء ولا كأنه عمل حاجة خالص .

/وبعدين كمل ، جبت حكاية الوحش دي منين؟ انت بتتفرج على افلام كتير ولا ايه ؟

/ ولا افلام ولا حاجة حضرتك بس لما مكنتش عارف اعمل ايه اتصلت بمراتي لاني دائماً بشورها في كل حاجه بعملها . قولت يمكن يكون عندها حل علشان مروحش في داهية ويقولوا كان نايم وسايب شغله ويمكن اتحبس فيها.

كلمتها وحكيت لها اللي حصل ولكن هي كان عندها راي تاني ، اخترعت لي قصة الوحش دي وقالت احكيها ولما الناس هتعرف هتتشهر اوي والكل هيعوز يسمع منك القصة وبكده نتشهر ويبقى معانا فلوس كتير واهي فرصة مكناش نحلم بيها وجت لحد عندنا . ولازم نستغلها كويس . اقتنعت بكلامها وقررت إني انفذ الفكرة ولما حضرتك سألتني اضطريت اكدب عليك واحكيلك قصة محصلتش..

بعد صمت طويل يتحدث الضابط حسن

/الله يخربيتك انت ومراتك ، خلتوني عمال افكر وكنت هتشل لأني مش مصدق الكدب اللي انت كنت بتكدبه وكنت هشيلك انت الجريمة بسبب عبطك وطمع مراتك.

/يانهار اسود ابوس ايدك يا بيه أنا معملتش حاجة ابوس ايدك متودينيش في داهية .

/امشي يا عماد امشي قبل ما اولع فيك انت ومراتك.

أثناء خروج عماد يدخل العسكري محمد ليبلغ الضابط حسن بأن هناك جثة أخري وجدت متروكة في جراج سيارات عمومي ، ليهب الضابط حسن منفعلا.

/طب فرحني وقولي إن الجراج ده كان فيه كاميرات .

/ ايوه يا فندم الجراج كان فيه كاميرات مراقبه وفي كمان مفاجاة هتبسط حضرتك.

يذهب الضابط حسن مسرعاً إلى موقع الجريمة وهو يشعر بأنه قد اقترب من حل ذلك اللغز الذي حيره في الفترة الأخيرة وقبل ان يذهب الى الجثة يذهب مباشرة الى كاميرات المراقبة ، ليشاهد ما حدث. ثم يجد نفس الشكل أمامه رجل يرتدي الأسود الكامل ويحمل امرأة بين يديه ثم يلقيها علي الأرض ويقوم بنزع كل ملابسه ثم يخرج كاميرته ليلتقط لها الصورة المعتادة ولكن قبل أن يقوم بالتقاط الصورة كعادته يخرج حارس الجراج من خلف إحدى العربات ويضرب القاتل بعصاة على رأسه من الخلف . يقع القاتل أرضا ثم يحاول الحارس الامساك به فإذا بالقاتل يباغته بضربة سكين في قدمه ثم يهرب بعدها مسرعا..

لينظر الضابط حسن اللي العسكري محمد ويقول.

/مفاجاة ايه بقي اللي هتفرحني ما القاتل هرب اهو قدام عينك .

/مش دي المفاجأة اللي انا قصدي عليها حضرتك انا قصدي علي ده.

ثم يخرج محمد قناع غريب الشكل ويعطيه للضابط حسن.

/الظاهر يافندم إن القاتل لما اتشاجر مع الحارس خاف وارتبك ونسي القناع ده اللي كان بيحطه على وشوش الجثث بتاعته بس بصراحة معرفش كان بيعمل كده ليه

/هنعرف كل حاجة يا محمد متقلقش كده القضية ابتدت توضح قدامي. مفيش جريمة كاملة لازم القاتل يغلط في حاجة علشان نمسكه .. تعالي نشوف الحارس بتاع الجراج جايز يفيدنا بحاجة..

/عامل إيه يابطل ، لو كنت كملت جميلك ومسكت الحيوان ده كنت بقيت بطل فعلاً وجايز كنت اديتك الشارة بتاعتي وتبقي انت الظابط الجديد..

/ههههه شكراً يافندم

/قولي بقي مشوفتش اي حاجه غريبة تقدر توصلنا للي بيعمل كده.

/والله يافندم انا كان نفسي امسكه واخلصكم من الموضوع كله لكني مقدرتش .

/طب احكيلي كده ايه اللي حصل بالظبط؟

/انا كنت بمر على المكان كعادتي في الوقت ده وفجأة لقيت القاتل داخل الجراج ومعاه الجثة رماها علي الأرض وقلعها كل هدومها وانا واقف مذهول من اللي بيحصل مكنتش مصدق إن الوحش اللي الناس كلها بتتكلم عنه كان واقف قدامي كده وكنت منتظر الفرصة المناسبة علشان امسكه.

/يعني بعد ما قلعها هدومها محاولش يعمل اي حاجه غريبة يعني يغتصبها او يعتدي عليها..

/لا حضرتك هو كان عايز يصورها وبس ولكن كان في حاجة غريبة شوية ظهرت عليه و لاحظتها فيه رغم إنه كان لابس قناع إلا إنه مقدرش يخفي.....

يتبع..

بقلمي..

الجزء الرابع.

قصة

كان باين عليه إنه مستمتع هو بيشوفها في الحالة دي. أو سكران مش قادر أحدد

/مستمتع آه ممكن ! لكن سكران مفتكرش اللي بيعمل كده هو فاهم وعارف بيعمل إيه كويس جداً. والاستمتاع ده طبيعي يابطل إحنا بنتعامل مع قاتل متسلسل مش شخص عادي ولا حتي قاتل عادي . استريح أنت بس وأنا وراه لحد ما اجيب أمه

يخرج الضابط حسن وفي يده القناع ويعطيه الي خبير الطب الجنائي..

/عايزك تعرفلي إيه ده بالظبط وفي أسرع وقت تمام

/تمام حضرتك

يجلس الضابط حسن في مكتبه يحاول تجميع خيوط القضية فإذا برجل مزعور يدخل عليه مكتبه..

/ارجوك يا فندم لازم تقبضوا علي الحيوان اللي عمل كده في أسرع وقت وتاخدو لي حقي منه..

/حقك؟ انت مين ؟ وحق ايه اللي انت بتتكلم عنه؟

/انا ممدوح صفوان حضرتك جوز الست اللي لقتيوها ميته من شوية.

/جوزها! اه فهمت ، متقلقش ياممدوح حقك وحق مراتك هييجي وده وعد مني ليك.

يخرج الرجل ثم ينادي الضابط حسن علي العسكري محمد .

/بقولك ايه يا محمد عايزك تتاكدي إذا كان باقي الستات اللي لقينا جثثهم كانوا متجوزين ولا لا بسرعة ماشي .

/تمام يا فندم

يعود حسن الى موقع الجريمة ليبحث عن أي شيء قد يكونوا مسؤولين الطب الشرعي قد نسوه سهوة وظل يبحث هنا وهناك ولا يترك شيئا حتى يتحقق منه لأكثر من ثلاث ساعات ولكنه لم يجد شئ للأسف.

ليعود خائب الأمل إلى مكتبه، ويبدو عليه الحزن وعند دخوله يجد العسكري محمد في انتظاره .

/ها يا محمد عملت إيه ؟

/تمام حضرتك نفذت اللي قولتلي عليه ، وطلعوا كلهم متجوزين ومعندهمش اي اطفال خالص .

/متجوزين و معندهمش اي اطفال خالص!!

/بس هو حضرتك بتسأل ليه عن الموضوع ده؟

/علشان يامحمد نقدر نحدد النمط اللي القاتل بيقتل على أساسه.

/نمط ازاي حضرتك؟

/بص ده قاتل متسلسل مش حد عادي وده بيكون ليه نمط أو تسلسل معين بيختار من خلاله ضحاياه .

زي القاتل بتاعنا ده مثلا بيختار ست جميلة في الثلاثينات من عمرها متجوزة ومعندهاش أولاد. ومش هيقتل اي حد تاني متنطبقش عليه المواصفات دي إلا لو اضطرته الظروف

/طب وده ليه حضرتك؟

/دي غالباً بتبقي عقدة عند القاتل بس للأسف مش هنقدر نعرفها إلا لما نمسكه هو شخصيا ً

يدخل مسؤول الطب الشرعى..

/لقينا بصمة على القناع يافندم اتمني توصلنا للقاتل .

/ بصمة طب هايل كده القضية ابتدت تتفك خيوطها واحدة واحدة .

قدامنا قد ايه علشان نحلل البصمة دي ونعرف مين صاحبها ؟

/أنا بعتها وفي أقل من دقيقة هنكون عارفينه حضرتك.

/مش مصدق نفسي أخيراً القضية الملعبكة دي هتتحل .

يدخل مسؤول آخر في الطب الشرعي ويعطي الضابط حسن نتيجة تحليل البصمات.

يفتحه الضابط حسن ولكن تظهر عليه خيبة الأمل من جديد .

/كانت عارف إنها مش هتتحل بالسهولة دي.

/خير يافندم ؟

/القاتل ملوش اي سابقة جنائية علشان كده معندناش ملف ليه.

/يعني كده باظت القضية يافندم ومش هنقدر نقبض عليه؟

/لا طبعاً هنقبض عليه بس الموضوع عايز شوية وقت وتركيز أكثر.. مقولتليش ايه حكاية القناع ده بقي؟

/لسه حضرتك بنحلله علشان نفهم الغرض منه والطريقة التي اتصنع بها .

/الأهم من ده كله هو المكان اللي اتصنع فيه لازم نوصل للنقطة دي علشان دي اللي هتوضحلنا حاجات كتير.

/تمام اعتبره حصل حضرتك..

يذهب الضابط حسن إلى منزله مرهقاً فقد كان شديد التركيز في الفترة الأخيرة على القضية لدرجة أنه لم ينم سوى ساعات قليلة ، وصل الي منزله حاول أن يأكل أي شيء لكن لم يستطع فغليه النعاس ونام حتى دون أن يغير ملابسه..

في اليوم التالي يدق جرس الباب بقوة شديدة ، يستيقظ الضابط حسن على صوت الجرس يتجه ناحية الباب ويفتحه بعصبية ليجد امامه العسكري محمد ويبدو سعيداً جداً..

/خير يا محمد دي طريقة تصحى بيها حد ؟

/عرفنا القاتل حضرتك.

يضحك حسن ويقول عرفتوا القاتل طب خلاص ادخل انام انا بقي، كده مليش دور في القضية .

/والله بتكلم جد يافندم عرفنا القاتل

/اهدي كده بس وفهمني الموضوع كويس

/القناع حضرتك طلع قناع سيليكون مش اي حد يقدر يعمله معمول مخصوص علشان يقدر يغير ملامح الجثة وهي ميتة يعني يقدر يخليها تعيط او تضحك زي ما بيحصل مع الستات اللي بنلاقيهم.

/تمام ، طب ومين اللي بيعمل كده؟

/القناع يا فندم زي ما قولت لحضرتك مش اي حد يقدر يعمله ده متسجل كا براءة اختراع بإسم الدكتور مجدي الهواري .

بحثنا عنه ولقينا إنه كان متجوز ومراته خانته مع واحد تانى ومن يومها وهو اختفي عن الانظار ساب شغله وقطع علاقته مع كل اللي يعرفوه وقعد لوحده في شقة كأن مأجرها في مدينة نصر..

/وليه محدش بلغني بكل ده اول ما عرفتوا؟

/حاولنا نكلم حضرتك كتير ولكن تليفونك كان مغلق ، علشان كده انا اضطريت اجيلك لحد هنا..

وسيادة اللواء علي علم بكل المستجدات وانا بكلم حضرتك دلوقتي في قوة من مركز الشرطة راحوا يقبضوا على القاتل..

/مش هيلاقوه.

/مش هيلاقوه إزاي يا فندم؟!

/زي ما بقولك كده مش هيلاقوه .

شخص زي ده مش بالغباء اللي يخليه يفضل قاعد في مكانه بعد ما القناع بتاعه وقع وهو عارف إن ده الخيط الوحيد اللي هيوصلنا ليه .

/طب والحل إيه يافندم؟

/هقولك بس سيبني اغسل وشي واشرب القهوة بتاعتي وأنا عارف المكان اللي هيكون متواجد فيه .

باستغراب شديد يسأل العسكري محمد عارف إزاي يافندم ؟؟؟

/أمال يابني جابوني انا امسك القضية ليه مالو سهل اي حد يحلها مكانوش جابوني استني وهتشوف بنفسك…..

يتبع …

بقلمي ..

الجزء الأخير

قصة..

ضحكات_الأموات

أمال يابني جابوني انا امسك القضية ليه مالو سهل اي حد يحلها مكانوش جابوني استني وهتشوف بنفسك…..

*************************

في تمام الساعة الثامنة مساءً تتحرك قوة بقيادة مأمور القسم للقبض على القاتل .

تصل القوة أمام منزل القاتل ويحاوطون المنزل من جميع الجهات ، ثم يقوموا باقتحام المنزل بعدما قاموا بتحطيم الباب ، الشقة فارغة تقريباً القليل من الأساس مجرد سرير للنوم وكرسي للجلوس وماكينة قهوة صغيرة . يبدوا أنه لم يترك المكان إلا من قريب . ظل البحث لأكثر من ثلاث ساعات وتم تفتيش البانيات المحاورة وسؤال كل الحيران عما إذا كان راه احد ولكن دون أي جدوى الكل أجمع عليه انه كان شخص إنطوائي لأبعد الحدود ولم يكن يختلط بأحد على الإطلاق.. ليعود المأمور ومع القوة الي قسم الشرطة خائبين الأمل جميعاً..

*************************

يركب الضابط حسن سيارته ومعه العسكري محمد ويتجها إلى مشرحة الجثث وسط علامات الاندهاش والتعجب من العسكري محمد. يدخلا الي المشرحة متسللان اقتربا من ثلاجة الجثث وتحديدا عند جثة القتيلة الأخيرة ومازال العسكري محمد يسأل لماذا أتينا إلى هنا. يرد عليه الضابط باختصار

/بص أطفئ النور واختفي خالص وأنا هستني هنا جنب الجثة ومش عايزك تعمل أي حركة غير لما اولع أنا النور من تاني. ومتعملش اي حاجه من دماغك نفذ اللي بقولك عليه بس عارف إنك عايز تفهم بس مفيش وقت افهمك وانت اول ما انا اولع النور هتفهم لوحدك

/مع إني مش فاهم حاجه بس تمام أوامرك يافندم..

ينتظر محمد وحسن في صمت وترقب يمر الوقت ببطء شديد ولا شيء جديد يحدث يبدأ الملل واليأس في محاوطة محمد وحسن ولكن يتبقي عند حسن أمل بسيط وثقة في حسه الأمني.

حركة خفيفة عند باب المشرحة . يدخل شخص بهدوء وبخطوات واثقة شخص يعرف بالضبط ماذا يفعل هنا .

يقترب من ثلاجة الجثث يبحث عن جثة معينة بحث في الأسماء الموضوعة على كل ثلاجة وأخيراً يجد ما يبحث عنه . يمد يده ليفتح الثلاجة فإذا بالنور يضي في كل الغرفة من حوله ويظهر الضابط حسن بهدوء قائلا..

/حمدالله علي السلامة اتاخرت ليه ياراجل انا افتكرتك مش هتيجي.

وهنا فهم القاتل بأنه قد كشف ولن يستطيع ان يكذب لذلك حاول أن يلوذ بالفرار فإذا بالعسكري محمد يقف على باب المشرحة ويمنعه من الخروج.

يخرج القاتل سكينا من جيبه و يباغت محمد بضربه في معدته فيقع محمد اراضا.

فينقض الضابط حسن من خلف القاتل يمسك يده ويحاول أن يأخذ منه السكين ولكن القاتل يقاوم بكل قوته دام الوضع لأكثر من خمس دقائق ولكن في الأخير تغلب الضابط وأخذ السكين من يد القاتل ثم طرحه أرضا وقام بتكبيله .

وأخرج هاتفه واتصل ع بالطوارئ ليأخذوا العسكري محمد ومكالمة أخرى للمأمور ليأتي للقبض على القاتل..

في المشفى يقف الضابط حسن بجانب العسكري محمد الذي يرقد في سريره .

/ايوه ياعم خدت ضربة سكين هايفه في بطنك اترقيت وخدت إجازة وكله تمام .

/ههههه المهم إننا حلينا القضية يافندم.

/الحمد لله ، انا كده اطمنت عليك واروح بقي أشوف القضية بتاعتنا علشان اقفلها ونخلص..

في مكتب الضابط حسن يجلس القاتل وتبدو عليه علامات الجنون واللامبالاة وكأنه في نزهة .يتحدث حسن.

/نفسي افهم ازاي يتحول شخص من عبقري وعالم الناس كلها تتمنى تسلم عليه لشخص مجنون وقاتل زيك كده؟

/بضحكة غريبة يرد.. الخيانة ! الخيانة تعمل اكتر من كده . الخيانة تهد حضارات وتجنن أعظم الرجال وتنهي شعوب كاملة

/ومين اللي خانك بقي؟

/مراتي خانتني ومسكتها وهي بتخوني في شقتي وعلى سريري والغريب بقي إنها محاولتش تدافع عن نفسها بالعكس كانت عادية ولا كأن في حاجة وكانت مبتسمة وبتضك من اللحظة دي وانا مبقتش انا بقيت عندي عقدة غريبة مش برتاح ولا بحس إني عايش غير بما اقتل مرة واتين واصبح الموضوع عاده عندي .

/و مراتك عملت معاها ايه؟

/للأسف معرفتش اقتلها أول ما شوفتها حصلتلي صدمة ومقدرتش اعمل اي حاجه وهي هربت يمكن لو كنت قتلتها مكنتش بقيت كده ومكنتش حاولت اقتل غيرها ..

/مش عارف أقولك إيه أنت مجني عليك وليك حق ولكن اللي عملته لا يغتفر وتستحق أي حكم هتاخده واكيد مش هيكون اقل من إعدام..

سؤال بس قبل ما اسيبك انت كنت بتخليهم يضحكوا ازاي؟

/امال قناع السيلكون اللي مسكتوه معايا ده كان لزمته ايه ما ده اللي بيخليهم يفضلوا مبتسمين بعد ما يموتوا..

/تمام انا كنت عارف بس بتاكد منك

يخرج الضابط حسن ليجد المأمور ينتظره .

بص مبروك إنك حليت القضية ومسكت القاتل بس نفسي افهم أنت عرفت مكانه ازاي هو انت كنت متفق معاه يابني؟

/ باختصار كده يافندم انا فهمت إننا مش بنتعامل مع قاتل عادي لا ده حد عنده عقدة ودول بيكون ليهم تفكير مختلف . القاتل كان لسه عنده مهمة لسه منتهتش لو نفذها هيختفي ومحدش هشوفه تاني.

/مهمة ايه دي؟

الصورة الأخيرة التي بيلتقطها لكل جثة في آخر جريمة لو حضرتك تفتكر هو مشي قبل ما يصور الجثة وكده هو كأنه معملش حاجة لازم يكمل مهمته علشان يحس بالرضا وأنه كده بقى مبسوط.

علشان كده استغليت الموضوع ده وروحت على أمل إني تخميني يطلع صح.

/والحمد لله طلع صح وإلا كنا روحنا في داهية .

انت ظابط هايل يا حسن علشان كده انا اخترتك للقضية ومخيبتش ظني فيك..

**

أتمنى تكون القصة عجبتكم 😊

بقلمي..