تحميل رواية «بين زمنين حب واحد» PDF

رواية بين زمنين حب واحد الفصل الاول

ليلى :الو ..الو مين تب لو مش عايز تتكلم بترن ليه يعنى

الام :مين الا بيرن يا ليلى

ليلى :مش عارفة يا ماما محدش رد

الام : تلاقي سلك التليفون مش متوصل عدل

ليلى : انا مش عارفة اصلا مين لسه بيستخدم التليفونات القديمة دى غيرك انتى وبابا

الام : بس يا بنت انتى متعرفيش التليفون ده كان من صديق قديم ليا انا ابوكى كانت ايام جميلة والله ...يلا احنا خارجين و لو اتاخرنا تعالى عند خالتك متقعديش لوحدك

ليلى : اه عشان العفريت ما يجيش يا لبسنى صح ... استغفرالله العظيم يارب ما حسسني انى طفلة لسه برضع

الام :احنا ماشين سلام يا لولو

ليلى :سلام يا ماما فى رعاية الله

٠٠٠٠٠بعد ساعة ٠٠٠٠٠

ليلى : اكيد ماما الا بترن دى هى الوحيد الا بتحب ترن على الفون القديم ده ..ايوه يا ماما

٠٠٠٠ الو مين حضرتك

ليلى : نعم حضرتك الا بترن مش انا يعنى انا الا أسألك انت مين

٠٠٠ بس انا مرنتش على حد انا جالى الاتصال رديت عليكى

ليلى : بقولك اى استعباط انا مش عايزة انا مرنتش على حد

٠٠٠٠رغم انى مرنتش عليكى ولا اعرفك بس اسف الازعاج

ليلى :لا خلاص ولا يهم-... اه ده قفل فى وشي صحيح قليل الذوق

٠٠٠٠٠٠تانى يوم٠٠٠٠٠٠٠

ليلى : اى يا ماما انتى قولتى انكم هتتاخروا مش انكم ممكن تباتوا بره

الام : معلش يا ليلى خالتك مردتش تخلينا نمشي لما لقت الوقت اتأخر علينا كلها ساعة أو ساعتين ونبقي فى البيت

ليلى :تمام يا ماما تيجوا بالسلامة

٠٠٠٠بعد خمس دقايق ٠٠٠٠

ليلى : الو مين

٠٠٠الو انتى الا مين حضرتك رنه عليا

ليلى :لا انا مرنتش على حد انت الا رنيت ... ثانية واحدة انت الا رنيت امبارح ايوه انت نفس الصوت اه يا حيوان انت يعنى انت بترن على الفون القديم ده عشان رقمك ميظهرش و أبلغ عليك صحيح انك منحط

٠٠٠٠ اى قلة الذوق انا لحد دلوقتى محترمك يا آنسة و انا مرنتش عليكى و بعدين من امته اساسا و الرقم بيظهر لحد و مفيش حاجة اسمها إبلاغ على الرقم ٠٠ ده واضح انك واحدة متخلفة وجاهلة كمان

ليلى: متخلفة فى عينك و بعدين واضح انه انت الا متخلف و جاهل كمان انا لو كنت اعرف بس رقمك كنت جبت اسمك ومكانك و جبت تاريخ حياتك كله

٠٠٠ لا والله ليه مكشوف عنك الحجاب ولا اى و بعدين بطلى تخلف بقي عشان لو حد غيرى كان فى مكانى مكنش بطل تريقة عليكى

ليلى :ههههههه ضحكتني والله مين الا يتريق على مين بابا فوق لنفسك والله لو كان ينفع لكنت عملتلك بلوك من اول مرة

٠٠٠٠ بلوك ... والله شكلك كريمه و هتعمليلى بلوك بقي فين والله مش لازم اختار المكان اعمليه بقي انتى و ذوقك

ليلى : انت بتقول اى يا متخلف انت بلوك اى الا اعمله فى اى مكان شكلك جاهل و متعرفش يعنى اى بلوك ... بلوك يعنى حظر يا جاهل

٠٠٠٠حظر تجوال يعني ولا ايه

ليلى :اععع بقولك اى انا لو بكلم واحد جاهل و فى زمن التسعينات كان زمانه عنده علم بالكلام الا بقوله ده

٠٠٠٠ فى زمن التسعينات اومال احنا فى زمن اى معلش فى الثمانينات مثلا ولا اى

ليلى :هههههه و الله انت واحد قليل الذوق ومعرفش ازى احنا فى ٢٠٢٥ و لسه فى ناس كده

.....٢٠٢٥اى ملعش

ليلى :انت ليه محسسنى انك فى زمان التسعينات

٠٠٠٠ لانى فى زمان التسعينات فعلا

ليلى : ممكن تبطل كلامك ده بقي وانا الغلطانة اصلا انى كلمتك من الاول

٠٠٠ ارجوكى ثانية بس انا بتكلم بجد والله انا فى سنه١٩٩٠

ليلى: ايي انت اكيد كداب

رواية بين زمنين حب واحد الفصل الثاني

ليلى: اى انت اكيد كداب

٠٠٠ لا مش كداب انتى الا كدابة اكيد لان مستحيل ده يحصل يعنى اى احنا الاتنين من زمانين مختلفين ازى ده يحصل

ليلى: بص هو لو مقلب قول عشان انا جبت أخرى منك

٠٠٠ مقلب اى انتى كمان .. تب انتى اسمك اى

ليلى : أسمى ليلى وانت اسمك اى

٠٠٠ أنور

ليلى : تب ازى انت فى ١٩٩٠ وانا ٢٠٢٥

أنور:مش عارف بس الا انا عرفه اكيد ان ده مستحيل حاسس انه ده حلم

ليلى : تب اى هنعمل اى دلوقتى

أنور: مش عارف بس مادام احنا اتكلمنا يبقي القدر ليه حكمته من الا حصل

ليلى : انت عندك كام سنه يا عمو أنور

أنور: عمو اى عمو دى

ليلى : يعنى انت فى ١٩٩٠ وانا فى ٢٥ يعنى انت دلوقتى فى سن بابا

أنور: مع ان كلامك صح بس انا دلوقتى شاب لسه انا عندى ٢٥

ليلى:اى ده انت اكبر منى بسنه بس ازى ده

أنور: انا هسكت احسن لان الكلام معاكى ملوش لازمة

ليلى : قصدك اى بالكلام ده يا عمو أنور انا بس هحترمك لأنك من سن بابا

أنور: اولا انا قولتلك انى لسه صغير اى عمو دى

ليلى :تب جد بقي احنا هنعمل اى و اشمعنا احنا الا حصل معنا كده

أنور: انا بجد مش عارف بس اكيد الا حصل ده ليه سبب و هنعرفه مع الوقت

ليلى :تب تتوقع هنتكلم تانى ولا دى اخر مرة

أنور : اكيد مش الأخيرة

....ليلى انتى فين يا ليلى

ليلى : ماما جات ثانية هخليك تكلمها

أنور: ماشي بس هى هتصدقنا

ليلى :اكيد هتصدق لأنها هتكلمك

ليلى : مامااا تعالى بسرعة

الام : فى انتى كويسه وبعدين بتكلمى مين على التليفون ده

ليلى: تعالى بس يا ماما و انا هحكيلك كل حاجة

الام : الو ...الو مين

مفيش حد بيتكلم ليه

ليلى :يعنى اى الكلام ده .. الو

أنور: ايوه مامتك مكلمتنيش ليه

ليلى : ازى يعنى ما هى كلمتك انت مردتش عليها

أنور :بس انا مسمعتش صوت حد

ليلى: يعنى اى الكلام ده

الام: انتى اتهبلتى ولا اى يا بت انتى

ليلى :هاا لا يا ماما ده انا كنت عايزة اعمل مقلب بس فيكى بس انتى محدش يقدر عليكى طبعا

الام مش هتبطلى الهبل بتعك ده بقي انتى كبرتي

ليلى : ماشي

الام ماشي على انتى و مالك كده سرحانه فى اى

ليلى :لا مش سرحانه ده انا بس بفكر هلبس اى و انا خارجة مع اصحابي

الام: العوض من عندك يارب

_________________________ بعد ساعة ____________________

ليلى : ماما هو الفون ده مكنش خالص

...لا مرنش انتى مستنية حد يرن

ليلى :لا هكون مستنية مين يعنى

يارب هو إلا حصل ده بجد واى تب هو فى حاجة زى دى ممكن تحصل و بعدين هو مرنش ليه تانى خلينى اقوم البس احسن خلينى اخرج مع اصحابي

ليلى : ماما انا خارجة عايزة حاجة

الام : مع السلامة فى رعاية الله

_____________________________عند ليلى ___________________

هاى بنات عاملين اى

٠٠٠٠تمام الحمدالله بخير

اى مفيش اخبار جديدة مفيش حد عايزة يقول حاجة

لا مفيش جديد حياتنا عادية ماتقولى انتى اى الا حصل

ليلى:معقول حد يصدقني لو قولتله الا حصل معايا معقول حد يصدقني انى كلمت حد من زمان مختلف عن الزمان بتعنا

٠٠٠٠٠ليلى بت ليلى

ليلى : اى يا غادة فى اى

غادة : بقالى ساعة بكلمك وانتى ولا هنا مالك سرحانه فى اى

ليلى: هاا لا مفيش ماما تعبانة بس شوية فكنت بفكر فيها

غادة الف سلامة عليها ربنا يشفيها

ليلى: يارب يا حبيبتي انا همشي بقي عشان ماما سلام عايزين حاجه

٠٠٠ مع السلامة يا حبيبتي

______________________بعد نصف ساعة _____________________________

ليلى: ماما انا جيت انتى فين

الام: انا فى المطبخ تعالى

ليلى: عاملة اى خلصتى الاكل ولالسه

الام :هخلص اهو بس غريبة يعنى انتى جيتى بدرى عن كل مرة

ليلى :مفيش بس حسيت القعدة مملة اه صحيح هو مفيش حد رن وانا مش هنا على الفون القديم

الام :لا مفيش حد رن روحي غيرى انتى وانا هحط الاكل

ليلى : تمام

الام :يلا يا ليلى كل ده بتغيري

ليلى :جاية اهو يا ماما

الام : يا ربي عليك بت تاخد ساعة فى كل حاجة تعملها

الام :الو

ليلى :مامااا استنى هاتى كده الفون ده الو ..الو انو__ خالتو انتى الا بترني هاا لا مش مستنيه حد ايوه ماما اهي خديها معاكى اهى

______________________بعد خمس دقايق _____________________________

الام: انا عايزة اعرف فى اى كل شوية تسألي حد رن ولا لا ولما خالتك رنت جريتى عليا و اخدتى الفون من ايدى فى اى وانتى مستنية مين يرن

ليلى : فى اى يا ماما لكل ده انا بس كنت جايبة اوردر و عطيت الرقم ده للمندوب عشان لو معرفش يوصلى على رقمي

الام : ماشي يا ليلى لما نشوف اخرتها معاكى ....انا رايحة انام و ابوكى مش هنا كالعادة وانتى كمان متسهريش يا ليلى يلا تصبحي على خير

ليلى: وانتى من اهله يا ماما

________________________فى منتصف الليل___________________

الفون بيرن

ليلى : معقول يكون هو ..الو

أنور الو ايوه ياليلى

ليلى: انت مرنتش من الصبح ليه انت عارف انى معرفش رقمك

أنور: بس انا مرنتش عليكى انتى الا رنيتى عليا

ليلى: لا وانا هرن عليك ازى وانا معرفش رقمك

أنور: معنى الكلام ده ان التليفون هو إلا بيرن علينا احنا الاتنين تب ازى

ليلى :مش عارفة بجد حتى ماما لما جات تكلمك ما سمعتش حاجة وانت قفلت وانا بكلمك

أنور: بس انا مقفلتش انتى الا قفلتي

ليلى: حاسة انى فى حلم يعنى التليفون هو الابيرن علينا وهو الا قفل كمان تب ازى وليه ده بيحصل معنا

ليلى: ماما نايمة دلوقتى وممكن تصحي وانا بكلمك و مش عارفة هتصدقنى ولا لا لو قولتها الا حصل

أنور اكيد مفيش حد هيصدقنا لو قولنا الكلام ده لحد

ليلى : اكيد ماما هتقول يا ملة بختك فى بنتك يا امل البت اتعبطت على صغر يا ربي

أنور: امل ...مامتك اسمها امل ..امل حبيبتي

ليلى: حبك برص و عشرة خرص يا بعيد انت اى حبيبتى دى

أنور: لا لااا فهمتي غلط

ليلى: غلط ولا صح انت واحد قليل الحيا

أنور :صدقينى انا قصدى على امل حبيبتى انا مش مامتك

ليلى حبيبتك نفسي اعرف حبتك على اى بس

أنور: بس هى محبتنيش انا بس الا بحبها وهى ولا تعرف بحبي

ليلى: ازى يعنى حب من طرف واحد يعنى

أنور حاجة زى كده

ليلى :تب ما تقولها انك بتحبها واتقدم ليها

أنور: خايف ..خايف لاخسارها و هى اعز اصحابي

ليلى: يعنى هى معتبرك اعز صديق وانت بتحبها فى السر و خايف تصرحها بمشاعرك فتخسرها فى الاتنين كحبيبة و كصديقة

أنور :بالظبط كده

ليلى: تب افرض هى كمان كانت بتفكر زيك كده

أنور: قصدك اى بالكلام ده

ليلى :قصدى انه ممكن تكون هى كمان عندها مشاعر اتجاهك و بتفكر نفس تفكيرك

أنور: بجد يعنى هى ممكن تكون بتحبنى زى ما بحبها

ليلى: ايوه ممكن وليه لا

أنور: تب وانا هعرف ازى انها بتحبنى

ليلى: والا يساعدك انك تعرف اى مشاعرها

أنور: قصدك انك هتساعدينى

ليلى: يعنى ممكن اساعدك شوية

أنور :بجد هتساعدينى

رواية بين زمنين حب واحد الفصل الثالث

_ بجد هتساعدينى

_ ايوه ياعم هساعدك عد الجمايل بقي

_ بجد شكرا ليكى جدا بس هتساعدينى ازى و اعمل اى

_ فى اى ياعم حيلك شويه ده انت شكلك واقع اوى

_ واقع ازى يعنى ؟؟

_ يعنى انك بتحبها اوى.

_ هى لو فى جيلكم معنها واقع ف انا غارق فى حبها مش واقع بس

_ لا بقي انا مش حمل الكلام ده ٠٠ انا بس نفسي اعرف حاجة واحدة هى ازى محستش بحبك ليها كل ده ده العمي يشوف وهى لا

_ عشان انا الا بخبي حبي بخاف ابينه فاخسرها

_ اعع تفكير متخلف اقول اى من انت من التسعينات صحيح

_ هو ليه انتى ماسكه التسعينات كأنها تهزيق مع انها بالنسبة ليا عادى

_ ما انت مش هتفم قصدى غير لما تعيش معنا فى جيلنا احنا لما نلاقي واحد مثلا بيفكر فى حاجة مش طالعة ترند او موضه الايام دى بنقول عليه انه كأنه من التسعينات يعنى قديم شويه

_ انتو الا محتاجين تعيشوا فى زمان ده لان هتحسوا انكوا مكنتوش عايشين اصلا احنا فى زمان الكل بيحب الخير لغيره و بيقسم مع بعض التعب و الحزن قبل الفرح والراحة

_ لا بقولك اي سيبك مين يعيش فى زمان مين واعمل الا هقولك عليه بالظبط عشان نعرف اذا كانت بتحبك ولا لا

_ ماشي قولى بس ازى

_ قولى بس انتو أصحاب اوى يعنى من زمان

_ احنا أصحاب من الطفولة عشان أهلنا أصحاب برضه

_كده تمام اوى ٠٠بص بقي انت هتختفى

_ اختفي ازى يعنى

_ ما انت لو تسبنى بس اكمل كلامى هتعرف

_ خلاص اتفضلي مش هقطعك تانى

_شطور ايوه كده ...بص بقي ياعم انت بتقول انكوا أصحاب من زمان ومن طريقة كلامك انكوا بتعملوا كل حاجة مع بعض فأنت اي بقي هتختفي مثلا يومين بس اكيد محدش من أهلك يعرف مكانك لأنها اول حاجة هتروح تسالهم عليك لما تظهر بقي طريقتها بقي هى الا هتوضح ليك اذا كان فى مشاعر اتجاهك ولا لا ..انت هنا معايا

_ ايوه معاكى

_ اومال فى اى كانك مش معايا

_لا بس فكرتك عجبتنى وكنت بفكر هل هتنجح ولا لا

_ طبعا يا بيبي هتنجح هو انا اى حد ولا اى بس اهم حاجة لما تظهر قول إنك حبيت تقضي شوية وقت لوحدك اوع تقول حاجة غير انت فاهم

_همشي على الخطة بالظبط وهعمل كل الا انتى قولتى عليه

_ايوه كده وان شاء الله هننجح ... وهستنى اتصالك او قصدى اتصال التليفون لانه هو إلا بيرن علينا

_تمام وانا كمان هستني و شكرا مرة تانية

_ياعم اشكرنى براحتك بس لما ننحج مع انى معنديش شك فى أفكاري

_ماشي يا ام افكار مفيش زيها

_اتريق براحتك بس متنسش ان افكارى دى هتساعدك فى المستقبل ...يلا سلام بقي

_تمام سلام

_اه حاسة كانى مستشارة فى العلاقات تب والله فكرة انا لو نجحت مع أنور هيبقي اول حالة عندى واوو يا سلام بقي لو فتحت مركز و اسميه مستشارة العلاقات ليلو ياسلام مفيش احلى من أحلام اليقظة بتعتى دى

______________________________________بعد يومين ___________________

انا عايزة افهم انتى مالك بقالك يومين و انتى مش على بعضك فى اى حتى اصحابك رنوا عليا عشان حضرتك مش بتردى عليهم وانتى فى البيت شبه الهبلة كل شوية تنطي على التليفون وكان فى عفريت هيرن

_ اولا يا ماما مش عفريت ده أنور

_نعم يا ختى

قصدى يا ماما المندوب أنور الا كنت قولتلك عليه مش انا طالبه اوردر و هو معه وانا بس مستنيه انه يرن

_ ليلى انتى عارفة انى بثق فيكى و هصدقك بس لو فى حاجة قوليلى و متخبيش عليا

_ انا والله فاهمة خوفك و قلقك عليا يا ماما بس صدقينى مفيش حاجة

_ تمام يا ليلى

_يارب انت الا عالم بحالي يارب و انت عالم انت مقصدش اكدب على ماما يارب سامحني

________________________الساعة الثامنة مساءآ___________________________

ليلى ردى على التليفون

_ حاضر يا ماما ..الو

_ الو

_ أنور انت ..انت كنت فين كل ده انا كنت بقولك تختفي منها هى مش منى

انا

_اهدى بس انا معرفتش اكلمك لانى اكيد مكنتش هاخد التليفون معايا

_ اه تمام ماشي ها قولى حصل اى

_ مين يا ليلى

_ دى صحبتى ياماما انا هاخد التليفون فوق يا ماما معايا ماشي

_ماشي يا ليلى

_دى مامتك

_ايوه انت سمعت صوتها

_لا بس سمعت صوتك انتى و انتي بتكلميها

_ ماشي قولى بقي حصل اى

_عملت زى ما قولتى و فعلا اول حد سألته عنى هو اهلى

_شفت عشان تبقي تسمع كلامى كمل وبعدين

_ هى عرفت انى رجعت البيت عن طريق ماما ومامتها ولما جات كانت متعصبة جدا و بتزعق و بتقول كلام معظمه انى ازى اختفي و مش اقولها هى انا كنت فين و طبعا انا جاوبت زي ما انتى قلتيلي قولتلها انى كنت محتاج افضل لوحدى شوية و هى قالت تفضل لوحدك ماشي بس من حقي انا اعرف انت ليه اختفيت وانا سألتها ليه من حقك

و هى ردت بعد تفكير عشان انت صحبى الوحيد و انا صحبتك الوحيدة بعد كده مشت و هى مضايقة عشان مش قولت ليها انا كنت فين

_ يا سلام هو ده الا انا كنت عايزة بالظبط

_يعنى اى مش فاهم

_يعنى يعنى هى بتحبك يا غبي

_اى بجد تب ازى و عرفتى ازى وهى مقالتش

_انا هقولك عرفت ازى من طريقة كلامها و الا انت قولته معنى انه هى بتحبك او فى مشاعر اتجاهك بس هى ذات نفسها مش عارفة مشاعرها

_تب واى الحل اعمل اى

_ تصالحها طبعا

_ اصالحها تب ازى

_هتصالحها بوردة

_وردة اشمعنا ورده مع انى ممكن اجيبلها حاجة تانية

_انا قولت وردة و بس ..بس مع الوردة دى هتظهر شوية من مشاعرك

_هظهر شويه من مشاعرى ازى

_هقولك بص انت هتاخد الوردة و هتروح ليها هتقدم الوردة وانت ساكت بس هى هتسالك اى ده انت هترد بقي تقول اى

قعدت أفكر كتير أجيب لك إيه، وفي الآخر ملقتش حاجة أقدمها لك غير الوردة دي.. بيقولوا الورد للورد، بس الحقيقة أنا شاكك إن فيه وردة هنا في المكان غيرك أنتِ."

_ ثانية بس انا الا هقول كده

_ لا امى هتيجي تقول بدلك منك لله طلعتنى من مود الرومانسية الا كنت فيه

_خلاص خلاص كملى ولا كانى قولت حاجة

_تمام استنى لما ادخل فى المود تانى ٠٠ها يلا بينا

بص بقي هي اكيد هتنصدم من الكلام ده لأنها مش متعودة منك على كده بس انت هتقولها حبيت اعتذرلك عشان اختفيت فجأة و خوفتك عليا مع انى مكنتش متوقع انك بتخفي عليا او تهتمى بيا كده انا كنت متوقع انه هيبقي عندك عادى

هنا بقي هتاكد من مشاعرها اتجاهك يعنى لو هى مثلا جاوبتك بسرعة فى ضمن كلامك وقالتك لا متقولش كده طبعا انت مهم عندى معنها اكيد هى عندها مشاعر بس هى هتحاول تداريها و تقولك انك صديقها الوحيد من الطفولة

_اى ده بجد انتى ازى كده انتى كمان حللتى المشهد و حللتى هى قالت كمان ازى كده

_ يا بنى دى اقل حاجة عندى انا اصلا خسارة فى البلد دى

_سيبك من الكلام بعد هى ما تقولى كده انا هعمل اى

_ هتقول اكيد طبعا احنا صدقاء و هتتعامل معها عادى لحد ما اكلمك بكره بقي

_ ماشي انا رايحة بقي اجيب الورد

_ هى وردة واحدة بس متجيش كتير هى وردة واحدة بس انت فاهم

_ تمام ماشي وردة واحدة بس يلا مع السلامه

_ مع السلامة

هو في كده بجد هو فى حد بيحب حد كده ياه لو اقبل حد يحبني كده

_____________________________________________تانى يوم ________________

صباح الخير يا ماما

_صباح اى بقي قولى مساء الخير احنا العصر على الأذان يا ختى

_ماما انا كنت صاحية طول الليل

_اه ما انا عارفة سامعة صوتك طول الليل بتتكلمى فى التليفون

_سيبك بس من الكلام ده انتى خلصتى اكل ولا لسه هتعملى اكل

_ مش هعمل اكل هناكل بواقي امبارح

_ مش مهم المهم انى اكل وخلاص

_ اه ما انتى همك تاكلي وخلاص إنما تعملى حاجة تاكليها لا مستحيل ده يحصلك حاجة

_ خلاص بقي يا ماما مش بحب المديح الكتير فيا عشان متغرش

_ تتغرى على اى ياتك نيلة فى شكلك

_ مرسي يا ماما مرسي يا حبيبتي

_ليلى بابكي هيجي الأسبوع الا جاى

_ اى هيجي ليه

_ هو اى الا يجي ليه ده بيته

_ و ده من امته من امته و هو بيعتبر ان ده بيته و ان احنا عيلته بابا مش همه غير نفسه يا ماما

_ ليلى عيب كده ده باباكى و صدقينى هو بيحبك بس هو مبيعرفش يعبر عن حبه بس هو بيحبك بجد

_ اه مبيعرفش يعبر عن حبه ليكى انتى كمان صح

_ليلى انا شكلى استهلت معاكى اوى عشان تكلميني بالطريقة دي

_ماما انا بجد اسفة بس دى الحقيقة الا انتى بتنكريها

__ليلى باباكى_

_ماما لو سمحتى خلاص .. الموبايل بيرن هروح اشوف مين

_الو

_الو

_ انتى كلامك طلع صح حصل زى ما قولتى بالظبط وكل حاجة حصلت وكأنك كنتى شايفة الموقف ده قبل كده

_ بجد تب كويس والله

_فى اى مالك

_مفيش انا كويسه

_لا فى حاجة مش دى طريقة ليلى الا اعرفها

_لا انا كويسه بس اتخنقت مع ماما

_ ليه حصل اى

_ بابا هيجي الاسبوع الا جاى

_ليه هو فين هو مش عايش معكم

_بابا مش عايش معنا و لا كأنه فى حياتنا بابا لغانا انا وماما من حياته بيعيش لنفسه و بس و ماما لحد دلوقتى بتنكر ان هو عايش لنفسه و بس و بتضحك على نفسها انه مش بيعرف يبين حبه لحد

_ تب ما يمكن فعلا هو كده

_ لا بقولك اى متقولش زى ماما و بعدين سيبك منى و خلينى افكر اى الخطوة الا جاية

_ انتى عارفة ان انا من كتر ما بحبها مسميها سمائي

_ سمائى اشمعنا سمائى

_عشان انقي واحلى حاجة فى الدينا هى السماء حتى لما تلقي اى حد مضايق دايما تلقيه رافع نظره وبص على السماء لأنها أجمل ما تراه العين

_يا سلام على الرومانسية ياعم اوعدنا يارب

_ عارفة لما نخلف بنت هسميها اي

_اى

_ نجمة عشان هتبقي قطعة من سمائى

_بجد تحفة و هى بجد محظوظ بيك جدا ياريت ماما كانت زى امل حبيبتك ولقت حد يحبها كده

_هى مامتك اسمها امل اى

_ قولى انت الاول اسمك أنور اى

_انا يا ستى أسمى أنور عبد السلام المرشدى

_ ماما اسمها امل فرحان الهلالى

_اى مستحييل

رواية بين زمنين حب واحد الفصل الرابع والاخير

اى مستحييل

_ هو اى الا مستحيل .أنور الوو أنور انت سمعنى .. يعنى وقته المكالمة تنتهى دلوقتى اى الوقت الزفت ده تب قصده اى بمستحيل دى يارب صبرنى لحد ما التليفون يرن عشان فضولى هيموتنى

_ ليلى تعالى عايزكى

_ حاضر يا ماما جاية ..نعم فى اى

_ انتى عارفة انى بحبك صح و انى معنديش أغلى منك فى حياتى

_ عارفة يا ماما والله و عارفة انك احسن ام فى الدنيا كلها .بس فى اى عشان تقولى كده

_ انا فكرت فى كلامك وانتى معاكى حق

_ والله يا ماما انا كلامى كله معايا حق فيه بس انتى قصدك على اى بالظبط

_ هو لسانك ده مش هيقصر بقي يابنتى.. على العموم انا اخدت قرار مهم و انا معنديش اهم منك اقولك عليه واشوف رايك فيه

_ ده الكلام شكله جد بقي ...تمام خير فى اى يا ماما

_ كان معاكى حق لما قولتى انى ابطل انكر انك ابوكي لسه بيحبنى كان معاكى حق لما قولتى انه عايش لنفسه وبس .. ابوكى طالع مش جاي لينا احنا كان جاي لمصلحته هو جاى عشان عشان ياخد حته الأرض الا بابا كتابها بأسمى جاي ياخدها بحجة انه هيستثمار عليها

_ عادى كنت متوقعة منه اى حاجة ...عادى جدا بس انتى قرارتي اى

_ انا هطلق منه

_ بس هو هيرفض هو مستحيل يطلق

_ يبقي هخلعه خلاص انا زهقت و فضلت صابرة كتير اوى والله

_ و انا معاكى يمكن لو كنت شوفت منه حاجة كويسه كنت اقولك فكرى تانى فى قرارك بس هو للاسف مخلش حاجة غير بتوجعنا وعملها

_ اسفة يا بنتى انى معرفتش اختار اب كويس ليكى يا ريت ينفع نرجع بالزمان مكنتش اختارته

_ للاسف يا ماما ده الحاجة الوحيد مش بنعرف اذا كان كويس ولا لا غير بالعشرة

_ صح معاكى ان شاء الله يجي و هفتحه بالموضوع قبل ما يقولى على الأرض

_ تمام يا ماما ٠٠ انا رايحة اوضتى عايزة حاجة

_ روحي يابنتى ربنا يصلحك

___________________________ عند منتصف الليل___________________________

_ اى ده الوقت الا التليفون بيرن فيه كل عدى تب مرنش ليه انا عايزة اعرف أنور ماله

_ لا بقي الساعة ٢ ولسه قعدة الوقت اتأخر اكيد مش هيرن دلوقتى انا انام احسن

______________________________فى الصباح ___________________________

ليلى انتى يا زفته اصحي كل ده نوم انا مخلفة غيبوبة مش بنت ليلى انا طالعة دقيقتين لو ما لقيتكيش ورايا والله هكب عليكى مياه ساقعة

_يوه بقي يا ماما ونبي عايزة انام .. تب لو صحيت هعمل اى يعنى هفضل قعدة نايمة جمبك

_ ليلى انا قولت اى قومى يلا ابوكى زمانه جاي

_ يجي بالسلامة بس انا هعمله اى يعنى

_ انا طالعة يا ليلى و ايكى متطلعيش ورايا

_ بصي قومت اهو خلاص بقي

_ شطورة يا حبيبتي

_ماما هو التليفون ده مرنش خالص انهارده

_ لا مرنش بتسالى ليه لسه مستنيه المندوب برضه

_ اه يا ماما المندوب انا لو شفته هتخانق معه حته خانقة على تأخيره ده عشان انا قعدة على. نار ..ماشي يا أنور لو اشوفك بس

_______________________________بعد ساعتين ___________________________

يعنى انتى مصحياني من امتى عشان اى بابا جاى فى الطريق هو فين الا جاى ده ياربي كان زمانى نمت شويه بقولك اى يا ماما انا هنام ولما يجي صحيني

_ لو جدعة روحي نامى يا ليلى

_ مين قالك اصلا انى عايزة انام بصي حتى على عينى صاحية و مش فيها نوم خالص ازى

_ ايوه كده جدعة ... الجرس بيرن اكيد ده بابكى روحي افتحي ليه

_ ليلى عاملة ايه يا بنتى

_ الحمد لله بخير يا بابا انت عامل ايه

_ الحمد الله كويس ولا كبرتي يا ليلى

_ لا والله انا لسه زى ما انا مش سنة يعنى الا كبرت فيها

_ بت يا ليلى

_ اى يا ماما فى اى انا بس بعرف بابا انه من زيارته السنه الا فاتت و انا زى ما انا

_ اناعارفو انك زعلانة منى يا ليلى بس يا حبيبتي انا كنت فى شغلى مكنتش بلعب يعنى و بعدين مامتك هنا معاكى و انا ببعتلكم فلوس كل شهر

_ معاك حق ماما هنا معايا و ده كفاية عن اذنكم طالعة اكلم صحابي

ياريت يا بابا كنت اقدر اقولك الكلام الا نفسي اقوله واقولك انى كنت محتاجلك مش محتاجه للفلوس الا بتبعتها كل شهر دى

_ فينك يا أنور انت كمان و ليه التليفون مرنش لحد دلوقتى يارب يارب يرن بقي

_______________________________الثامنة مساءآ __________________________

ليلى يا حبيبتي يلا عشان نتعشي

_ مش عايزة اكل يا ماما

_ يعنى يرضيك انام وانا عايزة اكل يلا تعالى عشان مش هاكل من غيرك

_ جاية يا ماما اهو

_ اي يا ليلى انا من ساعة ما جيت وانتى قعدة فى اوضتك مش عايزة تقعدي معايا ولا اى

_ ها لا يا بابا طبعا بس كنت بكلم صحبتى عندها مشكلة و كنا بنتكلم فيها

_ اه ماشي ... بس عارفة يا امل اكتر حاجة وحشتني هى اكلك ياه من زمان الواحد ما اكلش اكل بيتى حلو كده

_ ما انت الا مشيت و سبتنا محدش قالك تروح تعيش هناك

_ فى اى يا ليلى ما انا قولتلك انا يا بنتى فى الشغل مش بلعب مش احسن ما اقعد هنا و ملقيش الفلوس دى

_ صح معاك حق الفلوس أهم... تصبحوا على خير انا رايحة انام

_ هتنامى دلوقتى لسه بدرى

_ لا مش بدري انا كنت صاحية بدرى وعايزة انام ...عايزة حاجة يا ماما

_ مع السلامة يا حبيبتي تصبحي على خير

_ برضه لسه مرنش تب هعمل اى بقي يا رب ما انا مينفعش ارن اععع انا زهقت بقي من الحكاية دى تب لو مرنش تانى هعمل اى ..انا هنام دى احسن حاجة اعملها دلوقتى

_______________________________ فى الصباح____________________________

صباح الخير عاملين اي

_ صباح النور يا حبيبتي الحمد لله كويسين تعالى افطر يلا

_ نفسي اعرف الواحد هيحتاج اى غير انه ينام و ياكل ياه دى احسن حاجة فى الحياة

_ فى الشغل فى الفلوس انك تشتغلى و تجيبي فلوس و دى احلى حاجة

_ ده بالنسبلك بس يا بابا

_ هو احنا مينفعش نفطر حتى بهدوء

_انا اتكلمت انا بس برد على بنتك

_ ما انا بنتك انت كمان

_يوه اتخنقوا براحتكم اديني قايمة و سيبهلكم

_ ماما استني بس يا ماما .

_ عجبك كده اهى قامت ومكملتش أكلها

_ هو انا كنت اتكلمت مش انت الا بدأت

_ بت متنسيش انى ابوكي

_ تمام يا بابا عن اذنك تليفونى بيرن هروح اشوف مين

_ الو .الو أنور عامل اى وحصل معاك اى فى اليومين الا فاتو دول قولت لأمل انك بتحبها ولا لسه وهى عملت اى معاك

_ محصلش حاجة

_ يعنى محصلش حاجة و مالك انت مضايق من حاجة فى حاجة حصلت معاك

_ انا تمام بخير مفيش حاجة انتى عاملة اى وحصل اى معاكى

_ انا كويسه الحمد لله مفيش حاجة جديدة فى اليومين دول غير أن بابا بس جاه

_ جاه و هو عامل اى معكم

_ عادى زى العادة و ماما قرارت انها _

_ ليلى ... انا خلاص هسيب امل و امشي

_ نعم تمشي .. تمشي ازى يعنى و هتسيبها ليه صدقنى هى بتحبك بس هى محتاجة وقت بس وانت متستسلمش

_ بس الوقت ده مش هيفيد بحاجة هى خلاص مبقتش ليا ولا هتكون ... فاكرة لما قولتلك انى لو خلفنا بنت هسميها نجمة عشان تبقي سمائى و نجمتي

هى فعلا جابت نجمة بس مش هتبقي نجمتي... جابت بنت جميلة اوى وطيبة وبتحب تساعد اى. حد

_ قصدك اى بالكلام ده انا مش فاهمة حاجة.

_ ولا انا فاهم بس الحاجة الوحيد الا فاهمها انك فعلا شبها روحك الحلوة و طيبتك زيها بالظبط

_ شبه مين انت بتتكلم عن اى أنور وضح كلامك لو سمحت

_ ليلى عادل ابراهيم البدرى مامتك امل فرحان الهلالى

_ أنور انا..هو انت قصدك يعنى انه انا

_ ايوه انتى بنت البت الا قضيت عمرى كله بحبها من غير ما تعرف لحد ما راحت لحد غيري كان معاكى حق لما قولتى انى من خوفي هخسرها و اديني فعلا خسرتها بس عايز افهم ليه...ليه حصل معنا كده ليه اتكلمنا ليه نتكلم واحنا فى زمن متخلف عن بعض ليه

كده خلاص كل حاجة اتنهت مبقش فى داعى نتكلم تانى كل حاجة بانت .

_ لا مفيش حاجة انتهت انت اكيد فاهم غلط فى حاجة غلط انا واثقة انه فى حاجة غلط اكيد مش مامتي البت الا بتحبها

_ لا هى ..هى يا ليلى صدقينى انا اكتر واحد كنت بتمنى ان متبقش هي ٠٠٠رحلتنا انتهت هنا عايزة اقولك انك حد كويس اوى اوعي تغيرى نفسك خليكى زى ما انتى و اوعى تنسيني خليكى فاكراني

_ أنور ارجوك لا متقولش كده بص اتأكد يمكن تشبه اسماء عادى بتحصل صح

_ تشبه اسماء فى اسم مامتك و باباكى

_ اه عادى بتحصل

_ لا مبتحصلش بطلى تنكري بقي خلاص كل حاجة انتهت وهى بقي ليها عيلة و بنت زى القمر زيك كل حاجة خلاص خلصت سلام يا ليلى كلامنا انتهى

_ لا لسه منتهش مفيش حاجة خلصت انت سامع .. الو أنور .أنور رد عليا لسه الكلام منتهش لسه فى كلام تانى مينفعش الحكاية تخلص كده مينفعش أنور ارجوك رد .. رد عليا و قولى انى مش ماما هى البت الا انت بتحبها رد مينفعش المكالمة تنتهى هنا مينفعش والله

ماما الوحيدة هى الا هتعرفنى اذا كان معه حق ولا لا

_ ماماااا انتى فين مامااا

_ فى اى ليلى بتزعقي كده ليه فى اى حصل حاجة

_ ماما بصي هو انا عايزة أسألك عن شخص كده من زمان

_ مين ده الا بتقولى عليه

_ واحد اسمه أنور عبد السلام المرشدى .. تعرفي واحد بالاسم ده

_ ياه أنور انتى تعرفي أنور مين يا ليلى

_ ماما انتى معنى كلامك انك تعرفي واحد بالاسم ده فعلا

_ اي الا اعرفه ده انا قضيت طفولتى و شبابي معه ده كان باباه و مامته أصدقاء العيلة بعد كده الصداقة اتنقلت لينا .. بس ما قولتيش برضه تعرفيه منين

_ ماما ارجوكى ممكن تقوليلى هو فين دلوقتى انا محتاجة اشوفه ضرورى اوى ونبي

_ فى اى يا ليلى انتى تعرفي أنور منين اصلا عشان تشوفيه و عايزة تشوفيه ليه اصلا

_ ماما ارجوكى قوليلى هو عايش فين و انا هقولك والله كل حاجة و مش هكدب عليكى بس ارجوكي قوليلى هو ساكن فين

_ معرفش ... معرفش ساكن فين هو نقل اسكندريه من زمان اوى

_ نقل قبل فرحك من بابا صح

_ ايوه لأن كان جاله شغل الفترة دى مع انى زعلت منه اوى وقتها لانه محضرش الفرح بس بعدها جاه واعتذار انه كان عنده شغل

بعد كده بقي كل واحد اتشغل فى حياته و مبقش حد يعرف عن التانى حاجة

_ تب متعرفيش مين ممكن يعرف مكانه

_متهيألي باباكى عارف بس مش متأكده اذا كان عارف ولا لا

_ تب هو بابا فين دلوقتي

_ راح يتمشي على الكورنيش شوية

_ تمام انا رايحة لبابا اسأله

_ هو مفيش صبر لما يجي تسأليه

_ لا مش هيبقي عندى وقت

______________________________على الكورنيش __________________________

الو يا بابا انت فين بالظبط

_ يا بنتى انا على الكورنيش عند عمك محمود بتع الحمص

_ تمام يا بابا انا قريبة منك خليك عندك اوعي تتحرك

_ ماشي مستنيكى اهو

_ بابا

_ ليلى خير فى اى و اى الموضوع الا مش ممكن تستنى لما ارجع البيت

_ تعرف أنور ساكن فين

_ أنور .. أنور مين

_ أنور عبد السلام المرشدى

_ انتى اى الا عرفك بأنور و بعدين مش عيب تقولى أنور كده ده قد ابوكى

_ يوه ماشي يا بابا لو سمحت تعرف مكان عمو أنور فين فى اسكندريه

_ ايوه اعرفه بس بتسالى ليه فى اى

_ بجد تب مكانه فين بالتفاصيل ولا اقولك استنى اكتب مكانه فين بالظبط عشان ما انساش

_مكانه يا بنتى فى اسكندرية فى محطة الرمل .... ده مكانه بالظبط كنتى بتسالى ليه بقي

_ عشان عايزة اروحله ،

_ نعم تروحي لمين و انتى مفكرة انى ممكن اخليكي تروحي

_ بابا ونبي انا لازم اروح لازم اشوفه ضرورى

_ هو انا اخلص من امك تطلعي انتى انا مش عارفة اى أنور ده

_ قصدك ايه بالكلامك ده

_ لا قصدى ولا مش قصدى اخر الكلام انتى مش رايحة فى حته

________________________فى محطة القطر _______________________

سافرت بعد معاناه مع بابا وماما الا كانوا رفضين اسافر لوحدي اتحايلت عليهم كثير عشان يوافقوا لحد ما وافقوا في الاخر بس بشرط انى معقدش حتى يومين فى اسكندرية

نزلت فى محطة مصر

_ لو سمحت هو انا اركب منين لمحطة الرمل

_ بصي روحي عند الميدان و اركبي اى مشروع هيعدى على محطة الرمل

_ يعنى اركب اى واحد

_ لا ما انتى اسالى السواق الاول هيعدى عليها ولا لا

_تمام ماشي شكرا

العفو يا اختى

_____________________________بعد ساعة _______________________________

وصلت قدام العمارة بس مش عارفة لما اشوفه هقوله اى ولا هقوله ازى انت كلمتنى وانت فى التسعينات .. تب لو قولتله هيصدقنى و لا هيفتكرني بضحك عليه

_ محتاجة حاجة يا استاذه

_ ها لا مش عايزة حاجة

_ اومال واقفة كده ليه يا بنتى

_ هو حضرتك واقف هنا

_ ايوه يا بنتى انا بواب العماره دى

_ حضرتك انا كنت عايزة اطلع عند استاذ أنور عبدالسلام

_ استاذ أنور المرشدى

_ هو حضرتك تعرفه

_ طبعا عز المعرفة

_ هو يعنى عصبي ولا لا و شكله عامل ازى يعنى لو قولتله على حاجة ممكن يصدقني و لا يفكرنى بضحك عليه تب هو طيب ولا اى

_ يا بنتى والله مكنش في أحسن من الاستاذ أنور ده كان ونعمة و الأخلاق

_ تب هو فوق دلوقتى ولا فى الشغل و لا ممكن يكون على البحر بص انت قوله فى ضيفة جيلك بس قوله انى عايزة ضرورى

_ والله يا بنتى انا مش عارف اقولك اى بس الأستاذ مش فى ولا مكان من الا انتى قولتيه

_ اومال فين ما تقولش انه فى القاهرة مش بعد ما انا اجى وهو يروح هناك

_ والله يا بنتى استاذ أنور مش فى القاهره

استاذ أنور اتوفي مات من شهرين

_ اي انت اكيد بتكدب يعنى اي مات مستحيل طبعا مينفعش اه اكيد بعد الا حصل مينفعش يموت .. هو اى الا مات انت اكيد بتهزار

_ انا ولا بكدب و لا اعرفك عشان اهزار معاكى عندك العمارة اهى اطلعى اسالى السكان اللي فيها كلهم هيقولوا لك نفس الكلام

_ تب ازى مات يعنى تب و الا حصل ده كان اى و ازى يعنى

_ بصي يا بنتى انا معرفش اى الا حصل معاكى بس مفيش حاجة بتحصل معنا غير وليها سبب محدش يعرفه غير ربنا

_ تب يا عمو انا عايزة اطلع اشوف الشقة لو سمحت

_ والله يا بنتى انا كده كده كنت هطلع افضيها عشان الاستاذ كام مأجر فتعالي معايا شوفيها

لما طلعت فوق فى الشقة شفت صور كتير ليه هو وماما وهم صغيرين كان محتفظ بكل حاجة كان بيكتب قد اى كان بيحبها و قد اى كان نفسه يعرفها بحبه ده كان نفسه هى تحس بيه و كتب قد اى كان موجوع لما اتجوزت هى و بابا و انه مقدرش يشوفها و هى بتروح لحد غيره و كل ده من سبب خوفه انه يعترف بحبه ليها فيخسرها بس الا مكنش عارفه انه هيسخرها للأبد من سبب خوفه ده

_ عمو لو سمحت حضرتك تعرف فين مكان قبره

_ ايوه اعرف مكانه

_ تب ممكن حضرتك تيجى معايا لانى عايزة أزور قبره

_حاضر من عنيا

_ تسلم يا عمو

_اهو ده قبره يا بنتى وانا هستناكي بره لو عوزتي حاجة نادى عليا

_ تمام يا عمو متشكرة جدا لحضرتك

_ العفو يا بنتى

_ عمرى ما كنت أتوقع أن ده ممكن يحصل معايا ... انت دلوقتى عارفني ولا لا انا ليلى بنت امل حبيبتك ..انا مش عارفة ده حصل ازى بس كان نفسي اعرف رد فعلك لو قولتلك انى كلمتك وانت فى الماضي هتعمل اى ... انا بس عايزة اقولك ان حبك لماما هتعرفه بس هتعرفه بعد فوات الاوان.... انت عارف ان ماما هتنفصل عن بابا

انا كنت عايزة اقولك ده فى اخر مكالمة كانت ما بينا بس وقتها التليفون قفل

انا هرجع القاهرة تانى انهارده بس هجيلك تانى فى أقرب وقت بس وقتها ماما هتبقي معايا

سلام يا أنور.... معلش بقي مش متعود عليك انى اقولك عمو

_ انا خلصت و ماشية يا عمو

_ ماشي يا بنتى بس انتى هترجعي القاهرة برضه انهارده مينفعش كده حتى ارتاحي انهارده

_ لا يا عمو خلاص هرجع الا كنت جايه عشانه خلاص راح

_ شكرا يا عمو على وقفتك معايا

_ العفو انتى زى بنتى ... يلا توصلي بالسلامة ان شاء الله

____________________________ فى القاهرة ______________________________

لما وصلت القاهرة عرفت ان ماما قالت لبابا انها عايزة تطلق و اتفقوا انهم هيطلقوا

قولت لماما كل حاجة حصلت معايا مكنتش مصدقني فى الاول بس بعد ما قولتلها على حاجات كانت بتعملها و أنور بس الا عارفها صدقتني و عرفتها انى روحت ازوره عشان كده بس لما وصلت عرفت انه اتوفي وقتها ماما عيطت كتير على صديق عمرها

و لأنها هى كمان خافت من مشاعرها و كانت مفكرة ان أنور مش بيحبها عشان كده سافر و سبها بس مكنتش تعرف انه سافر لانه مكنش قادر يشوفها و هى بتروح لغيره

ماما قالت ياريت كان قالى مكنش كل ده حصل بس فى الحقيقة ان كل ده مكتوب لينا فى الاخر و مكتوب لينا اننا نعيشه

فى النهاية انا مستحيل انسي الا حصل معايا و مستحيل انسي انى كلمت حد و هو فى التسعينات .. حياتى هتمشي عادى بس القصة دى هتفضل معلمه فيا للأبد

____________________________________________________________________

فى النهاية امل و أنور كانوا خايفين يظهروا مشاعرهم لبعض عشان ميخسروش بعض بس الا مكنش حد عرفه فيهم انهم هيخسروا بعض و للأبد

كتير مننا يبعمل زى أنور و امل و فى الاخر بنقول ياريت لو كنا قولنا فى الحقيقة اننا حسينا بالمشاعر دى عشان نظهرها مش عشان نخفيها ... و فى النهاية متخليش خوفك يتحكم فيك احنا مش هنشوف غير الا مكتوبلنا وبس