تحميل رواية «أسباب مغيبه» PDF

ليلي:يعني إيه يا ماما نروح هناك

انا مش فاهمه

ماجده بحنيه:يعني عادي يا ليلي

موضعكوا ده عدي عليه

أكتر من سنتين

ليلي بخنقه:هو مش بالي أصلا يا ماما

بس انا مش عايزه أروح هناك

ماجده:ليلي مينفعش اللي انت عايزاه ده

لازم نحط في اعتبارك إن دول أهلك وأبوكي طلب منك تروحي

مينفعش ترفضيله طلب

ليلي بضيق:وليه مينفعش

ليه لازم أقول حاضر ونعم

لواحد مسافر في شغله وبيجيلنا مره ولا اتنين في السنه يا ماما

ماجد:عشان هو بيشتغل يا ليلي مش بيلعب

بيأمن مستقبلك وانت عارفه هو بيحبك قد إيه

ليلي بتعب:لا معرفش يا ماما

هو ملهوش مبرر عندي

وملهوش حق عليه أسمع كلام راجل بيجري ورا الفلوس وبس

مستني إيه أكتر من كده

لو عايزه تقولي فتقولي صح

بابا إسمه كبر في أمريكا وبقي راجل أعمال

فطمع وجري ورا الفلوس أكتر وساب بنته ومراته

ماجد بتعب من الجدال:هو قالنا نسافر معاه

وانت اللي رفضتي واتحججتي بالجامعه وصحابك

مع إني كنت مستعده أكون معاه هناك عادي

ليلي بعصبيه:معاه فين؟؟

مع واحد مفكرش غير في نفسه

مع واحد باع ورماني ورا ضهره

وجري ورا شويه فلوس

ونسي انه مش هياخد حاجه معاه

كملت بعيون مدمعه

انا مطلبتش منه يقعد جمبي ولا يسيب شغله

عشان انا بفرح بنجاحه

بس كنت عايزاه يكون معايه أكتر من كده

لو هو كان عايز يكون معايه كان قدر يكون معايه رغم كل الظروف

بس هو اختار نفسه

فبلاش تعاتبيني دلوقتي لما اختار نفسي

بعد إذنك يا ماما

_____________________

ليلي*

عارفين لما تحسوا إنكوا مجرد ضيف شرف في حياه أهلكوا

لما تكونوا آخر اهتماماتهم

وهو بيجري ورا فلوس ومنصب وإسم

ونسي بنته

بنته اللي سابها في أهم مراحل حياتها

مشافش أول مره مشيت فيها

أول خطوه ليا مكنش موجود

أول مشكله في المدرسه مكنش موجود

كل عيد وكل رمضان مكنش موجود

مكنش موجود في حياتي غير في الوقت اللي هو عايزه

في الوقت المناسب معاه هو

مش من حقي دلوقتي أقول لأ

مش من حقي أرفض

قعدت علي الأرض وفي إيدي ألبوم صورنا

صوري مع عيلتي

ده اللي المفروض كان يكون موجود

المفروض يكون فيه لحظات حلوه

ذكريات!!

بس الحقيقه مفيهوش غير صوره واحده معاه

أبسط حقوقي وهي الذكريات

فشل أنه يعملها معايه

هيفضل ديما السؤال في بالي

هو لو مكنش مستعد للخلفه

لو مكنش قادر يشيل المسؤليه

خلف ليه؟

ولا عشان الصوره تكمل

طب وأنا

طب وهو سابني عشان مش كامله

مكنتش البنت اللي بيتمناها

مكنتش استاهل اهتمام منه

كنت مثلا أقل من إني أكون في صورته اللي رسمها لنفسه…

_______________________

بليل

كنت قاعده في البلكونه لوحدي

صوت الراديو شغال علي أغنيه أم كلثوم

“لسّه فاكر يا قلبي… لسه شايف زمانا.”

في إيدي كوبايه نعناع

مشروبه

انا لسه فكراه

كنت بشربه عشانه ومعاه

فاكره تفاصيله

كلمه بحبك اللي هو أول راجل يقولهالي

ومش هقبل بيها من غيره

أول مره كنت أحس بالأمان معاه

معاه هو

طب هو يمكن عشان كنت بدور فيه علي الأب اللي اتحرمت منه

فمشي

يمكن زهق

أصعب عقاب حبيب يعاقب حبيبه بيه هو الفراق..

مفيش حد بيحب بيفارق الا لو من الأول محبش

فوقت من سرحاني علي جرس الباب

استغربت مين ممكن يكون جه في وقت زي ده

قومت من مكاني وانا شايفه ماما رايحه ناحيه الباب

_______________________

فتحت الباب وماما كانت واقفه ورايا

رجعت لورا بصدمه

ليلي بصدمه:بابا

محمد بحنيه:اه بابا

مكنتيش عايزاني آجي

ليلي ببرود:مش هكون عايزاك تيجي بيتك ليه

حضرتك حر

محمد بصوت مرتفع شويه:أنا عايز افهم لحد إمتي

هتعامليني كده وليه

ادخلت ماجده لما حسيت ان الموضوع هيكبر:مش وقته الكلام ده

خش يا محمد عشان ترتاح من السفر

سابت ليلي الباب وهي بتبص لمامتها بدهشه وإستغراب

سابتهم واقفين قدام بعض

ودخلت هي جوا

وهي بتضرب كف علي كف من العيله ده

_______________________

كانت ليلي قاعده في أوضتها

بتقرأ كتاب زي عادتها

كانت سامعه كلامهم ومنقاشتهم بره بس مكنتش عايزه تدخل

عايزه تبقي بعيد

فاقت علي خبط باب الأوضه

فإتنهدت بتعب:ادخل

دخل محمد وهو في إيده شنطه سفر

بصيتله ليلي بإستغراب

محمد:ممكن أقعد

اتنهدت ليلي بضيق وبصيت في الكتاب

فقعد قدامها واتنهد بعمق قبل ما يتكلم وكأنه بيجمع الكلام:أنا أبوكي يا ليلي

أنا مفيش في حياتي حاجه ولا حد أغلي منك

بلاش تحكمي عليه من بره

انت متعرفيش أنا بمر بإيه لوحدي هناك او عيشت إيه وانا لوحدي

متعرفيش تعبت إزاي عشان أوصل للمكانه ده

كمل بصدق

وانت بنفسك اللي رفضتي تبقي معايه

مكنتش طالب منك غير إنك تبقي معايه

في المكان اللي أنا فيه

ولسه عند كلامي

لو قولتي آه

ورقك وكل حاجه هتجهز من بكره

أنا مكنتش اتمني أبدا ان علاقتي بيكي توصل لده

انا بحبك يا ليلي

ومش هقولك مفيش أب بيكره ولاده

عشان أنا مش بحبك زي أي أب

يمكن أكون فشلت اديكي اللي اي أب بيديه لعياله

بس حبيتك حب مفيش أب قدر يديه لعياله

انت محتاجه تركني ده وشاور علي دماغها

وتفكري بده

المره ده كان بيشاور علي قلبها

اتكلم بوجع

أوعي تكوني فاكر أنه سهل عليه

اشوف كرهك ليا او نظراتك ده

مش سهل أقف اسمع واشوف منك انت ده

انت بنتي يا ليلي

يعني حته مني

وحتي لو فضلتي بتكرهيني

هفضل أحبك لحد آخر نفس فيه

عشانك

عشان انت تتحبي يا ليلي

اتكلم بضحك وهو بيمسح دموعه اللي نزلت:بصي جبتلك إيه

بصيتله ليلي بوجع عليه وعليها

كل كلمه منه لسه بتأثر فيها

كلمه بحبك منه مختلفه

بطعم تاني

الكلام معاه وانها تحس إنها مهمه بالنسباله

ده أكبر إنجازاتها

أومر مره تحس أنه فعل يستاهل فرصه تانيه

ياتري كان يستاهل تسيب حياتها وتروح معاه؟؟

واقفه في النص بين أرضين لا هو عارف يكون معاها ولا هي عارفه تكون معاه

حاولت تجمع نفسها وتلاقي كلام مناسب

ليلي بتعب:انا مش قادره

ولله ما قادره يا بابا

مش قادره اكون عادي ولا انسي ولا امثل ان انا كويسه

انا كل لحظه كنت فيها لوحدي من غيرك

انت مكنتش موجود معايه عشان دلوقتي تحاسبني

يمكن انت معاك حق او انا معايه حق

محدش عارف

بس اللي انا عارفاه

إن لو انت كنت معايه

وفي حياتي

عمري ما كنت هكون أنا دلوقتي

ولا كنت هكون ليلي اللي قدامك ده

شدها محمد لحضنه بوجع ودموع:أنا أسف

أسف يا بنتي

ليلي دموعها نازله وإيديها جمبها

لا قادره تبعد ولا قادره تقرب

مش قادره ترفع إيديها وتحضنه ولا قادره أنه يهون عليها

حاطه إيديها جمبها

وهو بيضمها بحب ودموعه بتنزل بندم

_______________________

تاني يوم

ليلي كانت واقفه قدام المرايه

لابسه دريس بني وعليه خمار بيج

بترسم عيونها بالكحل البني

وتحط ليب جلوس بينك

طلعت شنطه بني وكوتشي أبيض

خلصت ووقفت تبص علي نفسها في المرايه

بتاخد نفس وكأن روحها بتطلع

حاسه بتعب او يمكن خايفه من المواجهه

من الأسئله أو حتي النظرات

_______________________

في البلد

عربيه محمد وصلت

كانت ليلي ورا

وجمبه ماجده

علاقه ليلي اتحسنت شويه بمحمد

أحسن من الأول بس مش أوي

كل واحد منهم بيحاول

بيحاول يبقي أحسن

بيحاول يتأقلم

كل واحد منهم بيحاول يقرب من التاني

ويكفي أنهم بيحاولوا

كان في استقبالهم

محمود أخو محمد

مياده مراته

وبنتهم ندي

سلم محمد علي محمود بلهفه لأنهم مشافوش بعض من كتير

سلمت ليلي بهدوئ عليهم وكأنها خايفه تفتح كلام فتسمع سيرته

مش عارفه إزاي هتطلع وتقعد وتشوف أوضته

بس هو مش فيها

هو إدا وعد ولأومر مره ميكونش قد الوعد

_______________________

في العماره

كان فيه شقه لمحمد وليلي وماجده

والشقه التانيه بتاعت محمود

والتالته بتاعت إبنهم اللي كانت متجهزه لجوازه

في شقه محمود

كانت ماجده ومياده في المطبخ بيحضروا الفطار عشان المغرب فاضلوا حاجه بسيطه

مياده بحزن:أنا أسفه مره تانيه يا ماجده

عارفه أنه مش كفايه

بس إبني ميعملش كده

هو بيحب ليلي ومستحيل يسيبها

ماجده بحزن:بس هو سابها فعلا يا مياده

سافر وساب الدنيا كلها عشان ميشوفهاش

ياريت محدش يفتح الكلام ده قدامها

مياده:مش هفتحه عشان عارفه إنها حقها تزعل وحقك انت كمان

بس انا بقولك احساسي

افهميني

انت عارفه عمر

مستحيل يعمل كده

ده كان روحه في ليلي

ماجده بحزن:وهو اختار

هو ميستاهلش بنتي ولا يستاهل قلبها

مياده بدموع:يمكن غلط

بس انا متأكده أنه هيرجع وهيقول عمل كده ليه

إبني مش كويس وانا حاسه بيه

ماجده بنبره جامده:يرجع ولا ميرجعش هو حر

أهم حاجه بعيد عن بنتي

كملت بحزن

انا بقولك كده عشان بنتي يا مياده

إبنك كسرها وانا عارفه إنها مش كويسه

ربنا يرجعه ليكي بالسلامه

مياده بدموع:يارب

________________________

في أوضه ندي

كانت ليلي قاعده معاها سرحانه

مش مركزه

ندي بمرح:سرحانه في إيه

ليلي بإنتباه:ولا حاجه

انت عامله إيه في الدراسه

اتجدعني بقي عشان ده آخر سنه

ندي بحزن:مش عارفه اركز في حاجه يا ليلي غير فيه

فيه هو

عمر عمره ما كان كده

هو مش هيسيبك ولا هيمشي ويسيب الدنيا كلها غير لو عنده أسباب

قلب ليلي دق من مجرد إسمه

حصل اللي كانت خايفه منه

الكلام رجع من تاني

وسيرته بقيت تيجي

بصيت ليلي الناحيه التانيه وهي بتمسح دموعها وبعدين اتكلمت بصوت مبحوح:هروح الحمام يا ندي وارجعلك

ندي بلهفه:استني بس يا ليلي

انت زعلتي ولله م اقصد

انا بس عارفه إنك زيي وزي ما هو يهمني يهمك

يمكن أكتر مني

ليلي بحزن وهي بتهرب من عيونها:كان

كان يهمني

_______________________

كانت ليلي خارجه من الحمام بعد ما مسحت دموعها وغسلت وشها

عديت من قدام أوضته

وقفت قدامها دقيقه

هي بعيده عنهم فمحدش شايفها

مديت إيديها علي الأكوره في لحظه من غير ما تفكر

وكأن دماغها في الوقت ده مكنتش معاها

فتحت الباب بهدوئ

قلبها اتهز

ريحته

ريحته لسه زي ما هي في كل حاجه

مش ريحته بس

ده ريحه ذكريات

او يمكن وجع

مش ديما الذكريات بتكون حبيب

ممكن تكون عدو

مش ديما بتطبطب عليك

ممكن تلف إيديها حواليك فجأه

وتخنقك

ممكن في يوم الذكريات اللي كانت بتونسك

تكون سبب حزنك

دخلت الأوضه

وكل خطوه بتكسر حته منها

مع كل خطوه دموعها بتنزل

قعدت علي سريره

ماسكه في إيديها صورته

ضحكته اللي كانت بتحبها

وعيونه

طب هو ليه بعد

بعد ليه فجأه من غير مبرر

رساله

مكالمه

ليه سابها

معقوله مبقاش يحبها؟؟

قامت من مكانها بعد ما رجعت الصوره مكانها

وقفت قدام المرايه

عليها حاجته

كأنه موجود

بس المره ده كل حاجه في مكانها ماعدا هو

وقفت في نص الأوضه تبص حواليها علي كل حاجه

تفتكر كل كلمه

ضحكه

وعد

بس هي دلوقتي واقفه في نفس المكان لوحدها

وباقي ذكريات وبس….

_______________________

بعد فتره

ليلي وندي كانوا بيساعدوهم

ويطلعوا الأطباق والأكل

وقفت ليلي لوحدها قدام كرسيه

اللي كان جمب كرسيها أو هو اللي خلاه كده عشانها

دلوقتي مبقاش موجود

الكرسي فاضي

بس ريحته

وذكرياته لسه موجوده

سيرته بتتجاب بكل خير

لما بتفتكره

بتفتكر حنانه

والأمان اللي أومر مره حسيته معاه

اللي بعيد عن العين مش بعيد عن القلب

لو هو بعيد

فروحه ساكنه روحها

وضحكته ديما سمعاها في كل كلمه

وصورته قدامها في كل مكان

________________________

طلعت ليلي شقتهم

أخدت شاور

و لبست عبايه بيتي لونها أبيض وطرحه بيضا

حطيت ميكب خفيف

روج نود وكحل بني

قعدت علي السرير بعدها

وهي باصه للفراغ

كل حاجه من برا تمام

بس جواها لأ

إزاي هترتاح وهو بعيد

كلام ندي فكرها بيه

هو ممكن يكون بعد غصب عنه

كان تعبان او زعلان

يمكن هي محاولتش كفايه عشان تعرف

حطيت إيديها علي راسها بتعب من التفكير

قلبها بيوجعها

هي بتتمني حتي لو بعيد يكون بخير

مش مهم هي

المهم هو يكون بخير

______________________

في أوضه مياده

خلصت صلاه وقعدت علي السجاده بهزيمه وتعب

رفعت إيديها

ودموعها نازله كأنها مطر:يارب احفظلي إبني يارب

انا حاسه أنه مش كويس

مش بخير

يارب إلا إبني يارب

احفظه ليا حتي لو مش معايه

هما ميعرفوش حاجه

بس انا حاسه

وفهماه هو مخبي حاجه

يارب رجعه ليا بالسلامه يارب وريح قلبه

ومتورنيش فيه حاجه وحشه

_______________________

في شقه محمود

الكل علي السفره

اللي بياكل

واللي بيتكلم

بس هي عنيها علي كرسيه هو

بتلعب في طبقها من غير ما تاكل

مياده:مبتكليش ليه يا حبيبتي

الأكل مش عاجبك

ليلي:لا طبعا ولله الأكل حلو جدا

مياده:أومال مش بتاكلي ليه

ليلي:باكل أهو ولله

محمود بص لليلي:خلصي يا لولا عشان آخدك انت وندي تتفرجوا علي الأرض وتشربوا شاي بالنعناع

الجو بليل بيكون حلو جدا

ندي بمرح:أخيرا

كان لازم ليلي تيجي يعني

قاطع كلامهم صوت جرس الباب

قامت وقفت ليلي:هفتح أنا

اتحركت من قدامهم

وهي سرحانه

فتحت الباب بهدوئ وهي باصه في الأرض

استغربت لما محدش اتكلم ولا دخل

رفعت عيونها عشان تتصدم بيه

قلبها دق

وعيونها متعلقه عليه

عليه هو وبس

قلبها دق وعيونها متعلقه عليه

عليه هو وبس.

كان ميقلش حاجه عن صدمتها،

واقف قدامها، بس الفرق إنه كان بيفحصها بنظره…

نظرات غريبه،

مش نظراته اللي عارفاها.

وشه شاحب وعيونه متغيره،

مستحيل يكون ده هو.

جسمه رفيع أكتر من الأول بكتير.

نطقت ليلي بدون وعي ودموعها بتنزل:

“إنت… إنت مالك؟

ليه شكلك تعبان؟

رد عليّ يا عمر بالله عليك!”

لو تعرف بس نطق اسمُه ده عمل فيه إيه…

كان واقف قدامها بيراجع تفاصيلها…

ملامحها…

إحلوت أوي.

بس لسه فاكره طلبه إنها تحط كحل بني عشان بيبرز عيونها العسلي.

هي هي عيونها،

نفس اللمعه.

آه… لو تعرف دموعها بتعمل فيه إيه.

عمر بهمس:

“ممكن أدخل؟”

وسعت من قدام الباب وهي بتمسح دموعها.

دخل شنطته بهدوء، ووقف قدامهم.

الكل اتفاجأ من وجوده،

كلهم وقفوا في نفس اللحظه.

أول واحده اتحركت كانت مياده.

جريت تاخده في حضنها بدموع:

“وحشتني…

وحشتني أوي يا عمر.

إنت كويس صح؟

رد عليّ يا ابني.”

خرجت من حضنه وهي بتبص على وشه بصدمة ودموع:

“إنت… إنت ليه كده؟

إنت اتغيرت أوي يا عمر.

حصلك إيه يا حبيبي؟

رد عليّ يا حبيب أمك.

بلاش تقلقني عليك.”

عمر بدموع:

“أنا… أنا كويس يا أمي.

خلينا نقعد بس.”

وقف محمود بصرامه:

“إنت رجعت ليه؟

مش كنت ماشي وسايب أهلك من غير مكالمه ولا كلمه؟

جاي دلوقتي ليه؟”

خرج عمر من حضن مياده وبص لمحمود بنظره وجع وهو بيمسح دموعه:

“مش عايزني يا بابا؟”

مياده بدموع:

“لا لا، متقولش كده.

أبوك بس واخد على خاطره يا عيوني،

هو كان عايز يطمن عليك،

هو بس زعلان منك.

طيب خاطره يا ابني.”

محمود بصرامه:

“ومين قالك إني واخد على خاطري منه؟

أنا مليش عيال غير ندى،

وأنا مخلفتش رجاله فاهمه.

واللي عمله في بنت عمه عمره ما هيتنسي فاهم؟

حتى لو أمك سامحتك،

أنا لأ.”

كانت ليلي واقفه جنب الباب مكانها، حاطه إيديها على بقها وبتعيط.

وماجده اتحركت ووقفت جنبها،

أخدتها في حضنها،

وهي خبيت وشها فيها وهي بتعيط،

بتحاول تهرب من عيونهم.

عايزه تطلع تجري وتسيبهم بس مش عارفه.

جريت ندى على عمر بدموع، وحضنته بلهفه وهي بتبص لمحمود:

“لا لا يا بابا،

متقولش على عمر كده.

هو أكيد عنده أسباب.

إنت مش شايف شكله عامل كده ليه؟

مش شايفه تعبان إزاي؟”

محمود بصرامه:

“ندى،

أنا مليش دعوه بكل ده.

أخوكي ملوش مكان هنا.

بنت عمه موجوده، وهو مش هينفع يكون موجود.

يروح شقته، ولو عايزه تروحي معاه الباب مفتوح.”

عمر بص لمحمود بخذلان وهو كاتم دموعه:

“ت… تمام.

أنا همشي.”

محمد بص لعمر بنظره غريبه:

“لأ، أنا اللي همشي.

أنا وبنتي مش هنقعد هنا دقيقه واحده.

خلي ابنك موجود معاك.”

محمود بشده:

“والله العظيم ما يحصل.

إنتوا هتقعدوا في شقتكوا، وعمر في شقته،

ومش هيجتمع بيها في أي وقت أبداً.”

محمد كان هيتكلم،

بس قاطعه محمود بشده:

“الكلام خلص يا محمد.

أنا أخوك الكبير، وكلامي هيتسمع.”

ليلي اتكلمت برعشه وهي بتمسح دموعها:

“لأ… لأ يا عمو،

عمر هيقعد في بيته،

ده بيته وأنا ضيفه هنا.”

محمود بقوه:

“لا، مش ضيفه.

وابني اللي خان أهل بيته ملوش قعاد فيها.”

كانت هتتكلم ليلي،

بس قاطعهم عمر بضعف:

“معاك حق.

ليه أصلاً أقعد في شقتك؟

أنا مش هقعد هنا دقيقه واحده، ولا حتى في عمارتك.”

محمود قعد ببرود:

“برحتك.”

مياده بعياط:

“وأنا مش هسيب ابني،

ولو مشي همشي معاه يا محمود!”

محمود بعصبيه:

“ولو خرجتي بره البيت ده،

تبقي طالق يا مياده.”

مياده بصدمه:

“إنت بتحلف عليّ بالطلاق؟!”

ماجده اتدخلت:

“استهدوا بالله يا جماعه،

إنتوا كبرتوا الموضوع من ولا حاجه.

كل واحد في شقته ومحدش هيكون له علاقه بحد.”

عمر بص لمحمد بنظره غريبه:

“لأ طبعاً…

عشان نريح أونكل محمد وبابا،

أنا همشي.”

ندى بعياط:

“لا لا يا عمر، والنبي ما تمشيش!

طب خدني معاك!”

عمر باس راسها:

“هجيلك يا عيون عمر.”

ندى بعياط بصيت لمحمود:

“أنا هروح معاه.”

محمود بقوه:

“يبقى مالكيش قعاد هنا تاني،

ولا تعتبري إن ليكي أب.”

ندى بعياط:

“بس يا بابا…

هو لسه راجع من السفر…”

محمود بصرامه:

“أنا قلت اللي عندي.”

راح عمر ناحية مياده وباس إيديها بحب:

“أنا همشي يا أمي،

وهبقى أكلمك ونقعد سوا.

لو سمحتي سيبيني براحتي ممكن.”

مياده بدموع:

“مش هسيبك يا عمر،

وأبوك اللي حلف عليّ بالطلاق،

مش قاعده في بيته دقيقه واحده.”

عمر بهدوء:

“مش إنتي يهمك راحتي؟

هكون مرتاح كده.

وغلاوتي عندك، ما تمشي ولا تعملي مشاكل بسببي.”

وبص لمحمود بهدوء:

“واعتبرني مجتش يا بابا.”

باس راس ندى وهي بتعيط،

وشد شنطته بهدوء،

وبص لليلي نظره غريبه…

نظره مش مفهومه.

فتح الباب وخرج

محمود قعد مكانه بعصبيه،

وليلي طلعت تجري على شقتهم،

مياده دخلت أوضتها وقفلت الباب وراها،

وندى دخلت أوضتها وقفلت على نفسها.

_______________________

في أوضه ليلي

قفلت الباب عليها وقعدت ورا الباب،

وهي دافنه وشها بين إيديها وضامه ركبتها ليها.

كانت بتعيط وقلبها بيتقطع…

منه…

من شكله.

مكنتش تتخيل إن لما تشوفه هيكون كده،

مش هو ده عمر اللي كانت تعرفه،

ولا عمره كان بالهزيمه والضعف ده.

ده مش عيونه، ولا نظرته،

نظرته كان فيها حياه،

دلوقتي كأن الحياه اتسحبت منها.

عيونه فاضيه،

مفيش فيها مشاعر.

حاطه إيديها على دماغها، وعيونها حمرا.

قلبها بيدق بخوف،

ومع كل دقه دموعها بتنزل.

مكنتش تتوقع إنها هتنهار كده لما تشوفه،

مكنتش عامله حساب اللحظه دي.

قلبها لسه بيخاف عليه زي ما هو،

البعد والقسا مغيرهوش.

عند عمر

كان راكب عربيته بهدوء،

شنطته ورا،

وهو سايق كأن مفيش حاجه حصلت،

كأنه مكنش موجود في اللي حصل ده.

محدش عارف هو مشي بمزاجه فعلاً،

ولا فيه حاجه تانيه؟

في أوضه ليلي

سمعت خبط على بابها،

فقامت وقفت وحاولت تمسح دموعها والكحل اللي سايح على وشها.

فتح الباب محمد،

ومن غير ولا كلمه…

قرب، أخدها في حضنه.

لأول مره تحس الإحساس ده،

إن في ضهرها أب حاسس بيها،

مقدر وعارف هي بتمر بإيه.

ممثلتش أكتر من كده،

حضنته بكل قوتها وهي بتعيط.

يمكن مفيش كلام يوصف اللي هي مريت بيه من غيره،

بس المهم دلوقتي…

هو في حضنها.

من غير ما تطلب،

ولا تحس إنها لوحدها.

هي بين حضنه،

مكانها… ومكان قلبها الصح.

________________________

في شقه محمود

خبط على باب مياده،

ودخل.

محمود بعتاب:

“هتفضلي قاعده وسيباني لوحدي بره؟”

بص عليها،

كانت عيونها حمرا ودموعها نازله.

جري قعد جنبها،

ومسك إيديها بلهفه:

“متعيطيش عشان خاطري…

أنا عملت كده عشان ده الصح.”

“ابنك كسر قلب ليلي، وجه عليها،

وصغرنا،

ومعملش لينا اعتبار يا مياده.”

مياده بعياط:

“إنت إزاي قسيت عليه كده؟

بتطرد ابنك إزاي؟

جالك قلب؟

مشوفتش شكله؟

وشه اللي دبلان؟

قلبك موجعكش؟

محستش بوجعه؟”

محمود بحزن:

“أنا بشد عليه عشان يعرف غلطه…

ابنك غلط.”

مياده بعياط:

“غلط؟!

إنت قعدت معاه؟

سمعت منه؟

شوفت الكل جه عليه إزاي؟

شوفت نظرته ليك؟

هو اتكسر منك إنت…”

“مش هتفوق يا محمود غير لما تخسر ابنك،

ويارب ما ده يحصل.”

مشيت وسابته.

قعد مكانه،

سرحان، بيفكر في كلامها…

بس شايف إنه لازم يقسي عليه،

عشان يتعلم.

هو اتربى على كده…

والغلط لازم يتدفع تمنه.

________________________

في شقه عمر

كان واقف تحت الدش،

والمياه الساقعه بتنزل على جسمه.

باصص قدامه بنظره غريبه،

نظره فاضيه…

مش باين منها هو حاسس بإيه.

ذنب؟

هزيمه؟

ولا ساكت على حاجه؟

__________________________

في أوضه ندى

كانت رايحه جايه،

بتتصل بعمر،

بس موبايله مقفول.

بعتتله كذا مره،

مفيش رد.

وقفت في نص الأوضه،

دموعها بتنزل،

وخوفها عليه بيزيد.

ندى فتحت الموبايل،

لقيت ليلي شافت الرسايل ومردتش،

رجعت تتصل عليه،

تليفونه كان لسه مقفول.

قامت بسرعه بتوتر،

طلعت شنطه السفر بتاعتها وإيديها بترتعش،

لميت كل هدومها وهي مش شايفه قدامها من كتر الدموع،

خلصت وطلعت هدومها،

لميت شعرها بعشوائيه،

وأخدت موبايلها،

وطعت بره وهي بتشيل الشنطه بتعب.

طلعت ندى الصاله،

وهي بتجر شنطتها وراها،

كانت ماشيه علي طراطيف صوابعها،

بتجر الشنطه بهدوء.

هما كده كده هيعرفوا،

بس هي مش ناقصه دلوقتي،

ولا فاضيه لخناق وزعيق.

حطيت إيديها علي الباب ولسه هتفتح،

اتجمدت مكانها لما سمعت صوت محمود.

محمود بصرامه:

راحه فين يا ندى؟

عدلت ندى نفسها ولفت وشها لي بتعب:

نعم يا بابا؟

عايز تعرف راحه فين؟

انا راحه لعمر.

مسألش حتي عليه،

ملامح وشه اتشدت واتعصب.

كان هيتكلم،

فوقفته بإيديها بتعب:

عارفه…

عارفه…

مش هكون بنتك ولا البيت ده بيتي،

عادي يا بابا،

البيت اللي اتطرد منه أخويا،

ميكونش بيتي.

وقف محمود بعصبيه، وفي ثانيه كان ضربها بالألم.

وقفت مكانها بصدمه وإيديها علي وشها،

إنهارت في العياط،

وهي بصاله بصدمه.

أول مره يمد إيده عليها.

هو وقف مكانه،

وحط إيده جمبه،

بص عليها بندم.

كان عايز يتكلم، بس كبريائه منعه.

لفت وشها، ومستنتش تسمع كلمه زياده،

فتحت الباب وخرجت.

________________________

في شقه محمد،

كان قاعد هو وماجده في البلكونه،

كل واحد سرحان لوحدو.

لحد ما قطع الصمت محمد.

محمد:

لما ننزل أي وقت عند محمود،

متسبيش ليلي لوحدها أبدا لو عمر جه لأي سبب،

وخلي بالك من كل حاجه،

موبيلها واللاب،

حتي كلام ندى معاها،

عينك متغبش عنها لحظه.

ماجده بإستغراب:

ليه كل ده؟

هي كانت أول ولا آخر واحده،

خطيبها يسيبها،

انت مكبر الموضوع كده ليه؟

محمد بشده:

مش مكبر الموضوع،

لا هو كبير.

الولد ده،

بنتي مستحيل ترجعله تاني ولا حتي تتكلم معاه كلمه واحده.

ماجده بإستغراب:

ما هو سابها يا محمد،

وهي من وقتها ساكته وقافله علي نفسها،

انت دلوقتي عايزني اراقبها؟

محمد بشده:

اه يا ماجده،

كل خطوه هتتحسب عليها،

وموبيلها أنا بنفسي هشوف كل كلمه فيه،

انا معنديش استعداد،

ترجعله ولا حتي يحاول يكلمها.

ماجده بزعل:

وليلي متربيه وعمرها ما عملت حاجه من ورايا،

كل حاجه بتقولها ليا وتاخد إذني،

وانا مش هفتش ورا بنتي،

عشان أنا حافظه بنتي كويس وعارفاها.

بصيتله بعتاب،

وبلاش تشد نفسك عليها من تاني،

انت يادوب لسه ظاهر في حياتها،

حاول تكسبها مش تخسرها يا محمد.

محمد بزعيق:

وانت كمان بتقولي زيها،

انا مش لسه ظاهر في حياه بنتي،

هي فهماني غلط وفاكره إني بعدت عشان مش بحبها،

وأنا أهو بثبتلها العكس.

ماجده:

يعني انت أصلا مش حاسس بغلطتك،

بتقول كلام وبس؟

محمد بعصبيه:

اظبطي كلامك يا ماجده،

انا مش بتاع كلام وبس،

انا عايز بنتي تقرب مني وانا بحبها،

وانا هعمل وبعمل كل حاجه عشان مخسرهاش تاني أبدا،

والولد ده مش هترجعله ولو علي موتي.

خلص الكلام لحد كده.

_________________________

عند ندى،

وصلت قدام العماره اللي ساكن فيها عمر،

مكنتش عارفه هو في أي شقه ولا حتي في أي دور.

شالت الشنطه وبدأت تطلع علي السلم،

مش عارفه هي راحه فين،

بس يمكن تلاقي أي حاجه تعرف منها هو فين.

وقفت مكانها في الدور التاني بتعب،

وقعدت علي السلم لما حسيت برجليها مش شيلاها.

حطت وشها بين إيدها وعيطت.

مفاقتش غير علي صوت غريب.

صهيب بقلق:

حضرتك كويس؟

رفعت ندى وشها،

كان شعرها لازق علي وشها.

بصيتله وعنيها حمرا:

عايزه شقه عمر،

تعرف هي فين؟

صهيب بقلق:

اه اعرفه،

انا صاحبه،

انت أكيد ندى.

ندى بتعب:

انت تعرفني؟

صهيب قرب منها وأخد الشنطه:

مش مهم،

قومي معايا،

انت قاعده كده ليه؟

ندى بدموع:

بدور علي عمر،

افتكرت إني مش هلاقيه،

وو…

سكتت وهي حاطه إيديها علي قلبها،

وبتتنفس بصعوبه.

صهيب وقف بقلق:

انت كويسه؟

ندى بنهجان:

ا انا تمام،

ممكن بس تاخدني شقته؟

صهيب بقلق:

حاضر.

مشيت قدامه لحد ما وصلت شقته.

ندى بصيتله بدموع:

شكرا.

خبطت علي الباب،

ووقفت باصه للأرض بتعب.

فتح عمر الباب، واتفاجأ لما شافها:

انت كويسه؟

ازاي جيتي هنا؟

اترمت ندى في حضنه بتعب وعياط:

بابا…

بابا يا عمر…

ضربني.

عمر طبطب علي ضهرها:

طب إهدي،

إهدي.

عمر بص علي صهيب بإستفهام.

صهيب:

هي مكنتش عارفه شقتك،

وانا شوفتها تحت،

همشي انا وأشوفك بكره.

عمر بإمتنان:

شكرا.

ندى بتعب:

مش…

مش قادره آخد نفسي يا عم—

فجأه صوتها وقف،

وهو حس بتقل جسمها.

خرجها عمر من حضنه،

واتصدم لما لقاها فاقده الوعي.

ضرب علي وشها بخفه:

ندى!

ندى حبيبتي!

مالك؟

شدها لجوا بسرعه،

نيمها علي الكنبه،

وحاول يفوقها.

بص لصهيب بخوف:

اعمل حاجه!

صهيب بقلق:

مش هتفوق…

شكلها

انقلها جو بسرعه، وانا هجيب الشنطه وآجي.

عمر بقلق:

بسرعه!

________________________

في أوضه ليلي،

كانت رايحه جايه بتوتر،

ماسكه موبايلها في إيديها.

كل شويه تخش علي الإتصالات،

عايزه تتصل علي عمر.

لسه إسمه زي ما هو،

كل حاجه تخصه لسه موجوده في مكانها،

معملتلوش بلوك زي ما قالت،

ولا مسحت رقمه.

رقمه الوحيد اللي بيتنقل من تليفون لتليفون عشان يفضل معاها.

فتح الباب محمد فجأه من غير ما يخبط،

وبصلها بشك:

بتعملي إيه؟

ليلي بإستغراب:

مش بعمل حاجه يا بابا،

وبعدين هو حضرتك مخبطتش؟

محمد بشك:

وانت عايزاني اخبط ليه؟

بص علي إيديها، وبعدين اتكلم بأمر:

هاتي الموبايل ده.

ليلي بإستغراب:

ليه؟

محمد بزعيق:

من غير ليه،

هاتي الزفت!

مدت التليفون لي،

ودموعها نزلت من أسلوبه،

ولهجه الشك اللي بيتكلم بيها.

مدلها الموبايل تاني بأمر:

افتحيه.

ليلي بدموع:

فيه ايه يا بابا؟

افتحه ليه أصلا؟

هتفتش ورايا؟

مش واثق فيا؟

محمد بزعيق:

قولت افتحيه!

ليلي بصيت في عيونه بتعب،

كانت

ما صدقت إن علاقتهم بدأت تتحسن،

بس هو أهو…

رجع أسوأ.

ليلي بدموع:

وانا مش هفتحه.

محمد بزعيق:

تمام، يبقي خليه معايا بقي،

وأوضتك ده مشوفكيش براها يا ليلي.

بص حواليه وأخد اللاب.

محمد بعصبيه:

وآدي اللاب كمان!

ليلي كانت بصاله بصدمه،

وعيونها مليانه دموع بتحاول تكتمهم،

مش لاقيه كلام مناسب،

ولا عارفه تقول إيه.

ليلي وقفته بدموع:

انا عملت ايه يا بابا لكل ده؟

محمد بزعيق:

انا قولت اللي عندي

__________________________.

في شقه عمر،

ندى فتحت عنيها بتعب،

بصيت حواليها.

كان عمر قاعد جنبها،

وصهيب واقف قدامها.

ندى بتعب وتوهان:

حصل إيه؟

عمر طبطب علي إيديها:

إهدي يا حبيبتي،

مفيش حاجه،

انت بس تعبتي شويه وأغم عليكي.

ندى بتعب:

عايزه أقوم.

صهيب:

خليكي مرتاحه النهارده،

وحاولي متعمليش مجهود،

انا هركبلك محلول وهكتبلك علي فيتامينات تاخديها.

ندى بتعب:

أنا مش عايزه حاجه،

انا كويسه.

عمر بعصبيه:

لا مش كويسه يا ندى!

هو ازاي محدش منهم ملاحظ تعبك؟

اللي حصلك ده عشان ضغطك واطي بزياده،

غير إن صهيب بيقول عندك أنيميا حاده وانهيار عصبي.

ازاي أصلا يوصلوكي للحاله ده؟

وبعدين محدش مهتم بيكي للدرجه ده؟

ندى بتعب طبطبت عليه:

انا كويسه يا عمر والله،

إهدي بس.

عمر لف وشه الناحيه التانيه بعصبيه،

كان بيحاول يسكت عشان ميتعصبش عليها.

صهيب جهز المحلول وقعد قدامها:

هاتي إيدك.

ندى بخوف:

لا لا، مش عايزه،

انت هتوجعني!

عمر حضنها:

متخافيش،

انا معاكي أهو.

ندى بخوف:

لا يا عمر والله انا كويسه.

خبيت وشها في حضنه بخوف.

صهيب بهدوء:

متخافيش،

غمضي عينك وعدي من واحد لتلاته،

هتلاقيني خلصت.

عمر حضنها جامد وطبطب عليها:

ثقي فيه وغمضي عنيكي زي ما قال،

يلا يا حبيبتي.

غمضت ندى عنيها بخوف،

وهي ماسكه في هدوم عمر بإيديها وبترتعش.

عمر حس بخوفها فاتكلم بتطمن:

اهدي يا حبيبتي.

صهيب مسك إيديها وبدأ يركب المحلول ليها ببطء لحد ما خلص.

صهيب بهدوء:

بالشفا.

فتحت ندى عنيها بإستغراب وهي بتبص علي إيديها:

بس كده؟

صهيب ضحك:

اه بس كده.

عمر ضحك:

قولتلك يا بنتي،

ثقي فيه.

________________________

بليل،

في أوضه ندى،

كانت قاعده بتذاكر،

وعمر في أوضته نايم.

قامت تدور علي الشاحن بتاعها،

دورت في كل مكان.

ندى بزهق:

ياربي…

شكلي نسيته.

خرجت من أوضتها،

ودخلت أوضه عمر.

كان نايم.

دورت في شنطته علي شاحنه،

مكنش موجود.

فتحت أدراج الكومودينو،

وقفت بإستغراب لما فتحت آخر درج.

كان فيه علب أدويه كتير.

طلعت علبه منهم وبصيت عليها بقلق،

بصيت علي عمر واتأكدت إنه نايم.

لفتها عشان تحاول تشوف أي حاجه مكتوبه عليها،

مفهمتش أي حاجه.

فأخدتها معاها وخرجت.

قعدت ندى في أوضتها بقلق،

فتحت موبايلها وصورت العلبه،

عشان تبحث عنها.

كانت قاعده بتهز رجليها بتوتر،

وعنيها مركزه علي الشاشه.

قلبت في التليفون وهي بتحاول تفهم حاجه…

لحد ما شافت كلمه…

صدّمتها.