مهره واقفه معاه بنتها في المدرسه وبتقول ليها
مهره
انا عارفه ان بنتي اشطر بنت في الدنيا هتكون متفوقه علي كل البنات
كارمن قالت. وهي زعلانه
كارمن
بس انا كان نفسي بابا يكون موجود معايا انهارده يا ماما متعرفيش كان هيفرق قد اي
مهره
بوصي يا حبيبتي عارفه لو انتي كنتي متوفقه اي اللي هيحصل بابا هيشوفك علي التلفزيون وفي كل مكان وهيكون مبسوط منك اوي
وبعدها بتيجي جنبها شمس بنت ضرتها وبتقول
شمس
مش عايزكي تكوني فرحانه اوي كده يا طنط لأن عمو اسامه موجود هنا بس جاي علشاني انا عايز يشوف نجاحي
كارمن بصتلها بكسرة كبيرة ودموعها بدأت تنزل من عينيها وبعدها جريت من قدامهم بسرعة وهي حاسة إن قلبها بيتقطع ومهره بصت لـ شمس بغضب شديد وقربت منها وقالت
مهره
انتي ايه اللي اصلا خلاكي تقدمي في المسابقة دي مش انتي المفروض ما كنتيش في المدرسة هنا ولا هو أي مكان فيه كارمن لازم تدخليه علشان تكسري فرحتها وتحرقي قلبها
شمس ضحكت بسخرية وهي رافعة حاجبها وقالت
شمس
وطبعا حاجة تفوتني ولا تفوت ماما أي حاجة تحرق دمك ولا تحرق دم كارمن لازم أعملها على طول ما تتوقعيش بقى إن بنتك هي اللي هتنجح أكيد أنا اللي هكسب وكل الناس هتتكلم عني وأنا اللي هاخد الكاس قدام عمو أسامه
مهره قربت منها أكتر وقالت بعصبية
مهره
بصي يا بنت شمس أنا ساكتالك علشان انتي صغيرة لكن متفكريش إنك لما تغيظي بنتي كده تبقي قوية انتي بس واحدة متربية على الكره والحقد وبس
شمس ابتسمت ببرود وقالت
وأهو الكره والحقد دول خلوني دايما أكسب أما بنتك قاعدة تعيط وتستخبى في الأوضة
شمس
بجد انا مش عارفه اسامه ده حب في مامتك اي
وبعدها سابتها ومشيت
وفي أوضة التحضير كانت كارمن قاعدة على الكرسي ووشها كله دموع والمدرسة واقفة جنبها بتحاول تهديها وهي بتقول
ايمان
مش عايزين نضيع كل اللي عملناه يا كارمن انتي تعبتي جدا في البروفات وكل المدرسة مستنية تشوفك النهارده لازم تكوني من الناس الناجحة اللي الكل يفتخر بيها
كارمن هزت راسها وهي بتمسح دموعها وقالت بصوت مخنوق
كارمن
مش عايزة حد يشوفني خلاص طالما بابا جاي علشان يشوف شمس خليها هي تكون مكاني أكيد هيفرح بيها أكتر مني
ايمان اتنهدت بحزن وقالت
انتي بطلة الفرقة يا كارمن ومينفعش أي حد غيرك يقف مكانك انتي موهوبة وعندك حضور محدش يقدر يعوضه
وفجأة الباب اتفتح ودخلت مهره بسرعة وهي بتحاول تخبي دموعها وقربت من بنتها ومسكت وشها بين إيديها وقالت
مهره
هو ده اللي احنا اتفقنا عليه يا كارمن عايزاكي تنسي أي حاجة من دماغك ومش مهم إن بابا يكون معاكي أو لا المهم انتي تثبتي لنفسك إنك قوية وإنك تقدري تنجحي حتى لو الدنيا كلها ضدك والمفروض ده يفرحك مش يكسرك
وبدأت تمسح دموع بنتها بإيديها وهي بتحاول تبتسم وقالت
مهره
بنتي عمرها ما تهرب من المعركة وبعدين انتي فاكرة إن النجاح محتاج حد يسقفلك النجاح الحقيقي إنك تقفي على رجلك حتى وإنتي موجوعة
كارمن حضنت أمها جامد وهي بتعيط وقالت بصوت كله وجع
كارمن
ربنا يخليكي ليا يا ماما انتي الوحيدة اللي دايما جنبي انتي الوحيدة اللي عمرك ما كسرتيني ولا سيبتيني لوحدي
مهره باست على راسها وقالت وهي بتحاول تضحك رغم الدموع اللي مالية عينيها
مهره
يلا يا بطلة وريهم بنت مهره تقدر تعمل ايه
وبعد شوية اتفتح الستار وطلعت كارمن على المسرح وكل الناس كانت مركزة معاها وهي واقفة بثبات رغم خوفها ووجعها وبدأت تقدم فقرتها بطريقة خلت كل اللي في القاعة يندهشوا والمدرسين كانوا بيبصوا لبعض بإعجاب شديد وحتى لجنة التحكيم فضلت تكتب ملاحظات وهي مبتسمة
أما شمس فكانت واقفة وملامحها بدأت تتغير واحدة واحدة لأنها لأول مرة تحس إن كارمن أقوى منها بجد
وبعد انتهاء الحفل بدقائق طلع المدير على المسرح وهو ماسك النتيجة وقال بصوت عالي
المدير
الطالبة الفائزة بالمركز الأول النهارده واللي شرفت المدرسة كلها هي كارمن أسامه الدمنهوري
وفجأة القاعة كلها اتمليت تصفيق وصريخ وفرحة والناس فضلت تنادي باسم كارمن وهي واقفة مصدومة وعينيها دمعت ومهره كانت واقفة بعيد بتحاول تمسك دموعها من الفرحة
كارمن نزلت من على المسرح والكل بيقف يسلم عليها ويباركلها وفي اللحظة دي أسامه قرب منها بسرعة ومد إيده ليها وقال بابتسامة متوترة
اسامه
تعالي يا كارمن سلمي على بابا مبروك يا حبيبتي
ما تعرفيش انا مبسوط ان انا شفتك النهارده ازاي
كارمن بصتله ثواني طويلة بعين كلها عتاب ووجع وبعدها سابت إيده ومشت من قدامه من غير ما تنطق حرف واحد
واسامه فضل واقف مكانه مصدوم وحاسس إن الأرض اتهزت من تحته
وفي اللحظة دي مهره قربت منه وهي باصة له بغضب سنين وقالت
مهره
شايف النتيجة اللي وصلت لها بنتك النهارده دي كان ممكن تشوفها من زمان لو كنت أب بجد لو كنت مرة واحدة حسيت بيها وهي مكسورة ومستنياك تيجي علشان تفرح بيها
اسامه بصلها بعصبية وقال
اسامه
انتي سخنتي بنتي عليا انتي عايزة توصلي لإيه بالظبط
مهره ضحكت بقهرة وقالت
مهره
أنا اللي سخنتها عليك بجد يا أسامه بنتك اتصلت بيك كام مرة علشان تقولك على الحفلة ولما ما بقتش تردي عليها بعتت لك على الوتساب وانت عملت ايه قولتها أن كنت مشغول وبعدها نقلت شمس لنفس المدرسة علشان تفضل طول الوقت قدامها وتكسرها أكتر ما هي مكسورة انت كنت فاكر إنك كده بتثبت إنك أب عادل لكن الحقيقة إنك كنت بتدمر بنتك بإيدك
واسامه سكت وهو سامع كلامها ومهره كملت وهي صوتها بيعلى بالقهر
مهره
انت افشل أب شوفته في حياتي بنتك كانت محتاجة حضنك وانت كنت بتجري على بنت مراتك كانت محتاجة كلمة حلوة وانت كنت بتكسرها كل يوم من غير ما تحس
وبعدها بصتله باحتقار شديد وقالت
مهره
بس أحب أقولك حاجة كارمن النهارده نجحت رغم عنك مش بسببك
وسابته وراحت ناحية بنتها وهي ماسكة الكاس وسط فرحة المدرسين والطلبة
أما أسامه ففضل واقف مكانه ولما روح الفيلا دخل هو ومنار مراته وبنتها شمس
ولما أسامه دخل الفيلا كان وشه كله غضب وساكت تماما ومنار كانت ماشية وراه وهي مستغربة تشوفه بالحالة دي
منار قربت منه بسرعة أول ما دخل الصالون وقالت بعصبية
منار
هو أنا ممكن أفهم في إيه بقى أنا طول الطريق بكلمك وانت مش راضي ترد عليا خالص هو أنا عملت ايه لكل ده
أسامه لف لها فجأة بعصبية شديدة وقال
اسامه
ليه ما قولتيليش إن كارمن كانت بترن عليا ليه خبيتي عني رسايل
بنتي وليه بعتي الرسالة اللي من موبايلي دي
منار اتصدمت من طريقته وقالت وهي بتحاول تمثل البراءة
منار
أنا مش فاهمة انت بتقول ايه أصلا أنا ما عملتش حاجة من الكلام ده
أسامه قرب منها أكتر ومسـك دراعها جامد وقال بصوت عالي
اسامه
ما حدش يقدر يمسك موبايلي غيرك انتي فاهمة يعني ايه غيرك أنا واثق إنك انتي اللي مسحتي رسايل كارمن وبعتي لها الرسالة دي علشان تبعديني عنها
منار حاولت تفلت إيدها وهي متوترة وقالت
منار
سيب إيدي يا أسامه وبعدين ليه مصدق مهره بالشكل ده ما يمكن هي اللي كدابة وعايزة تعمل مشكلة بينا علشان ترجعلِك تاني
أسامه بصلها بغضب لأول مرة يبان بالشكل ده وقال
اسامه
مهره عمرها ما كانت بالكذب ده أنا صحيح طلقتها لكن كارمن بنتي ودي حاجة عمري ما هسمح لحد يلعب بيها أو يكرهها فيا
شمس كانت واقفة بعيد وخايفة تبص في وشه أما منار فبدأ القلق يظهر على ملامحها وقالت بسرعة
منار
أنا كل اللي عملته إني كنت بحاول أخلي شمس تبقى مرتاحة في المدرسة مش أكتر
أسامه قاطعها بعصبية أشد وقال
اسامه
مرتاحه على حساب بنتي على حساب إنها تفضل مكسورة وخايفة طول الوقت انتي كنتي شايفة كارمن بتتوجع وساكتة بل وبتزودي وجعها كمان
منار سكتت للحظة وبعدها قالت بحدة
منار
وانت يعني فجأة افتكرت إن عندك بنت ما انت طول عمرك معانا وعمرك ما اهتميت بيها بالشكل ده
أسامه حس كأن الكلام خبطه في قلبه لأنه عارف إنها بتقول الحقيقة لكنه قال بغضب وندم
اسامه
وأهو فوقت لنفسي أخيرا فوقت بعد ما خسرت بنتي بإيدي
وبعدها سابها وطلع على فوق بسرعة وهو حاسس بتعب ووجع عمره ما حسه قبل كده
أما منار فوقفت مكانها وهي ملامحها كلها خوف لأن لأول مرة تحس إن أسامه ممكن يبعد عنها فعلا
وشمس قربت منها بخوف وقالت بصوت واطي
شمس
هو بابا زعلان مننا للدرجة دي يا ماما
منار بصتلها بتوتر شديد لكنها حاولت تتمالك نفسها وقالت
منار
متخافيش يا حبيبتي أبوكي يومين وهيهدى أكيد مهره لعبت في دماغه وخلاص
شمس
أنا بكره اللي اسمها كارمن دي علشان على طول كده مخليه بابا بعيد عني أنا خايفة في يوم من الأيام يقولي متقوليش يا بابا تاني عشان أنا اتعودت أقول له الكلمة دي
منار قامت بسرعة حضنتها وقالت وهي بتمسح على شعرها
منار
طول ما انتي بتسمعي كلامي يا حبيبتي أبوكي هيفضل معاكي طول عمره متخافيش من حاجة يلا اطلعي أوضتك دلوقتي ونامي
شمس طلعت فوق وهي خايفة أما منار فقعدت على الكرسي وفضلت سرحانة ووشها كله قلق لأنها لأول مرة تحس إن كل حاجة ممكن تضيع منها فجأة
وفي بيت مهره كانت كارمن قاعدة في الصالة وهي فرحانة بالكاس وبتلف حوالين جدتها وتوريها الرقصات اللي عملتها في الحفلة والجدة كانت بتضحك من قلبها وهي بتسقف لها بحماس
الجدة
يا روح قلب تيته طول عمرك متفوقة يا حبيبتي وعشان كده أنا هجيبلك كل الهدايا اللي نفسك فيها قوليلي عايزة ايه وأنا أجيبهولك حالا
كارمن جريت حضنت جدتها وقالت بابتسامة بريئة
كارمن
عارفة يا تيته أنا مش عايزة أي حاجة من الدنيا دي غير وجودك جنبي انتي وماما ربنا يخليكوا ليا ومتمشوش من حياتي أبدا
الجدة دمعت عينيها من كلامها وباستها من خدها وقالت
الجدة
يا قلب تيته انتي أغلى من الدنيا كلها
وبعدها كارمن أخدت الكاس وطلعت على أوضتها وهي فرحانة بيه وفضلت تبصله كل شوية كأنها أخيرا صدقت إنها نجحت
أما مهره فقعدت جنب أمها وهي باين عليها التعب والوجع فقالت لها الأم بضيق
الأم
جوزك جه الحفلة ولا لا اصل انا شايفه ان نفسيه البنت فرحانه جدا بس انا مش رضيت اني اسالك قدامها
مهره
جي يا ماما ويا ريته ما جهويا ريته ما جه ده جايب شمس معاه وكمان نقلها مدرسة كارمن أنا من بكرة هشوف مدرسة تانية للبنت علشان مش عايزاها تتعب نفسيا أكتر من كده
الام
لا طبعا ما ينفعش اللي انت هتعمليه ده ما بنتي كده هتتعب عشان خاطر هتسيب صحابها علمي بنتك تبقى قويه مش تهرب زيك
مهره اتنهدت بوجع وقالت
مهره
أنا مش عارفة والله يا أمي إيه اللي وصل أسامه لكده زمان عمره ما كان بالقسوة دي
الأم بصتلها بحنان وقالت
الأم
الراجل لما يبعد عن بيته ويتسحب ورا واحدة تانية بيتغير يا بنتي المهم دلوقتي انتي تركزي في بنتك وبس
مهره هزت راسها بتعب وبعدها الأم افتكرت حاجة
وقالت
الأم
صح عملتي ايه في موضوع الشغل اللي كنتي مقدمة عليه
مهره ظهر شوية أمل في عينيها وقالت
مهره
بإذن الله هروح بكرة علشان أعمل المقابلة وإن شاء الله خير أنا لازم أشتغل وأقف على رجلي علشان كارمن متحتاجش لحد
الأم ابتسمت بفخر وقالت
الأم
وأنا واثقة إنهم أول ما يشوفوكي هيوافقوا عليكي على طول انتي ست شاطرة وجدعة وربنا عمره ما بيضيع تعب حد