تحميل رواية «انت حلالي وانا حلالك» PDF

الله اكبر الله اكبر الله أكبر الله أكبر اشهد ان لا اله الا الله أشهد أن لا إله إلا الله

وكان هذا اذان الفجر ونداء الناس الي الصلاة والاستيقاظ من النوم

في منطقة راقية في منزل هادى مليئ بإذاعات القرآن وقراءت القرآن الدائمة وفي اوضة متوسطة الحجم ليس بكبيرة ولا صغيرة الوان هادئة وأرض نظيفة وكل شيء منظم وهذا ليس غريب علي صاحبتها انها غرفة حور احمد عبد الله ياعزيزي

تعالو اقولكم مين حور 🤌

حور بنوتة في عمرها الثالث و العشرين تدرس بكلية الهندسة شخصية ملتزمة بأمور دينها ومرحة مع أهلها وصحابها ولكن الغريب ويقصد بالغريب الرجال ليس من محارمها يرون انها شخصية كئيبة ولا تضحك (لازم تهزر وتضحك معاهم بقا وكدا علشان تبقي شخصية فرفوشة🙂😅)

ملامحها بريئة جداا لديها عيون باللون البني الفاتح وبشرة بيضاء وشعر طويل يصل الي ما بعد ظهرها وهذا كله لا يظهر الا لمحارمها !!

لأنها ياعزيزي ترتدي نقاب يخفي هذا الجمال وتحفظه لمن يستحقه وهي تري ان لا يستحق لأحد ان يتمتع بهذا الجمال إلا من سيكون حلالها أمام الله وأمام الجميع …

نبدأ بسم لله….

استيقظت حور علي صوت خبط علي الباب وما كان الا أخيها مصطفي يوقفها لصلاة الفجر

مصطفي : حوور يحوور يابنتي قومي الفجر أذن عايز انزل احصل الصلاة

حور وهي بتفوق وبثوت نائم: صحيت يمصطفي خلاص هقوم اتوضي اهو

مصطفي :تمام ياحبيبتي انا هنزل بقا بابا هيعلقني واقف بقالو كتير تحت

حور بتوبان: ههه الحق بقا

استنو نسيت اعرفكم علي مصطفي.. 🤦🏼‍♀️

مصطفي احمد عبدالله في عمره السادس والعشرون خريج كلية صيدلة ولديه صيدلية خاصة به كانت هدية من والده شاب ملتزم طويل القامة بشرته قمحاوي (مش عارفة اوصفه ازاي بس هو شاب كويس وخلاص عدوها 😅 )

يحب عائلته كثييرااااا…….

نكمل بقا …

في مكان تاني في نفس الشارع كان يخرج من بيته هو و والده الي الجامع لصلاة الفجر

يوسف : بقولك يبابا متصلي بينا انت النهاردة انا حاسس ان صوتي تعبان شوية

والده عبد الرحمن: لا خلي عمك أحمد هو الي يصلي بينا النهاردة من زمان مصلناش وراه

يوسف بص علي اول الشارع لقي مصطفي ووالده جايين عليهم علشان يروحو المسجد

يوسف : اهو عمي أحمد جاي علينا لما اقوله واشوف رأيه

وصلو عندهم مصطفي ووالده

احمد :السلام عليكم ورحمة الله وبركاته

ردو السلام عليه :وعليكم السلام ورحمة الله وبركاته

عبد الرحمن : بقولك اي يا احمد متصلي بينا انت النهاردة يوسف صوته تعبان شوية وانا بصراحة وحشني صوتك وعايز اصلي وراك

احمد : الف سلامة عليك يا يوسف اشرب حجات سخنة هتنفعك وربنا يشفيك ياحبيبي و يا عبدو اكيد معنديش مشكلة هو حد يرفض ان يصلي بالناس وكمان صلاة الفجر دا يبختي

عبد الرحمن: فعلا والله يا احمد ربنا يتقبل منا يارب ويجمعنا في جنته مع الصالحين والنبيين

امنوا علي دعائه وراحو المسجد ليصلوا الفجر

في منزل حور ….

صلت وقعدت تستغفر وتقرأ الورد بتاعها وقامت طبقت المصلاية وخرجت تشوف مامتها صلت ولا لسا لقت مامتها قاعدة علي المصلاية وبتدعي وتعيط

ام حور : يارب اكرمهم وفرح قلوبهم ومشوفش حاجة وحشة فيهم ابدا يارب اجعلهم من عبادك الصالحين اللهم احفظهم من كل سوء وشر اللهم ثبت خطواهم اللهم ابعد عنهم اولاد الحرام وصلي وسلم وبارك على سيدنا محمد وعلى آله وصحبه أجمعين..

مسحت دموعها ولسا هتقوم لقت حد بيحضنها من رقبتها وهي بتقولها..

حور :ربنا ميحرمناش منك ينوارة البيت ويطول في عمرك ويبارك لينا في عمرك انتي وبابا..

ام حور حطت ايدها علي ايد حور الي ملفوف حوالين كتفها..،

ام حور : نور عيني انتي ويبارك لينا فيكم انتي واخوكي واشوفكم اسعد الناس يعيوني

سمعو خبط علي الباب..

حور : اكيد بابا ومصطفي..

راحت تفتح الباب اول م باباها دخل

حور : تقبل الله منكم

باباها اخدها تحت دراعه وهو ماشي لعند الصالون

والد حور : منا منكم ياقلبي صليتي ؟

حور : اه الحمد لله

مصطفي وهو بيحط ايدي علي بطنه :جعااانن يماماا

مامته : ياحبيبي انزل هات العيش وطعمية وفول وانا هقوم احمر بطاطس

مصطفي :حاضر ياقلبي

حور : ماما انا هحمر البطاطس وبعد كدا هقوم البس الساعة 6 يكون مصطفي جا

مامتها : ماشي يحبيتي ربنا يرضي عنك يارب

مصطفي جا وفطرت وكل واحد راح لمصالحه مصطفي نزل الصيدلية هو و والده لانه والده صيدلي بردو وحور مشت للكلية

عند يوسف…..

(هو انتو تعرفتو علي يوسف ؟؟ لا صح ؟)

تعااالووو اعرفكم عليه …..

يوسف عبد الرحمن شاب في عمره السابع والعشرون لديه لحية متوسطة الطول ملتزم دينيا يصلي بالناس في المسجد ومهندس عنده شركة خاصه بيه عنده اخت وحده اسمها خديجة عندها 23سنة في عمر حور ومعها في نفس الكلية

يلا نكمل….

يوسف دخل الشركة الخاصه به وهنا نظام غير كل الشركات لا يوجد موظفين نساء الموظفين جميعهم رجال ..

يوسف بيتكلم في التلفون..

يوسف :ايوة يا عمر زي مبقولك هي تبقا اخت مصطفي انا مشفتهاش من كانت صغيرة بس يعني امي وبابا شيفين انها زوجة صالحة

عمر : طب وانتت اي رأيك

يوسف : مش عارف بس حاسس اني مرتاح ومتقبل الموضوع جدا خصوصا ان انا بحب مصطفي وعم احمد جدااا

عمر : ربنا يقدملك الي فيه الخير يصاحبي ويرزقك الزوجة الصالحة

يوسف : آمين يارب وإياك ياحبيبي

يوسف قفل مع عمر وقعد يفكر هو ليه مرتاح اوي من وقت م والده كلمه في الموضوع دا وحاسس انه عايزة يروح النهاردة قبل بكره تفكيره اخده لتخيل شكلها هو مشفهاش من كان عندها 9سنين لأنهم سافرو ولما رجعو كان عندها 17 سنة وكانت راجعة منتقبة

فاق لنفسه واستغفر ربنا

يوسف :استغفر الله العظيم استغفر الله العظيم اي الي انا بفكر في دا فوق يمصطفي

رجع لمكتبة وانشغل في شغله….

حور في الجامعة مع صحابها(منة واية وخديجة ،،اية منتقبة ومتزوجة من قريب جدا ومنة مختمره وخديجة مختمره )….

منة : يبنات محمد ابن عمي اتقدملي وانا مش عارفة أوافق ولا لأ مش عارفة محتارة اوي انا مكنش ليا اختلاط معاه خالص ولما أتقدم وطلعت قعدت معاه بجد كنت حاسه نفسي اول مره اشوفه شخصية هادية محترم اوي حسيت اني مرتاحة بس بردو خايفة

حور : صليت استخاره ؟

منة :لا لسا

حور: يبقي خلاص تروحي النهاردة تصلي استخارة وتدعي ربنا وان شاءالله ربنا يرشدك للصواب ياقلبي ربنا يرزقك الزوج الصالح الي ياخد بإيدك للجنة ياعمري

منة :يارب يعيوني ويفرحني بيكي.. اي عملتي مع العريس الي فات انتي صحيح بردو رفضتي؟

اية صاحبتهم التالتة

اية : ايوة صحيح عملتي اي نسيت مسألك امبارح

حور بتتكلم بتوتر وحمحمه :احمم

بصراحه انا رفضت

اية بتنهيدة: طيب ولحد امتي يحور هتفضلي ترفضي في العرسان انتي بترفضي من غير متشوفيهم اصلا وبعدين انتي اخر سنة دي خلاص مش هيبقي ليكي حجة تاني

حور : مش عارفة بقا ي اية بس انا بجد الفكره مخيفة اوي بالنسبالي وكمان خايفة ان زي مالناس بتقول اني انا لو اتخطبت خطيبي هيزهق مني ومش هيحب انه ميمسكش ايدي فتره الخطوبة ومش هيستحمل نظام الخطوبة الشرعية بجد الموضوع دا مخوفني جدا وكمان في نفس الوقت بابا حاساه زعلان بس بخبي عني بس انا حاسه بيه وماما كمان بجد حاسه اني سبب زعلهم وانا والله مش بإيدي 🥺

اية ومنة حضنوها وهي بتعيط في حضنها

منة بدموع : والله ياقلبي ربنا هيفرح قلبك وهتشوفي ربنا شايلك نصيبك اكيد لسا نصيبك مجاش

اية بهزار علشان تخرجها من الجو دا: وبعدين مهو ممكن تكوني قاعدة كل دا بسبب واحد غلبان بيدعي بيكي في كل صلاة انك تكوني من نصيبه ههههه

حور ابتسمت : ممكن بردو ههه

اية : ايوة كدا اضحكي يحوريتي خلي الدنيا تنور كدا

منة : اي دا بقا هي حوريتك وانا اي 😔

اية وهي تمسك منة من خدودها : انتي منوشتي ومنونة قلبي يخلاثووو 😚🥰

منة وهي بتبعد بهزار :خدودي يبت وجعتني بنت اختك انا ها 😐

حور : هي ديجة فين المحاضرة خلاص باقي خمس دقايق

خديجة من وراها : سلام عليكم ايها الفتيات انا جيييت

حور بتمثل العصبية. : انتي فين يبت كل دا المحاضرة خلاص هتبتدي

خديجة وهيا بتاكل في الساندوتش الي في ايدها وقعدت تربعت علي المقعد : والله يا أخت حور ولا اخفي عليكي سرا دخلت الجامعة لقيت بطني بتقولي بت يخديجة انتي مأكلتنيش كويس علي الفطار عايزة اكل ساندوتش شاورما وانتي عارفة ان انا قلبي حنين مهنتش عليا فرحت أأكلها غلط انا 😔

حور : اه يحنينية انتي طيب يلا يختي ندخل قبل الدكتور (للتوضيح الكلية هندسة ازهر بنات بس )

راحو للمدرج وحضرو المحاضرات

واليوم خلص وكل واحد راح بيته

في بيت حور…

كانو قاعدين علي السفرة بيتعشو.،

والد حور : احم حور بقولك

حور سابت اللقمة الي في ايدها وبصت لوالدها : نعم يحبييي

الوالد : في عريس متقدملك

حور لسا هنتكلم: يب…

والدها قاطعها : وقبل ما تقولي لا ودراستي ومش عارف اي انتي خلاص اهو باقي ترم وتخلصي دراسة يعني مش صغيرة والعريس دي انا شايفة انه هو الزوج الصالح الي انا أأمن بنتي عليه هكون مطمن ومش بغصبك يقلب ابوكي بس ادي فرصة لنفسك اقعدي معاه رؤية شريعة لقيتي في قبول يبقي علي بركة الله ملقتيش يبقي الخير فيما يختاره الله

حور بتوتر وارتباك : يابابا مش عارفة

مصطفي وهو قاعد جمبها مسك ايدها : يحور والله دا فعلا شخص كويس وصاحبي من زمان هو زيك وزي بابا وزي كدا ملتزم بيغض بصره عمري ما شوفته رفع عينه علي بنت وبيصلي الفرض بفرضه خاتم لكتاب الله يعني راجل محترم واحسبه علي خلق حسن اقعدي وشوفي زي م بابا قالك ومتخفيش احنا معاكي في اي قرار هتاخديه

حور بتوتر : طيب م ماشي هقعد معاه

والدتها بفرحه وهي بتقولها : تعالي في حضني ياقلبي والله فرحتي قلبي متعرفيش قد اي

حضنتها حور وباباها بطبطب علي ضهرها

مصطفي بهزار : طب اي مش هناكل انا جعان

حور بهزار : انت دايما جعان يمصطفي ههه

مصطفي بهزار: بصولنا في اللقمة كمان بقا

والدهم : اقعدي اقعدي يحور كملي اكلك وانت يخوي كمل اكلك

حور قعدت بس سرحانه مش بتاكل..

حور في عقلها. هو انا وافقت بجد طيب انا هقدر اقعد معاه حور بصدمة وكأنها كانت مغيبة

ينهااار ابيض انا هقعد معاه من غير نقاب …..

تاني يوم اليوم عدي زي الي قبله حور راحت الكلية ورجعت وطبعا النهاردة العريس جاي…

وكان معاها صاحبتها منة لان اية متزوجة فكان صعب تحضر النهاردة

والدتها : قومي يحور انتي ومنة شوفي هتلبسي اي وظبطي نفسك كدا

حور بتوتر وخوف : حاضر يماما

قامت دخلت اوضتها هي ومنة قعدت علي السرير

حور لمنة : هو انا ليه حاسه اني مرتاحة حاسه اني عايزة اشوف الشخص دا

منة وهي بتحضنها من كتافها : لعله خير يقلبي قومي اتوضي وصلي ركعتين وان شاءالله خير

قامت يحور اتوضت وصلت ركعتين ودعت ربنا : يارب اللهم اخترتلي ولا تخيرني اللهم اخترتلي ولا تخيرني اللهم ان كان خيرا لي فجعله من نصيبي……. سمعت اخوها بينادي عليها من ورا الباب

مصطفي : حور البسي ياحبيبتي علشان خلاص يوسف كلمني وقال انه جاي

حور مركزتش غير في اسم يوسف ياسبحان الله هي تحب هذا الاسم كثيراا من حبها لسيدنا يوسف

مصطفي بصوت اعلي اعلي : حوور سمعاني

فوقتها منة نكزتها في كتفها : يبت ردي علي اخوكي بيقولك البسي

حور فاقت علي لمست منة : اه اه ايوة يمصطفي حاضر هلبس اهو

حور لبست درس بلون السماء وخمار بالون الأبيض ومحطتش اي شيي من مساحيق التجميل وكانت اللهم بارك اية في الجمال بياض ناصع جدااا وعيون واسعة وبنية تشبه عيون الغزال(بنتنا قمر بردو مش محتاجة لتجميل😅🤎)

قبلها بساعة في بيت يوسف ….

خديجة : بالله عليك يا يوسف اجي معاك 🥺

يوسف : يبت تجي معايا احنا لسا رؤية شرعية بس يعيني انا بس الي هروح حتي بابا وماما مره تاني علشان لو مفيش قبول ميبقاش في احراج

خديجة : انا هاجي معاك وهي كدا كدا حورية صاحبتي يعني متعودة عليها وهي متعودة عليا

يوسف اوى مره ياخد بالي انه مسألش عن اسمها مكنش مركز لما خديجة قالت حورية حتي استوعب ان ميعرفش اسمها

يوسف في عقله حورية حوري يوسف بستغرب من نفسه حورك اي بس يعم يوسف انت لسا شوفتها اصلا استغفر الله العظيم

خديجة وهي بتشاور بيديها قدام وش يوسف: يوسف يوسف هل تسمعنا نحن هنااا يوووسف

يوسف فاق علي زعيقها حط ايده علي ودنه : اي يبنتي صوتك ودني اتخرم

خديجة : مهو انت الي فجأة سرحت وسافرت مني قولت اما افوقك ههه

يوسف بتوعد ليها : ماشي يخديجة ليكي يوم

والدته : اي يا يوسف هتروح علي الساعة كام دلوقتي 7

يوسف : علي 8 كدا يست الكل ان شاء الله

والدته وهي بتبطب عليه : ربنا يقدملك الي في الخير ياحبيبي يارب

يوسف وهو بيوطي يبوس ايدها: يارب ياحبيبتي يارب.

خديجة وهي عاملة نفسها زعلانه ومربعة ايدها : يعني مش هتاخدني معاك بردو يجو 😔

يوسف بعصبية بهزار : هاخدك هاخدك بتقلبيش وشك

خديجة وهي بتتنطت وبتجري عليه تتعلق في رقبته : اخويا حبيبي عم الناس

يوسف وهي بيبعدها منه بهزار: عم الناس ! ابعدي يبت عاملة زي الولاد البلطجية

خديجة ضحكت وبعد كدا رجعت تتكلم بحب وجدية: بجد والله يا يوسف بعيدا عن الهزار بس انت متعرفش انا فرحانه قد اي اكتر اتنين بحبهم في حياتي هيتخطبو انا حور اكتر من اختي وبجد هي ونعم الأخت والصاحبة

الصالحة يبختك بيها والله وهي يبختها بيك لو بقيتو من نصيب بعض

انت ابويا التاني والله يايوسف بحبك جدا

يوسف أخدها في حضني : وانتي بنوتي واختي يقلب اخوكي ومكانتك كبيرة اوي عندي ربنا يباركلي فيكي يست البنات

خديجة وهي بتبعد وبتجري علي اوضتها هروح اجهز فوريرا ….

يوسف بضحك علها : هههه مجنونة

والدته وهي بطبطب علي دراعي يلا ياحبيبي انت كمان روح اجهز خلاص باقي نص ساعة

يوسف راح اوضته واتوضي وصلي ودعا ربه : اللهم اجعلها من نصيبي يوسف برجوع استغفر الله العظيم يارب اللهم ان كانت خيرا لي فاجعلها من نصيبي اللهم ارزقني اياها زوجة يوسف بستغراب من الي بيقوله ومن نفسه..

بعد مخلص دعاء يوسف : انا معرفهاش اصلا ازي بدعي انها تكون زوجتي وتكون من نصيبي فتنهد يوسف وقال يارب اللهم اخترلي ولا تخيرني (وهنا دعاء مشترك عزيزي القارى بينهم صدفة من تأليفي اعمل نفسك اهبل 😅)

رن يوسف علي مصطفي وقاله ان كمان عشر دقايق ويتحرك من بيتهم وطبعا البيت اخر الشارع اصلا…

وصل يوسف وخديجة بيت حور ..

استقبلهم والد حور.

والد حور : اتفضل اتفضل يبني تعالو اتفضلو نورتونا

يوسف : يذيد فضلك يعمي يارب البيت منور بناسه

احمد: حبيبي ربنا يبارك فيك يارب..

خديجة راحت مع ام حور طبعا متعودة عليهم خديجة بتخبط علي اوضة حور..

حور بتوتر ونفسها بيزيد : ايوة يماما

منة : اهدي اهدي خدي نفس براحة براحة مفيش حاجة براحة

حور وهي بتنفس براحة : انا خايفة يمنة ازاي هخرج كدا انا مفيش راجل.غريب عني شافني من 7 سنين مش عارفة ازي هخرج 🥺

منة : ياحبيبتي دي سنة الحياة مش انتي دايما تقولي مش هيوشوفني غير حلالي مهو ممكن يكون دا حلالك انتي اي عرفك استعيني بالله ياحبيبتي وأخرجي

حور : الله المستعان الله المستعان

بره خديجة انشغلت في الكلام مع ام حور بعد م خبطت ومخبطتش تاني

مصطفي من بعيد علشان عارف اني في بنات جوا

ماما يلا هاتو العصير وخلي حور تطلع

والدته : حاضر يابني

راحت خبطت من اول خبطة طلعت حور ومنة

حور بصدمة بسيطة :خديجة انتي جيتي امتي يبنتي انا مش قولتلك تعالي مع منة قولتيلي اخويا رايح يخطب وهزن عليه اروح معاه شكله مرضيش ياخدك

خديجة بانبهار وهي بتلفها: اللهم بارك اللهم بارك اي الجمال دا كله ما شاءالله دا الواد يوسف يبخته بكل الحلاوة دي

حور : الواد يوسف هو انتي تعرفيه؟!!!

خديجة بهزار وهي بتعدل الخمار : اه مهو العريس يبقي اخويا وانا اخت العريس ايش رأيك في هذه المفاجأة 🤭😌

حور بصدمة حقيقية : انتي بتتكلمي بجد اخوكي ازاي يعني؟!!!!

خديجة وهي بتضحك : هو اي الي اخويا ازاي اخويا من امي وابويا هههه

مصطفي من بره بصوت عالي : يلا يماماا

ام حور وهي بتمشي بسرعة وبتسحب حور : ايوة ايوة يمصطفي حاضر راحت بيها المطبخ ومسكتها الصنية يلا يحور ادخلي سلمي ياحبيبتي

حور يتوتر شديد واديها بتترعش : يماما بجد خايفة اوي

والدتها وهي بهديها: لا متخافيش استعيني بالله وادخلي سلمي ومتوتريش واهدي كدا مفيش حاجة لكل دا يحور انتي بس هتقعدي وتسألو بعض كام سؤال بس تشوفو في قبول ولا لأ مش هتطولي يعني وباباكي واخوكي معاكي اهو يلا يحبيتي يلا

حور اتقدمت من اخوها الي اخد منها الصنية لما لقيها هتوقع منها

مصطفي بحنان. : يحببتي لي كل التوتر دا اروح امشيه طيب

حور بسرعة وتلقائية :لاا

مصطفي بضحك : والله انا مفاهمك هههه

حور بكسوف وتوتر: والله هو انا مش فاهمة مالي

مصطفي : طيب يلا وانا معاكي متخافيش

اخدها مصطفي عندهم وهي ماسكة في التيشيرت ومش باينة من وراه

ابوها طلع بردة في البلكونة من قبل مايجي الي في الاوضة حاليا (حور،يوسف،مصطفي)

اول مدخلو يوسف قام وقف

راح مصطفي شاورله بعينه انها ورا وهو مبتسم

قعد تاني يوسف وهو بيضحك بابتسامة بسيطة

مصطفي بهزار : طب اي مش هتطلعي مهو مش جاي يشوفني انا

حور ضربته بخفة في ضهره

يوسف : احمم عاملة اي

حور بتوتر : الحم الحمد لله وسكتت..

يوسف بهزار:..

حور بتوتر : الحم الحمد لله وسكتت…..

يوسف بهزار : وانا الحمد لله كويس

حور ابتسمت لأنها كانت المفروض تسأله هو عامل اي بردو

مصطفي بص لحور وراه وبصوت واطي : يحبيبتي مش هينفع كدا لازم يشوفك وتقعدو وتتكلمي علشان تشوفي نفسك في قبول ومرتاحة ولا اي

حور هزت راسها بهدوء لتفهمها لكلامه

حور ببطى بعدت عن ضهر مصطفي ورفعت عيونها علي يوسف لقيته مركز معاها جدا وعيونها اتلاقت في نظرة هي قطعتها بسرعة بارتباك وهي بتبعد عيونها بعيد عن عنيه…

يوسف شافها..عيونه مش عارف ينزلها من عليها .. عايز يغض بصره زي ما متعود مش عارف حاسس انه عايز يفضل يتأمل في وشها الي بياضه صافي وعامل زي وجه الأطفال كدا في كمية براءة وقبول مش طبيعي عيونها الي ملحقش حتي يشوف لونهم لأنها مدتلوش الفرصة..

يوسف بصوت هادي وابتسامه : اللهم وبارك تبارك الرحمن فيما خلق .

حور اتكسفت لأنها سمعته ومكنتش عارفه تقول اي وتتصرف ازاي..

مصطفي وهو بيمسك ايد حور وبيقعدها علي الكرسي القريب من يوسف علشان لو معملش كدا هي مش هتتحرك من مكانها…

مصطفي قعدها وهمس ليها متخافيش واتكلمي بطبيعتك.. باس راسها وبعد عنها وكلم يوسف…

مصطفي بهزار خفيف : اتكلم انت بقا لأنك لو استنيت هي تتكلم هتقعد سنة ومش هتتكلم

يوسف بابتسامة وهزار مع مصطفي : اطلع منها انت بس والله المستعان ههه

مصطفي وهي رايح ناحية الكرسي الي اخر الاوضة : طالع ياخويا طالع بس مش طالع اوي يعني انا هنا بردو ههه

يوسف وهو بيبص لحور الي باصه علي السجادة وبتفرك في ايدها..

يوسف أتقدم وهو قاعد علي الكرسي وسند بكوعة علي رجله هو وقاعد واتكلم..

يوسف بهزار خفيف وابتسامه: اي طلعو كام نقطة فيها

حور مش مستوعبة هو بيتكلم عن أي…

حور بصت له وباسغراب: هي اي ؟!

يوسف بابتسامه وهزار خفيف لكسر الجليد بينهما: السجادة اصلك. مركزة معاها من وقت مدخلتي بصيلي انا مسمحلك والله مفيش ذنب متخافيش …

حور اتكسفت و ابتسمت علي كلامه وسكتت تاني بردو ..

يوسف اتنهد واتكلم ببساطة وابتسامة هادية : طيب يستي اتكلم انا واعرفك علي نفسي.. انا يوسف عندي 27 سنة خريج كلية هندسة حافظ لكتاب الله وبصلي فروضي الحمد لله مش بدخن ولا اي حاجة من الحجات دي الحمد لله عندي شركتي الخاصة يعني مقتدر ماديا فضل من ربنا وكرم..امممم بس عايزة تعرفي حاجة تاني أو حاجة معينة ؟

حور بصوت هادئ ويدوب مسموع وهي بردو بتبص في كل حتة معاده وش يوسف..

حور : احم لا الي انا كنت كنت عايزة اعرفه وأسألك عليه انت قولته انك يعني بتصلي وحافظ القرآن مش بتدخن وهو دا الي يهمني ويفرق معايا…

يوسف بابتسامة وهزار بسيط : طيب الحمد لله عدينا اول مرحلة بسلام..

حور ابتسمت وسكتت…

يوسف بهزار وابتسامةهادية: طب اي انتي مش هتعرفيني عليكي انتي سمعتيني وانا كمان عايز اسمعك ممكن ؟

حور بتوتر خفيف عن الاول واتكلمت بصوت مسموع ليوسف : انا اسمي حورية بس الكل بيقولي حور عندي 23 سنة اخر سنة هندسة بردو منتقبة بصلي فروضي الحمد لله بتوفيق من ربنا حافظة لكتاب الله الحمد لله…وسكتت مش عارفة تقول اي هي قالت زي مسمعته اتكلم عن نفسه

يوسف بابتسامه وفرحة داخلية بيحاول يخبيها: اللهم بارك ربنا يزيدك وتخلصي كليتك علي خير ان شاء الله…هو انتي قسم اي ؟

حور وهي بتتكلم بتعود اكتر من الاول والتوتر خف : انا قسم نظم وحسابات

يوسف بصدمه خفيفة لانه مكنش يعرف هو عارف انها هندسة زي اخته بس مش عارف قسم اي : انا بردو كنت قسم نظم وحسابات

حور بابتسامة : انا بحب البرمجة وشغلها وكدا

يوسف : وانا بردو بحب المجال دا جدا وحاليا اصلا شركتي شركة برمجة انا حاليا بشتغل علي ان اعمل برامج خاصه بيا لان دا حلمي..

حور بهدوء وابتسامة: ان شاء الله ربنا يكرمك وتعمل الي نفسك فيه

يوسف آمن علي دعائها وسكت..

سكتو الاتنين…

يوسف قطع الصمت بصوت هادئ : انا معنديش اي امنيات غير ان الي هتبقي حلالي ومراتي قدام ربنا تكون زوجة صالحة ملتزمة بأمور دينها نساعد بعض علي طاعة الله نجعل بيتنا كما بيت الرسول ﷺ.. بحب الهدوء والسكينةجداا..وفيما بعد نربي أولادنا علي حب وطاعة الله وحب رسول الله ﷺو نربيهم علي قواعد ديننا الصحيحة… وانا عليا ان اعاملها كما كان يعامل حبيبي ورسولي محمد صل الله عليه وسلم امنا عائشة هعاملها كما وصاني ﷺ(اسْتَوْصُوا بالنٍّسَاءِ خَيْراً)

ونكون سند وعون لبعض علي طاعة الله ورسوله و نشد بعض للجنة….

حور قلبها كان فرحان ومش ناقص غير يخرج يتنطط من الفرحة حور بابتسامة وهدوء: وانا مش عايزة اكتر من كدا وانا عليا ان اكون له زي امنا عائشة(رضي الله عنها) في معاملتها لرسولنا محمد ﷺ واعمل بحديث رسولنا ﷺ عندما قال ﷺ”ألاَ أُخْبٍرُكَ بِخَيْرِ مَا يَكْنِزُ المَرْءُ ؟ الْمَرْأَةُ الصَالِحَةُ:التِي اذَا نَظَرَ إِلِيْهَا سَرَّتْهُ ،وَاِذَا أَمَرَهَا أطَاعَتْهُ،وَإٍذَا غَابَ عَنْهَا حَفِظَتْهُ ” وكمان زي مقولت نساعد بعض علي طاعة الله ورسوله ونشد بعض للجنة

يوسف برضا علي كلامها وابتسامة : في حاجة عايزة تسألي عليها؟

حور بهدوء هزت راسها بالرفض..

يوسف بابتسامه هادية : نسأل الله أن يكتب لنا الخير فإن كان فينا خير لبعضنا فلييسره الله …

مصطفي لاحظ انهم خلاص سكتو قرب منهم وحور خرجت وابو حور دخل وقعدو يتكلموا وبعد كدا يوسف اخد خديجة ومشيو …

في اوضة حور…

منة : طب يعني حاسه نفسك مرتاحة ولا مش مرتاحة

حور وهي بتقعد علي سريرها وبتفتكر كلامه ابتسمت تلقائي

حور : عارفة يمنة فيه كل حاجة انا كنت بدعي بيها يعني ملتزم وبيصلي ومش بيدخن و عنده نفس أمنياتي الي انا عايزاها تبقي في بيتي ومع زوجي يعني كل الي انا بفكر فيه هو بردو قالو وبيفكر فيه وحاسه اني مرتاحة ومتقبلاه جداا يعني انا كنت قاعدة من غير النقاب الاول كنت متوترة بس بعد كدا لما قعدت وتكلمنا بقيت بتكلم من غير محس ان خايفة اول مضايقة بالعكس كنت مرتاحة في الكلام..

منة بفرحة وابتسامة : يحبيبتي الحمد لله ربنا يكتبلكم الي فيه الخير يارب ويفرحني بيكي يعيوني يارب..

حور حضنتها بحنان وحب. :يارب يقلبي وافرح بيكي

حور بعدت وبتذكر: هو انتي اي قولتي علي ابن عمك صحيح ؟

منة بكسوف وابتسامة : انا وافقت.. بعد مصليت استخارة زي ماقولتيلي حسيت ان انا مرتاحة جدا وقولت لباب ان موافقة وهنقري فاتحة بس بعد يومين او تلاتة علشان هوا معاه شغل الفترة دي كتير…

حور بفرحه وهي بتحضنها : وساكته من الصبح علي الاخبار الحلوة دي مبروك ينور عيني ويتمملك علي خير يارب واشوفك

ست العرايس..

منة تليفونها رن وكان اخوها

منة بابتسامة :وعليكم السلام..ايوة ادخل الشارع الي علي يمين السوبر ماركت دا وانا هتلاقيني وقفالك قدام العمارة

حمزة : ماشي يلا سلام

منة وهي بتحضن حور وتودعها : انا همشي بقا يقلبي حمزة خلاص وصل اشوفك بكره في الكلية..

حور : ان شاء الله يحبيبتي وسلميلي علي طنط اوي

منة : من عيوني يلا سلام

مشت منة وحور قعدت مع أهلها شوية ودخلت تذاكر شوية لان عندها امتحان بعد يومين(وانا كمان عندي يحور🥲)…

في الصيدلية مصطفي كان قاعد لوحده لان والده مقدرش ينزل بعد ما يوسف مشي ..

مصطفي قاعد علي الكرسي وفي ايده قلم بيخبط بيه بصوت هادي علي المكتب الي قدامه وبيفتكر لما راح ينادي خديجة ليوسف علشان يمشو ووقتها شافها بس غض بصره بسرعة ومشفهاش بس طبعا فكره مش ساكت …

مصطفي بيكلم نفسه : يارب يارب والله تعبت انا بدعي بيها في كل صلاة انها تكون من نصيبي ولا عمري بصتلها بصة مترضيش ربنا ولا فكرت اعصيك بحبي ليها دافن حبي ليها ومستني أتقدم وتكون حلالي ومراتي وتكون علاقتنا في النور مش في الخفي يارب اللهم اغننا بحلالك عن حرامك يارب …

جا ذبون عنده وقام يشوفه عايز اي….

عند يوسف……………….

يوسف اتكلم مع والده ووالدته انه مرتاح وانه هو عن نفسه موافق جدا وهيستني الرد منهم ودعوله ان شاء الله ربنا ييسرله الي فيه الخير …

يوسف دخل اوضته وهو بيفتكر كلامهم مع بعض وكان مبسوط جدا ان حور طلعت نفس التفكير ونفس عقليته ودعا ربنا انها لو كانت خيرا له تكون من نصيبه…

تاانييي يوم في الكلية …..

تقابلو حور واية ومنة وخديجة

اية بصوت مرح : بناات سكووت سكووت ليكم عندي خبر عاجل وحصري

منة : سمعينا يا أختاه كلنا اذانٌ صاغية

أية وهي رافعة ايدها وعملاه زي ميكرفون:بعد الترقب والتحليل والانتظار والكشف والروح والجاي ……..انا حااامل ترارار🤰

حور بفرحة كبيرة وهي بتحضنها : يروووحي الف مبروك ينور عيني ربنا يتمملك علي خير يروح قلبي يارب ونن عيون خالته يشرف الدنيا بالسلامة بجد مش عارفة اوصف فرحتي بالخبر دا 🥺

اية بحنان وحب : يروحي انتي اللهم امين يارب وميحرمنيش منكم ابدا

منة وهي بتحضنها : مبروك يا يووو هتبقي مامي صغنونة وعسولة كدا 😚

ربنا يكملك حملك علي خير يحبيبي يارب

بعدها خديجة بفرحة كبيرة اوي : الله يعني انا بعد تسع شهور هبقي خالتو واو توحفةة 🥰

مبروك ياحلي مامي في الدنيا ربنا كملك حملك علي خير يقمري انتي يارب

اية بفرحة بلمت صحابها حواليها وفرحتهم الي واضحة عليهم : ربنا يديم وجودكم في حياتي وميحرمنيش منكم ابدا وافرح بيكم وتحصلوني بقا ونبقي ماميهات كبيرات عقليات (هي جات معايا كدا عدوها عدوها 😅)

البنات خلصو كلام وراحو المدرج علشان المحاضرات….

عند يوسف في الشركة…

يوسف وهو بيكلم الي واقف قدامه : ربنا يتمم لك علي خير يحبيبي ومعاك اسبوعين اجازة والمرتب زي مهو متقلقش

عبد الله : ربنا يبارك فيك يباش مهندس يوسف مش عارف اقول لحضرتك اي والله

يوسف بابتسامة وحب : متقولش حاجة انتي زي اخويا يعبد الله

عبد الله بحب : هستناك يوم الفرح اوعي متجيش هزعل جدا والله

يوسف بابتسامة : لا هاجي بإذن الله ربنا يمنع الموانع مقدرش اتأخر عليك..

مشي عبد الله هو وبيفتح الباب لقي اليي بيفتح الباب قصاده من بره وكان عمر

عبد الله بابتسامة : ابن حلال كنت لسا رايح ليك المكتب

عمر بابتسامة : لعله خير ان شاء الله

عبد الله بحب وفرحة : كل خير..كتب كتابي وفرحي يوم الجمعة هكون في انتظارك اوعي متجيش

عمر حضنه بفرحة وابتسامه : مبارك ياصاحبي ربنا يتمم علي خير يارب ..ويسيدي مش هتأخر بإذن الله هتلاقيني اول الحاضرين ههه

عبد الله بابتسامه : تشرفنا والله والفرحة هتكمل بوجودكم بجد قال كدا وهو بيبص ليوسف الي متابع حوارهم

يوسف بحب : ربك يسهل وان شاءالله زي مقالك عمر هتلاقينا اول الحاضرين ولو احتجت اي حاجة مترددش انك تكلمني أو تكلم عمر..

عبد الله بحب ليهم : اكيد لو احتجت حاجة هلجأ ليكم مليش غيركم اصلا

عمر طبطب علي كتفه : حبيبي ربنا يكمل فرحتك علي خير يارب

عبدالله بابتسامة : آمين يارب

وطلع عبد الله ومشي…..

عمر قعد علي الكرسي الي قدام مكتب يوسف الي مركز مع الجهاز الي قدامه

عمر بتعب : مش هتروح ولا اي انا تعبت اوي النهاردة

يوسف : لا اهو بفنش خلاص وهمشي انت عايز تمشي امشي انا خلاص دقايق وهروح

عمر وهو بيرجع راسه ورا : مجتش علي كام دقيقه يعني خلص ونطلع مع بعض

يوسف وهو مركز في الي بيعمله : براحتك يعمر

بعد شوية كان عمر ويوسف قدام عربيته وكل واحد ركب عربيته ومشي…..

عدي يومين بدون أحداث جديدة تذكر…

في بيت حور علي العشاء…

ابو حور : اي يحبيبتي قررتي اي

حور باستغراب وهي بتاكل : قررت اي في ايه يبابا

ابو حور : موافقة على يوسف ولا ارد اقول اي احنا بقالنا كدا 3 ايام والراجل مستني الرد ..

حور سابت المعلقة واتكلمت بكسوف وهدوء : انا بصراحة يابابا لما صليت استخارة حسيت ان انا مرتاحة وفي قبول يعني

ابو حور بحنان وابتسامه : يعني يحبيبتي ارد عليه اقوله يجيب اهله ويجي يقرأ فاتحة..

حور بكسوف هزت راسها بموافقة

ام حور من الفرحة حضنتها جمبها وكانت مدمعة من الفرحة : يروح قلبي ربنا يفرحني بيكي ويجعله زوج صالح ليكي يارب

حور بابتسامة وهي بتبعد وبتمسع دموع مامتها: يروح قلبي ليه الدموع دي دا انا وافقت حتي اهو وهتفرحي بيا زي ما انتي عايزة

ام حور بابتسامة وهي بتمسك ايد حور و بتبوس باطن ايدها الي علي وشها يحبيتي دي دموع الفرحة ربنا عالم فرحتي قلبي ازاي

حور بحب : يارب دايما قلبك فرحان ينور عيني

مصطفي بحزن وفرحة في نفس الوقت بهزار :اي دا يعني هتتجوزي وهتمشي يعني اومال هضرب مين بالقفا ومين هياشركني الهبل الي بعمله في المطبخ..

حور وهي بتقوم وبتحضنه من رقبته : لا مهو دي خطوبة بس يعني لسا قعدالك متخافش وبعدين يعني ياسيدي وقت متكون عايز تضرب حد قفا تعالي عندي سهلة عادي هههه

يوسف بحب وهي بيمسك ايدها الي حوالين رقبته وبيبصلها وراه : والله بجد بعيدا عن الهزار بس مش متخيل البيت من غيرك

حور بهزار علشان تخرجي من المود دا : يعم انا لسا قعدالك انت ليه محسسني اني خلاص ماشية بكره انا قعدالك مش ماشية…

قعدوا يتكلمو مع بعض كتير وبعد كدا كل واحد راح يشوف مصالحه ………

عند يوسف…

قاعد علي السرير نص قعدة بيقلب في التلفون فجأة التلفون رن باسم (عم احمد )

يوسف اتعدل في قعدته وارتبك خايف تكون رفضت..

هدي نفسه ورد علي المكالمة

يوسف : وعليكم السلام ورحمة الله وبركاته عامل اي حضرتك يعمي

احمد ببشاشه : الحمد لله يحبيي في نعمة من الله

يوسف : ربنا يزيدك يارب

احمد: عبد الرحمن عامل اي والوالدة وكل الي عندك

يوسف : الحمد لله كلهم بصحة جيدة وسلامه الحمد لله

احمد : يارب دايما يحبيبي

سكتوو الاتنين… قطع الصمت احمد

احمد : طب يا ابني حور صلت استخارة وان شاءالله منتظرينك انت ووالدك والدتك في اي وقت تشرفونا

يوسف قام من علي السرير بفرحة وهو نسي ان بيكلم ابوها :بجد يعني وافقت

احمد بابتسامة : ايوة يا ابني هو الكلام دا في بجد وبا هزار

يوسف بكسوف واستوعاب للي قاله : مش قصدي يعمي بس يعني مش عارف اقول لحضرتك اي والله انا حاليا اسعد خلق الله

احمد بابتسامه : ولا يهمك يحبيبي يارب دايما مبسوط وسعيد شوف بقا ظبط امورك وشوف والدك وبيتنا مفتوح ومشرف بيكم في اي وقت

يوسف بسرعة : ينفع بكره؟؟

احمد بابتسامه: تنورنا يابني

يوسف بابتسامه وسعادة كبيرة : خلاص يبقي بكره الساعة 8 هنكون عند حضرتك

احمد بحب : تنورونا وتشرفنا يحبيبي….

قفل يوسف مع ابو حور و طلع وهو مبسوط والابتسامه مش مفارقة وشه : يا اميي يست الكل

والدتك من المطبخ : ايوة يحبيبي انا في المطبخ تعالى

يوسف راح عندها والسعادة باينة عليه : عندي ليكي خبر هيفرحك اوي

والدته وهي بتغطي الحلة الي علي النار : مشاء الله سمعني الواحد محتاج فعلا يسمع اخبار حلوة

يوسف وهو بيقرب منها و بياخد خيارة ويقطمها وبيسند بضهره علي الرخامه وبيتكلم بابتسامة : عم احمد كلمني من شوية وقالي انهم وافقو وانه في انتظارنا علشان نقرأ الفاتحة

ام يوسف بفرحة وهي بتحضنه: لولولولولولولولولولولولوا اللهم بارك يفرحة قلبي مبروك يحبيبي مبروك ربنا يسعدكم يارب واشوفك في بيتك متهني وسعيد يحبيبي يارب

يوسف بحب وهو حضنها. :يارب يماما يارب

خديجة جات علي صوت الزغاريت: اي في اي مين بيتجوز

يوسف بتريقة عليها : يعني مين مثلا يا اذكي اخواتك

خديجة اخدت منه الخيارة ووقفت جمبه وهو سند بايده علي كتفها واتكلمت وي كأنها بتكتشف الذرة : يعني ماما يتزغرت وفرحانه كدة فأكيد مش بابا بيتجوز واكيد مش هيا يعني وطبعا طبعا مش انا … فأكيد انت حور وافقت صح ؟ الله عليكي يبت يديجة الذكاء بيتعلم منك…

يوسف وهو بيضربها علي راسها بخفة : ذكاء اي هو اصلا الموضوع مش محتاج كل دا يعني مهو طبيعي انا لاني انا الي اتقدمت وفي مشروع جواز بس نقول اي معانا واحده في البيت بتفهم بالقطارة..قال اي الذكاء بيتعلم مني دا الذكاء قاعد بيبكي في الزاوية..

قعدو يهزرو مع بعض وقالهم ان بكره هيروح ويقرؤو الفاتحة

عند حور ابوها مقلهاش انهم جايين بكره قال هيقولوها بكره الصبح…

حور بكره معاها امتحان ميد تيرم وقاعدة بتذاكر بس مش عارفة تركز كل ما تقرأ حاجة تفكيرها بيروح ليوسف في الاخر قامت اتوضت وصلت ركعتين وقعدت شوية علي المصلاية تستغفر وتدعي بعد كدا قامت تذاكر لأنها حست نفسها ارتاحت شوية وفعلا قامت وذاكرت ولمت كل الي عليها وراحت اخدت شاور علشان تعرف تنام وفعلا راحت علي السرير ونامت علطول لأنها كانت صاحية بدري الصبح ومرهقة …..

تاني يوم………………

حور صحيت في الفجر وهي حاسه ان جسمها كله متكسر وبتعطس اتشيييييييي دا كان صوت حور وهي بتحاول تقوم ومش قادرة

حور :ااه يدماغي هو انا امتي عييت م انا كنت زي الفل امبارح اتشييييييي الحمد لله 🤧

دخلت عندها والدتها علشان تصحيها للفجر…

ام حور سامعه حور بتعطس هي وداخله : اي يحبيتي مالك اخدت برد ولا اي

حور بتعب وهي ماسكة مناديل وبتمسح بيها : ااه 🤧مش عارفة يماما شكلي كدا لما استحميت امبارح ونمت اخدت برد ولا اي مش عارفة

ام حور بحنان : طب يحبيتي قومي اتوضي وصلي وان شاءالله خير هخلي مصطفي هو و جاي من الصلاة يجبلك علاج علشان تقدري تحلي في الامتحان وكمان علشان بالليل

حور بتعب : بالليل ؟!! ليه في اي بالليل؟

ام حوربهدوء :يوسف وعيلته جيين علشان نقرأ الفاتحه ونتفق

حور قامت اتعدل بسرعة وصدمة : يوسف مين وعيلته اي دا بجد يماما؟؟!!!

ام حور: يبنتي يعني ههزر في موضوع زي دا قومي بس دلوقتي اتوضي وصلي وان شاءالله ربنا يسهلها من عنده

حور بزعل وهي بتعطس وحالتها صعبة اوي : يعني سابو الايام كلها وجايين النهاردة طب هقعد معاهم ازاي بمناديلي وصوتي المخنف دا وكمان مش هعرف احضر حاجة لاني معايا امتحان ومش هينفع مروحش ياربييي انا مش عارفة افكر

ام حور بهدوء : طيب ممكن تهدي انتي هتروح امتحانك وتجي زي مبتيجي العصر وهيكون معاكي وقت كبير تحضري الي عيزاه هما هيجو بعد صلاة العشا يعني في وقت حلو هيكون معاكي…

حور : ربنا ييسرها اتشييييي 🤧…طب يماما بس انا حتي مش عارفة ممكن البس اي؟..

ام حور : الدريس الي اشتريته الاسبوع الي فات الي هو البينك دا حلو اوي وانتي ملبستهوش لسا هيكون حاجة جديدة وحلو اوي

حور بابتسامة: ايوة صحيح انا نسيته خالص طيب كدا مسألت اللبس انحلت الحمد لله باقي صوتي دا اعمل اي

ام حور : متعمليش حاجة ادعي ربنا يشفيكي وييسرلك امورك وان شاءالله خير

وانا زي مقولتلك هخلي مصطفي يجبلك علاج قوي للبرد…

حور قامت تتوضي وتصلي وبعدها قعدت شوية لحد لما الصبح صبح والدنميا نورت وكامت اخدت العلاج الي جابه مصطفي ولبست وراحت لكليتها

في الكلية ………………..

اتقابلت حور مع منة وخديجة

حور بصوت مخنف ومش واضح خالص : اتشييييي 🤧 ااه ينفوخي مش قادرة مش عارفة هحل ازاي

منة: يحبيبتي احنا معاكي متقلقيش بس المشكلة دلوقتي في بالليل لازم ترتاحي علشان تبقي فايقة كدا وكمان تاخدي جرعة تاني من العلاج علشان يعمل مفعول..

حور وهي بتوجه الكلام لخديجة وعيونها بتدمع لوحدها علشان دور البرد : يعني اخوكي ساب ايام ربنا كلها ومخترش غير النهاردة طب انا دلوقتي اقعد معاهم ازاي فهموني بس وانا كل الحروف ضايعة كدة وعيوني بدمع لوحدها وحالتي يعني متسمحش خالص ان اعمل اي حاجة يعني بجد اختيار موفق…..

خديجة. : الله وانا مالي يلمبي انا زي زيك اتفقوا وبعد كدا قالولي.. حتي بعد ماقالولي قولتلهم معانا امتحان وكدا قالولي احنا خلاص اتفقنا مع عم احمد وهما لو لقيين المعاد مش مناسب هيقولو ..انتي بقا ليه معترضتيش علي النهاردة ؟؟

حور بتعب : يبنتي انا اصلا عرفت الفجر وامي قعدت تقولي أن شاء الله خير وانا سيبتها علي ربنا وان شاءالله ربنا ييسرها…….

جات اية من وراهم : سلام عليكم يبنات اي قاعدين بره ليه الامتحان خلاص باقي ربع ساعة

منة : مستنينك يهانم انتي الي متأخرة دايما

اية بضحك : معلش معلش يمنون بس الطريق كان زحمة اوي

خديجة بسرعة : طاب يمنة تعالي معايا نجيب ماية قبل الامتحان عطشانة اوي ..مشيو منه وخديجة…

اية بصت لحور وقربت منها بخوف وحنان : انتي معيطة في اي حصل اي معاكي

حور بابتسامه علي حنية صاحبتها : اهدي يحبيبي مفيش حاجة انا بس

عندي دور برد وزي م انتي عارفة لما بيكون عندي برد عيوني بتدمع لوحدها

اية وهي تحضنها : يقلبي الف سلامة عليكي ربنا يشفيك يعيوني يارب …طب اي ذاكرتي ولا مقدرتيش

حور : لا ذاكرت الحمد لله لان اصلا انا الدور جاني النهاردة الفجر

اية : علي العموم احنا معاكي متقلقيش يعني

حور : مش قلقانه بس محتجاكم معايا بالليل اكتر من دلوقتي

اية باستغراب : بالليل؟! اشمعنا يعني

حور بتعب : اتشييييييي 🤧 يوسف وعيلته جايين النهاردة وهنقرأ فاتحة

اية بغمزة وهزار : و بقينا بنقول يوسف عادي كدا😉ههههه

حور بكسوف وابتسامه : يووه بقا يا اية بجد مش وقته ههه

اية بضحك : خلاص خلاص سكت اهو

وكملت ..وبعدين يستي مقلقيش هكون معاكي النهاردة هقول لعمار وهو مش هيمانع ان شاء الله يعني

حور بهزار : ايوة يختي جوزك دا مش مضمون مهو المرة الي فاتت مجتيش

اية بابتسامة :يبنتي المرة الي فاتت مش هو الي رفض هو كان جاي من السفر مكنش ينفع ييجي ومكنش في البيت فعلشان كدا محضرتش لكن المرة دي هو موجود مش في سفر او كدا فيعني ان شاء الله خير

حور : ان شاء الله يقلبي ولو رفض بردو انا عذراكي تتعوض عادي اهم حاجة تشوفي هو يرضيه اي

اية : متخافيش يقلبي خير ان شاء الله

جات منة وخديجة ومشيو كلهم راحو المدرج علشان الامتحان……

بعد الامتحان…

اية بتتكلم في التلفون : ايوة يحبيبي اه الحمد الله حليت كويس هو الامتحان كان حلو يعني الحمد لله

عمار: طب الحمد لله يقلبي بالنجاح ان شاء الله

اية : يارب يقلبي

عمار: طب اي هتروحي ولا تستني شوية اخلص واعدي عليكي نروح مع بعض

اية بتوتر وتردد انها تقوله : اصل يعني انا عايزة اقول اني يعني عاي..

قاطعها عمار بحنان وحب : يوكا حبيبي اتكلمي علطول ليه مترددة من امتي وانتي بتكوني مترددة ومتوترة وانتي بتكلميني قولي علطول سامعك

اية غمضت عيونها واتكلمت بسرعة :انا عايزة اروح عند حور صاحبتي علشان النهاردة قراية فاتحتها وهي محتجاني جمبها…..

مفيش صوت سكوووووت….

اية ببطئ فتحت عين وبعد كدا التانية وهي بتبص للتلفون..

اية بصوت واطي: هو قفل في وشي ولا اي

عمار بضحكة بسيطة : مقفلتش معاكي

اية : احم طب اي موافق ؟

عمار : طب يعني انتي متخيلة ان هرفض يا اية يحبيبي زي ما انا بكون مع صحابى لما يكونو محتجني او وحشوني وعايز اشوفهم واسيبك وانزل معاهم انتي كمان ليكي نفس الاحقية تبقي مع صاحبتك في وقت هي محتجاكي فيه ولو عايزة تشوفيهم وتخرجي معاهم يحبيبي انتي مش في حبس دي حياة وانتي ليكي كامل حريتك انك تشوفي اصحابك وتخرجي معاهم طالما بكل احترام وأدب بعد كدا متتردديش وانتي بتطلبي حاجة تاني واه علي فكره بقا انا اوقات بقولك لا متروحيش او متناميش عند مامتك انا بقولك كدا علشان بتوحشيني مش تحكم

اية بحب :بحبكك اوي يعمار 🥺

عمار : وعمار بيحبك اكتر يقلب عمار انتي.. يلا روحي شوفي صحابك وابقي طمنيني علكي لما توصيلي وخلي بالك من نفسك..هتوحشيني ..

اية بحب : حاضر يقلبي وانت كمان هتوحشني يا ابو عتريس ههه

عمار : ممكن تكون عتريسة احنا مش عارفين لسا هههه

يلا يقلبي في رعاية الله ..

قفلو واية رجعت ليهم……………………………….

الساعة 7 عند يوسف ..