تحميل رواية «"الــيـل الـدامـس فـي الـجـحـيـم"» PDF

بسم الله الرحمن الرحيم

اللهم صل على محمد وآل محمد

اللهم بارك على محمد وآل محمد

___________________________________

گعدت من النوم تعبانه حيل بالكوه كمت غسلت وجهي طلعت من الغرفه ورحت للاستقبال واني مخليه أيدي على بطني لگيت صهيد يمه اوراق لمن شافني ابتسم

صهيد- صباح الخير

شُجان- صباح النور

صهيد- تعالي گعدي يمي

شُجان- خلي اسويلك اكل اكيد بعدك ما ماكل؟ 

صهيد- لا حبيبي اكلت تردين اسويلج اكل؟ 

شُجان- لا ماشتهي هسه

رحت گعدت يمه والاوراق بيها مخططات وارقام هواي

شُجان- شنو هاي؟ 

صهيد- مخطط بناء

شُجان- صهودي

باوع علي مبتسم

صهيد- ها يا عيون صهودج

شُجان- عادي اليوم نروح ناكل بمطعم؟

صهيد- أي ليش لا يلا بدلي بسرعه

فرحت وحضنته وبسته من خده

صهيد- ماناسيها ابد

شُجان- شنيه؟

صهيد- احجي ويه روحي.

ابتسمتله ورحت للغرفه بدلت ولبست جبه كشوخيه وربطه صرت جني مثقفه طلعتله هو طب يبدل لمن طلع جان طالع برفكتو جان لابس تيشرت بني وبنطلون اسود لزم ايدي وباسها

شُجان- اكلك صهيد

صهيد- ها بويه

شُجان- امم عبودي يريد كيكه ام الككو

ضحك ونزل لبطني باسها

صهيد- يدلل عبودي اجيبله احلا الكيك

ابتسمتله وطلعنا رحنه لمطعم حلوات طلبت جاي

وكيكه وهو طلب بس جاي گعدت اكل واني مبتسمه وأباوعله

صهيد- اعتذر على كلشي سويته وراح نبدي بدايه جديده اني وانتِ وأبنا

شُجان-صهيد عمري ما فكرت يجي يوم واتزوج ويصير عندي طفل

صهيد- اول مرا شفتج بيها حبيتج بس جان لسانج طويل

شُجان- ههه جنت خايفه من أبوي ولهاذه طولت لساني

صهيد- لا هاي المرا الثالثه اقصد المرا الاولى الشفتج بيها لمن جان عمرج 7 سنوات

انصدمت شنو؟ 

صهيد- ها شو صفنتي؟

شُجان- شلون؟ ماتذكر شفتك واني صغيره

صهيد- هههه طبعا بويه ما تتذكرين لمن جان علي يلعب وياج وانتِ ضليتي تصيحين علي لان يصيحلج شجره تتذكرين؟

شُجان- اتذكر لمن علي يصيحلي شجره بس ماتذكر شفتك؟ 

لزم ايدي وطبطب عليها وابتسم

صهيد- انسي بويه انسي

اجاه اتصال وگام علمود يحجي برا بس طول واني كملت الاكل وصار وقت الدفع وهو بعده دفعت مني واخذت الغراض وطلعت مالگيت صهيد واني ماندل البيت خفت واتصلت علي ميجاوب ضليت اتصل بي لحد ما قفل التلفون حاولت اتذكر اسم المنطقه لحد ما تذكرتها اجرت تكسي ورحت للمطنقه نزلت من التكسي وضليت افتر بين الافرع لحد ما وصلت للبيت بعد ما افتريت فوك الساعتين الحمد الله عندي نسخه احتياطيه وفتحت الباب ودخلت البيت فارغ ماكو لا صوت ولا أي شي حاولت اتصل بصهيد بس ميجاوب خفت اكثر لمن مر اليوم وصهيد ماكو لا اثر ولا أي شي الساعه بالـ12 باليل اتصل بيه جاوبته بسرعه

صهيد- اسف

شجان- وينننن جنتتت اتصللل عليكك من الصبحح والي هسههه ليشش متجاووببب صهيددد وينكك ارجعع

صهيد- بالبصره

انصدمت وصرخت

شُجان- وانيييي؟  ليششش رحتتت ليششش

صهيد- وهبان بالطريق لمي ملابسج بسرعه وملابسي وياج وتعالي اني افهمج ليش واقفلي البيت زين

سده بوجهي بدون ما يحجي شي خابرت على ورده لان هيه ببغداد عايشه اتصلت عليها وطلعت هم موجوده بالبصره استغربت شكو صاير شي! لميت ملابسي بسرعه گعدت ابجي لان احس صاير شي سمعت الباب يندك رحت فتحت الباب لكيته وهبان

وهبان- وين الجنط؟ 

شجان- جوه

دخل واشرتله على الغرفه راح جاب الجنط وطلع

وهبان- يلا بسرعه! !!!

صاح بوجهي واني سديت الاضويه وقفلت الباب وطلعت صعدت الي ورا وبقيت ساكته وهو ساق

شُجان- وهبان صاير شي؟ 

وهبان- لا

شُجان- لعد ليش صهيد عافني؟ 

وهبان- ماصاير شي

سكت واني سكتت بقينا شوي واتصل بي صهيد

سمعت المكالمه لان هدوء محد يحجي

صهيد- بسرعه وهبان كرار حالته موزينه بسرعه

وهبان- بالطريق والله بالطريقق

انصدمت شبي كرار ققرت ما ابقى ساكته وحجيت

شجان- وهبانن شبيي كرارر

سكت ما جاوبني

شجان- كرار شبيي احجيي

بقى ساكت سكتت اني هم بس ادعي بگلبي يكون ما بي شي مرت الساعه وصارت بالـ5 ونص الفجر وصلنا للبصره وكبل وداني للبيت ونزلني وراح طبين للبيت وذبيت الجنط بالاستقبال ورحت لبيت جدو ماموجود احد طلعت واني الدموع بعيوني شفت تكسي جايه من بعيد وطبگت على بيتنا الشخص الي نزل مستحيل توقعته يجي لمن شافتني اجتي تركض وهيه تبجي

جمره- شجاننن

بقيت مصدومه وهيه حضنتني وتبجي الي استغربته جانت نازعه الحجاب وجانت لابسه بنطلون وتيشرت اسود والكوت لون بني تغيرت خلال شهر مدري شهرين؟ بقيت اباوع لشكلها وهيه تبجي

جمره- كرارر ويننن شجانن

شجان- ماعرفف ماعرف انييي هممم ماعرففف كلهمم. ماموجودينن

سحبنتي ورجعت للتكسي ودلته على مستشفى سئلتها واحنه بالطريق

شجان- ليش نازعه الحجاب؟

جمره- تحجبت غصب واني ماحب الحجاب ققرت انزعه

سكتت وطلعت تلفونها وخابرت على عمي عباس

جمره- بابا اني بالعراق وينن كرار بنفس المستشفى غيرر؟   … جايه

وصلنا ودفعت الفلوس وسحبتني وصلت تركض

لمن سئلنا علي عرفنا بغرفه الانعاش جمره گعدت تبجي حيل واني باقيه بصدمتي مجاي افتهم شكو رحنا اني وياها وجانو كلهم موجودين وانصدمو من جمره وطريقه لبسها ونزعها للحجاب وانصدمو لان اني اجيت وياها رحت جمره لعمي عباس تبجي

جمره- بابا بابا شبيي كرار احجيي

محد جاوبها وضلت تصيح بينهم

جمره- احجوو شبيي ليش مجايي تحجو

سلطان- جمره تعالي وياي

سحبها بددون ما ينتظرها ترد والواضح تعاركو ضليت ادور على صهيد بينهم ماكو

شجان- صهيد وين؟

عباس- رجعي للبيت

شجان- اني مو فرد من العائله احجو وينن صهيد وشبيي كراررر شلعتوو گلبيي احجوو

حجت عمتي رقيه وهيه تبجي

رقيه- طلع گال راح اطلع يم جماعتي ومانحس اله واحد يكللنا كرار مدعوم ودمه سايل بالگاع

انصدمت ورحت گعدت من الهبطه ضليت ادعي ربي يگوم بالسلامه

شجان- وهسه … زين؟

عباس - كالو منا للتسعه اذا ما گعد نقراله الفاتحه

انصدمت اكثر وگعدت ابجي اجه صهيد وعرفت راح يتبرع بالدم لكرار باوع علي وانصدم لان اجيت اجه علي

صهيد- ليش اجيتي؟ موزين عليج رجعي للبيت اخاف عليج ماضل بيه حيل وداعتج

شجان- صهيد أسمعني حبيبي كرار مابي شي وهسه يگوم بالسلامه ادعي ربك صهيد

صهيد- ماريد اخسر أخوي ، تعالي اخذج ارجعج للبيت

بقيت واگفه

صهيد- تعالي

شجان- ماروح اذا ما اشوف كرار زين

بقيت گاعده وهو گعد بصفي بقينا ساعه وطلع الطبيب يبشرنا

الطبيب - الحمد الله على سلامه ابنكم بس وين ابو؟

سكتو وتقدم صهيد

صهيد- اني اخو الجبير

الطبيب - اريد احجي ويه ابو

صهيد- اني ابو

الطبيب افتهم واخذ صهيد على صفحه باوع لغرفه كرار وابتسم ورجع باوع على جمره وهيه فرحانه شكر الطبيب ودخل وحده وبقى هواي يالله طلع لمن طلع طبينا احنه نتحمدله بالسلامه بس جمره مت دخلت ويانا

شجان - جمره؟  ليش ما تجين؟

انتبهت علي وابتسمت گامت

جمره- لازم اروح راح ارجع للبيت ابقى اسبوع وارجع اسافر

دارت على صهيد

جمره- الحمد الله على سلامته

صهيد جان مدنگ راسه ويحجي وياها

صهيد- الله يسلمج

دخلت جوه وتحمدت بسلامته

كرار- شجان اريد احجي وياج

فهمو البقيه وطلعو بقيت يمه

كرار- سمعت صوت جمره وينها؟ 

جان يحجي بتعب وبخنگه

شجان- راحت اعتقد

كرار- ليش ما اجتي تسلم علي؟ 

شجان- ماعرف

كرار- شجان

شجان- ها

كرار- بعدني احبها ماگدر اتخطاها

شجان- كرار شنو هل حجي؟  انتَ راح تتزوج شمس عيب تحجي هل شي

كرار- شمس احبها بس ما اگدر انسى جمره كلما اشوفها گلبي يرجع يلهث بيها

شجان- لعد ليش رحت وخطبت شمس؟ 

كرار- ماعرف شمس شفتها المناسبه الي

شجان- كرار اخذ قرارك تريد جمره او شمس؟ 

بقى ساكت يفكر واني گمت حتى اطلع بس وقفني صوته

كرار- شمس

بقيت ساكته توقعت يختار جمره لان كلش يحبها رجعت گعدت على الكرسي وسئلته بأستغراب

شجان- ليش؟ 

كرار- قررت انسى جمره ماعرف احس نفسيتي كلش زفت ماعرف شجاي احجي

شجان- كرار اسمع انت مرتاح ويه شمس؟ 

كرار- للأمانه هيه البنيه خلوقه من وهيه صغيره وهم يعني ماشوف منها شي مو حلو هيه حلوه ولطيفه حيل ولمن احجي وياها احس براحه عجيبه

انفتح الباب وطلعت جمره وسمعت الكلام الگاله كرار عن شمس هيه بقت صافنه شوي وبعدين ابتسمت

جمره- الحمد الله على سلامتك خويه

كرار- الله يسلمج

جمره- أحم شُجان عادي نحجي شوي؟ 

هزيت راسي وطلعت وياها سحبتني وطلعتني برا المستشفى

جمره- واو متوقعت هيج ملاحظها من وهيه صغيره

شُجان- جمره حبيبتي انسي

جمره- أمم راح انساه اني اصلا نسيته لا عبالج

شافت واحد يبيع گهوه راحت جابت الها وألي

شُجان- ماشرب گهوه

جمره- هاا صدك اي بغداد حلوه؟

شجان- اي حلوه شمدريج انتِ؟

جمره- مرا وحده رحتلها

شجان- اها

ابتسمت جمره وباوعت علي

جمره- أذا اكلج بفد سر تضمينه؟ 

شجان- احجي هيه بقت عليج

جمره- اكو واحد بالجامعه مالتي اول ما نقلت هو عيونه علي اسمه نوح من ام عراقيه واب امريكي يعني صاير ميكس عربي اجنبي

شجان- اي وانتِ تحبي؟ 

جمره- الصراحه؟  لا لان حاليا اني ما افكر بالارتباط واني توني طلعت من تجربه فاشله اريد اكمل دراستي وبعدين افكر

شجان- يمكن يكون نوح من نصيبج؟

جمره- لا يع ماريد

شجان- ليش؟ 

جمره- أسمر وعيونه زرگ وانوب معضل خرب يومه وها اكبر مني بسنه لان هو مأجل سنه فه هسه هو تقريبا عمره 22-21 هيج

شجان- زين يعني شاب مرتب

هزت راسها ورجعنا طبينا جوه اجاني صهيد خايف

صهيد-وين جنتي؟ 

جمره- جنه برا نسولف شوي

صهيد- سئلت مرتي! 

شجان- صهيد جنه نتمشه برا

صهيد- تعالي يلا راح يطعلون كرار

شجان- صدك

صهيد- والله يلا

سحبني من ايدي ورحنا انتظرنا شوي وطلعنا بعربانه لان جانت رجله مكسوره اخذو وصهيد ووهبان صعدو بسياره صهيد صعد كرار الي ورا وصهيد يسوق ووهبان بصفه رحت وياهم لان ماكو مكان بسياره عمي عباس

صهيد- شجان

شجان- ها

صهيد- جمره ليش نزعت الحجاب؟ 

كرار- حريتها الشخصيه معلينا بالناس

شجان- كالت اني ماريد الحجاب وجانت لابسته غصب

هز راسه ورجعنا للبيت لمن فتحنا الباب اني بسرعه تقدمت وشلت الجنط من التخم وكرار گعد علي رحت جبتله مي وشرب صبيت لصهيد ووهبان

شجان- جوعانين تردون اسويلكم شي ؟

صهيد- لا بويه روحي ارتاحي اهواي وگفتي اليوم موزين عليج روحي للغرفه والملابس عوفيهن اني اجيبهن وراج

شجان- خاف وهبان وكرار يردون شي

وهبان- لا خويه روحي ارتاحي موزين عليج تتعبين اكثر

هزيت راسي وصعدت فوك على كيفي وطبيت للغرفه جانت شبه بارده تمددت وتغطيت ونمت من التعب ماگعدت اله الساعه بالـ 4العصر  گعدت وجان نايم يمي صهيد وجان واضح تعبان گعدت وسحبت تلفوني لگيت رساله من جمره

- هلاو شجان ادري مراح تگعدين هسه بس شوفي شنو رأيج تجين يمي اليوم؟  جايبه وياي حلويات من امريكا كلش حلوه وشغلات هواي تعالي ماطول شمس هم موجوده يمنا

تفاجئت شمس موجوده وبعدين گلت اكيد لان خطيبها سوه حادث اكيد تجي رديت عليها

- هلا بيج تمام اني بس اسوي غده واكمل واجي

شافتها وما ردت اني گمت ونزلت على كيف سويت غده سويت تمن ومرگه دجاج وسويت شوربه لكرار وخليته على صفحه سويتلهم زلاطه وبقيتها بالثلاجه صعدت فوك وشفت الجنط رتبت الملابس ملابسي وملابس صهيد طلعت اني ملابس ألي ملابس وطبيت سبحت لمن طلعت لكيت صهيد گاعد بدلت وگعدت انشف بشعري وامشط بي اجه صهيد واخذ مني السشوار والمشط وكعد يسشور شعري ويمشطه

صهيد- أحبج

شجان- اني هم

صهيد- بعدج تردين تبقين ببغداد؟ 

شجان- لا

صهيد- أسف ردت ابقى بعيد عن الكل بس مامر كم اسبوع واخوي سوه حادث اسف لان خليتج بالمطعم وحدج وانتِ ما تندلين البيت

شجان- عادي ماصار شي بس تصرفك كلش غلط المفروض تصيحلي حتى اجي وياك

صهيد- أسف ماگدرت اسيطر على روحي وگمت ما اشةف بعيوني من الهبطه شجان موقف الصار ويه كرار تكرر علي مرا بس مو كرار جان شخص عزيز علي ومات بالحادث واني خفت لا بموت كرار ويروح مني

شجان- أسم الله على كرار لا مو تشوفه مابي شي الحمد الله

سكت وكمل گعد يمشط بشعري ومايعرف يضفر واني ميته ضحك علي

شجان- عود شجاي تسوي؟

صهيد- النيه ضفيره بس الواقع خر** مطي

فطست بالگاع من الضحك اخذت شعري وسويته ضفيره

شجان- ها صهودي اريد اروح لان جمره عزمتني وكالت ماطول شمس هنا نسهر ومدري شنو

صهيد- شمس؟  يعني عمي موجود

شجان- ماعرف والله يمكن

صهيد- نروح سوه، سويتي غده؟ 

شجان- اي سويت

صهيد- كملي وصبيلي مابين اطب اسبح

راح طب يسيه واني نزلت صبيت غده وگعد وهبان وحسبته وخليته الهم بالاستقبال ورحت صبيت شوربه وصعدت انطيته لكرار

كرار- بس شوربه ؟

شجان- تريد اصبلك تمن ومرگ؟ 

كرار- مرگ شنو؟ 

شجان- دجاج

كرار- اويليي صبيلي

شجان- هههه لعد اكل هاي الشوربه واني اروح اصبلك

ضحك وگعد ياكل نزلت جوه وصبيت لكرار واخذتله سلاحيه مي وصعدت فوك انطيته اله وخليت المي يمه

كرار- شجان شمس اجتي؟

شجان - اي

كرار- وينها

شجان- ببيت جدي

كرار- خابريها

شجان- واني شعلي خابرها انتَ

كرار- لا مو بعدني استحي منها

شجان- خاب دنجب وانتَ خابرها يلا باييي

طلعت منه ونزلت جوه انتظرتهم يكملون حتى اغسل المواعين وفجا طبت علينا شمس

صهيد- ها بويه شعندج

شمس- هلا صهيد احم اجيت اشوف كرار

صهيد- روحي لغرفته،  ابوج موجود؟

شمس - اي يريد يروح

صهيد- وانتِ؟

شمس - اني ومسلم راح نبقى

صهيد- مسلم موجود؟  خوش يلا بويه روحي صعدي

راحت تركض ودخلت للغرفه ضحكت عليها شلون حاصرتها البجيه وبالگوه تحجي

كرار

طلعت شجان وهيه تضحك علي تشجعت وخابرتها رد صوت مو شمس

جمره- الو؟

كرار- جمره

جمره- شمس خطيبج يريدج

اجاني صوت شمس

شمس- كرار! ! شلون صرتت!

كرار- تعالي يمي

شمس- شنو؟ 

كرار- شنو شنو تعالي يمي اريدج يمي

شمس - لا اخاف ابوي ميقبل

كرار- عمي مو ابن عمج اني هسه اني خطيبج تعالي ولج لتشلعين گلبي

شمس- شبيك تصيح علي؟ 

كرار- ماصيح حبيبي ماصيح يلا تعالي

شمس- اذا تريد شي احجي اهنا

كرار- يعني ما تردين تشوفيني؟ 

شمس- جايه

سدر الخط ومرت دقائق واجتي فتحت الباب وسدته واجتي تركض وتبجي حضنتني واني ضليت امسح على راسها

كرار- أشش شموستي ليش تبجين؟

شمس - خفت عليك كرار خفت اخسرك

كرار- لهاي الدرجه تحبيني؟ 

شمس- واكثرر احبك اكثر من روحي

كرار- أحبج

جعت حضنتني وبقت بحضني دقائق وگامت

كرار- ها؟ 

شمس- احم عيب ابقى بحضنك

كرار- خطيبتييي يا ناسسس

خلت اديها على حلكي حتى اسكت وضحكت عليها هيه مبتسمه وعيونها يلمعن من الدموع بقيت گاعد على التخم وسحبتها يمي مسحت دموعها

كرار- دموعجج غسلنييي لج ليش تبجين ريلاكسس شموسه ريلاكسس

ضربتني بجتفي

شمس- شنوو ريلاكس جنتت خايفه عليك

كرار- ليش ما اجيتي من وكت؟ 

شمس- مادريت الصبح لمن طلعت من المستشفى اني دريت بيك لان عمي عباس خابر أبوي واجينا ولمن ردنا نجي كالو راح ينام بعدين

ابتسمت لان ماعرف شنو أرد عليها رجعت حضنتني وحجت بزعل

شمس- لتعوفني كرار

كرار- لا ما اعوفج حبيبتي

شمس - كرار اريد أسئلك سؤال

كرار- جواب

شمس- ليش قررت تخطبني ؟

كرار- فكرت بيج هواي ولمن شفتج اخر مرا حسيت انتِ المناسبه ألي

شمس - احجي الصدك ليش! 

كرار- هاذ الصدك شمسي

شمس- وجمره؟ 

ابتسمت ولزمت خدها

كرار- جمره من الماضي تمام؟  انتِ هسه الحاضر والمستقبل ماشي؟  ولتفكرين هواي

ردت الابتسامه ولزمت ايدي

شمس- كرار مابقى هواي واكمل دراستي باقي بس ثلاث اشهر واخلص

كرار- شمس

شمس- ها

كرار- تعالي لحضني

هيه انصدمت خطيه ووجها صار احمرر من الخجل هيه بيضه ولمن يصير وجه احمر يبين سحبتها وخليتنا بحضني ادنيت شوي وخليتها تنام بحضني

شُجان

كملو الاكل وشلت الصينيه وگعدت اغسل بالمواعين كملت وصعدت فوك سمعتهم يسولفون ماحبيت ازعجهم رحت لغرفتي رجعت بدلت ملابسي لان تبللن وكملت خليت مكياج خفيف حمره وبلاش وخليت عطري المفضل وخليت بجنطتي عطر وخليت تلفوني. لبست سوار جابه ألي صهيد هديه وكلش احب هاذ السوار جان فضه ومحفور بيها أسمي وأسم صهيد * شُجان&صهيد* هيج،  طلعت من الغرفه ومرت من غرفه كرار ماكو صوت ولا اي شي استغربت ولمن فتحت الباب على كيفي لگيت شمس نايمه بحضن كرار وكرار غافي ضحكت وطلعت تلفوني صورتهم بسرعه وسديت الباب واني اضحك عليهم شكلهم كلش حلو سوه نزلت جوه

صهيد- ها بويه نروح؟ 

وهبان- وين ؟

صهيد- لبيت علوان المنعول

وهبان- اروح وياكم

صهيد- شجان صيحي شمس خلي تجي وانتَ لا متروح ابقى يم اخوك يمكن يريد شي اني بس اودي شجان واحجي ويه عمي بشغله واجيك

رحت حتى اصيح لشمس ولكيتهم نفس الوضعيه سديت الباب ودگيته اعتقد فزت واجتي وجان وجها احمر من الخجل

شمس- احم اسفه تأخرت

شجان- لا عادي بس يلا يكول صهيد

صاح كرار

كرار- اشتعللل جدكك علوانن صهيدددد

ضحكت علي وسحبت شمس ونزلنا جوه ورحنا لبيت علوان. ولمن طبينا جانو بس الزلم مجتمعين النسوان والبنات بالغرفه الثانيه سلمت عليهم ورحت يم البنات سلمت عليهن وگعدنا نزعت عباتي والحجاب خليته على جتفي حتى خاف احد يطب اكدر البسه بسرعه،

كنان- وهبان اجه؟ 

شمس- لا بقى يم كرار

كنان- اها شلونه كرار؟ 

شمس- زين الحمد الله

جمره- شجان تعالي اراويج شنو جبت من حلويات يلا بنات تعالو شمس؟ تعاي ويانا

كمنا كلنا ورحنا لغرفتها طلعت من الجنطه علاگه جبيره كلها حلويات ضحكت عليها جايبه امريكا وياها

جمره- شمس جربي هاذ بالبدايه تشوفينه مو طيب بس بعدين يجيج طعم حلو جبت على عددنا يلا

اخذنا كل وحده وحده وجان طعمها بالبدايه مثل النشا بس بعدين يجي طعم حلو وبي نكهات

جمره- ها بنات ابو المحل كال اكو نكهة نادره الي هيه بالتفاح منو طلعلها طعم تفاح ؟

ضلت وحده تباوع للثانيه لحد ما گالت شمس

شمس- اممم اني تفاح

جمره- اللهه طعمها طيب مووو

هزت شمس راسها وهيه مبتسمه

شمس- واا طعمها طيبب كلش

جمره- وانتن شنو الطعم؟ 

شجان- اني رگي

كنان- اني اجاني طعم العنب

جمره- اني توت

گعدت تطلع لحد ما انتبهت على باكيت غريب وجان ككو بس ما فتحته وضمته

شجان- شنو هذني؟ 

جمره- هيج ، صدك شمس شوكت عرسج ؟

توترت شمس وضحكت

شمس- ها ماعرف بكيف كرار اقصد ماعرف

جمره- امم

گامت جمره وراحت للحمام

كنان- شمس أسفه أذا ضوجتج جمره

شمس- مم لا مضوجتني

طلعت تلفوني وصارت كبالي الصوره الصورتها ضحكت وراويتها لكنان هيه هم گامت تضحك

كنان- اييي واكولل ليشش صايره طماطههه

شجان- مشهدد لطييفف بينهم

كنان- ههههه ايي

شمس - شنو شجاي تحجون

لفيت التلفون واني لفيته وجمره دخلت وشافت الصوره

شمس- عزااا عليج الله مسحيهاا والله مو انيي هو خلانيي بحضنه والله

شمس صايره ورا الباب لهاذه ما شافت جمره

سكتنا كلنا وهاي شمس تتوسل احذف الصوره

شمس- اموتتت اذا احد شافهاا خصوصا جمره ماريد تشوفها علمود ما تزعل

جمره- لا ليش ازعل عادي

التفتت شمس وتجمعت الدموع بعيونها

شمس - جمره حبابه لتزعلين والله مجان قصدي ازعلج

جمره- هههههههه ليش ازعل حبيبتي؟  عادي انتِ وخطيبج مابيها شي ولتخافين محد راح يعرف بالصوره غيرنا

خابرني صهيد وجاوبت

صهيد- ها بويه تبقين لو تروحين؟ 

شجان- ماعرف اشوف البنات

صهيد- اذا تردين تبقين ابقي وباتي اليوم وباجر اجي اخذج

شجان- تمام احبك

صهيد- أحمم واني هم

عرفت يمه ولد وسكت سديت الخط بقينا نسولف للساعه 2 باليل عطشت ونزلت حتى اشرب مي لمن وصلت للبايه الاخيره بطني صارت توجعني خفت حيل وهمزين جنت اضوي بتلفوني گعدت بالگاع والوجع ضل يزيد خابرت صهيد جاوبني بصوت نايم

صهيد- ممم

شجان- صهيد … صهيد بطني توجعنيي

صهيد- شنوو؟ ؟؟ بعدجج بشهر السادس ليش وجعتجج؟

شجان- ماعرفف تعالل بسرعه بطنيي صهيدد بطنيي

صهيد- جاي جاي

سد الخط وبقيت شوي ونزلت جمره

جمره- شبيج؟  شجانن احجي شبيج ليش هيج گاعده تبجينن

شجان- بطنيي جمره بطنيي

شوي واندك الباب راحت جمره فتحت الباب واجه صهيد يركض شالني

صهيد- جيبي شالها وعباتها بسرعه

صعدت جمره جابت العبايه والشال وخلاهن علي وصعدني بالسياره

صهيد- لبسي الحجاب

جمره- اني اروح وياكم گلت لشمس وكنان

صهيد- يلا صعدي

صعدت ورا وبالگوه لبست حجابي والعبايه خليتها علي ماگدرت البسها عدل

صهيد- شجان شجانن احجي بعده للوجع.

شجان- أيي يوجعنيي

صهيد- يارب سترك ياربب ستركك

جمره- شجان أذكري الله هسه تصيرين زينه

بقينا شوي ووصلنا للمستشفى ولمن رحت حتى يفحصوني

صهيد- هاا دكتوره بشري؟ 

- اخويه مرتك تصعد للدرج هواي؟ 

صهيد- أي غرفتها فوك

- ميصير خصوصا هيه بالاشهر الاخيره

صهيد- صار دكتوره

-  وانتِ هم ماما لتعبين روحج هواي،  اختج؟ 

جمره- مثل اختي

- اهتمي بيها هل ايام

جمره- ان شاء الله

طلعوني وصعدت بالسياره

صهيد- شلون صرتي ؟

شجان- زينه

صهيد- جمره راح ارجعج للبيت شجان راح ترجع وياي

جمره- ماشي

رجع صهيد جمره للبيت ورجعنا اني وياه للبيت تمشينا ووصلنا لطرف الدرج شالني وصعدنا فوك

شجان- تعبت تعبني هل حمل تعبنيي حيلل

صهيد- ما بقى بس 3 اشهر وتكملين

شجان- ان شاء الله

خلاني على الجربايه ونزعت حجابي والعبايه واخذهن صهيد خلاهن بالكنتور واجه تمدد يمي

صهيد- شجان تعالي لحضني

أدنيت يمه وحضني حضتنه حيل وعبالك خايفه من شي ونمت لمن گعدت ماجان بيه حيل فه بقيت نايمه بالفراش لحد ما اجه صهيد وشافني گاعده

صهيد-  شجونتي گاعده حبيبي

شجان- عادي ما اسوي شي اليوم بس اليوم والله تعبانه حيل

صهيد- ههههه بويه لا ابقي گاعده اليوم اصلا ماكو شي رجعي نامي ماعدنا شي

ضليت گاعده لحد ما خلص اليوم وجانت الايام الباقيه عاديه اني بقيت بالفراش ومحد شافني ولا احجي ويه احد غير صهيد،  مرت الاشهر واجه شهري التاسع بعد عناء طويل وتعب وارهاق والي تعب وياي اكثر صهيد واخر شهرين اجتي ورده وصارت تهتم بيه واكثر اثنين وگفو وياي بيوم ولادتي ورده وصهيد رغم ورده عدها طفل جابت بنيه عمرها 3 اشهر سمتها زينب،  بيوم ولادتي جنت ميته من الوجع واصرخ

شجان- صهيدددد حبابببب ألحكليييي

صهيد- يمج يمج اني والله

شجان- صهييدد جايي اتوجععع راحح اموتتت

صهيد- اسم الله عليج بويه

شجان- صهيد أذا متت لا تزوج اهتمم بأبنكك وابداا لا تهمله

شفت صهيد گام يدمع وطلع برا الغرفه واني ضليت اطلگ الوجع مامعقول حسيت اكو شي نزل مني وراحه بعد ما نزل تنفست على السريع وسمعت صوت طفل يبجي وصوت هلاهل وبعدها غبت عن الوعي…

صهيد

سمعت صوت طفل وفرحت طلعت الطبيبه ورا شويه وهيه شايله أبني عبد الله. اخذته منها واني فرحان وعمتي تهلهل بي كبرت بأذنه وسمته عبد الله اخذته مني الطبيبه وراحت حتى تسبحه راحت ورا عمتي رقيه والحجيه سعاد

صهيد- دكتوره مرتي شلونها؟

- بعدها غايبه عن الوعي ونزفت هواي دم من عدها راح ناخذها لغير غرفه حاليتها شوي خطره

انصدمت نزفت هواي دم وهسه هيه هسه بخطر راح تروح مني ؟

صهيد - نقذيها حاوليي تنقذيهاا لتخلينهاا تموت

- موبيدنا بيد رب العالمين بس ان شاء الله تصير زينه

طلعوها من غرفه الولاده لغرفه الانعاش لان دگات گلبها سريعه ويخافون لا تصير بيها جلطه بسبب سرعه گلبها خفت عليها ورحت اني ووهبان وكرار وياها وعمي عباس بقى حتى لمن يجون عمتي والحجيه يجيبهن النا بقيت گاعد على جمر انتظر بالساعات مرت ثلاث ساعات ماعرف ليش هيج تأخرو بقيت خايف وأبني بأيدي خايف على شجان والطفل ضل يبجي لازم يرضع حليب أمه اضطريت اروح اجيب مميه وحليب وسوتله عمتي رقيه ورضعته جانن عيونه على أمه عسليه فاتحه وبشرته لا علي ولا على امه صايره بالنص بشرته حنطيه وقريب على الابيض كمل مميته وبقى ساكت اخذته لحضني وبهل اثناء طلعت الطبيبه

- الحمد الله على سلامه أم عبد الله

فرحت حيل وحضنت عبد الله وبسته

صهيد- شفت ماما ما تعوفنه وحدنا،  دكتوره اگدر افوت

-  اي طبعا بس انتَ والطفل وبعدين البقيه يدخلون

هزيت راسي ودخلت لگيتها گاعده ومبتسمه لمن شافت عبد الله بيدي فرحت حيل وگعدت تبجي

شجان- صهيد صهيد هاذذ ابني؟  هاذ ابناا؟ 

خليته بحضنها ومسحت على خدها واني مبتسم أشوف تعب السنين بيها وبأبني ربي عوضني بالتعب التعبته بأبني عبد الله ومرتي شجان

صهيد- هاذ ثمره حُبنه هاذ ضلع صهيد والسبع ماله

شفتها مبتسمه وتباوع للطفل وتحجي وياه

شُجان

ضليت صافنه بملامحه ماشاء الله تبارك الرحمان حلو وبشرته ناعمه بسته

شجان- عبد الله مو؟ 

صهيد- طبعا

شجان- عبودي حبيبي ليش تعبتني؟  ازعل عليك أذا تتعبني خوش؟ ياحبيب ماما،  صهيد

صهيد- ها گلبي

شجان- جنت اتمنى اهلي واهلك حاظرين مثل هاذ اليوم اريد اعرف شنو رده فعل امي على عبد الله لو عمتي لان اول حفيد ولد

صهيد- نفس حجايه ورده هم گالت اريد اعرف شنو شعور امي وهيه عدها اول حفيد بنيه وانتِ هم هيج تحجين

شجان- صهيد أحبك

صهيد- اموت بيج يبعد روحه لصهيد

طلع صهيد وستأذن حتى اطلع وطلعت جانو اهل صهيد حيل فرحانين بيه حيل حيلل وخصوصا عمتي رقيه جانت الفرحه ما توسعها بقيت يم بيت علوان

بغرفه عمتي رقيه

كنان- يمهه عبوديي عبوديي عبودييي يمهه فدوههه تعالل ابوسككك

كنان تحب الاطفال وهيه مهتمه بعبد الله اشوفها تلاعبه وتشيله وتبوس بي جمره خابرتني وتباركتلي وفتحتلها كامره حتى تشوفه

جمره- ياربيي فدوه لالله شگد حلوو ماشاء الله عبد الله انتظرنييي بس اكمل دراستي اله اشبعك بوساتت

شجان- ليش بالعطله ما تجين؟ 

جمره- لگيت وضيفه وجاي اشتغل اجمع فلوس الايجار وفلوس الجامعه والحمد الله جاي اشتغل والراتب هم يعني يكفيني

شجان- عفيه فخوره بيج جمره

جمره- يگلبي،  يلا رايحه راح اتأخر على الشغل

ودعتني وراحت انطتني كنان عبد الله وراحت تسويلي غده

شجان- عبودي تعرف؟  هواي تعذبت بحياتي هواي شفت شغلات مو زينه بحياتي هواي تعبت بحياتي بس ربي عوضني بيك وبأبوك احبك انتَ وأبوك عبد الله اتمنى من ربي ما تتعبني

بقيت الاعبه واجتي كنان اخذت مني عبد الله وخلتلي الاكل على الميز واني جاي اكل دخل علي صهيد

صهيد- عبوديي ويننن

كالها وهو يضحك اخذ عبد الله من كنان وشاله ضل يشتم بي ويبوس بي

صهيد- اهخخ مثل عطر امك يمه وليدي شحلاتهه

كنان- اخذه منك لو تريده

صهيد- لا بقي يمي

كنان- ماشي

طلعت كنان واجه سلم علي وباسني من خدي

صهيد- وأبني؟  ليش ما توكلينه؟ ماما ما توكلك؟ ختولي اخذك يمي اني اداريك يبعد روحه لابوك

شجان- توه شرب حليب والله

صهيد- شلونج؟

شجان- الحمد الله زينه وانتَ شلونك؟ 

صهيد- موزين

استغربت

شجان- ليش بيك شي؟

صهيد - بعيده علي انتِ وعبد الله اني تعلقت بيج وبعدين اجه هاذذ الحلوو صارر روحي الثانيه

مخلي عبد الله بحضنه ويلاعبه رغم عمره بس أيام بس جان يسكت لمن يشيله صهيد لو من يجي يضل بحضنه واذا وخرنا يگوم يبجي

شجان- تريد تاكل وياي؟

صهيد- لا بويه بالعافيه اكلي

كملت الاكل وخليته على صفحه

شجان- صهيد عادي توديني للمغسله

صهيد- أي هسه بس انوم عبد الله

گام يتمشى ويهز بي لحد ما نام واجه علي وداني للحمام غسلت وكملت وطلعت على كيفي

شجان- صهيد

صهيد- شرايين گلبه

شجان- شگد راح ابقى هيج؟

صهيد- 40 يوم هيج وتصيرين زينه

رجعني للغرفه وشال الصينيه. ووداها ورجع

صهيد- محتاجه شي اريد اروح

شجان- جيب حفاضات لعبودي

صهيد- هاي جبتلج وينهن خليتهن يمكن بالجنطه مال عبود

راح للجنطه وشافهن

صهيد- اي ذني تحتاجين شي بعد ؟ راح اروح شهر لبغداد

شجان- هواي

صهيد- اروح وارجع أگاج مخلصه الابعينيه مالتج

شجان- هم صدك

صهيد- تحبين اجيبلج بعد ملابس؟ 

شجان- لا هذني العندي هواي

راح للباب ومد راسه يتأكد محد موجود واجه يمي وباسني من شفتي بقى دقيقة على هل حال ووخر مني ورجع باسني بوسه خفيفه

صهيد- أحبج

شجان- واني اكثر

راح صهيد واني بقيت بالغرفه ضليت أكلب بالتلفون شوي ومليت من التلفون خابرت كنان حتى تجيني

واجتني وگعدت يمي گعدنا نسولف شوي واجتي وراها عمه رقيه هم گعدت تسولف على صهيد وشلون هو جان يشبه عبد الله من جان صغير وبالفعل عبد الله النسخه المصغره من صهيد بس الفرق عبد الله حنطي مو أسمر وعيونه عسليه بس الباقيات يشبه صهيد، مر الشهر وخلصت الابعينيه مالتي وصهيد بقاله بس يومين ويجي صرت عادي اگدر أكوم واگعد

بيوم عبد الله جان يبجي ورحت علي شلته

شجان- ها ماما ها ماما اجيتك حبيبي ليش تبجي

ضليت اهز بي وبعده يبجي گلت يمكن جوعان بس لمن ارضعه يوخر ومايقبل يرضع غيرت حفاظته وسويت كلشي بس هو مستمر يبجي اتصلت على صهيد

صهيد- الو،  ليش عبد الله يبجي!

شُجان- مادري بس يبجي مادري شبي

صهيد- فتحي السبيكر وخلي يمه

فتحت السبيكر وخليت التلفون يم عبد الله وگعد صهيد يحجي وياه والله عاد سكت واني الصارلي ساعه احاول اسكته وبالاخير سكت بس بصوت صهيد

صهيد- عبودي بابا ليش تبجي،  حبيبي،  يومين واجيك يبعد روحي اشتم عطرك المحروم منه شهر شگد مشتاقلك عبودي، عبود مو تتعب ماما لتبجي هواي حبيبي ماشي ؟ أحبك عبد الله

اخذته منه وگعدت احجي وياه شوي وسد الخط بقى عبد الله ساكت عبالك سمع كلام ابوه شلته ورحنا للاستقبال

علوان- عبد الله اهناا تعال جدو جيبي شجان

شجان- توني سكته جان يبجي

علوان- ليش يبجي خاف جوعان

شجان- لا والله بس سمعع صوت ابوه بسرعه سكت

انطيته لجدو علوان شاله وگعد يلعب وياه رحت حتى اساعدهم بالغده

كنان- شجان وين عبود نام؟ 

شجان- شيطان هاذ وين ينام خليته يم جدو علوان

رقيه- سمعته يبجي شبي؟ 

شجان- والله ماعرف بس يبجي

رقيه- خاف بطنه بيها غازات؟ 

شجان- والله ماعرف

سعاد- بالله جيبي خاف ممتون؟ 

رحت واخذته من جدو وانطيته للحجيه شافته وگالت

سعاد- أي ولج هاذ ممتون

رقيه- منو يشيله بعت بس اني وامه وكنان ومرات يشيلونه الولد

سعاد- عادي يمه يمكن انمتن من وحده دجيبيلي الزيت وجيبي الگماط وتعالي

رحت جبت الزيت والگماط ووگعدت تدهنه بالزيت وسوت رجلي وگمطته وخلته على راسها تقرا أيات قرأنيه وبعدين دعبلته على رجلها انطيته حليب مني هداء شوي ونام اخذته خليته بالاستقباب نايم على البروده ورجعت للمطبخ اساعدهم سوينا الغده وكملنا وصبينا واجو الولد كرار ووهبان وسلطان وعمي عباس وجدي علوان گعدو على السفره وگعدنا ناكل بنص الاكل گعد عبد الله گمت من الاكل ورحت شلته وضليت اهدي بي خليته بحضني ورجعت اكل وهو خطيه سكت ماله صوت كمل كرار وراح حتى يغسل ولمن رجع اجه علي

كرار- جيبي اني اخذه مابين تكملين

شجان- تسويلي فضل والله

انطيته عبد الله وهو گعد يلاعبه كرار يحب عبدالله حيل عبالك ابنه ولا عبالك أبن اخوه ووهبان كذالك يحبونه حيل ودائما ياخذونه مني اذا اني اكل وهو گعد هم ياخذونه مني كرار ووهبان ماحسهم حموييني احسهم اخواني واحبهم على معزة صهيد

مرن اليومين واجه صهيد ورجعنا للبيت وصرت اهتم بالبيت وبعبد الله وبصهيد واتضاعف التعب علي

شجان- صهيد ساعدني شوي والله جاي اتعبب

صهيد- مو جاي اساعدج

شجان- اخذ عبد الله جاي يضوجني بس يبجي طلعه برا بس خلي امسح الغرفه

صهيد- امشي حبيبي نروح بعيدد لناسس متريدنااا

شجان- صهيد لتضل تذب بسامير اطلع برا

اخذ عبود وطلعو مسحت الغرفه وعطرتها ورتبت الجربايه وطلعت برا مسحت الممر مال الدرج ونزلت مسحت الدرج ولگيت صهيد وكرار جاي يلاعبون عبودي مخلينه على التخم وواحد يكول للثاني احبه اكثر منك ضحكت ورحتلهم سحبت أبني منهم خطيه لگيته صافن عليهم

شجان- الي يحبه اكثر يروح يساعدني بالتنضيف؟ 

كرار- صهيد انت ومرتك لدخلني بالتنضيف

اخذ كرار مني عبود وراح صعد فوك وصهيد ابتله وساعدني بالتنضيف كملنا ورحت اسبح لمن طلعت طب صهيد يسبح اني سويت شعري ضفيره جان السبلت مشتغل خفت لا اتمرض ولبست شيله عندي لبستها بهل اثناء طلع صهيد من الحمام وانتبه علي باوعت علي وسويت الشيله مثل الثام واضحك علي اقترب مني وخر الشيله من وجهي وتلمس خدي باصابع ايده الخشنه

صهيد-انتِ عذبة شلون دجلة ويمچ تحوم النوارس والله لو كللها بجمالج مايضل الليل دامس الناس حلاها لبسها

وانتِ حليتي الملابس ام عيون العسليه

شجان- يابويه چا كلمن اليتغزل هيج حليو؟ هاي هيهه بعد لحد يتغزل بيه

ضربني بخفه ايده على وجهي

صهيد- طرگاعه ما تصيلج جاره والكفل زينب

شجان- يااا شبيكك

صهيد- يروحلج فدوه جدي وبساتينه

شجان- دعوفه بحاله لا انوب ينگلب علينا يخلينا ما نددل وين نروح

صهيد - مو اگلج طرگاعه ما يصيرلج جاره الفصمه

شجان- هسه شحجيت غير الصدك غير يخلينا ما نندل دربنا وعلي

صهيد- هههه شگد احبج

شجان- اموتت عليكك

ابتسملي وراح حتى يبدل واني نزلت جوه سويت جاي وجان عنده كعك ابو السمسم احبه حيل اخذت الستكاين مال الجاي واخذت ماعون كعك وخليته بالاستقبال نزل صهيد وشافه گعد بصفي وصبيتله جاي وگعدنا نشرب جاي ونسولف لحد ما اجه كرار وهو بيده عبد الله

كرار- الله صبولي وياكم

صبيتله واخذت منه عبود وخليته بحضني وهبان صار يتأخر بالرجعه لان واخيرا لگه وضيفه بعد ما جان يدور واكثر من وضيفه اشتغل بيها وينطرد بس هل مرا لگه وضيفه وثبت بيها وجاي يضغطون علي بالشغل لهاذه لمن يجي يجي متأخر ويجي تعبان وهلكان حيل ، صهيد صار بين شهر وشهر يروح لبغداد لان نقل الشغل المهم للبصره بس علمود يبقى قريب من عدنا وشمس وكرار باقي بس اسبوع على زواجهم واني فرحانه حيل بيهم فرحانه بعائلتي الجديده عبودي وصهيد عبود صار قطعه من روحي وصهيد صار ألي السند بهاي الحياه هو زوجي وحبيبي وأبوي وأمي وصديقي واخوي وكلشي. وكرار ووهبان صارو اخواني وكنان صارت اختي واكثر حبيتهم احب هل عائله منو جان متوقع دخولي الهم المفاجئ هيج راح يغير حياتي وحياتهم؟  اللهم اجعلني احتمي بهم في الدنيا والاخرى، 

____________________ __________________

يتبع …

هلا بنوتاتتتت التصويتت مهمم + انشرو القصه حتى تنشهر اكثرر بنات

قناتي على التلي 👈🏻

احبكم هواييي وشكرا لدعمكم ألي + ضروري تشتركون بقناتي على التلي